མི་ལ་རས་པ་

རྗེ་བཙུན་མི་ལ་རས་པ། (1040 - 1123), ནི་ཡོངས་གྲགས་སུ་སྙན་ངག་མཁས་ཅན་དང་རྣལ་འབྱོར་བ་ཞིག་ཡིན། དྭགས་པོ་བཀའ་བརྒྱུད་པའི་བླ་མ་སྙན་གྲགས་ཅན་ཞིག་ཡིན་པར་མ་ཟད། མར་པ་ལོ་ཙཱ་བ་ཆོས་ཀྱི་བློ་གྲོས་ཀྱི་ཐུགས་སྲས་ཤིག་རེད། ཁོང་གིས་མགུར་མ་སྙན་པོ་མང་པོ་བཞེངས་ཡོད། ཐུགས་སྲས་གཙོ་བོ་ལ་ནི་དྭགས་པོ་ལྷ་རྗེ་དང་རྗེ་རས་ཆུང་པ་གཉིས་ཡོད་རེད།

མི་ལ་རས་པ་

སྐུ་ཚེ་སྟོད།

རྗེ་བཙུན་གྲུབ་ཐོབ་ཀུན་གྱི་རྒྱལ་པོའམ་རྣལ་འབྱོར་གྱི་དབང་ཕྱུག་མི་ལ་རས་པ་སྐུ་འཁྲུངས་པའི་ཡུལ་ནི་མང་ཡུལ་གུང་ཐང་གི་སྐྱ་རྔ་རྩའི་ཀོ་རོན་བྱ་བར་རིགས་ཁྱུང་པོ། ཡབ་མི་ལ་ཤེས་རབ་རྒྱལ་མཚན་དང་ཡུམ་མྱང་བཟའ་དཀར་རྒྱན་གཉིས་ཀྱི་སྲས་སུ་ལྕགས་ཕོ་འབྲུག་གི་ལོ་ལ་ཡ་མཚན་གྱི་ལྟས་བཅས་སྐུ་བལྟམས། དེ་ནས་ལོ་གསུམ་ནས་སྲིང་མོ་པེ་ཏ་མགོན་སྐྱིད་བྱ་བ་སྐྱེས། རྗེ་བཙུན་ལ་མཚན་ཐོས་པ་དགའ་གསོལ། མི་ལ་ཞེས་པ་ནི་ཡབ་མེས་ཀྱི་རིགས་ལ་མི་ལ་ཙ་ཊ་བྱ་བའི་གདོན་བཏུལ་བའི་མིང་རུས་ལ་ཆགས་པ་སྐད། རྗེ་བཙུན་དགུང་ལོ་བདུན་ནས་ཡབ་འདས་པ་ལ། ཨ་ཁུ་གཡུང་རྒྱལ་དང༌། ཨ་ནེ་དཔལ་འདྲེན་སོགས་ཕ་ཚན་ཆེ་བར་ཡོད་པས། རྒྱུ་ནོར་རྣམས་ངེད་ཚོས་ཉར་ཚགས་བྱེད། ཁྱེད་མ་བུ་གསུམ་སྡུག་པོ་མི་གཏོང་ཟེར་ནས་ཁོང་ཚོས་བདག་བྱས། དེ་ནས་བུ་ཐོས་པ་དགའ་ཅུང་ཟད་ནར་སོན་པ་དང༌། ཡུམ་གྱིས་ཕ་མེས་ཉེ་དུ་གྲོང་པ་རྣམས་བསྡུས་ནས་སྟོན་མོ་བྱས་ཏེ། ངའི་བུ་དང་མཛེས་སེ་ཆུང་གཉེན་བསྒྲིགས་ཡོད་ཅིང་ད་ཁྱིམ་སོ་ཟིན་ཙམ་ཡོད་པས། རྒྱུ་ནོར་ཚང་མའམ་མིན་ཀྱང་བུ་ཁོ་རང་གི་ནོར་སྐལ་ཙམ་ཞིག་སྙིང་རྗེས་ལྟོས་ལ་བྱིན་བྱས་པས། དེ་སྔོན་གསོས་པ་དྲ་མ་ཡིན། རྒྱུ་གཡར་རྩིས་སྤྲད་པ་ཡིན་པས་གཏད་རྒྱུ་མེད། ཁྱོད་མ་སྨད་ཀྱིས་མང་བའི་དམག་དང་ཉུང་བའི་མཐུ་ཅི་དགའ་གྱིས་ཟེར་ནས་འཇིགས་ཉམས་མེར་སོང༌།

མཐུ་སློབ་ཚུལ།

དུས་དེ་ཙམ་ན་རྩ་ཡི་མི་ཐོད་ཁར་སློབ་དཔོན་ཞིག་ཡོད་སར་འབྲི་ཀློག་བསླབ་པར་བཞག ཨ་མ་དང་ཞང་པོ། མཛེས་སེའི་ཕ་མིང་གིས་གྲོགས་བྱས། འབྲི་ཀློག་མཁས་པར་བྱུང༌། དུས་རེ་ཤིག་ཨ་མ་ན་རེ། རང་རེ་མ་བུ་རྒྱུ་ནོར་ཤོར་རྗེས་མང་ན་དམག་ཉུང་ན་མཐུ་གྱིས་ཟེར་ནས་བསྡིགས་མོ་བྱས། རང་ཚོ་ཉམ་ཞན་པས་དམག་མེད། ཁྱོད་ཀྱིས་མཐུ་ཞིག་བྱེད་དགོས། མ་བྱེད་ན་ཁྱོད་རང་གང་དགར་སོང༌། རང་ཕ་མིང་ཡུལ་དུ་འགྲོ་བ་ཡིན་ཟེར་གཅུད་ལ་བོར་བས་མཐུ་བྱེད་པར་ཁས་བླངས། མ་ཡི་ཞིང་སྐལ་བཙོང་བའི་རིན་རྟ་ཁམ་པ་རྟེལ་གྲགས་བྱ་བ་དང་ཚོས་སྲང་བཞི་ཁུག་པས། ཚོས་དང་གྲོ་ཕྱེ་རྟ་ལ་བཀལ། མཐུ་སློབ་པའི་མི་དྲུག་དང་བསྡེབས་ནས་བཏང༌། སྐྱིལ་བའི་ལྡོན་ཁར་བུ་ཁྱོད་ཀྱི་སྙིང་རུས་གྱིས། མཐུ་རྟགས་བྱུང་ན་ཅི་རྙེད་བསྐུར་ནས་ཡོང་ཟེར། གྲོགས་ཚོར་ངའི་བུ་དགྲ་གཉེན་ངོ་མི་ཤེས་པ་ཞིག་ཡོད་པས་འདི་ལ་སྙིང་རྗེས་ལྟོས་ཟེར་བཅོལ་གཏམ་ནན་བཅག་བྱས། ཁོང་རྣམས་འགྲོགས་ནས་མཐུ་གང་ཆེ་དྲིས་ཤིང་གཙང་ནས་མར་སོང་བས། ཡར་ལུང་གཉག་གཡུང་སྟོན་ཆེ་ཟེར། དེ་གར་ཕྱིན་ནས་རྟ་དང་དངོས་པོ་ཅི་ཡོད་ཕུལ།

མཐུ་བསླབས་ནས་ལོ་གཅིག་སོང༌། གྲོགས་པོ་རྣམས་འགྲོ་རན་པས་ཚ་ལམ་དུ་བསྐྱལ། རང་ནི་ཡུལ་དུ་མཐུ་རྟགས་མེད་པས་འགྲོ་ས་མེད་ནས་ཡར་ལོག་པའི་ལམ་ཁ་ནས་རྟ་ལུད་མཐུ་བ་གང་རྙེད་པ་བླ་མའི་ཞིང་དུ་བླུགས། དེར་བླ་མས་གཟིགས་ནས་མཉེས། ཁྱོད་ཅི་ཡིན་གསུངས་པར་སྔོན་གྱི་ལོ་རྒྱུས་ཞིབ་ཏུ་ཞུས་པས་སྙིང་རྗེ་གསུངས། འོ་ན་ངའི་གཟའ་གདོང་དམར་ནག་ཟེར་བ་གནུབ་ཆུང་ལ་ཡར་ཕུལ། ཁོང་གི་སེར་བ་མཛུབ་ཁྲིད་ཀྱི་གདམས་པ་དེ་ང་ལ་གནང་བ་ཡིན་པས་ད་ཁྱོད་དེར་གཏོང་གསུང་ཞིང༌། རྟ་དཀར་པོ་སྟོང་ལ་གྲགས་ཞེས་པ་དང་སྣམ་བུ་བུབ་འགའ་བསྐུར་ནས་བུ་དང་སྦྲགས་ཏེ་བཏང༌། དེར་གནུབ་ལ་རྟེན་རྣམས་ཕུལ་ནས་ཞུས་པས། དཔེ་ཞིག་གཏད་ནས་བློ་ལ་ཟུངས་ཟེར། དེ་ནས་ཁོང་གི་བུ་གཅིག་དང་མཉམ་དུ་མཚམས་ལ་བཞག་པས་ཟླ་གཅིག་གིས་འགྲུབ།

དེར་སེང་ལྡེང་གི་ཕུར་པ་རྐང་མགྱོགས་པ་གཉིས་ལ་བསྐུར་ནས་འདི་ང་ཡི་མ་ལ་གཏོད་ལ་ཁོང་ཚོའི་མཁར་ལ་འདེབས་སྟངས་མང་དུ་གྱིས་བྱས་པས། དེ་ཙམ་ན་ཁོལ་མོ་གཅིག་གིས་སྡིག་པ་གླང་ཤད་ཙམ་གྱི་ཀ་བ་འཐེན་པ་མཐོང་སྟེ། ཨ་ཁུའི་བུ་ལ་གནའ་མ་བླངས་བའི་ཆང་སྟོན་གྱི་སར་ཕྱི་མི་རྣམས་གྱེས་ནང་མི་རྣམས་མ་གྱེས་པར་དེར་ཁང་པའི་ཐེབ་འོག་ཏུ་མི་ཉེར་ལྔ་ཤི། དེར་གྲོང་པ་རྣམས་ཀྱིས་མི་ལའི་མཐུ་ཡིན་པར་ཤེས་ནས་གསོད་མི་གཏོང་ཟེར་བའི་ལྐོག་ཆད་བྱས། དེའི་ཡུལ་དེའི་གཙོ་བོའི་ཆུང་མ་རྗེ་བཙུན་ཕ་མ་འཛོམ་དུས་གཡོག་མོ་ཡིན་པ་དེས་རྗེ་བཙུན་གྱི་མ་ལ་བྱ་བཏང༌། མས་ཀྱང་རྣལ་འབྱོར་པ་ཞིག་ལ་བརྔན་བྱིན་ནས་མ་རིག་པར་དུག་པོའི་བར་དེར་གསེར་སྲང་བདུན་སྦས་སྟེང་དུ་ལྷན་པ་ནག་པོ་བརྒྱབ། ཡི་གེ་བསྐུར་བར་བུ་ཁྱོད་ཀྱི་མཐུ་བྱས་བྱུང་བས་གོ་ཆོད། ཁྱོད་ཡུལ་མིས་གསོད་པའི་གྲོས་འཆམས་པས་སྲོག་ཟོན་གྱིས། ད་དུང་གྲོང་པ་འདིར་སེར་བ་གཅིག་ཐོངས་དེ་ནས་བསམ་པ་འགྲུབ་བརྒྱག་ཆད་ན་རི་ཆེན་པོའི་ནུབ་ཕྱོགས་སྤྲིན་ནག་ལྡིང་བའི་འོག་ཏུ་ཉེ་ཚན་བདུན་ཡོད་པས་དེར་ཚོལ་མ་ཤེས་ན་རྣལ་འབྱོར་པ་རང་ལ་འདྲི་རྟོག་གྱིས་བྱས་འདུག།

