དགེ་འདུན་དཀོན་མཆོག

དགེ་འདུན་དཀོན་མཆོག་ནི་རྣམ་དཀར་དགེ་བའི་ལས་ལ་འཇུག་འདོད་ཀྱི་འདུན་པ་དྲག་པོ་ལྡན་པས་ན་དགེ་འདུན་ཞེས་བྱ་སྟེ། དེ་ཡང་འཁོར་བའི་བདེ་བ་ལ་སྐད་ཅིག་ཙམ་ཡང་མི་ཆགས་པར་ཐར་བ་དོན་དུ་གཉེར་འདོད་ཀྱི་ངེས་འབྱུང་དྲག་པོས་ཀུན་ནས་བསླངས་ཏེ་ཁྱིམ་ནས་ཁྱིམ་མེད་པར་རབ་ཏུ་བྱུང་ཞིང་། སངས་རྒྱས་ཀྱིས་གསུངས་པའི་དམ་པའི་ཆོས་རྣམས་ཚུལ་བཞིན་ཉམས་སུ་ལེན་མཁན་ལ་དགེ་འདུན་གྱི་སྡེ་ཟེར། དེ་ཡང་སྤང་བྱ་སྤོང་ནུས་མཁན་གྱི་ད་ལྟ་ང་རང་ཚོའི་རྒྱུད་ལ་སྟོང་ཉིད་རྟོགས་པའི་ལྟ་བ་དང༌། བྱང་ཆུབ་ཀྱི་སེམས་སྐྱེས་ན་ལམ་སེང་སྤང་བྱ་སྤོང་ཐུབ་རྒྱུ་མེད། དེ་རིམ་པས་ནུས་པ་ཆེ་རུ་དང༌། གོམས་འདྲིས་རིམ་གྱིས་ཆེ་རུ་ཕྱིན་པས། སྤང་བྱ་གང་ཡང་རུང་བ་ཞིག་དངོས་སུ་སྤོང་ཐུབ་པའི་ནུས་པ་ཆ་ཚང་ཐོབ་པའི་སྐབས། སྤང་བྱ་སྤོང་བའི་དངོས་ཀྱི་གཉེན་པོར་སྒྲུབ་ཡོང་གི་ཡོད། སྤང་བྱ་གང་ཡང་རུང་བ་ཞིག་སྤོང་བའི་དངོས་ཀྱི་གཉེན་པོ་བྱེད་ཐུབ་པའི་རྟོགས་པའི་ ཡེ་ཤེས་དང་པོ་སྐྱེས་སྐབས་དེར་འཕགས་པའི་དགེ་འདུན་ཞེས་བརྗོད་དོ། །དེ་ལྟ་བུའི་སྤང་བྱ་གང་རུང་སྤོང་ནུས་པའི་གཉེན་པོ་ཡེ་ཤེས་རྒྱུད་ལ་སྐྱེས་ སྐབས་སོ་སྐྱེ་བྱིས་པའི་ས་ལས་འཕགས་ཤིང༌། བྱིས་པ་ལས་གོང་མར་གྱུར་ཞིང༌། དེ་ལས་ཡོངས་སུ་འདས་པའམ་དེ་ལས་ལྷག་པ་རེད། དེར་བརྟེན་འཕགས་པ་ཞེས་པ་འདི་ཁྱད་དུ་འཕགས་པ་ཞེས་པ་དེ་རེད། ཁྱད་དུ་འཕགས་པའམ་གོང་མར་གྱུར་པ། གཞན་ལས་ལྷག་པས་ན་སངས་རྒྱས་ཞེས་པ་འདི། སྤངས་རྟོགས་ཀྱི་ཡོན་ཏན་ཐོག་མ་འགོ་ཚུགས་པའི་སྐབས་དེར་འཕགས་པའི་དགེ་འདུན་ཞེས་པ་དེ་ཆགས་པ་ཡིན། དེ་ལའང་སོ་སོ་སྐྱེ་བོའི་དགེ་དང་འཕགས་པའི་དགེ་འདུན་གཉིས་ཡོད། ཡུན་རིང་བོར་དམ་པའི་ཆོས་བསྒྲུབ་པ་ལ་བརྟེན་ནས་རང་རྒྱུད་ཀྱི་རྟོགས་པ་ཚད་མཐོ་བོར་སླེབས་པའི་དགེ་འདུན་གྱི་རིགས་སྟེ། རིག་པ་ཡེ་ཤེས་རྒྱུད་ལ་སྐྱེས་ཤིང་། གྲོལ་བ་ཉོན་སྒྲིབ་སྤངས་པའི་ཡོན་ཏན་གཉིས་དང་ལྡན་པ་ལ་འཕགས་པའི་དགེ་འདུན་ཞེས་དང་། དེ་ལས་གཞན་པ་ལ་སོ་སོ་སྐྱེ་བོའི་དགེ་འདུན་ཟེར་ཞིང་དེ་དག་ནི་དགེ་འདུན་དཀོན་མཆོག་གོ།