འབྲི་རུ་རྫོང་།

འབྲི་རུ་རྫོང་ (དབྱིན་ཡིག: Driru County / Biru County) ནི་བོད་རང་སྐྱོང་ལྗོངས་ནག་ཆུ་གྲོང་ཁྱེར་གྱི་ཤར་ཕྱོགས་སུ་ཆགས་པའི་རྫོང་ཞིག་ཡིན། ལོ་རྒྱུས་ཐོག་མདོ་དབུས་ཁམས་གསུམ་ལས་མདོ་སྟོད་མི་ཡི་ཆོལ་ཁ་དང་། མདོ་ཁམས་ཤོད་ཆེན་བཅོ་བརྒྱད་ཀྱི་ནང་ཚན་ནགས་ཤོད་དང་རྒྱ་ཤོད་ཀྱི་ས་ཁུལ་དུ་གཏོགས། རྫོང་འདི་ནི་བོད་ཀྱི་རིག་གནས་དང་། ལོ་རྒྱུས། ཆོས་ལུགས་གྲུབ་མཐའ་སྣ་མང་འདུས་པའི་གནས་གལ་ཆེན་ཞིག་ཡིན་ལ། སྔར་གྱི་ལོ་རྒྱུས་ཡིག་ཚགས་ནང་ "ནགས་ཤོད་ཚོ་དགུ" ཞེས་ཡོངས་སུ་གྲགས།

མིང་གི་འབྱུང་ཁུངས།

འབྲི་རུ་ཞེས་པའི་མིང་ཐོགས་ཚུལ་ལ་བཤད་རྒྱུན་གཙོ་བོ་གཉིས་ཡོད། ནགས་རའི་ལྗོངས།: གནའ་སྔ་མོ་ཡུལ་འདིར་ནགས་ཚལ་སྟུག་པོ་ཡོད་པས་ "ནགས་ར་ལྤགས་ཐང" ཞེས་བཏགས་པ་ལས་ཕྱིས་སུ་འབྲི་རུ་ཞེས་འགྱུར་བར་བཤད། འབྲི་མོའི་གཏམ་རྒྱུད།: སྔར་འབྲི་ (གཡག་གི་མོ་རིགས) ཞིག་གི་རྭ་ཅོ་ལས་སྒོ་ང་གསུམ་བྱུང་བ་དེ། ཉི་མའི་དྲོད་ཀྱིས་བཀའ་བཞད་པ་ལས་རིམ་བཞིན་ "ཆུང་རྒྱུད་" དང་། "ཉི་མ་"། "ལུང་རྒྱུད་" བཅས་ཀྱི་ཤོག་ཁ་བྱུང་བས་ "འབྲི་རུ་" (འབྲི་ཡི་རྭ་ཅོ་) ཞེས་ཐོགས་པར་གྲགས།

Map

ས་ཁམས་ཆགས་ཚུལ་དང་སྣོད་བཅུད།

ས་བབ།

འབྲི་རུ་རྫོང་ནི་གདང་ལ་རི་རྒྱུད་ནུབ་ནས་ཤར་དུ་ནར་བའི་ལྷོ་ཕྱོགས་དང་། གཉན་ཆེན་ཐང་ལྷ་རི་རྒྱུད་ནུབ་ནས་ཤར་དུ་བརྐྱང་བའི་བྱང་ཕྱོགས་སུ་ཆགས་ཡོད། མདོ་ཁམས་ཆུ་བཞིའི་ཡ་གྱལ་རྒྱལ་མོ་རྔུལ་ཆུ་ (དངུལ་ཆུ་ཁམས་པ) ནུབ་ནས་ཤར་དུ་རྒྱུག་པའི་གཞུང་དུ་གནས་ཤིང་། ས་བབ་ཀྱི་ཆ་ནས་ནུབ་དང་ནུབ་བྱང་མཐོ་ལ། ཤར་དང་ཤར་ལྷོ་དམའ་བ་ཡོད། རྒྱ་མཚོའི་ངོས་ནས་ཆ་སྙོམས་མཐོ་ཚད་སྨི་ ༤༠༠༠ (4000m) ཡོད།

