མཆོད་རྟེན་
མཆོད་རྟེན།
[རྩོམ་སྒྲིག]མཆོད་རྟེན་ནི་སཾསྐྲྀ་ཏའི་སྐད་དུ་སྟཱུས་ཞེས་འབོད་ཅིང་དོན་དུ་མཆོད་པའི་ཞིང་ངམ་རྟེན་གྱི་དོན་ཡིན། སཾསྐྲྀ་ཏའི་སྐད་དུ་སྟཱུས་ཞེས་པ་དེ་ཡང་དོན་ངོ་མར་རྟེན་མཆོག་ལྟ་བུ་དང་བང་སོ་ལྟ་བུ་གཉིས་ཀ་ལ་འཇུག་ཅིང་། རྟེན་མཆོག་ཅེས་པ་དྲན་རྟེན་གྱི་བཟོ་སྐྲུན་ལྟ་བུ་ལ་འབོད་ཅིང་བང་སོ་ནི་རོ་འཇུག་སའི་པུར་སྒམ་གྱི་དོན་ཡིན། བདག་ཅག་གི་སྟོན་པ་མ་བྱོན་གོང་ནས་རྒྱ་གར་དུ་ཡོད་པ་ཞིག་སྟེ། རྒྱལ་པོ་སོ་སོའི་བང་སོ་ལའང་སྟཱུས་ཞེས་འབོད་པ་ཡིན། རང་རེ་བོད་ཀྱི་ཡུལ་དུ་ཆ་བཞག་ནའང་གནའ་རབས་བོན་གྱི་ཆོས་དར་བ་ནས་གའོ་ཚུགས་ཏེ། ཡུལ་ལྷ། གཞི་བདག བཙན་དང་། རྒྱལ་པོ་མཆོད་ཡུལ་རྟེན་ནམ། རྟེན་མཁར་དེ་བོད་ཡུལ་གྱི་མཆོད་རྟེན་ལས་སྔ་བར་འདོད་དོ། ། དེ་ཡང་ད་སྐབས་མཆོད་རྟེན་དང་གདུང་རྟེན་གྱི་དབྱེ་བ་དེ་ཙམ་འབྱེད་མི་ཤེས་པའམ་མང་བས་སྤྱིར་མཆོད་རྟེན་ལ་སྐུ་རུས་སམ་པུར་ཐལ་མེད་པ་དང་ཡོད་པ་གཉིས་ལས་སྐུ་རུས་པུར་ཐལ་ཡོད་པ་ལ་གདུང་རྟེན་ཞེས་འབོད་ན་གོ་བདེ་བ་དང་། མཆོད་རྟེན་ཡིན་ན་གདུང་རྟེན་ཡིན་མ་དགོས་ཀྱང་གདུང་རྟེན་ནི་མཆོད་རྟེན་གྱི་བྱེ་བྲག་གོ། དེ་ཡང་ལུགས་གཉིས་ལས་བུ་སྟོན་ལུགས་དང་སྡེ་སྲིད་ལུགས་གཉིས་པོའི་མཆོད་རྟེན་གྱི་སྤྱིའི་མཐོ་ཚད་ཆ་ཆུང་དྲུག་ཅུ་རེ་བཞི་གཅིག་མཐུན་ཐོག་བུ་སྟོན་ལུགས་ལ་ས་འཛིན་གྱི་རྒྱར་ཆ་ཆུང་སུམ་ཅུ་རྩ་གཉིས་དང་། སྡེ་སྲིད་ལུགས་ལ་ཆ་ཆུང་སུམ་ཅུ་སོ་དགུ་ཡོད་པའི་ཁྱད་ཡོད་ལ། བུམ་པའི་རྒྱ་དང་། ཆོས་འཁོར་བཅུ་གསུམ་གྱི་ཚད་གཞི་ལ་ཡང་ཁྱད་པར་ཅུང་ཟད་ཡོད། དབྱིབས་གཟུགས་ཐད་བདེ་གཤེགས་མཆོད་རྟེན་བརྒྱད་རང་དུ་ངེས་ཤིང་པད་སྤུངས་ནི་དབྱིབས་ཟླུམ་པོ་པདྨའི་རྣམ་པ་ཅན། བང་རིམ་བཞི་པ་ཅན(བང་རིམ་བརྒྱད་དུ་བཞེད་པའང་ཡོད)བྱང་ཆུབ་མཆོད་རྟེན་ནི་དབྱིབས་གྲུ་བཞི་བང་རིམ་བཞི་དང་ལྡན་པ། བཀྲ་ཤིས་སྒོ་མང་ནི་དབྱིབས་གྲུ་བཞི་གློ་འབུར་དང་བཆས་པ། སྒོ་རབ་བརྒྱ་རྩ་བརྒྱད། འབྲིང་ལ་སྒོ་ང་དྲུག