User talk:སྟག་ཚང།
ཁེར་འགྲོའི་ཉིན་མོ།།
དང་པོ།
ཉིན་གུང་ཟས་ལ་ཚིམས་པར་རོལ་རྗེས།།
རང་ཤག་ནང་དུ་གནས་འདུན་མེད་པས།།
དེབ་དང་སྨྱུ་གུ་ལག་པར་བཟུང་ནས།།
དགོན་པའི་ཕྱི་རུ་དལ་གྱིས་བུད་སོང་།།
ཕྱི་རོལ་ཡུལ་ལ་ལེགས་པར་ལྟས་དུས།།
སྦྲང་ཚང་འདོལ་འདྲའི་ཟང་ཟིང་ཆེ་བས།།
ང་རང་སེམས་པ་ཟང་ཟིང་གྱུར་ནས།།
ནགས་གསེབ་ཞིག་ལ་འགྲོ་འདུན་སྐྱིས་བྱུང།།
རང་གི་འདོད་པ་རང་གི་བཀང་ཕྱིར།།
མདུན་གྱི་ནགས་སུ་དལ་གྱིས་སོང་བས།།
གཡས་གཡོན་གང་ལ་ཇི་ཙམ་ལྟས་ཀྱང་།།
རྩེ་ཤིང་རིགས་ལས་ཅི་ཡང་མ་མཐོང་།།
ཆུ་ཚོད་གཉིས་ཀྱི་འགྲུལ་བཞུད་རྗེས་སུ།།
རི་སྟེང་ཞིག་ལ་སླེབས་པའི་དུས་དེར།།
ཡངས་པའི་ཐང་ལ་ཕྱིར་མིག་ལྟ་དུས།།
ཡུལ་གྱི་བཀོད་པ་ཧ་ཅང་ལེགས་སོ།།
ད་དུང་གོམ་པ་མདུན་ལ་ཕྱོགས་ནས།།
རི་ཆུང་དེ་ཡི་གཡས་ནས་སྐོར་དུས།།
ལྗོན་པ་ཆེ་ལ་ཧ་ཅང་རིང་རྩེར།།
སྣ་མང་བྱ་ཡིས་སྙན་དབྱངས་བསྒྲགས་བྱུང།།
རྐང་ལམ་ཞིག་གི་སྣེ་མོར་བཟུང་དུས།།
གཡས་གཡོན་གང་སར་ཁང་ཆུང་འགའ་རེ།།
བཀོད་པ་ལེགས་པའི་ཁང་ཆུང་དེ་ཡིས།།
རྒྱང་རིང་ཕ་སའི་རང་ཁྱིམ་དྲན་བྱུང་།།
གཉིས་པ།
ལམ་ཟུར་དེ་ནས་རྒྱ་གར་ཕོ་གསར་ཞིག།།
རྒྱང་ཤེལ་བཟུང་ནས་གང་སར་ལྟ་བཞིན་འདུག།།
ང་ཡིས་ཁོང་ལ་སྐད་ཆ་འདི་ལྟར་དྲིས།།
འདི་རུ་ཇ་ཁང་ཨེ་ཡོད་གྲོགས་པོ་ལགས།།
དགོད་ཙམ་བྱེད་བཞིན་འདི་རུ་ཇ་ཁང་མེད།།
ལགས་སོ་ཟེར་ནས་མདུན་དུ་འགྲོ་བའི་སྐབས།།
སླར་ཡང་ཁོང་གི་ངག་ནས་འདི་ལྟར་འབོད།།
འདི་རུ་ཤོག་དང་ཁོ་བོས་བྱིན་ཆོག་ཟེར།།
འགྲིག་པའི་བརྡ་ལ་མགོ་བོ་གུག་ཙམ་བྱས།།
རྒྱ་གར་སྐད་ནས་བཀའ་དྲིན་ཆེ་ཞེས་ཞུས།།
རྐུབ་སྟེགས་སྟེང་དུ་མར་ལ་དལ་གྱིས་བསྡད།།
རྒྱ་གར་བ་དེས་ང་ལ་འདི་ལྟར་་དྲིས།།
གང་ནས་ཡོང་ངམ་གང་དུ་འགྲོའམ་ཟེར།།
འབོད་ཐེངས་གཅིག་གིས་དྲི་བ་གཉིས་དེ་དྲིས།།
ང་ཡིས་ཁོང་ལ་བརྡ་ལེན་འདི་ལྟར་སྤྲད།།
གཞིས་ཆགས་ནས་ཡོང་འཁྱམ་འཁྱམ་འགྲོ་བ་ཡིན།།
