ཀསྨི་ར་

ཡོང་ཁུངས་Wikipedia
Jump to navigation Jump to search

བོད་སྐད་དུ་ཁ་ཆེའི་ཡུལ་ཟེར། རྒྱ་གར་ནུབ་བྱང་ཕྱོགས་སུ་ཡོད། བོད་ཡིག་ཐོག་འཁོད་པའི་ལོ་རྒྱུས་ཁག་དང་། ཏཱ་ར་ནཱ་ཐས་མཛད་པའི《རྒྱ་གར་ཆོས་འབྱུང》ལེའུ་གསུམ་པའི་འགོར། ཁ་ཆེའི་ཡུལ་འདི་ཐོག་མར་མཚོ་ཞིག་ཡིན་པ་ལ་རྒྱལ་པོ་མ་སྐྱེས་དགྲའི་བུ་ལག་བཟང(འཆར་བྱེད་ཡིན་ནམ་སྙམ)གི་བུ་གཞུ་བཟང(མ་འགགས་པ་ཡིན་ནམ་སྙམ)གིས་སྲིད་དབང་བཟུང་སྐབས་ཏེ། ཕལ་ཆེར་སྤྱི་ལོའི་གོང་གི་༥༠༥ལོ་ནས༤༩༧ལོ་བར་ཡིན་ཚོད་ལ་སྐབས་དེར་ཀུན་དགའ་བོའི་སློབ་མ་དགྲ་བཅོམ་པ་ཉི་མ་གུང་པས་ཡུལ་དེར་བྱོན་ནས་ཀླུའི་རྒྱལ་པོ་ཨོ་དུ་ཤྚ་བཏུལ་ནས་མཚོ་བསྐམས་པའི་ཤུལ་དུ་སྐམ་ས་ཆགས་ཏེ། རིམ་གྱིས་ཡུལ་གཞན་དག་ནས་མི་མང་པོ་དེར་འཛོམས་ཤིང་། གྲོང་ཁྱེར་ཆེན་པོ་དགུ་དང་གྲོང་གསེབ་ཁག་མང་པོ། རྒྱལ་པོའི་ཕོ་བྲང་གཅིག། གཙུག་ལག་ཁང་བཅུ་གཉིས། དགེ་འདུན་ཧ་ཅང་མང་པོ་འཛོམས་པ་ཞིག་ཆགས་པར་གསུངས་ཡང་མུ་སྟེགས་རིག་བྱེད་སྨྲ་བ་འགའ་ཞིག་གིས་བཤད་སྲོལ་ལ། དྲང་སྲོང་ཀ་ཤྱབ་ཟེར་བ་ཞིག་ཡུལ་དེར་བྱོན་ནས་མཚོ་རྡོལ་དུ་བཅུག་པ་ཡིན་པས། ཡུལ་གྱི་མིང་ཡང་དྲང་སྲོང་དེའི་མཚན་ལས་གྲས་ཏེ་ཀ་ཤ་སྨིར་ཞེས་ཐོགས་པ་ཡིན་ཟེར་བའང་སྣང་། གང་ལྟར་མཚོ་སྐམ་པའི་ཤུལ་དུ་ཡུལ་གྲོང་ཆགས་པའི་བཤད་ཚུལ་མཐུན་ཡོད། དེ་ནས་སྤྱི་ལོའི་དུས་རབས་དང་པོའི་དཀྱིལ་དུ་ཀུ་ཤ་ནའི་རྒྱལ་རབས་ཀྱི་རྒྱལ་པོ་མི་ཐོག་གསུམ་པ་རྒྱལ་པོ་ཀཎི་སྐའི་དུས་སུ་ཐེག་པ་ཆེ་ཆུང་གཉིས་ཀ་དར་རྒྱས་ཆེ་ཞིང་བཀའ་བསྡུ་གསུམ་པའི་སྦྱིན་བདག་ཀྱང་རྒྱལ་པོ་འདིས་བྱས་ཏེ་ཀཎི་སྐའི་གཙུག་ལག་ཁང་དང་། ཁྲུ་བཞི་བརྒྱ(འདོམ་བརྒྱ)ཡོད་པའི་མཆོད་རྟེན་ཆེན་པོ་བཅས་བཞེངས་པར་གསལ་ཞིང་། 