རི་སྤྱང་ཁེར་འགྲོ

ཡོང་ཁུངས་Wikipedia

རི་སྤྱང་ཁེར་འགྲོ་ནི་བོད་ཡིག་ཐོག་རྩོམ་འབྲི་མཁན་དང་ནང་ཆོས་སྐད་སྒྱུར་བ། སྤྱི་ཚོགས་ཞབས་ཞུ་བ་དང་ཁོར་ཡུག་སྲུང་སྐྱོབ་ཉམས་ཞིབ་པ།   དུད་འགྲོའི་ཚེ་སྲོག་རང་དབང་སྲུང་སྐྱོབ་པ་དང་དབྱིན་ཇིའི་སྙན་ངག་འབྲི་མཁན་པ་བཅས་ཡིན།

ཁོང་གིས་བོད་ཡིག་ནང་སྤེལ་བའི་རྩོམ་ཡིག་ཁག་ཅིག་ནི་༼ཨིན་ཊི་ཡན་མི་རིགས་ཀྱི་སྐོར་ཕྲན་ཙམ་གླེང་བ་གཡུ་ཡི་རྣ་རྒྱན།༽་དང་༼རང་བྱུང་ཁོར་ཡུག་གི་ན་ཚ་ཞིག་གླེང་བ།༽   །          ༼བརྩམས་ཆོས་ཤིག་དང་འབྲེལ་ནས་ཨིན་ཊི་ཡན་མི་རིགས་ཀྱི་མཆེད་ཁུངས་ལ་བལྟ་བ།༽་ དང་  ༼ཕ་སྤྲེའུ་བྱང་ཆུབ་སེམས་དཔའ་དང་མ་བྲག་སྲིན་མོའི་སྐོར་ལ་བསམ་གཞིགས་ཐོར་བུ༽་དང་།   གཞན་ཡང་<<རི་སྤྱང་ཁེར་འགྲོའི་མི་ཚེའི་དྲན་ཐོ>> ་དང་།   དབྱིན་ཇིའི་སྙན་ངག་གཅེས་བཏུས ་ <<My Weeping Poems>> ་ཞེས་པ་སོགས་ཡོད།

ཁོང་རྨ་ལྷོ་དགེ་འོས་སློབ་གྲྭའི་སློབ་མ་ཡིན་དུས་མཚོ་སྔོན་ཁྲིམས་ལུགས་གསར་འགྱུར་དང་གངས་རྒྱན་ན་ཆུང་ཚགས་པར་སྟེང་སྔ་ཕྱིར་རང་གི་བྲིས་རྩོམ་དང་བསྒྱུར་རྩོམ་ཁ་ཤས་བཀོད།   ཁོའི་དབྱིན་ཇིའི་སྙན་ངག་མེལ་པོ་ཤིང་སྡོང་འོག་གི་སྙན་ངག་པ་དང་། བདག་གི་ལས་གྲོགས་དཀར་ཟས་རྣལ་འབྱོར་བ་ཞིག   འགྲུལ་འཁོར་ནང་བྲིས་བའི་སྙན་ངག་ཞིག  ངའི་བྲང་ཁོང་ན་གསོས་བའི་ཅེ་སྤྱང་ དང་ མཚན་གྱི་ཟླ་བ་ལ་ཀློག་མཁན་གྱིས་དགའ་བསུ་ཐོབ།     ཁོང་གི་སྙན་ངག་དགའ་བའི་འགྲུལ་བཞུད་ནི་ས་གནས་གྲོང་ཁྱེར་སྙན་ངག་པའི་མགྲིན་ཚབ་པ་འན་ཅི་ལ་ ཝི་སུ་ཁོས་༢༠༢༠་ལོའི་ཡུལ་བའི་སྙན་ངག་ལེགས་འདེམས་ཉི་ཤུའི་ཁོངས་སུ་བཙུད།