དེ་ལྟར་ང་གཉིས་སྐད་ཆ་གང་མང་ཞིག།།།
བཤད་པའི་སྐབས་དེར་ལྕགས་ཕོར་ཞིག་གི་ནང་།།
ཨ་མ་ཞིག་གིས་ཇ་གང་ཁྱེར་ནས་ཡོང་།།
ང་ལ་སྤྲོད་བཞིན་ཁ་ནས་ཁམས་བཟང་ཟེར།།
དེ་ནས་ག་ལེར་ཇ་ལ་རོལ་བའི་རྗེས།།
བཀའ་དྲིན་ཆེ་ཞེས་མགོ་བོ་གུག་ཙམ་བྱས།།
སླར་ཡང་གོམ་ཁ་ཕྱི་རུ་ཕྱོགས་ནས་ནི།།
གཞུང་ལམ་རྒྱུད་དེ་ཐུར་དུ་ཡོང་བའི་སྐབས།།
གཡས་གཡོན་གྲོང་གི་སྡེ་བ་གང་མང་ཞིག།།།
ང་ལ་ལྟས་ནས་སྐད་ཆ་གང་མང་བཤད།།
ཅི་ཞིག་བཤད་མིན་གསལ་ཁ་མེད་མོད་ཀྱང་།།
གོས་དམར་འདི་ལ་མཚར་སྣང་སྐྱིས་པ་འདྲ།།
ད་དུང་སྡེ་བའི་ཕོ་གསར་དར་མ་འགས།།
ཁོ་བོའི་རྗེས་སུ་དལ་གྱིས་ཡོང་བཞིན་དུ།།
གྲོགས་པོ་ཟེར་ནས་ཡང་ཡང་འབོད་མོད་ཀྱང།།
འཇིགས་སྣང་ཞིག་གིས་ཨ་ལེན་སྤྲོད་མ་ནུས།།
དཔེ་དེབ་ཀློང་བཞིན་དགོན་པའི་ཕྱོགས་སུ་ཡོང་།།
དེ་རིང་ཁེར་འགྲོའི་ཉིན་མོ་ཧ་ཅང་སྐྱིད།།
རོགས་པ་མེད་ཚེ་འགྲོ་རྒྱུ་ཅུང་ཙམ་དཀའ།།
སླར་ཡ་རྗེས་སུ་འགྲོ་རྒྱུའི་འདུན་པ་ཆེ།།
ཅེས་པ་འདི་ནི་དེ་རིང་སྤྱི་ལོ་༢༠༡༢ཟླ་༡༢ཚེས༡༦ཉིན་རི་རྩེ་ནས་ཕྱིར་དགོན་པར་སླེབས་རྗེས་བྲིས།།
ཁ་བ་བབས་པའི་ཞོགས་པ།[རྩོམ་སྒྲིག]
ཉལ་ས་དྲོ་མོའི་ནང་རོལ་དུ་མནལ་ལམ་གྱི་ཞིང་ཁམས་ཞིག་ལ་རོ་མྱོང་བྱེད་བཞིན་པའི་སྐབས་དེར།
གྲང་སིལ་སིལ་དུ་རྩིག་གསེབ་ནས་ཡོང་བའི་རླུ་བུ་ཞིག་གིས་ངའི་རྐང་མགོ་གཉིས་ལ་གྲང་སྣང་བྱིན།
འགྲིལ་ལོག་འགའ་རྒྱག་བཞིན་དུ་མགོ་བོ་དལ་གྱིས་བཏེགས་ནས་སྒིའུ་ཁུག་གི་ཕྱི་རོལ་ལ་ལྟས་དུས།
ངའི་གཡས་ཕྱོགས་ཀྱི་རི་རྩེ་ཡོངས་སུ་ཁ་བས་དར་གྱིས་གཡོག་པ་བཞིན་བཀླུབས་འདུག་པ་མཐོང་།
ཆེས་མཛེས་སྡུག་ལྡན་པའི་དེ་རིང་གི་གངས་རི་དེ་ངའི་མིག་ཟུང་གི་ཡུལ་དུ་འཁྲུངས་པའི་སྐབས་དེར།
རང་དབང་མེད་པར་མགོ་བོ་སྔས་ལ་ལྷུང་ནས་འདས་དོན་ཞིག་དྲན་འཛིན་ངོས་སུ་འཁོར་ནས་ཡོང་།
དེ་དི་མི་ལོ་དྲུག་གི་སྔོན་རོལ་ཞིག་ལ་ང་དང་ངའི་གྲོགས་པོ་གཉིས་གངས་ལ་བརྒལ་བའི་དུས་ཏེ།