གནམ་གཤིས་དང་ཐོན་ཁུངས།

གནམ་གཤིས།: ལོ་རེའི་ཆར་ཆུ་འབབ་ཚད་ཧའོ་སྨི་ ༥༨༠ ནས་ ༦༥༠ བར་ཡིན། དབྱར་ཁར་ཚ་བ་ཆུང་ཞིང་ཉི་འོད་ཕོག་ཡུན་རིང་བ་དང་། མཁའ་དབུགས་གཙང་། སྨན་རྫས།: རི་སྐྱེས་སྔོ་སྨན་གྱི་རིགས་སྣ་ ༣༠༠ ལྷག་ཡོད་པས་ "ནགས་ཤོད་སྦས་ཡུལ་སྨན་ལྗོངས་" ཞེས་གྲགས། དེའི་ནང་དབྱར་རྩྭ་དགུན་འབུ་དང་། གཡའ་ཀྱི་མ། གངས་ལྷ་མེ་ཏོག་སོགས་ཚུད་ཡོད། རི་དྭགས།: གནའ་བ། ཤྭ་བ། གླ་བ། དྲེད་མོང་། གཟིག་སོགས་རི་སྐྱེས་སྲོག་ཆགས་མང་པོ་གནས་ཡོད།

ལོ་རྒྱུས་ཀྱི་འཕེལ་རིམ།

འབྲི་རུ་རྫོང་གི་ལོ་རྒྱུས་ནི་བོད་ཀྱི་ལོ་རྒྱུས་སྤྱི་དང་འབྲེལ་བ་དམ་ཟབ་ཡོད། གནའ་བོའི་དུས།: གནའ་སྔ་མོ་ཡུལ་འདིར་ སུམ་པ་འབྲི་ཡི་རྒྱལ་པོས་དབང་བསྒྱུར་མྱོང་བ་དང་། སུམ་པའི་ཡུལ་གྱི་ལྟེ་བ་ནི་ད་ལྟའི་འབྲི་རུ་རྫོང་གཡང་ཤོད་ཤང་གི་རྒྱལ་ཆུའི་རྒྱུད་དུ་ཡིན་པར་བཤད། བཙན་པོའི་དུས།: བོད་བཙན་པོའི་དུས་སྐབས་སུ་རུ་ཆེན་ལྔ་པ་སུམ་པའི་རུ་ཡི་ཁོངས་སུ་གཏོགས་ཤིང་། "ནགས་ཤོད་སྟོང་བུ་ཆུང་" ཞེས་པའི་དམག་གི་ལྟེ་བ་དེ་ནགས་ར་ལྤགས་ཐང་ (ད་ལྟའི་འབྲི་རུ་རྫོང་ཆགས་ས་) དུ་བཙུགས་ཡོད། སོག་དུས།: དུས་རབས་ ༡༣ པའི་ནང་སོག་པོ་ཧོར་གྱི་རྒྱལ་པོའི་མངའ་ཁོངས་སུ་གྱུར་པས་ "ཧོར་སྡེ་" ཞེས་ཐོགས། རྒྱ་དུས།: མན་ཇུ་གོང་མའི་སྐབས་སུ་ཧོར་ཚོ་སོ་དགུ་འདི་ཟི་ཁྲོན་ཞིང་ཆེན་གྱི་ཁོངས་སུ་བཅུག་པ་དང་། ས་གནས་ཀྱི་འགོ་དཔོན་རྣམས་ལ་ "ཆེའུ་ཧུ" དང་ "སྦེ་ཧུ" སོགས་ཀྱི་གོ་གནས་སྤྲད། བོད་དུས།: ༡༩༡༦ ལོར་བོད་གཞུང་གིས་ "ཧོར་སྤྱི་ཁྱབ་" བཙུགས་ནས་ནགས་ཤོད་ཚོ་དགུ་བོད་གཞུང་གི་ཐད་ཀའི་འཛིན་སྐྱོང་འོག་ཏུ་བསྡུས། ༡༩༡༧ ལོར་སྔར་གྱི་ "སྦེ་ཧུ" རྣམས་ "རྫོང" (དཔོན) དང་། "སྦེ་ཅང" རྣམས་ "ལྡིང་དཔོན" དུ་མིང་བསྒྱུར་བྱས།

སྤྱི་ཚོགས་སྒྲིག་གཞི། (ནགས་ཤོད་ཚོ་དགུ)

འབྲི་རུ་རྫོང་གི་སྔར་གྱི་སྤྱི་ཚོགས་སྒྲིག་གཞི་གཙོ་བོ་ནི་ ནགས་ཤོད་ཚོ་དགུ་ (Naksho Tsho Gu) ལས་གྲུབ་པ་སྟེ།

