སྟོང་རི་ལྷ་མཚོ་

སྟོང་རི་ལྷ་མཚོ་ནི་གངས་ཅན་ཡུལ་གྱི་མཚོ་མོ་གྲགས་ཅན་གྱི་གྲས་སུ་བརྩི་བཞིན་ཡོད།སྟོང་རི་ལྷ་མཚོ་ཞེས་པ་དེ་ཨ་མྱེས་སྟོང་རིའི་ཕང་ན་སྔོ་ལྷམ་མེར་འཁྱིལ་ནས་ཡོད་ཅིང་།མིང་ལ་སྟོང་རི་ལྷ་མཚོ་དང་སྟོང་རི་གཡུ་མཚོ།སྟོང་རུ་མཚོ་ནག  ལྷ་ལུང་མཚོ།དུང་རི་མཚོ།དུང་རི་མཚོ་ཞེས་འབོད་ཚུལ་མི་འདྲ་བ་དུ་མ་ཡོད།སྟོང་རིའི་མིང་ཇི་ལྟར་ཐོགས་པ་དང་ལོ་རྒྱུས་ཀྱི་རྒྱབ་ལྗོངས་གང་འདྲ་ཡོད་པ་གོང་གི་གཞི་བདག་མཐུ་བོ་ཆེ་རྣམ་གསུམ་ངོ་སྤྲོད་ཞུ་སྐབས་བཤད་ཟིན།འོ་ན་ལྷ་ལུང་མཚོ་དང་དུང་རི་མཚོ་ཞེས་པ་ནི་ཇི་ལྟར་ཐོགས་པ་ཡིན་ནམ་ཞེ་ན།སྤྱི་ལོ་480ལོར་ལྷ་ལུང་དཔའ་རྡོར་གྱིས་ཨུ་དུམ་བཙན་པོ་གླང་དར་མ་བཀྲོགས་རྗེས་མདོ་སྨད་དུ་ཉེན་གཡོལ་དུ་ཕེབས་ཤིང།མཚོ་འདིའི་ཉེ་ལོགས་ནས་མི་ཚེ་མ་སྟོང་བར་དུ་སྒྲུབ་པ་ཉམས་ལེན་མཛད་པས་དེ་ལྟར་ཐོགས་པར་བཤད།དུང་རི་མཚོ་ཟེར་བ་ནི་རི་དེའི་ཆགས་དབྱིབས་རྒྱུ་མཚན་དུ་བྱས་ཏེ་མཚོ……ལའང་མིང་དེ་འདྲ་བཏགས་སྐད།གང་ལྟར་བོད་ཀྱི་ལོ་རྒྱུས་ཡིག་ཚང་དུ་མཚན་སྙན་རྒྱས་པའི་མཚོ་གྲགས་ཅན་ཞིག་ཡིན།གཡུ་ཡི་མཚོ་མོ་གྲགས་ཅན་འདིའི་ཁོར་ཡུག་ཀུན་ཏུ་ཤུག་སྡོང་།སིལ་སྡོང།མ་གལ།འོད་དམར།སྟག་པ་སོགས་ཤིང་སྣ་ཧ་ཅང་མང་ལ་དེ་མིན་ད་དུང་མིང་མི་ཐོགས་པའི་ཤིང་སྣ་བརྒྱ་ཕྲག་དུ་མས་ཕྱུག་པ་དང།མཚོ་དྭངས་མོ་གཡུ་ཡི་མེ་ལོང་ནང་བཞིན་ལྟ་ན་སྡུག་པ།མཚོ་རུ་ཉ་རིགས་རྩེན་ཞིང།སྟེང་དུ་ཆུ་བྱ་ལྡིང་བ།ཕྱོགས་བཞིའི་ནགས་ཁྲོད་ནས་ཁུ་བྱུག་སོགས་བྱ་རིགས་སྣ་ཚོགས་ཀྱིས་སྐད་སྙན་ལྷང་ལྷང་སྒྲོག་པ།མཐའ་སྐོར་གྱི་ནགས་ཚལ་མཛེས་ཤིང་དུས་བཞིར་སྔོ་ཞིང་ལྗང་བ།མཁའ་ན་སྤྲིན་དཀར་འཁྲིགས་ཤིང་།མཚོ་ནང་དུ་ཉི་ཟླ་སྐར་གསུམ་གྱི་འོད་མདངས་ཤར་བ་བཅས་ཡིད་དུ་འོང་བའི་རྣམ་པ་དེས་ཀུན་གྱི་ཡིད་དབང་མེད་དུ་འཕྲོག་ངེས།མཚོ་ཁ་རྒྱ་མཚོའི་ངོས་ལས་སྨི་ཉིས་སྟོང་ལྔ་བརྒྱ་དང་བཞི་ཡོད་ལ།རྒྱ་ཁྱོད་ན་ཧ་ལམ་མུའུ་སུམ་བརྒྱ་དང་ཆ་སྙོམ་གཏིང་ཚད་སྨི་ཉེར་དྲུག་ཡས་མས་ཡོད།མཚོ་ཡི་མཐའ་བཞི་རུ་སྐྱེས་ཧ་ཅང་ཕུན་སུམ་ཚོགས་ཤིང།ཁོར་ཡུག་གི་ནགས་ཚལ་ནང་དུ་མཚོ་སྔོན་གྱིས་ཁུལ་གཞན་དག་ཏུ་མེད་པའི་སྐྱེས་དངོས་རིགས་ལྔ་བཅུ་ལྷག་ཡོད།སྨན་རིགས་སུ་ཐེབས་པའི་སྐྱེས་དངོས་རིགས་སུམ་བརྒྱ་ལྷག་ཡོད་ལ།སྨན་གཞུང་ནང་བཀོད་པའི་རིགས་གྱ་གཅིག་ཡོད།འདབ་ཆགས་རིགས་མི་འདྲ་བ་ཆིག་བརྒྱ་སོ་གཉིས་ལྷག་ཡོད་ཅིང།སྲོག་ཆགས་ཀྱི་རིགས་ཀྱང་མང་པོ་ཡོད།དེ་ཡང་ཇི་སྐད་དུ་།མདོ་སྨད་ས་ཡི་ཐིག་ལེ་ལྟེ་བ་ན།ངོ་མཚར་རྫུ་འཕྲུལ་རི་མོ་སྟོང་གི་གར།།ལིང་ལིང་ཟློས་པའི་གྲིབ་མ་ནག་པོའི་གཟུགས་།འཛིན་པའི་མེ་ལོང་མང་ཞེས་སྒྲོགས་ཏེ་གང།ཞེས་མཚོ་ཡི་མཚར་སྡུག་ཚིགས་བཅད་བཞིར་བསྡུས་ནས་བཀོད་པ་ནང་བཞིན་གཡུ་མཚོ་འདི་ནི་གནས་ཁྱད་པར་ཅན་ཞིག་ཡིན་པས།རྡོ་སྦིས་གཙོ་བྱས་པའི་ཉེ་འཁོར་གྱི་བོད་མི་རྣམས་ཀྱིས་གནའ་སྔ་མོ་ནས་ད་ལྟའི་བར་དུ་སྐར་བཟང་དུས་བཟང་ཉིན་གཏེར་འབུལ་དང་ལྷ་མཆོད།ཀླུ་མཆོད་བཅས་བྱས་ཏེ་ངོ་མཚར་བའི་ལྟས་།ཁྱད་པར་ཅན་མཐོང་ཐུབ་པར་བཤད།དེང་སང་མཚོ་མོ་འདི་མཚོ་སྔོན་ཞིང་ཆེན་གྱི་ལྗོངས་རྒྱུའི་གནས་སྐོར་བྱེད་སའི་ཡུལ་གལ་ཆེན་གྱི་གྲས་སུ་གྱུར་ཡོད།