ཁ་ཏར།

ཡོང་ཁུངས་Wikipedia
Jump to navigation Jump to search

ཁ་ཏར་(دولة قطر)ནི་ཨེ་ཤེ་ཡ་ཡི་རྒྱལ་ཁབ་ཞིག་རེད། དེའི་རྒྱལ་ས་ནི་དྷོ་ཧ་རེད། གཞན་ནས་ལོ་ཙཱ་བྱེད་ལུགས་ཀྱི་དབང་དུ་ཕྱིན་ནས་མིང་ལ་ཁ་ཐར་ཡང་འབོད་དོ།

ཁ་ཐར་རྒྱལ་ཁབ་ནི་ཨེ་ནུབ་ཏུ་ཆགས་པའི་རང་བཙན་གཙང་མའི་རྒྱལ་ཁབ་ཅིག་ཡིན་ལ། ཨ་རབ་ཕྱེད་གླིང་ཕྲན་གྱི་བྱང་ཤར་མཚོ་ངོགས་སུ་ཡོད་པའི་ཁ་ཐར་གླིང་ཕྲན་ཆུང་ཆུང་བདག་ཏུ་བཟུང་ཡོད། ཁ་ཐར་རྒྱལ་ཁབ་ཀྱི་ས་སྟེང་ས་མཚམས་གཅིག་པུ་དེ་ལྷོ་ཕྱོགས་སུ་ས་དི་ཨ་རབ་དང་འབྲེལ་ཡོད་པ་ལས། དེ་བྱིངས་མངའ་ཁོངས་རྣམས་ཕིར་ཞི་ཡའི་མཚོ་ཁུག་གིས་མཐའ་བསྐོར་ཡོད། ཕིར་ཞི་ཡའི་མཚོ་ཁུག་གི་ཆུ་ལམ་དོག་མོ་ཞིག་གིས་ཁ་ཐར་དང་ཉེ་འཁྲིས་ཀྱི་བྷ་རེན་གླིང་ཕྲན་རྒྱལ་ཁབ་གཉིས་ཁ་ཁར་ཕྱེ་ཡོད་པ་དང། ཨ་རབ་དང་ཨི་རན་ལྷན་དུ་ཡང་མཚོ་ཐོག་ས་མཚམས་མཉམ་སྤྱོད་བྱེད་ཀྱིན་ཡོད།

ལོ་རྒྱུས།[རྩོམ་སྒྲིག]

ཨོ་དོ་མན་དབང་སྒྱུར་གྱི་རྗེས་ཏེ་དུས་རབས༢༠པའི་དུས་སྟོད་ནས་སྤྱི་ལོ༡༩༧༡ལོར་རང་བཙན་ཐོབ་རག་བར། ཁ་ཐར་དབྱིན་ཇིའི་སྲུང་སྐྱོབ་ས་ཁུལ་ཞིག་ཏུ་གྱུར། དུས་རབས༡༩པའི་དུས་སྟོད་ནས་བཟུང་། ཐཱ་ནི་རིགས་རྒྱུད་ཀྱིས་ཁ་ཐར་དབང་བསྒྱུར་བ་དང་། ཁ་ཐར་རྒྱལ་ཁབ་གསར་འཛུགས་གནང་མཁན་ནི་མགོ་དཔོན་ཇཱ་སིམ་བྷེན་མོ་ཧཱ་མེད་ཨལ་ཐཱ་ནི་ཡིན།ཁ་ཐར་གསར་འཛུགས་གནང་མཁན།(Sheikh Jassim bin Mohammed Al Thani) ཁ་ཐར་ཕ་ཤུལ་བུ་འཛིན་གྱི་རྒྱལ་པོའི་སྲིད་དབང་ཞིག་ཡིན་ལ། ཚོ་དཔོན་དཱ་མེམ་བྷེན་ཧཱ་མེད་ཨལ་ཐཱ་ནི་རྒྱལ་ཁབ་ཀྱི་འགོ་གཙོ་ཡིན། རྩ་ཁྲིམས་རྗེས་མཐུན་གྱི་རྒྱལ་པོའི་སྲིད་དབང་ངམ་རྒྱལ་པོའི་སྲིད་དབང་རྣལ་མ་གང་ཞིག་ཡིན་མིན་མི་རེ་རེའི་བསམ་ཚུལ་ལ་རག་ལས་ཡོད། སྤྱི་ལོ༢༠༠༣ལོར། མང་མོས་འོས་བསྡུ་ཞིག་གི་ནང་ཧ་ལམ་རྒྱབ་སྐྱོར་བ་བརྒྱ་ཆ༩༨བྱུང་སྟེ། རྩ་ཁྲིམས་ལ་ངོས་ལེན་ཧ་ཅང་ཆེན་པོ་ཐོབ། སྤྱི་ལོ༢༠༡༧ལོའི་འགོ་སྟོད་དུ། ཁ་ཐར་གྱི་མི་འབོར་ཧྲིལ་བོ་ལ་ས་ཡ༢.༦ཡས་མས་ཡོད་པ་དང་། དེ་གྲས་ཀྱི་མི༣༡༣༠༠༠ཁ་ཐར་གྱི་མི་སེར་ཡིན་ལ། ས་ཡ༢.༣ཡུལ་བྱོལ་པ་ཡིན།