ཚོ་པའི་མིང་།	འགོ་དཔོན་གྱི་མིང་།	མཆན་འགྲེལ།
འབྲི་རུ་ཚོ་པ།	དཔོན། (སྦེ་ཧུ)	རུས་རྒྱུད་ "ཅང་རྒྱུད" ཡིན། ཤོག་ཁ་བཞི་རུ་དབྱེ་ཡོད།
སྟག་ཕྲུག་ཚོ་པ།	ཆེའུ་ཧུ།	སྔར་གོང་མ་ཆེན་པོས་ "ཆེའུ་ཧུ" གོ་གནས་སྤྲད་པས་མཐོ་ཤོས་གྲས་ཡིན།
བོམ་ཕན་ཚོ་པ།	དཔོན།	སྔོན་དུས་ "ནགས་ཆུ་མ་གཞུང་" ཟེར།
ཁྲ་རིང་ཚོ་པ།	དཔོན།	ཐོག་མར་སྨུག་པོ་གདོང་གི་རྒྱུད་པ་ལས་མཆེད།
འགོམ་ཚོ་པ།	དཔོན།	འགོམ་སྡེ་ལིང་དྲུག་ཏུ་དབྱེ་ཡོད།
རཀྴི་ཚོ་པ།	དཔོན།	ཕྱིས་སུ་ "ནགས་རྗེ་དཔོན" གྱིས་དབང་བསྒྱུར་བྱས།
ན་རོག་ཚོ་པ།	སྒེར་ཐོབ་སྦེ་ཅང་།	སྐབས་རེ་བུད་མེད་ཀྱིས་དཔོན་པོ་བྱས་མྱོང་།
བུ་རྫུམ་ཚོ་པ།	སྒེར་ཐོབ་སྦེ་ཅང་།	མི་སྡེ་ལ་ "མཐའ་ལྔ་དབུས་བཅུ" ཞེས་གྲགས།
སེན་ཚ་ཚོ་པ།	སྒེར་ཐོབ་སྦེ་ཅང་།	ཨར་ཀེ་དང་ཡོན་ཚ་སོགས་རུས་རྒྱུད་དྲུག་ལས་མཆེད།

ཆོས་ལུགས་དང་དགོན་སྡེ།

འབྲི་རུ་རྫོང་ནི་གྲུབ་མཐའ་རིས་མེད་ཀྱི་དགོན་སྡེ་མང་པོ་ཡོད་པའི་ས་ཁུལ་ཞིག་ཡིན་ལ། རྫོང་ཁོངས་སུ་དགོན་པ་ཁག་ ༢༥ ཡོད། དེའི་ནང་དགེ་ལུགས་པ་ ༡༢ དང་། བོན་པོ་ ༧། བཀའ་བརྒྱུད་ ༣། རྙིང་མ་ ༣ བཅས་ཡོད། བོན་པོ།: གསའ་མདའ་དགོན། སེན་ཚ་དགོན། དགའ་རི་དགོན། ཀླུ་མཁར་དགོན། དངུལ་ཁོ་དགོན། རྡོ་རྟེང་དགོན། (སེར་བཀྲ་དགོན་ཡང་བོན་གྱི་དགོན་པར་བརྩི་སྲོལ་འདུག) རྙིང་མ།: ཆགས་རི་དགོན། རྒོད་ལུང་དགོན། སེར་བཀྲ་ཤིས་དགོན། བཀའ་བརྒྱུད།: འགོམ་དགོན། ཝ་ཐང་དགོན། གླང་དེལ་དགོན། (འདི་དག་གཙོ་བོ་འབྲི་གུང་བཀའ་བརྒྱུད་དང་འབྲོང་ངུར་བཀའ་བརྒྱུད་ཀྱི་ཆོས་རྒྱུད་ཡིན།) དགེ་ལུགས།: ཤུག་ལྡིང་དགོན། གཡག་འཁྲབ་དགོན། ཆོས་སྡེ་དགོན། འབྲི་རུ་དགོན། ཆོས་གླིང་དགོན། སྒྲུབ་སྡེ་དགོན། འབྲོང་སྣ་དགོན། རྭ་ཁྱིམ་དགོན། རབ་བརྟན་དགོན། ལྟ་སྨོན་དགོན། བན་སྒར་དགོན། བྱ་སྣ་དགོན།

མི་སྣ་གྲགས་ཅན།

• འབྲི་རུ་ཞབས་དྲུང་།
• རིག་འཛིན་ཉི་མ་གྲགས་པ།
• སྟག་ཕུ་རྡོ་རྗེ་འཆང་། (སྐུ་ཕྲེང་བརྒྱད་པ་པདྨ་བཛྲ)བཅས་ནི་ནགས་ཤོད་བསྟན་པའི་སྒྲོན་མེ་རྣམ་གསུམ་ཞེས་གྲགས།

