ཡེ་ཟི་ལམ་ཆོས་ལུགས།
བརྡ་རྟགས་གཅིག་གྱུར་ཡོང་བར་སྐུལ་ཆེད། དབྱིན་ཡིག་གི་Aslamaནི་ཨ་རབ་སྐད་ལས་ཐད་བསྒྱུར་བྱེད་པ་ཡིན་པས་འདི་ལ་སྒྲ་བསྟུན་ཡོད།
ཡེ་ཟི་ལམ་ཆོས་ལུགས་ནི་འཛམ་གླིང་ཆོས་ལུགས་ཆེན་པོའི་གྲས་ཀྱི་དད་ལྡན་མི་ཚོགས་ཤིན་ཏུ་མང་བའི་ཆོས་ལུགས་ཤིག་ཡིན། བོད་སྐད་དུ་དེ་ལ་སྔར་བྱུང་འབོད་སྲོལ་མང་པོ་ཆགས་ཡོད་དེ། དཔེར་ན། ཁ་ཆེ་ཆོས་ལུགས། མུ་སི་ལིན་ཆོས་ལུགས། ཧོས་ཧོས་ཆོས་ལུགས་སོགས་བྱུང་ཡོད། ༢༠༠༩ལོའི་ལོ་འཇུག་ལ་སྡོམ་བརྩིས་བྱེད་པ་ལྟར་ན། སྐབས་དེར་འཛམ་གླིང་གི་མི་འབོར་ཐེར་འབུམ་དྲུག་དང་དུང་ཕྱུ་བརྒྱད་ཀྱི་ཁྲོད་དུ། ཡེ་ཟི་ལམ་ཆོས་ལུགས་ལ་དད་པ་བྱེད་མཁན་མི་འབོར་དུང་ཕྱུ་བཅོ་ལྔ་དང་བྱེ་བ་བརྒྱད་ལྷག་ཟིན་ཡོད། དེ་དག་ནི་གོ་ལ་ཧྲིལ་བོའི་རྒྱལ་ཁབ་ཉིས་བརྒྱ་དང་བཞི་ལ་གནས་སྡོད་བྱེད་ཡོད་པ་དང་། དད་ལྡན་མང་ཚོགས་ཀྱི་མི་འབོར་འཛམ་གླིང་ཧྲིལ་བོའི་བརྒྱ་ཆའི་ཉེར་གསུམ་ལ་སླེབས། ད་དུང་ཡང་ཡེ་ཟི་ལམ་དད་ལྡན་མང་ཚོགས་ཀྱི་བུ་སྐྱེས་པར་སྐུལ་མ་གཏོང་བཞིན་ཡོད་པས། ལོ་རེར་མི་གྲངས་འཕེལ་བ་ཤིན་ཏུ་མགྱོགས།
ཡེ་ཟི་ལམ་ཆོས་ལུགས་ཀྱི་ལོ་རྒྱུས།[རྩོམ་སྒྲིག]
ལོ་རྒྱུས་ཐོག་དཔྱོད་ལྡན་རྣམས་ངོ་མཚར་བར་བྱེད་པའི་དོན་རྐྱེན་གསུམ་བྱུང་ཡོད། གསུམ་པོ་ནི་གནའ་བོའི་རྒི་རི་སི་དང་། མུ་སི་ལིམ་གྱི་ཆོས་ལུགས། སོག་པོའི་དམག་དཔུང་བཅས་རེད། དེ་དག་ལས་དང་པོས་རིག་གནས་དང་། གཉིས་པས་ཆོས་ལུགས། གསུམ་པས་དམག་དཔུང་གིས་ངོ་མཚར་བར་བྱས་ཡོད། གསུམ་པོ་ལ་མཚུངས་ཆོས་རེ་ཡོད་པ་ནི་ཐོག་མར་ལུང་པ་དང་སྤྱི་ཚོགས་ཆུང་ཆུང་ཞིག་ནས་བྱུང་ཞིང་། གློ་བུར་དུ་བསམ་གྱིས་མི་ཁྱབ་པའི་ཡར་རྒྱས་བྱུང་བས་དེའི་ཤུགས་རྐྱེན་གྱིས་ད་ལྟའི་བར་འཛམ་གླིང་འདིར་ཁྱབ་ཡོད། སྐབས་འདིར་གསུམ་པོ་ལས་མུ་སི་ལིམ་གྱི་ཆོས་ལུགས་སྐོར་ལ་བཤད་པར་བྱ། དེ་ཡང་མུ་སི་ལིམ་གྱི་ཆོས་ལུགས་འདི་བོད་ལ་ཀ་ཤི་མིར་གྱི་ས་ཁུལ་ནས་དར་བ་དང་། ཀ་ཤི་མིར་ལ་ཁ་ཆེ་གུར་གུམ་མང་པོ་སྐྱེ་བར་བརྟེན་ཕྱིས་སུ་བོད་པས་ཁ་ཆེའི་ཆོས་ལུགས་ཞེས་འབོད་སྲོལ་ཆེ་ན་ཡང་འདི་ཉིད་ཀ་ཤི་མིར་རང་གི་མ་ཡིན་པས་ཐ་སྙད་འདི་དངོས་པོའི་གནས་ཚུལ་དང་མི་མཐུན་པའི་ཐོག སྤྱན་རས་གཟིགས་བརྟུལ་ཞུགས་ཀྱིས་མཛད་པའི་ཤེས་རབ་སྒྲོན་མ་རྒྱ་ཆེར་འགྲེལ་པ་དུས་རབས་བརྒྱད་པའི་ནང་ཙམ་དུ་ཅོག་རོ་ཀླུའི་རྒྱལ་མཚན་གྱིས་བོད་དུ་བསྒྱུར་བའི་ནང་དུ་ཡང་ཆོས་ལུགས་འདིའི་མིང་དུ་མུ་སིལ་མན་ཞེས་བྲིས་འདུག་པ་དང་། མུ་སི་ལིམ་རང་གིས་ཨི་སི་ལམ་ཞེས་འབོད་སྲོལ་ཆེ་ན་ཡང་། ཡོངས་གྲགས་སུ་ཐམས་ཅད་ཀྱིས་ཐུན་མོང་དུ་མུ་སི་ལིམ་ཞེས་འབོད་པ་ཉིད་བརྗོད་བདེ་ཕྱིར་འདིར་ཡང་མུ་སི་ལིམ་ཞེས་པའི་ཐ་སྙད་དེ་བེད་སྤྱོད་པར་འདོད། རྒྱ་གར་གྱི་ཆོས་གཞུང་རྣམས་སུ་ཆོས་ལུགས་འདི་འདྲེ་དང་བདུད་ཀྱིས་བྱིན་གྱིས་བརླབས་ནས་བྱུང་ཚུལ་དང་། བོད་ཀྱི་ཆོས་བྱུང་རྣམས་སུ་རྒྱ་གར་གྱི་རྒྱལ་པོ་ཧར་ཤས་མུ་སྟེགས་མང་པོ་མེར་སྲེག་པའི་སྐབས་སུ་གཅིག་བྲོས་ཤོར་བ་ལས་ཆོས་ལོག་འདི་དར་བར་བཤད་པ་སོགས་ནི་ཁུངས་ལྡན་གྱི་ལོ་རྒྱུས་རྙིང་པ་རྣམས་དང་ཟུར་ཙམ་ཡང་མི་མཐུན་པས་འདིར་རྒྱས་པར་མི་གླེང་། དེ་ལས་གཟུ་བོར་གནས་པའི་མཁས་པ་རྩོད་མེད་རྣམས་ཀྱིས་གང་བཤད་པ་ལ་ཁུངས་བཅོལ་ཞིང་རང་གི་ལྟ་ཚུལ་གྱིས་ཟུར་བརྒྱན་ནས་འདིར་དེ་དོན་ཚན་བཞིའི་སྒོ་ནས་བཤད་པར་བྱ།
ལེ་ཚན་དང་པོ། མུ་སི་ལིམ་ཆོས་ལུགས་དབུ་བརྙེས་པ། [རྩོམ་སྒྲིག]
ཆོས་ལུགས་འདི་ཐོག་མར་དེང་སང་ཨ་རབ་ལུང་པ་སོ་དི་ཨ་ར་བྷ་ཡ་ཞེས་པའི་ས་ཆ་དེ་ནས་བྱུང་བ་དང་། ཡུལ་གྲུ་དེ་ནི་སྔོན་མི་ཐར་ཐོར་ཡོད་པའི་བྱེ་ཐང་ཞིག་ལས་ལོ་རྒྱུས་ཐོག་དམིགས་བསལ་གྱི་གལ་གནད་ཅི་ཡང་མེད་ཅིང་། དེའི་ཆོས་ལུགས་ནི་གཙོ་བོ་རྗེའུ་ཤིའི་ཆོས་ལུགས་ཏེ་སྟོན་པ་ཨབ་ར་ཧམ་ནས་བྱུང་བ་ཞིག་རེད། ཡེ་ཤུའི་ཆོས་ལུགས་ཀྱང་རྩ་བ་ཨབ་ར་ཧམ་ནས་བྱུང་བ་ལ་སྐབས་དེར་ཨ་རབ་ཀྱི་ཁུལ་དུ་ཡེ་ཤུའི་ཆོས་ལུགས་ལ་དད་མོས་དང་གུས་བཀུར་ཞུ་མཁན་ཡོད་ན་ཡང་དར་ཁྱབ་དེ་ཙམ་མེད། དེ་ཡང་ལྷོ་ནུབ་ཨེ་ཤ་ཡའི་ས་ཁུལ་ཨི་སི་རིལ་ནས་དར་བའི་ཆོས་ལུགས་གཅིག་ཉིད་གསུམ་དུ་གྱེས་པའི་རྒྱུ་མཚན་གཙོ་བོ་ནི་རྗེའུ་ཤིའི་ཆོས་ལུགས་ལ་ལོ་རྒྱུས་ཐོག་ལྷ་ཆེན་པོའི་ལུང་སྟོན་པ་པོ་ཟེར་བའམ་སྟོན་པ་རིམ་པ་མི་ཉུང་བ་བྱོན་པ་ལ། རྗེའུ་ཤི་རྣམས་ཀྱིས་ཡེ་ཤུའི་སྟོན་པ་ལྷ་ཆེན་པོའི་ལུང་སྟོན་པ་པོར་ཁས་ལེན་མ་བྱས་པས་ཡེ་ཤུའི་ཆོས་ལུགས་ལོགས་སུ་གྱེས་པ་དང་། དེ་བཞིན་རྗེའུ་ཤིས་མུ་སི་ལིམ་གྱི་སྟོན་པ་ཡང་ཁས་ལེན་མ་བྱས་ཤིང་། མུ་སི་ལིམ་ཚོས་ཡེ་ཤུའི་སྟོན་པ་ལྷ་ཆེན་པོའི་ལུང་སྟོན་པ་པོར་ཁས་ལེན་ཀྱང་རྗེས་འཇུག་རྣམས་རྣམ་དག་ཡིན་པར་ཁས་མི་ལེན་པ་སོགས་ཙམ་གྱིས་ཐ་དད་གྱེས་པ་ལས་ལྟ་གྲུབ་ཀྱི་ཁྱད་པར་ཧ་ཅང་ཆུང་། ཆོས་ལུགས་གསུམ་པོའི་གནད་འགག་གཙོ་བོ་ནི་འཇིག་རྟེན་བཀོད་པ་པོར་གྱུར་པའི་ལྷ་གཅིག་རང་ཡོད་པ་དང་། དེ་ཡང་གཟུགས་མེད་ཀྱི་རང་བཞིན་ཞིག་ཡིན་པར་འདོད་པ་དེ་རེད། ཆོས་ལུགས་འདི་གསུམ་པོ་ལ་སྤྱི་ཁྱབ་ཀྱི་མིང་དུ་དེང་སང་ཨབ་ར་ཧམ་ཆོས་ལུགས་ཞེས་ཀྱང་འབོད་སྲོལ་ཡོད།