ཁོང་༡༩༩༢་ལོར་རྒྱ་གར་ལ་ཕྱིན་ནས་དང་ཐོག་སྦིར་སུ་ཇ་སློབ་གྲྭར་དབྱིན་ཡིག་སྦྱངས་།  སློབ་གྲྭའི་བོད་ཡིག་རྩོམ་ཡིག་འགྲན་བསྡུར་རྩེ་ཕུད་ཐེངས་ཤས་ཐོབ།   དབྱིན་ཇིའི་སྐད་ཡིག་སྦྱོང་བའི་ཞོར་དུ་༼ལྗང་གཞོན༽་དང་༼གངས་རྒྱུན༽་ ༼ལྡུམ་རྭ༽་སོགས་ཀྱི་སྟེང་རང་མོས་སྙན་ངག་དང་ལྷུག་རྩོམ་དང་སྒྱུར་རྩོམ་སོགས་བཀོད།

༡༩༩༤་ལོར་རྡ་རམས་ས་ལ་གནས་སྤོར་ནས་ཕྱི་དྲིལ་ཁོར་ཡུག་སྲུང་སྐྱོབ་ཀྱི་རང་ཁོངས་ལས་བྱེད་ངོར་ལོ་ཤས་རིང་ཁོར་ཡུག་སྲུང་སྐྱོབ་ཟབ་སྦྱོང་མཁས་དབང་གདན་ཞུ་བར་སྐད་སྒྱུར་དང་།  གོང་ས་མཆོག་གིས་དབྱིན་ཇིའི་སྐད་ཡིག་ཐོག་བསྩལ་བའི་བཀའ་སློབ་ཕྱོགས་བསྒྲིགས <<  His Holiness The Dalai Lama’s Collected Speeches on The Environment>> ཞེས་པའི་བརྩམས་ཆོས་དཔེ་ཆ་བོད་ཡིག་ཏུ་བསྒྱུར་ནས་བོད་གཞུང་ཕྱི་དྲིལ་ཁོར་ཡུལ་སྡེ་ཚན་གྱིས་པར་བསྐྲུན་དང་འགྲེམས་སྤེལ་བྱས།     རྡ་རམས་ས་ལ་ནས་སྤེལ་བའི་གོང་ས་མཆོག་གི་མཛད་རྗེས་སྐོར་ལ་རྩོམ་ཡིག་འགྲན་བསྡུར་ཨང་གཉིས་བའི་བྱ་དགའ་རྒྱལ་བ་རིན་པོ་སྐུ་དངོས་ནས་ཐེག་ཆེན་ཆོས་གླིང་གཙུག་ལག་ཁང་གི་ཐང་ཆེན་དུ་ཕྱི་ནང་སྐྱ་སེར་སྟོང་ཕྲག་འདུ་བའི་མཛད་སྒོ་ཐོག་ཏུ་སྩོལ་གནང་མཛད།  ད་དུང་རྡ་རམས་ས་བོད་ཀྱི་དཔེ་མཛོད་ཁང་གི་ནང་ཆོས་འཛིན་གྲྭར་ལོ་ཤས་རིང་ནང་ཆོས་ལོ་ཙཱའི་སྐོར་ལ་སློབ་སྦྱོང་བྱས།  ཞོར་དུ་དབྱིན་ཡིག་ནང་ཀློག་བདེར་སྦྱར་བའི་མདོ་སྔགས་སྐོར་གྱི་བརྩམས་ཆོས་བརྒྱ་ཕྲག་བརྒལ་བ་ལྗགས་ཀློག་བྱས།

བྱེས་ཀྱི་དཔལ་ཡུལ་དགོན་རྣམ་གྲོལ་གླིང་དང་།རིགས་ལམ་སློབ་གཉེར་ཁང་།  བདུད་འཇོམས་རིན་པོ་ཆེའི་ཐུགས་སྲས་མཁས་བཙུན་བཟང་བོ་རིན་པོ་ཆེའི་དགོན་པ་དང་བལ་ཡུལ་ཞེ་ཆེན་དགོན་སོགས་སུ་ཟུར་ཞུགས་བྱས་ནས་ནང་ཆོས་ལ་སློབ་གཉེར་དང་ཞིབ་འཇུག་བྱས།