དེར་ཇོ་མོའི་བརྡ་གོ་ནས་དུག་པོ་ནས་གསེར་བཏོན། དེར་སེར་བ་གནང་བར་ཞུ་བྱས་པས། སེར་བ་ངས་ཀྱང་ཤེས་ཏེ་ཆད་ལ་གནོད་པས་ཁོང་ཅན་དུ་སོང་གསུངས། དེ་ནས་ཡར་ལུང་དུ་གཉགས་ཀྱི་སར་ཕྱིན་ནས་ཞུས་པས་གནང་ཞིང༌། གཉགས་ཀྱི་བུ་གཅིག་དང་ངེད་གཉིས་སྒྲུབ་ཁང་དུ་ཞུགས་ནས་སེར་བ་བསྒྲུབས་པས་ཞག་ཉི་ཤུ་རྩ་ལྔ་ནས་ཐུན་ཐམས་ཅད་ཁོལ་ཏེ། དེར་སྙེ་མ་ཐོན་ཙམ་དུ་སེར་བ་གཅིག་ཕབ་བཙས་མའི་སྒང་གཅིག་ཕབ། དེ་ལྟར་སེར་བ་ལོ་རེ་རེར་ལན་གཉིས་རེ་གཏོང་བ་ཡིན་ཞེས་ཤིང་གི་བྱང་བུ་བྲིས་ཤིང་བཙུག་པས་ཀུན་ཧ་ལས།

དམ་པའི་ཆོས་ལ་སློབ་གཉེར་མཛད་པ།

mini

དེ་སྐབས་མ་ཡིས་བོང་བུ་ཞིག་ལ་ཚོས་ལྟང་གཉིས་བཀལ་ནས་འགྲོས་པར་བསྐུར་ནས་ད་ཡང་བུ་ཡིས་གོ་བཅད། བུ་རང་ཡུལ་དུ་མགོ་མི་ཚུད་པར་བྱས་པ་མ་ལེན་པ་ཡིན། ད་ནི་འགྲོ་གང་བདེ་སོང་ལ་དམ་པའི་ཆོས་ཤིག་ཨི་འགྲུབ་གྱིས་ཟེར་བའི་འཕྲིན་བྱུང་ངོ། །དེར་གཡུང་སྟོན་ཁྲོ་རྒྱལ་གྱིས་ཀྱང་རང་གཞན་གཉིས་སྡིག་ཚན་པོ་ཆེ་བསགས་པས་ཆོས་ངེས་པར་བསྒྲུབ་དགོས་གསུངས། གནུབ་ཆུང་གིས་ཀྱང་དེ་བཞིན་དུ་དགོས་གལ་ཆེ་བ་ཡིན་གསུངས། བླ་མ་གཉིས་ནས་སྣམ་བུ་ལ་སོགས་ཕྱག་རྟེན་གནང་ནས་གཙང་རོང་སྟོན་ལྷ་དགའ་མཇལ་དུ་བྱོན།ཕྱག་རྟེན་རྣམས་ཕུལ་ཏེ་མཇལ། གྱེར་སྟོན་གྱིས་གང་ནས་འོང་གསུངས། ཁྲོ་རྒྱལ་གནུབ་ཆུང་གཉིས་ཀྱི་རྩ་ནས་འོང་ཞུས། ཨེ་མཐུ་སེར་གྱིས་མི་མང་པོ་སྡུག་བསྔལ་ལ་སྦྱར་ཨཾ་གསུངས། སྡིག་ཆེ་བས་ཐུགས་ལ་འདོགས་པར་ཞུ་ཞུས་པས། འདིར་འོང་བ་ལེགས། ངའི་དམ་ཆོས་རྫོགས་པ་ཆེན་པོ་འདི། ནང་རྟོགས་ན་ནང་སངས་རྒྱས། ནུབ་རྟོགས་ན་ནུབ་སངས་རྒྱས། སྐལ་ལྡན་ལས་འཕྲོ་ཅན་རྣམས་སྒོམ་མི་དགོས་པར་གྲོལ་བའི་ཆོས་ཟབ་མོ་ཡོད་པས་སྐྲག་མི་དགོས་གསུངས་ནས་གདམས་པ་ཡང་གནང༌།

མྱང་སྟོད་ཁ་རེ་བྱ་བ་ན་ཁ་མི་བྱང་ཆུབ་རྒྱལ་པོ་ལས་སྒྱུ་འཕྲུལ་གྱི་རྒྱུད་ལ་སོགས་པ་མང་དུ་ཞུས། ཡར་འབྲོག་ཏུ་མར་པ་འབྱུང་ངེ་བྱ་བ་ལ་མདོ་སེམས་སོགས་ཀྱི་ཆོས་མང་དུ་ཉན། གཞན་ཡང་བླ་མ་མང་པོ་ལས་ཆོས་མང་དུ་ཉན་ཞིང་སློབ་གཉེར་བག་རེ་ཡང་བྱས། དེ་ནས་གཙང་རོང་དུ་སྙིང་རུས་དྲག་པོ་བསྐྱེད་ནས་བསྒྲུབ་པའི་ཚེ། རོང་སྟོན་ནས་ངའི་ཆོས་འདིས་ཁྱོད་ལ་ཕན་ཆེར་མི་འོང་བས། ད་ལྷོ་བྲག་ཆུས་ཁྱེར་དུ་མར་པ་ལོ་ཙཱ་བྱ་བ་རྒྱ་གར་ནཱ་རོ་པཎ་ཆེན་གྱི་ཐུགས་སྲས་སྡིག་པོ་ཆེ་བཙན་ཐབས་སུ་སངས་རྒྱས་པའི་གདམས་པ་ཡོད་གྲགས་པས་དེར་འགྲོ་བ་དྲག་གསུངས། མར་པའི་མཚན་ཐོས་པ་ཙམ་གྱིས་ཐུན་མིན་གྱི་དད་པ་སྐྱེས། དེ་ཉིད་དུ་ཁྲེལ་པོ་ཁུར་ནས་བྱོན། ལྷོ་བྲག་ཏུ་སླེབས་པ་དང་མར་པ་ལོ་ཙཱ་གར་བཞུགས་དྲིས་པས་དེ་འདྲ་ཟེར་བ་འདིར་མེད་ཟེར། གཅིག་གི་ཁུ་བོ་བློ་གྲོས་ཡིན་པ་འདྲ་ཁོ་རྒྱ་གར་ཐེང་འགའ་ཕྱིན་པ་ཡིན་ཟེར། དེ་ཡིན་ན་སྤང་རྐོ་ཞིང་ཡོད་པས་ཡར་སོང་དང་ཟེར། དེར་སོང་བས་རྣལ་འབྱོར་པ་གཟུག་བོང་ཆེ་ཞིང་རལ་པ་སིག་གེ་བ་ཞིག་སྤང་རྐོ་ནས་གདའ། དེར་མར་པ་ལོ་ཙཱ་གར་བཞུགས་ངེད་ཀྱིས་མཇལ་འདོད་བྱས་པས། སྤང་ལ་རི་མོ་ཞིག་བྱས་འདི་རྐོས་དང་བླ་མ་མཇལ་སྣ་བྱེད་ཟེར་སྤང་དེ་རྐོས་པས་ཐོན་པ་དང༌། བླ་མ་དམ་པའི་གདམ་ངག་གནད། །རྩ་ཁམས་དབུ་མར་བསྡུས་པ་ཡི། །ཉོན་མོངས་ཐ་བ་འདུལ་ལགས་ན། །འབྲས་བུ་མྱུར་དུ་སྨིན་ཏེ་མཆིས། །ཟེར་ནས་ས་ལ་རི་མོ་ཅིག་བྱས་ཏེ། འང་འདི་ཙམ་ཞིག་རྐོས་ཟེར། ཡང་དེ་རྐོས་པས་ཐོན་ཙམ་ན། བརྒྱུད་ལྡན་བླ་མའི་བྱིན་རླབས་ཀྱིས། སེམས་ཉིད་ལྷུག་པའི་ངོ་བོར་གནས། དྲན་པའི་ཐ་བ་འདུལ་ལགས་ན། སྟོན་ཐོག་འབྲས་བུ་མྱུར་དུ་སྨིན། ཞེས་ཟེར་ཞིང་ལས་ལ་རེམ་པོ་ཞིག་འདུག་ཟེར།

དེ་ནས་སྤོ་ཐོའི་གསེབ་ནས་ཆང་གཅིག་བླངས་ཏེ། ཁོ་རང་གིས་གསོལ་ཏེ། འཕྲོ་གཅིག་གདའ་བ་མི་ལ་ལ་བླུད་ནས་ངོམས་པར་བྱུང༌། དེ་ནས་ཡང༌། བདེ་བ་ཆེན་པོའི་ཆང་གི་དངོས། ཡང་དག་དོན་ཆེན་གསང་བ་འདིས། ཡོངས་དག་ཐ་བ་འདུལ་ལགས་ན། སྟོན་ཐོག་འབྲས་བུ་སྨིན་ཏེ་མཆིས། ཞེས་ཟེར་ཞིང་དེ་དག་ཁ་འབྱང་གི་ཚིགས་སུ་གོ་ཞིང༌། གཞན་གྱི་རྟོག་དཔྱོད་ཅི་ཡང་མ་བྱུང༌། བླ་མ་ཡིན་པར་ཡང་མ་ཤེས། དེ་ནས་ལག་ཆ་རྣམས་འཟུང་ནས་སྒོ་ཙར་ཕྱིན་པ་དང༌། འདིར་སྡོད་དང་ངས་ཞུ་ལེན་ཅིག་བྱེད་ཟེར། དེ་ནས་དལ་གཅིག་ལོན་པ་དང༌། གཅིག་བྱུང་ནས་མཇལ་འདོད་ན་ནང་དུ་བྱོན་ཟེར། དེར་སོང་ནས་བར་ཁང་གཅིག་ཏུ་ཕྱིན་པ་དང༌། ད་ཅིའི་རྣལ་འབྱོར་པ་དེ་རལ་པ་ས་བྲུལ་ལེ་ན་བཟའ་དང་སྟེགས་གཅིག་གི་ཁ་ན་སང་ངེ་བཞུགས་པས་ཞལ་མཐོང་བ་དང༌། དངངས་ཡེར་གྱིས་སོང་བས་བླ་མས་དེ་ཙམ་འཇིགས་མི་དགོས་ངའི་སྤྱོད་ལམ་འདི་ལ་གཞན་ཀུན་མི་ཤེས་པ་ཡིན་གསུངས། ལོ་རྒྱུས་ཞིབ་ཏུ་ཞུས་ནས་མི་སྡིག་པོ་ཆེ་ཡིན་པས་ལུས་ངག་ཡིད་གསུམ་འབུལ། ལྟོ་གོས་ཆོས་གསུམ་ཞུ་ཞུས་པས། གསུམ་ཀ་མི་འོང་གསུངས་པས་ཆོས་གནང་བར་ཞུ་ཞུས་པས། ཁྱོད་ཀྱི་མིང་ལ་མཐུ་ཆེན་ཐོག་གསུངས།