ཆོས་ལུགས་དེ་གསུམ་ལས་རྗེའུ་ཤིའི་མི་རིགས་ནི་གཙོ་བོ་ཨབ་ར་ཧམ་གྱི་བུ་གཉིས་པ་ཨི་སཀ་ཅེས་པ་ལས་བྱུང་བར་འདོད་ཅིང་། ཡེ་ཤུའི་སྟོན་པའི་མེས་པོ་ཡང་ཨི་སཀ་ཡིན་པར་འདོད། འོན་ཀྱང་མུ་སི་ལིམ་གྱི་མི་རིགས་ཨ་རབ་རྣམས་ནི་ཨབ་ར་ཧམ་གྱི་བུ་དང་པོ་ཨི་ཤ་མེལ་ནས་བྱུང་བར་གྲགས། རྗེའུ་ཤིའི་ཆོས་ལུགས་དར་རྗེས་ཨ་རབ་ཀྱི་ཡུལ་མི་རྣམས་ཀྱིས་ཨབ་ར་ཧམ་དང་ཨི་ཤ་མེལ་གཉིས་ཀྱིས་བཞེངས་པར་གྲགས་པའི་ལྷ་ཁང་ཀཱ་རྦ་ཞེས་པ་དེ་ལ་མཆོད་སྲོལ་ཡོད་ཅིང་དེ་དང་མཉམ་དུ་ཡུལ་མིའི་ལྷ་གཞན་ཡང་བསྟེན་སྲོལ་ཡོད། དེ་ལྟར་རྗེའུ་ཤིའི་ཆོས་ལུགས་དར་ནས་ལོ་ངོ་སྟོང་ཕྲག་ཁ་ཤས་དང་། ཡེ་ཤུའི་ཆོས་ལུགས་དར་ནས་ལོ་ངོ་ལྔ་བརྒྱ་ཡས་མས་ཀྱི་རྗེས་སུ། ཨ་རབ་ཀྱི་མེ་ཀ་ལུང་པར་སྤྱི་ལོ་༥༧༠ ལོར་མུ་ཧམ་མད་ཅེས་པའི་བྱིས་པ་ཞིག་འཁྲུངས་པ་ཁོང་ནི་ཕྱིས་སུ་མུ་སི་ལིམ་ཆོས་ལུགས་ཀྱི་སྲོལ་གཏོད་པ་པོར་གྱུར། ཁོང་གི་ཡབ་ནི་ཁོང་མ་འཁྲུངས་པའི་ཟླ་བ་དྲུག་གི་གོང་ནས་གྲོངས་ཤིང་། ཁོང་གི་ཡུམ་ཡང་ཁོང་འཁྲུངས་ནས་ལོ་དྲུག་གི་རྗེས་སུ་གྲོངས་པས་ཁོང་ལ་ལྟ་རྟོག་གནང་མཁན་ནི་ཁོང་གི་ཡབ་ཕྱོགས་ཀྱི་སྤོ་བོ་ལགས་རེད། ལོ་གཉིས་ཀྱི་རྗེས་སུ་སྤོ་བོ་ལགས་ཀྱང་གྲོངས་པས་ཨ་ཁུས་གསོ་སྐྱོང་ཞུས། ཁོང་གི་ཨ་ཁུ་ནི་ཀཱ་རྦ་ལ་ལྟ་རྟོག་གནང་མཁན་ཡིན་པས་དབང་ཚད་ཆེ་ཙམ་ཡོད་པ་ཞིག་ཡིན། དེ་ནས་དགུང་གྲངས་ཉེར་ལྔ་ཟིན་རྗེས་ལུང་པ་དེར་བུད་མེད་ཡུག་ས་མ་ཚོང་པ་འབྱོར་ལྡན་ཞིག་ཡོད་པ་ལ་ཨ་ཁུས་ངོ་སྤྲོད་བྱས་པ་བཞིན་མུ་ཧམ་མད་གིས་དེའི་ལས་རོགས་གནང་ནས་ཚོང་ལས་ལ་ཞུགས། མོའི་མིང་ལ་ཁ་དྷི་རྗ་ཞེས་ཟེར་ཞིང་། ཁོང་ལས་ཀྱང་ཚོང་པ་བུད་མེད་དེ་ལོ་བཅོ་ལྔ་ཆེ་ན་ཡང་ཁོང་གཟུགས་སྟོབས་ཆེ་བ་དང་འཇོན་ཐང་ཆེ་བ་སོགས་ཀྱིས་ཚོང་པ་བུད་མེད་དེའི་ཡིད་དབང་འཕྲོགས། རིམ་པས་ཁོང་གཉིས་བཟའ་ཟླར་གྱུར་ཏེ་བུ་གསུམ་དང་བུ་མོ་བཞི་སྐྱེས། མོ་ནི་ཐབས་ལ་མཁས་ཤིང་སྙིང་སྟོབས་ཆེ་བའི་བུད་མེད་ཅིག་ཡིན་པའི་ཐོག་མུ་ཧམ་མད་གི་སྐྱེས་སྨན་རྣམས་ཀྱི་ནང་ནས་སྲས་འཁྲུངས་པ་ཡང་མོ་གཅིག་པུ་ཡིན་པས་མུ་ཧམ་མད་རང་དང་ཁོང་གི་རྗེས་འཇུག་རྣམས་ཀྱིས་མོ་ལ་གུས་བཀུར་ཤིན་ཏུ་ཆེ།
སྐབས་དེའི་ཨ་རབ་ལུང་པའི་མི་སེར་སྤྱི་ཡོངས་བཞིན་མུ་ཧམ་མད་ཁོང་ནི་འབྲི་ཀློག་གི་ཤེས་ཡོན་ཙམ་ཡང་མེད་མཁན་ཞིག་དང་ལྷ་དང་འདྲེ་ལ་དད་པ་ཡིད་ཆེས་ཆེ་བའི་ཆོས་པ་ཞིག་དེ་བས་མིན་ཀྱང་གནས་ལུགས་ལ་ཤེས་འདོད་དང་སྤྲོ་བ་ཟབ་མོ་ཡོད་མཁན་ཞིག་ཡིན་པས་ཁོང་གིས་དུས་དང་དུས་སུ་རང་ཉིད་གཅིག་པུར་སྒོམ་རྒྱག་གནང་སྲོལ་ཡོད། དེ་ནས་དགུང་ལོ་བཞི་བཅུར་ཕེབས་པའི་ཉིན་ཞིག་རི་ཞིག་གི་རྩེར་འཁྱམས་འཁྱམས་ལ་ཕེབས་ནས་མཚན་མོ་ཕུག་པ་ཞིག་གི་ནང་དུ་བཞུགས་བཞིན་པ་ན་གློ་བུར་དུ་ལྷ་ལྟ་བུ་གཟི་བརྗིད་ཤིན་ཏུ་ཆེ་བ་ཞིག་མཐོང་བས་དྲན་མེད་དུ་བརྒྱལ། རྗེའུ་ཤིའི་ཆོས་ལུགས་ལྟར་ན་དེ་འདྲའི་རིགས་ནི་ལྷ་དངོས་མ་ཡིན་པར་ལྷ་ཡི་འཁོར་ལྟ་བུ་ཡིན་ཞིང་། ལྷ་དེའི་མིང་དུ་ཕྱིས་སུ་རྒེབ་རིལ་ཞེས་འབོད། འདིའི་རིགས་མང་ཆེ་བ་ཕོ་ཡིན་ཀྱང་ཁ་དོག་དཀར་པོ་གཤོག་པ་ཡོད་པ་ཞིག་ཡིན་པས་ཕྱིས་སུ་མང་པོས་ཨེན་རྗེལ་ཞེས་བུད་མེད་ལྟ་བུར་ངོས་འཛིན། འོན་ཀྱང་ལྷ་མ་ཡིན་དུ་ངོས་འཛིན་ན་ཅུང་མི་འགྲིག་སྟེ་རྒྱུ་མཚན་འདི་དག་ནི་ལྷ་ཡི་གཡོག་པོ་ལྟ་བུ་ཡིན་པ་ལས་ལྷ་ཡི་འགྲན་ཟླར་གྱུར་པ་ཞིག་མ་རེད། དེ་ནས་མུ་ཧམ་མད་གི་དྲན་པ་སོས་པ་ན་རྒེབ་རིལ་གིས་མུ་ཧམ་མད་ལ་དཀོན་མཆོག་གམ་ལྷ་ཆེན་པོས་མི་ཡི་རིགས་བཟོས་ཤིང་། འབྲི་བ་དང་ཀློག་པ་སོགས་མི་ཡི་རིགས་ཀྱིས་མི་ཤེས་པ་ཐམས་ཅད་ལྷ་ཆེན་པོས་བསླབས་ཡོད་ཅེས་གསུངས། མུ་ཧམ་མད་ཁོང་ནམ་རྒྱུན་མི་མ་ཡིན་ལྟ་བུས་ཟིན་པ་ལ་མཉེས་པོ་མེད་པས་ཐོག་མར་དྭོགས་པ་སྐྱེས་ནས་མ་བདེ་བར་གྱུར་ཀྱང་རིམ་པས་བཟའ་ཟླ་ཁ་དྷི་རྗ་དང་། ཚ་བོ་ཨ་ལི་གཉིས་གཙོ་བོར་གྱུར་པའི་རྒྱབ་སྐྱོར་ཐོབ་པས་རང་གིས་གསར་དུ་ཐོབ་པའི་ཆོས་ལུགས་དེ་ཉིད་སྤེལ་མགོ་བརྩམས།
དེ་ནས་བཟུང་ཐ་མ་སྐུ་མ་གཤེགས་ཀྱི་བར་དུ་རྒེབ་རིལ་གྱི་བརྒྱུད་ནས་མུ་ཧམ་མད་ལ་ལོ་ཉེར་གསུམ་གྱི་རིང་ལུང་བསྟན་ནམ་དགོངས་གཏེར་ལྟ་བུ་རབ་དང་རིམ་པར་བབ་པ་རྣམས་ཕྱོགས་བསྡོམས་བྱས་པ་ལ་ཁུ་རན་ཞེས་གྲགས། ཁུ་རན་ཞེས་པ་ནི་ཀློག་པ་དང་བགྲང་བ་ལ་གོ་བར་བཤད། ཁོང་གིས་སོ་སོར་ཆོས་བབ་རིམ་བཞིན་གྲོགས་པོ་དང་སྤུན་མཆེད། རྗེས་འཇུག་རྣམས་ལ་གསུངས་པ་དེ་དག་གིས་བློར་བཟུང་ནས་ཐ་མ་བཀའ་ཡི་བསྡུ་བ་མཛད་ཅིང་ཡིག་ཐོག་ཏུ་ཕབ་པ་ནི་ཁོང་གཤེགས་ཟིན་པའི་རྗེས་སུ་རེད། ཁུ་རན་ལ་རིང་ཐུང་མ་འདྲ་བ་ཅི་རིགས་ཡོད་པའི་ལེ་ཚན་བརྒྱ་དང་བཅུ་བཞི་ཡོད་ཅིང་། ཕྱིས་སུ་མཁས་པ་རྣམས་ཀྱིས་བརྩམས་པའི་འགྲེལ་པ་ཡང་མང་པོ་ཡོད། རིམ་པས་སྐད་ཡིག་མང་པོར་བསྒྱུར་ན་ཡང་མུ་སི་ལིམ་གྱི་ཆོས་ལུགས་ལྟར་ན་དེ་ཉིད་ཨ་རབ་རང་གི་སྐད་ནང་དུ་ཀློག་དགོས་པ་ནི་ཆ་རྐྱེན་གལ་ཆེན་ཡིན་པར་འདོད་པས་སྐད་ཡིག་གཞན་དུ་བསྒྱུར་བར་མོས་མཐུན་བྱེད་སྲོལ་མེད། དེའི་ནང་དུ་ལྷ་ཆེན་པོས་འཇིག་རྟེན་བཟོས་ཚུལ་དང་། ཆོས་དར་ཚུལ། མ་འོངས་པར་འཇིག་རྟེན་འདི་འཇིག་ནས་ལྷ་ཆེན་པོས་མི་ཐམས་ཅད་ལ་རང་རང་གིས་བསགས་པའི་དགེ་སྡིག་ལ་དཔགས་པའི་ཁྲིམས་གཅོད་པའི་དུས་ཡོང་ངེས་པ་སོགས་ཀྱི་ལྟ་གྲུབ་ནི་རྗེའུ་ཤིའི་ཆོས་གཞུང་དང་མཚུངས། གཞན་ཁུ་རན་གྱི་བརྗོད་བྱ་གཙོ་བོ་དཀོན་མཆོག་གམ་ལྷ་ཆེན་པོ་སྟེ་ཨ་ལའི་རང་བཞིན་ཡིན་ཀྱང་རང་བཞིན་གང་ཡིན་མཐའ་གཅིག་ཏུ་གསལ་པོ་གསུངས་མེད་པ་ནི་ཨ་ལའི་རང་བཞིན་དངོས་ནི་ཐད་ཀར་མངོན་སུམ་གྱིས་རྟོགས་དགོས་པ་ལས་དོན་སྤྱི་དང་སྐུ་བརྙན་སོགས་ཀྱི་སྒོ་ནས་རྟོགས་ཐུབ་པ་ཞིག་མ་ཡིན་པའི་རྒྱུ་མཚན་གྱིས་ཡིན་པར་བཤད།
