རྗེ་འཇམ་དབྱངས་ཉི་མ་རྒྱ་མཚོ།
![](http://upload.wikimedia.org/wikipedia/commons/thumb/5/5b/Jamyang-Nyima_gyatso_01.jpg/220px-Jamyang-Nyima_gyatso_01.jpg)
མཚན།: འཇམ་དབྱངས་ཉི་མ།
འཁྲུངས་ལོ།: ཕྱི་ལོ་ ༡༩༣༧
འཁྲུངས་ཡུལ།: ཟངས་དཀར་སྟོད་མ།
འཁྲུངས་གཞིས།: རུ་སར་ཚང་།
ཡབ་ཀྱི་མཚན།: དགྲ་འདུལ།
ཡུམ་གྱི་མཚན།: འཕགས་སྒྲོན།
ཆོས་བརྒྱུད།: རི་བོ་དགེ་ལུགས་པ།
ཡིག་ཆ།: བཀྲིས་སྒོ་མང་ཡིག་ཆ།
དགོན་པ།: དམུ་དགེའི་དགོན།
མཚན་ཐོབ།: མཁན་པོ་དང་ཁྲི་བ།
འཆད་ཉན།: མདོ་སྔགས་ཟུང་འབྲེལ།
རྗེ་འཇམ་དབྱངས་ཉི་མ་(འཇམ་དབྱངས་ཉི་མ་རྒྱ་མཚོ་)མཆོག་ནི་མདོ་ཁམས་སྨད་ཀྱི་ཁོངས་གཏོགས་ཟངས་དཀར་སྟོད་མ་རུ་ཕྱི་ལོ་༡༩༣༧ ལོར་སྐུ་འཁྲུངས། དགུང་ལོ་བཅུ་གཅིག་ཐོག་དམུ་དགེའི་དགོན་ནས་རབ་ཏུ་བྱུང་སྟེ་ཚོགས་ཞུགས་གནང་། ཚུལ་ཁྲིམས་རྣམ་པར་དག་པའི་གཞི་བཟུང་སྟེ་མཚན་ལྡན་གྱི་བཤེས་གཉེན་དུ་མ་ཚུལ་བཞིན་བསྟེན་ནས་མདོ་སྔགས་རིག་གནས་བཅས་ལ་བསླབ་པ་སློབ་གཉེར་དཔྱིས་ཕྱིན་པ་བྱས། རིམ་གྱིས་དམུ་དགེ་དགོན་གྱི་དཔེ་ཁྲིད་དགེ་རྒན་དང། རྡོ་རམས་པ། བླ་མ་གཞུང་ལས་པ། ཁྲི་བ། མཁན་པོ་སོགས་ཀྱི་ལས་འགན་ཆེ་ཕྲ་ཆུང་གསུམ་ལེགས་པར་བཞེས། ད་སྐབས་དགོན་དེ་ནས་སྐལ་ལྡན་གྱི་གདུལ་བྱ་རྣམས་ལ་དབང་དང་རྗེས་གནང་ལུང་དང་ཁྲིད་སོགས་ཀྱི་མཛད་འཕྲིན་རྒྱ་ཆེར་སྐྱོང་བཞིན་པ་བཅས་སོ།།
སྐུ་འཁྲུངས་པའི་མཛད་པ།
[རྩོམ་སྒྲིག]རྗེ་འཇམ་དབྱངས་ཉི་མ་རྒྱ་མཚོ་དཔལ་བཟང་བོ་མཆོག་ནི་མདོ་ཁམས་སྨད་ཀྱི་ཆར་གཏོགས་ཟངས་དཀར་[༡](སྔོན་མ་བཙན་པོའི་དུས་སྐབས་སྟོད་མངའ་རིའི་ཡུལ་ནས་མཐའ་མཚམས་སྲུང་དམག་ཏུ་གཏང་བའི་མི་རྒྱུད།)ཁག་གསུམ་གྱི་ནང་ཚན་ཟངས་དཀར་སྟོད་མའི་རི་སར་ཚང་ཞེས་པའི་ཁྱིམ་ཚང་ཞིག་ཏུ་ཡབ་དགྲ་འདུལ་དང་ཡུམ་འཕགས་སྒྲོན་གཉིས་ཀྱི་སྲས་སུ་རབ་བྱུང་བཅུ་དྲུག་པའི་མེ་མོ་གླང་སྟེ་ཕྱི་ལོ་༡༩༣༧ ལོའི་ཟླ་་་་་ཚེས་བཟང་བོར་སྐུ་འཁྲུངས། ཁོང་ཚོ་མིང་སྲིང་གསུམ་ཡོད་པའི་ཆུང་བ་ཡིན། ཁོང་གི་བྱིས་དུས་ཀྱི་མཚན་ལ་ཚེ་རས་ཞེས་འབོད། རྗེས་སུ་བྲ་ཁྱོམ་ཆོས་མཛད་ཀྱིས་ཁོང་གི་མཚན་ལ་འཇམ་དཔལ་ཆོས་ཀྱི་ཉི་མ་ཞེས་མཚན་བརྗེས་འདུག
