ཀུན་གཟིགས་ཕོ་བྲང་

གདན་ས་ཆེན་པོ་བཀྲ་ཤིས་ལྷུན་པོའི་བླ་བྲང་རྒྱལ་མཚན་མཐོན་པོ་དང་འདབས་འབྲེལ་དུ་ཡོད་པའི་ཕོ་བྲང་གི་མིང་སྟེ། རབ་བྱུང་བཅུ་བཞི་པའི་མེ་བྱ(༡༨༣༧)ལོར་པཎ་ཆེན་རིན་པོ་ཆེ་སྐུ་ཕྲེང་བདུན་པ་བསྟན་པའི་ཉི་མ་དགུང་ལོ་ང་བདུན་དུ་ཕེབས་སྐབས་གསར་སྐྲུན་གནང་ཞིང་། མཐོ་ཚད་ཐོག་བརྩེགས་བཞི་དང་། རྒྱ་ཁྱོན་ཀ་བ་བརྒྱ་དང་དྲུག་ཅུ་རེ་གཉིས། སྟེང་ཐོག་ལ་གཟིམས་ཆུང་ཕན་བདེ་ཀུན་འཁྱིལ། གཟིམས་སྦུག་ཤར་ནུབ་བཅས་སུ་སྐུ་རྒྱུ་ལི་མ་ལས་གྲུབ་པའི་ཚེ་དཔག་མེད་ཀྱི་སྟོང་སྐུ་སོགས་སྐུ་གསུང་ཐུགས་རྟེན་གྲངས་ལས་འདས་པ་བཞུགས་ཡོད།
༼དུང་དཀར་ཚིག་མཛོད་ཆེན་མོ་༽ནས་བཏུས།