ཀརྨ་པ་དུས་གསུམ་མཁྱེན་པ་

ཡོང་ཁུངས་Wikipedia
Jump to navigation Jump to search
ཀརྨ་པ་དུས་གསུམ་མཁྱེན་པ་

(ཀརྨ་པ་སྐུ་ཕྲེང་དང་པོ)འཁྲུངས་ཡུལ་མདོ་ཁམས་ཀྲེ་ཤོད་དུ་ཡབ་སྒོམ་པ་རྡོ་རྗེ་མགོན་དང་ཡུམ་ལྷ་ཐོག་བཟའ་སྒང་ལྕམ་མིང་འདྲེན་གྱི་སྲས་སུ་རབ་བྱུང་གཉིས་པའི་ལྕགས་སྟག(༡༡༡༠)ལོར་སྐུ་འཁྲུངས། ཆུང་དུས་ཀྱི་མཚན་ལ་དགེ་འཕེལ་ཞུ། དགུང་ལོ་བཅུ་དྲུག་པ་ཤིང་སྦྲུལ(༡༡༢༥)ལོར་ཆོས་འཁོར་ཀ་བྲག་ཏུ་རྔོག་ལོ་ཙཱ་བའི་སློབ་མ་མཆོག་གི་བླ་མས་མཁན་པོ་དང་། ཆག་སེང་གེ་གྲགས་ཀྱིས་སློབ་དཔོན་མཛད་དེ་རབ་བྱུང་བཞེས་པའི་མཚན་ལ་ཆོས་ཀྱི་གྲགས་པ་ཞེས་གསོལ། ཁོང་གཉིས་ཀྱི་དྲུང་ནས་འདུལ་བ་དང་བཀའ་གདམས་ཀྱི་ཆོས་སྐོར་འགའ་ཞིག་གསན། དགུང་ལོ་བཅུ་དགུ་པ་ས་སྤྲེལ(༡༡༢༨)ལོར་ཁམས་ནས་དབུས་སུ་བྱོན། དེའི་ཕྱི་ལོ་སྟོད་ལུང་དུ་ཕེབས་ནས་རྒྱ་དམར་བ་དང་། ཕྱ་པ་ཆོས་ཀྱི་སེང་གེ་པ་ཚབ་ལོ་ཙཱ་བ་ཉི་མ་གྲགས་པ་བཅས་ཀྱི་དྲུང་ནས་ཕར་ཕྱིན་དང་། དབུ་མ། ཚད་མ་བཅས་གསན། མལ་འདུལ་བ་འཛིན་པས་མཁན་པོ་དང་། ཡེ་ཤེས་བློ་གྲོས་ཀྱིས་སློབ་དཔོན། མཁན་པོའི་གཅུང་གིས་གསང་སྟོན་མཛད་དེ་བསྙེན་རྫོགས་ཀྱི་སྡོམ་པ་བཞེས། གཞན་ཡང་དགེ་བཤེས་ཤ་ར་བ་དང་། རྣལ་འབྱོར་པ་ཤེས་རབ་རྡོ་རྗེ། རྒ་ལོ་ཙཱ་བ། ཁམས་པ་ཨ་སེང་། ཡོལ་ཆོས་དབང་རོང་པ་མགར་དགེ་སོགས་བླ་མ་མང་དུ་བསྟེན་ཏེ་བཀའ་གདམས་ཀྱི་གཞུང་དང་། མན་ངག་། དུས་འཁོར་མགོན་པོ་བྱ་རོག་མ། ཕག་མོ། ཀྱེེ་རྡོར། ས་སྐྱ་བའི་ལམ་འབྲས། ཞི་བྱེད་སོགས་སྐབས་དེར་བོད་དུ་ཡོངས་སུ་གྲགས་པའི་ཆོས་བཀའ་ཐམས་ཅད་གསན། དགུང་ལོ་སུམ་ཅུ་པ་ས་ལུག(༡༡༣༩)ལོར་རྗེ་སྒམ་པོ་པ་ཁུ་དབོན་གཉིས་དང་མཇལ། གསང་སྔགས་ཐབས་ལམ་གྱི་སྐོར་གསན་ནས་ལོ་གསུམ་གྱི་བར་སྒོམ་སྒྲུབ་ལ་འབད་བརྩོན་གནང་བས་ན་བཟའ་རས་རྐྱང་ཐུབ་པ་བྱུང་། རྗེ་སྒམ་པོ་བས་ལུང་བསྟན་པ་ལྟར་ཟངསརི་དང་། ཕག་མོ་གྲུ། འོལ་ཁ། མོན་པ་གྲོ་སྟག་ཚང་སོགས་གནས་མང་པོར་ཕེབས་ཏེ་སྒོམ་སྒྲུབ་ཁོ་ན་མཛད། མོན་གྱི་རྒྱལ་པོ་ག་ཐུང་གིས་སྦྱིན་བདག་ཞུས་ནས་ལོ་གཅིག་རིང་རི་ཁྲོད་དུ་བཞུགས། རྗེ་བཙུན་རས་ཆུང་པ་བསྟེན་ནས་རྗེ་མི་ལ་རས་པའི་ཞལ་གདམས་ཆ་ཚང་བ་གསན། རྗེ་སྒམ་པོ་པ་སྐུ་མྱ་ངན་ལས་འདས་ཁར་ལུང་བསྟན་པ་ལྟར་གནས་ངེས་མེད་དུ་མཛད་པའི་ངང་ནས་རླུང་ལ་རང་དབང་ཐོབ་པའི་རྟགས་གསལ་པོ་བྱུང་། དགུང་ལོ་ལྔ་བཅུ་པ་ས་ཡོས(༡༡༥༩)ལོར་མཚུར་ཕུའི་བྲག་རྩར་ཞག་འགའ་ཤས་བཞུགས་ཏེ་དགོན་པ་དང་གཙུག་ལག་ཁང་ཆགས་པའི་རྟེན་འབྲེལ་དང་ཐུགས་སྨོན་མཛད། དེ་ནས་ཁམས་སུ་བྱོན་ནས་དབེན་གནས་མང་པོར་སྒྲུབ་པ་མཛད། དགུང་ལོ་ལྔ་བཅུ་ང་ལྔ་པ་ཤིང་སྤྲེལ(༡༡༦༤)ལོར་ཀམ་པོ་གནས་ནང་དུ་ཕེབས་ཏེ་གནས་གཞི་བཟུང་བར་མཛད། དགུང་ལོ་བདུན་ཅུ་དོན་བདུན་པ་ཤིང་སྦྲུལ་ལ་ཀརྨ་པའི་དགོན་པ་ཕྱག་བཏབ། དེའི་ཕྱི་ལོ་ཁམས་ནས་དབུས་སུ་ཕེབས། འབྲི་གུང་སྐྱོབ་པ་རིན་པོ་ཆེ་དྭགས་ལྷ་སྒམ་པོར་བཞུགས་པ་དང་མཇལ་ནས་ཆོས་གསན་རེས་མཛད། དགུང་ལོ་བརྒྱད་ཅུ་བཞེས་པ་ས་བྱ(༡༡༨༩)ལོར་སྟོད་ལུང་དུ་མཚུར་ཕུའི་དགོན་པ་དངོས་སུ་ཕྱག་བཏབ། དགུང་ལོ་བརྒྱད་ཅུ་རྩ་བཞིར་ཕེབས་པ་ཆུ་གླང(༡༡༩༣)ལོར་མཚུར་ཕུའི་གདན་ས་རང་དུ་སྐུ་གཤེགས། སྐུ་གདུང་ཞུགས་འབུལ་ཞུགས་པའི་གདུང་ལ་རིང་བསྲེལ་སོགས་བྱོན་པ་རྣམས་གདུང་རྟེན་གསེར་གདུང་འབྲས་སྤུངས་མཆོད་རྟེན་གྱི་དབྱིབས་འདྲ་བ་ཞིག་བཞེངས་པ་མཚུར་ཕུའི་དགོན་པ་རང་དུ་བཞུགས། ལོ་རྒྱུས་ཞིབ་པ《ལྷོ་རོང་ཆོས་འབྱུང》བྲིས་མའི་ཤོག་གྲངས༡༧༧ནས༡༨༢བར་དང་། 《མཁས་པའི་དགའ་སྟོན》ཤོག་གྲངས༨༥༩ནས༨༧༠བར། 《ཀམ་ཚང་ཆོསའབྱུང》པོད་དང་པོའི་ཤོག་གྲངས༢ནས༢༣བར་གསལ། གཞན་ཡང《ཀརྨ་པ་དུས་གསུམ་མཁྱེན་པའི་རྣམ་ཐར་དགོས་འདོད་ཀུན་འབྱུང》དྲི་མེད་དཔལ་ཡེ་ཤེས་ཀྱིས་མཛད་པ་བྲིས་མ་ཤོག་གྲངས༢༨ཡོད་པ་ཞིག་འདུག་ཀྱང་ཞིབ་ཆ་ལྟ་བའི་གོ་སྐབས་མ་རྙེད་ལགས།
དུང་དཀར་ཚིག་མཛོད་ཆེན་མོ་༽ནས་བཏུས།