རབ་ཏུ་བྱུང་སྟེ་སློབ་གཉེར་གྱི་མཛད་པ།
[རྩོམ་སྒྲིག]ཕྱི་ལོ་༡༩༤༨ ལོ་སྟེ་ཁོང་དགུང་ལོ་༡༡ ཐོག་དམུ་དགེའི་དགོན་(དམུ་དགེ་བཀྲ་ཤིས་འཁོར་ལོའི་དགོན་)ལ་ཕེབས་ནས་འདུལ་བ་འཛིན་པ་འཇམ་དབྱངས་ཐབས་མཁས་མཆོག་གི་མདུན་ནས་དགེ་ཚུལ་སློང་གི་སྡོམ་པ་བཞེས་ཏེ་ཁྱིམ་ནས་ཁྱིམ་མེད་པར་རབ་ཏུ་བྱུང་། དགེ་ཚུལ་གྱི་མཚན་ལ་འཇམ་དབྱངས་ཉི་མ་ཞེས་གསོལ། དམུ་དགེ་དགོན་ནས་ཚོགས་ཞུགས་གནང་སྟེ་ཆོས་མཛད་བཏང་། དེ་ནས་བཟུང་ཁོང་གིས་ཁས་བླངས་པའི་གཞི་ཚུལ་ཁྲིམས་ཀྱི་བསླབ་པ་རིན་པོ་ཆེ་ཚུལ་བཞིན་བསྲུང་བའི་འགོ་བརྩམས། ཡག་སྐྱའི་ཆོས་མཛད་ཚང་གནས་ཀྱི་སློབ་དཔོན་དུ་བསྟེན། རྡོ་རམས་པ་འཇམ་དབྱངས་ཐབས་མཁས་སང་། ལྷ་རམས་པ་དཀོན་མཆོག་བསྟན་འཛིན་ཚང་། གངས་ལྗོངས་ཐོན་མི་གཉིས་པ་མ་ཧཱ་པཎྜི་ཏ་ཆེན་མོ་༧རྗེ་བཙུན་བསམ་གཏན་རྒྱ་མཚོ་མི་འཇིགས་དབྱངས་ཅན་དགའ་བའི་བློ་གྲོས་དཔལ་བཟང་བོ་མཆོག་སོགས་དགེ་བའི་བཤེས་གཉེན་རྣམས་བསམ་སྦྱོར་གཉིས་ཀྱི་སྒོ་ནས་ཚུལ་བཞིན་དུ་བསྟེན་ནས། ཀ་ཁའི་སྦྱོར་ཀློག་ནས་བཟུང་ཚོགས་ཀྱི་འདོན་ཆའི་སྐོར་གང་ཡོད་ཐུགས་འཛིན་དང་། ཆོས་གྲྭའི་སྐབས་ཀྱི་བརྩི་བཞག་སོགས་ཐུགས་འཛིན་ཡོད་པའི་སྟེང་ནས་སློབ་སྦྱོང་ལ་རྡོ་རུས་ཐུག་པ་སྦྱངས། དེ་ལས་གཞན་དུ་ཕྱག་དང་ཁ་འདོན་སྒྲིབ་སྦྱོང་ཀུན་སྤྱོད་སོགས་ལ་ཉིན་མཚན་ཀུན་ཏུ་ཕལ་བས་དཔག་པར་དཀའ་བ་ཞིག་གནང་བ་གྲྭ་རྒན་ཁུངས་ཐུབ་རྣམས་ཀྱིས་གླེང་བ་ལན་མང་བོར་ཐོས།
ཉིན་ཞིག་གཞུང་ལས་པ་ཨ་ཁུ་ཆོས་ལྡན་ཚང་གིས་བདག་ལ་གསུང་རྒྱུར། “འཇམ་དབྱངས་ཉི་མ་ཚང་ཆུང་དུས་ནས་སྤྱིར་བཏང་བ་ཞིག་གཏན་ནས་མིན། ང་ཚོ་ཟངས་དཀར་དང་ཨ་མཆོག་ཕྱོགས་ཀྱི་གྲྭ་རྒྱུན་ཚོ་ཆོས་མཚམས་སྐབས་དམུ་དགེ་དང་ཕ་ཡུལ་བར་ཕར་འགྲོ་ཚུར་ཡོང་སྐབས་རྟ་ལམ་ཉིན་གཉིས་གསུམ་གྱི་ལམ་ལ་མཉམ་དུ་འགྲོ་དགོས། འཇམ་དབྱངས་ཉི་མ་ཚང་དགོང་ལོ་དེ་འདྲ་ཆུང་རུང་ལམ་བར་ཞག་འདུག་སོགས་ཀྱི་སྐབས་སྔ་དགོང་གི་ཞལ་འདོན་འཆག་མེད་མཛད་པར་མ་ཟད། ཆུ་དང་ཆར་བ་ག་ཚོད་བབ་ཀྱང་རུང་སྔ་དགོང་གི་ཕྱག་འཚལ་རྒྱུ་ཡང་འཆག་མི་སྲིད། ངོ་མཚར་བ་ཞིག་ཡིན། ལྷག་པར་དུ་དེང་སང་ཁོང་གིས་ལམ་རིམ་འཆད་ན་ཁོང་ལ་འགྲན་ཐུབ་མཁན་བླ་བྲང་བཀྲ་ཤིས་འཁྱིལ་ལ་འང་མི་འདུག” ཅེས་བདག་ལ་དངོས་སུ་གསུང་།
གོ་ཆག་གི་ལོ་ཟླའི་ཁྲོད་གྲོང་ལས་ཀྱི་མཛད་པ།
[རྩོམ་སྒྲིག]དུས་སྐབས་དེར་རྒྱ་ནག་དམར་དམག་གིས་བོད་ས་དབང་བསྒྱུར་གྱི་དམག་འཁྲུག་བརྒྱབ་སྟེ་མཐའ་མཚམས་མདོ་སྟོད་སྨད་གཉིས་དབང་འོག་བཅུགས་ཏེ་དབུས་ཁུལ་ཡོངས་རྫོགས་དབང་བསྒྱུར་ལ་ཉེ་བས། བོད་ཀྱི་ཕྱི་ནང་གི་སྣོད་བཅུད་གཉིས་དང་ཆོས་སྲིད་རིག་གནས་དང་བཅས་པར་གཏོར་བཤིག་དང་ཆག་འཇིག་ཚབ་ཆེན་འབྱུང་བའི་འགོ་བརྩམས། ཕྱི་ལོ་༡༩༥༨ ལོར་དམུ་དགེའི་དགོན་པ་ཡང་གཞན་ལྟར་སྒོ་རྒྱག་དགོས་པའི་བཙན་བཀའ་བཏང་སྟེ། དགོན་པའི་དགེ་འདུན་པ་རྣམས་ཀྱང་གྲོང་ལ་ལོགས་བཅུགས། ལོ་ངོ་དྲུག་བརྒྱ་ལྷག་གི་ལོ་རྒྱུས་ཡོད་པའི་དགོན་རྙིང་དེ་ཡང་ཤུལ་ཙམ་ལས་ལྷག་མེད་པའི་གནས་སུ་བསྐྱལ། རྗེ་འཇམ་དབྱངས་ཉི་མ་ཚང་ཡང་ཕ་ཡུལ་ཟངས་དཀར་ལ་མི་ལོག་ག་མེད་བྱུང་། སྐབས་དེར་དགོན་པའི་སྐྱེས་ཆེན་ཚོས་ཁོང་ལ་དགོན་འདི་མ་འོངས་པར་བདག་སྐྱོང་གནང་དགོས་པའི་བཅོལ་དམ་ནན་པོ་ཡང་མཛད་རབས་འདུག དེ་ནས་བཟུང་ལོ་ངོ་བཅུ་ལྷག་གི་རིང་སྐྱ་ཆས་བསྣམས་ཏེ་རྟ་རྫི་བྱེད་པ་སོགས་གྲོང་ལས་སྣ་ཚོགས་མཛད་དགོས་ཐུག་ཀྱང་། ཁོང་གིས་སྡོམ་དམ་ཚིག་སྲོག་བཞིན་བསྲུང་སྟེ་ངོ་མཚར་རྨད་བྱུང་གི་རྣམ་ཐར་བཟང་བོ་མཛད་པའི་ལོ་རྒྱུས་གང་མང་ཐོས་རྒྱུ་གདའ།
![](http://upload.wikimedia.org/wikipedia/commons/thumb/8/86/Jamyang-Nyima_gyatso_02.jpg/220px-Jamyang-Nyima_gyatso_02.jpg)
