རྒྱལ་སྲིད་སྣ་བདུན་

རྒྱལ་སྲིད་སྣ་བདུན The 7 Royal Possessions / the 7 attributes of kingship/ the 7 royal emblems འཁོར་ལོས་བསྒྱུར་བའི་རྒྱལ་བོ་ལ་རང་ཆས་སུ་འབྱུང་བའི་ཕུན་སུམ་ཚོགས་པའི་ཡོ་བྱད་མཆོག་གི་རིན་ཆེན་བདུན་ནམ་རིན་ཆེན་སྣ་བདུན་དུ་གྲགས་པ་ནི། འཁོར་ལོ་རིན་པོ་ཆེ། ནོར་བུ་རིན་པོ་ཆེ། བཙུན་མོ་རིན་པོ་ཆེ། བློན་པོ་རིན་པོ་ཆེ། གླང་པོ་རིན་པོ་ཆེ། རྟ་མཆོག་རིན་པོ་ཆེ། དམག་དཔོན་རིན་པོ་ཆེ་སྟེ་བདུན།

འཁོར་ལོ་/རྩིབས་སྟོང། the Precious wheel

འཁོར་ལོ་རིན་པོ་ཆེ་ནི་སྔོན་དུས་འཁོར་ལོས་བསྒྱུར་བའི་རྒྱལ་པོ་རྣམས་ཀྱི་བསོད་ནམས་ཀྱི་སྟོབས་ལས་ཕོ་བྲང་གི་རྩེ་ནས་བདེན་ཚིག་བརྗོད་པས་ཤར་ཕྱོགས་ནམ་མཁའ་ནས་རྒྱལ་པོའི་མདུན་དུ་འབབ་ཏེ་གང་དུ་འགྲོ་འདོད་པའི་ཡུལ་དེར་འཁོར་ལོ་དེས་སྣ་དྲངས་ནས་འགྲོ་བ་དང་། དེ་དང་མཉམ་དུ་རྒྱལ་སྲིད་གཞན་རྣམས་ཀྱང་འབྱོར་འོངས་པ་དེ་ཡིན།

འཁོར་ལོ་རིན་པོ་ཆེ་ནི། རྒྱུ་གསེར་ལས་བྱས་པའི་རྩིབས་སྟོང་དང་ལྡན་པ། རྒྱ་ཚད་དཔག་ཚད་ལྔ་བརྒྱ་ཡོད་པ་དང་། བསོད་ནམས་ཀྱི་མཐུས་གྲུབ་ཅིང་ནམ་མཁའ་ལ་འཕགས་ཏེ་ཉི་མ་གཅིག་ལ་དཔག་ཚད་འབུམ་བགྲོད་པ། རྒྱལ་ཆེན་བཞིའི་གནས་དང་གླིང་བཞིའི་གནས་གང་དུའང་སྡང་བའི་དགྲ་ལས་རྣམ་པར་རྒྱལ་ངེས་པའི་བགྲོད་བྱེད་དང་མཚོན་ཆ་གཅིག་ཆོག་ཅིག་ཡིན་པར་གསུངས། དེ་ཕྱིར་འཁོར་ལོ་དམ་པའི་ཆོས་ཀྱི་མཚོན་བྱེད་དེ་དོན་ཡང་དགྲའི་མཐར་ཐུག་བདག་འཛིན་འཇོམས་བྱེད་ཡིན་པས་སོ། །

ནོར་བུ་རིན་པོ་ཆེ། Jewel

ནོར་བུ་རིན་པོ་ཆེ་ནི་མདོག་ཐིང་ཀ་དྲི་མ་མེད་པ་འོད་ཀྱིས་དཔག་ཚད་བརྒྱད་ཅུ་ཙམ་དུ་སྣང་བར་བྱེད་པའི་ནུས་པ་དང་ལྡན་པ། གླིང་བཞིའི་འགྲོ་བ་ཐམས་ཅད་ཀྱི་དབུལ་ཕོངས་སེལ་བ། འདོད་རྒུ་ཡིད་བཞིན་དུ་སྐོང་བ་ལ་སོགས་པའི་ཡོན་ཏན་དང་ལྡན་པ་དེའོ།།

ནོར་བུ་རིན་པོ་ཆེ་ནི། རྒྱུ་བཻཌཱུརྱ་ལས་གྲུབ་པའི་ཟུར་བརྒྱད་པ། འོད་ཟེར་ཁ་དོག་ལྔ་འཕྲོ་བས་དཔག་ཚད་བརྒྱའི་བར་དུ་སྣང་བས་གསལ་བ་དང་། ཚ་བའི་ཚེ་བསིལ་བ་དང་། གྲང་བའི་ཚེ་དྲོ་བར་བྱེད་པ། གང་དུ་ཡོད་པའི་སར་ནད་དང་དུས་མིན་འཆི་བ་སོགས་མི་འབྱུང་ཞིང་ཡིད་ལ་གང་བསམ་གྱི་འབྱོར་བ་འཕེལ་བར་བྱེད་པ་ཞིག་སྟེ་སྔོན་གྱི་ལོ་རྒྱུས་དག་ཏུ་གསལ་བ་ལྟར་རོ། །

