ཚེ་རིང་མཆེད་ལྔ་

ཚེ་རིང་མཆེད་ལྔ་ནི་རི་བོ་ཇོ་མོ་གླང་མའི་ཕྱོགས་བཞི་དབུས་བཅས་ཀྱི་རི་རྩེ་ལྔ་བོ་འདི་དག་ཡིན་ལ། རྗེ་བཙུན་མི་ལ་རས་པས་བཀའ་བསྒོ་དམ་བཞག་བྱས་པའི་འཕྲིན་ལས་ཀྱི་སྲུང་མ་གཙོ་བོ་ཞིག་ཡིན། ད་ལྟ་དིང་རི་རྫོང་ཁོངས་སུ་ཡོད། ལྷ་མོ་འདི་དག་སྔོན་ཡབ་ལྷོ་ལྷ་འཐེང་བོ་དང་། ཡུམ་འབྲང་ཡུམ་སྨན་གཅིག་མ་གཉིས་ལ་བུ་བདུན་དང་། བུ་མོ་ལྔ་འཁྲུངས་བའི་བུ་མོ་སྤུན་མཆེད་ལྔ་བོ་དེ་ཡིན་ནོ།།

བྱུང་རིམ།

སྔར་རྒྱ་གར་གྱི་དུར་ཁྲོད་མུན་པ་སྒྲ་སྒྲོག་ཅེས་པར་བཞུགས་པའི་སློབ་དཔོན་ཕྱོགས་ཀྱི་གོ་ཆ་ཞེས་བྱ་བས་དམ་ལ་བཏགས་ཤིང་། དུས་ཕྱིས་སློབ་དཔོན་པད་མ་བོད་དུ་བྱོན་པའི་དུས་སླར་ཡང་དྲག་འདུལ་མཛད་དེ་བཀའ་སྡོད་ཀྱི་སྲུང་མར་བསྐོས། དེའི་རྗེས་བསྟན་པ་ཕྱི་དར་གྱི་སྐབས་རྗེ་བཙུན་མི་ལ་རས་པ་གང་ཉིད་སློབ་དཔོན་པད་མ་འབྱུང་གནས་ཀྱིས་བྱིན་གྱི་བརླབས་པའི་གནས་རི་སྨན་ལུང་ཆུ་དབར་གྱི་དབེན་གནས་ན་བཞུགས་སྐབས་ཤིག་ཏུ། ལྷ་མོ་ལྔ་ལ་སྐྱབས་འགྲོའི་བསླབ་སྡོམ་དང་ཇོ་མོ་སྒྲོལ་མའི་རིག་པ་གཏད་པའི་དབང་བསྐུར་ཏེ་བྱང་ཆུབ་ཀྱི་ལམ་ལ་བཀོད། དེ་དག་གིས་ཀྱང་སངས་རྒྱས་ཀྱི་བསྟན་པ་སྤྱི་དང་། ལྷག་པར་དུ་རྗེ་བཙུན་གྱི་རིགས་བརྒྱུད་དུ་གཏོགས་པ་རྣམས་བསྲུང་བའི་གཡར་དམ་མཛད་དོ།། དེ་འདྲའི་ཚེ་རིང་མཆེད་ལྔ་འདི་དག་ནི་བཀའ་བརྒྱུད་པའི་སྲུང་མ་གཙོ་བོ་ཙམ་དུ་མ་ཟད། རི་བོ་དགེ་ལྡན་པའི་སྐྱེས་ཆེན་མང་པོས་ཀྱང་མཆོད་གཏོར་དང་། འདོན་ཆོག གསོལ་ཁ་སོགས་མཛད་པའང་ཤིན་ཏུ་མང་ངོ་།།

