གཙོ་ངོས།

ཡོང་ཁུངས་Wikipedia
Jump to navigation Jump to search

རྩོམ་པ་པོའི་སྔོན་གླེང་། འཕགས་བོད་མཁས་པའི་བསྟི་གནས་ཝཱ་ར་ཎཱ་སི་བོད་ཀྱི་གཙུག་ལག་སློབ་གཉེར་ཁང་ཆེན་པོའི་ནང་ལོ་ཤས་རིང་བསྟན་བཅོས་འཛིན་གྲྭ་ལོ་རིམ་གསུམ་པ་ལ། རྒྱལ་པོ་དགའ་བ་འཕེལ་གྱིས་མཛད་པའི་《ཀླུ་ཀུན་ཏུ་དགའ་བའི་ཟློས་གར་》གྱི་སློབ་ཁྲིད་བྱས་པའི་སྐབས། སློབ་ཚན་ཁྲིད་རིམ་དང་འགྲོགས་ནས་བརྩམས་པའི་《ཀླུ་ཀུན་ཏུ་དགའ་བའི་ཟློས་གར་གྱི་མཆན་དཔྱད་རགས་བསྡུས》ཞེས་པ་འདི་བཞིན་གསར་རྩོམ་དང་འབྲེལ། དབུས་མཐོ་སློབ་སློབ་གཉེར་ཁང་ནས་དཔར་བསྐྲུན་གནང་བར་སྤྲོ་སེམས་འཁོལ་བའི་ངང་ནས་ནས་ཐུགས་རྗེ་ཆེ་ཞུ་རྒྱུ་ཡིན། རྒྱལ་པོ་དགའ་བ་འཕེལ་གྱིས་མཛད་པའི་《ཀླུ་ཀུན་ཏུ་དགའ་བའི་ཟློས་གར》ནི། འཕགས་ཡུལ་གྱི་རྩོམ་རིག་ལོ་རྒྱུས་དང་། བྱུང་བ་བརྗོད་པའི་ལོ་རྒྱུས་གཉིས་ཀར་གལ་ཆེ་རང་བཞིན་ལྡན་པའི་གོ་ས་ངེས་ཅན་ཞིག་བཟུང་ཡོད་ལ། བོད་ཀྱི་སྲོལ་རྒྱུན་རྩོམ་རིག་དང་། ལྷག་དོན་སྙན་ངག་ཆེན་མོའི་རྩོམ་རིག་གི་ཁུངས་དང་མ་ཕྱི་ལྟ་བུ་ཞིག་ཀྱང་ཡིན། རྒྱ་གར་རྩོམ་རིག་ལོ་རྒྱུས་ཁྲོད་གྲགས་ཆེ་བའི་བརྩམས་ཆོས་ཕལ་ཆེ་བར་དཔྱད་བརྗོད་དང་འགྲེལ་བ་ཧ་ཅང་མང་པོ་སྤེལ་ཟིན་ཅིང་། དེ་དག་གི་ཁྲོད་ནས་《ཀླུ་ཀུན་ཏུ་དགའ་བའི་ཟློས་གར》ལའང་དཔྱད་བརྗོད་མང་པོ་སྤེལ་ཡོད་པ་མ་ཟད། 《དགའ་བའི་སྤྱོད་པ》ལྟ་བུས་ཟློས་གར་འཁྲབ་གཞུང་འདིའི་རྩོམ་པ་པོ་དང་རྩོམ་ཆོས་གཉིས་ཀར་འགྲེལ་བརྗོད་རྒྱ་ཆེར་གནང་ཡོད་ལ། དེབ་དེའི་མགོ་བརྗོད་དུ་བརྩམས་ཆོས་འདིའི་ཆེ་བ་དང་ཁ་ཕྱོགས་གསལ་པོ་འགྲེལ་བརྗོད་གནང་ཡོད། དེ་བཞིན་རྒྱ་གར་《ལེགས་སྦྱར་རྩོམ་རིག་ལོ་རྒྱུས》སུའང་འདི་ཉིད་ལ་འབུར་དུ་ཐོན་པའི་དཔྱད་བརྗོད་རབ་དང་རིམ་པ་གསལ་ཡོད། བོད་དུ་གནའ་དང་དེང་གི་མཁས་པ་མི་ཉུང་བ་ཞིག་གིས་《སྙན་ངག་དཔག་བསམ་འཁྲི་ཤིང》དང་། 