དེ་ལྟར་ཁུ་རན་ལ་བརྟེན་ནས་དར་བའི་ཆོས་ལུགས་གསར་པ་དེ་རྗེའུ་ཤིའི་ཆོས་ལུགས་དང་མི་འདྲ་ས་ཆེར་མེད་ཀྱང་། མུ་ཧམ་མད་གི་འཁྲུངས་གནས་མེ་ཀ་ལུང་པའི་ས་གནས་དེའི་མི་རྣམས་ཀྱིས་རྗེ་ཤུའི་ཆོས་ལུགས་དང་མཐུན་པར་ལྷ་ཆེན་པོ་ལ་ཡང་མོས་པ་དང་མཉམ་དུ། རིགས་བརྒྱུད་ཀྱི་ལྷ་སོགས་མཚོན་བྱེད་ཀྱི་རྟེན་དངོས་པོ་འདྲ་མིན་ལ་མཆོད་པའི་ལུགས་སྲོལ་ཡང་ཡོད་པ་ལ་མུ་ཧམ་མད་གི་ཆོས་ལུགས་ཀྱིས་མཐའ་གཅིག་ཏུ་བཀག་འགོག་གནང་གི་ཡོད་པས་དེ་དག་གི་བར་དུ་འགལ་ཟླ་ཇེ་ཆེར་གྱུར། འགལ་ཟླ་དེའི་ཁྲོད་དུ་མོ་ཧམ་མད་གི་སྤུན་མཆེད་དང་གྲོགས་པོ་མང་པོའི་སྲོག་ཤོར་ཞིང་། སྔར་ཡེ་ཤུའི་སྟོན་པས་རང་སྲོག་རྗེའུ་ཤིའི་ལག་ཏུ་ཤོར་བ་ལྟར་མུ་ཧམ་མད་གི་སྐུ་སྲོག་ལ་ཡང་ཉེན་ཀ་ཆེ་ཙམ་འཕྲད་ན་ཡང་། སྟབས་ལེགས་པར་དེ་ནས་ཐག་མི་རིང་སར་ཡོད་པའི་ས་ཆ་དེང་སང་མེ་ཌི་ན་ཞེས་འབོད་པའི་ས་ཆའི་མི་རྣམས་ཁོང་ལ་འཇིག་རྟེན་གྱི་ཕྱོགས་ནས་དགའ་པོ་དང་ཆོས་ཀྱི་ཕྱོགས་ནས་དད་པོ་ཡོད་པས་ཁོ་ཚོས་ཁོང་དེར་གདན་དྲངས། སྐབས་དེ་དུས་ཁོང་དང་ལྷན་དུ་རང་གི་ཕ་ཡུལ་དང་སྤུན་མཆེད་དང་བཅས་པ་དོར་ནས་འགྲོ་མཁན་མང་པོ་ཡོད་པ་ལ་དེ་ནི་དད་པའི་འགྲུལ་བཞུད་གལ་ཆེན་ཞིག་དང་མུ་སི་ལིམ་ཚོར་མཚོན་ན་ཆེས་ཐོག་མ་དེ་ཡིན་པས་འགྲུལ་བཞུད་དེ་ལ་མུ་སི་ལིམ་ཚོས་ཧི་ཇི་ར་ཞེས་འབོད། ལོ་དེ་ནི་སྤྱི་ལོའམ་ཡེ་ཤུའི་ཆོས་ལུགས་ཀྱི་ལོ་ཐོ་ལྟར་ན་༦༢༢ ཡིན་ཀྱང་མུ་སི་ལིམ་རྣམས་ལ་མཚོན་ན་ལོ་དེ་ཉིད་མུ་སིམ་གྱི་ཆོས་ལུགས་ཐོག་མར་དབུ་བརྙེས་པའི་ལོ་ཡིན་པས་ཁོ་པ་ཚོའི་ལོ་ཐོའི་ལོ་མགོ་ཡང་འདི་ནས་བཙུགས་པ་ཞིག་རེད། མེ་ཌི་ན་ལ་སྡོད་སྐབས་ལུང་པ་དེར་མུ་སི་ལིམ་ཆོས་ལུགས་ཀྱི་ལྷ་ཁང་ཐོག་མ་ཡང་བཞེངས་པ་དང་། མུ་སི་ལིམ་གྱིས་ཉིན་ལྟར་ལྷ་ལ་སྐད་གསང་མཐོན་པོས་གསོལ་བ་འདེབས་པ་ཡང་ས་ཆ་དེར་དབུ་བརྙེས།
མུ་ཧམ་མད་རང་གི་ཐུགས་ལ་རང་གི་འཁྲུངས་ཡུལ་དུ་ཞི་བའི་ཐོག་ནས་རང་གི་ཆོས་ལུགས་སྤེལ་ཐུབ་པའི་དགོངས་བཞེད་ཡོད་ཀྱང་། དགོངས་བཞེད་བཞིན་མ་བྱུང་བར་ད་ཆ་བྲོས་བྱོལ་དུ་ཕེབས་དགོས་བྱུང་བས་མ་ཚད། དེ་ནས་མེ་ཀའི་ཕྱོགས་ནས་མུ་སི་ལིམ་ཡོད་ཚད་རྩ་མེད་གཏོང་ཆེད་དམག་དཔུང་བསྒྲིགས་ནས་འབྱོར་བ་ན་ཐབས་གཞན་མེད་པས་དེའི་ཁ་གཏད་དུ་མུ་སི་ལིམ་རྒད་པོ་དང་ལོ་ཆུང་བྱིས་པ་ཡན་ཆོད་བསྡོམས་པའི་མི་སུམ་བརྒྱ་ཙམ་ཡོད་པས་གྲི་དང་དབྱུག་པ་སོགས་སྣ་ཚོགས་པ་ཐོགས་ནས་དམག་འཐབས་ལ་ཞུགས། སྐབས་དེའི་དམག་འཐབས་ནི་ཕྱོགས་གཉིས་ཀར་ཐབས་མེད་པའི་གནས་སྟངས་བཟོད་དཀའ་བ་ཞིག་སྟེ་སྤུན་མཆེད་ནང་ཁུལ་དང་། གྲོགས་པོ་ནང་ཁུལ། ཕ་བུ་ནང་ཁུལ་དང་བཅས་པར་དད་མོས་དང་བསམ་ཕྱོགས་མི་འདྲ་བའི་དབང་གིས་རང་སྲོག་འབེན་ལ་བཙུགས་ནས་འཐབས་དགོས་བྱུང་ཡོད། སྟོང་ཕྲག་ཁ་ཤས་ཡོད་པའི་མེ་ཀའི་དམག་ལ་ལྟོས་ན་མུ་སི་ལིམ་ཚོའི་དམག་དཔུང་ནི་ཆེས་ཉུང་ཉུང་ལས་མིན་ཀྱང་། སྔ་རྗེས་ཐེངས་ཁ་ཤས་འཐབ་རིང་མུ་ཧམ་མད་གི་ཕྱོགས་ལ་རྒྱལ་ཕམ་གཉིས་ཀ་བྱུང་ནས་མུ་ཧམ་མད་རང་ལ་ཡང་རྨས་སྐྱོན་ཕོག་པ་སོགས་བྱུང་ན་ཡང་མུ་སི་ལིམ་རྣམས་ཀྱི་ནང་གི་དད་མོས་དང་སྙིང་སྟོབས་ནི་འགྲན་ཟླ་མེད་པས་རིམ་པས་ཤིན་ཏུ་འདུལ་དཀའ་བར་གྱུར་ཅིང་རྒྱབ་སྐྱོར་བྱེད་མཁན་ཡང་ཇེ་མང་དུ་གྱུར་ཏེ་མཐར་མུ་སི་ལིམ་རྣམས་རྣམ་པར་རྒྱལ།
དེ་ནས་དམག་མི་ཁྲི་གཅིག་ཙམ་ཡོད་པའི་སྟོབས་ཤུགས་ཐོབ་སྐབས་མུ་ཧམ་མད་སྐུ་འཁོར་རྣམས་མེ་ཀ་ལུང་པར་འབྱོར་བ་ན་ད་ཆ་མེ་ཀའི་ཡུལ་མི་རྣམས་ཀྱིས་མུ་ཧམ་མད་ལ་ཁ་གཏད་གཅོག་ཐབས་མེད་པ་གསལ་པོར་གྱུར་ཡོད། ཡུལ་གྲུ་དེའི་གནའ་བོའི་ལུགས་སྲོལ་ལྟར་ན་རིགས་རྒྱུད་ཚོ་པ་སུ་ཞིག་གི་དམག་ཕམ་ན་ཡང་དེའི་སྐྱེས་པ་ཐམས་ཅད་གསོད་ཅིང་བུད་མེད་ཐམས་ཅད་འཚོང་བ་སོགས་ཀྱིས་ཡ་ང་སྙིང་རྗེ་ཅུང་ཟད་ཙམ་ཡང་བྱེད་སྲོལ་མེད་པས་ཉིན་དེར་མེ་ཀའི་ཡུལ་མི་ཐམས་ཅད་དངངས་སྐྲགས་བརྗོད་མི་ཤེས་པའི་འོག་ཏུ་ཡོད་ཀྱང་། མུ་ཧམ་མད་གིས་སུ་ཡིན་ཀྱང་ཁོང་གི་ཆོས་ལུགས་ལ་ཞུགས་པ་ཙམ་གྱིས་འགྲིགས་ཡོད་པས་ཞེད་དགོས་པ་སོགས་གང་ཡང་མེད་པར་གསུངས་པས་ཚང་མ་འཇིགས་པ་ལས་གྲོལ། དེ་ནས་ཁོང་དམག་གིས་བསྐོར་ཏེ་མེ་ཀ་ལུང་པར་ཡོད་པའི་གནས་ཀྱི་ལྟེ་གནས་ཀཱ་རྦར་ཕེབས་ནས་དེར་ཆོས་ལུགས་གཞན་གྱི་མི་རྣམས་གསོད་པའི་ཚབ་ཏུ་ཡབ་མེས་ཀྱིས་བསྟེན་སྲོལ་ཡོད་པའི་ལྷ་རྣམས་མཚོན་བྱེད་ཀྱི་རྟེན་ཐམས་ཅད་ཐལ་བར་གཏོར། དེ་ནི་རྙིང་ཟིན་པའི་འདས་པ་གཏོར་བ་དང་འབྲེལ་མ་འོངས་པ་གསར་པ་ཞིག་མགོ་ཚུགས་པའི་དོན་ཡང་ལོས་ཡིན། དེ་ནས་བཟུང་མུ་སི་ལིམ་གྱི་ཆོས་ལུགས་ཀྱི་ལྟེ་བ་ནི་མེ་ཀའི་ལུང་པ་འདི་ཡིན་ཅིང་། ཀཱ་རྦ་ཡང་གནས་ཀྱི་གཙོ་བོར་གྱུར། རྒྱ་གར་གྱི་ཆོས་ལུགས་ལྟར་ན་རི་བོ་མཆོག་རབ་ནི་འཇིག་རྟེན་གྱི་ལྟེ་བ་ཡིན་པར་འདོད་པ་བཞིན་མུ་སི་ལིམ་ཚོས་ཀཱ་རྦ་ནི་འཛམ་གླིང་གི་ལྟེ་བ་ཡིན་པར་འདོད། ཚན་རིག་པ་མི་ཉུང་བས་དེ་ལ་ངོ་མཚར་བའི་གནས་ལུགས་དང་རྒྱུ་མཚན་མང་པོ་ཡོད་སྐོར་འགྲེལ་བརྗོད་བྱས་ཡོད། ཀཱ་རྦའི་ནང་དུ་ཡ་མཚན་ཅན་གྱི་རྡོ་ནག་པོ་ཞིག་ཡོད་པ་དེ་ནི་ལྷ་ཆེན་པོས་ཞིང་ཁམས་ནས་མར་གནང་བར་ཡིད་ཆེས་བྱེད་ཅིང་། འདི་དག་ལ་མུ་སི་ལིམ་ཚོས་མོས་པ་དང་བཀུར་བར་བྱེད་པས་རྗེའུ་ཤི་ཆོས་ལུགས་པས་མུ་སི་ལིམ་རྣམས་ནི་གཟུགས་ཅན་གྱི་རྟེན་ལ་མོས་པས་ན་ཆོས་ལོག་ཡིན་པར་བཤད་སྲོལ་ཡོད།