ཐ་མ་སྒོ་བཅུ་དྲུག་སོགས་ཅི་རིགས་དང་། སྒོ་བཞི་རེས་བྱས་པ་བདེན་པ་བཞིའི་མཚོན་བྱེད། བརྒྱད་རེ་བྱེད་པ་རྣམ་ཐར་བརྒྱད་དུ་མཚོན། བཅུ་གཉིས་སུ་བྱེད་པ་རྟེན་པ་རྟེན་འབྲེལ་བཅུ་གཉིས་བཅུ་དྲུག་ཏུ་བྱེད་པ་སྟོང་ཉིད་བཅུ་དྲུག་གི་མཚོན་ཚུལ་བཅས་མང་བར་གསུངས་སོ། །ཆོ་འཕྲུལ་ནི་གྲུ་བཞི་པ་བང་རིམ་བཞི་དང་ལྡན་པ། ཕྱོགས་རེར་གློ་འབུར་དང་བཅས་པ། ལྷ་བབས་ནི་བང་རིམ་བཞི་པའམ་བརྒྱད་པ་ངོས་རེར་གློ་འབུར་དང་བཅས་པ་གློ་འབུར་དབུས་ན་ཐེམ་སྐས་ཡོད་པ། དབྱེན་འདུམ་མཆོད་རྟེན་ནི་བང་རིམ་བཞི་པ་དབྱིབས་གྲུ་བཞིའི་ཟུར་མཉམ་པར་བཅད་པའོ། །རྣམ་རྒྱལ་མཆོད་རྟེན་ནི། དབྱིབས་ཟླུམ་པོ་བང་རིམ་གསུམ་ཅན། མྱང་འདས་མཆོད་རྟེན་ནི་བང་རིམ་མེད་པ། ཁྲི་ཡེ་སྟེང་དུ་བུམ་རྟེན་ཡན་ཆད་བཞུགས་པ་བཅས་མཆོད་རྟེན་ཚད་ལྡན་ཞིག་ལ་མཚོན་ན། བཞུགས་ཁྲི་དང་། རྒྱུའི་མཆོད་རྟེན། འབྲས་བུའི་མཆོད་རྟེན་གསུམ་ཚང་དགོས་ཏེ། ས་འཛིན་ནས་བ་གམ་མན་ཆོད་བཞུགས་ཁྲི་དང་། བང་རིམ་དང་པོ་ནས་བྲེ་མན་ཆོད་རྒྱུའི་མཆོད་རྟེན། བྲེ་ཡན་ཆོད་ནས་ཏོག་གི་རྩེ་མོ་བར་འབྲས་བུའི་མཆོད་རྟེན་དུ་གསུངས། མཆོད་རྟེན་གྱི་ཆ་སོ་སོ་ནི་འོག་ནས་རིམ་བཞིན་གྱེན་དུ་བགྲངས་ནས་ས་འཛིན་དང་། ཐེམ་སྐས་དང་པོ། ཐེམ་སྐས་གཉིས་པ།(ཐེམ་སྐས་འདི་པདྨ་བྱེད་པ་ཤས་ཆེ)ཐེམ་སྐས་གསུམ་པ། ཁྲི་གདོང་། གཟུང་སྣེ། པདྨ་བ་གམ་བཅས་རིམ་པ་བརྒྱད་ནི་ཁྲི་ཡིན། དེའི་སྟེང་དུ་དགེ་བཅུ། དེ་ནས་བང་རིམ་དང་པོ། བང་རིམ་གཉིས་པ། བང་རིམ་གསུམ་པ། བང་རིམ་བཞི་པ། བུམ་རྟེན། བུམ་པ། བྲེ་རྟེན། བྲེ་བཅས་རྒྱུའི་མཆོད་རྟེན་དང་། གདུངས་འདེགས་པདྨ་མོ་འཁོར་དང་ཕོ་འཁོར་རེས་མོས་བཞིན་བཅུ་གསུམ་དེ་ནས་ཐུགས་རྗེ་མདོ་གཟུང་གདུངས་དང་། གདུགས་ཁེབས། ཟླ་བ། ཉི་མ་ནོར་བུའི་ཏོག་བཅས་ཡིན།