སྙིང་ནས་དུང་བའི་ཕ་མ་སྤུན་གྲོགས་རྒྱང་རིང་དུ་བོར་ནས་གཞན་ཡུལ་འགྲིམས་པའི་སྐྱོ་གར་ཞིག་རེད།
སྙིང་ཉེ་བའི་ཕ་མ་སྤུན་གྲོགས་ལ་ཡང་གྲོས་ཙམ་མ་བྱས་པར་ཁུ་སེམ་མེར་རྒྱང་རིང་ཞིག་ལ་སོང་།
ཧ་ཅང་གྲང་བའི་ནམ་ཟླ་ཞིག་ཡིན་རུང་དཀའ་བ་ཡོད་ཚད་ཁྱད་དུ་སད་ནས་ལམ་དུ་བཞུད་པའི་དུས།
བཀྲེས་ལྟོགས་གིས་ཇི་ཙམ་མནར་རུང་གོམ་པ་རེ་རེ་ནས་མདུན་དུ་ཕྱོགས་པའི་མཚན་མོ་དེ་དག།།
དུསས་ཡུན་ཟླ་བ་གཅིག་ལྷག་གི་གོམ་འགྲོས་ཀྱི་མཐའ་མ་གངས་ཁྲོད་ནས་སྤོས་པའི་དགོང་མོ་ཞིག།
དོན་མེད་ཀྱི་འཇིག་སྣང་ཞིག་གིས་རང་ས་བོར་ནས་གཞན་ཡུལ་དུ་གྱར་བའི་ཉིན་དང་པོའི་མཚན་མོ་དེ།
ང་ཤི་ནས་རྣམ་ཤེས་དམྱལ་བར་སོང་རུང་བརྗེད་མི་སྲིད་པའི་སེམས་ཀྱི་རྡོ་རིང་གསོན་པོ་ཞིག་ཡིན།
དེ་ནི་ངའིི་འཇིག་རྟེན་ལ་འཕོ་འགྱུར་ཆེན་པོ་བྱུང་བའི་རང་བྱུང་གི་ལས་འབྲས་ཞིག་ཡིན་པར་འདོད།
དེ་ནི་ངའི་མི་ཚེའི་ནང་རང་ངོ་རང་གིས་ཤེས་པའི་གཟི་བརྗིད་ཀྱི་ཉིན་མོ་དང་པོ་དེ་ཡིན་པར་འདོད།
ཉིན་མ་དེ་ནི་ཕ་ངོ་བུ་ཡིས་ཤེས་པའི་སྐལ་བཟང་གི་ཉིན་མོ་བཟང་པོ་ཞིག་ཡིན་པར་བསམས་སོང་ལ།
རང་དགྲ་ངོས་འཛིན་ཐུབ་པའི་དུས་མཐུན་གྱི་འཐབ་རྩོད་པ་ཞིག་བྱེད་པའི་གོ་སྐབས་ཀྱང་ཐོབ་སོང་།
རིགས་ཞེན་དྭངས་མ་ཞིག་གིས་ཤིན་ཏུ་གཙང་བའི་མདུན་ལམ་ཞིག་ཀྱང་གསལ་པོར་གྲུབ་སོང་ལ།
དུས་དེ་ནས་བཟུང་ངས་རིགས་ཅིག་གི་སྤུན་ཟླ་ལ་ལྷད་མེད་ཀྱི་བརྩེ་བ་ཞིག་བཅང་ནས་གནས་ཡོད།
འདི་ལྟར་སྐབས་དེའི་དཀའ་སྡུག་གང་མང་ཞིག་ལ་མནོ་བསམ་གཏོང་བཞིན་པའི་དུས་སྐབས་དེར།
ཏིང་སྒྲ་ཞིག་གིས་ངའི་རྣ་བའི་བུ་ག་ཡོངས་སུ་གང་སོང་བས་བསམ་བློ་ནང་དུ་བཀུག་པའི་དུས་དེར།
ཆུ་ཚོད་བརྒྱད་པའི་འཛིན་གྲྭ་ཚོགས་དུས་ཀྱི་ཏིང་བརྡ་རེད་འདུག་པས་ངས་ངོ་གདོང་བཀྲུས་རྗེས།
ལག་མགོས་ངོོ་གདོག་ཕུར་བརྡར་གཏོང་བཞིན་འཛིན་ཁང་ཕྱོགས་སུ་གོམ་པ་རེ་རེ་བཞིན་སྤོས།
སྤྱི་ལོ་༢༠༡༢ཟླ་བ་༡༢ཚེས་༡༢ཉིན་ཞོགས་པ་བྲིས།། །།