གང་ལྟར་ཡང་ལྷ་ཁང་དེ་ནི་མུ་སི་ལིམ་གྱི་ཆོས་ལུགས་པ་ཞིག་ཡིན་ནས་བཟུང་སྟེ་བྱ་དགོས་པ་ཀ་བ་ལྔ་ཞེས་ཡོད་པའི་ནང་ནས་ལྔ་པ་སྟེ་གནས་སྐོར་དུ་ངེས་པར་དུ་འགྲོ་དགོས་ས་དེ་རེད། མུ་སི་ལིམ་གྱི་ཆོས་ལུགས་ནང་དུ་བཤད་པའི་ཉམས་ལེན་གྱི་ཀ་བ་ལྔ་ནི། ༡ ཤ་ཧ་ད་ཞེས་པ་དད་མོས་ཏེ་ལྷ་ཆེན་པོ་གཅིག་རང་ལ་དད་པ་ཡིན་ཞིང་འདི་ཉིད་ནང་པའི་སྐྱབས་འགྲོ་དང་མཚུངས། ༢ ས་ཧཏ་ཞེས་པ་སྨོན་ལམ་སྟེ་ཉིན་རེ་གསོལ་བ་དང་སྨོན་ལམ་ལན་ལྔ་ཆད་མེད་དུ་འདེབས་པར་གོ། གསོལ་བ་འདེབས་པ་དེས་ནི་གནས་སྐབས་དེར་མུ་སི་ལིམ་ཡོངས་རྫོགས་ཀྱིས་སེམས་ནས་བསམ་རྒྱུ་གཅིག་པ་དང་། ལུས་ཀྱི་བྱེད་སྟངས་གཅིག་པ། ཐ་ན་དུས་ཚོད་དང་། འཛམ་གླིང་གང་དུ་ཡོད་ཀྱང་ཚང་མས་ཀཱ་རྦའི་ཕྱོགས་ལ་ཁ་སྟོན་དགོས་པ་གཅིག་པ་བཅས་ཀྱིས་དེས་གཅིག་གྱུར་གྱི་ཚོར་བ་གཞན་ལས་ལྷག་པ་སྟེར་ནུས་པ་བཤད་མ་དགོས། ༣ ཛ་ཀཏ་ཞེས་པ་སྦྱིན་གཏོང་སྟེ་ཐམས་ཅད་ལྷ་ལ་དབང་བར་དྲན་པ་དང་མཐོ་དམན་འདྲ་མཉམ་ཡོང་ཕྱིར་རང་གི་རྒྱུ་ནོར་གྱི་ཆ་ཤས་ཙམ་རྟག་ཏུ་གཞན་ལ་སྦྱིན་པ་གཏོང་བ། ༤ སི་ཡམ་ཞེས་པ་གསོ་སྦྱོང་སྟེ་ཟླ་བ་དགུ་པ་ར་མ་དྷར་སྲུང་དགོས་པའི་གསོ་སྦྱོང་བཅས་གསོ་སྦྱོང་གི་རིགས་གསུམ་ཡོད། ༥ ཐ་མ་ནི་ཧཇ་ཞེས་པ་གནས་སྐོར་ཏེ་མུ་སི་ལིམ་ཡིན་ནས་བཟུང་སྟེ་མ་མཐར་ཡང་མེ་ཀ་ལ་གནས་སྐོར་ཐེངས་གཅིག་འགྲོ་དགོས་པ་བཅས་སོ། གཞན་ཡང་རྗེའུ་ཤིའི་ཆོས་ལུགས་ཀྱི་ནང་དུ་ཡོད་པ་དང་མེད་པའི་ཉམས་ལེན་མི་ཉུང་བ་ཡོད་ཀྱང་མུ་སི་ལིམ་ཡིན་མིན་གྱི་ས་མཚམས་འབྱེད་བྱེད་ནི་འདི་ལྔ་སྲུང་མི་སྲུང་གིས་འབྱེད་པ་ཡིན། གཞན་མུ་སི་ལིམ་རྣམས་ཀྱིས་བསྟེན་མི་རུང་བའི་བཟའ་བཏུང་ནི་རང་བཞིན་གྱིས་ཤི་བའི་སེམས་ཅན་གྱི་ཤ་སྤྱི་དང་། ལྷག་པར་ཕག་པ་ནི་ཤིན་ཏུ་མི་གཙང་བ་ཡིན་པས་རྩ་བ་ནས་བཟའ་མི་རུང་ཞིང་། ཆང་དང་ཁྲག་ལ་སོགས་པ་འཐུང་མི་རུང་ཡང་། མང་དུ་དྭོགས་པས་རྒྱུ་མཚན་རྣམས་འདིར་མི་བཤད།
དེ་ནས་སྤྱི་ལོ་༦༣༢ ལོར་དགུང་ལོ་དྲུག་ཅུའི་ནང་དུ་ཕེབས་པའི་མུ་ཧམ་མད་སྐུ་གཤེགས་ཁར་ཁོང་གིས་མ་འོངས་པར་སྟོན་པ་གཞན་མི་འབྱུང་བ་དང་། ཆོས་ཚུལ་བཞིན་བྱ་དགོས་ཚུལ། གཞན་ལ་གནོད་པ་བྱ་མི་རུང་ཚུལ། བུ་ལོན་ལ་སྐྱེད་འབབ་ལེན་མི་རུང་ཚུལ། བུད་མེད་ལ་ཡག་པོ་བྱ་དགོས་ཚུལ་སོགས་ཀྱི་ཐ་མའི་སློབ་སྟོན་གནང་ནས་ཁོང་ལ་སྔ་ཕྱིར་བཟའ་ཟླ་བཅུ་གསུམ་ཙམ་ཡོད་པའི་ནང་ནས་ཕྱིས་སུ་ཐུགས་འདིངས་ཆེ་ཤོས་དང་ལོ་ན་ཡང་ཧ་ཅང་ཆུང་བ་ཨའི་ཤ་ཟེར་བ་དེའི་པང་དུ་དབུ་བསྙེས་ནས་སྐུ་གཤེགས། ཆོས་ལུགས་གཞན་གྱི་སྟོན་པ་དང་མི་འདྲ་བར་ཁོང་གིས་ཁོང་ནི་ལྷ་ཡི་ལུང་སྟོན་པ་པོ་ཙམ་ཡིན་པ་ལས་ལྷ་མ་ཡིན་ཞིང་། ལྷ་དངོས་ནི་གཅིག་རང་ལས་མེད་པའི་ཚུལ་གསལ་པོར་གསུངས་པས། རང་གི་སྟོན་པ་དེ་ལྷར་མི་འཛིན་པའི་ཆོས་ལུགས་ཕལ་ཆེར་མུ་སི་ལིམ་མ་གཏོགས་མེད་པ་ལྟ་བུ་རེད། དེ་ལྟར་ཡོང་བར་མུ་ཧམ་མད་ཁོང་སྐུ་མ་གཤེགས་གོང་ནས་ཁོང་གིས་ཁོང་གྲོངས་རྗེས་མི་རྣམས་ཀྱིས་མཆོད་གནས་སུ་མི་འགྱུར་བའི་དོན་དུ་སྤྲོས་པ་རྒྱས་པོའི་དུར་སྦས་སོགས་དམིགས་བསལ་བྱ་མི་དགོས་པའི་ཞལ་ཏ་གནང་ཞིང་། གྲོངས་ཟིན་རྗེས་གྲོགས་པོ་ཨ་རྦུ་རྦ་ཀར་ཟེར་བ་ཁོང་གི་བཟའ་ཟླ་ཨའི་ཤའི་ཡབ་ཡིན་པ་དེས་སྐད་གསང་མཐོན་པོས་གལ་སྲིད་ཁྱོད་ཚོས་མུ་ཧམ་མད་ལ་དད་མོས་བྱ་ཡི་ཡོད་ན་ཁོང་གྲོངས་ཟིན་པ་རེད། འོན་ཀྱང་གལ་སྲིད་ཁྱོད་ཚོས་ཨ་ལ་སྟེ་ལྷ་ཆེན་པོ་ལ་དད་མོས་བྱ་ཡི་ཡོད་ན་ཤེས་དགོས་པ་ཞིག་ལ་ལྷ་ཆེན་པོ་ནི་འཚོ་ཞིང་བཞུགས་ལ་ནམ་ཡང་སྐུ་གཤེགས་མི་སྲིད་ཅེས་བཤད།
རྒྱུ་མཚན་དེས་མུ་སི་ལིམ་ཆོས་ལུགས་ཀྱི་ནང་དུ་མུ་ཧམ་མད་ལྷ་མ་ཡིན་པར་ལྷ་ཡི་ལུང་སྟོན་པ་པོ་ཙམ་ཡིན་པ་རྩོད་མེད་ཡིན་པས་ཡེ་ཤུ་ཆོས་ལུགས་པ་ལྟར་ལྷ་ཆེན་པོ་དང་། རྣམ་ཤེས། ཡེ་ཤུའི་སྟོན་པ་གསུམ་གྱི་བར་དུ་གཅིག་དང་ཐ་དད་ཀྱི་འབྲེལ་བ་གང་ཡོད་ཟེར་བའི་རྩོད་གཞི་ཛ་དྲག་ཅན་དེ་འདྲ་བྱུང་མེད། དེ་བཞིན་ཡེ་ཤུའི་ཆོས་ལུགས་པས་ཡེ་ཤུའི་སྟོན་པའི་སྐུ་བརྙན་དང་རི་མོ་བཞེངས་སྲོལ་ཡོད་ཀྱང་མུ་སི་ལིམ་རྣམས་ཀྱིས་མུ་ཧམ་མད་གི་སྐུ་བརྙན་བཞེངས་པ་དང་རི་མོ་འབྲི་བ་སོགས་ལ་དགའ་བོ་བྱ་སྲོལ་མེད། འོན་ཀྱང་ལོ་རྒྱུས་ཐོག་གི་མུ་ཧམ་མད་མཚོན་བྱེད་དུ་འགའ་ཤས་ཀྱིས་ཁོང་གི་ཞལ་རས་རས་དཀར་པོས་བཀབ་པའི་རི་མོ་ཅུང་ཟད་རེ་འབྲི་སྲོལ་ཡོད། དེས་ན་མུ་ཧམ་མད་ནི་མི་དངོས་ཤིག་ཡིན་པ་ལ། ཨི་རྦན་ཨི་ཤཀ་གིས་བརྩམས་པའི་མུ་ཧམ་མད་གི་མི་ཚེའི་ལོ་རྒྱུས་ནི་རྙིང་ཤོས་དང་ཁུངས་དག་ཤོས་ཡིན་པར་བརྩི་སྲོལ་ཡོད་ཅིང་། དེའི་ནང་དུ་བལྟས་ན་ཆོས་ལུགས་ཀྱི་སྟོན་པ་ཆ་ཚང་ནང་ནས་མུ་ཧམ་མད་གི་མི་ཚེའི་ལོ་རྒྱུས་ནི་གསོན་ཉམས་ཆེ་ཤོས་དང་ལྷ་སྒྲུང་ཉུང་ཤོས་ཀྱང་ཡིན་པར་མངོན། མུ་ཧམ་མད་ལ་རྫུ་འཕྲུལ་དང་མངོན་ཤེས་སོགས་ཡོད་རབས་མེད་ཅིང་། མུ་ཧམ་མད་ལ་བཟའ་ཟླ་མང་པོ་ཡོད་པ་དང་དམག་འཁྲུགས་ལ་སྐུ་ངོ་མ་ཕེབས་པ་སོགས་ཀྱིས་ཁོང་ལ་སྐྱོན་མི་ཉུང་བ་ཡོད་ན་ཡང་། དེ་ཚོ་ཁོང་གི་མི་ཚེའི་ལོ་རྒྱུས་ནང་དུ་གསལ་པོར་བྲིས་ཡོད། ཆོས་ལུགས་གཞན་གྱི་སྟོན་པའི་ལོ་རྒྱུས་ནི་ངན་ཚད་སྦས་ཤིང་བཟང་ཚད་ངོམས་པ་ཞིག་ཡིན་པས་དེ་དག་གི་བཟང་ངན་ལྗིད་ཁོག་མཇལ་རྒྱུ་ཁག་པོ་ཡིན་ན་ཡང་གཞན་དག་ལ་ལྟོས་ན་མུ་ཧམ་མད་གི་ལོ་རྒྱུས་ནི་དྲང་པོ་ཞིག་རེད་ཅེས་བཤད་ཆོག་པ་རེད།