《རཱ་མ་ཎའི་རྟོགས་བརྗོད》། 《སྤྲིན་གྱི་ཕོ་ཉ》སོགས་བརྗོད་དོན་དང་ཚིག་སྦྱོར་ལ་དཔྱད་བརྗོད་དང་འགྲེལ་བརྗོད་རྒྱས་བསྡུས་ཅི་རིགས་སྣ་ཚོགས་པ་ཤིན་ཏུའང་མང་ཞིང་། ད་དུང་དཔག་བསམ་འཁྲི་ཤིང་ལྟ་བུ་ནི། དགོན་སྡེ་གྲྭ་ཚང་ཁག་དུ་མས་གསོན་ཉམས་ལྡན་ལ་ཡིད་དབང་འཕྲོག་པའི་ལག་རྩལ་ལ་བརྟེན་ནས་སྡེབས་རིས་སུ་ཕབ་པ་ཡང་ཧ་ཅང་མང་མོད། དེ་ལྟ་ནའང་《ཀླུ་ཀུན་ཏུ་དགའ་བའི་ཟློས་གར》འདི་ཉིད་ཟུར་དུ་བཏོན་ནས་འགྲེལ་བརྗོད་དང་དཔྱད་བརྗོད་གནང་མཁན་ལྟ་བུ་སུ་ཡང་བྱུང་མེད་པས། སྟོང་ཆ་ཆེན་པོ་ཞིག་ཁ་བསྐང་བའི་ཆེད་དང་། ལྷག་དོན་མཐོ་སློབ་འདིའི་སློབ་ཚན་དུའང་ཡོད་པ་མ་ཟད། དེ་སྔོན་འཁྲབ་གཞུང་འདི་བཞིན་ཁྲབ་སྟོན་ཡང་གནང་མྱོང་འདུག་པས། འགྲེལ་བརྗོད་དང་དཔྱད་བརྗོད་ཅིག་ཟུར་དུ་དགོས་ངེས་སུ་མཐོང་ནས་བསྒྲིགས་པ་ཡིན། འདི་ཉིད་སྒྲིག་པའི་ཁུངས་བཅོལ་ས་གཙོ་བོ་ནི་རྒྱ་གར་བ་རང་གིས་བྲིས་པའི་ལེགས་སྦྱར་ཐོག་གི་《ཀླུ་ཀུན་ཏུ་དགའ་ཟློས་གར》དང་《དགའ་བའི་སྤྱོད་པ》། དེ་བཞིན་ཧིནྡྷཱིའི་ཐོག་བྲིས་པའི་དགའ་བ་འཕེལ་དང་ཀླུ་ཀུན་ཏུ་དགའ་བའི་ཟློས་གར་གྱི་དཔྱད་བརྗོད་རྣམས་སུ་ཇི་ལྟར་གསལ་བ་རྣམས་དོན་བསྒྱུར་གྱིས་དཔྱད་རྩོམ་འདིའི་མ་ལག་གཙོ་བོ་དེ་བྱས། དེའི་ཐོག་འཁྲབ་གཞུང་རང་གི་ངོ་གདོང་ལ་བལྟས་ནས་ཚིག་འགྲེལ་དང་། འཕགས་བོད་ཀྱི་རྩོམ་པ་པོ་གྲགས་ཅན་མཁས་པ་ཁག་གཅིག་གི་བརྩམས་ཆོས་དང་བསྡུར་ནས་དཔྱད་བརྗོད་མདོར་བསྡུས་རེ་ཡང་ཞུས་ཡོད། དཔྱད་བརྗོད་འདིའི་བརྗོད་གཞི་གོ་རིམ་སྒྲིག་སྟངས་ཐད། དང་པོ། རྩོམ་པ་པོ་རྒྱལ་པོ་དགའ་འཕེལ་གྱི་ལོ་རྒྱུས་ལ་དཔྱད་པ། གཉིས་པ། ཨེ་ཤི་ཡའི་རྩོམ་རིག་བྱུང་བ་སྤྱི་བཤད། གསུམ་པ། རྒྱ་གར་གྱི་ཟློས་གར་རྩོམ་རིག་བྱུང་བ་སྤྱི་བཤད། བཞི་པ། དགའ་བ་འཕེལ་གྱི་རྩོམ་རིག་པ་དཔྱད་པ། ལྔ་པ། སྒྱུ་རྩལ་དང་ཉམས་འགྱུར་པ་དཔྱད་པ། དྲུག་པ། ཤིས་བརྗོད་དང་མཚན་མ་དང་པོའི་ཚིགས་བཅད་རྣམས་ཀྱི་འགྲེལ་བརྗོད། བདུན་པ། ཚིགས་བཅད་གཞན་འགའ་ཞིག་དཔེ་མཚོན་དུ་བགྲངས་པ། བརྒྱད་པ། ཟློས་གར་འདིའི་ཚིག་དོན་གྱི་ཉམས་འགྱུར་གཙོ་བོར་གང་ལ་ལྟོས་པ། དགུ་པ། ཀླུ་ཀུན་ཏུ་དགའ་བའི་ཟློས་གར་བོད་སྐད་དུ་བསྒྱུར་རྗེས་ཀྱི་ཤུགས་རྐྱེན། ཟུར་བཀོལ། ཧརྵ་དང་ཁོང་གི་རྩོམ་རིག་བསྐོར་གྱི་ལོ་རྒྱུས་འབྲི་མཁན་མི་སྣ་གལ་ཆེ་བ་ཁག་གི་ངོ་སྤྲོད་བཅས་ཀྱི་སྒོ་ནས་བསྒྲིགས་པ་ཞིག་ཡིན། དེབ་ཆུང་འདི་བཞིན་ལེགས་གྲུབ་བྱུང་པའི་རྒྱུ་རྐྱེན་གཙོ་བོ་ནི། འཛམ་གླིང་སྤྱི་ཡི་སྐད་ཡིག་རིག་གཞུང་སྣ་ཚོགས་དང་། ལྷག་དོན་གངས་ཅན་པའི་བསྟན་སྲིད་ཆོས་རིག་ཤེས་བྱ་ཀུན་ལ་འཆད་རྩོད་རྩོམ་པའི་བློ་གྲོས་ཀྱི་སྤོབས་པ་མཆོག་ཏུ་དགེ་བ། ཤེས་འཇོན་ནུས་གསུམ་གྱི་ཆ་ལ་གཞན་དྲིངས་མི་འཇོག་པའི་མཁས་པའི་དབང་པོ་པདྨ་ཤྲཱི་དཔལ་ལྡན་ཉེ་བའི་རིགས་བདག་དགེ་བའི་བཤེས་གཉེན་ཆེན་པོ་ངག་དབང་བསམ་གཏན་མཆོག་གིས། བོང་བ་གསེར་གཟིགས་ཀྱིས་དམིགས་བསལ་ཆེ་མཐོང་དང་གཟིགས་པ་རྒྱ་ཆེར་གནང་བའི་འོག ལེགས་སྦྱར་དང་འབྲེལ་བའི་དཔྱད་གཞི་མི་ཉུང་བ་ཞིག་གི་ཐོག