དེར་ལྷོ་བྲག་ཏུ་སྟོན་ཐོག་གཅོད་སར་བསོད་སྙོམས་བྱས་པས་ནས་དགའ་བར་བྱུང༌། ནས་ཕད་ཙེ་གང་ཁུར་ནས་བླ་མར་ཕུལ་བས་ཤེད་པོ་ཆེས་མི་འོང་ཁང་ཤིང་ཆགས་དོག་ཡོད། ཁྱོད་ལ་ལས་ཀ་རེམ་པོ་ཞིག་འདུག་པས་ངའི་ཇོ་སྲས་མདོ་སྡེ་ལ་ཕོག་པའི་མཁར་གཅིག་བརྩེགས་དགོས་གསུངས་ནས། མཁར་སྒོར་མོ་སོག་ཀ་ཟླ་གམ་གྲུ་གསུམ་རེ་ཕྱེད་ཙག་ལོང་ནས་ཡང་ཕྱིར་བཤིག་པའི་ཞལ་བཀོད་གནང། ཡང་མཁར་ཁང་གྲུ་བཞི་ཕྱི་ཁྱམས་ཀ་བ་སུམ་ཅུ་སོ་གཉིས་དང་བཅས་པའི་རྨིང་བཞག །ཉིན་པར་མཁར་བརྩེགས། ནང་སྔ་ནུབ་ཀྱི་ཆུ་དང་མེ་ཤིང་གསོག །སྲོད་ལ་རྔོ་འཐག་བྱས། བླ་མའི་ཆིབས་སྟེགས་ཇོ་མོའི་གཞོན་སྟེགས་བྱས། ལུས་སྲོག་ལྟོས་མེད་མོས་གུས་བྱས་ཤིང་བརྩེགས་པས་ཐོག་གསུམ་གྲུབ། དེ་དུས་རྔོག་གཞུང་པ་སོགས་སློབ་མ་མང་པོར་དབང་ཞུར་ཕྱིན། ཇོ་མོའི་མར་རྡོག་ཆེ་བ་གཅིག། ཤ་སྐལ་གཅིག སྣམ་བུ་གཅིག་ཁྱེར་ནས་དབང་གྲལ་བསྡད། འདི་རྣམས་གང་ནས་བྱུང་གསུངས། ཇོ་མོའི་གནང་ལགས་བྱས། ང་ཡི་དངོས་པོ་ཁྱོད་ཀྱི་འབུལ་བ་མི་འོང༌། ཁྱོད་ལ་ཡོད་ན་ཁྱེར་ཤོག་གསུངས། དེར་ཐུགས་མུག་ནས་བཤུམ་པར་ཇོ་མོས་སེམས་གསོ་བཏང། ཇོ་མོས་ཉིན་རེར་ཚལ་མ་རྒྱ་མ་རེ་དུས་གསུམ་དང༌། ཆང་ངོམ་པ་རེ་གནང་ནས་ཐུགས་ལ་བཏགས། ཡང་གཅིག་གཉལ་པའི་འབུལ་སྐྱེལ་ཡོང་བ་ལྷོ་སྨད་པའི་ཇག་པས་ཁྱེར་བ་བྱུང་སྐབས། བླ་མས་འདི་བསྟན་པ་ལ་གནོད་པ་ཡིན། ཁྱོད་ཀྱིས་སེར་བ་ཕོབ་དང་སྡིག་པས་མི་གནོད་པའི་ཐབས་ཡོད་གསུངས། སེར་བ་ཕབ་ནས་ད་གདམས་པ་ཞུ་འཚལ་ཞུས་པས། སྡིག་བྱས་པའི་བརྔན་པར་ཆོས་སྟོན་མི་རུང་གསུངས།

དེར་སྡུག་བསྔལ་ཚད་མེད་བྱུང༌། དེ་ནས་ཇོ་མོས་གྲོ་ཆས་ཅུང་ཟད་གནང་བ་ཁྱེར་ནས་ཡོང་བས་བྲག་རྩ་ཞིག་ཏུ་ཉལ། ཕྱིར་ནང་ཚ་བ་བསྐོལ་བའི་དོན་དུ་རྗེས་ཀྱིས་གང་ནས་འདུག །ག་རེ་དེ་སྔོན་ཁང་པ་བརྩེགས་པ་ཕྱེད་བླ་མའི་དོན་ཡིན་རུང༌། ཕྱེད་རང་གི་རེད་འདུག་ཡར་ལོག་པ་དྲག་སྙམ་ཕྱིན་པས་ཇོ་མོ་ཐུགས་དགྱེས། ཡང་མཁར་ལས་གྱིས་གསུངས། དེ་ནས་སྒལ་པ་བྱང་ནས་རྨ་རུལ་སོང་བ་བླ་མས་གཟིགས་ནས་རྟ་བོང་ལྟར་སྒལ་ལྕིབ་ཕུབས་གསུངས། ཡང་དབང་ཞུ་བ་འགའ་བྱུང་བར་མ་ཚུད།

ཇོ་མོས་ཐབས་བྱ་གསུངས་ནས་མཐུ་ཆེན་འགྲོ་བ་སྐད་ཇོ་མོས་བཤོལ་བ་སྐད་བྱས་པས་ཅི་བྱེད་པ་ཡིན་གསུངས། མཐུ་ཆེན་འགྲོ་བ་རེད་ཞུས་ཀྱང་མ་གནང༌། ཕྱིར་ཉིན་ཁྱོད་ཞེ་སྡང་སྐྱེས་སམ་གསུངས། མ་སྐྱེས་ཀྱང་རང་ལ་ཆོས་སྐལ་མེད་པ་རེད་སྙམ་མཚན་ཁོ་ནར་ངུས་པ་ཡིན་ཞུས་པས། ཁྱོད་ང་ལ་ངུ་ཤག་བྱེད་པའི་ཡུས་ཅི་ཡོད་གསུངས་ཕྱག་མཁར་བརྒྱབ་ནས་སྒོར་ཕུད། ཇོ་མོས་ད་དུང་ཁྱོད་ཡི་མ་ཆད་པར་གཉུག་བསྲིང་དང་ངས་ཀྱང་ཞུ་ནས་གནང་བ་ཡིན་གསུངས། ཁོང་རང་གིས་ཕྱག་རྒྱ་ཆེན་པོའི་གདམས་པ་ཞིག་གནང་བ་ཉམས་སུ་བླངས་པས་སེམས་ལ་འཕྲོད་པར་བྱུང༌། དེ་ལྟར་ལོ་རེ་ལ་རྩག་རེ་ཐོན་པའི་ཐོག་བདུན་ལོན། དེར་དོལ་གྱི་མཚུལ་སྟོན་དབང་ངེ་དཔོན་སློབ་རྣམས་བདེ་མཆོག་གི་དབང་ཞུ་བར་སླེབ། ཇོ་མོའི་ཕག་ནོར་གཡུ་ཞིག་ཡོད་པ་འདི་མཐུ་ཆེན་གྱི་ཕྱག་རྟེན་ཡིན། ད་རེས་དབང་གནང་བར་ཞུ་ཞུས་མདུན་དུ་ཁྲིད་པས། ང་ཡི་གཡུ་ཡིན་ཁྱོད་ཀྱི་འབུལ་བ་མི་ཡོངས་གསུངས་ནས་ཕྱག་འཁར་རྒྱབ་པས་ཁོང་གཉིས་ཕྱིར་བྲོས། དེར་ཇོ་མོ་ན་རེ། ནཱ་རོ་མཻ་ཏྲིའི་བརྒྱུད་པ་ཚེས་བཅུ་ལ་བརྩོན་མཛད་པས་དེ་དུས་ཐབས་ཤིག་ཡོད་ཟེར།

དེར་ཚེས་བཅུའི་སྐབས་ཆང་གར་མ་མང་དུ་བླ་མ་ལ་དྲངས་པས་བད་ནས་གཟིམ་པའི་ཚེ། ཏཻ་ལོ་ནཱ་རོའི་དབུ་སྐྲ་ན་བཟའ་དུམ་བུ་རེ་དང༌། དམ་རྫས་བདུད་རྩི། ཕྱག་ཕྲེང་གི་རྡོག་མ་ཁ་ཤས་རྣམས་བླངས་ཏེ། འདི་རྣམས་ཁྱེར་ལ་རྔོག་ཅན་སོང་དང་བླ་མའི་གདམས་པ་ཁོང་ལ་ཡོད་པས་ཞུས་ཤིག་གསུངས་ནས་བཏང་ངོ༌། །དེར་མཐུ་ཆེན་བླ་མ་རྔོག་པའི་མདུན་དུ་སླེབས་ནས་རྟེན་རྣམས་ཕྱགག་ཏུ་ཕུལ་ནས་ཇོ་མོས་འདིར་བཏང་བ་ཡིན། གདམས་ངག་ཐུགས་ལ་འདོགས་པར་ཞུས། འོ་ན་དོར་ཚོང་དུས་པས་ངའི་འབྲོག་ནོར་ཐམས་ཅད་དེད་ནས་གཏད་དུ་མ་ཉན་པས་དེར་སེར་བ་ཕོབ། དེ་ནས་གདམས་ངག་བྱ་ཡིས་གསུངས། དེར་དོལ་པ་ལ་སེར་བ་ཕབ་ནས་ལོ་ཐོག་བཅོམ། ལམ་བར་ནས་བྱེའུ་རོ་ཕད་བུ་གང་ཁྱེར་བ་བླ་མའི་དྲུང་དུ་སྤུངས་པ་ལ། བླ་མས་སེ་གོལ་གཅིག་མཛད་པས་བྱིས་རོ་རྣམས་ནམ་མཁར་ཅིག་དེར་གྱིས་འཕུར་སོང་བས་ངོ་མཚར་སྐྱེས། དེར་དབང་གདམས་ངག་ཐོབ་ཅིང་སྒྲུབ་པ་ལ་འབད་ཀྱང་ཡོན་ཏན་ཆེན་པོ་མ་བྱུང་བས། འདིར་བླ་མའི་བཀའ་ཨི་ཡོད་གསུངས་པས། མེད་ཞུས། ཇོ་མོས་བཏང་བ་ཁོ་ན་ཡིན་ཞུས་པས། ཨེ་ཨེ་དེ་ཡིན་པ་འདྲ། ད་ལན་བླ་མའི་སྐུ་མཁར་ཚར་བའི་དགའ་སྟོན་དུ། ང་རང་ཤོག་གསུངས་གདའ་བས་དངོས་པོ་སྤོང་དག་བྱེད་རྒྱུ་ཡིན། ཁྱོད་ཀྱི་ཟངས་དཀར་ལུང་བཞི་འདི་ཟུང་ལ་བླ་མར་ཕུལ་གསུངས། ཁོང་རྣམས་ལྷོ་བྲག་མདར་སླེབ་མཐུ་ཆེན་སྔོན་དུ་སོང་ནས་ཇོ་མོ་མཇལ་བས་ཐུགས་དགྱེས།