དེ་ལྟར་མུ་སི་ལིམ་རྣམས་ཀྱིས་མུ་ཧམ་མད་ཁོང་ལྷ་དངོས་མ་ཡིན་པར་ལྷ་དང་ཉེ་ཤོས་ཀྱི་དམ་པའི་སྐྱེས་བུ་ཞིག་ཡིན་པར་བརྩིས་ནས་མིག་དཔེར་འཛིན་པ་དེས་ཁོང་གི་ཆོས་ལུགས་ལ་ཤུགས་རྐྱེན་ཆེན་པོ་ཐེབས་ཡོད། དཔེར་ན་མུ་ཧམ་མད་ཁོང་ཚོང་པ་ཡིན་པས་ཁོང་གི་ཆོས་ལུགས་པའི་ཁྲོད་དུ་ཚོང་ལས་ཡར་རྒྱས་ཕྱིན་པ་དང་འབྲེལ་དེས་རིམ་པས་ཤར་ནུབ་ཀྱི་གླིང་གཉིས་པོའི་བར་དུ་དཔལ་འབྱོར་གྱི་འབྲེལ་མཐུད་བྱས། ད་དུང་ཁོང་ལ་བཟའ་ཟླ་མང་ཙམ་ཡོད་ཅིང་། ཁོང་གི་ཆོས་ལུགས་ལ་ཚངས་སྤྱོད་ཀྱི་སྡོམ་པ་སྲུང་དགོས་པའི་ཚབ་ལ་བུ་ཕྲུག་མང་ཙམ་གསོ་སྐྱེད་དགོས་པའི་ལྟ་གྲུབ་ཡོད་པ་དེས་ཁོང་གི་ཆོས་ལུགས་ཀྱི་མི་འབོར་ལོ་རེ་ནས་ལོ་རེ་འཕར་བ་ལས་ད་ལྟའི་བར་ཉམས་རྒུད་ཕྱིན་མེད། མ་ཟད་ཁོང་ནི་དམག་དཔོན་ཆེན་པོ་ཞིག་ཀྱང་ཡིན་པས་ཁོང་གི་རྗེས་འཇུག་རྣམས་ལ་སུ་ཞིག་གིས་ལས་སླ་པོས་བརྙས་བཅོས་བཤད་ཐུབ་བམ། དེས་ན་ལོ་ངོ་གཅིག་སྟོང་ལྔ་བརྒྱ་མ་ཟིན་ཙམ་གྱི་རིང་མེ་ལྕེ་བཞིན་དུ་དར་བའི་ཁོང་གི་ཆོས་ལུགས་ཀྱི་ཁྱད་ཆོས་གལ་ཆེ་ཤོས་ནི་ཧ་ཅང་སྟབས་བདེ་བོ་ཡིན་པ་སྟེ། ཧིན་དུ་ལྟར་འཇིག་རྟེན་དང་འཇིག་རྟེན་ལས་འདས་པའི་གསང་བ་མང་པོ་མེད་ཅིང་། ནང་ཆོས་ལྟར་གྲངས་མེད་གསུམ་དུ་ཚོགས་གསོག་པ་དང་ཉིན་མཚན་ཆད་མེད་སྒོམ་རྒྱག་དགོས་མེད་པར་ཚེ་འདིར་ལྷ་ལ་དད་མོས་གཙང་མ་བྱས་ན་ཤི་མ་ཐག་ཏུ་ཞིང་ཁམས་སུ་འགྲོ་ཆོག གཅེར་བུ་པ་སོགས་ལྟར་དཀའ་བ་མང་པོ་སྤྱད་མི་དགོས་པར་ཉིན་རེ་གསོལ་འདེབས་ཐེངས་ལྔ་བྱས་པས་ཆོག རྒྱུ་མཚན་དེ་དག་གིས་ཕྱིས་སུ་སོག་པོའི་རྒྱལ་བརྒྱུད་རྣམས་འཛམ་གླིང་གི་ཆོས་ལུགས་མང་པོར་འབྲེལ་བ་བྱུང་བ་ལས་མང་པོ་ཞིག་གིས་མུ་སི་ལིམ་གདམས་པ་ལ་དེའི་རྒྱུ་མཚན་ཁོ་ཚོས་ཆོས་ལུགས་འདི་ཧ་ཅང་སྟབས་བདེ་མོ་ཡིན་པས་ཡིན་ཞེས་བཤད་ཡོད། འོན་ཀྱང་མུ་ཧམ་མད་ཁོང་སྐུ་འཚོ་བཞུགས་རིང་ཁོང་གིས་སོ་སོས་གསར་གཏོད་གནང་བའི་ཆོས་ལུགས་དེས་འཛམ་གླིང་ཇི་ལྟར་དབང་བསྒྱུར་བ་གཟིགས་རྒྱུ་མ་བྱུང་བས་དེའི་སྐོར་ལེ་ཚན་རྗེས་མའི་ནང་དུ་འཆད་པར་འགྱུར་རོ། །
དོན་ཚན་གཉིས་པ། མུ་སི་ལིམ་གྱི་རྫོགས་ལྡན།[རྩོམ་སྒྲིག]
མུ་ཧམ་མད་གིས་མུ་སི་ལིམ་གྱི་ཆོས་ལུགས་དར་བའི་རྨང་གཞི་ཆ་ཚང་བ་བསྐྲུན་ནས་སྐུ་གཤེགས་པའི་རྗེས་སུ་ཁོང་གི་མཛད་ཕྲིན་གྱི་ལྷག་མ་ནི་ཁོང་གི་སློབ་མ་གྲོགས་པོ་དང་སྤུན་མཆེད་ཡིན་པ་རྣམས་ཀྱིས་བསྐྱངས། འོན་ཀྱང་ཁོང་གིས་སྐུ་མ་གཤེགས་གོང་དུ་རྒྱལ་ཚབ་དངོས་སུ་བསྐོས་ཡོད་མེད་ཐད་རྩོད་པ་ཡོད། དེ་ཡང་སྐུ་མ་གཤེགས་གོང་ཙམ་དུ་ཁོང་གིས་ཞལ་ཆེམས་ཤིག་གནང་བའི་ནང་དུ་ཁོང་གིས་རང་གི་ཚ་བོ་ཡང་ཡིན་ཞིང་སྲས་མོའི་ཁྱོ་ག་ཡང་ཡིན་པ་ཨ་ལི་ལ་བསྟོད་བསྔགས་ཆེན་པོ་གནང་། འགའ་ཤས་ཀྱིས་དེ་ནི་ཨ་ལི་རྒྱལ་ཚབ་ཏུ་བསྐོས་པའི་དོན་དུ་འགྲེལ་བརྗོད་བྱས་ཤིང་། གཞན་དག་གིས་དེ་ནི་ཨ་ལི་མུ་སི་ལིམ་ལ་ཞུགས་པའི་བུ་རྣམས་ཀྱི་ནང་ནས་དང་ཤོས་ཡིན་པ་སོགས་ཀྱིས་བསྟོད་བསྔགས་དང་བརྩི་མཐོང་གནང་བ་ལས་རྒྱལ་ཚབ་ཏུ་བསྐོས་པའི་དོན་མ་ཡིན་པར་བཤད། གང་ལྟར་ཐོག་མར་མུ་ཧམ་མད་གི་གྲོགས་པོ་དང་སློབ་མ་གཅིག་ལྕོགས་ཡིན་པ་རྣམས་ཀྱིས་རྒྱལ་ཚབ་བམ་མུ་སི་ལིམ་གྱི་ཆོས་སྲིད་གཉིས་ཀྱི་དབུ་ཁྲིད་ཀྱི་འགན་བཞེས། རྒྱལ་ཚབ་འདི་ལ་མུ་སི་ལིམ་གྱི་ཆོས་སྐད་དུ་ཀ་ལི་ཧྥ་ཞེས་འབོད་ཅིང་། དེ་ནི་ཤུལ་འཛིན་བྱེད་པོ་ལ་གོ། འོན་ཀྱང་ཆོས་ལུགས་གཞན་དང་མི་འདྲ་བར་མུ་སི་ལིམ་གྱི་ཆོས་ལུགས་ལ་མི་སུ་ཞིག་ཡིན་ཀྱང་རང་ཉིད་སྒེར་གྱིས་ཨ་ལའམ་ལྷ་ཆེན་པོར་དད་པ་དང་གསོལ་བ་འདེབས་པ་ཁོ་ནས་ཆོག་པ་ལས་དེ་ལ་གཞན་གྱི་བྱིན་རླབས་དང་ཆོ་ག་སོགས་ལ་ལྟོས་དགོས་མེད་ཅིང་། ཨ་ལའི་མདུན་དུ་ཚང་མ་འདྲ་མཉམ་ཡིན་པས་བླ་མ་དང་ཆོས་པ་སོགས་གལ་ཆེན་ཡིན་པར་འཛིན་སྲོལ་མེད་པར་བརྟེན་མུ་སི་ལིམ་གྱི་ལུགས་སྲོལ་དུ་ལྷ་ཁང་ཙམ་ལས་དགོན་པ་སོགས་ཀྱང་བཞེངས་སྲོལ་མེད་པས་ན་སྐབས་དེའི་མུ་སི་ལིམ་གྱི་དཔོན་པོ་རྣམས་ནི་ཆོས་དཔོན་ལས་ཀྱང་གཙོ་བོ་སྲིད་དཔོན་ཡིན་པར་བཤད་ན་འོས་ཤིང་འཚམས་པར་མཁས་པ་རྣམས་ཀྱིས་གསུངས།
ཀ་ལི་ཧྥ་དང་པོ་ཨ་རྦུ་རྦ་ཀར་ནི་ལོ་རྒྱུས་སྨྲ་བ་རྣམས་ཀྱིས་མུ་སི་ལིམ་གྱི་ཆོས་ལུགས་གསར་གཏོད་གནང་མཁན་གྱི་མི་གཉིས་པ་དང་དེ་ཡང་མུ་ཧམ་མད་རང་དང་གལ་གནད་མཚུངས་པ་ཙམ་དུ་ངོས་འཛིན་བྱེད། རྒྱུ་མཚན་ཁོང་ནི་མི་དམངས་ཀྱི་མདུན་དུ་མུ་སི་ལིམ་ཡིན་པར་ཁས་ལེན་མཁན་དང་པོ་དེ་ཡིན་པས་མ་ཚད། མུ་ཧམ་མད་ལ་དཀའ་སྡུག་འཕྲད་སྐབས་རྒྱབ་རྟེན་བཅོལ་ས་དང་ལམ་སྟོན་བྱེད་མཁན་ཡང་ཁོང་ཡིན་པ་དང་། མུ་ཧམ་མད་གྲོངས་རྗེས་གསར་དུ་བརྙེས་པའི་ཚོགས་པ་དེའི་གཞི་རྩ་བརྟན་པོར་འཛུགས་པ་དང་མདུན་ལམ་གསལ་པོར་སྟོན་མཁན་ཡང་ཁོང་ཡིན་པས་རེད། འོན་ཀྱང་ཁོང་གིས་ལོ་གཉིས་ཙམ་གྱི་རིང་དུ་དབུ་ཁྲིད་པའི་རྗེས་སུ་སྐུ་བསྙུན་ནས་རང་བཞིན་གྱིས་གྲོངས་པ་ལ། དེ་རྗེས་ཨ་རྦུ་རྦ་ཀར་གྱི་དྲུང་ཡིག་ཨོ་མར་ཞེས་པ་དེ་ཀ་ལི་ཧྥ་གཉིས་པར་གྱུར། ཁོང་ནི་ཐོག་མར་མུ་ཧམ་མད་གི་ཆོས་ལུགས་ནི་ཆོག་ལོག་ཡིན་པ་དང་དེས་རིགས་བརྒྱུད་ཀྱི་མཐུན་སྒྲིལ་གནོད་པར་བསམ་ནས་མུ་ཧམ་མད་དཀྲོངས་འདོད་དྲག་པོ་ཡོད་པ་ཞིག་ཡིན་ན་ཡང་རང་གི་སྲིང་མོའི་བརྒྱུད་ནས་མུ་ཧམ་མད་གི་ཆོས་ཀྱི་སྐོར་བསླབས་པས་མོས་པར་གྱུར་ཏེ་དེའི་ཆོས་ལ་ཞུགས་པ་ཞིག་རེད། དེ་ནི་མགོ་བོ་སྤྱི་ཐེར་དང་། མིག་ནག་པོ། གཟུགས་ཧ་ཅང་རིང་བ། འབྲི་ཀློག་ཀྱང་ཤེས་པས་ཁ་ལྕེ་ཤིན་ཏུ་བདེ་བ་ཞིག་ཀྱང་ཡིན་པར་གྲགས། ཁོང་མུ་ཧམ་མད་ལ་དགའ་མོས་ཧ་ཅང་ཆེ་བས་མུ་ཧམ་མད་སྐུ་གཤེགས་པར་ཐོས་དུས་ཁོང་གིས་ཞིང་ཁམས་ལ་གཤེགས་པ་མ་གཏོགས་སྐུ་གཤེགས་པ་ཡིན་མི་སྲིད་བསམ་སྐད། སྔར་བོད་དུ་ཡང་རྒྱལ་བ་དགེ་འདུན་གྲུབ་པས་ཙོང་ཁ་པ་སྐུ་གཤེགས་པ་གསན་སྐབས་སྤྱོད་པ་ལ་གཤེགས་པ་ཡིན་ན་མ་གཏོགས་སྐུ་གཤེགས་པ་ཡིན་མི་སྲིད་དགོངས་རབས་ཀྱི་ལོ་རྒྱུས་ཡོད་པ་དེ་ཤེས་མཁན་ཚོར་འདིས་དྲན་གསོ་སྟེར་ངེས། ཀ་ལི་ཧྥ་དེ་གཉིས་ཀྱི་སྐབས་དེར་ཨ་རབ་རང་གི་དམག་མི་སྟོང་ཕྲག་ཁ་ཤས་ལས་མེད་ཀྱང་དེ་གཉིས་ཀྱིས་སྔ་རྗེས་བསྡོམས་པའི་ལོ་ཉེར་ལྔ་ཙམ་གྱི་རིང་དུ་སྙན་གྲགས་ཅན་གྱི་རྒྱལ་ཁབ་པེར་ཤ་ཡ་སོགས་དབང་དུ་བསྡུས་ནས་མུ་སུ་ལིམ་ཆོས་ལུགས་ཀྱི་སྟོབས་ཤུགས་ཨ་རབ་ཀྱི་མི་རིགས་དང་ས་ཆ་ལས་བརྒལ་བའི་རྒྱ་བསྐྱེད་གནང་།
ཀ་ལི་ཧྥ་ཨོ་མར་མ་གྲོངས་གོང་དུ་ཁོང་གིས་ཀ་ལི་ཧྥ་རྗེས་མ་བསྐོ་བའི་དོན་དུ་ཚོགས་ཆུང་ཞིག་བཙུགས་པ་ལ་དེ་དག་གིས་ཨ་ལི་དང་། ཨུཐ་མན་ཞེས་པ་གཉིས་ལས་ཨུཐ་མན་ཀ་ལི་ཧྥ་ལ་འདེམས་བསྐོས་བྱས་པ་དེས་སྔར་ནས་ཡོད་པའི་ཁྱིམ་བརྒྱུད་མི་འདྲ་བ་བར་གྱི་འགལ་ཟླ་དེ་ཇེ་ཆེར་གྱུར། ཨུཐ་མན་གྱིས་མུ་སི་ལིམ་ནང་ཁུལ་གྱི་འགལ་ཟླ་དེ་སེལ་བའི་ཐབས་ཤེས་གང་དྲག་བྱས་ཀྱང་གྲུབ་འབྲས་མ་ཐོབ་པར་ཐ་ན་དེའི་ཁྲོད་དུ་རང་སྲོག་ཀྱང་ཤོར། དེ་ནས་ཨ་ལི་ཀ་ལི་ཧྥར་བཞི་པར་བསྐོས་ཀྱང་མུ་སི་ལིམ་ནང་ཁུལ་དུ་ཟིང་འཁྲུགས་བསྟུད་མར་བྱུང་ནས་ཁོང་མ་ཟད་ཁོང་གི་རྗེས་སུ་ཀ་ལི་ཧྥ་ལ་བསྐོས་པའི་ཁོང་གི་སྲས་ནང་མི་དང་བཅས་པ་རྐྱེན་ལམ་དུ་ཤོར། དེ་དག་ལ་བརྟེན་ནས་མུ་སི་ལིམ་ནང་ཁུལ་ལ་ཨ་ལིའི་ཕྱོགས་གཏོགས་ཤི་ཨ་ཞེས་པའི་རིགས་གཅིག་དང་། དེ་ལས་གཞན་པའི་ཕྱོགས་གཏོགས་སུན་ནི་ཞེས་གྲགས་པ་གཉིས་བྱུང་། ཨ་ལིའི་བརྒྱུད་འཛིན་ཤི་ཨ་རྣམས་ཀྱིས་ཨ་ལི་ནི་མུ་ཧམ་མད་སྐུ་དངོས་ཀྱིས་ཀ་ལི་ཧྥ་ལ་བསྐོས་ཤིང་དེའི་ཁྲི་འཛིན་ནི་རྒྱལ་པོ་དང་གདུང་བརྒྱུད་ཀྱི་ལུགས་སྲོལ་ལྟར་ངེས་པར་དུ་མུ་ཧམ་རང་གི་ཁྱིམ་བརྒྱུད་ཡིན་དགོས་པར་འདོད་ཅིང་། སུན་ནི་རྣམས་ཀྱིས་མུ་ཧམ་མད་སྐུ་ངོ་མས་རྒྱལ་ཚབ་སུ་ཡང་བསྐོས་མེད་ཅིང་རྒྱལ་ཚབ་བསྐོ་བ་ནི་སློབ་མ་རྣམས་ཀྱིས་ཤེས་འཇོན་ལྡན་པ་ཞིག་དམངས་གཙོ་ལྟར་འོས་བླུགས་ནས་བསྐོ་དགོས་པར་འདོད། རྒྱུ་མཚན་དེས་ཀ་ལི་ཧྥའི་ཐོབ་ཐང་དངོས་གནས་སུ་ལ་ཡོད་མེད་ཐད་རྩོད་པ་ཆེ། ལག་ལེན་དངོས་ཀྱི་ཐོག་ནས་སུན་ནིའི་ཕྱོགས་རྒྱལ་བ་ལྟར་གྱུར་ནས་ད་ལྟའི་ཆར་མུ་སི་ལིམ་གྱི་བརྒྱ་ཆ་བརྒྱད་ཅུ་ལྷག་ཙམ་སུན་ནི་ཡིན་ཅིང་། གཞན་ཤི་ཨ་ཉུང་ཟད་ཡོད་པ་ནི་ཨི་རན་དང་ཨི་རཀ་གི་ས་ཁུལ་རྣམས་སུ་ཡོད། དེ་གཉིས་ཀྱི་ཁྱད་པར་གཙོ་བོ་ནི་གོང་དུ་བཤད་པ་ལྟར་ཀ་ལི་ཧྥའི་ཐོབ་ཐང་སུ་ལ་ཡོད་མེད་ཙམ་ལས་གཞན་ཁྱད་པར་ཆེན་པོ་མེད་ཀྱང་། ཆོས་ལུགས་ཀྱི་འགལ་ཟླ་ཕལ་མོ་ཆེ་ཁྱད་པར་བཤད་རྒྱུ་ཡོད་པ་དང་བཤད་ཤེས་མཁན་ཧ་ཅང་དཀོན་ན་ཡང་འགལ་ཟླ་ནི་ཛ་དྲག་ཆེ་བ་བཞིན་འདི་ཡང་དེ་འདྲའི་ཁོངས་སུ་གཏོགས།
མུ་སི་ལིམ་ནང་ཁུལ་དུ་མི་སེར་དམག་འཁྲུག་དེ་འདྲ་ཞིག་བྱུང་བ་ནི་བར་ཆད་ཆེན་པོ་ཡིན་པ་བཤད་མ་དགོས་ཀྱང་། དེས་མུ་སི་ལིམ་ཉམས་ཆག་ཏུ་སོང་བ་ནི་མ་ཡིན་པར་ལོ་རེ་ནས་ལོ་རེ་སྟོབས་ཤུགས་རྒྱས་པར་གྱུར། ལོ་བརྒྱའི་ནང་དུ་ཨ་རབ་ཙམ་མ་ཡིན་པར་ཨ་ཧྥི་རི་ཀ ཡུ་རོབ་ཀྱི་སི་པན། རྒྱ་གར་བྱང་ཕྱོགས་དང་སོག་པོ་དང་རྒྱ་ནག་ཚུན་ཆད་ལ་མུ་སི་ལིམ་གྱི་དམག་ཤུགས་འབྱོར་བ་ལ་ལོ་རྒྱུས་ཐོག་སྔར་གོ་རྒྱུ་ཙམ་ཡང་མེད་པའི་ཨ་རབ་ལུང་པས་འཛམ་གླིང་ཕལ་མོ་ཆེ་གློ་བུར་དུ་དབང་དུ་བསྡུས་ཡོད། ཕྱིས་སུ་སོག་པོས་ཀྱང་དུས་ཐུང་ངུའི་ནང་དུ་ས་ཁྱོན་ཆེན་པོ་དབང་དུ་བསྡུས་ན་ཡང་དེ་དག་ལ་མུ་སི་ལིམ་ལྟར་གཞི་རྒྱ་ཆེ་བའི་དམིགས་ཡུལ་དང་གཞི་རྩ་མེད་པས་ན་འཛམ་གླིང་གི་ལོ་རྒྱུས་ཐོག་མུ་སི་ལིམ་ནང་བཞིན་ཤུགས་རྐྱེན་ཐེབས་ཐུབ་མེད། འོ་ན་མུ་སི་ལིམ་ལ་སྟོབས་ཤུགས་དེ་འདྲ་ཐོབ་པའི་རྒྱུ་རྐྱེན་གང་ཡིན་ནམ་སྙམ་ན། དེ་ནི་གཞན་མ་ཡིན་པར། མུ་སི་ལིམ་གྱི་ཆོས་ལུགས་ལ་བརྟེན་པའི་དཔའ་བོའི་སྙིང་སྟོབས། སྤུན་ཟླའི་དམ་ཚིག དད་མོས་ཀྱི་ཆིག་སྒྲིལ་སོགས་ཀྱི་ནུས་པས་ཡིན་པར་བཤད་མ་དགོས་ཤིང་། མདོར་བསྡུས་ན་དེ་ཡིས་སྤྱི་ཚོགས་ཡར་རྒྱས་འགྲོ་བར་ཡིད་ཆེས། རྨི་ལམ། སྙིང་སྟོབས། ཆིག་སྒྲིལ་ནི་ཧ་ཅང་གལ་ཆེན་ཡིན་པ་གསལ་པོར་བསྟན་ཡོད། མུ་སི་ལིམ་ཆོས་ལུགས་ཀྱི་ལྟ་བའི་སྙིང་པོ་ནི་ཀུན་ལ་ཁྱབ་པ་དང་སྙིང་རྗེའི་བདག་ཉིད་ཅན་གྱི་ལྷ་གཅིག་ལས་མེད་པ་དེ་ཡིན་པས། གོང་དུ་ལྷ་གཅིག་ལས་མེད་པས་འོག་ཏུ་མི་ཡི་རིགས་ཀྱང་འདྲ་མཉམ་དང་གཅིག་གྱུར་དགོས་པའི་ལྟ་གྲུབ་ཀྱི་སྲོག་ཤིང་བརྟན་པོར་ཚུགས་ཡོད། མུ་ཧམ་མད་ཁོང་གིས་མི་རིགས་དང་ཁ་དོག་གི་དབྱེ་བ་མེད་པར་མུ་སི་ལིམ་ཚང་མ་འདྲ་མཉམ་ཡིན་པ་གསལ་པོར་གསུངས་པས་ལོ་མང་པོའི་རིང་ཕན་ཚུན་དབྱེ་འབྱེད་དང་ཕྱོགས་ཞེན་གྱིས་ཁ་འཐོར་གྱུར་པའི་ཨ་རབ་ལུང་པ་ལ་མུ་སི་ལིམ་གྱི་ཆོས་ལུགས་ལ་བརྟེན་ནས་ལོ་རྒྱུས་ཐོག་གི་གཅིག་གྱུར་ཐེངས་དང་པོ་བྱུང་ཞིང་དེ་ལ་བརྟེན་ནས་འཛམ་གླིང་ཧྲིལ་པོ་ལ་ཡང་ནམ་ཡང་ཕྱིར་ལྡོག་མེད་པའི་རང་བཞིན་དུ་འགྱུར་བ་ཐེབས། སྐབས་དེ་དུས་རྗེའུ་ཤིའི་ཆོས་ལུགས་ནི་རྙིང་རུལ་ཡིན་པ་དང་། ཡེ་ཤུའི་ཆོས་ལུགས་ནི་ལྟ་གྲུབ་དང་གནད་དོན་ཆུང་ཙག་རེའི་དོན་དུ་ཡང་མི་མང་པོ་དམར་གསོད་གཏོང་བ་སོགས་ཀྱིས་མུན་ནག་གི་འཇིག་རྟེན་སྐྱི་གཡའ་བ་ཞིག་ཏུ་གྱུར་ཡོད་ཅིང་། རྒྱ་གར་ལ་ཡང་བྲམ་ཟེ་དང་གྲངས་ཅན། ནང་པ་དང་གཅེར་བུ་པ་སོགས་ཆོས་ལུགས་འདྲ་མིན་སྣ་ཁ་བཅོ་བརྒྱད་དར་བ་དེས་སྤྱི་ཚོགས་ལ་ཆིག་སྒྲིལ་མེད་པར་འཕོ་འགྱུར་གྱི་རྦ་རླབས་ཅི་ཡང་སྟོན་བཞིན་པས་ན་སུས་ཀྱང་མུ་སི་ལིམ་སྤྱི་ཚོགས་གསར་པའི་དོ་ཟླ་བྱ་ཐབས་བྲལ།