སློབ་གླིང་འདིའི་ལོ་ཙཱ་བ་དང་པཎྜི་ཏ་ཆེན་པོ་རྣམ་པར་དྲི་རྨེད་ཡང་ཡང་ཆོག་པ་དང་། རྒྱུན་ལྡན་སློབ་ཁྲིད་སྐབས་སློབ་མ་ཚོས་དམིགས་བསལ་གུས་ཞབས་དང་དགའ་ཚོར་ཆེན་པོ་གནང་གི་ཡོད་པ་བཅས་ཀྱིས། རེ་བ་དང་དམིགས་འབེན་ལ་སེམས་ཤུགས་བསྐྱར་མ་ཞིག་འཕེལ་བ་ལ་བརྟེན་ནས། མི་ཚེའི་ཟང་ཟིང་དང་འབྲེལ་བའི་སྒེར་གྱི་ལས་ཀ་མང་པོ་ཞིག་ཆེ་བཞག་ཆུང་བསྐྱུར་བྱས་ནས། འཛིན་གྲྭའི་ནང་དུ་ངག་ཐོག་ནས་འཁྲིད་པ་རྣམས་ཉིན་མཚན་ནམ་ཁམ་ལ་ཟིན་བྲིས་སུ་བཏབ་ནས་ཕྱོགས་གཅིག་ཏུ་བསྒྲིགས་པ་ལས། དེབ་ཆུང་འདི་ཉིད་ལེགས་གྲུབ་བྱུང་བ་ཞིག་ཡིན། འདི་ཉིད་སྒྲིག་སྟངས་དང་དམིགས་ཡུལ་ཐད། དཔྱད་བརྗོད་འདི་བསྒྲིག་པའི་རྒྱུ་མཚན་ནི་ཀླུ་ཀུན་ཏུ་དགའ་བའི་ཟློས་གར་འདི་གཙུག་ལག་སློབ་གྲྭ་ཆེན་མོ་འདིའི་རྩོམ་རིག་གི་སློབ་ཚན་དུ་བདམས་ཡོད་པ་དང་། ཉེ་སྔོན་ནས་བསྟན་བཅོས་ལོ་རིམ་གསུམ་པའི་འཛིན་གྲྭར་སློབ་འཁྲིད་བྱས་པའི་རྒྱུད་རིམ་ལས། འབྲེལ་ཡོད་མཐོ་སློབ་ཀྱི་སློབ་མ་ཚོར། འདི་ལས་འཕྲོས་ནས་བོད་ཀྱི་རྩོམ་རིག་གི་བྱུང་རིམ་དང་ཁ་ཕྱོགས། རྣམ་གྲངས། བརྗོད་ལུས། ཉམས་འགྱུར། མཛེས་བཀོད། ལྷག་དོན་སརྒས་བཅིངས་པའི་སྙན་ངག་ཆེན་པོའི་མཚན་ཉིད་ལྡན་པའི་རྩོམ་རིག་འབྲི་ཚུལ་བཅས་ལ་ཕན་ཐོགས་ངེས་ཅན་ཞིག་ཡོང་ཐུབ་ན་སྙམ་ནས། སློབ་ཁྲིད་སྐབས་ངག་ཐོག་ནས་བཤད་པ་རྣམས་དུས་ཀྱི་ཁོམ་པ་དང་བསྟུན་ནས་ཟུར་བྲིས་དང་ཚིག་ཐོ་ཐ་རེ་ཐོ་རེ་བཀོད་པ་རྣམས་ཕྱོགས་གཅིག་ཏུ་བསྡེབས་ནས་བསྒྲིགས་པ་ཡིན། དཔྱད་བརྗོད་འདི་ཉིད་བསྒྲིགས་པའི་དམིགས་ཡུལ་ནི། དུས་རབས་ཉེར་གཅིག་པའི་བོད་རིགས་གཞོན་སྐྱེས་ཚོས་དུས་རབས་ཀྱི་འཁྲུག་ཆ་དོད་པའི་ཚོར་སྣང་ལས་ལོགས་སུ། རིན་ཐང་གཞལ་དུ་མེད་པའི་གནའ་རབས་ཀྱི་རྩོམ་སྲོལ་རྩ་ཆེའི་ནོར་བུ་དང་འདྲ་བ་འདི་རིགས་ཀྱི་རིན་ཐང་ཤེས་ཆེད་དང་། ཤེས་པ་ཙམ་དུ་མི་བསྡད་པར་རྩོམ་ལུས་འདིར་དུས་རབས་ཀྱི་རྐང་རྗེས་ཟིན་པའི་རྩོམ་རྩལ་གྱི་མ་ལག་ཚང་གི་ཡོད་པ་དེ་ར་སྤྲོད་གཏོང་ཐབས་དང་། གནའ་རྩོམ་གྱི་མ་ལག་ལ་ཞན་ཆ་དང་སྟོང་ཆ་རེ་གཉིས་ཡོད་པ་དེ་དག་ཁ་བསབ་བཟོ་ཐབས་ཀྱི་འཛུབ་སྟོན་ཆུང་ཆུང་ཞིག་གི་རེ་བ་བྱས་ནས་སྒྲིག་པ་ཞིག་ཡིན། སྡུག་ཡས་ཉུང་ཉུང་ཞིག་བཤད་འདོད་པ་ནི། དེང་སང་བརྟན་ལྷིང་གི་རང་བཞིན་མི་ལྡན་པའི་དུས་བབ་ཟང་ཟིང་འདིའི་ནང་། རིགས་མཐུན་ཕལ་པོ་ཞིག་རྩྭ་སྔོ་ས་དང་དུ་དྭངས་སར་འཚང་ཀ་བརྒྱབ་ཏེ་གོ་སྐབས་རག་པ་དང་། ཕྱིར་མི་ཟློག་པ་ཕྱིར་མི་འོང་བའི་ལམ་སྣེ་བཙལ་དང་འཚོལ་བཞིན་པའི་སྐབས་འདིར། ཨ་རི་གཙོས་པའི་ནུབ་ཕྱོགས་འབྱོར་ལྡན་རྩེ་ཏོག་གི་རྒྱལ་ཁབ་བཅུ་ཕྲག་ལ་ཐེངས་མང་རྒྱུ་བའི་གོ་སྐབས་རག་པར་མ་ཟད། ཨ་རི། ཁེ་ཎ་ཊ། དབྱིན་ལོན་གསུམ་ཀར་མཐའ་མའི་དུར་འཇུག་བྱེད་སའི་གོ་སྐབས་ཡག་ཤོས་དེ་རག་ཅིང་། སྐྱིད་མ་སྡུག་གི་མི་ཚེ་འདིར་གྲྭ་རྐྱང་གཞན་དང་བསྡུར་ན་ཅི་ས་གང་ཐད་ནས་གོ་སྐབས་དང་གནས་བབ་ཆེས་ལེགས་པར་ཐོབ་ནའང་། གང་ཟག་ཕལ་བ་སུ་ཞིག་ལ་ངོ་སོ་ཡོད་མེད་ལ་མ་ལྟོས་པར་བློས་བཏང་ཆེན་པོ་བྱས་ནས། ༸གོང་ས་ཐམས་ཅད་མཁྱེན་པ་དང་། རྒྱལ་མཆོག་ཀརྨ་པ་རིན་པོ་ཆེ། ཟམ་གདོང་མ་ཧཱ་པཎྜིཏ་གསུམ་གྱི་བཀའ་སློབ་ལམ་སྟོན་ལ་གཞི་བཅོལ་ནས། མི་ཚེ་རིང་པོ་སྐྱིད་གསུམ་སྡུག་གསུམ་དང་། དཔྱིད་ཉིན་རིང་པོ་དྲོ་གསུམ་གྲང་གསུམ་གྱི་རྒྱུད་ལམ་ཁྲོད། ཕོག་ཐོབ་དང་གོ་གནས་གང་ལའང་ཞེན་ཆགས་མ་བྱས་པར། ཡབ་ཆེན་མཁས་དབང་དམ་པ་དང་དགེ་བའི་བཤེས་གཉེན་དམ་པ་ཚོའི་བཀའ་དྲིན་འོག