ཚིག་བདུན་གསོལ་འདེབས་བླ་མའི་རྣལ་འབྱོར་

༄༅།།ཚིག་བདུན་གསོལ་འདེབས་དང་འབྲེལ་བའི་བླ་མའི་རྣལ་འབྱོར་བྱིན་བརླབས་ཆར་འབེབས་བཞུགསསོ།།

  ༄༅། ཨོཾ།རང་ལུས་ཐ་མལ་གནས་པའི་མདུན་མདུན་མཁའ་རུ།།ཨོ་རྒྱན་དྲི་མེད་དྷ་ན་ཀོ་ཤའི་མཚོ།།གཏིང་ཟབ་ཡན་ལག་བརྒྱད་ལྡན་ཆུས་གང་བའི།དབུས་སུ་རིན་ཆེན་པད་སྡོང་འདབ་རྒྱས་སྟེང་།།སྐྱབས་གནས་ཀུན་འདུས་ཨོ་རྒྱན་རྡོ་རྗེ་འཆང་།།མཚན་དཔེའི་དཔལ་འབར་ལྷ་ལྕམ་ཡུམ་དང་འཁྲིལ།།ཕྱག་གཡས་རྡོ་རྗེ་གཡོན་པས་ཐོད་བུམ་བསྣམས།།དར་དང་རིན་ཆེན་རུས་པའི་རྒྱན་གྱིས་མཛེས།།འོད་ལྔའི་ཀློང་ནས་བདེ་ཆེན་གཟི་བྱིན་འབར།།འཁོར་དུ་རྩ་གསུམ་རྒྱ་མཚོ་སྤྲིན་ལྟར་གཏིབས།།བྱིན་རླབས་ཐུགས་རྗེའི་ཆར་འབེབས་བདག་ལ་གཟིགས།།རྒྱལ་ཀུན་ངོ་བོ་འཆི་མེད་ཡེ་ཤེས་སྐུར།།གདུང་ཤུགས་དྲག་པོས་དད་ཕྱག་རྟག་ཏུ་འཚལ།།ལུས་དང་ལོངས་སྤྱོད་དུས་གསུམ་དགེ་བའི་ཚོགས།།ཀུན་བཟང་མཆོད་པའི་སྤྲིན་དུ་དམིགས་ནས་འབུལ།།ཐོོགས་མེད་ནས་བསགས་སྡིག་ལྟུང་མ་ལུས་བཤགས།།སྲས་བཅས་རྒྱལ་བ་ཀུན་གྱི་ཡོན་ཏན་གྱི།།ཁྱབ་བདག་གཅིག་པུ་མགོན་པོའི་རྣམ་ཐར་ལ།།སྙིང་ནས་ཡི་རང་དད་པས་གསོལ་འདེབས་ཤིང་།།ཟབ་རྒྱས་ཆོས་ཀྱི་ཆར་ཆེན་འབེབས་པར་བསྐུལ།།རང་གཞན་དགེ་བའི་དངོས་པོ་ཀུན་བསྡོམ་ནས།།འགྲོ་ཁམས་རྒྱ་མཚོ་ཇི་སྲིད་གནས་ཀྱི་བར།།མགོན་པོ་ཁྱོད་ཀྱི་རྣམ་ཐར་རྗེས་བསྙེགས་ཏེ།།མཁའ་ཁྱབ་འགྲོ་བ་འདྲེན་པའི་དོན་དུ་བསྔོ།།སྐྱབས་གནས་ཀུན་འདུས་མཁྱེན་བརྩེའི་གཏེར་ཆེན་པོ།།དུས་ངན་སྙིགས་མའི་སྐྱབས་གཅིག་རིན་པོ་ཆེ།།ལྔ་བདོའི་རྒུད་པས་མནར་བཞིན་གདུང་ཤུགས་ཀྱིས།།གསོལ་འདེབས་བུ་ལ་བརྩེ་བའིི་ཐུགས་རྗེས་དགོངས། །དགོངས་པའི་ཀློང་ནས་ཐུགས་རྗེས་རྩལ་ཕྱུངས་ལ། །མོས་ལྡན་བདག་གི་སྙིང་ལ་བྱིན་གྱིས་རློབས།།རྟགས་དང་མཚན་མ་མྱུར་དུ་བསྟན་པ་དང་།།མཆོག་དང་ཐུན་མོང་དངོས་གྲུབ་སྩལ་དུ་གསོལ།།ཧཱུཾ།ཨོ་རྒྱན་ཡུལ་གྱི་ནུབ་བྱང་མཚམས།། པདྨ་གེ་སར་སྡོང་པོ་ལ།། ཡ་མཚན་མཆོག་གི་དངོས་གྲུབ་བརྙེས།། པདྨ་འབྱུང་གནས་ཞེས་སུ་གྲགས།། འཁོར་དུ་མཁའ་འགྲོ་མང་པོས་བསྐོར།། ཁྱེད་ཀྱི་རྗེས་སུ་བདག་བསྒྲུབ་ཀྱིས།། བྱིན་གྱིས་བརླབ་ཕྱིར་གཤེགས་སུ་གསོལ།། གུ་རུ་པདྨ་སིདྡྷི་།།ཧཱུྃཿཞེས་ཚིག་བདུན་གསོལ་འདེབས་ཅི་ནུས་འདོན།མོས་གུས་ཀྱི་གསོལ་བ་བཏབ་པས་བླ་མ་ཡབ་ཡུམ་གྱི་སྦྱོར་མཚམས་དང་ཐུགས་ཀ་ནས་ཡེ་ཤེས་ཀྱི་འོད་ཟེར་སྣ་ལྔ་བ་ཐག་ལྟར་བརྐྱང་བ་རང་གི་སྙིང་གར་སྙིང་གར་ཐིམ་པས་རྒྱུད་བྱིན་གྱིས་བརླབས་པར་བསམ།།བླ་མའི་གནས་གསུམ་ཡི་གེ་འབྲུ་གསུམ་ལས།།འོད་ཟེར་དཀར་དམར་མཐིང་གསུམ་བྱུང་ནས་སུ།།རང་གི་གནས་གསུམ་ཐིམ་པས་སྒོ་གསུམ་གྱི།།སྒྲིབ་བྱང་སྐུ་གསུང་ཐུགས་ཀྱི་རྡོ་རྗེར་གྱུར།།མཐར་ནི་བླ་མ་འཁོོར་བཅས་འོད་དུ་ཞུ།།དཀར་དམར་ཐིག་ལེ་ཧཱུཾ་གིས་མཚན་པ་རུ།།རང་གི་སྙིང་གར་ཐིམ་པས་བླ་མའི་ཐུགས།།རང་སེམས་དབྱེར་ལྷན་སྐྱེས་ཆོས་སྐུར་གནས།།ཨ་ཨཱ།། ཞེས་བརྗོད་ལ་ཡེ་ནས་བཅོས་བསྒྱུར་སྤང་བླང་ལས་འདས་པ་རང་གི་སེམས་ཉིད་གདོད་མའི་ཆོས་སྐུ་ཆེན་པོའི་རང་ཞལ་བལྟ།།སླར་ཡང་སྒྱུ་མ་ལྟ་བུའི་སྣང་བ་ཐམས་ཅད་བླ་མའི་རང་བཞིན་དུ་བལྟས་ལ་དགེ་བ་བསྔོ་ཞིང་ཤིས་པ་བརྗོད་པས་བདེ་ལེགས་སུ་བྱའོ།།ཞེས་པའང་ཐམས་ཅད་འདུལ་ཅེས་པའི་གྲོ་བཞིན་ཟླ་བའི་ཡར་ཚེས་བརྒྱད་ལ་ཚེ་རབས་ཐམས་ཅད་དུ་གུ་རུ་པདྨའི་བྲན་དུ་སྨོན་ལམ་འདེབས་པ་མི་ཕམ་རྣམ་རྒྱལ་བའི་ཡིད་ཀྱི་བློ་མཚོ་ལས་བྱུང་པ་དགེའོ།། མངྒལཾ།དགེ་བ་འདི་ཡིས་མྱུར་དུ་བདག།།ཨོ་རྒྱན་བླ་མ་འགྲུབ་གྱུར་ནས།།འགྲོ་བ་གཅིག་ཀྱང་མ་ལུས་པ།།དེ་ཡི་ས་ལ་འགོད་པར་ཤོག།།