བཙུན་མོ་རིན་པོ་ཆེ། Queen

བཙུན་མོ་རིན་པོ་ཆེ་ནི་གཟུགས་མཛེས་ཤིང་ལྟ་ན་སྡུག་པ། བུད་མེད་ཀྱི་སྐྱོན་ཐམས་ཅད་དང་བྲལ་ཞིང་ཡོན་ཏན་དང་ལྡན་པ། ཡིད་དུ་འོང་བའི་དྲི་དང་རེག་བྱ་དང་ལྡན་པ་ལ་སོགས་པ་དེའོ།

བཙུན་མོ་རིན་པོ་ཆེ་ནི། རྒྱལ་རིགས་སུ་སྐྱེས་པའི་བུད་མེད་གཟུགས་དང་ལང་ཚོ་ལྟ་ན་སྡུག་ཅིང་། ལུས་ལ་དྲི་བཟང་གི་ངད་དང་ལྡན་ཞིང་། ཁ་ནས་ཨུད་པ་ལའི་དྲི་འབྱུང་བ། གང་དུ་གནས་པའི་སར་བཀྲེས་སྐོམ་མི་འབྱུང་ཞིང་སྐྱེ་བོ་ཀུན་གྱི་ནད་དང་། སེམས་ཀྱི་ཉོན་མོངས་མཐའ་དག་ཞི་བར་བྱེད་པ་ཞིག་གོ །

བློན་པོ་རིན་པོ་ཆེ། Minister

བློན་པོ་རིན་པོ་ཆེ་ནི་རྣམ་ཐོས་ཀྱི་བུ་ལྟ་བུ་ལོངས་སྤྱོད་དཔལ་འབྱོར་ཕུན་སུམ་ཚོགས་པ། རྒྱལ་པོས་སྟོང་གསུམ་གསེར་གྱིས་ཁོངས་ཤིག་ཅེས་བཀའ་སྩལ་ནའང་སྐད་ཅིག་གིས་སྒྲུབ་ནུས་ཤིང་གཏོང་ཕོད་ཆེ་བའི་བསོད་ནམས་དང་ལྡན་པའོ།།

གླང་པོ་རིན་པོ་ཆེ། Elephant

གླང་པོ་རིན་པོ་ཆེ་ནི་ཐལ་དཀར་མཆེ་བ་དྲུག་དང་ལྡན་པ་སྤྱི་གཙུག་དམར་ཞིང་དཔངས་མཐོ་བ། ནོར་བུའི་དྲ་བས་གཡོགས་ཤིང་གླང་ཕལ་བ་སྟོང་གི་སྟོབས་མངའ་བ། ཤིན་ཏུ་མགྱོགས་ཁྱད་དང་ལྡན་པ་གླང་ཆེན་ས་སྲུང་གི་བུ་ལྟ་བུའོ།།

རྟ་མཆོག་རིན་པོ། Horse

རྟ་མཆོག་རིན་པོ་ཆེ་ནི་མདོག་སྔོན་པོ་རྨ་བྱའི་མགྲིན་པའི་སྤུ་ལྟ་བུ་ཡིད་དུ་འོང་བ། ནད་མེད་ཅིང་འཚེར་སྐད་ཀྱིས་འཛམ་གླིང་ཁྱབ་པ། རྒྱལ་པོའི་ཐུགས་ལ་གང་ཤར་ཤེས་པས་ཅང་ཤེས་པ། འཛམ་གླིང་ཉིན་གཅིག་ལ་ལན་གསུམ་བསྐོར་ནུས་པའི་བང་ཤུགས་རླུང་དང་འདྲ་བ་རྟ་ཡི་རྒྱལ་པོ་ཅང་ཤེས་པ་ལ་ཧ་ལྟ་བུའོ།།

དམག་དཔོན་རིན་པོ། The General

དམག་དཔོན་རིན་པོ་ཆེ་ནི་སྙིང་སྟོབས་དང་ལྡན་པ། སྒྱུ་རྩལ་དང་གཡུལ་འགྱེད་པའི་ཐབས་ལ་མཁས་པ། དཔུང་ཚོགས་ཡན་ལག་བཞི་དང་བཅས་པ། གཞུ་བདུངས་པ་ཙམ་གྱིས་ཕ་རོལ་གྱི་དགྲ་སྡེ་ཐམས་ཅད་དཔའ་ཞུམ་པའི་གཟི་བྱིན་བསྟོད་པར་དཀའ་བ་རྒྱལ་པོ་འཕགས་སྐྱེས་པོ་ལྟ་བུ་ཡིན་ནོ།།་་་ཡག་གི