བཀྲ་ཤིས་ཚེ་རིང་མ།

རྡོ་རྗེ་མི་འགྱུར་དཔལ་གྱི་ཡུམ།། སྐུ་མདོག་དཀར་མོ་གཞིན་ཚུལ་ཅན།། ཕྱག་གཡས་གསེར་གྱི་རྡོ་རྗེ་བསྣམས།། གཡོན་པས་ཚེ་ཡི་བུམ་པ་འཛིན།། བུམ་པའི་སྟེང་ན་དཔལ་བེ་དང་།། གཡུང་དྲུང་རིན་ཆེན་འཁྱིལ་པས་བརྒྱན།། ལྷབ་ལྷུབ་ན་བཟའི་རྒྱན་དང་བཅས།། སིལ་སྙན་རོལ་མོའི་སྒྲ་དང་བཅས།། རིན་ཆེན་དུ་མས་མཛེས་པར་བརྒྱན།། བཀྲ་ཤིས་ཚེ་ཡི་གཙོ་མོ་སྟེ།། ཆིབས་སུ་སེང་གེ་དཀར་མོ་ཆིབས།། གངས་དཀར་སྟོད་ན་བཞུགས་པ་མོ།། མཆོད་གཏོར་འདི་བཞེས་དངོས་གྲུབ་སྩོལ།།

མཐིང་གི་ཞལ་བཟང་མ།

ལྷ་མོ་མཐིང་གི་ཞལ་བཟང་མ།། རྡོ་རྗེ་ཁྲོས་མ་ཞེས་སུ་གྲགས།། སྐུ་མདོག་སྔོ་བསངས་འཚེར་བག་ཅན།། ཆིབས་སུ་རྐྱང་བུ་ཁ་དཀར་ཆིབས།། ཕྱག་གཡས་དངུལ་དཀར་མེ་ལོང་བསྣམས།། གཡོན་པས་ལྷ་ཡི་བ་དན་ཕྱར།། སྐུ་ལ་དར་དཀར་ན་བཟའ་གསོལ།། སིལ་སྙན་རོལ་མོའི་སྒྲ་དང་བཅས།། མཆོད་གཏོར་འདི་བཞེས་དངོས་གྲུབ་སྩོལ།། སྔ་གསལ་བདེན་མཐོང་པྲ་ཡི་དངོས་གྲུབ་སྩོལ།།

མི་གཡོ་བློ་བཟང་མ།

གསང་མཚན་རྡོ་རྗེ་བཞད་པ་མོ།། སྐུ་མདོག་གསེར་མོ་གསེར་གྱི་མདོག། ཆིབས་སུ་རྒྱ་སྟག་ཁྲ་བོ་ཆིབས།། ཕྱག་གཡས་རིན་ཆེན་སྡེར་བཟང་ནང་།། ལྷ་ཡི་ཞལ་ཟས་སྣ་ཚོགས་བསྣམས།། གཡོན་ན་ནེའུ་ལེའི་རྐྱལ་བ་འཛིན།། མཆོད་གཏོར་འདི་བཞེས་དངོས་གྲུབ་སྩོལ།། རྨ་གཡང་རོ་མཆོག་ཟས་ཀྱི་དངོས་གྲུབ་སྩོལ།།

ཅོད་པན་མགྲིན་བཟང་མ།

ལྷ་མོ་ཅོད་པན་མགྲིན་བཟང་མ།། རྡུ་རྗེ་དཔལ་མོ་ལོངས་སྤྱོད་ཡུམ།། སྐུ་མདོག་དམར་གསལ་མདངས་དང་ལྡན།། ཆིབས་སུ་ཤ་བ་ཡུ་མོ་ཆིབས།། ཕྱག་གཡས་ཡིད་བཞིན་ནོར་བུ་དང་།། ཕྱག་གཡོན་རིན་ཆེན་སྒྲོམ་བུ་བསྣམས།། མཆོད་གཏོར་འདི་བཞེས་དངོས་གྲུབ་སྩོལ།། བང་མཛོད་འབྲུ་ནོར་འཕེལ་བའི་དངོས་གྲུབ་སྩོལ།།

གཏད་དཀར་འགྲོ་བཟང་མ།

ལྷ་མོ་གཏད་དཀར་འགྲོ་བཟང་མ།། གསང་མཚན་རྡོ་རྗེ་གར་མཁན་མ།། སྐུ་མདོག་སྔོ་ལྗང་མདངས་དང་ལྡན།། ཆིབས་སུ་གཡུ་འབྲུག་སྔོན་མོ་ཆིབས།། ཕྱག་གཡས་རྩྭ་མཆོག་དུ་རྦ་དང་།། གཡོན་པས་སྦྲུལ་གྱི་ཞགས་པ་བསྣམས།། མཆོད་གཏོར་འདི་བཞེས་དངོས་གྲུབ་སྩོལ།། རྐང་བཞི་ནོར་ཕྱུགས་འཕེལ་བའི་དངོས་གྲུབ་སྩོལ།།