རང་སངས་རྒྱས་
प्रत्येकबुद्धयान པྲ་ཏྱེ་ཀ་བུ་དྡྷ་ཡཱ་ན རང་སངས་རྒྱས་ནི་བསྟན་པ་མེད་པའི་དུས་སུ་གཞན་གྱི་སྟོན་པ་ལ་མ་ལྟོས་པར་རང་ཉིད་ཀྱི་སྔོན་གྱི་བསོད་ནམས་ཀྱི་མཐུས་རྟེན་ཅིང་འབྲེལ་བར་བརྟགས་ནས་གང་ཟག་བདག་མེད་དང་ཆོས་ཀྱི་བདག་མེད་ཕྱེད་ཙམ་རྟོགས་ཏེ་རང་བྱང་ཆུབ་མངོན་དུ་བརྙེས་པའི་དགྲ་བཅོམ་པའོ། །
ངོ་བོ།
[རྩོམ་སྒྲིག]"རྐྱེན་རྒྱལ་རང་སངས་རྒྱས་"[༡]ཞེས་དང་། "རྐྱེན་རྟོགས་རང་སངས་རྒྱས་ཀྱི་ས་"[༢]ཞེས་གསུངས་པ་ལྟར་རྐྱེན་རྟོགས་ཀྱི་བྱང་ཆུབ་ཐོབ་པའི་གང་ཟག་གོ །
རང་སངས་རྒྱས་ཀྱི་ཁྱད་ཆོས།
[རྩོམ་སྒྲིག]"གང་གིས་སྔོན་ཐོས་པ་ལ་སོགས་པ་མངོན་པར་འདུས་བྱས་པས་གཞན་གྱིས་བསྟན་པ་ལ་ལྟོས་པ་མེད་པར་རང་གི་བྱང་ཆུབ་ཐོབ་པ་ནི་གཅིག་ཡིན་ནོ། །དེ་བཞིན་དུ་ཤེས་བྱའི་སྒྲིབ་པའི་ཕྱོགས་གཅིག་གཟུང་བའི་རྣམ་པར་རྟོག་པ་སྤངས་པ་དང་། སྒྲ་བརྗོད་པ་མེད་པར་གཞན་གྱི་དོན་བྱེད་པ་དག་གིས་ཡེ་ཤེས་ཟབ་པ་ཡིན་ཏེ། གཉིས་ཀྱི་ཁྱད་པར་དུ་འཕགས་སོ། །"[༣]ཞེས་གསུངས་པ་ལྟར་རོ། །"དགྲ་བཅོམ་པའི་ས་དང་རྟགས་ལ་སོགས་པར་མི་གནས་ཤིང་རང་རྒྱལ་བའི་ས་དང་དེ་བཞིན་རྫོགས་པའི་སངས་རྒྱས་ཀྱི་སར་ཡང་མི་གནས་སོ། །"[༤]ཞེས་གསུངས་པ་ལྟར། རང་རྒྱལ་བ་སྟེ་རང་སངས་རྒྱས་ཀྱི་ས་ནི་དགྲ་བཅོམ་པའི་ས་དང་རྫོགས་པའི་སངས་རྒྱས་ཀྱི་ས་གཉིས་ཀྱི་བར་དུ་གནས་པའི་གོ་རིམ་ཞིག་ཡིན་པར་གསལ་ལོ། །
སྤངས་རྟོགས་ཀྱི་ཚད།
[རྩོམ་སྒྲིག]"གཟུང་བར་རྟོག་པ་འབའ་ཞིག་སྔངས་(སྤངས་)པའི་རང་སངས་རྒྱས་ཀྱི་ལམ་གང་གིས་ཁྱད་པར་དུ་འཕགས་པ་"[༥]ཞེས་དང་། "ཤེས་རབ་འབྲིང་གི་སྟོབས་ཀྱིས་ཆོས་ཉིད་ལྷག་པ་མཐོང་བ་ཉིད་ཇི་སྐད་བསྟན་པས་ཁྱད་པར་དུ་འཕགས་པ་དང་ལྡན་ཞིང་ཤེས་བྱའི་སྒྲིབ་པ་བཟུང་བར་རྟོག་པ་ཕྱོགས་གཅིག་སྤོང་བ་"[༦]ཞེས་གསུངས་སོ། །
དབྱེ་བ།
[རྩོམ་སྒྲིག]"ཚོགས་ན་སྤྱོད་པ་དང་། བསེ་རུ་ལྟ་བུ་འང་རང་སངས་རྒྱས་སུ་མཚུངས་པས་རྐྱེན་རྒྱལ་ལོ། །"[༧]ཞེས་གསུངས་པ་ལྟར་ཚོགས་སྤྱོད་དང་བསེ་རུ་ལྟ་བུ་གཉིས་སུ་འབྱེད་དོ། །
ལུང་ཁུངས།
[རྩོམ་སྒྲིག]- ↑ ཅོ་ནེ་གྲགས་པ་བཤད་སྒྲུབ། སྡུད་པའི་འགྲེལ་པ་རྒྱལ་བའི་དགོངས་གསལ། ཤིང་དཔར། ཤོག་ངོས། 13a[༡]
- ↑ འཇུ་མི་ཕམ། མདོ་སྡུད་པའི་འགྲེལ་པ་ཡུམ་གྱི་དགོངས་དོན། ལག་བྲིས། ཤོག་ངོས། 18a[༢]
- ↑ སློབ་དཔོན་སེངྒེ་བཟང་པོ། སྡུད་པའི་དཀའ་འགྲེལ། ཤིང་དཔར། ཤོག་ངོས། 40-41[༣]
- ↑ ཀརྨ་པ་རང་བྱུང་རྡོ་རྗེ། མདོ་སྡུད་པའི་འགྲེལ་པ་ཡིད་བཞིན་ནོར་བུ། ལྕགས་དཔར། ཤོག་ངོས། 33[༤]
- ↑ སློབ་དཔོན་སེངྒེ་བཟང་པོ། སྡུད་པའི་དཀའ་འགྲེལ། ཤིང་དཔར། ཤོག་ངོས། 41[༥]
- ↑ སློབ་དཔོན་སེངྒེ་བཟང་པོ། སྡུད་པའི་དཀའ་འགྲེལ། ཤིང་དཔར། ཤོག་ངོས། 43[༦]
- ↑ སློབ་དཔོན་སེངྒེ་བཟང་པོ། སྡུད་པའི་དཀའ་འགྲེལ། ཤིང་དཔར། ཤོག་ངོས། 42[༧]