རྨེན་གཤེར་
༄༅།། དལ་གཤིས་རྨེན་བུའི་ཕྲ་ཕུང་རིགས་ཀྱི་ཁྲག་རིལ་དཀར་པོའི་ནད།
རྩོམ་སྒྲིག་པ།ཚེ་དཔལ། ཡོང་ཁུངས།མཚོ་སྔོན་བོད་ཡིག་གསར་འགྱུར། སྤེལ་དུས། ༢༠༢༡ལོའི་ཟླ་བ་༡༡ཚེས་༢༢ཉིན།
རྨེན་བུའི་ཕྲ་ཕུང་ནི་ཁྲག་རིལ་དཀར་པོའི་ནད་ཀྱི་ཕྲ་ཕུང་ཞིག་རེད།ཕྲ་ཕུང་གཅིག་གམ་ཡང་ན་ཕྲ་ཕུང་འགའ་ནད་འགྱུར་བྱུང་རྗེས།དལ་གཤིས་རྨེན་བུའི་ཕྲ་ཕུང་རིགས་ཀྱི་ཁྲག་རིལ་དཀར་པོའི་ནད་བྱུང་བ་དང་།རྨེན་བུའི་ཕྲ་ཕུང་གི་འཚར་ལོངས་འབྱུང་ཚད་དང་ཤི་ཚད་སོགས་རྒྱུན་ལྡན་མིན་པར་གྱུར་ཏེ།ཁྲག་རིལ་དཀར་པོའི་ནད་ཀྱི་རྨེན་བུའི་ཕྲ་ཕུང་འབོར་ཆེན་སྐྱེ་འཕེལ་བྱེད་པ་དང་རིགས་མཚུངས་ཅན་གྱི་ཕྲ་ཕུང་བྱུང་ནས།དུས་ཡུན་ངེས་ཅན(ལོ་འགའ་རེ་འགོར་བ)ཞིག་འགོར་རྗེས།ཁྲག་རིལ་ནད་ཀྱི་ཕྲ་ཕུང་གི་གྲངས་འབོར་རིམ་གྱིས་རྨེན་བུའི་གཤེར་རྨེན་ནང་གི་རྒྱུན་ལྡན་གྱི་ཕྲ་ཕུང་དཀར་པོ་ལས་བརྒལ་ན།བདེ་ཐང་ཕྲ་ཕུང་གི་རེད་ནད་འགོག་ཤུགས་ཇེ་ཆུང་དུ་འགྲོ་བ་རེད།
ཁྲག་རིལ་དཀར་པོའི་ནད་ཀྱི་ཕྲ་ཕུང་དེ་ད་རུང་རྨེན་བུའི་གཤེར་རྨེན་བརྒྱུད་དེ་ཁྲག་རྩའི་ནང་དུ་རྒྱུ་བ་དང་།ཁྲག་རྒྱུན་དང་འགྲོགས་ཏེ་མཚེར་བ་དང་མཆིན་པ།རུས་རྐང་སོགས་ཀྱི་ནང་དུ་ཞུགས་པ་རེད།གལ་ཏེ་རུས་རྐང་ནང་གི་ཁྲག་རིལ་དཀར་པོའི་ནད་ཀྱི་ཕྲ་ཕུང་ཇེ་མང་དུ་སོང་ན། རུས་རྐང་གི་ཁྲག་གི་ཕྲ་ཕུང་བཟོ་བའི་ནུས་པ་ཇེ་ཞན་ནས་ཇེ་ཞན་དུ་འགྲོ་བ་དང་།དེས་ཟུངས་ཁྲག་ཉམས་པ་དང་རེད་སླ་བ།ཁྲག་རྡོལ་བ་སོགས་ཀྱི་གནད་དོན་མང་པོ་མང་པོ་ཞིག་བཟོ་སྲིད།
ནད་རྟགས། དང་པོའི་དུས་སུ་ནད་རྟགས་གང་ཡང་མི་མངོན་པས། རྒྱུན་དུ་ནད་རིགས་གཞན་པ་ལ་བརྟག་དཔྱད་བྱེད་པའི་སྐབས་སུ་ཁྲག་གི་ནང་དུ་ཁྲག་རིལ་དཀར་པོ་ཡོད་པ་ཚོར་བའི་གནས་ཚུལ་ཧ་ཅང་མང་། ལན་རེར་སྐེ་དང་མཆན་འོག གསུས་ཁོག་སོགས་ཀྱི་རྨེན་བུ་སྐྲངས་པའི་གནས་ཚུལ་འབྱུང་བ་དང་།ཡང་ན་མཚེར་བ་སྐྲངས་ཏེ།ལུས་གཟུགས་ཡོངས་མི་བདེ་བ་དང་ཟས་ལ་ཡི་ག་མེད་པ།ལུས་པོའི་ལྗིད་ཚད་ཇེ་ཡང་དུ་འགྲོ་བ།ཚ་རྒྱས་པ།རྔུལ་ཆུ་མང་པོ་འབྱུང་བ་སོགས་ཀྱི་ནད་རྟགས་འབྱུང་སྲིད།
གསོ་བཅོས། སྨན་ཁང་དུ་སོང་ནས་བརྟག་དཔྱད་བྱས་རྗེས།གལ་ཏེ་ཁྲག་རིལ་དཀར་པོའི་ནད་ཡོད་པ་ཤེས་ན།འབྲས་འགོག་སྨན་རྫས་འཐུང་སྟེ་ནད་རྟགས་འགོག་པའམ་ཡང་ན་འགོག་བཅོས་ནུས་ལྡན་བྱེད་དགོས།གལ་ཏེ་སྨན་རྫས་དེའི་རིགས་ཀྱིས་གོ་མི་ཆོད་པའམ་ཡང་ན་སྨན་བཅོས་དེའི་རིགས་དུས་ཡུན་ངེས་ཅན་ཞིག་བྱས་རྗེས་ནུས་པ་མེད་པར་གྱུར་ན།འབྲས་འགོག་སྨན་རྫས་གཞན་དག་དང་བསྡེབས་ཏེ་གསོ་བཅོས་བྱེད་དགོས་པ་དང་།དེ་ལྟར་བྱས་ན་ནད་གཞི་ཇེ་ཡང་དུ་གཏོང་བར་ཕན་པ་ངེས་ཅན་ལྡན།
དལ་གཤིས་རྨེན་བུའི་ཕྲ་ཕུང་རིགས་ཀྱི་ཁྲག་རིལ་དཀར་པོའི་ནད་པ་གསོ་བཅོས་མ་བྱས་ནའང་ལོ་འགའ་རེར་གསོན་ཐུབ་ལ།གསོ་བཅོས་བྱས་རྗེས་མུ་མཐུད་དུ་ལོ་འགའ་རེར་བདེ་ཐང་གི་གནས་བབ་རྒྱུན་འཛིན་བྱེད་ཐུབ། །
རྨེན་གཤེར་[རྩོམ་སྒྲིག]
གཤེར་རྨེན་ཕྲ་ཕུང་ལས་ཟགས་པའི་སྤྲི་དཀར་རིགས་ཀྱི་སྐུལ་རྩི་ཞིག་སྟེ། དེ་ལ་ལུས་ཕུང་ནང་གི་མངར་ཆ་སྙོམ་པར་བྱེད་པའི་ནུས་པ་ཡོད་པས་ནམ་ཞིག་དེ་ཉམས་ཚེ་ཟ་ཁུའམ་དེང་སང་གཅིན་མངར་དུ་གྲགས་པའི་ནད་དེ་འབྱུང་བར་འགྱུར་རོ།