ཆོས་ལུགས་གཞན་དང་མི་འདྲ་བར་མུ་སི་ལིམ་རྣམས་ཀྱིས་རང་གི་ཆོས་ལུགས་སྤེལ་བའི་དོན་དུ་དམག་འཐབས་བྱས་ཡོད་ཀྱང་། དེས་གནོད་སྐྱོན་ཆེན་པོ་བཏང་བ་མ་ཡིན་པ་ནི་ནུབ་ཕྱོགས་ཀྱི་མཚན་ཉིད་རིག་པའི་མཁས་པ་ཆེན་པོ་རྦེར་ཊེན་ཌི་ར་སེལ་གྱིས། “ཁོ་ཚོས་བཙན་པོའི་རྒྱལ་ཁམས་དེ་འཁྲུག་པ་ངར་པོ་རྒྱག་མ་དགོས་པར་ཐོབ་པ་དེས་གཏོར་སྐྱོན་ཧ་ཅང་ཆུང་བ་དང་། མི་སེར་གྱི་འཛིན་སྐྱོང་རྣམས་ཕལ་ཆེར་འགྱུར་བཅོས་རྩ་བ་ནས་མ་བཏང་བར་རང་འཇགས་བཞག་”ཡོད་ཅེས་གསུངས། མ་ཟད་ཁོ་ཚོས་མུ་སི་ལིམ་གྱི་ཆོས་ལུགས་ལ་ཞུགས་པ་ཙམ་གྱིས་འགྲིགས་པས་སྐབས་དེར་རྒྱལ་པོ་དང་རྒྱལ་ཁབ་གཞན་གྱིས་བྱེད་པ་ལྟར་དོན་མེད་འཕྲོགས་བཅོམ་དང་གསོད་རྨས་ཚད་ལས་འདས་པ་སོགས་བྱེད་ཀྱི་མེད་པ་དང་། ཡེ་ཤུས་གཙོ་བོར་གྱུར་པའི་ཆོས་ལུགས་གཞན་གྱི་ཆབ་སྲིད་པ་ཚོས་མི་དམངས་ནས་ཁྲལ་ཕོན་ཆེན་བསྡུ་ཡི་ཡོད་ཀྱང་དེ་ལ་ལྟོས་ན་མུ་སི་ལིམ་གྱིས་ཁྲལ་ཉུང་ཟད་ལས་བསྡུ་ཡི་མེད་པ་དང་། ཆོས་ལུགས་གཞན་དང་མཐུན་འབྲེལ་ཡང་ཆེ་ཤོས་ཡིན་པ་སྟེ། རྗེ་རུ་ས་ལམ་ལ་རྗེའུ་ཤི་དང་མུ་སི་ལིམ་གཉིས་ཀས་མཉམ་དུ་གསོལ་བ་སྨོན་ལམ་འདེབས་ཤིང་། ས་ཆ་འགའ་ཤས་ལ་ལྷ་ཁང་གཅིག་གི་ནང་དུ་གཟའ་པ་སངས་ལ་མུ་སི་ལིམ་ཚོས་སྨོན་ལམ་འདེབས་ཤིང་གཟའ་ཉི་མར་ཡེ་ཤུའི་ཆོས་ལུགས་པ་ཚོས་སྨོན་ལམ་འདེབས་སྲོལ་ཡོད་སྐད། མུ་སི་ལིམ་གྱིས་སྐབས་རེ་ཡེ་ཤུའི་ཆོས་བྱེད་པ་རྣམས་ཀྱི་ལྷ་ཁང་ནང་གི་སྐུ་བརྙན་འདྲ་མིན་གཏོར་བ་ཙམ་ལས་ཡེ་ཤུའི་སྟོན་པ་རང་ནི་ཨ་ལའི་ལུང་སྟོན་པ་པོར་རྩོད་མེད་དུ་བཀུར་སྲོལ་ཡོད། མུ་སི་ལིམ་གྱི་རྒྱལ་ས་སི་རི་ཡ་ཡིན་སྐབས་ཀྱང་དེའི་མངའ་འོག་ཏུ་ཡེ་ཤུ་མང་པོ་ཡོད་པ་མ་ཟད་གཞུང་གི་ལས་བྱེད་པ་གལ་ཆེན་མང་པོ་ཞིག་ཀྱང་ཡེ་ཤུའི་ཆོས་ལུགས་པ་ཡིན་པ་དང་། ད་དུང་བར་སྐབས་ཡེ་ཤུའི་ཆོས་ལུགས་པའི་དབང་ཚད་ཆེ་སྐབས་དེ་དག་གིས་རྗེའུ་ཤིའི་ཆོས་ལུགས་པ་རྣམས་རྗེ་རུ་ས་ལིམ་ལ་འགྲོ་མ་བཅུག་ཀྱང་མུ་སི་ལིམ་ཚོས་བཀག་རྒྱ་དེ་དཀྲོལ་བ་སོགས་ཀྱིས་རྗེའུ་ཤི་རྣམས་ཡེ་ཤུ་ལས་ཀྱང་མུ་ཧམ་མད་ལ་བཟང་འབྲེལ་ཆེ་བ་བྱུང་། མདོར་ན་ད་ལྟའི་ཡེ་ཤུའི་གུ་ཡངས་དང་ཁ་ཆེའི་གུ་དྭོགས་གཉིས་སྐབས་དེ་དུས་ནི་ས་གནམ་གྱི་ཁྱད་པར་གྱིས་གོ་ལྡོག་ཡིན་པར་གྲགས།
བཤད་མ་དགོས་པར་དེ་འདྲའི་གྲུབ་འབྲས་ནི་གཙོ་བོ་ཀ་ལི་ཧྥ་རྣམས་ཀྱི་ཐབས་ལ་མཁས་པའི་དབུ་ཁྲིད་འོག་བྱུང་བ་ལ་ལོ་རྒྱུས་ཐོག་ཨ་རྦུ་རྦ་ཀར་ནས་ཨ་ལི་བར་གྱི་ཀ་ལི་ཧྥ་ལ་ར་ཤི་དུན་ཀ་ལི་ཧྥ་ཞེས་འབོད་ཅིང་། དེ་ནས་མུ་ཨ་ཝི་ཡས་དབུ་བཙུགས་པའི་ཀ་ལི་ཧྥའི་བརྒྱུད་པ་དེ་ལ་ཨུམ་མ་ཡད་ཀ་ལི་ཧྥ་ཞེས་འབོད། དེས་སྤྱི་ལོ་༦༦༡ ནས་༧༥༠ བར་ཏེ་ལོ་བརྒྱ་ཙམ་གྱི་རིང་ཀ་ལི་ཧྥའི་གོ་གནས་བཟུང་ཞིང་མུ་སི་ལིམ་གྱི་ཡུལ་གྲུ་རྣམས་དབང་བསྒྱུར་བྱས། མུ་ཨ་ཝི་ཡ་ཁོང་ཀ་ལི་ཧྥར་གྱུར་པའི་སྐབས་དེར་སི་རི་ཡ་ས་ཁུལ་གྱི་གཞུང་འཛིན་ཡིན་པར་བརྟེན་ཁོང་གི་བརྒྱུད་འཛིན་རྣམས་ཀྱི་སྐབས་རྒྱལ་ས་གཙོ་བོ་ཡང་སི་རི་ཡ་ཡིན། རྒྱལ་ས་དེའི་མིང་དུ་ཌ་མ་སི་ཀུ་སི་ཞེས་འབོད། མུ་ཨ་ཝི་ཡ་ཁོང་དང་ཁོང་གི་བརྒྱུད་པ་རྣམས་ཀྱིས་མངའ་ཐང་རྒྱ་བསྐྱེད་བྱས་པས་སྐབས་དེ་དུས་འཛམ་གླིང་གི་མི་འབོར་རྒྱ་ཆ་ཉེར་དགུ་ཙམ་ཁོང་གི་མངའ་འོག་ཏུ་ཡོད་པར་གྲགས། དེ་ནས་ཨུམ་མ་ཡད་གི་ཁྱིམ་བརྒྱུད་ཡོད་ཚད་དམར་བསད་བཏང་ནས་ཀ་ལི་ཧྥའི་བརྒྱུད་པ་གསར་པ་ཞིག་དབུ་བརྙེས་པ་ལ་ཨབ་རྦ་སིཌ་ཅེས་འབོད། དེ་དག་གིས་རྒྱལ་ས་རྙིང་པ་ཌ་མ་སི་ཀུ་སི་ནས་དེང་སང་གི་ཨི་རཀ་ས་ཁུལ་དུ་སྤོས་ནས་སྤྱི་ལོ་༧༥༠ ནས་སྤྱི་ལོ་༡༢༥༨ བར་དུ་དབང་བསྒྱུར་བྱས། འོན་ཀྱང་ཨ་རྦ་སིཌ་རྣམས་ཀྱིས་ཨུམ་མ་ཡད་གི་ཁྱིམ་བརྒྱུད་རྣམས་ཚར་གཅོད་སྐབས་ཀ་ལི་ཧྥའི་སྲས་གཅིག་ཡུ་རོབ་ཀྱི་སི་པན་དུ་བྲོས་ཤོར་ནས་དེ་ཉིད་སི་པན་དང་། པོར་ཊུ་རྒལ་སོགས་སུ་ཁྱབ་ཡོད་པའི་མུ་སི་ལིམ་རྒྱལ་ཁབ་ཀྱི་དབུ་ཁྲིད་དུ་གྱུར། དེ་ལྟར་ན་ཡང་དེའི་བརྒྱུད་འཛིན་རྣམས་ཀྱིས་རེ་ཞིག་ཨེ་མིར་ཞེས་པ་ལས་ཀ་ལི་ཧྥ་ཞེས་པའི་མཚན་གནས་དེ་ཁུར་མེད། དུས་སྐབས་དེར་མུ་སི་ལིམ་ནང་ཁུལ་ལ་འགལ་ཟླ་ཛ་དྲག་ཅན་འགའ་ཞིག་བྱུང་ཡང་། ཨབ་རྦ་སིཌ་དང་ཨེ་མིར་གྱི་དུས་སྐབས་གཉིས་ནི་མུ་སི་ལིམ་གྱི་ལོ་རྒྱུས་ཐོག་རྫོགས་ལྡན་གྱི་དུས་སྐབས་སུ་ངོས་འཛིན་བྱེད། དེ་ལས་སི་པན་དུ་ཡོད་པའི་རྒྱལ་ས་ལ་ཀོར་ཌོ་རྦ་ཞེས་འབོད་ཅིང་། ཨབ་རྦ་སེ་ཌའི་ཁྱིམ་བརྒྱུད་ཀྱིས་ཨི་རཀ་ཏུ་སྤོས་ཡོད་པའི་རྒྱལ་ས་དེའི་མིང་དུ་བྷག་ཌད་ཅེས་གྲགས། དེ་གཉིས་ལས་སི་པན་དུ་ཡོད་པ་དེས་གཙོ་བོ་ཡུ་རོབ་ས་ཁུལ་གྱི་རིག་གནས་དང་ལོ་རྒྱུས་ལ་ཤུགས་རྐྱེན་ཐེབས་ཤིང་། ཨི་རཀ་ཏུ་ཡོད་པ་དེས་ཤར་ཕྱོགས་ཀྱི་རྒྱལ་ཁབ་རྣམས་དང་འབྲེལ་བ་ཆེ་བ་བྱུང་ནས་ཤར་ནུབ་གཉིས་ཀྱི་འབྲེལ་མཐུད་བྱས་ཏེ། མདོར་ན་གནས་སྐབས་རིང་འཛམ་གླིང་ཕལ་མོ་ཆེ་མུ་སི་ལིམ་གྱིས་དབང་བསྒྱུར་བ་ལྟ་བུར་གྱུར།