རང་བྱུང་ཐོན་ཁོངས།[རྩོམ་སྒྲིག]

ཁ་ཐར་ལ་འཛམ་གླིང་གི་རང་བྱུང་རླངས་གཟུགས་གསོག་འཇོག་དང་སྣུམ་གསོག་འཇོག་ཆེ་ཤོས་གསུམ་པ་ཡི་རྒྱབ་རྟེན་ཡོད་པར་བརྟེན། དཔལ་འབྱོར་གྱི་ཡོང་འབབ་མཐོ་ལ་ཡར་རྒྱས་ཕྱིན་ཚར་བའི་རྒྱལ་ཁབ་ཅིག་ཡིན། འཛམ་གླིང་སྟེང་གི་མི་རེའི་ཡོང་འབབ་མཐོ་ཤོས་དེ་ཡིན། མཉམ་འབྲེལ་རྒྱལ་ཚོགས་ཀྱིས་ཁ་ཐར་མིའི་རིགས་ཡར་རྒྱས་ཧ་ཅང་ཆེ་བའི་རྒྱལ་ཁབ་ཀྱི་གྲལ་རིམ་དུ་བཞག་པ་དང་།  མིའི་རིགས་ཡར་རྒྱས་ཆེས་ཡར་ཐོན་ཅན་གྱི་ཨ་རབ་རྒྱལ་ཁབ་དེ་ཡིན།  ཨ་རབ་རྒྱལ་ཁབ་རྣམས་ཀྱི་ཁྲོད་ནས། ཁ་ཐར་གལ་གནད་ཅན་གྱི་རྒྱལ་ཁབ་ཅིག་ཡིན་ཏེ། ཨ་རབ་གསར་བརྗེའི(Arab Spring)དུས་ཟིང་སྐབས་སུ། མ་རྩའི་འགྲོ་གྲོན་བཏང་བ་དང་འཛམ་གླིང་ལ་ཁྱབ་པའི་གསར་འགྱུར་བརྒྱུད་ལམ་ཨལ་ཇཱ་ཙི་ར་གསར་འགྱུར་དྲ་བ(Al Jazeera Media Network)བརྒྱུད་ནས་ངོ་རྒོལ་ཚོགས་པ་དུ་མ་ལ་རམ་འདེགས་བྱས། ས་ཁྱོན་གྱི་ཆ་ནས་བཤད་ན། ཁ་ཐར་གྱིས་འཛམ་གླིང་སྟེང་ཆ་མི་མཚུངས་པའི་ཤུགས་རྐྱེན་བཞག་པ་དང་། སྟོབས་ཤུགས་འབྲིང་ཙམ་གྱི་རྒྱལ་ཁབ་ཅིག་ཏུ་ངོས་བཟུང། ཁ་ཐར་གྱིས་སྤྱི་ལོ༢༠༢༢ལོའི་ཧྥི་ཧྥ་འཛམ་གླིང་གཟེངས་རྟགས(2022 FIFA World Cup)ལ་གཙོ་སྐྱོང་བྱ་རྒྱུ་ཡིན་པ་དང་། དེ་ལྟར་སྒྲུབ་མཁན་གྱི་ཨ་རབ་རྒྱལ་ཁབ་ཐོག་མ་དེར་འགྱུར་རྒྱུ་རེད།