༡༩༩༥་ལོར་འཛམ་གླིང་ཤར་ནུབ་ཀུན་ཏུ་ནང་ཆོས་སྒོམ་སྒྲུབ་དོ་སྣང་བྱེད་མཁན་ཁྲོད་ཤུགས་རྐྱེན་ཧ་ཅང་ཆེ་བའི་འབར་མའི་སྒོམ་འཁྲིད་སློབ་དཔོན་གྷོ་ཨིན་ཁ་ལགས་ཀྱི་སྒོམ་གྲྭ་རུ་ཉིན་བཅུའི་རིང་གནས་བརྟན་སྡེ་བའི་ལུགས་ཀྱི་དབུགས་འབྱིན་རྔུབ་དང་ཚོར་བ་དྲན་པ་ཉེར་བཞག་གི་སྒོམ་ཐབས་རྩལ་དུ་བཏོན་པའི་༼ལྷག་མཐོང་སྒོམ་སྒྲུབ༽་ལ་ཞུགས་པ་བོད་པ་ཞིག་སྒོམ་སྒྲུབ་ཁྱད་པར་བ་དེར་ཞུགས་ཐེངས་དང་པོ་ཡིན།

༡༩༩༨ ནས ༢༠༠༡ ་བར་ལོ་གསུམ་རིང་བླ་མ་ཡེ་ཤེས་དང་བླ་མ་བཟོད་པ་རིན་པོ་ཆེས་གསར་འཛུགས་གནང་བའི་༼Foundation For Preservation of Mahayana Tradition༽ དང་བསྡུས་མིང་ལ་FPMT་ ཞེས་པ་བོད་སྐད་དུ་ཐེག་ཆེན་ཆོས་རྒྱུད་གཅེས་ཉར་ཚོགས་པ་ཞེས་བའི་ཁོངས་གཏོགས་དགའ་ལྡན་ཡིད་དགའ་ཆོས་འཛིན་སྒོམ་སྒྲུབ་གླིང་དུ་ལོ་ཙཱ་བ་དང་། སྒོམ་འཁྲིད་དགེ་རྒན་གཞོན་པ།། སྒོམ་གྲྭ་འཛིན་སྐྱོང་དོ་དམ་པ་བཅས་ཀྱི་འགན་འཁུར།

༢༠༠༢་ལོར་ཉིག་ཡོ་གྲོང་ཁྱེར་ནང་གཞིས་སྤོ་བྱས་ཏེ་ལོ་བཅུའི་རིང་ས་གནས་སྦི་རོ་ཁི་ལིན་དམངས་ཕན་སྤྱི་ཚོགས་བདེ་རྩ་ལྷན་ཁང་དུ་དམངས་ཕན་དགེ་རྩ་ལྟ་རྟོག་ལས་བྱེད་དང་དེ་མུར་ཉིག་ཡོ་མངའ་སྡེ་གཞུང་གི་ཨོ་བྷ་མ་འཕྲོད་སྟེན་ལྟ་སྐྱོང་ལས་གཞི་ལྷན་ཁང་དུ་འཕྲོད་བསྟེན་ལྟ་སྐྱོང་ཐོབ་ཐང་ལེན་མཁན་ལ་སློབ་སྟོན་པ་དང་ཞོར་དུ་ཁོང་གི་མི་ཚེ་ནང་དགའ་མོས་ཆེ་ཤོས་རྐང་ཐང་ལྗོངས་རྒྱུ་དང་དཔེ་ཀློག་རྩོམ་འབྲི།  དབུགས་འབྱིན་རྔུབ་དང་ཚོར་བ་དྲན་པ་ཉེར་བཞག་གི་སྒོམ་སྒྲུབ་ལ་འཇུག་བཞིན་པའོ།