Category talk:རྩོམ་རིག
༄༅།།བུ་རྒོད་པོ།
བན་ཤུལ་འཁྱམ་བསེ་རུ།
འཛམ་གླིང་གནས་ཚུལ་མིག་གིས་མ་མཐོང་ལ།། གཞིས་ཕྱིས་བོད་མིའི་བདེ་སྡུག་མ་ཐོས་པར།། རང་ཉིད་ཤོང་བའི་སྤྱིལ་བུ་ཆུང་ཆུང་འདིར།། མགོ་བོ་བཏུམ་ནས་མིག་ཆུ་སྙིལ་ཡང་མྱོང་།།
དུས་རབས་ཉེར་གཅིག་ཆ་འཕྲིན་གློག་འགྱུ་ལས།། རི་ཆུ་སྟོང་ཕྲག་བརྒལ་བའི་བར་ཐག་ཀྱང་།། སྐད་ཅིག་བགྲོད་པའི་ཚན་རྩལ་ཕོ་ཉ་འདིས།། འཛམ་གླིང་གནས་ཚུལ་གསལ་བར་སྟོན་འདི་མཚར།།
ལུས་ཀྱི་གནས་མལ་གླིང་བཞིར་མཆིས་ན་ཡང་།། ཕྱི་ནང་མཐོང་ཐོས་དུས་ལྟར་འགྲེམས་པ་སོགས།། དེ་ལྟའི་མཐུན་རྐྱེན་ཡང་དག་འཛོམས་པའི་གླིང་།། ཇ་གྲོགས་འདུ་རའི་ཚོམས་ཆེན་ཨེ་མ་ཧོ།།
ལུས་པོ་གངས་ཀྱི་རི་དང་བྲལ་ན་ཡང་།། སེམས་པ་གངས་རིའི་ལྗོངས་དང་མ་བྲལ་བའི།། རང་སྡེ་ལ་རིགས་ལ་ཞེན་པའི་བུ་རྒོད་ཞིག། འདའ་བཞིའི་མདའ་ལྷ་འདི་ཡང་བསྟོད་པའི་ཡུལ།།
དཔའ་བོའི་ཞལ་ཆེམས་གང་སར་འགྲེམས་ལུགས་ནས།། གསར་འགྱུར་དུས་ལྟར་བརྒྱུད་གཏོང་གནང་ལུགས་དང་།། མདོར་ན་བུ་ཆུང་ལམ་སྟོན་བྱེད་ལུགས་སོགས།། རིགས་ཞེན་གངས་བུ་རྒོད་པོའི་གཤིས་སུ་གྲུབ།།
མེ་དང་མིག་ཆུའི་ཀློང་གི་གངས་ཅན་པའི།། སྐྱོ་གར་འཁྲབ་གཞུང་རིང་མོ་ཤུགས་ཀྱིས་བཀླགས།། བདེན་པའི་ང་རོ་འཛམ་གླིང་ཁྱོན་ལ་བསྒྲགས།། བུ་རྒོད་མདའ་ལྷའི་ངོ་སོ་ཡར་ལ་བསྟོད།།
མི་སྲིན་དམར་བོའི་དཔུང་གི་མཆེ་སྡེར་འོག། ཨ་ཐང་ཆད་པའི་ཚེ་སྲོག་གྲངས་མེད་ཅིག། ཁྱེད་ཀྱིས་བཏང་བའི་ཆ་འཕྲིན་དབྱངས་འགྲོས་ལ།། ཐིམ་ནས་སླར་ཡང་གསོན་པའི་རེ་ལྟོས་འཆའ།།
ཆ་འཕྲིན་གསར་བའི་ཁ་དོག་རེ་རེས་ལས།། འཚོ་བའི་སྣང་བརྙན་རེ་རེ་མངོན་བྱུང་བས།། ཀུ་དོགས་བསམ་བློ་རྒྱ་ལ་འཆིང་བའི་བདག། རྒྱང་དུ་ལྟ་བའི་བློ་སྒོ་ཡངས་པོར་ཕྱེས།།
ལྷག་བསམ་གངས་ཀྱི་རི་བོ་མ་ཉམས་པར།། ཕྱི་ཐག་དར་དཀར་གཞིས་ཕྱིས་བོད་དུ་འཐེན།། བདེན་དོན་གླུ་སྒྲ་དེ་ཡང་མ་འགག་པར།། སླར་ཡང་ཐོས་འཛིན་ཡུལ་དུ་འདྲེན་རོགས་ཞུ།།
ཁ་བ་བོད་པའི་དར་རྒུད་རེ་རེ་ན།། ཨ་ཐང་ཆད་པའི་གཏམ་རྒྱུད་མང་ན་ཡང་།། སེམས་ཀྱི་ཉི་ཟླ་སྐར་གསུམ་མི་མངོན་པའི།། གཞིས་ལུས་མུན་པའི་གླིང་འདི་ཅི་འདྲའི་སྐྱོ།།
བསམ་ཞིང་བསམ་ན་སྙིང་རླུང་སྟོད་དུ་འཚང་།། བྲལ་གདུང་མི་བཟོད་མིག་མཐར་མཆིལ་ཞགས་འཁྱིལ།། སེམས་ཀྱི་འཁུན་སྒྲ་རླབས་བཞིན་འཕྱུར་ནས་འོང་།། ད་ནི་སྨྱུ་གུའི་བསྒྱུར་མཚམས་བཙན་གྱིས་འགོག།
ཞེས་ཇ་གྲོགས་འདུ་ར་གསུམ་པའི་ནང་གསར་འགྱུར་དུས་ལྟར་བརྒྱུད་གཏོང་གནང་མཁན་སྐུ་ཞབས་མདའ་ལྷ་མཆོག་ལ་བཀའ་དྲིན་མཚོན་བྱེད་དུ། ༠༢༡༣ལོའི་ཟླ་༡༡པའི་ཚེས་༡་ཉིན། Chambusuiri ནས་ཕུལ།