སྲིད་དབང་ལམ་ལུགས།[རྩོམ་སྒྲིག]

ཁ་ཐར་རྩ་ཁྲིམས་རྗེས་མཐུན་གྱི་རྒྱལ་པོའི་སྲིད་དབང་ངམ་རྒྱལ་པོའི་སྲིད་དབང་རྣལ་མ་ཞིག་ཡིན་མིན་གང་ལྟར་ཡང་ཨལ་ཐཱ་ནི་ཁྱིམ་རྒྱུད་ཀྱིས་དབང་བསྒྱུར་ཡོད། སྤྱི་ལོ༡༨༢༥ལོར་ཁྱིམ་རྒྱུད་རིགས་རྒྱུད་འདི་གསར་འཛུགས་བྱས་པ་ནས་བཟུང་། ཨལ་ཐཱ་ནི་རྒྱལ་རབས་ཀྱིས་ཁ་ཐར་དབང་སྒྱུར་བྱེད་ཀྱིན་ཡོད། སྤྱི་ལོ༢༠༠༣ལོར། ཁ་ཐར་གྱིས་རྩ་ཁྲིམས་ཤིག་གཏན་ལ་ཕབ་པ་དང་། རྩ་ཁྲིམས་དེ་ལ་མང་མོས་འོས་བསྡུའི་ནང་ངོས་ལེན་ཆེན་པོ་ཐོབ།

ཁ་ཐར་གྱི་ཚོ་དཔོན་བདུན་པ་བ་དཱ་མེམ་བྷན་ཧཱ་མེད་ཨལ་ཐཱ་ནི་ཡིན། ཁོང་གི་ཡབ་ཧཱ་མེད་བྷེན་ཀ་ལི་ཧྥ་ཨལ་ཐཱ་ནི་ཡིས་སྤྱི་ལོ༢༠༡༣ལོའི་ཟླ༦ཚེས༢༥ཉིན་ཁོ་ལ་དབང་ཆ་སྤྲད། ཁ་ཐར་གྱི་ཆེས་མཐོའི་ཁྲིམས་དཔོན་ལ་སྲིད་བློན་དང་བཀའ་ཤག་བློན་ཆེན་རྣམས་བསྐོ་བཞག་དང་གནས་དབྱུང་གཏོང་པའི་འཛིན་སྐྱོང་དབང་ཚད་ཡོད། བློན་ཆེན་རྣམས་ཀྱིས་ལྷན་དུ་བློན་ཆེན་ལྷན་ཁང་གྲུབ་ཡོད་ལ། དེ་ནི་རྒྱལ་ཁབ་ཀྱི་ཆེས་མཐོའི་འཛིན་སྐྱོང་ལྷན་ཁང་ཡིན། བློན་ཆེན་ལྷན་ཁང་གིས་ཁྲིམས་བཟོ་བའི་འགོ་ཡང་བཙུགས། ཁོ་ཚོས་གྲོས་འཆར་བཏོན་པའི་ཁྲིམས་ལུགས་དང་བཅའ་ཁྲིམས་རྣམས་སློབ་སྟོན་ལྷན་ཁང་ལ་ཕུལ་ནས་གྲོས་བསྡུར་བྱེད། དེའི་རྗེས་སུ་ཚོ་དཔོན་གྱི་སྙན་ལམ་དུ་ཕུལ་ནས་གཏན་འབེབས་བྱེད་དུ་འཇུག སློབ་སྟོན་ལྷན་ཚོགས་ཀྱིས་ཁྲིམས་ལུགས་ཟིན་བྲིས་འགོད་པ་དང་ངོས་ལེན་བྱེད་པའི་ཁྲིམས་བཟོ་དབང་ཆ་ལ་ཚད་ཡོད། ཡིན་ན་ཡང་། ཚོ་དཔོན་ལ་དོན་ཡོད་ཚད་ཀྱི་མཐའ་མའི་ཐག་གཅོད་ཐོབ་ཐང་ཡོད། ད་ལྟའི་ལྷན་ཁང་ནི་ཚོ་དཔོན་གྱིས་བསྐོ་བཞག་གནང་བའི་ཚོགས་མིས་ཡོངས་སུ་རྫོགས་པར་གྲུབ་པ་ཞིག་ཡིན། རྒྱུ་མཚན། སྤྱི་ལོ༡༩༧༠ལོར་གཞུང་གཙོ་བོར་ཆ་ཤས་འོས་བསྡུ་ཡོད་པ་ནས་བཟུང་། ཁྲིམས་བཟོ་འོས་བསྡུ་བྱེད་མཚམས་བཞག སྤྱི་ལོ༢༠༡༦ལོར་ཁྲིམས་བཟོ་འོས་བསྡུ་བྱེད་པའི་རེ་བ་བཅངས་ཡོད།ཁ་ཐར་གྱི་ཁྲིམས་ལུགས་ནང་ཆབ་སྲིད་ཚོགས་པའམ་ཚོང་ལས་མཉམ་འབྲེལ་རྩ་འཛུགས་བྱེད་པར་ཆོག་མཆན་མེད།