རྔོག་གཞུང་པས་འབུལ་སྐྱེལ་དེད་ནས་བྱོན་ཡོད་པས་བསུ་བ་མཛད་དམ་ཞུས་པས་བསུ་བ་འཐད་གསུངས། ཇོ་མོ་ནས་སྤོས་ཕོར་ཐོགས་ནས་བསུ་བ་མཛད། དེ་ནས་བུ་ཆེན་རྣམས་འདུས་ནས་མཁར་སྟོན་ལ་ཚོགས་འཁོར་བསྐོར་ཞིང་དབང་བསྐུར་མཛད། ཡང་བླ་མས་རྔོག་ལ་མཐུ་ཆེན་ཁྱོད་ཅན་དུ་སོང་བར་གདམས་པ་ཨི་བྱིན་གསུངས། རྟེན་རྣམས་གནང་བས་བྱིན་པ་ཡིན་ཞུས། ཇོ་མོས་དེ་ང་ལེན་པ་ཡིན་ཞུས་པས་འདི་ཚོས་རྐུ་མ་བྱས་གསུངས་ནས་རྦ་བེར་བརྒྱབ། རྔོག་པས་སྤོང་དག་གི་འབུལ་བ་བྱས་ནས་སྙན་དྲིལ་ཞུས་པར། སྙན་བརྒྱུད་ཆོས་ཀྱི་ཕྱི་མོ་ཡིན། ཁྱོད་ཀྱི་ར་ཡི་ཕྱི་མོ་བཞག་པས་དེ་ཕུལ་གསུངས། དེ་ཉིད་དུ་བྱོན་ནས་རྒྱབ་ཏུ་ཁུར་ནས་ཕུལ། ང་ལ་དེ་འདྲའི་དགོས་པ་མེད་ཀྱང་ཆོས་ཀྱི་ཆེ་བ་ཡིན་གསུངས། དེ་ནས་མཐུ་ཆེན་གྱི་ཟངས་ཕུལ་བ་ལ་དགྱེས་ཏེ། རྦ་བེར་བརྒྱབ་ཅིང་རྟེན་འབྲེལ་བཟང༌། ཆེ་རྒྱུ་མེད་ཏེ་རང་ལ་མནོག། ནང་གཙང་བས་དམ་ཚིག་གཙང་ཞིང་སྣོད་དང་ལྡན། མདོག་དམར་བས་མཁའ་འགྲོ་འདུ་ཞིང་གདམས་པ་ཟབ་མོ་ཐོབ། ཕྱི་ནག་པས་འཕྲལ་སྡུག་དཀའ་བ་སྤྱད་དགོས། ནང་ན་ནས་འབྲུ་གསུམ་བླུགས་པས་ལྟོ་བ་བསེར་རེ་བ་འབྱུང༌། ལུང་བཞི་ཡོད་པས་རྒྱུ་མཚན་བཞི་འོང༌། རྒྱུ་བཟང་བས་རྒྱུད་པ་ཇེ་བཟང་ལ་འགྲོ། སྐད་སྙན་པས་སྙན་པ་ཆེ་གསུངས། དེ་ནས་མཐུ་ཆེན་ལ་དགེ་བསྙེན་གྱི་སྡོམ་པ་གནང་ཞིང༌། མཚན་རྡོ་རྗེ་རྒྱལ་མཚན་བྱ་བར་བཏགས། བདེ་མཆོག་ལ་སོགས་པའི་དབང་བསྐུར་བས། བླ་མ་འཁོར་ལོ་བདེ་མཆོག་དངོས་སུ་ཞལ་གཟིགས། ད་ཡང་མཐུ་ཆེན་ངེད་གཉིས་མཚམས་ལ་འདུག་དགོས་གསུངས་ནས་སྐུ་མཚམས་མཛད་ཅིང༌། སྙན་བརྒྱུད་ཆོས་དྲུག་ཕྱག་རྒྱ་ཆེན་པོ། རིམ་ལྔའི་དམར་ཁྲིད། བསྲེ་འཕོ་སྐོར་གསུམ་ལ་སོགས་གདམས་པ་ཐམས་ཅད་བུམ་པ་གང་བྱོའི་ཚུལ་དུ་གནང་ཞིང་ཁྱོད་ལ་བྱིན་དང་གཞན་ལ་བྱིན། གལ་ཏེ་སྲང་ལ་གཞལ་ཡོད་ན། འབུམ་འགྱུར་བས་ཀྱང་མི་ལྷག་སྟེ། གསུང་ཞིང་ད་ཡང་གདམས་པ་ཐམས་ཅད་རྫོགས་པར་ཐོབ་པ་ཡིན་པས། ལྷོ་བྲག་སྟག་ཉའི་ཕུག་ཏུ་སོང་ལ་སྒོམས་གསུང༌།

དེར་སོང་ནས་བསྒོམས་པས་ཡོན་ཏན་ཐམས་ཅད་རྒྱུད་ལ་སྐྱེས་ནས་ཡོད་པའི་ཚེ། མཁའ་འགྲོ་མའི་ལུང་བསྟན་བྱུང་ཞིང་བླ་མའི་མདུན་དུ་སོང་སྟེ་འདོད་ཆོས་ཀྱི་བྱེ་བྲག་མང་དུ་ཞུས་པ་རྫོགས་པར་གནང་ནས། ན་མོ་བཀའ་བརྒྱུད་གོང་མའི་རྣམ་ཐར་འདི། ཞེས་དང༌། ཇོ་མོ་བདག་མེད་མས་ཀྱང༌། ཁྱོད་སྙིང་རུས་ཅན་གྱི་སྡུག་བསྲན་ཅན། ཞེས་སོགས་གསུངས་མི་ལ་ཡང་ཤིན་ཏུ་དགའ། དེ་ནས་བླ་མ་དང་ཇོ་མོས་ཐུགས་ལ་བཏགས་ཤིང་གདམས་ངག་ཐམས་ཅད་རྫོགས་པ་དང༌། མི་ལས་མགུར་ལ་སྔ་བ་གཙང་ལ་ཡར་འགྲོའི་མགུར་ཕུལ་བ། རྗེ་མི་བསྐྱོད་ཀྱི་ངོ་བོ་ལྷོ་བྲག་པ། ཞེས་ཞུས་པ་དང༌། བླ་མའི་ཞལ་ནས། རྗེ་བླ་མའི་སྐུ་ལ་གསོལ་བ་འདེབས། ཞེས་པ་ནས། མི་ལ་རས་པའི་སྙིང་རུས་ལ། སངས་རྒྱས་བསྟན་པའི་སྲོག་ཤིང་ཡོད། ཅེས་སྨོན་ལམ་གྱི་མགུར་གསུངས། ད་ཞག་ཤས་མ་འགྲོ་བར་ཇོ་སྲས་འདས་པའི་དུས་མཆོད་གཅིག་བྱེད་གསུངས། དེར་གྲྭ་སློབ་ཐམས་ཅད་འཚོགས་ནས་ཚོགས་ཀྱི་འཁོར་ལོ་བསྐོར་བའི་ཚོགས་གྲལ་དུ། མཐུ་ཆེན་གྱི་ཕྱག་ཕུལ་ཏེ། ཇོ་སྲས་འགྲན་ཟླ་བྲལ་བ་དེ་གདུལ་བྱའི་བསོད་ནམས་ཀྱིས་མ་དབང༌། ད་ཆོས་བརྒྱུད་འཛིན་པའི་སློབ་མ་དང་དར་རྒྱས་གང་དུ་འབྱུང་ཞུས་པས། ངས་ཀྱང་དོ་ནུབ་བརྟགས་པ་བྱེད་ནས་ནངས་པར་ཆོས་ཀྱི་ཕས་ཕོག་བྱེད་གསུངས། ཕྱིར་ནང་ཐམས་ཅད་འཚོགས་པར་རྨི་ལམ་ལུང་བསྟན་གྱི་མགུར་གསུངས་པས། ཤར་དུ་ཀ་ཆེན་གཅིག་བཙུགས་པ་རྨིས། ཞེས་གསུང་ཞིང་གཞུང་གི་རྔོག་སྟོན་ཆོས་རྡོར་གྱིས་བཤད་རྒྱུན་ཆུ་བོའི་གཞུང་དང་འདྲ་གསུངས། དོལ་གྱི་ཚུལ་སྟོན་དབང་ངེས་འཕོ་བ་རྒྱ་མཐོང་ཁ་ཕྱེས་པ་ལྟ་བུས་འགྲོ་དོན་གྱིས། གཙང་གི་མེས་སྟོན་ཆེན་པོས་འོད་གསལ་བུམ་ནང་མར་མེ་ལྟ་བུ་སྦོར། ཁྱོད་གུང་ཐང་གི་མི་ལ་རས་པས་གཏུམ་མོ་ཤིང་བཤག་ལ་མེ་སྦར་བ་ལྟ་བུས་རང་གཞན་སྨིན་པར་གྱིས། ལར་མཁར་གྱིས་ཁོ་བོ་ལ་དགོས་པ་མེད་རུང་ཁྱོད་སྒྲིབ་པ་སྦྱངས་བའི་རྟེན་འབྲེལ་ཡིན། ད་དེ་ལྟར་རྫོགས་པར་མ་གྱུར་པས་གནས་གངས་ཁྲོད་འགྲིམས་ལ་སྒྲུབ་པ་ལ་བརྩོན་ན་གྲོལ་བར་འགྱུར་རོ་གསུངས། དེ་ནས་བླ་མ་ཡབ་ཡུམ་དཔོན་སློབ་རྣམས་ཀྱིས་གྲོ་ལམ་ཞིག་ཏུ་སྐྱེལ།

དེར་བླ་མས་མི་ལའི་ཕྱག་ནས་བཟུང་སྟེ་རྒྱ་གར་ནས་ལུས་མེད་མཁའ་འགྲོའི་ཆོས་སྐོར་དགུ་ཡོད་པའི་བཞི་ངས་བླངས་ཡོད་ལྔ་པོ་དེ་ཁྱོད་ཀྱིས་ལོན་པར་གྱིས། ང་དང་ཁྱོད་གཉིས་འདུ་འབྲལ་མེད་པ་ཡིན་ཞེས་གསུངས་ནས་བཀྲ་ཤིས་སྨོན་ལམ་མཛད་དོ། །དེ་ནས་རྗེ་བཙུན་ཡུལ་དུ་བྱོན་པས་ཁང་པ་འགྱེལ་ཞིང་འཇག་མས་གང༌། སྲིང་མོ་སྤྲང་དུ་སོང་བས་ནུབ་མོ་གཟིམ་མ་ཟིན། ཐོ་རངས་སྐྱོ་ཕྱེད་དེ་བ་ལ། མི་རྟག་པའི་མགུར་གསུངས། དེ་ནས་སློབ་དཔོན་རྙིང་མ་བའི་དྲུང་དུ་བྱོན་ནས་མི་རྟག་པའི་མགུར་གསུངས། ཨ་ནེ་ཕུ་འབྲོག་མདའ་ཞིང་འཛོམ་ཡོད་པས་དེར་སོང་དང་རྒྱག་ཆུ་ལ་ཕན་པ་ཞིག་སྟེར་འོང་གིས་གསུངས། དེར་ཨ་ནེ་ཅན་དུ་སོང་ཙ་ན་སྤྲང་པོ་ཕ་མེས་བླ་འཚོང་པོ་ཟེར་ནས་སྦྲ་ཡི་ཀ་བས་བརྡུང༌། གུང་ཐང་ཕུག་ཏུ་བཞུགས་དུས་ཕྱེ་དུམ་པ་ཞིག་ཞིང་རིན་ཡིན་ཟེར་བསྐྱལ། རག་མ་བྱང་ཆུབ་ནམ་མཁའ་རྫོང་དུ་བསྒོམས་པས་རྨི་ལམ་བརྡ་ཤར་གྱི་མགུར་མཛད། བྲག་དཀར་སྤོ་མཐོན་དུ་ཟྭ་ཚྭ་མེད་རྡོལ་མེད་གསོལ་བས་སྐུ་ལུས་ཤེད་མེད་པར་གྱུར། ཉིན་གཅིག་ཡུལ་མིས་མཐོང་བས་འདྲེ་རེད་ཟེར་ཞིང་བྲོས། ཡང་སྒྲོ་ཚོལ་མི་འགའ་བྱུང་བས་ཙམ་པ་དུམ་པ་ཞིག་བྱིན་པ་ཟྭ་ལ་བཏབ་ནས་གསོལ་བས་ཁམས་དྭངས། དེར་ཡུལ་མིས་རྗེ་བཙུན་གྱི་ལོ་རྒྱུས་བཤད་པས་པེ་ཏས་ཚོལ་ནས་མཇལ་དུ་ཕྱིན། སྐུ་ལུས་མཐོང་བས་ཡིད་སྡུག་ནས་མང་དུ་ངུས། འདིར་ཤི་བས་མི་ཕན་བསོད་སྙོམས་ལ་སོང་ཟེར་བས། སྡིག་ཆེ་བས་དགེ་སྦྱོར་མ་འགྲུབ་ན་བསོད་སྙོམས་ལ་མི་འགྲོ་གསུངས།

