ལེ་ལོ་ཅན་དང་བརྩོན་འགྲུས་ཅན།

ཡོང་ཁུངས་Wikipedia

ལེ་ལོ་ཅན་དང་བརྩོན་འགྲུས་ཅན།[རྩོམ་སྒྲིག]

ལེ་ལོ་ཅན་དང་བརྩོན་འགྲུས་ཅན།

རྩོམ་པ་པོ། དཔལ་དོན་གྲུབ་རྒྱལ།

དུས་ཚོད་ཀྱི་འཁོར་ལོ་བར་མེད་འཁོར། །

དྲན་སྐུལ་གྱི་ཅོང་བརྡ་རྒྱུན་མི་ཆད། །

བརྩོན་འགྲུས་ཀྱིས་ཅོང་བརྡ་ཐོས་མ་ཐག །

གྲིམ་རིལ་ཅིག་བརྒྱབ་ནས་མལ་ལས་ལངས། །

དཔེ་དེབ་ཅིག་མཆན་ལ་བཟུང་ནས་ནི། །

ལྷས་རའི་ནང་རང་སྦྱོང་བྱེད་དུ་སོང་། །

ལེ་ལོ་ནི་ད་དུང་ཉིད་དུ་ཡུར། །

རྨི་ལམ་དུ་རྟ་བོ་ཞོན་པ་རྨིས། །

ཐང་སྟོང་དུ་གམ་པ་འཁྱེར་བ་རྨིས། །

ཡུད་ཙམ་ནས་གློ་རྨེད་ཆད་པ་རྨིས། །

རྟ་ཐོག་ནས་ཐང་ལ་ལྷུང་བ་རྨིས། །

རྐང་པ་གཅིག་ཡོབ་ལ་ཐོགས་པ་རྨིས། །

ཚེར་གསེབ་ཏུ་རྟ་ཡིས་དྲུད་པ་རྨིས། །

ན་ཟུག་དག་བཟོད་བསྲན་མ་ཚུགས་པར། །

ཨ་ཙ་མ་ཟེར་ཞིང་གཉིད་ལས་སད། །

དེ་མ་ཐག་སླར་ཡང་གཉིད་དུ་ཁུག །

ལེ་ལོ་དངབརྩོན་འགྲུས་ཕུ་ནུ་གཉིས། །

རིགས་རུས་ལ་མཆོག་དམན་མ་མཆིས་ཤིང་། །

ཆོ་འབྲང་ལ་བཟང་ངན་མེད་ན་ཡང་། །

བརྩོན་འགྲུས་དང་ལེ་ལོ་སྤུན་གཉིས་ཀྱི། །

སྦྱང་འབྲས་ལ་གནམ་སའི་ཁྱད་པར་བྱུང་། །

དེ་མུས་སུ་ལོ་ཟླ་དུ་མ་འདས། །

ནམ་ཞིག་ཚེ་ནུ་བོའི་བསམ་པ་ལ། །

ཕ་བོ་ནི་ལེ་ལོར་གཡེང་དྲགས་པས། །

དྲན་སྐུལ་གྱི་གསལ་ཞིག་འདེབས་དགོས་སྙམ། །

དེ་ཙ་ན་དཔྱིད་ཀྱི་དཔལ་ཡོན་ཤར། །

ཕུ་ནུ་གཉིས་ལྡུམ་རའི་སྐྱེད་ཚལ་དུ། །

སྤྲོ་བསངས་དང་འཆམ་འཆམ་བྱེད་དུ་དེངས། །

དཔྱིད་གསུམ་གྱི་དཔལ་ཡོན་དེ་མཐོང་ནས། །

བརྩོན་འགྲུས་ཀྱིས་ལེ་ལོར་འདི་སྐད་སྨྲས། །

ཀ་ཡེ་ཁྱོད་གསོན་དང་གཅེན་པོ་ལགས། །

མེ་ཏོག་གི་སྐྱེད་ཚལ་ཉམས་དགའ་འདིར། །

ཁོར་ཡུག་ཀུན་ལྗོན་ཤིང་ཚང་ཚིང་འཁྲིགས། །

བྱ་བྱིའུ་རྣམས་གླུ་དབྱངས་ཅི་དགར་སྒྲོག །

སྔོ་ལྗང་གི་ནེའུ་གསིང་གཙང་མའི་གཞིར། །

ཁྲ་ཆིལ་གྱི་མེ་ཏོག་འཛུམ་ཞིང་དགོད། །

རྐང་དྲུག་གི་བུང་བ་འཕུར་ཞིང་ལྡིང་། །

འདི་དག་རྣམས་གཞོན་ནུའི་ལང་ཚོར་དཔེ། །

དོན་ལྡན་གྱི་ས་བོན་མ་བཏབ་ན། །

མ་ཏོག་གི་སྐྱེད་ཚལ་ཇི་ལྟར་ཆགས། །

བརྩོན་སེམས་ཀྱིས་མྱུ་གུ་མ་བཙུགས་ན། །

ཚང་ཚིང་གི་ལྗོན་ཤིང་ཇི་ལྟར་སྐྱེ། །

བྱ་བྱིའུ་རྣམས་གྲེ་བ་མི་བདེ་ན། །

ཡིད་འཇེབས་ཀྱི་གླུ་དབྱངས་ཇི་ལྟར་ལེན། །

རྐང་དྲུག་གིས་འཕུར་རྩལ་མ་སྦྱངས་ན། །

མེ་ཏོག་གི་བཅུད་བཟང་ཇི་ལྟར་ལེན། །

དེ་བས་ན་ད་ལྟ་གཞོན་ནུའི་དུས། །

ལེ་ལོ་ཡི་དབང་དུ་མི་འགྲོ་ཞིང་། །

བརྩོན་པ་ཡི་བློ་དེ་མ་དོར་བར། །

ཡོན་ཏན་ཞིག་སྦྱོང་ལ་ཁྱོད་ཀྱང་འབུངས། །

དེ་སྐད་ཀྱི་གཏམ་དག་ཐོས་འཕྲལ་དུ། །

ལེ་ལོ་ནི་ཁོང་འཛུམ་གཏིང་ནས་ཤོར། །

ཁྲེལ་རྒོད་ཀྱི་མེ་ལྕེ་མཁའ་ལ་མཆེད། །

ཟུར་ཟ་ཡི་ཆུ་མོ་རླབས་ལྟར་འཕྱུར། །

སངས་རྒྱས་ཁྱོད་རང་མགོ་མ་ཐོན་པར། །

སེམས་ཅན་རྣམས་ཡར་འདྲེན་ཅི་ལ་ཡོང་། །

མོ་མ་ཁྱོད་རང་བྱས་མི་དྲན་པར། །

སེམས་ཅན་རྣམས་ཡར་འདྲེན་ཅི་ལ་ཡོང་། །

མོ་མ་ཁྱོད་རང་མི་དྲན་པར། །

སེམས་ཅན་གྱི་བདེ་སྡུག་ཇི་ལྟར་མཁྱེན། །

ནུ་བོ་ཁྱོད་རང་མགོ་མི་འཁྱོངས་བཞིན། །

ཕུ་བོ་ལ་བསླབ་བྱ་ཇི་ལྟར་བྱེད། །

ཞེས་པ་སོགས་འཆལ་གཏམ་བྱུང་རྒྱལ་སྨྲས། །

དེ་ནས་བཟུང་མ་གཅིག་ཕུ་ནུ་གཉིས། །

རང་རང་སར་འཚོ་བ་སྐྱེལ་ཞིང་འདས། །

ལེ་ལོ་ནི་གཉིད་དང་སྒྱིད་ལུག་བྱེད། །

བརྩོན་འགྲུས་ཀྱིས་ལྔ་རིག་མཁས་པར་སྦྱངས། །

ལོ་ཟླ་ཡི་དུས་ཚོད་དལ་གྱིས་འདས། །

སོ་དཀར་གྱི་ལང་ཚོ་རིམ་གྱིས་ཡལ། །

སྐྲ་དཀར་གྱི་ཕོ་ཉ་མྱུར་དུ་སླེབས། །

བརྩོན་འགྲུས་ནི་མཁས་པའི་གྲལ་དུ་མཛེས། །

ལེ་ལོ་ནི་གླེན་པ་གཅིག་པུར་ལུས། །

ཐམས་ཅད་གྱིས་འཕྱ་ཞིང་རྒོད་པའི་ཚེ། །

སྔར་བྱས་ལ་འགྱོད་ཀྱང་འཕྱིས་པ་ཤེས། །