ཁ་ཐར་གྱི་རྩ་ཁྲིམས་གཞིར་བཟུང་ན། ཁ་ཆེའི་ཆོས་ལུགས་ཀྱི་ཁྲིམས་ལུགས་ནི་ཁ་ཐར་གྱི་ཁྲིམས་བཟོའི་འབྱུང་ཁུངས་གཙོ་བོ་དེ་ཡིན། ལག་ལེན་གྱི་ཁྲོད་དུ་སྤྱི་དམངས་ཁྲིམས་ལུགས་དང་ཁ་ཆེའི་ཆོས་ལུགས་འདྲེས་མ་བེད་སྤྱོད་པ་ནི་ཁ་ཐར་གྱི་ཁྲིམས་མཐུན་ལམ་ལུགས་ཡིན། ཁྱིམ་རྒྱུད་གྱི་ཁྲིམས་དང་རྒྱུད་འཛིན། ཁྲིམས་འགལ་བྱ་བ(ལོག་གཡེམ་དང་འཕྲོག་བཅོམ། ལྐོག་གསོད་འདུ།)སོགས་ལ་འབྲེལ་བ་ཆགས་པའི་ཁྲིམས་ལུགས་ཐོག་ཁ་ཆེའི་ཆོས་ལུགས་ཀྱི་ཁྲིམས་བེད་སྤྱོད་བྱེད། ཁ་ཆེའི་ཆོས་ལུགས་ཀྱི་ཁྲིམས་རྨང་བྱས་པའི་ཁྱིམ་རྒྱུད་ཁྲིམས་ཁང་གི་གནད་དོན་ཁ་ཤས་ནང་བུད་མེད་ཀྱི་བདེན་དཔང་ལ་སྐྱེས་པའི་བདེན་དཔང་གི་རིན་ཐང་གི་ཕྱེད་ཀ་ཡོད། སྤྱི་ལོ༢༠༠༦ལོར། བཅའ་ཁྲིམས་སུ་བཀོད་པའི་ཁྱིམ་རྒྱུད་ཀྱི་ཁྲིམས་ལུགས་མཚམས་སྦྱོར་བྱས་པ་དང་། རྒྱལ་ཁབ་ཀྱི་ནང་ཁྱོ་གཅིག་བཟའ་མང་ལམ་སྲོལ་ལ་ངོས་ལེན་བྱུང་།