དེ་ལ་བྷག་ཌད་ནི་བར་སྐབས་རྒྱ་གར་དང་རྒྱ་ནག རོམ་དང་བྷག་ཌད་བཅས་འཛམ་གླིང་ཐོག་གི་སྟོབས་འབྱོར་ཆེ་ཤོས་ཀྱི་རྒྱལ་ཁབ་བཞིའི་རྒྱལ་ས་ཞེས་བརྩི་སྲོལ་ཡོད་པའི་ནང་གི་གཅིག་ཡིན། རྒྱལ་ས་རང་ལ་མི་འབོར་བྱེ་བ་གཉིས་ཡོད་པར་གྲགས་ཤིང་། སྐབས་དེ་དུས་ཡུ་རོབ་ཀྱི་རྒྱལ་ས་གྲགས་ཆེ་ཤོས་རོམ་ཡིན་པ་ལ་དེ་ལ་ཡང་མི་གྲངས་ཁྲི་གསུམ་ལས་མེད་སྐད། བྷག་ཌད་རྒྱལ་ས་དེ་ནི་མུ་སི་ལིམ་གྱི་རྒྱལ་ཁབ་ཙམ་མ་ཡིན་པར་གྲ་རྒྱས་པོའི་འཚོ་བ་དང་། སྙན་ངག ཡོན་ཏན་སློབ་སྦྱོང་སོགས་ཀྱི་ལྟེ་གནས་ཆེན་པོ་ཞིག་ཡིན་པས་འཛམ་གླིང་གང་ས་ནས་སླེབས་པའི་མཁས་པ་རྣམས་འཛོམས་ས་ཡང་ཡིན་པར་བརྟེན་ཤེས་རབ་ཀྱི་ཕ་ཁྱིམ་དང་རིག་གནས་ཀྱི་ལྟེ་གནས་སུ་ངོས་འཛིན་བྱ་སྲོལ་ཡོད། སྐབས་ཤིག་མཁས་པ་ནང་ཁུལ་ལ་རྣམ་དཔྱོད་དང་འབྲེལ་བའི་རྩོད་པ་དང་བགྲོ་གླེང་མང་དུ་བྱུང་ནས་འཛམ་གླིང་གང་ས་ནས་རིག་གནས་ཀྱི་དཔེ་དེབ་རྙིང་པ་ཅི་ཐོབ་བྱེད་པའི་ལས་འགུལ་ཞིག་ཀྱང་སྤེལ་བ་ལ་དེ་ནི་ལོ་རྒྱུས་ཐོག་རྒྱལ་སྤྱི་རང་བཞིན་གྱི་ཚན་རིག་གི་ལས་འཆར་དེ་ལྟ་བུ་ཆེས་ཐོག་མ་དེ་ཡིན་པར་གྲགས། བྷག་ཌད་གི་མངའ་ཐང་ཆེ་ཤོས་ནི་ཨ་རབ་ཀྱི་རྒྱལ་པོ་ཆེས་སྙན་གྲགས་ལྡན་པ་ཧ་རུན་ཨལ་ར་ཤིཌ་སྐབས་སུ་ཡིན་ཅིང་། ཁོང་ནི་རྣམ་དཔྱོད་དང་། ཆབ་སྲིད་སོགས་གང་ཐད་ནས་ཕུན་སུམ་ཚོགས་པའི་མི་ཞིག་ཡིན་པར་བརྟེན། ཁོང་དང་འབྲེལ་བའི་སྒྲུང་དང་ལོ་རྒྱུས་སྣ་ཚོགས་པ་ཡོད་པས། ཨ་རབ་ཀྱི་རྩོམ་རིག་སྐོར་ཤེས་མཁན་ཚོས་རྒྱལ་པོ་ཁོང་གི་སྐོར་མི་ཤེས་པ་མི་སྲིད་པ་ལྟ་བུའི་སྙན་གྲགས་ཡོད། ཁོང་གྲོངས་ནས་རིང་པོ་མ་ལོན་པར་ཨ་རབ་ནང་ཁུལ་ལ་ཟིང་འཁྲུགས་བསྟུད་མར་ལངས་ནས་སྐབས་ཤིག་ལ་མུ་སི་ལིམ་གྱི་དབུ་ཁྲིད་ཀ་ལི་ཧྥ་ལ་བྷག་ཌད་གི་གྲོང་ཁྱེར་ཙམ་ལས་གཞན་ལ་འགན་དབང་མེད་པར་གྱུར་ཅིང་། ཐ་ན་ཀ་ལི་ཧྥ་གཅིག་ནི་རང་གི་དམག་མིས་དྲུད་ནས་དམར་གསོད་བྱས་པ་སོགས་ཀྱང་བྱུང་།
གཅིག་ཤོས་ཡུ་རོབ་ཏུ་སི་པན་གཙོ་བོར་གྱུར་པ་ལ་མུ་སི་ལིམ་གྱིས་ལོ་བདུན་བརྒྱའི་རིང་དབང་བསྒྱུར་བྱས་པ་ལ། ལོ་རྒྱུས་སྨྲ་བ་གྲགས་ཅན་ཞིག་གིས་དུས་སྐབས་དེར་ཡུ་རོབ་ལུང་པ་ཧྲིལ་པོ་མུན་ནག་དང་ཀླ་ཀློའི་འཇིག་རྟེན་ཞིག་ཡིན་པ་ལ་ཀོར་ཌོ་རྦ་གཅིག་པུ་ལ་སློབ་གསོ་དང་རིག་གནས་ཀྱི་སྒྲོན་མེ་ཡོད་ཅེས་གསུངས་ཡོད། བདེན་པ་ཡང་ཡིན་ཏེ་ཡེ་ཤུའི་ཆོས་ལུགས་དར་སའི་ཡུ་རོབ་ཀྱི་ས་ཁུལ་རྣམས་སུ་ཡི་གེ་འབྲི་ཀློག་ཤེས་མཁན་ནི་བླ་མ་དང་དཔོན་པོའི་རིགས་མཐོ་བ་འགའ་ཤས་ལས་ཐ་ན་ལས་བྱེད་པ་རྣམས་ཀྱང་ཡིག་རྨོངས་ཡིན་ན་ཡང་། སི་པན་ལུང་པར་ཡི་གེ་འབྲི་ཀློག་མི་ཤེས་མཁན་ནི་ཕལ་ཆེར་མེད་སྐད། དེའི་རྒྱུ་མཚན་གྱིས་ཡེ་ཤུའི་དགོན་པ་ཆེ་བ་རྣམས་སུ་ཡང་དེབ་བཅུ་ཕྲག་ཙམ་ལས་མེད་པ་ལ་ཀོར་ཌོ་རྦའི་དཔེ་མཛོད་ཁང་གཙོ་བོ་དེར་དཔེ་དེབ་འབུམ་བཞི་ལྔ་ཙམ་ཡོད་པར་གྲགས་ཤིང་། དཔེ་མཛོད་ཁང་དེའི་མགོ་ལ་ལྟ་མཁན་ལུབ་ན་ཟེར་བའི་མུ་སི་ལིམ་བུད་མེད་དེ་ནི་རིག་པའི་གནས་མང་པོར་མཁས་པའི་བུད་མེད་སྙན་གྲགས་ཅན་ཞིག་རེད། ལུང་པ་དེར་གྲགས་ཅན་གྱི་མཐོ་རིམ་སློབ་གྲྭ་མང་དུ་ཡོད་པ་ལས་མི་དམངས་སྐྱོ་བོའི་ཕྲུ་གུ་ཚོའི་ཆེད་དུ་རིན་མེད་ཀྱི་གཞི་རིམ་སློབ་གྲྭ་ཡང་ཡོད། ཤེས་ཡོན་ཙམ་མ་ཡིན་པར་སྟོབས་འབྱོར་གཉིས་ཀ་ཆེ་བས་རྒྱལ་ས་རང་ལ་སྡོད་མཁན་གྱི་མི་ས་ཡ་ཙམ་ཡོད་པ་དང་། མི་དམངས་ཀྱིས་གཟུགས་པོ་འཁྲུ་ས་ཁོ་ན་ཡང་བདུན་བརྒྱ་ཙམ་ཡོད་པར་གྲགས་ཤིང་། མུ་སི་ལིམ་གྱི་མཁས་པ་རྣམས་ཀྱིས་གཙང་སྦྲ་བྱེད་སྟངས་སྐོར་གྱི་བསྟན་བཅོས་ཀྱང་མཛད་ཡོད། དེ་ལ་ལྟོས་ན་ཡེ་ཤུའི་ཆོས་ལུགས་པ་རྣམས་ཀྱིས་ནི་ཡི་གེ་འབྲི་ཀློག་དང་གཟུགས་པོ་འཁྲུ་བ་གཉིས་ཀ་ལ་བཀག་འགོག་ནན་པོ་བྱེད་ཀྱི་ཡོད་པས་སྐབས་དེར་ཡུ་རོབ་ཀྱི་ལུང་པ་མང་པོར་གཟུགས་པོ་འཁྲུ་བ་ནི་ཁྲིམས་འགལ་ཡིན་སྐད། ད་དུང་མུ་སི་ལིམ་གྱི་གྲོང་ཁྱེར་རྣམས་སུ་མཚན་མོ་སྲང་ལམ་དུ་སྒྲོན་མེས་འོད་ཆིམ་མེ་ཡོད་ཅིང་། གཅིག་ཤོས་ཡེ་ཤུའི་ཆོས་ལུགས་དར་སའི་གྲོང་ཁྱེར་རྣམས་སུ་མཚན་མོ་སྲང་ལམ་དུ་ནག་དོང་ངེ་ཡོད་པས་དེས་ནི་ཕྱི་རོལ་ལ་འོད་ཡོད་མེད་མཚོན་པ་ཙམ་མ་ཡིན་པར་ནང་དུ་རིག་གནས་ཀྱི་དཔལ་ཡོན་ཡོད་མེད་ཀྱི་ཁྱད་པར་ཡང་མཚོན་པ་ཡིན།
དེ་ནས་དུས་རབས་བཅུ་པ་ཙམ་དུ་མུ་སི་ལིམ་ལོ་རྒྱུས་ཐོག་གི་རྫོགས་ལྡན་དེ་རྩོད་ལྡན་དུ་འགྱུར་མགོ་ཚུགས་ནས་རིམ་པས་ཉམས་ཆག་བྱུང་བ་ལ། མཁས་པ་རྣམས་ཀྱིས་མུ་སི་ལིམ་ཐོག་མར་དར་བ་དེ་ནང་ཁུལ་གྱི་ཆིག་སྒྲིལ་ཡོད་པ་ལ་བརྟེན་ནས་ཡིན་པ་བཞིན། མཐར་ཉམས་ཆག་ཕྱིན་པ་ཡང་ཕྱི་རོལ་གྱི་དགྲ་ཡི་དབང་གིས་མ་ཡིན་པར་ནང་ཁུལ་གྱི་ཆིག་སྒྲིལ་མེད་པ་ལ་བརྟེན་ནས་ཡིན་པར་གསུངས། ཆིག་སྒྲིལ་མེད་པའི་གནད་དོན་ལ་བརྟེན་ནས་བྷག་ཌད་ལ་ཡོད་པའི་ཀ་ལི་ཧྥའི་ནུས་ཤུགས་ཇེ་ཆུང་དུ་སོང་ནས་སྤྱི་ལོ་༩༠༩ ལོར་བྱང་ཨ་ཧྥི་རི་ཀར་རང་བཙན་ཅན་གྱི་ཀ་ལི་ཧྥའི་བརྒྱུད་པ་གཅིག་བྱུང་ཞིང་། སྤྱི་ལོ་༩༢༩ ལོར་སི་པན་ནས་སྔར་ཨེ་མིར་ཞེས་པའི་གོ་གནས་བཟུང་བའི་རྒྱལ་པོ་ཚོས་ཀྱང་ད་ཆ་ཀ་ལི་ཧྥའི་མཚན་གནས་བཟུང་བ་སོགས་ཀྱིས་མུ་སི་ལིམ་གྱི་ཆོས་སྲིད་ཀྱི་དབང་ཚད་རྣམས་དུམ་བུར་འཐོར་ཞིང་། ཡུལ་གྲུ་མང་པོ་མགོ་འོག་ལུས་ཆུད་མེད་པར་གྱུར་ཏེ་རང་བཙན་ཅན་གྱི་རྒྱལ་ཁབ་ཏུ་གྱུར་ནས། སྤྱི་ཡོངས་ནས་བཤད་ན་མུ་སི་ལིམ་གྱི་སྟོབས་ཤུགས་ལ་ཉམས་རྒུད་ཆེན་པོ་ཐེབས་ཡོད། གཉན་འཕྲང་ཅན་གྱི་དུས་སྐབས་དེར་ང་ཚོས་ཏུ་རུཀ་ཥར་འབོད་པའམ་ཡོངས་གྲགས་སུ་ཊུར་ཀི་ཞེས་འབོད་པའི་ནུབ་ཨེ་ཤ་ཡའི་མི་རིགས་རྣམས་མུ་སི་ལིམ་གྱི་ཆོས་ལུགས་ལ་ཞུགས་ཏེ་དེ་དག་གིས་ཨ་རབ་ཀྱི་རྒྱལ་ཁབ་ཁག་ཙམ་མ་ཡིན་པར་ཡུ་རོབ་ཀྱི་རྒྱལ་ས་ཡང་དབང་དུ་བསྡུས་ནས། མུ་སི་ལིམ་གྱི་སྟོབས་ཤུགས་ཉམས་རྒུད་ཕྱིན་ནས་མེད་པར་རེ་བའི་ཡུ་རོབ་ཀྱི་ལུང་པ་རྣམས་ཧོན་འཐོར་བར་བྱས་པའི་ཚུལ་ནི་དོན་ཚན་གསུམ་པའི་ནང་དུ་བཤད་པར་འདོད། །