སྤྱིའི་ཨང་། | མཚན། | མཛད་འགན། | མཚན་ཐོབ། | བཞུགས་གནས། |
---|---|---|---|---|
༡ | འཇམ་དབྱངས་ཐབས་མཁས། | རབ་བྱུང་གི་བླ་མ། | རྡོ་རམས་པ། | དམུ་དགེའི་དགོན། |
༢ | ཡག་སྐྱའི་ཆོས་མཛད། | གནས་ཀྱི་བླ་མ། | ཆོས་མཛད། | དམུ་དགེའི་དགོན། |
༣ | དཀོན་མཆོག་བསྟན་འཛིན། | དཔེ་ཁྲིད་དགེ་རྒན། | ལྷ་རམས་པ། | དམུ་དགེའི་དགོན། |
༥ | བསམ་གཏན་རྒྱ་མཚོ། | དབང་ལུང་ཁྲིད་གསུམ་གྱི་སློབ་དཔོན། | བོད་ཀྱི་མཁས་པ་མི་བཞིའི་ཡ་གྱལ། | དམུ་དགེ་དང་བླ་བྲང་སོགས། |
༦ | འཇམ་དབྱངས་རྒྱ་མཚོ། | དབང་ལུང་ཁྲིད་གསུམ་གྱི་སློབ་དཔོན། | བླ་བྲང་བཀྲིས་འཁྱིལ་གྱི་དཔེ་ཁྲིད་དགེ་རྒན། | བླ་བྲང་བཀྲ་ཤིས་འཁྱིལ། |
སྤྱིའི་ཨང་། | མཚན། | སྐབས་ཐོག | མཚན་གནང་མཁན། |
---|---|---|---|
༡ | ཚེ་རས། | བྱིས་དུས་ཀྱི་གཅེས་མིང་། | ཕ་མ། |
༢ | འཇམ་དཔལ་ཆོས་ཀྱི་ཉི་མ། | རབ་བྱུང་མ་སྒྲུབ་སྔོན་གྱི་མཚན། | བྲ་ཁྱོམ་ཆོས་མཛད། |
༣ | འཇམ་དབྱངས་ཉི་མ། | དགེ་ཚུལ་གྱི་མཚན། | འཇམ་དབྱང་ཐབས་མཁས། |
༤ | འཇམ་དབྱངས་ཉི་མ་རྒྱ་མཚོ། | དགེ་སློང་གི་མཚན། | དམུ་དགེ་བསམ་གཏན་རྒྱ་མཚོ། |
༥ | གསང་མཚན། |
![](http://upload.wikimedia.org/wikipedia/commons/thumb/1/1b/Jamyang_Nyima_Gyatso_03.jpg/220px-Jamyang_Nyima_Gyatso_03.jpg)
ཆོས་སྒོ་ཕྱེས་རྗེས་སློབ་གཉེར་ལ་ཕེབས་པའི་མཛད་པ།
[རྩོམ་སྒྲིག]ཕྱི་ལོ་༡༩༧༦ ལོ་ནས་རིག་གནས་གསར་བརྗེ་ཆེན་མོ་མཇུག་བསྒྲིལ་བ་དང་རིམ་པས་དུས་ངན་གྱི་མུན་མཐའ་རིམ་གྱིས་བསལ་ཏེ་བོད་ས་ཡོངས་ནས་རང་དབང་ལ་ལོངས་སུ་སྤྱོད་པའི་བསྐལ་བཟང་བྱུང་བ་དང་བསྟུན། ཕྱི་ལོ་༡༩༨༡ ལོ་སྟེ་ཁོང་དགུང་ལོ་ཞེ་བཞིའི་ཐོག་རྒྱལ་བསྟན་སླར་གསོའི་ཐུགས་བསྐྱེད་སྨིན་ཏེ་མདོ་སྨད་བསྟན་པའི་འབྱུང་གནས་བླ་བྲང་བཀྲ་ཤིས་འཁྱིལ་དུ་དཔེ་གཟིགས་ལ་ཕེབས། དགེ་བའི་བཤེས་གཉེན་ཆེན་མོ་རྗེ་འཇམ་དབྱངས་རྒྱ་མཚོ་མཆོག་དང་རྗེ་དགེ་འདུན་རྒྱ་མཚོ་ཆེ་བ་སོགས་དགེ་རྒན་དུ་བསྟེན་ནས་མདོ་ཕྱོགས་གཞུང་བཀའ་པོད་ལྔས་མཚོན་པའི་གཞུང་ཆེ་ཕྲ་མང་བོའི་ཁྲིད་དང་ལུང་བཤད་ལུང་སོགས་ལ་གུས་རྟག་སྦྱོར་བའི་སྒོ་ནས་ཐོས་བསམ་གནད་སྨིན་མཛད། སྔགས་ཕྱོགས་ལའང་མ་ཧཱ་པཎྜི་ཏ་ཆེན་མོ་༧རྗེ་བཙུན་བསམ་གཏན་རྒྱ་མཚོའི་མདུན་ནས་དབང་དང་ལུང་མན་ངག་ཁྲིད་རྗེས་གནང་ཕྱག་ལེན་སོགས་ཆད་མེད་གསན་ནས་ཐུགས་རྒྱུད་ཕྱུག་པར་གྱུར།
ཕྱིར་རང་དགོན་དུ་ཕེབས་ཏེ་གདུལ་བྱ་སྐྱོང་བའི་མཛད་པ།
[རྩོམ་སྒྲིག]རྗེ་རིན་པོ་ཆེ་བློ་བཟང་གྲགས་པས།
- བསྟན་པ་རིན་ཆེན་མཆོག་གིས་མ་ཁྱབ་པའམ། །
- ཁྱབ་ཀྱང་ཉམས་པར་གྱུར་པའི་ཕྱོགས་དེར་ནི། །
- སྙིང་རྗེ་ཆེན་པོས་ཡིད་རབ་བསྐྱོད་པ་ཡིས། །
- ཕན་བདེའི་གཏེར་དེ་གསལ་བར་བྱེད་པར་ཤོག །ཅེས་གསུངས་པ་བཞིན།
ཕྱི་ལོ་༡༩༨༦ ལོ་སྟེ་ཁོང་དགུང་ལོ་ཞེ་དགུའི་ཐོག་རང་དགོན་དམུ་དགེའི་བཀྲ་ཤིས་འཁོར་ལོའི་དགོན་དུ་ཕྱིར་ཞབས་སོར་བཀོད་དེ། སློབ་གཉེར་རྒྱུན་འཁྱོངས་དང་སྐལ་ལྡན་གྱི་གདུལ་བྱ་རྣམས་ལ་གཞུང་ཆེན་བཀའ་པོད་ལྔའི་དཔེ་ཁྲིད་ཀྱིས་མཚོན་པའི་དགོན་པའི་ཆོས་ཕྱོགས་ཀྱི་མཛད་འཕྲིན་ཉིན་མཚན་འདའ་བར་བྱས་དང་བྱེད་མོས་སུ་མཆིས། རྗེ་དམུ་དགེ་བསམ་གཏན་མཆོག་གི་མདུན་ནས་བསྙེན་རྫོགས་བསྐྱར་སྒྲུབ་གནང་སྟེ་མཚན་ལ་འཇམ་དབྱངས་ཉི་མ་རྒྱ་མཚོ་ཞེས་གསོལ། རིམ་གྱིས་ཕར་ཕྱིན་དམ་བཅའ་དང་། སྨོན་ལམ་རབ་འབྱམས་པ་དང་། སྨོན་ལམ་རྡོ་རམས་པའི་དམ་བཅའ་སོགས་ལ་བཞུགས།
དགོན་པའི་ཆོས་ཕྱོགས་ཀྱི་ཐུགས་འགན་བཞེས་པའི་མཛད་པ།
[རྩོམ་སྒྲིག]- ༡ བླ་མ་གཞུང་ལས་པ་ལོ་གསུམ་དང་།
- ༢ མགོན་པོའི་གཏོར་སྒྲུབ་དང་ལྕགས་མཁར་གྱི་ཁྲིར་ལོ་གསུམ་རེར་ཕེབས།
- ༣ སྨོན་ལམ་ལྔ་མཆོད་ཀྱི་ཁྲི་ཚབ་ལོ་བརྒྱད་དང་།