ཁ་ཐར་རྒྱལ་ཁབ་ནང་ཆང་རག་འཛད་སྤྱོད་དང་བཀག་རྒྱ་དང་འགལ་བའི་འཁྲིག་སྤྱོད་འབྲེལ་བ་ལ་ཁྲིམས་ཆད་གཅོད་པར་ལྕག་ཚན་གཞུ་བ་ལག་ལེན་ཏུ་བསྟར་གྱིན་ཡོད། ཁ་ཐར་གྱི་ནག་ཉེས་བཅའ་ཁྲིམས་གྱི་དོན་ཚན༨༨པའི་ནང་། ལོག་གཡེམ་ལ་ལྕག་ཚན༡༠༠གཞུ་བའི་ཁྲིམས་ཆད་ཡོད་པར་བཤད། སྤྱི་ལོ༢༠༠༦ལོར། ཧྥི་ལི་ཕིན་གྱི་བུད་མེད་ཅིག་ལ་ལོག་གཡེམ་ཆེད་ལྕག་ཚན༡༠༠ཡི་ཉེས་ཆད་བཅད། སྤྱི་ལོ༢༠༡༤ལོའི་ཟླ༦པའི་ནང་། ཡུལ་བྱོལ་པ་ཁ་ཆེ་ཞིག་ལ་ཆང་རག་འཛད་སྤྱོད་བྱས་པ་དང་ར་བཟི་བའི་གནས་སྟངས་འོག་རླངས་འཁོར་བསྐོར་བར་ལྕག་ཚན༤༠ཡི་ཉེས་ཆད་བཅད། ཁ་ཐར་ནང་ཁ་ཆེའི་ཆོས་ལུགས་ཀྱི་ནང་ཚན་ཧན་བྷ་ལི་ཁྲིམས་ལུགས་ལག་བསྟར་བྱེད་པའི་རྒྱུ་མཚན་གྱིས། ཁྲིམས་ཁང་གི་ལུས་ཐོག་ཉེས་ཆད་ནི་རྒྱུན་ལྡན་གྱི་སྣང་ཚུལ་ཞིག་ཡིན། ཁ་ཐར་རྒྱལ་ཁབ་ནང་རྡོས་རྡེག་པའི་ཉེས་ཆད་ནི་ཁྲིམས་མཐུན་གྱི་ཁྲིམས་ཆད་ཅིག་ཡིན། དད་ལོག་བྱེད་པ་ནི་སྲོག་ཐོག་ཉེས་ཆད་གཏོང་འོས་པའི་ནག་ཉེས་ཤིག་ཡིན། ཆོས་ལུགས་ལ་སྨད་ར་གཏོང་བར་བཙོན་འཇུག་ལོ་བདུན་དང་ཆོས་ལུགས་བརྗེ་བསྒྱུར་ལ་བཙོན་འཇུག་ལོ་བཅུ་ཡི་ཉེས་པ་ཡོད། མཚན་མཐུན་འཁྲིག་སྦྱོར་ནི་སྲོག་ཐོག་ཉེས་ཆད་བྱེད་འོས་པའི་ནག་ཉེས་ཤིག་ཡིན། ཁ་ཐར་ནང་ཆང་རག་འཛད་སྤྱོད་བྱེད་པ་ཆ་ཤས་ཙམ་གྱིས་ཁྲིམས་མཐུན་ཡིན་ཏེ། སྐར་མ་ལྔ་རྟགས་ཅན་གྱི་རྒྱས་སྤྲོས་མགྲོན་ཁང་རྣམས་ཀྱིས་ཁ་ཆེ་པ་མ་ཡིན་པའི་ཚོང་མགྲོན་ལ་ཆང་རག་འཚོང་ཆོག ཡིན་ནའང་། ཁ་ཆེ་པ་རྣམས་ཀྱིས་ཁ་ཐར་ནང་ཆང་རག་འཛད་སྤྱོད་བྱ་མི་ཆོག གལ་ཏེ་ཆང་རག་འཛད་སྤྱོད་བྱེད་པ་མཐོང་བ་ཡིན་ན་ལྕག་ཚན་གཞུ་བའམ་རྒྱང་འབུད་གཏོང་པའི་ཉེས་ཆད་ཡོད། ཁ་ཆེ་པ་མ་ཡིན་པའི་ཡུལ་བྱོལ་པ་རྣམས་ཀྱིས་སྒེར་གྱི་འཛད་སྤྱོད་ཀྱི་ཆེད་དུ་ཆང་རག་ཉོ་བའི་ཆོག་མཆན་རག་ཐུབ། ཁ་ཐར་ཁྱབ་སྤེལ་སྤྱི་གཉེར་ཁང་ལ་ཆང་རག་དང་ཕག་ཤ་ནང་འདྲེན་བྱེད་པའི་ཆོག་མཆན་ཡོད་པ་དང་། སྤྱི་གཉེར་ཁང་འདི་ཡིས་རྒྱལ་ཁབ་ནང་ཨ་རག་ཚོང་ཁང་གཅིག་ཁོ་ན་དེ་གཉེར་ལ། ཨ་རག་ལག་འཁྱེར་ཡོད་མཁན་ལ་ཕག་ཤ་ཡང་འཚོང་། ཉེ་དུས་བར་དུ། ཁ་ཐར་མུ་ཏིག(Pearl-Qatar རྒྱལ་ས་དྷོ་ཧའི་ཉེ་འཁྲིས་ཀྱི་མིས་བཟོས་གླིང་ཕྲན་ཞིག)གླིང་ཕྲན་དུ་ཡོད་པའི་ཟ་ཁང་རྣམས་ཀྱིས་ཆང་ཪག་རིགས་ཀྱི་བཏུང་བྱ་འཚོང་ཆོག་གིན་ཡོད། ཡིན་ནའང་། སྤྱི་ལོ༢༠༡༡ལོའི་ཟླ༡༢པའི་ནང་། དེར་ཡོད་ཟ་ཁང་རྣམས་ལ་ཆང་རག་འཚོང་མཚམས་འཇོག་ཏུ་བཅུག བཀག་སྡོམ་དེར་གསལ་བཤད་གང་ཡང་བྱས་མེད། སྤྱི་ལོ༢༠༡༤ལོར། ཁ་ཐར་རྒྱལ་ཁབ་ཀྱིས་མཛངས་སྤྱོད་ཀྱི་ལས་འགུལ་ཞིག་སྤེལ་ཏེ། བུད་མེད་ཡུལ་སྐོར་བ་རྣམས་ཀྱིས་དམངས་ཚོགས་ཀྱི་སར་དོར་མ་ཐུང་ཐུང་དང་ཕུ་མེད་པའི་གྱོན་ཆས། ཡང་ན་ཐུང་ལ་དམ་པོ་ཡིན་པའི་གྱོན་པ་རིགས་གོན་མི་ཆོག་པ་དང་། སྐྱེས་པ་རྣམས་ཀྱིས་ཐུང་ཐུང་དང་སྟོད་ཐུང་ནང་གྱོན་རིགས་གོན་མི་ཆོག་པའི་བསླབ་བྱ་བརྒྱབ་སྟེ། ཚུལ་མཐུན་གྱོན་ཆས་གོན་པའི་བཅའ་ཁྲིམས་དྲན་སྐུལ་བྱས།