ཡང་པེ་ཏས་ཆང་སྦང་ཟོ་བ་གང་དང་ཤ་ཟན་ཅུང་ཟད་ཁུར་བ་ཚོགས་འཁོར་མཛད་ཡང་ཉིན་གཅིག་སྣམ་བུ་སྲེ་བོ་ཞིག་ཁྱེར་ནས་འདི་ལ་གོས་གྱིས་ལ་བླ་མ་བ་རི་བའི་ཉེ་གནས་ལ་འགྲོ་ཟེར་བས་དེར་ཆོས་བརྒྱད་སྤང་པའི་མགུར་གསུངས། གཞན་ཡང་ཁྱི་ར་བ་དང་གཤིན་རྡོར་མོ་སོགས་ཀྱིས་འཚོ་བ་ཅུང་ཟད་རེ་སྦྱར་བ་ལ་སྨོན་ལམ་དང་བསྔོ་བ་མཛད། དེ་ལྟར་གནས་དེར་ལོ་དྲུག་སོང༌། དེ་ནས་བྲག་དམར་མཆོང་གླིང་ཁྱུང་གི་རྫོང་ལ་ལོ་བཅུ་གཉིས་ཀྱི་དམ་བཅའ་བྱས་ནས་ཡུལ་མིས་མི་ཚོར་བར་ཤི་ཨི་ཐུབ་བསམ་པ་མཛད་གསུངས། ཉིན་གཅིག་ཐུག་མ་བཏུས་ནས་རྡོ་ལེབ་སྟེང་དུ་བཏིང་བས་རླུང་གིས་གཏོར་ཤིང་སྐམ་པོ་བཅག་པས་འགྱེལ་ནས་དབང་པོ་མ་བྱུང༌། ལྷག་པས་བརྒྱལ་སངས་ནས་ཡིད་སྐྱོ་བའི་སྐབས་བླ་མ་བཞུགས་པའི་ཕྱོགས་ནས་སྤྲིན་དཀར་པོ་བྱུང་བར་བླ་མ་དྲན་དྲུག་གི་མགུར་མཛད། སྤྲིན་སྣམ་བུ་བརྐྱང་འདྲའི་སྣེ་མོར་བླ་མ་མར་པ་ཞལ་གཟིགས་ནས་དགའ་དྲག་པའི་གསོལ་འདེབས་མཛད། དེ་ནས་ཕུག་པར་ཨ་ཙ་ར་བདུན་གྱི་ཆོ་འཕྲུལ་ལ་བྱམས་སྙིང་རྗེའི་མགུར་མཛད་པས་འཇའ་ཡལ་བ་བཞིན་སོང༌། དེར་ལོ་བཅུ་གཉིས་ཀྱི་དམ་བཅའ་རྫོགས། དེ་ནས་ལ་ཕྱི་ཆུ་བཟང་དུ་བྱོན་ནས་བསྒོམས་པས་ལྷ་འདྲེས་ཆོ་འཕྲུལ་སྣ་ཚོགས་བྱུང་བ་ཟིལ་གྱིས་མནན། ཕྱི་ནང་ཁ་ཟས་ཀྱི་བྱེ་བྲག་མང་པོ་ཕུལ་བ་བཞེས་པས་ཟླ་མང་པོར་འཚོ་བ་མི་དགོས་པ་བྱུང༌། སྙེ་ནམ་དུ་གཤིན་རྡོར་མོ་སྟོན་པ་ཤཱཀྱགུ་ཎ་སོགས་ཀྱིས་བསྙེན་བཀུར་ཡོན་བདག་བྱས། རྗེ་བཙུན་ལ་ཕྱི་གངས་དུ་ཕྱེ་བྲེ་དོ། ཤ་གཟུག་གཅིག་མར་ཤག་གཅིག་བསྣམས་ནས་བྱོན་པ་ལ། སྟག་ཡོས་གཉིས་ཀྱི་ལོ་མཚམས་སུ་ཁ་བ་ཉིན་མཚན་བཅོ་བརྒྱད་བབས་ལམ་ཆད། ཡོན་བདག་རྣམས་ཀྱིས་འདས་མཆོད་ཕུལ།

ཕྱིས་ཟླ་བ་བདུན་པའི་ནང་ཡུལ་མི་དྲུག་འཚོལ་དུ་སོང་བས་རྗེ་བཙུན་དང་མཇལ། རྗེ་བཙུན་གཟི་མདངས་ཆེ་བར་བཞུགས་པས་ལྷ་འདྲེས་འཚོ་བ་ཕུལ་བ་འདྲ་ཞུས། སྐབས་འགར་མཁའ་འགྲོ་མས་ཚོགས་སྐལ་དང༌། སྐབས་འགར་མི་མ་ཡིན་གྱི་འཚོ་བ་སྦྱར་གསུངས། དེ་ནས་སྙེ་ནམ་གྱི་བྲག་ཕུག་ལ་བཞུགས་སྐབས་རས་ཆུང་པ་སོགས་སྐལ་ལྡན་གྱི་སློབ་ཚོགས་མང་དུ་འདུས་ནས་ཆོས་གསུངས། གཞན་ཡང་ཤེལ་ཕུག་ནམ་མཁའི་རྫོང་དང༌། སྐྱིད་ཕུག་ཉི་མ་རྫོང་དུ་ཡོན་བདག་འདུས་ནས་ཆོས་ལ་བཀོད་པའི་མགུར་མཛད། དེ་ནས་ལིང་པའི་བྲག་ཏུ་བྲག་སྲིན་མོ་ལ་མགུར་གསུངས་ནས་དམ་ལ་བཏགས། དེ་ནས་སློབ་ཚོགས་རྣམས་ཀྱིས་ལིང་པའི་བྲག་ནས་སྙེ་ནམ་བྲོད་ཕུག་ཏུ་གདན་དྲངས་པེ་ཏ་དང་ཨ་ནེས་ཆོས་ཞུས། དེར་རྗེ་བཙུན་གྲགས་པའི་སྙན་པས་ཁྱབ་ནས་སྡེ་རྣམས་ཀྱིས་ཚོགས་གསོགས་དང༌། རས་པའི་སློབ་ཚོགས་མང་དུ་བྱུང༌། སྙེ་ནམ་དུ་ལོ་སྟོན་དར་ལོ་གཉིས་ཀྱིས་གཙོར་བྱས། བཀའ་གདམས་པའི་མཚན་ཉིད་རྣམས་ཕྲག་དོག་གིས་རྩོད་པ་བྱས་པར། སྙེ་ནམ་རིའི་དགོན་པ་ན། །མི་ལ་རས་པ་སྒོམ་པ་ལ། །སྟོན་པ་ལོ་སྟོན་ཟུག་རྔུ་སྐྱེས། །དེ་རང་སྟོན་པ་ཨེ་མ་འཁྲུལ། །ཡོན་བདག་ཕོ་མོའི་དད་ཟས་ལ། །ཁྱེད་མཁས་བཙུན་བཟང་པོ་སེར་སྣ་སྐྱེས། །དེ་རང་མཁས་པ་ཨེ་མ་འཁྲུལ། །དོན་མེད་ཚིག་གི་སྟོང་སྒྲ་ལ། །དོན་བདེན་པར་མ་འཛིན་སྟོན་པ་ལགས། །ཚིག་ཐ་སྙད་མུ་སྟེགས་རྟོག་པ་ལ། །ཚེ་སུམ་གཉིས་ཟད་པ་མ་ཚོར་རམ། །རྟོག་གེའི་ངན་ཚིག་སྣ་ཚོགས་ལ། །ཚེ་སྟོང་པར་མ་ཟད་སྟོན་པ་བ། །ངས་ཚིག་ངན་གྱི་ཡ་བོ་ལབ་མི་ཁོམ། །མུ་སྟེགས་སྟོན་པ་དྲང་མི་ལ། །ཚད་མི་ཚོད་མ་འཐུང་མ་མྱོང༌། །ད་རེས་རྩོད་པ་སྟོན་པ་རྒྱལ། །ཅེས་གསུངས་ཤིང་རིམ་ཀྱིས་ཆོས་ཀྱི་དྲི་བ་དང་གསུང་མགུར་མཛད་པས་མཐར་གདམས་ངག་ཞུས་ནས་སྟོན་སྒོམ་ཆེ་བར་གྱུར།