རིག་གནས་དང་ཡུལ་སྲོལ།

ས་གནས་འདིར་ཐུན་མོང་མ་ཡིན་པའི་རིག་གནས་སྒྱུ་རྩལ་དང་ཡུལ་སྲོལ་གོམས་གཤིས་དར་ཁྱབ་ཆེན་པོ་ཡོད། སྟེང་དཀར་རས་པ།: སྟེང་དཀར་གྲོང་ཚོ་ནས་དར་བའི་དམངས་ཁྲོད་ཀྱི་རས་པའི་བྲོ་གར་ཞིག་སྟེ། མི་ལོ་སྟོང་ཙམ་གྱི་ལོ་རྒྱུས་ལྡན། འདིའི་ནང་རྗེ་བཙུན་མི་ལ་རས་པའི་རྣམ་ཐར་སོགས་འཁྲབ་སྟོན་བྱེད་ཀྱི་ཡོད། འཁྲབ་ཚན་ ༣༠ ལྷག་ཡོད། སྟག་ཕུའི་ཨར་གཞས།: སྟག་ཕུ་རྡོ་རྗེ་འཆང་སྐུ་ཕྲེང་བརྒྱད་པ་པདྨ་བཛྲ་གྱིས་སྤྱི་ལོ་ ༡༩༢༠ ཙམ་ལ་སྒྲུབ་སྡེ་དགོན་བཞེངས་སྐབས་གསར་རྩོམ་གནང་བའི་ཆོས་དང་འཇིག་རྟེན་གཉིས་ལྡན་གྱི་ལས་གཞས་ཤིག་ཡིན། དགུ་ཐུག: ནགས་ཤོད་ཁུལ་དུ་བོད་ཟླ་ ༡༢ པའི་ཚེས་ ༢༩ དགོང་མོ་དགུ་ཐུག་འཐུང་སྐབས། ཐུག་པའི་ནང་དུ་དོན་དག་མཚོན་པའི་རྫས་སྣ་ཚོགས་ (དཔེར་ན་སེམས་དཀར་བའི་རྟགས་སུ་རུས་དཀར་དང་། སེམས་ནག་པའི་རྟགས་སུ་སོལ་བ། ལེ་ལོ་ཅན་ལ་གླང་གཟུགས་ལྟ་བུ་) བཅུག་ནས་རྟེན་འབྲེལ་བརྟག་པའི་སྲོལ་ཡོད། གཉེན་སྒྲིག: སྔོན་དུས་སུ་ "ཁྱོ་གཅིག་མོ་མང་" དང་ "མོ་གཅིག་ཁྱོ་མང་" གི་ལམ་ལུགས་ཡོད་ཀྱང་། གཙོ་བོ་ཁྱོ་གཅིག་མོ་གཅིག་ཡིན། "མག་པ" (བུ) དང་ "མནའ་མ" (བུ་མོ) གང་རུང་ཁྱིམ་དུ་བསུ་བའི་ལུགས་སྲོལ་ཡོད།

ཐོན་སྐྱེད་ལམ་ལུགས།

འབྲི་རུ་རྫོང་ནི་ "ས་མ་འབྲོག" (ཞིང་འབྲོག་གཉིས་ཀ་ཡོད་པ) གི་ས་ཁུལ་ཞིག་ཡིན། འབྲོག་ལས།: འབྲི་གཡག་དང་། ར་ལུག་གསོ་སྤེལ་བྱེད། འབྲོག་པ་རྣམས་དབྱར་དགུན་སྟོན་དཔྱིད་དུས་ཚིགས་ལྟར་རྩྭ་ཆུ་འཛོམས་སར་གནས་སྤོ་བྱེད། ཞིང་ལས།: ནས་དང་། གྲོ། སྲན་མ། པད་ཁ། ལ་ཕུག ཞོག་ཁོག་སོགས་འདེབས་ལས་བྱེད། ས་བབ་དང་བསྟུན་ནས་ "ཕྱེད་འདེབས་ཕྱེད་ཉར" (ས་ཞིང་ངལ་གསོ་བ) གྱི་སྲོལ་ཡོད། ཞོར་ལས།: དབྱར་རྩྭ་དགུན་འབུ་བརྐོ་བ་དང་། ཤྭ་བའི་ཁྲག་རྭ་དང་གླ་རྩི་སོགས་སྨན་རྫས་རིགས་བསྡུ་ལེན་བྱེད་པ། དེ་བཞིན་ལག་ཤེས་བཟོ་ལས་ (རུམ་འཐག་དང་ལྕགས་བཟོ་) བཅས་ཡོད།

དཔྱད་གཞིའི་ཡིག་ཆ།

རི་དབང་བསྟན་འཛིན། 《ནགས་ཤོད་འབྲི་རུའི་ལོ་རྒྱུས་རབ་རིམ་སཱ་ལའི་ལྗོན་པ།》 བོད་ལྗོངས་མི་དམངས་དཔེ་སྐྲུན་ཁང་། ༢༠༠༢ ལོ།