ས་ཁམས།[རྩོམ་སྒྲིག]

ཁ་ཐར་རྒྱལ་ཁབ་ནི་ཕྱེད་གླིང་ཕྲན་ཞིག་ཡིན། (ཆ་ས་ཕྲ་ལ་རིང་བ་ཞིག་རྒྱ་མཚོའི་ནང་དུ་ནར་ཡོད།)ལྷོ་ཕྱོགས་སུ་ས་དི་ཨ་རབ་དང་འབྲེལ་ཡོད་པ་ལས། ཕྱོགས་གཞན་ཚང་མ་ཨ་རབ་མཚོ་ཁུག་གི་ཆུས་བསྐོར་ཡོད།

ཁ་ཐར་རྒྱལ་ཁབ་ཧ་ཅང་ཆུང་ཆུང་ཞིག་ཡིན། ས་ཁྱོན་ལ་སྤྱི་ལེ་གྲུ་བཞི་མ༡༠༣༦༠ལས་མེད། ཕྱེད་གླིང་ཕྲན་གྱི་རིང་ཚད་སྤྱི་ལེ༡༦༠ཡིན། ས་ཆ་མང་ཆེ་བ་དམའ་མོ་དང་སྐམ་ཐེར་གྱི་ཐང་གཤོང་ཡིན་ལ་བྱེ་མས་གཡོགས་ཡོད། ཁ་ཐར་གྱི་ས་སྟེང་སྣུམ་མཛོད་གཙོ་བོ་ཇཱེ་བྷིལ་དྲུས་ཀན་ས་ཁུལ་དུ་ཡོད་པ་དང་། རང་བྱུང་རླངས་གཟུགས་གཏེར་མཛོད་ཕྱེད་གླིང་ཕྲན་གྱི་ནུབ་བྱང་གི་རྒྱ་མཚོའི་སྟེང་དུ་ཡོད།

རྒྱལ་ས།[རྩོམ་སྒྲིག]

