Wikipedia:Risk disclaimer

ཡོང་ཁུངས་Wikipedia
གནས་སྤོ། དཀར་ཆག, འཚོལ།

རྩོམ་པ་པོའི་སྔོན་གླེང་མདོར་བསྡུས། རྟསུམ་རྟགས་རྣམ་བཤད། བེ་རི་འཇིགས་མེད།གས་ཀྱི་འཇུག་པའི་རྣམ་བཤད་མཁས་པའི་དགོངས་རྒྱན་ཞེས་བྱ་བ་འདི་ནི། འཇིག་རྟེན་ཕལ་བའི་སྐད་ཡིག་དང་གསུང་རབ་ཀྱི་བརྡ་ཆད་གཉིས་ལས། གཙོ་བོ་གསུང་རབ་ཀྱི་བརྡ་ཆད་བཀྲོལ་བའི་ཆེད་ཁོ་ནར་དམིགས་ནས་བྲིས་པ་ཡིན། ཆུང་དུས་ནས་ཡབ་ཆེན་མཁས་དབང་བློ་བཟང་དོན་ཡོད་དང་དགེ་བཤེས་བསོད་ནམས་ཕུན་ཚོགས་གཉིས་ཀྱི་བཀའ་དྲིན་ལས་བརྡ་སྤྲོད་རིག་པའི་འགྲོ་སྟངས་རགས་ཙམ་ཆགས་པ་དང༌། ཀླུ་སྦྱིན་དགེ་བཤེས་ཆེན་མོའི་དྲུང་ནས་ཕར་ཚད་ཀྱི་རིགས་ལམ་ལ་ཐོས་བསམ་གྱི་སྐལ་བཟང་ལོ་ཤས་ཐོབ་པ་ནས། བོད་ཀྱི་བརྡ་སྤྲོད་རིག་པའི་གཞུང་སུམ་རྟགས་གཉིས་ལ་དག་སྣང་ལྷག་པར་འཕེལ་ཏེ། ཞར་དང་ཞོར་ལ་མཁས་བླུན་ཅི་རིགས་ཀྱིས་བརྩམས་པའི་སུམ་རྟགས་ཀྱི་གཞུང་འགྲེལ་བཅུ་ཕྲག་ཁ་ཤས་མིག་སྔར་རེག་པར་གཏན་ཚིགས་རིག་པས་དཔྱོད་པ་དང་འགྲོགས་ནས་ལྟ་རྒྱུའི་བགོ་སྐལ་ཐོབ། ལྷག་པར་རྒྱ་གར་དུ་སླེབས་རྗེས་དེང་རབས་ཀྱི་འཛམ་གླིང་མཛེས་པའི་རྒྱན་གཅིག་དགེ་བཤེས་དཔལ་ལྡན་གྲགས་པའི་དྲུང་ནས་དབུ་ཚད་ཕར་གསུམ་གྱི་བཤད་ཁྲིད་ཞུས་སྐབས། གཞུང་ཆེན་པོའི་དཀའ་གནད་དུ་མའི་ནང་གི་བྱ་བྱེད་ལས་གསུམ་ལས་འཕྲོས་པའི་དྲི་རྨེད་དང་བགྲོ་གླེང་ཡང་ཡང་གནང་བ་མ་ཟད། གཞུང་ཆེན་མོའི་བརྡ་ཆད་ལས་བཏུས་པའི་དཔྱོད་གཞི་འགོང་ཆེ་བ་ཡང་མང་པོ་གནང་ནས་པྲ་སྟི་དགེ་བཤེས་རིན་པོ་ཆེའི་རྟགས་འགྲེལ་དང་མཐུན་པའི་འགྲེལ་བ་ཞིག་གསར་རྩོམ་དགོས་པའི་ནན་ཏན་གྱི་དཀའ་ཡི་མེ་ཏོག་གི་ཅོད་པན་སྤྱི་བོའི་རྒྱན་དུ་བཅིངས་པ་ལྟར། སྤྱི་ལོ་༡༩༩༤ལོར་ཁ་ཐུག་ཤར་མ་རྩོམ་གདན་དང་པོ་ཟིན་བྲིས་སུ་བཏབ། ད་དུང་མཁས་པ་ཆེན་པོ་འདི་ཉིད་ཀྱིས་གཞུང་ཆེན་པོ་དང་ཚད་མ་རིག་པའི་འགྲོ་སྟངས་མ་ཆགས་པའི་རྟགས་འགྲེལ་མཁན་པོ་ཚོའི་སྨིག་རྒྱུ་དང་འཇའ་རིས་ལ་ཐེར་ཟུག་གིས་མཛུབ་ཀེར་གནང་ཐེངས་རེ་རེས་གཞུང་འགྲེལ་དེ་དག་གི་གཏད་སོ་སྦྲུལ་ཤུབས་ལྟར་ཞུས། མོན་གྷོ་དུས་དབང་སྐབས་ཀྱི་སྔོན་འགྲོའི་ཆོས་བཀའ་དབུ་མ་རིན་ཆེན་ཕྲེང་བ་པར་སྐྲུན་ཞུས་དག་སྐབས། གསུང་རབ་ཀྱི་བརྡ་ཆད་འཁྲུལ་མེད་ཅིག་ཤེས་དགོས་ན་བརྡ་སྤྲོད་ཀྱི་གཞུང་འགྲེལ་གང་ཞིག་ལ་རྩ་འཛིན་དགོས་པའི་ངེས་ཤེས་གསལ་པོར་རྙེད། གནད་འགག་དེ་དག་གཞི་འཛིན་བྱས་ནས། རྟགས་ཀྱི་འཇུག་པའི་དཀའ་གནད་འགའ་ཞིག་དོགས་སེལ་གཟུ་གནས་དགྱེས་པའི་གཏམ། ཞེས་པ་ཞིག་སྒོ་མང་ལྡུམ་ར་ཐོག་བཀོད་ཁུལ་བྱས་པར་ལུང་རིགས་ཀྱི་གཤོག་རྩལ་རྫོགས་པའི་གདན་སའི་མཁས་པ་དུ་མས་བསྔགས་བརྗོད་དང་ཆ་ཚང་འགོད་དགོས་ཀྱི་འབད་སྐུལ་གནང་མཁན་ཡང་དུ་མ་བྱུང༌། གདན་སར་སྡོད་རིང་གནད་དེ་དག་རྩ་འཛིན་བྱས་ནས་འཛིན་གྲྭ་གོང་འོག་གི་སློབ་གཉེར་བ་ཤིན་ཏུ་མང་པོ་དང༌། གདན་ས་ནས་འཐོན་རྗེས་ནོར་གླིང་མཐོ་སློབ་སོགས་ལ་དཔྱད་བརྗོད་དང་བགྲོ་གླེང་ཟུང་འབྲེལ་གྱིས་སློབ་ཁྲིད་ཀྱང་རྒྱུན་རིང་བྱས། སྤྱི་ལོ་༢༠༠༦ལོར་སྐད་ཡིག་གསུམ་ལྡན་གྱི་ལོ་ཙཱ་བ་ཆེན་པོ་ན་ག་སངས་རྒྱས་བསྟན་དར་ལགས་ཀྱིས་རྟགས་འགྲེལ་འདི་བཞིན་རྡ་ས་བོད་ཀྱི་དཔེ་མཛོད་ནས་དཔེ་སྐྲུན་ཞུ་རྒྱུ་ཞལ་བཞེས་ཐོག་པར་རྩ་གང་མགྱོགས་དགོས་གལ་མངགས་ནའང༌། བར་ལམ་ྋགོང་ས་མཆོག་དང་མཛད་རྣམ་རྩོམ་སྒྲིག་དང༌། འཕགས་བོད་ཆོས་འབྱུང་གླེགས་བམ་གསུམ་པ་རྩོམ་སྒྲིག་བྱེད་གཞིན་ཐོག རྒྱལ་ཁབ་ཕྱི་ནང་དུ་མར་འགྲོ་སྐྱོད་འདུ་འཛུའི་གཡེངས་པས་དུས་འགྱངས་རིམ་པར་སོང་མཐར། ཝཱ་ཎཱ་བོད་ཀྱི་གཙུག་ལག་སློབ་གཉེར་ཁང་དུ་དགེ་འོས་འཛིན་གྲྭའི་དགེ་རྒན་འདན་ཞུས་བྱུང་བ་དང༌། གཞུང་ཁྲིད་དང་ཟུར་ཁྲིད་ཀྱི་ཞོར་ལ་ཞི་འཚོ་དཔེ་མཛོད་ཁང་ཆེན་མོར་བཞུགས་པའི་བཀའ་བསྟན་གསུང་འབུམ་ཁག་མི་ཉུང་བ་ཞིག་དང་ལྷག་དོན་བསྟན་འགྱུར་ཁྲོད་དུ་བཞུགས་པའི་བརྡ་སྤྲོད་པའི་བསྟན་བཅོས་ཡོངས་སུ་རྫོགས་པར་ཉམས་ཞིབ་ལྷོད་པོ་བྱེད་རྒྱུའི་གོ་སྐབས་ལྷ་ཡིས་བསྩལ་བ་ལྟར་བྱུང་བ་དང་སྦྲགས། དེ་སྔོན་བྲིས་ཟིན་པ་རྣམས་ལ་སྣོན་འཕྲི་ཅི་རིགས་དང་གསར་འབྲི་དགོས་རིགས་རྣམས་ཁ་སྐོང་གིས། སྤྱི་ལོ་༢༠༠༧ལོ་ཟླ་བ་ཎཻ་རུ་མགྲོན་ཁང་དུ་མཇུག་རྫོགས་པར་བྱས། དེ་ལྟར་གང་ཞིག་གཏན་ལ་ཕབ་ནས་བྲིས་པའི་རྟགས་ཀྱི་འཇུག་པའི་གཞུང་འགྲེལ་འདི་ཉིད་དེང་སང་ཕོ་གསར་རྐྱལ་སྟོང༌། མགོ་མ་མཐོང་གོང་ནས་ལུས་འགྲེལ་བཤད་རྒྱག་མཁན་དེ་དག་གིས་བྱེད་བབ་དང་མི་འདྲ་བར་སྔ་ཕྱིར་རྒྱུན་རིང་དཔྱད་པའི་མཐའ་སྡོམ་ལྟ་བུར་བཀོད་པ་ཡིན་པས། ཁྲིད་རྒྱུན་དང་རྨོངས་ཞེན་ལ་ཨ་འཐས་ཀྱིས་ཤི་འཐམས་མི་བྱེད་པར་རིག་པའི་རྗེས་སུ་འགྲོ་བ་རྣམས་ཀྱི་སྤྱན་ལམ་དུ་རྣམ་པར་བཀྲ་བའི་ལྟད་མོའི་དོ་ར་ཞིག་ཏུ་འགྱུར་རྒྱུའི་གདེངས་དཔོག་བྱེད་ཀྱིན་ཡིན་ལ། དེ་ལས་གཞན་གཞུང་ཆེན་པོ་དང་ཚད་མ་རིག་པའི་འགྲོ་སྟངས་མ་ཆགས་པའི་རྟགས་འགྲེལ་སྨྲ་བ་དག་གིས་ནི་བསྟོད་སྨོད་དབྱེ་ཞིབ་ཇི་ལྟར་བྱེད་ཀྱང་གྲོག་མས་གླང་ཆེན་གྱི་གཟུགས་ཚོད་འཇལ་བར་ཧ་ལས་རྒྱུ་དང་ཡ་མཚན་རྒྱུ་ཅི་ཡང་མེད། དེ་ལྟར་མོད་ཀྱང་དབྱིག་གི་གཉེན་པོས། ཉེས་པ་གྱུར་གང་དེ་ནི་བདག་གིས་ཉེས། །དམ་ཆོས་ཚུལ་ཚད་མ་ཐུབ་རྣམས་ཡིན། །ཞེས་དང༌། རྒྱལ་པོའི་སྲས་ཀྱིས། དོན་ཆེ་བ་ལ་བདག་འདྲའི་བློས། །འཁྲུལ་མི་སྲིད་པ་མ་ཡིན་པས། །ཅི་སྟེ་མིན་ན་གཞན་དུ་གྱིས། །ཞེས་པ་ལྟར། བྱེད་པ་པོ་ཚུར་རོལ་ཕལ་བའི་ས་ལས་མ་འགངས་པས། གང་ཞིག་ཉེས་པའི་བཤད་པ་མཆིས་པ་དེ་ཀུན་རང་གི་ཉེས་པ་ཁོ་ནར་ངེས་ལ། དཀའ་བའི་གནད་ལ་འཁྲུལ་བའི་བཤད་པའང་ཅིས་ཀྱང་འབྱུང་སྲིད་པ་དེ་ཀུན་གཟུ་གནས་མཁས་པ་ཚོས་གཞན་དུ་བཅོས་པ་མཛོད་རོགས་ཞུ་རྒྱུ་ཡིན། རྟགས་འགྲེལ་འདི་ཉིད་རྩོམ་འབྲི་བྱས་པའི་རྒྱུད་རིམ་ཁྲོད་ཆ་ཤས་གང་ཙམ་གློག་ཀླད་དུ་འཇུག་མཁན་དཀར་མཛེས་ཐུབ་བསྟན་དང༌། ཞུ་དག་གཏོང་མཁན་འབྲས་ཏྲེ་ནམ་མཁའ་དང་ངག་དབང་རྒྱལ་མཚོ། ནོར་གླིང་མེ་འོད། ཝཱ་ཎཱའི་ཚེ་རིང་ཕུན་ཚོགས། ལྷག་པར་མཐའ་མའི་ཞུ་དག་གནང་མཁན་ལྷ་ས་བ་ཚེ་བརྟན་དབྱངས་སྐྱིད་དང༌། ན་ག་སངས ་རྒྱས་བསྟན་དར་བཅས་ལ་སྙིང་ནས་ཐུགས་རྗེ་ཆེ་ཞུ་རྒྱུ་ཡིན། འདི་དོན་སྨྲ་བའི་ཉི་མ་ཕལ་བོ་ཆེ།། དུས་ཀྱི་ཆུ་ལྷའི་ཕང་པར་གཟིམས་པ་ན།། ལེགས་བཤད་ཟླ་བ་གསར་པའི་དཀྱིལ་འཁོར་འདིས།། བརྡ་དོན་མུན་སེལ་འོད་སྣང་འཚེར་གྱུར་ཅིག། ཤིས་སྨོན་བཅས་དགེ་མིང་ཟུར་ཙམ་འདྲེན་པ་བེ་རི་འཇིགས་མེ་ད་དབང་རྒྱལ་གྱིས། རྡ་ས་སྤྱི་འཐུས་ལས་ཤག་ཏུ་སྤྱི་ལོ་༢༠༠༨ཟླ་༦ཚེས་༡༥ལ་བྲིས།