- ༤ མཁན་པོའི་གོ་གནས་ལོ་བཞིར་བཞེས་པ་སོགས་ཀྱི་ལས་ཁུར་རྣམས་འཁོར་ལོ་གསུམ་གྱིས་སྒོ་ནས་བསྐྱངས།
- ༥ ཕ་མཐའ་ཚང་ཁྲི་བཟུར་ནས་ཨ་ཁུ་ཀླུ་སྒྲུབ་ཚང་ཁྲིར་བཞུགས་ཀྱི་བར་སླར་ཡང་ཁྲི་ཚབ་གནང་།
- ༦ དགེ་ཚུལ་སློང་གི་སྡོམ་པ་འབོག་པ་སོགས་ཀྱི་དགོས་བསྟན་པ་སྤེལ་པ་ནི་བརྗོད་ཀྱི་མི་ལང་།
དད་ལྡན་གདུལ་བྱའི་ཆེད་ཕྱོགས་ཕེབས་ཀྱི་མཛད་པ།
[རྩོམ་སྒྲིག]ཟངས་དཀར་ཁག་གསུམ། ཨ་མཆོག མཛོད་དགེ། ཐང་སྐོར། ཤར་ཁོག ཞང་ངུའི་ཁོག ཁྲོ་ཆུ་སོགས་ཡུལ་གྲུ་མང་བོར་ཕེབས་ནས་མཆོད་ཡོན་གྱི་འབྲེལ་ལམ་བཟང་བོ་བཙུགས།
རྟེན་བཞེངས་པའི་མཛད་པ།
[རྩོམ་སྒྲིག]- ༡ རང་དགོན་དུ་འོད་དཔག་མེད་ཀྱི་ལྷ་ཁང་གསར་བཞེངས་དང་།
- ༢ འདུ་ཁང་ནང་གི་བྱམས་ཆེན་གཙོ་འཁོར་གསུམ།
- ༣ རྗེ་ལྷ་ཁང་ནང་རྗེ་ཡབ་སྲས་དང་རྗེའི་ཚེ་འཛིན་མ་སྟོང་སྐུ་སོགས་གསེར་ཟངས་ལས་གྲུབ་པ་མང་བོ་བཞེངས་ཡོད། སྦྱོར་འཇགས་ཀྱི་སྐོར་ལའང་གྲངས་མེད་དོ། །
རྗེ་བླ་མས། མཛད་པ་ཀུན་ལས་གསུང་གི་ནི། །མཛད་པ་མཆོག་ཡིན། །ཞེས་གསུངས་པ་ལྟར་གཞུང་བཀའ་པོད་ལྔས་མཚོན་པའི་དཔེ་ཁྲིད་སྐོར་གྲངས་མེད་ལ། མཁན་པོའི་ལས་ཁུར་མཐར་ཕྱིན་ནས་སླར་ཡང་ལོ་དུ་མའི་རིང་དབྱར་ཐོག་རྣམས་ལ་བླ་བྲང་བཀྲ་ཤིས་འཁྱིལ་དང་། གཙང་བཀྲ་ཤིས་ལྷུན་པོ་སོགས་སུ་ཕེབས་ནས་༧རྗེ་འཇམ་དབྱངས་རྒྱ་མཚོའི་མདུན་ནས་བརྒྱ་རྩ་གསུམ་དང་། རིན་འབྱུང་། མི་ཏྲ་རྡོར་འཕྲེང་སོགས་སྤྱི་ཟུར་གྱི་དབང་རྗེས་གནང་སོགས་གྲངས་མེད་པ་གསན།
རང་དགོན་དུ་དབང་ཁ་རྗེས་གནང་གི་མཛད་པ།
[རྩོམ་སྒྲིག]བླ་མ་དམ་པ་རྣམས་ཀྱིས་དགོངས་ཁྲོལ་དང་བཀའ་བཞིན་དུ་རང་དགོན་དུ་དབང་ལུང་མན་ངག་གི་སྐོར་གནང་ཚུལ་ནི་རགས་རིམ་ཞིག་ཞུ་བ་ལ།
❀ སྤྱི་ལོ༢༠༠༢ལོའི་ཧོར་ཟླ་དང་བོའི་ཚེས་བཅུ་དགུའི་ཉིན་ནས་གྲྭ་མང་ཡོངས་ལ་འཇིགས་བྱེད་ལྷ་བཅུ་གསུམ་མའི་སྟ་གོན་དང་བཅས་པཎ་ཆེན་བསྟན་པའི་ཉི་མའི་གསུང་གི་རྗེས་ཆོག་སྟེང་ནས་སྒྲུབ་ཐབས་རིན་འབྱུང་གནང་བའི་དབུ་བཟུང་ནས་ཧོར་ཟླ་གསུམ་པའི་ཚེས་གསུམ་ཉིན་སྒྲུབ་ཐབས་རིན་འབྱུང་གནང་ཟིན་ལ་ཟླ་དེའི་ཚེས་བཅོ་ལྔའི་ཉིན་ཏཱ་ར་ནཱ་ཐའི་གསུང་གི་སྒྲུབ་ཐབས་རིན་འབྱུང་གི་ལུང་ཡང་གནང་ཟིན། ཚེས་ཉེར་གཉིས་ཉིན་གསང་འདུས་ཀྱི་དབང་ཡང་གནང་།