ཁ་ཐར་རྒྱལ་ཁབ་ཀྱི་རྒྱལ་ས་དྷོ་ཧ(Doha)ཡིན། དེར་མི་གྲངས་ཀྱི་བརྒྱ་ཆ༩༠ལྷག་གནས་ཡོད། གྲོང་ཁྱེར་ཆེན་པོ་གཞན་དེ་ནི་ཨལ་ཝ་ཀི་རཱ(Al Wakrah)ཡིན།

སྲིད་གཞུང་དང་ཆབ་སྲིད།[རྩོམ་སྒྲིག]

ཁ་ཐར་གྱི་སྲིད་གཞུང་ནི་འོས་བསྡུ་མིན་ལ་རྒྱལ་པོའི་སྲིད་དབང་དང་ཚོ་དཔོན་དབང་འཛིན་གྱི་རིགས་ཤིག་ཡིན། ཚོ་དཔོན་གྱི་གོ་གནས་ནི་ཕ་ཤུལ་བུ་འཛིན་གྱི་ལམ་སྲོལ་ཡིན། ཚོ་དཔོན་ཁོ་ན་ཡིས་སྲིད་བློན་དང་བཀའ་ཤག་བློན་ཆེན་རྣམས་བསྐོ་བཞག་དང་གནས་དབྱུང་གཏོང་ཆོག བློན་ཆེན་རྣམས་མཉམ་འདུས་ཀྱིས་བློན་ཆེན་ལྷན་ཁང་གྲུབ་ཡོད་པ་དང་། དེ་ནི་རྒྱལ་ཁབ་ཀྱི་ཆེས་མཐོའི་འཛིན་སྐྱོང་དཔོན་རིགས་ཡིན།

མི་དམངས་དང་རིག་གཞུང་།[རྩོམ་སྒྲིག]

ཁ་ཐར་རྒྱལ་ཁབ་ཀྱི་མི་དམངས་ལ(Qataris)ཁ་ཐ་རི་སི་ཞེས་འབོད། ཁོ་ཚོ་ཨ་རབ་ཀྱི་རིགས་རྒྱུད་ཡིན། ཁ་ཐར་གྱི་གཞུང་འབྲེལ་གྱི་སྐད་ཡིག་ཨ་རབ་སྐད་ཡིག་ཡིན། ཡིན་ནའང་། མི་མང་པོ་ཞིག་གིས་དབྱིན་ཇིའི་སྐད་ཀྱང་བཤད། དམིགས་བསལ་གྱིས་ཚོང་ལས་གཉེར་དུས་བེད་སྤྱོད་བྱེད། ཁ་ཐར་ནང་ཕལ་ཆེར་མི་ས་ཡ༢.༦ཙམ་གནས་ཡོད། ཡིན་ནའང་། མི་གྲངས་དེ་ཡི་བརྒྱ་ཆ༨༨ཙམ་མགྲོན་པོ་ངལ་རྩོལ་བ(ས་ཆ་གཞན་ནས་དུས་ཡུན་ཐུང་ངུ་ཞིག་གི་རིང་གནས་སྡོད་བྱེད་པ་དང་ལས་ཀ་བྱེད་དུ་ཡོང་བའི་མི།)ཡིན་ལ། མང་ཤོས་ཨེ་ལྷོ་དང་ཨེ་ཤར་ལྷོ། ཨ་རབ་རྒྱལ་ཁབ་གཞན་ནས་ཡོང་བ་ཡིན། མི་རིགས་གཞན་མང་པོ་ཡི་ཁྲོད་དུ། རྒྱ་གར་བ༦༥༠༠༠༠དང་བལ་ཡུལ་མི༣༥༠༠༠༠། ཧྥི་ལི་ཕིན་གྱི་མི༢༦༠༠༠༠ཡོད། 

དངུལ་ལོ།[རྩོམ་སྒྲིག]

ཁ་ཐར་གྱི་དངུལ་ལོར་ལ་རི་ཡལ(Riyal)ཞེས་བརྗོད།

སྒྱུར་མཁན། དབང་ཆེན་འཕྲིན་ལས།  མཐོ་བོད་འཕྲིན་སྟེགས་ནས་དྲངས།


"https://bo.wikipedia.org/w/index.php?title=ཁ་ཏར།&oldid=136366"ལས་སླར་རྙེད་སོང།