དེ་ནས་རས་ཆུང་པ་རྒྱ་གར་དུ་འབྱོན་གསུངས་པར་བཤོལ་མ་ཐེབས་ནས། སྙེ་ལམ་དུ་གསེར་ཅུང་ཟད་བསོད་སྙོམས་སུ་ཕུལ་བ་རས་ཆུང་པའི་རྫོངས་མཛད་ནས། ད་རེས་བླ་མ་མར་པའི་བཀའ་བཞིན་ལུས་མེད་མཁའ་འགྲོའི་ཆོས་སྐོར་ལྔ་རྒྱ་གར་ནས་ལེན་རྒྱུ་ཡོད་གསུངས་པ་ད་རེས་གདན་དྲོངས་ཤོག་གསུངས། དེ་ནས་རས་ཆུང་རྒྱ་གར་དུ་བྱོན་ནས་ཏི་པུ་པ་དང༌། མ་གཅིག་གྲུབ་པའི་རྒྱལ་མོ་སོགས་མཇལ་ནས་གསེར་གྱི་མཎྜལ་ཕུལ་ཏེ། ལུས་མེད་མཁའ་འགྲོའི་ཆོས་སྐོར་ལྔ་དང༌། གཞན་ཡང་གདམས་པ་ཟབ་ཁྱད་ཅན་མང་པོ་ཞུས། ཏི་པུ་པས་ག་པུར་གུར་གུམ་སིནྡྷུ་ར་ཨ་ཀ་རུ་ནག་པོའི་འཁར་བ་རྣམས་རྗེ་བཙུན་ལ་ཕྱག་རྟེན་དུ་བསྐུར། དེ་ནས་རས་ཆུང་པ་བལ་པོར་ཕེབས་ནས་དེ་ན་མུ་སྟེགས་ཀྱི་སྟོན་པ་ངན་སྔགས་སྣ་ཚོགས་ཤེས་པ་ཞིག་འདུག་པ་ལ་གསེར་ལྷག་མ་རྣམས་ཕུལ་ནས་ངན་སྔགས་རྣམས་ཞུས་ནས་འོང་བ་ན། རྗེ་བཙུན་བྲག་དམར་མཆོང་གླིང་ན་བཞུགས་ནས་གཟིགས་པར། རས་ཆུང་པ་ཤེལ་གྱི་མཆོད་རྟེན་ཞིག་ཏུ་ཡོད་པ་ལ། ངན་སྔགས་སྣ་ཚོགས་ཞུས་ནས་རླུང་དམར་འཚུབས་མ་གཅིག་ཏུ་གྱུར་སོང་བས་ལམ་དུ་བར་ཆད་བྱུང་བར་མཁྱེན་ནས། དཔལ་མོ་དཔལ་ཐང་ལ་བསུ་བར་བྱོན། རས་ཆུང་པ་དང་འཕྲད། དེར་སེར་བ་བབས་པས་རས་ཆུང་པ་དབུ་གཏུམ་ནས་བཞུགས་སེར་བ་སྲབ་སྐབས་རྗེ་བཙུན་མ་བཞུགས་པ་ལ་གར་བྱོན་བཙལ་བས་གཡག་རྭ་ཞིག་གི་ནང་དུ་རྗེ་བཙུན་ཆུང་དུ་མ་སོང༌། གཡག་རྭ་ཆེ་རུ་མ་སོང་བར་དེར་ཤོག་གསུངས་ཀྱང་མ་ཐར། རྗེ་བཙུན་སྒོར་བྱོན་ཏེ་ལྟ་སྟངས་མཛད་པས་སྤྲིན་དྭངས། དེ་ནས་རུ་བར་རྒན་མོ་ཞིག་ལ་བསོད་སྙོམས་བྱས་པས་གཏད་དུ་མ་ཉན། རྒྱང་དེར་ཕེབས་ནས་གཟིམས། ནང་པར་རུ་བ་གཞན་མི་འདུག །རྒན་མོ་ཤི་བ་གཟིགས་ནས་བསྔོ་སྨོན་མཛད། ཟ་མ་ཟོས་འཕྲོ་ཅུང་ཟད་ཡོད་པ་བསྣམས་ནས་བྲག་དམར་མཆོང་གླིང་དུ་བྱོན། དེར་རས་ཆུང་པ་ཆུ་ལེན་དུ་བྱོན་པའི་ཕར་ཁར་རྐྱང་ཕ་མ་བདུན་དང༌། སྤྱང་ཀི་མ་བུ་བདུན་བརྩེ་ཞིང་འདུག་པ་མཐོང་བས་ཐུགས་ཡེངས་སོང་བ་དང༌། དེ་ནས་ཡར་བྱོན་པས་ཤོག་བུའི་ཚིག་དྲི་བྲོ་བས་གོང་ནས་གདམས་ངག་ལ་སྙད་འདོགས་ལུགས་ཀྱིས་བསྲེགས་གམ་སྙམ་པས་དཔེ་ཁུག་སྟོང་པར་གཟིགས། དེར་དད་པ་ལོག་ནས་སེམས་སྡུག་པས་རྗེ་བཙུན་གྱིས་སྐུ་ལུས་ཀྱི་བཀོད་པ་དང་རྫུ་འཕྲུལ་སྣ་ཚོགས་བསྟན་ཅིང་རྐྱང་མགུར་སྐོར་གསུམ་སོགས་མཛད་ངན་སྔགས་བསྲེགས་པ་མ་གཏོགས་གཞན་མཁའ་འགྲོའི་ཕྱག་ཏུ་ཡོད་པས་གསོལ་བ་ཐོབ་གསུངས། དེར་བྲག་གསེབ་ནས་དཔེ་ཀུན་ཆིལ་གྱིས་བྱུང་བས་དེ་ནས་མི་ལྡོག་པའི་དད་པ་སྐྱེས་སོ། །ཡང་ཉིན་གཅིག་སྐུ་ལུས་བཀོད་པ་དྲུག་མཛད་པ་ལས་མཐོང་སྣང་སྣ་ཚོགས་འདི་ཇི་ལྟར་ལགས་ཞུས་པས། སྣ་ཚོགས་ཆུ་ཡི་སྣོད་རྣམས་སུ། ཇི་ལྟར་ཟླ་བའི་དཀྱིལ་འཁོར་བཞིན། དག་པའི་འགྲོ་རྣམས་ཐམས་ཅད་ལ། ཐ་དད་སྣང་ཡང་དེ་བཞིན་མིན། ཞེས་སོགས་གསུངས་སོ། །ཡང་ཉིན་གཅིག་ཟད་པར་གྱི་ཏིང་ངེ་འཛིན་དུ་མ་བསྟན་པ་དེ་ཇི་ལྟར་ལགས་ཞུས་པས། མེ་ཡིས་མི་ཚིག་ཆུས་མི་བྱིང༌། སྤྱོད་པ་གླང་ཆེན་འགྲོས་ཀྱི་གར། དག་པའི་འགྲོ་རྣམས་ཐམས་ཅད་ལ། ཐ་དད་སྣང་ཡང་དེ་བཞིན་མིན། ཞེས་སོགས་གསུངས་སོ། །ཡང་མ་ཇོ་ལྕམ་མོའི་ཚོགས་འཁོར་གཅིག་བསྐོར་བའི་གྲལ་དུ་ཁྱེད་ལ་སློབ་མ་གྲུབ་ཐོབ་ཨི་ཡོད་ཞུས་པས། མཁའ་འགྲོའི་ལུང་བསྟན་སྤྲུལ་པའི་སྐུ། དྭགས་པོ་ཉི་མ་འགྲོ་ལ་འཆར། རས་ཆུང་ཟླ་བ་སྤྲུལ་པའི་སྐུ། སྒོམ་སྟག་ཇོ་དར་ཞི་བ་འོད། འབྲི་སྒོམ་ལ་སོགས་ཉི་ཤུ་ལྔས། འགྲོ་དོན་བྱེད་འབྱུང་མཁའ་འགྲོའི་གསུངས། གྲུབ་ཐོབ་ལྔ་དང་རྟོགས་ལྡན་བརྒྱད། རང་བྱུང་ཉམས་ཤར་བརྒྱ་རྩ་བརྒྱད། ཆོས་མཐུན་སློབ་མ་སྟོང་རྩ་འོང༌། ཆོས་འབྲེལ་ཐོབ་པ་ཁྲི་འབུམ་སྟེ། ལག་ལེན་སྐྱོང་བ་འགའ་རེ་འདུག །ཁྱོད་དྲི་རྟོག་བྱེད་པ་བག་ཆགས་བཟང༌། གསུངས་སོ། །དེ་ནས་བལ་པོའི་རྒྱལ་པོ་ལ། མགུར་གསུངས་པ་དང༌། རྒྱ་གར་གྲུབ་ཐོབ་དྷརྨ་བོ་དྷི་དང༌། བོད་ཀྱི་མི་ལ་རས་པ་གཉིས་བལ་ཡུལ་དུ་མཇལ་འཕྲད་མཛད་པའི་སྐོར་དང་གུང་ཐང་སྣ་རྩེའི་ཕུག་ཏུ་ལྷ་ཡི་བུ་མོ་བརྒྱད་བྱུང་ནས་ཆོས་ཞུས་པ་དང༌། དིང་རི་ནས་ཕ་དམ་པ་ཚུར་བྱོན། རྗེ་བཙུན་གཉའ་ནང་ནས་ཕར་བྱོན། ཐོང་ལའི་ལ་ཁར་ཆོས་དང་རྫུ་འཕྲུལ་མཛད་པ་དང༌། སྐྱིད་ཕུག་ཉི་མ་རྫོང་དུ་ཁྱི་ར་བ་མགོན་པོ་རྡོ་རྗེ་རྗེས་སུ་བཟུང་ཕྱིར་ཤ་གྲོལ་ཁྱི་གྲོལ་མཛད་པའི་སྐོར་དང༌། ཡང་གཙང་གི་ག་ར་ཁ་ཆེའི་མགྲོན་ཁང་དུ་དགེ་བཤེས་གཡག་རུ་ཐང་པ་དང་སེ་བན་སྟོན་ཆུང་གཉིས་རྗེས་སུ་བཟུང༌། བྲིན་གྱི་ཕུག་པར་འདྲེ་དམག་གི་ཆོ་འཕྲུལ་བསྟན་པར་ཆོས་གསུངས་ནས་དམ་ལ་བཏགས་པ་དང༌། རས་ཆུང་པ་དང་ལེགས་སེ་འབུམ་རྣམས་ཀྱིས་དབང་བསྐུར་ཞུས་པའི་སྐབས་བུམ་པ་ནམ་མཁར་འཕར་ནས་དབང་བསྐུར་བ་དང༌། ཐང་སྐུ་ལ་རབ་གནས་མཛད་པ་མེ་ཏོག་རང་འབྱར་དུ་སོང་བ་རྣམས་དང༌། ཆུ་མིག་དངུལ་འབུམ་དུ་རས་པ་ཞི་བ་འོད་རྗེས་སུ་བཟུང་བའི་སྐོར་དང༌། གུང་ཐང་ལྷོ་སྒོ་ན་ཉ་མ་བཙུན་སེང་རྗེས་སུ་བཟུང་བ་དང༌། གངས་ཏི་སེར་བྱོན་ནས་ནཱ་རོ་བོན་ཆུང་དང་རྫུ་འཕྲུལ་འགྲན་པས་མཐར་ཟིལ་གྱིས་མནན་ནས་ཚར་བཅད་པ་དང༌། གུང་ཐང་ཡངས་པ་ཅན་དུ་བུད་མེད་རྗེས་སུ་བཟུང་བ་སྙན་བརྒྱུད་ཀྱི་བདག་མོར་གྱུར་པ་དང༌། ལྕིམ་ལུང་གི་ཆུ་མཐའ་མཁར་ཕུར་བྱོན་དུས་ངན་རྫོང་བྱང་ཆུབ་རྗེས་སུ་བཟུང་བ་དང༌། གཙང་གི་དིང་རི་མཁར་དམར་དུ་ལྷ་རྗེ་གཡང་ངེ་ལ་མགུར་མཛད། གཙང་བོང་རོང་གི་གྲོང་དུ་རྟོགས་ལྡན་རས་ཆུང་མ་རྗེས་སུ་བཟུང་བའི་སྐོར་རྣམས་སོ། །དེ་ནས་རེས་གཅིག་གི་ཚེ་རྗེ་བཙུན་ཆུ་བར་ན་ཏིང་ངེ་འཛིན་ལ་བཞུགས་པའི་ཚེ་ཆུ་ཕོ་འབྲུག་ལོ་དཔྱིད་ར་བའི་ཚེས་བརྒྱད་ལ་ཤ་ཟ་ཆེན་མོ་ལྔས་ཆོ་འཕྲུལ་བར་ཆད་བརྩམ་པར་ཟིལ་གྱིས་མནན་པས་ཕྱག་འཚལ་ནས་སོང༌། ཡང་དབྱར་ར་བའི་ཚེས་བཅུའི་ནུབ་མོ་མཚར་སྡུག་ཅན་གྱི་བུ་མོ་ལྔས་མཆོད་ཅིང་སེམས་བསྐྱེད་སྡོམ་པ་ཞུས་ནས་ཞབས