སྐྱེས་སྦྱངས་གོམས་པའི་བག་ཆགས་ཆུ་ཐིགས་ཙམ་ཞིག་མཆིས་པ་དེ་ཉིད་ཆེས་ཉག་ཕྲ་བའི་འགག་ལ་གནས་པའི་མི་རིགས་འདིའི་སྲོག་རྩར་ཅུང་ཟད་ཕན་རེ་ཁོ་ན་བཅངས་ནས། བག་མེད་རྒྱས་སྤྲས་དང་འགན་མེད་རྩེད་འཇོས་ལུས་སེམས་སྤྲོ་བའི་སྐྱིད་པོ་ཉི་མ་གཅིག་ཀྱང་གཏོང་རྒྱུ་མ་བྱུང་བ་མ་ཟད། ད་དུང་སྟབས་མ་ལེགས་པར་ཞིག་ལ་གཞིས་ཁྱིམ་དུའང་སྲིད་འབྱོར་གཉིས་ཀའི་ཐོག་ནས་དཀའ་ངལ་རབས་དང་རིམ་པར་འཕྲད་པར་དངུལ་དང་དངོས་པོའི་རོགས་ཕན་བཟོ་རྒྱུའི་ཆ་རྐྱེན་ཆེན་པོ་གང་ཡང་སྐྲུན་མ་ཐུབ་སོང་། ལས་དབང་མགོ་ཐོག་ཏུ་ཁུར་ནས། ཁ་ལ་དཔོག་ཚད་ཀྱི་སོ་དང་། ལུས་ལ་རན་ཚད་ཀྱི་གོས་ཀྱི་དཔེ་ལྟར། རང་གི་འཇོན་ཚད་ཀྱིས་འཆི་ལ་ཉེ་བའི་མི་རིགས་ཤིག་གི་སྲོག་རྩ་ལ་སྐད་ཡིག་རིག་གཞུང་གི་ཟུངས་ཁྲག་སྣོན་པ་ཐིགས་པ་རེ་གཉིས་ཙམ་ཞིག་བྲན་རྒྱུ་ཁོ་ནར་དམིགས་ནས། མཁས་པའི་ཕུགས་མདུན་དང་ལྐུགས་པའི་ཨུ་ཚུགས་གང་ཡིན་མ་ཆ་ཡང་། དམ་བཅའ་བརྟན་སྲུང་གིས་ཚ་བ་ལུང་པའི་ནང་རྩོམ་འབྲི་དང་སློབ་ཁྲིད་ཀྱི་ལས་ལ་ཞུགས་པའི་གྲུབ་དོན་ལས། དེབ་ཆུང་འདི་ཉིད་གྲུབ་དོན་གྱི་ཆ་ཤས་ཆུང་ཆུང་ཞིག་ཏུ་བགྲང་ནའང་འགྲིགས་སྙམ། རང་གི་རིགས་ལ་ཞེན་པ་དཀར་ཞིང་། རང་གི་སྐད་ཡིག་ལ་དམ་འཛིན་གནང་མཁན་དང་། ལྷག་དོན་བོད་ཀྱི་རྩོམ་རིག་ལ་དོ་སྣང་གནང་མཁན་ཞིག་ཡིན་ཕྱིན་དེབ་ཆུང་འདི་ཚོ་ལ་ངེས་པར་དུ་ཞིབ་གཟིགས་གནང་རོགས། འཛམ་གླིང་ཤར་ནུབ་ཀྱི་རྩོམ་རིག་རིགས་པའི་གཞུང་ལུགས་ནི། ཧ་ཅང་གཞི་རྒྱ་ཆེ་ལ་གཏིང་ཟབ་ལྡན་པའི་རང་བཞིན་ཅན་ཞིག་ཡིན་པ་ལྟར། རང་རེ་བོད་ཀྱི་རྩོམ་རིག་ཀྱང་ལོ་རྒྱུས་ཀྱི་རང་བཞིན་ལྡན་ལ། སྒྱུ་རྩལ་གྱི་ཁྱད་ཆོས་འབུར་བ། རྣམ་གྲངས་ཀྱི་སྤུ་རིས་བཀྲ་བ། མཛེས་རྟོག་གི་ཚོར་འདུ་སླ་བའི་ཁྱད་པར་དུ་མའི་རང་བཞིན་ལྡན་པས། ཞིབ་ཚའི་བཤད་པ་ནི་མི་རིགས་འདིར་བཀའ་དྲིན་བླ་ལྷག་ཏུ་ཆེ་བའི་རྒྱ་གར་དབུས་གཞུང་གིས་མཐུན་འགྱུར་ཆ་ཚང་གནང་བའི་འོག