ཁམས།

ཁམས་ཞེས་པ་ནི་སངས་རྒྱས་ཀྱི་བསྟན་པའི་ནང་དུ་སེམས་ཅན་རྣམས་འཁོར་བར་སྐྱེ་འཆི་བྱེད་སའི་གནས་ཏེ། འདིའི་ནང་དུ་སྟོང་གསུམ་གྱི་སྟོང་ཆེན་པོ་འཇིག་རྟེན་གྱི་ཁམས་དང་། དཔག་ཏུ་མེད་པའི་འཇིག་རྟེན་གྱི་ཁམས་རྣམས་བཤད་ཡོད། "འཇིག་རྟེན་གྱི་ཁམས་ཡོངས་སུ་དག་པ་རྣམས་ན་ཡོད་པ་མཆོག་ཏུ་ཉམས་དགའ་བའི་ལོངས་སྤྱོད་རྣམས་འབུལ་ལོ། །"ཞེས་གསུངས་པ་ལྟར་དག་པའི་ཞིང་ཁམས་ཀྱང་ཡོད།

མཚན་ཉིད།

"འཆགས་འཇིག་སྟོངས་གནས་བཞི་པོ་རེ་རེ་ལ་བར་བསྐལ་ཉི་ཤུ་རེར་བྱས་པའི་བར་བསྐལ་བརྒྱད་བཅུ་ནི་རྒྱུའི་ཐེག་པའི་ལུགས་ཀྱི་འཇིག་རྟེན་གྱི་ཁམས་འདིའི་བསྐལ་པ་ཆེན་པོ་གཅིག་གོ །"ཞེས་གསུངས་པ་དེ་བཞིན་ནོ། །

སྒྲ་བཤད།

འཇིག་ཅིང་ཆགས་པའི་འཇིག་རྟེན་གྱི་གནས་ཡུལ་ལམ་ཁྱབ་ཁོངས་ལ་གོ་དགོས་ཏེ། "འཇིག་རྟེན་གྱི་ཁམས་ན་དགོས་འདོད་ཀུན་འབྱུང་གི་ཡིད་བཞིན་གྱི་ནོར་བུ་རིན་པོ་ཆེ་"ཞེས་གསུངས།

དབྱེ་བ།

སྟོང་གསུམ་གྱི་སྟོང་ཆེན་པོ་འཇིག་རྟེན་གྱི་ཁམས། "བླ་མ་གྲགས་སེང་བ་གཉིས་ཀྱིས་མདོ་ཁམས་སྟོད་ནས་འབུལ་བ་མེ་ཏོག་དང་བཅས་ཏེ་ཡང་ཡང་བསྐུལ་ཞིང༌།" ཞེས་གསུངས་པ་ལྟར་མདོ་ཁམས་ཞེས་པའི་ཡུལ་གྱི་མིང་དུའང་བེད། དཔག་ཏུ་མེད་པའི་འཇིག་རྟེན་གྱི་ཁམས། "ཕྱོགས་བཅུའི་འཇིག་རྟེན་གྱི་ཁམས་སུ་མཁོ་དགུའི་དཔལ་འབྱོར་རང་གིས་མཐོང་ཐོས་གང་ཡོད་འབུལ་བ་སྟེ།" ཞེས་དང་། "ཐེག་ཆེན་གྱི་མདོ་དུ་མར་འཇིག་རྟེན་གྱི་ཁམས་གཞན་གྱི་དེ་བཞིན་གཤེགས་པ་རྣམས་ཀྱིས་ཞིང་འདིའི་བསྔགས་པ་བརྗོད་པ་ན།" ཞེས་གསུངས་པ་ལྟར་འཇིག་རྟེན་གྱི་ཁམས་དཔག་ཏུ་མེད་པ་ཡོད། དག་པ་དང་མ་དག་པའི་འཇིག་རྟེན་གྱི་ཁམས། "ཕྱོགས་བཅུའི་འཇིག་རྟེན་གྱི་ཁམས་མཐའ་ཡས་མུ་མེད་པ་དག་ཏུ་བཞུགས་པའི་འཕགས་པའི་མཆོག་ལྐོག་ཏུ་གྱུར་ཀྱང་ཆོས་ཐམས་ཅད་ལ་ལྐོག་ཏུ་མ་གྱུར་པའི་ཐུགས་མངའ་བ་ཐམས་ཅད་ལ་མཁྱེན་པར་གསོལ་ལོ། །"ཞེས་གསུངས།

རྩོད་སྤོང་།

"འཇིག་རྟེན་ནི་དངོས་པོ་ལ་མངོན་པར་ཞེན་པ་ཕུང་པོ་ལ་སོགས་པ་བསྟན་པས་གདུལ་བར་བྱ་བའི་སེམས་ཅན་རྣམས་ཡིན་ཏེ།" ཞེས་གསུངས་པ་ལྟར་འཇིག་རྟེན་ཞེས་པ་སེམས་ཅན་ལ་གོ་དགོས་ན། འཇིག་རྟེན་གྱི་ཁམས་ཞེས་པ་སེམས་ཅན་གྱི་ཁམས་ལ་གོ་དགོས་སམ་ཞེ་ན། འདིར་འཇིག་རྟེན་གྱི་ཁམས་ཞེས་པ་སེམས་ཅན་རྣམས་ཀྱི་གནས་ཡུལ་ལ་གོ་དགོས་ཏེ། "གང་དག་ཚེ་འཕོས་པ་དེའི་ཆ་ལུགས་ལྟར་སྣང་བ་སོགས་ནི་བར་སྣང་གི་ཁམས་ལ་དྲི་ཟའི་འཇིག་རྟེན་གྱི་ཁམས་དཔག་ཏུ་མེད་པ་མཆིས་པ་ལས་དྲི་ཟའི་འཆི་ཁ་མའི་སེམས་ལ་ཉེ་བར་འཇུག་པ་ཞེས་བྱ་བའི་རིགས་རྣམས་དྲི་ཟའི་ཟས་བཙལ་བའི་ཕྱིར་ལུས་དང་གོས་རྒྱན་ཆ་ལུགས་སོགས་དེ་ལྟ་བུའི་སྤྲུལ་པ་སོགས་ཀྱང་ཡོད།" ཅེས་གསུངས་པའི་ཕྱིར་རོ། །