ས་བཅད་ལྡེའུ་མིག་རང་གྲོལ་

༄༅༔ ཟབ་ཆོས་ཉམས་ཁྲིད་དགོངས་པ་རང་གྲོལ་གྱི༔ ས་བཅད་ལྡེའུ་མིག་རང་གྲོལ་ཞེས་བྱ་བ་བཞུགས་སོ༔ཞི་ཁྲོ་སྐུ་གསུམ་ལྷ་ལ་ཕྱག་འཚལ་ལོ༔ ཆོས་ཐམས་ཅད་ཀྱི་དགོངས་པ་ལ་ཕྱོགས་ལྷུང་མེད་པས༔ ཉམས་ཁྲིད་དགོངས་པ་རང་གྲོལ་འདི་ལ་གསུམ་སྟེ༔ སྔོན་འགྲོ༔དངོས་གཞི༔ རྗེས་དང་གསུམ་མོ༔ དང་པོ་སྔོན་འགྲོ་ལ་གཉིས་ཏེ༔ རང་རྒྱུད་སྦྱོང་བ་དང་༔ འདུལ་བ་གཉིས་སོ༔ སྦྱོང་བ་ལ་བཞི་སྟེ༔ ངན་སོང་གི་གནས་སྤར་ཞིང་ཐར་བའི་ལམ་བསྒྲོད་པའི་ཕྱིར༔ སྐྱབས་འགྲོ་སེམས་བསྐྱེད་ཀྱི་ཁྲིད། སྡིག་སྒྲིབ་མྱུར་དུ་དག་པར་བྱེད་པ་ཡི་གེ་བརྒྱ་པའི་ཁྲིད༔ བྱིན་རླབས་མྱུར་དུ་འཇུག་པར་བྱེད་པ་བླ་མའི་རྣལ་འབྱོར་གྱི་ཁྲིད༔ ཚོགས་གཉིས་མྱུར་དུ་རྫོགས་པར་བྱེད་པ་མཎྜལ་ཆོས་སྤྱོད་ཀྱི་ཁྲིད་དང་བཞིའོ༔ ༈གཉིས་པ་རང་རྒྱུད་འདུལ་བ་ལ་གསུམ་སྟེ༔ དལ་འབྱོར་རྙེད་པར་དགའ་བ་ལ་བསམ་པ༔ འཁོར་བའི་སྡུག་བསྔལ་ལ་བསམ་པ༔ འཆི་བ་མི་རྟག་པ་བསྒོམ་པ་དང་གསུམ་སྟེ༔ སྔོན་འགྲོ་ཡན་ལག་བདུད་ལྡན་དུ་ཉམས་སུ་བླང་ངོ་༔༈གཉིས་པ་དངོས་གཞི་ལ་སྤྱི་དོན་དྲུག་སྟེ༔ སྐྱེ་གནས་བར་དོའི་ཁྲིད་ཡིག་ཀུན་གཞི་རང་གྲོལ༔ ཕྱི་ནང་གི་ཐོས་བསམ་གྱིས་སྒྲོ་འདོགས་གཅོད་པ༔ ཐི་བྱ་ཚང་དུ་འཇུག་པ་ལྟ་བུའི་གདམས་ངག་དང་གཅིག༔ རྨི་ལམ་བར་དོའི་ཁྲིད་ཡིག་འཁྲུལ་བ་རང་གྲོལ༔ བག་ཆགས་ཀྱི་མཚམས་སྦྱོར་ཞིང་༔ འོད་གསལ་ལམ་དུ་ཁྱེར་བ་མུན་ཁང་དུ་སྒྲོན་མེ་བཏེགས་པ་ལྟ་བུའི་གདམས་ངག་དང་གཉིས༔ བསམ་གཏན་བར་དོའི་ཁྲིད་ཡིག་རིག་པ་རང་གྲོལ༔ དྭ་ཕྲུག་མ་དང་འཕྲད་པ་ལྟ་བུའམ༔ སྒེག་མོས་མེ་ལོང་ལ་ལྟ་བ་ལྟ་བུའི་གདམས་ངག་དང་གསུམ༔ འཆི་ཁ་བར་དོའི་ཁྲིད་ཡིག་འཕོ་བ་དྲན་པ་རང་གྲོལ༔ མི་གསལ་པ་གསལ་གདབ་པ་རྒྱལ་པོའི་བཀའ་ཐེམ་བསྐུར་བ་ལྟ་བུའི་གདམས་ངག་དང་བཞི། ཆོས་ཉིད་བར་དོའི་ཁྲིད་ཡིག་མཐོང་བ་རང་གྲོལ༔ རང་སྣང་ལ་ཡིད་ཆེས་པ་མ་པང་དུ་བུ་འཇུག་པ་ལྟ་བུའི་གདམས་ངག་དང་ལྔ༔ སྲིད་པ་བར་དོའི་ཁྲིད་ཡིག་སྲིད་པ་རང་གྲོལ༔ ཡུར་བ་རྐང་ཆད་པ་ལ་ཝ་འཛུགས་པ་ལྟ་བུའི་གདམས་ངག་དང་དྲུག་གོ༔དང་པོ་ལ་གཉིས་ཏེ༔ ཞི་གནས་དང་ལྷག་མཐོང་གི་ཁྲིད་གཉིས་སོ༔ ཞི་གནས་ལ་གཉིས་སྟེ༔ སྒོ་གསུམ་རྣལ་དུ་དབབ་པ་དང་༔ ཞི་གནས་དངོས་སོ༔ དང་པོ་ལུས་རྣལ་དུ་དབབ་པ་ལ་གསུམ༔ ཕྱི་ནང་གསང་གསུམ་མོ༔ གཉིས་པ་ངག་ལའང་གསུམ༔གསུམ་པ་ཡིད་ལ་གསུམ་སྟེ༔ བྱ་བ་དགུ་ཕྲུགས་སུ་བཏང་བའོ༔ གཉིས་པ་ཞི་གནས་དངོས་ལ་གཉིས་ཏེ༔ མཚན་མ་དང་བཅས་པའི་ཞི་གནས་ཀྱི་ཁྲིད་དང་༔ མཚན་མ་མེད་པའི་ཞི་གནས་ཀྱི་ཁྲིད་དང་གཉིས་སོ༔ དང་པོ་ལ་གསུམ་སྟེ༔ མ་དག་པ་ཤིང་བུ་རྡེའུ་ལ་སེམས་འཛིན་པ་དང་༔ དག་པ་ལྷ་ལ་སེམས་འཛིན་པ་དང་༔ རླུང་རྩོལ་ལ་སེམས་འཛིན་པ་དང་གསུམ་མོ༔ མ་དག་པའི་སེམས་འཛིན་པ་ལ་གསུམ་སྟེ༔ ཤིང་བུ་རྡེའུ༔ སྨིན་མཚམས་ཐིག་ལེ༔ སྙིང་ཁའི་ཐིག་ལེ་ལ་སེམས་འཛིན་པ་དང་གསུམ་མོ༔ དག་པ་ལྷ་ལ་སེམས་འཛིན་པ་ལ་གསུམ་སྟེ༔ རྡོ་རྗེ་སེམས་དཔའ་ལ་སེམས་འཛིན་པ༔ ཐུབ་པ་ཆེན་པོ་ལ་སེམས་འཛིན་པ༔ སྤྱན་རས་གཟིགས་ལ་སེམས་འཛིན་པ་དང་གསུམ་མོ༔ རླུང་རྩོལ་ལ་སེམས་འཛིན་པ་ལ་གསུམ་སྟེ༔ རླུང་སེམས་གཉིས་མེད་རྣམ་རྟོག་ཁོ་རང་ལ་སེམས་འཛིན་པ་དང༔ རླུང་བུམ་པ་ཅན་ལ་སེམས་འཛིན་པ་དང་༔ འབྲུ་གསུམ་སྐྱེ་མེད་རྡོ་རྗེའི་བཟླས་པ་ལ་སེམས་འཛིན་པ་དང་གསུམ་མོ༔ གཉིས་པ་མཚན་མ་མེད་པའི་ཞི་གནས་ཀྱི་ཁྲིད་ལ་གསུམ༔ བསྒྲིམ་པ༔ཀློད་པ༔ བསྒྲིམ་ཀློད་སྤེལ་མ་དང་གསུམ་མོ༔ དེ་ཡན་ཆད་ཞི་གནས་ཀྱི་ཁྲིད་དོ༔གཉིས་པ་ལྷག་མཐོང་གི་ཁྲིད་ལ་གསུམ་སྟེ༔ རིག་པ་ངོ་བསྟན་པ༔ སེམས་བཙལ་བ༔སེམས་ངོ་སྤྲད་པ་གསུམ་མོ༔ སེམས་ངོ་སྤྲད་པ་གཉིས༔ ཚིག་གིས་ངོ་སྤྲད་པ་དང་༔ལུང་གིས་རྒྱབ་སྐྱོར་བ་གཉིས་སོ༔ ཚིག་གིས་ངོ་སྤྲད་པ་ལ་བཞི་སྟེ་སྟོང་ཆ་ངོ་སྤྲད་པ༔གསལ་ཆ་ངོ་སྤྲད་པ༔ རིག་ཆ་ངོ་སྤྲད་པ༔ དབྱེར་མེད་དུ་ངོ་སྤྲད་པ་དང་བཞིའོ༔ དེ་ཡན་ཆད་སྐྱེ་གནས་བར་དོའི་ཁྲིད་ཡིག༔ ཀུན་གཞི་རང་གྲོལ༔ ཐི་བྱ་ཚང་དུ་འཇུག་པ་ལྟ་བུའི་གདམས་ངག༔ གཞི་ཁྲེགས་ཆོད་ཀྱི་གདམས་ངག་ཐལ་ལོ༔ ས་མ་ཡ༔ སྤྱི་དོན་གཉིས་པ་རྨི་ལམ་བར་དོའི་ཁྲིད་ལ་གསུམ་སྟེ༔ ཉིན་པར་སྒྱུ་ལུས་ཀྱི་ཁྲིད་སྣང་བ་རང་གྲོལ༔ ནུབ་མོ་རྨི་ལམ་གྱི་ཁྲིད་འཁྲུལ་བ་རང་གྲོལ༔ རྗེས་སུ་འོད་གསལ་གྱི་ཁྲིད་གཏི་མུག་རང་གྲོལ་དང་གསུམ་མོ༔དང་པོའི་སྒྱུ་ལུས་ལ་གཉིས་ཏེ༔ མ་དག་པའི་སྒྱུ་ལུས་དང་༔ དག་པའི་སྒྱུ་ལུས་གཉིས་སོ༔ དང་པོ་ལ་གསུམ༔ ལུས་སྣང་སྟོང་མེ་ལོང་གི་གཟུགས་བརྙན་ལ་སྦྱང་བ༔ ངག་གྲགས་སྟོང་བྲག་ཆའི་སྒྲ་ལ་སྦྱང་བ༔ ཡིད་གཡོ་བ་སྨིག་རྒྱུ་ལ་སྦྱང་བ་དང་གསུམ་མོ༔གཉིས་པ་ལ་གཉིས་ཏེ༔ སྣང་སྟོང་འཇའ་ལུས་ཤེལ་རྡོ་ལ་སྦྱང་བ་དང་༔ སྣོད་བཅུད་སྣང་སྟོང་ལྷ་དང་ལྷ་མོ་ལ་སྦྱང་བ་དང་གཉིས་སོ༔ གཉིས་པ་རྨི་ལམ་ལ་གསུམ་སྟེ༔རྨི་ལམ་བཟུང་བ་དང་༔ སྤྲུལ་ཞིང་བསྒྱུར་བ༔ རྨི་ལམ་གྱི་གེགས་སེལ་བ་དང་གསུམ་མོ༔ ༈དང་པོ་ལ་བཞི་སྟེ༔ འདུན་པས་བཟུང་བ་དང་༔ ཡི་དམ་དུ་བཟུང་པ་དང་༔ཡིག་འབྲུ་ལ་བཟུང་བ་དང་༔ ཐིག་ལེ་ལ་བཟུང་བ་དང་བཞིའོ༔ གཉིས་པ་ལ་བཞི་སྟེ༔ཡི་དམ་ལ་སྦྱང་བ་དང་༔ ཞིང་ཁམས་ལ་སྦྱང་བ་དང་༔ རྩལ་སྦྱང་ལ་བསླབ་པ༔ ཐོག་རྫིས་ཀྱི་ལས་ལ་བསླབ་པ་དང་བཞིའོ༔ གསུམ་པ་ལ་བཞི་སྟེ༔ སད་འབྱམས༔བརྗེད་འབྱམས༔ འཁྲུལ་འབྱམས༔ སྟོང་འབྱམས ་ཀྱི་གེགས་བསལ་བ་དང་བཞིའོ༔གསུམ་པ་རྗེས་སུ་འོད་གསལ་གྱི་ཁྲིད་ལ་བཞི་སྟེ༔ རྟོགས་པའི་འོད་གསལ་འཛིན་པ༔ཁམས་ཀྱི་འོད་གསལ་ལ་འཛིན་པ༔ བླ་མ་ལ་འོད་གསལ་འཛིན་པ༔ ཐིག་ལེ་ལ་འོད་གསལ་འཛིན་པ་དང་བཞིའོ༔ དེའང་གཉིས་སུ་འདུ་སྟེ༔ ཉམས་ཀྱི་འོད་གསལ་དང་༔ རྟོགས་པའི་འོད་གསལ་གཉིས་སོ༔ དེ་ཡན་ཆད་གྱིས་རྨི་ལམ་བར་དོའི་ཁྲིད་ཡིག༔ འཁྲུལ་བ་རང་གྲོལ་མུན་ཁང་དུ་སྒྲོན་མེ་བཏེགས་པ་ལྟ་བུའི་གདམས་ངག་གཉིས་པ་ཐལ་ལོ༔ ས་མ་ཡ༔