གཙུག་ལག་སློབ་གྲྭ་ཆེན་མོར་ད་ལྟར་འབྲི་བཞིན་པའི་《བོད་ཀྱི་རྩོམ་རིག་ལོ་རྒྱུས》ཞེས་པར་གང་ཤེས་ཅི་ཤེས་ཀྱིས་གསལ་བར་བཀོད་ཡོད་མོད། འདི་ནི་དེ་དག་གི་ཁ་ཕྱོགས་མཛུབ་མོ་རི་སྟོན་ཙམ་ཞིག་ཡིན་པ་ཡང་མཁྱེན་དགོས། རྩོམ་རིག་དེབ་ཆུང་འདི་ཉིད་ཀྱི་ནང་དུ་བཤད་པ་ནོར་བ་དང་མ་བཤད་པ་དང་ལོག་པར་བཤད་པའི་རིག་གང་ཞིག་མཆིས་ནའང་། མཁས་པའི་མདུན་སར་འཐོལ་བཤགས་འབུལ་རྒྱུ་དང་། ལེགས་ཆ་ཆུང་ཟད་རེ་འཆིས་ན་མེ་ཏོག་ཆུང་ཡང་ལྷ་རྫས་ཀྱི་དཔེ་ལྟར་མཆོད་པའི་ཚུལ་དུ་བཞེས་རོགས་ཞེས་ཞུ་རྒྱུ་ཡིན། མཐའ་དོན། སྲིད་ཞིའི་རྣམ་འདྲེན་༸གོང་ས་རྒྱལ་དབང་ཐམས་ཅད་མཁྱེན་པའི་སྐུ་ཚེ་བསྐལ་པ་བརྒྱ་ཕྲག་བར་ཏུ་བརྟན་པ་དང་བྱམས་བརྩེའི་ཐུགས་ཀྱི་གཞེད་པ་མཐའ་དག་ལྷུན་གྱིས་འགྲུབ་ཅིང་། གཞིས་བྱེས་མཉམ་དུ་འཛོམས་པའི་བཀྲ་ཤིས་དགའ་སྟོན་གྱི་ཉིན་མོ་མྱུར་བར་འཆར་བའི་སྨོན་འདུན་ཞུ། སྲིད་འབྱོར་ནོར་གྱིས་ཁང་ཆེན་མ་བསྐྲུན་ཞིང་།། སྟོབས་དང་གོ་སའི་ཁྲི་ལ་མ་རྔམས་པར།། སྐྱེས་སྦྱངས་གོམ་པས་ས་ཆེན་སྒུལ་བ་ཡི།། རིག་པའི་རྐང་རྗེས་དཀར་ཤོག་ཐོག་ཏུ་ཕབ།། གུས་འདུད་བཅས་དབུས་འགྱུར་རྒྱ་གར་འཕགས་པའི་ཡུལ་གྱི་གྲོང་ཁྱེར་རྙིང་ཤས་ཆོས་དང་རིག་པའི་གནས་ཀྱི་བསྟི་གནས་ཀ་ཤིའི་གྲོང་མཐའ་ཝཱ་ར་ཎཱ་སི་བོད་ཀྱི་གཙུག་ལག་སློབ་གཉེར་ཁང་གི་རྩོམ་རིག་སྡེ་ཚན་ནས་བེ་རི་དགེ་བཤེས་འཇིགས་མེད་དབང་རྒྱལ་བས། སྤྱི་ལོ2017/5/1/ ཉིན་ལ་བྲིས།