འབྲུག་པ་ཀུན་ལེགས་
འབྲུག་པ་ཀུན་ལེགས།་（1455—1520） ཁོང་ནི་རབ་བྱུང་དགུ་བའི་ནང་དུ་བྱོན་ཞིང་འབྲུག་པ་བཀའ་བརྒྱུད་པའི་བྱ་བྲལ་བའི་རྣལ་འབྱོར་བ་ཆེན་པོ་ཞིག་ཡིན། སྐུ་ན་ཆུང་ངུའི་དུས་སུ་རྐྱེན་སྣ་ཚོགས་ཀྱི་དབང་གིས་གནས་ངེས་མེད་དུ་འགྲིམ་དགོས་བྱུང་། གཞོན་ནུའི་དུས་སུ་རབ་ཏུ་བྱུང་སྟེ་ཕྱོགས་སོ་སོར་ཕེབས་ནས་སྒྲུབ་པ་ཉམས་ལེན་མཐའ་འཁྱོལ་བར་བྱས་ཤིང་རྟོགས་པ་མཐོན་པོར་སོན། ཕྱིས་སུ་ཁྱིམ་ཐབས་བྱས་ཀྱང་གནས་ངེས་མེད་འགྲིམ་ནས་ཆོས་དང་ཆོས་མིན་གྱིས་བྱ་ངན་ལ་ཐེར་འདོན་དང་། དྲང་བདེན་མ་ཡིན་པའི་འཇིག་རྟེན་གྱི་སྤྱོད་ངན་དག་སོགས་ལ་དགག་རྒྱག་མཛད་དེ་སངས་རྒྱས་ཀྱི་བསྟན་པ་སྤྱི་དང་བོད་མི་རིགས་ལ་བཀའ་དྲིན་བླ་ལྷག་ཏུ་ཆེའོ། །
ཁྱེད་བླ་མ་རྣམས་ཀྱི་ཆོས་ལུགས་འདི།།
ཟབ་མོ་གཞན་ལ་འཆད་འཆད་ནས།།
རང་ལ་མེད་པ་ངོ་མཚར་ཆེ།།
མེད་བསམ་མེད་པའི་ཧམ་པ་ལ།།
ཁྱེད་གྲྭ་བ་རྣམ་པའི་མོས་གུས་དེ།།
མིག་བཙུམ་ཐལ་མོ་སྦྱོར་སྦྱོར་ནས།།
སེམས་ལ་མེད་པ་ངོ་མཚར་ཆེ།།
བླ་མ་མགོ་བོ་བསྐོར་བའི་ཧམ་པ་ལ།།
ཁྱེད་སྔགས་པ་རྣམས་ཀྱི་བསྲུང་མ་དེ།།
དགྲ་དང་བགེགས་ལ་རྦད་རྦད་ནས།།
ཐུགས་སྒྲུབ་པ་མེད་པ་ངོ་མཚར་ཆེ།།
བསྲུང་མ་དགྲ་ལ་ངོམ་པའི་ཧམ་པ་ལ།།
ཁྱེད་དགེ་བཤེས་རྣམ་པའི་ལྷ་ཆོས་དེ།།
རིག་པ་གཞན་ལ་གཏོང་གཏོང་ནས།།
སེམས་གཞག་ས་མེད་པ་ངོ་མཚར་ཆེ།།
འགྲོ་མཚམས་གཟིགས་པའི་ཧམ་པ་ལ།།
ཁྱེད་རྟོགས་ལྡན་རྣམ་པའི་སྤྱོད་པ་འདི།།
གཞན་གྱི་ཞེན་པ་གསོག་གསོག་ནས།།
རང་བཟོད་པ་མེད་པ་ངོ་མཚར་ཆེ།།
ཧེ་རུ་ཀར་སྒོམ་པའི་ཧམ་པ་ལ།།
ཁྱེད་སྒོམ་ཆེན་རྣམས་ཀྱི་སྒྲུབ་ཚུལ་འདི།།
ལྐོག་ཟ་ཉལ་སྐྱིད་མཛད་མཛད་ནས།།
མཉམ་གཞག་མེད་པ་ངོ་མཚར་ཆེ།།
གྲུབ་རྟགས་སྟོན་པའི་ཧམ་པ་ལ།།
ཁྱེད་ཉེ་གནས་རྣམས་ཀྱི་ནོར་རྫས་དེ།།
བླ་མའི་མཛོད་ལ་སྤྱོད་སྤྱོད་ནས།།
ཡི་དྭགས་སྒྲུབ་པ་ངོ་མཚར་ཆེ།།
བླ་མས་ཐུགས་རྗེས་འཛིན་བསམ་ཧམ་པ་ལ།།
ཁྱེད་དཔོན་པོ་རྣམ་པའི་ཁྲིམས་ལུགས་དེ།།
གཞན་ལ་སྤྱོད་པའི་སྙིང་ཁམས་ལ།།
རང་ལ་མེད་པ་ངོ་མཚར་ཆེ།།
ཡོད་དོ་སྙམ་པའི་ཧམ་པ་ལ།།
ཁྱེད་སྦྱིན་བདག་རྣམ་པའི་སྦྱིན་པ་འདི།།
ལན་ལ་རེ་བའི་ཡུས་ལུགས་ལ།།
མི་ལ་སྟེར་བ་ངོ་མཚར་ཆེ།།
སངས་རྒྱས་ཐོབ་བསམ་ཧམ་པ་ལ།།
མཆོད་གཞིས་འཛིན་པའི་དཔོན་པོ་ཚོ།།
སྡོམ་པ་དམ་ཚིག་གཅིག་ཀྱང་མེད།།
ཆོས་པ་ཡིན་བསམ་ངོ་མཚར་ཆེ།།
ཆོས་གཟུགས་འཛིན་པའི་ཧམ་པ་ལ།།
ང་རྣལ་འབྱོར་ཀུན་ལེགས་རྒྱལ་ཁམས་བསྐོར།།
ཡུལ་ཕ་ཡུལ་སྤོངས་པས་ཅི་ཡོང་བ།།
ཞེན་པ་མ་ཐོངས་ངོ་མཚར་ཆེ།།
བྱ་བཏང་ཟེར་བའི་ཧམ་པ་ལ།།
丨འབྲུག་པ་ཀུན་ལེགས།