《ཐང་སན་ཙང་གི་ལམ་ཡིག》བོད་སྐད་དུ་བསྒྱུར་བ་ལས། སྐབས་དེར་ཁ་ཆེའི་ཡུལ་དུ་ཐེག་པ་ཆུང་ངུའི་དགེ་འདུན་ལྔ་སྟོང་ཙམ་ཡོད་པའི་དགོན་པ་གཅིག་དང་། སངས་རྒྱས་བཅོམ་ལྡན་འདས་ཀྱི་ཚེམས་ཡིན་ཟེར་བ་ཚོན་གང་ཙམ་ཡོད་པ་གཅིག་བཅས་མཇལ་བ་དང་། སློབ་དཔོན་དགེ་འདུན་གྲགས་པ་ལས་ཐེག་པ་ཆེན་པོའི་ཆོས་དང་། རིག་གནས་སྐོར་མང་པོ་གསན་པར་གསུངས། དེ་ནས་རབ་བྱུང་གསུམ་པའི་མཇུག་ལ(དུས་རབས་བཅུ་གསུམ་པའི་འགོ)ཁ་ཆེ་པཎ་ཆེན་ཤཱཀྱ་ཤྲི་བོད་ནས་ཁ་ཆེའི་ཡུལ་དུ་ཕྱིར་ལོག་ཕེབས་རྗེས་ལོ་ངོ་བཅུ་བཞིའི་རིང་ནང་བསྟན་ཆོས་ལུགས་དར་སྤེལ་མཛད་པའི་ལོ་རྒྱུས་ཁ་ཆེ་པཎ་ཆེན་གྱི་རྣམ་ཐར་ཁྲོ་ཕུ་ལོ་ཙཱ་བས་མཛད་པའི་ནང་གསལ། དེ་ནས་རབ་བྱུང་བཅུ་གཅིག་པའི་མེ་རྟ(༡༦༦༦)ཡས་མས་སུ་དབྱི་སི་ལན་གྱི་ཆོས་ལུགས་ལ་དད་པའི་རྒྱལ་པོ་ཨོ་རན་ཛེབ་ཟེར་བས་རྒྱ་གར་གྱི་ས་ཁུལ་མང་ཆེ་བ་བཟུང་རྗེས་རྒྱ་གར་བྱང་བརྒྱུད་དུ་དམག་དྲངས་ཏེ་དབང་དུ་བསྡུས་སྐབས་ཀསྨི་ར་ཡང་འོག་ཏུ་བཅུག་པ་དེ་ནས་བཟུང་ཀསྨི་རའི་ཡུལ་དུ་སྡོད་པའི་མི་ཚང་མ་དབྱི་སི་ལན་གྱི་ཆོས་ལུགས་ལ་མ་བསྒྱུར་དབང་མེད་བྱུང་ཞིང་། བོད་ས་གནས་སུ་དབྱི་སི་ལན་གྱི་ཆོས་ལུགས་ལ་དད་པ་བྱེད་མཁན་གྱི་ཚོང་པ་མང་ཆེ་བ་ཐོག་མར་ཀསྨི་ར་ནས་ཡོང་བ་ཡིན་སྟབས་བོད་དུ་ཡོངས་གྲགས་ཀྱི་ངག་རྒྱུན་ལ་དབྱི་སི་ལན་གྱི་ཆོས་ལ་དད་པ་བྱེད་མཁན་གྱི་ཀསྨི་རའི་མི་རྣམས་ལ་ཁ་ཆེ་ཞེས་འབོད་སྲོལ་དང་། ཀསྨི་ར་ནས་ཐོན་པའི་མེ་ཏོག་གུར་ཀུམ་ལ་ཁ་ཆེ་གུར་ཀུམ་ཞེས་འབོད་སྲོལ་བྱུང་བ་ཡིན།
དུང་དཀར་ཚིག་མཛོད་ཆེན་མོ་༽ནས་བཏུས།