❀ སྤྱི་ལོ་༢༠༠༤ལོའི་ཧོར་ཟླ་བདུན་པའི་ཚེས་བཅུ་དྲུག་ཉིན་ནས་པཎ་ཆེན་ཨ་བྷྱཱ་ཀ་རས་ཆོག་སྒྲིག་མཛད་པའི་སྒྲུབ་ཐབས་རྒྱ་མཚོ་གནང་བའི་དབུ་བཟུང་ནས་ཧོར་ཟླ་བརྒྱད་པའི་ཚེས་གཉིས་ཉིན་སྒྲུབ་ཐབས་རྒྱ་མཚོ་གནང་ཟིན། ཟླ་དེའི་ཚེས་གསུམ་བཞི་ལྔ་རྣམས་ལ་འཇིགས་བྱེད། གསང་འདུས། མཁའ་སྤྱོད་མ། བདེ་མཆོག་རྣམས་ཀྱི་སྔགས་བཏུ་གནང་།
❀ ༢༠༠༥ལོར་ཟླ་བཅུ་གཅིག་པའི་ཚེས་དྲུག་ནས་ཚེས་བཅུ་གསུམ་བར་ལ་བ་རི་བརྒྱ་རྩའི་རྗེས་གནང་ལུང་བཅས་གནང་། ཚེས་བཅུ་བཞི་ནས་བཅུ་དྲུག་བར་ལ་སྣར་ཐང་བརྒྱ་རྩའི་རྗེས་གནང་ལུང་བཅས་གནང་།
❀ སྤྱི་ལོ་༢༠༠༦ལོའི་ཧོར་ཟླ་གསུམ་པའི་ཚེས་སུམ་ཅུའི་ཉིན་ནས་ཟུར་བཀའ་སྦྱོང་རྒྱུད་དཀྱིལ་འཁོར་བཅུ་གཉིས་ཀྱི་དབང་གི་སྟ་གོན་བཅས་ཉིན་བཅུ་གསུམ་རིང་ལ་གནང་། བཅུ་གསུམ་ལ་སྟ་གོན་དང་བཅུ་བཞི་བཅོ་ལྔར་གདུགས་དཀར་བྱད་གྲོལ་དང་ལྷ་མང་གི་དབང་གནང་།
❀ སྤྱི་ལོ་༢༠༠༩ལོའི་ཧོར་ཟླ་གཉིས་པའི་ཚེས་ལྔ་ནས་གཉིས་པའི་ཚེས་བཅོ་བརྒྱད་བར་ཟུར་བཀའི་ཚེ་དབང་འཆི་མེད་རྡོ་རྗེ་སྲོག་ཤིང་གི་དབང་སོགས་དང་། ཚེ་དབང་བུ་སྟོན་གང་ཁུག་མའི་རྗེས་གནང་དང་སྐུ་ལྔའི་སྲོག་གཏད་སོགས་རྗེས་གནང་སུམ་ཅུ་ལྷག་དང་། ཟླ་གཉིས་པའི་ཚེས་བཅུ་བཞིའི་ཉིན་ནས་བཅོ་བརྒྱད་བར་ལ་སྒྲོལ་མ་ཉེར་གཅིག་གི་རྗེས་གནང་བསྩལ། ཟླ་དེའི་ཚེས་བཅུ་དགུ་ཉིན་ནས་ཉེར་གཉིས་བར་ལ་སྐྱིད་ཤོད་རྗེས་ཆོག་སྙིང་ནས་སྙིང་ཞུགས་མ་གཏོགས་པའི་མགོན་བཀའ་བཅུ་གཉིས་གནང་། ཉེར་གསུམ་ཉིན་ནས་ཉེར་བདུན་ཉིན་བར་ལ་རྣམ་སྲས་བཀའ་བཅོ་ལྔའི་རྗེས་གནང་བསྩལ། ཧོར་ཟླ་བཞི་བའི་ཚེས་དགུ་ནས་བཅོ་བརྒྱད་བར་ལ་ས་སྐྱའི་གསེར་ཆོས་བཅུ་གསུམ་གྱི་རྗེས་གནང་བསྩལ། དེའི་འཕྲོར་སྟག་ཕུ་སྒྲོལ་མ་ཐུན་མོང་དང་ཐུན་མོང་མ་ཡིན་པའི་དབང་བཞི་བྱིན་རླབས་དང་བཅས་པ་སྟག་ཕུའི་ཆོས་སྐོར་གྱི་ལུང་བཅས་ཚེས་བཅོ་ལྔའི་ཉིན་རྫོགས། །