་སྤྱི་བོར་བླང་ནས་སོང༌། ཡང་སྟོན་འབྲིང་པོའི་ཚེས་བཅུ་གཅིག་དགུང་མོར་བུད་མེད་གཅིག་གིས་ཇོ་མོ་བྲོ་འཚལ་བས་སྤྱན་འདྲེན་པར་ཞུས་ནས་དར་གྱི་སྣམ་བུའི་སྟེང་ནས་གདན་དྲངས། ཡུལ་གྱི་ཕྱུགས་རྫིས་དམར་ཐབ་ཀྱིས་མཁྲེན་པར་གྱུར་པའི་ཡུལ་མི་ལ་ཡང་ཡམས་རིམ་བྱུང༌། དེར་ཡི་གེ་བརྒྱ་པའི་ཁྲུས་དང༌། སྒྲོལ་མ་ཀུ་རུ་ཀུལླེའི་གཟུངས་སྒྲུབ། གཙུག་ཏོར་རྣམ་རྒྱལ་གྱིས་ཚེ་བསྲིང་མཛད་པས་ནད་ཡམས་ཐམས་ཅད་ཞི། ཟླ་བ་དེའི་ཉེར་དགུའི་ཉིན་ཚེ་རིང་མཆེད་དང་ཡུལ་བདག་གིས་བར་དོའི་ཁྲིད་ཞུས། བྱི་བ་ཟླ་བའི་ཚེས་བརྒྱད་ནུབ་མོར་ངོ་མཚར་བའི་གསང་མཆོད་ཕུལ་ཏེ་བསྟན་པ་བསྲུང་བར་དམ་བཅའ་ཕུལ་ལོ། །དེ་དག་ནི་བཀྲ་ཤིས་ཚེ་རིང་མའི་ཞུས་ལེན་གྱི་སྐོར་རོ། །དེ་ནས་རས་ཆེན་རས་ཆུང་གཉིས་བཅས་ཅོག་རོ་འབྲིང་མཚམས་སུ་རས་ཆུང་མ་རྗེས་སུ་བཟུང་བས་གྲུབ་པ་བརྙེས་ནས་མཁའ་སྤྱོད་དུ་གཤེགས་སོ། །དེ་ནས་རས་ཆུང་པ་རྒྱལ་ཁམས་བསྐོར་བར་གཤེགས་པ་ལ་བཤོལ་མ་ཐེབས་པར་བྱོན་པའི་དེ་དག་གི་ལོ་རྒྱུས་རས་ཆུང་པ་ཉིད་ཀྱི་རྣམ་ཐར་དུ་གསལ་ལོ། །དེ་ནས་རྗེ་བཙུན་གྱི་མདུན་དུ་རས་པ་བསྒྲེས་པ་རྣམས་བཞུགས་པའི་སྐབས་རས་ཆུང་པས་རྗེ་བཙུན་ལ། རང་རེ་རྣམས་ལྷོ་བྲག་མར་པའི་རྒྱུད་འཛིན་དུ་འདུག་པས། ངེད་སློབ་མ་རྣམས་ལ་རྒྱུད་པ་འཛིན་ཅིང་འཚོགས་པ་སྐྱོང་བ་འགའ་རེ་ཨེ་འོང་ཞུས་པས། རྒྱུད་འཛིན་དམ་པ་ཞིག་སྤྱན་སྔར་ཡོང་གསུངས། དེར་ཞག་བཅོ་ལྔ་ནས་དྭགས་པོ་སྙི་སྒོམ་སྤྱན་སྔར་བྱོན། ཕྱག་རྟེན་དུ་ཇ་གསེར་ཕུལ་བ་ཆོས་བརྒྱགས་གྱིས་གསུངས་ནས་གནང༌། དེ་ནས་རྗེ་བཙུན་གྱིས་སྣ་ལེན་གྱི་མགུར་མཛད། དེ་ནས་དབང་བསྐུར་དང་རྗེ་བཙུན་རྣལ་འབྱོར་མའི་ཐབས་ལམ་ལ་སོགས་པའི་གདམས་ངག་ཞུས་ནས་བསྒོམས་པས་ཐབས་སྟོན་ཁྱད་པར་ཅན་འཁྲུངས༌། བདེ་མཆོག་མཁའ་འགྲོ་སྙན་བརྒྱུད་ཀྱི་བཀའ་རྒྱས་པར་མཛད། ཉམས་ཀྱི་འཆར་སྒོ་དང་རྨི་ལམ་གྱི་བརྡ་དོན་རྣམས་ཞུས་ལེན་གྱི་མགུར་མཛད། བར་དོའི་གདམས་པ་དང༌། ཞལ་གདམས་སྐྱེལ་མགུར་གྱི་ཚུལ་དུ་མཛད། ད་ནི་གདམས་ངག་ཐམས་ཅད་རྫོགས་པས་ཁྱོད་ལ་ཡོན་ཏན་སྐྱེ་བ་ལ་དཀའ་ཚེགས་མི་དགོས། འདིར་ཐོག་མར་ཕྱིན་པའི་ནུབ་མོ་ཁྱུང་གཅིག་བྱ་རྒོད་མང་པོས་བསྐོར་བ་མེ་ཏོག་སེར་པོའི་གླིང་དུ་བབ་པ་རྨིས། བླ་མ་གོང་མ་རྣམས་ཀྱིས་བརྒྱུད་འཛིན་ལུང་བསྟན་ལྟར་ང་ཡི་བརྒྱུད་པ་འདི་ཁྱོད་ལ་གཏད་པས་ཟུང་དང་སྒྲུབ་བརྒྱུད་ཀྱི་བསྟན་པ་དར་བར་འགྱུར་རོ། །ད་དབུས་སུ་སོང་ལ་སྒྲུབ་གནས་སྒམ་པོ་ལུང་བསྟན་པ་དེར་སྒྲུབ་པ་གྱིས། བུ་ཁྱོད་ཡོས་ཀྱི་ལོ་རྟའི་ཟླ་བའི་ཚེས་བཅུ་བཞི་ལ་བྲིན་དུ་སླེབ་པར་གྱིས་གསུངས་སོ། །དེ་ཐམས་ཅད་དྭགས་པོའི་ཞུ་ལེན་གྱི་སྐོར་དང༌། ཡང་རེས་ཤིག་གི་ཚེ། རས་ཆུང་པ་རྡོ་མོན་གྱི་མཚམས་སུ་ལུང་བསྟན་ཅིང་ད་ནི་རེས་ཤིག་དབུས་སུ་སོང༌། མ་འགྲོ་ཟེར་དུས་འགྲོ་རང་ཟེར། ད་མ་འདུག་པར་སོང་ལ་འགྲོ་དོན་གྱིས་གསུངས་ནས་ཞལ་ཏའི་མགུར་མ་མང་དུ་མཛད། རས་ཆུང་པས་ཀྱང་སྨོན་ལམ་ཞལ་མཇལ་ལ་སོགས་ཀྱི་མགུར་ཕུལ་ནས་བྱོན་ནོ། །དེ་ནས་སྙེ་ནམ་ཀྱི་མི་སྡེ་རྣམས་འདིར་ཤོག་ཚོགས་འཁོར་ཡོད་ན་བཟང་གསུངས། དེར་འདུས་ནས་ཚོགས་འཁོར་བསྐོར་ཏེ་ཆོས་མང་དུ་གསུངས། མགུར་བཞེངས་འཇའ་འོད་མེ་ཏོག་ཆར་དུ་འབེབ་པ་སོགས་ཡོན་ཏན་གྱི་ཁྱད་པར་མང་དུ་བྱུང༌། ཀུན་ལ་བསྔོ་སྨོན་ཞལ་ཏ་མཛད་པས་དགའ་སྤྲོ་དང་བཅས་པས་སོང་ངོ༌། །དེ་ནས་འབྲི་སྒོམ་དང་སེ་བན་རས་པ་ངན་རྫོང་རས་པ་སོགས་མང་དུ་འཚོགས་པ་ལ། བླ་མའི་ཞལ་ནས། རྣལ་འབྱོར་ལུས་ཀྱི་མེ་ཏོག་འདི། འཆི་བདག་རྐྱེན་གྱི་བ་མོ་ཡིས། བཅོམ་ཏེ་ཕ་རོལ་འགྲོ་དུས་སུ། ང་ལ་མཐོང་སྣང་སྣ་ཚོགས་འོང༌། ཞེས་གསུང་ཞིང༌། འབྲི་སྒོམ་ཁྱེད་དྲང་པོ་ཡིན། ཇི་ལྟར་འོང་སྨྲོས་ཤིག་གསུངས་པ་ལ། རྗེ་བཙུན་ཆེན་པོ་ལ་མཐོང་སྣང་ལ་སོགས་སྐྱེ་འཆི་མི་མངའ་ཡང༌། དག་མ་དག་གི་མཐོང་སྣང་ལ་སོགས་འབྱུང་བ་ལགས་སམ་ཞུས་པས། ཁྱོད་ཀྱིས་གོ་ནས་འདུག་གསུངས། དེར་སེ་བན་གྱིས་རྗེབཙུན་གྲོང་ན་ཇི་ལྟར་བྱེད་ཞུས་པས། ལྷོ་བྲག་མར་པའི་བཀའ་དྲིན་གྱིས། བྱ་བ་ཐམས་ཅད་བྱས་ནས་ཡོད། མི་ལ་རས་པའི་སྙིང་རུས་ཀྱིས། བྱེད་པ་ཐམས་ཅད་ཟིན་ནས་ཡོད། ཅེས་སོགས་མགུར་མཛད་ཅིང༌། ད་ང་ཡི་ཤུལ་དུ་དངོས་པོ་ཆེན་པོ་མེད། ཨ་ག་རུ་ནག་པོ་འབའ་ཞིག་གི་ཕྱག་འཁར་དང༌། ཨ་རུ་ར་རྣམ་པར་རྒྱལ་བ་དང༌། རས་ཀྱི་པན་ཞུ་དང༌། རས་དུམ་གཅིག་དྭགས་པོ་ལ་བསྐུར། སྦ་བེར་དང་རས་དུམ་གཅིག་རས་ཆུང་པ་ལ་བསྐུར། གྲི་གུ་མེ་ཆ་མ་འདི་ངན་རྫོང་སྟོན་པ། རུས་པའི་ཐུར་མ་འདི་འབྲི་སྒོམ་རས་པ། པཎ་ཞུ་ཧྲུལ་པོ་འདི་སེ་བན་ནས་ཟུང༌། རས་འདི་དུམ་བུ་གྱིས་ལ་རས་པ་རེ་རེ་ལ་རེ་རེ་བྱིན། ནོར་ཆེ་བ་མིན་ཏེ། དངོས་གྲུབ་སྣ་རེ་འོང་སྲིད། སྒོམ་ཁང་གི་ཕུག་པར་གསེར་གཅིག་ཡོད་པ་ལ་འགྱེད་གྱིས་གསུངས་སོ། །དེར་མ་དག་པའི་བོན་སྟོན་གཅིག་གིས། ཡུལ་དུ་ནད་ཡམས་དཀོན་པ་རྗེ་བཙུན་གྱི་བྱིན་རླབས་ཡིན་ཏེ། ང་ཡི་ཁ་ཡི་ཟ་ཕུ་འགགས་ཟེར་ནས། མཛེ་མོ་གཅིག་ལ་རྔན་དུ་གཡུ་བྱིན་ནས། ཞོ་ཕོར་བ་གང་ལ་དུག་བཏབ་དེ་བསྐུར་བ་དྲངས་པ་དང༌། རྗེ་བཙུན་མཛེ་མོ་ཁྱོད་ཀྱིས་གཡུ་ཐོབ་པར་བྱ་བའི་ཆེད་དུ་འཐུང་བ་ཡིན་གསུངས་ནས་གསོལ་བ་དང༌། ཕོར་པ་ཡང་བཀྲུས་ནས་གནང་སྟེ། མཁའ་འགྲོ་མ་ཡི་ཆད་པས་དེ་ནུབ་བོན་པོ་ཤི་བས་དུག་དྲངས་པར་ཤེས་ཏེ། ཨ་ག་མཁྱེན་བཞིན་དུ་གསོལ་བའི་དཔེ་ཡོད་དམ་ཞུས་པས། ཨ་མཚར་པོ་ང་ཡི་འདུལ་ཞིང་ཐམས་ཅད་རྫོགས་པ་ཡིན། གསུངས་ནས་གསོལ་འདེབས་དང་བསྔོ་བ་མང་དུ་མཛད་ཅིང་བོན་པོ་མཛེ་མོ་གཉིས་ཀྱང་མཐོ་རིས་སུ་དྲངས་སོ། །དེ་ནས་རྗེ་བཙུན་ཆེན་པོ་དེ་གཞོན་ནུ་ནོར་བཟང་དང༌། ནཱ་རོ་ཆེན་པོའི་རྣམ་ཐར་བཞིན་དཀའ་བ་དཔག་ཏུ་མེད་པས་བླ་མ་དམ་པ་བསྟེན་ཅིང༌། གདམས་པ་ཟབ་མོའི་ཐུགས་བལྟམས་ཏེ། རི་ཁྲོད་རྣམ་དག་ཏུ་ལུས་སྲོག་ལ་ལྟོས་པ་མེད་པར་སྒྲུབ་པ་ཁས་བླང་ཞིང་བསྒོམས་པས༌། མཆོག་དང་ཐུན་མོང་གི་དངོས་གྲུབ་ཐམས་ཅད་ཐོབ་སྟེ། འགྲོ་བ་མི་དང་མི་མ་ཡིན་པ་དཔག་ཏུ་མེད་པ་སྨིན་གྲོལ་གྱི་ལམ་ལ་བཀོད་ཅིང༌། མཐར་ཡང་དག་པར་རྫོགས་པའི་སངས་རྒྱས་ཀྱི་མཛད་པ་དང་སྒོ་བསྟུན་ནས་ལེ་ལོ་ཅན་ཆོས་ལ་བསྐུལ་བའི་ཕྱིར་དགུང་ལོ་བརྒྱད་ཅུ་རྩ་བཞི་བཞེས་པའི་དུས་སུ། ཆུ་མོ་ཡོས་ཀྱི་ལོ་རྟའི་ཟླ་བའི་ཚེས་བཅོ་ལྔའི་ཉི་མ་རི་རྩེར་ཤར་བ་ལ། མ་དག་པའི་སྣང་ངོར་མྱ་ངན་ལས་འདས་པའི་ཚུལ་བསྟན་ཏེ། དེའི་དུས་སུ་དག་པའི་སྒོམ་ཆེན་རྣམས་ལ་འདུ་འབྲལ་མེད་པར་བཞུགས་པའི་སྣང་བ་དང༌། འགའ་ཞིག་ལ་མཁའ་སྤྱོད་དུ་བྱོན་པ་དང༌། སེང་གེ་ལ་བཅིབས་ནས་འབྱོན་པ་ལ་སོགས་མཐོང་སྣང་ཐ་དད་པ་བྱུང་ཞིང༌། ནམ་མཁའ་ཐམས་ཅད་འཇའ་འོད་ཀྱིས་ཁྱབ་ཏེ། མེ་ཏོག་སྣ་ཚོགས་ཀྱི་ཆར་ལ་སོགས་པ་ལྟས་ངོ་མཚར་ཅན་དུ་མ་བྱུང་ངོ༌། །དེར་ཐམས་ཅད་ཚོགས་ཏེ་གདུང་བཞུ་བ་ལ་མ་འཆམས་པས། བྱིས་སྦ་རལ་པ་ཁམས་སེག་གེ་བ་གཅིག་ནམ་མཁའ་ལ་གར་བྱེད་ཅིང༌། ཁྱེད་ཅག་མི་ཡུལ་གླེན་པ་འདིར། མི་ལ་རས་པའི་གདུང་ལ་རྩོད། བརྩད་པས་ཐོབ་ཏུ་མི་འཇུག་པ། མཁའ་འགྲོ་སྤྱི་ཡི་དམ་ཚིག་ཡིན། ཅེས་སོགས་དང༌། ལུང་པ་གཉིས་ཀྱི་རབ་སྒང་འདིར། བཞུས་ན་ཕན་པ་ཤིན་ཏུ་ཆེ། ཟེར་བས་བྲིན་ཆུ་བར་གྱི་བྲག་སྟེང་དུ་བཞུས་པས་མཛེ་ནད་ཐམས་ཅད་ཆད་དོ། །ཡང་མཁའ་འགྲོ་མ་རྣམས་ཀྱི་ནམ་མཁའ་ནས༌། རཾ་ཡེ་ཤེས་གཏུམ་མོ་མེ་ལྷའི་མེ། ཞེས་སོགས་མགུར་བླངས་པས་ཐུགས་ཀ་ནས་མེ་རང་བྱུང་དུ་འབར་བ་ལས༌། མཁའ་འགྲོ་མས་རྗེ་ཡིད་བཞིན་ནོར་བུ་གཤེགསཔ་ལ། ལ་ལ་ངུ་ཞིང་ལ་ལ་བརྒྱལ། བརྒྱལ་སངས་མྱ་ངན་བྱེད་དུས་འདིར། རང་བྱུང་མེ་ནི་རང་འབར་འགྱུར། ཅེས་སོགས་གདུང་དབྱངས་མགྲིན་གཅིག་ཏུ་མཛད་དོ། །དེར་གདུང་ཁང་གི་སྟེང་དུ་གདུང་རིང་བསྲེལ་འདུས་པའི་གོང་བུ་འོད་འཕྲོ་བ་གཅིག་འདུག་པ་ལ། ཞི་བ་འོད་དང༌། སེ་བན་གཉིས་ཀྱིས་མགུར་བླང་ནས་གསོལ་བ་བཏབ་པས། མཆོད་རྟེན་གཅིག་ཏུ་གྱུར་ནས་བསྐལ་བཟང་གི་སངས་རྒྱས་སྟོང་དང༌། བླ་མའི་སྐུ་གཅིག་ཏུ་འདུས་པས་མགུར་མཛད་ཅིང༌། ནམ་མཁར་འཁོར་ལོ་བདེ་མཆོག་ཁྲ་དཔུང་ངེ་བ་གཅིག་ཡོད་པ་ལ་ཐིམ་མོ། །མཆོད་རྟེན་མཁའ་འགྲོ་མ་དཀར་མོ་གཅིག་གིས་གདན་དྲངས་པ་ལ། ཞི་བ་འོད་ཀྱིས་མགུར་མཛད་ཅིང་གསོལ་བ་བཏབ་པས། མཆོད་རྟེན་གྱི་ནང་ནས་རྗེ་བཙུན་གྱི་མགུར་མཛད་པ་དང༌། མཁའ་འགྲོ་མས་མཆོད་རྟེན་བུ་ཆེན་རྣམས་ཀྱི་དབུ་ལ་རེག་ཙམ་རེ་བྱས་ཏེ་ནམ་མཁར་གདན་དྲངས་སོ། །དེ་ནས་ལེགས་སེ་ན་རེ། བླ་མའི་རྣམ་པར་ཐར་པ་དེ་ལ་གསེར་མེད་ཟེར་ནས་ཕུག་པ་རློགས་པས། བུར་དཀར་རྡོག་པོ་གསུམ་རས་ཁ་གཅིག་ཏུ་བཏུམ། གྲིའི་ཡུ་བ་ཁེམ་སོའི་གྲི་རྩེ་མོས་འབུག །ལྟག་པས་མེ་ཆ་འོང་བ་གཅིག་དང༌། ཡི་གེ་གཅིག་འདུག་པ་ལ་བལྟས་པས་རས་དང་བུ་རམ་གྲི་འདིས་ཆོད་དང་ཐམས་ཅད་ལ་ཁྱབ་ཅིང་ཐོབ་པར་འོང༌། དངོས་པོ་ལ་ཆགས་ཞེན་སྤང་ཞིང༌། རི་ཁྲོད་འགྲིམ་ལ་དགོན་པ་རུ་བསྒྲུབ་པ་དང༌། དེ་ཡང་རྗེ་བཙུན་ཆེན་པོ་དེ་གནས་ངེས་མེད་རི་ཁྲོད་འགྲིམ་པའི་བཞུགས་གནས་མང་དུ་ཡོད་ཀྱང་ཡོངས་སུ་གྲགས་པའི་རྫོང་ཆེན་བཅོ་བརྒྱད༌། རྫོང་ཆུང་གཉིས་དང་ཉི་ཤུ་ནི། བྲག་དམར་ལིང་པ་རྫོང༌། རྟ་སོ་དབུ་མ་རྫོང༌། བྲག་དཀར་སྤོ་མཐོན་རྫོང༌། རྐྱང་འཕན་ནམ་མཁའ་རྫོང༌། རག་མ་བྱང་ཆུབ་རྫོང༌། སྨིན་འཁྱུག་འགྲིབ་མ་རྫོང་སྟེ་ཡོངས་གྲགས་གི་མི་ལའི་རྫོང་དྲུག་གོ། བྲག་སྐྱ་རྡོ་རྗེ་རྫོང༌། ཁྲ་ཚང་སྲིན་པོ་རྫོང༌། སྐྱིད་པ་ཉི་མ་རྫོང༌། ཁུ་བྱུག་དབེན་པ་རྫོང༌། ཤེལ་ཕུག་ནམ་མཁའ་རྫོང༌། རྩེག་པ་རྐང་མཐོ་རྫོང་སྟེ། སྐུ་ཐང་རྫོང་དྲུག་གོ །རྒྱ་བྲག་ནམ་མཁའ་རྫོང༌། སྦས་ཕུག་མ་མོ་རྫོང༌། སྟག་ཕུག་སེང་གེ་རྫོང༌། ལ་ཕུག་པདྨ་རྫོང༌། ཁྲོ་རྒྱལ་རྡོ་རྗེ་རྫོང༌། གླང་མགོ་ཀླུ་བདུད་རྫོང་སྟེ། དེ་རྣམས་སློབ་དཔོན་ཆེན་པོ་པདྨས་བྱིན་གྱིས་རླབས་པའི་དཔལ་མོ་རྫོང་དྲུག་གོ། བྲག་དམར་སྤོ་མཐོན་སྐེད་ཕུག་ཉི་མ་རྫོང་སྟེ་རྫོང་ཆུང་གཉིས་སོ། །ཁྱད་པར་གྱི་གནས་ནི་ལ་ཕྱི་ཆུ་བར་ཏི་སེ་གསུམ་ཡིན་ནོ། །རྗེ་བཙུན་ཆེན་པོ་དེ་ལ་རས་པ་ཕ་བཞི་བུ་བརྒྱད་ལ་སོགས་སློབ་མ་མང་དུ་བྱུང་བའི་ཆེ་བཞི་ནི་གུང་ཐང་གཉན་ཆུང་རས་པ་ སྟག་མོའི་འབྲི་སྒོམ་རས་པ་ མདོ་བཀྲའི་སེ་བན་རས་པ། ལྕིམ་ལུང་གི་ངན་རྫོང་རས་པའོ། །ཆུང་བརྒྱད་ནི། རས་པ་ཞི་བ་འོད། རས་པ་སངས་རྒྱས་སྐྱབས། རས་པ་རྡོ་རྗེ་དབང་ཕྱུག། གཤིན་སྒོམ་རས་པ། རོང་ཆུང་རས་པ། མཁར་ཆུང་རས་པ། གཉེན་སྒོམ་རས་པ། ཁྱི་ར་རས་པ་བརྒྱད་དོ། །སྐུ་བགྲེས་པའི་སྲས་དྲུག་ནི། ལོ་སྐོར་འུ་པ། ལོ་སྟོན་དགེ་འདུན། སྐྱོ་སྟོན་ཤག་འགུ །དམ་པ་རྒྱག་ཕུ་བ། འབྲི་བན་བཀྲ་ཤིས། གཤིན་རྡོར་མོ་དང་དྲུག་གོ། ཉེ་བའི་སྲས་བཞི་ནི། རས་པ་བདེ་བ་སྐྱོང༌། རས་པ་རྩལ་ཡུལ་བ། གླན་བཙུན་རས་པ། ར་རྫི་རས་པ་དང་བཞིའོ། །སྲིང་བཞི་ནི། ལེགས་སེ་འབུམ། དཔལ་དར་འབུམ། གསལ་ལེ་འོད། རས་ཆུང་མ་དང་བཞིའོ། །དེ་རྣམས་ཀྱི་ནང་ནས་མཆོག་ཏུ་གྱུར་ཅིང༌། རྒྱུད་འཛིན་དམ་པ་མི་ཡི་འགྲོ་བ་འདུལ་བའི་མཆོག །དྭགས་པོ་རིན་པོ་ཆེ། མི་མ་ཡིན་གྱི་འགྲོ་བ་འདུལ་བའི་མཆོག་ཇོ་མོ་བཀྲ་ཤིས་ཚེ་རིང་མ། ཌཀྐི་མ་རྣམས་འདུལ་བའི་མཆོག། ལྷན་ཅིག་སྐྱེས་པའི་སྒྲོན་མ་སྟེ། འདི་གསུམ་མཆོག་ཏུ་གྱུར་པ་ཡིན་ནོ། གཞན་ཡང་ཇོ་རྡོར་སྒོམ་སྟག་ལ་སོགས་གྲུབ་ཐོབ་ཉི་ཤུ་རྩ་ལྔ། རས་པ་ཉེར་གཅིག །སྟོན་པ་བཅུ། རས་མ་བཅུ་གཉིས། ཁྱིམ་པའི་ཚུལ་གྱི་གྲུབ་ཐོབ་མ་དྲུག །ཐོ་བརྩམས་ཏེ་སླར་དད་ནས་གྲུབ་པ་ཐོབ་པའི་སློབ་མ་ལ་སོགས་དཔག་ཏུ་མེད་པ་བྱུང་ངོ༌། །

ནང་དོན་འདིའི་རེ་བ།གཙང་མ་བཟོས་པ།  - please translate all text in Tibetan ཁྱེད་ཀྱིས་ཐུབ་ན་ནང་དོན་འདིར་བཟོ་བཅོས་ལེགས་པར་གྱིས།