❀ ༢༠༡༤ལོའི་ཧོར་ཟླ་བཞི་བའི་ཚེས་བཅུ་གཉིས་ཉིན་ནས་བཅོ་ལྔའི་བར་ལ་བཀྲ་ཤིས་ཐང་དུ་རྫོང་ཁག་ལྔའི་མི་སྣ་མང་བོ་ལ་དུས་འཁོར་དབང་ཆེན་གནང་།
❀ ༢༠༡༦ལོའི་གནམ་ལོ་གསར་ཚེས་ཉིན་ཁོང་དགུང་ལོ་བརྒྱད་ཅུར་སླེབས་པའི་དགའ་སྟོན་དུ་གྲྭ་མང་ཡོངས་ནས་གནས་བཅུའི་སྒོ་ནས་བརྟན་བཞུགས་ཚད་ལྡན་ཕུལ་བས་རྟེན་འབྲེལ་ཕུན་སུམ་ཚོགས་པ་འཛོམས། ལོ་དེའི་ཧོར་ཟླ་བདུན་པའི་ཚེས་བཅུ་དྲུག་ཉིན་ནས་ཟླ་བརྒྱད་པའི་ཚེས་ལྔའི་བར་ལ་རྡོ་རྗེ་འཕྲེང་བའི་དབང་ཡོངས་རྫོགས་གནང་།
❀ སྤྱི་ལོ༢༠༡༧ལོའི་ཧོར་ཟླ་གཉིས་པའི་ཚེས་ཉེར་ལྔ་ནས་ཧོར་ཟླ་གསུམ་པའི་ཚེས་བཅུ་དགུའི་བར་ལ་མི་ཏྲ་བརྒྱ་རྩའི་དབང་ཡོངས་རྫོགས་བསྩལ། དེ་དག་གིས་མཚོན་པའི་སྤྱི་ཟུར་གྱི་དབང་རྗེས་གནང་དང་། བདེ་གསང་འཇིགས་གསུམ་གྱི་བསྐྱེད་རྫོགས། ལམ་རིམ་ཆེ་ཆུང་། བློ་སྦྱོང་སྐོར། ཁྲིད་རྒྱུན། ལུང་རྒྱུན་སོགས་དབང་ལུང་མན་ངག་གིས་མཚོན་སེར་སྐྱ་ཀུན་ལ་གང་ལ་གང་དགོས་ཀྱི་གདམས་པ་རྣམས་བསྩལ་དང་སྩོལ་བཞིན་སྐལ་ལྡན་གྱི་གདུལ་བྱའི་མགོན་དུ་བཞུགས་ནས་རྗེ་བླ་མའི་མདོ་སྔགས་ཟུང་འབྲེལ་གྱི་བསྟན་པ་རིན་པོ་ཆེ་འདི་ཉིད་ཕྱོགས་མཐར་འཛིན་སྐྱོང་སྤེལ་གསུམ་གནང་བཞིན་བཞུགས་པ་འདི་ལགས་སོ། །
རྩོམ་ཁུངས།
[རྩོམ་སྒྲིག]ལོ་རྒྱུས་ཀྱི་ཁུངས་གསལ་བཤད། རྩོམ་འདི་གཙོ་བོ་བསླབ་གསུམ་རྒྱ་མཚོས་བྲིས་ཤིང་དམུ་དགེའི་ལེགས་ཚོགས་རྒྱུན་དུས་དེབ་སྟེང་སྤེལ་བ་དེར་གཞི་བྱས་ཡོད། དེའི་སྟེང་བདག་གིས་རེ་ཟུང་ཁ་སྣོན་དང་གོ་རིམ་རེ་འགའ་ཡང་དཀྲུགས་ཡོད།
- ↑ ༡ བོད་ཀྱི་ལོ་རྒྱུས་ཀུན་དགའི་མེ་ལོང་། ཤོག་ངོས་༢༢༧ ཐིག་ཕྲེང་༡༨ སི་ཁྲོན་དཔེ་སྐྲུན་ཚོགས་པ། སི་ཁྲོན་མི་རིགས་དཔེ་སྐྲུན་ཁང་གིས་པར་དུ་བསྐྲུན་ནས་བཀྲམ།