བྲག་ལྷ་ཀླུ་སྒུག་

ཡོང་ཁུངས་Wikipedia
Jump to navigation Jump to search

བྲག་ལྷ་ཀླུ་སྒུག་ལ་སྒྲ་འགྱུར་ནས་ཀླུ་སྦུག་ཟེར། ལྷ་ས་ཀླུ་སྒུག་དང་དོན་གཅིག དེ་ཡང་ཐོག་མར་དུས་རབས་བདུན་པའི་ནང་རྒྱལ་པོ་སྲོང་བཙན་སྒམ་པོའི་རིགས་མཐུན་གྱི་བཙུན་མོ་གསུམ་གྱི་ཡ་གྱལ། མི་ཉག་རྒྱལ་པོ་སྲས་མོ་མི་ཉག་རུ་ཡོང་བཟས་༼རུ་ཡོང་བཟའ་རྒྱལ་མོ་བཙུན༽བྲག་ལྷ་མགོན་པོའི་ལྷ་ཁང་བཞེངས། བྲག་ལྷ་ཀླུ་སྒུག་གི་སྐུ་རང་བྱོན་རྣམས་གསལ་བར་བརྐོས་ཏེ། ཚྭ་ལ་བརྒྱད་བཅུ་སྡེའི་དུས་བྲག་ཕྱེ་བྲེ་རེ་ཕེད་པ་ལ་བརྔན་པ་ཚྭ་བྲེ་རེ་སྦྱིན་ནས་བྲག་ལ་སྐོར་ཁང་བརྐོས་ཞེས་ལོ་རྒྱུས་ཡིག་ཆར་གསལ། དེའི་ཉེ་འགྲམ་དུ་རྒྱལ་པོ་སྲོང་བཙན་སྒམ་པོས་མོང་བཟའ་ཁྲི་ལྕམ་གྱི་བཞུགས་གནས་སུ་ཕོ་བྲང་བཞེངས། བྲག་ཕུག་ནང་གི་རྟེན་གཙོ་ནི་ཇོ་བོ་ཤཱཀྱ་མུ་ནེའི་སྐུ་འབུར་གཟུགས་སུ་བཞུགས་ཡོད་ལ། མཐའ་སྐོར་དུ་བསྐོར་ལམ་ཡོད་པ་དེ་ཡིན་ནོ། ནང་པའི་ཆོས་ལུགས་ཀྱི་བཞེད་སྲོལ་ལ་མ་འོངས་པ་ན་བྲག་ལྷ་ཀླུ་སྒུག་གི་བྲག་ལྡེབས་སུ་བཞུགས་ཡོད་པའི་ཇོ་བོ་ཤཱཀྱ་མུ་ནེ་དེ་སྐུ་གཟུགས་ཆ་ཚང་མངོན་སྐབས་ལྷ་ས་ཆུས་འཇིག་ནས། བྲག་ལྷ་ཀླུ་སྒུག་ཏུ་ཀླུའི་གཟུགས་བརྙན་ལག་གཡས་པ་མགོ་བོ་སྦར་མོས་བཀབ་ནས་གཙུག་ལག་ཁང་ལ་ཞལ་ཕྱོགས་ནས་ཡོད་པས། ཇོ་བོ་ཤཱཀྱ་མུ་ནེ་ཀླུ་ཡུལ་དུ་གདན་འདྲེན་ཞུ་རྒྱུར་བྱ་ར་བྱས་ནས་སྒུག་བཞུགས་ཡོད་པར་གྲགས། སྔར་བྲག་ཕུག་ཡིན་ཅིང་རྗེས་སུ་ལྷ་ཁང་བཞེངས། རྡོ་བརྐོས་སྐུ་བརྙན་མང་པོ་མཇལ་རྒྱུ་ཡོད། བྲག་ཕུག་གི་མདོར་ལྷ་ཁང་ཀ་གཉིས་མ་དང་རྟ་མགྲིན་སྒྲུབ་ཕུག མཚམས་ཁང་། རྗེས་སུ་ལྷ་ས་སྨན་རྩིས་ཁང་གི་དབུ་འཛིན་མཁྱེན་རབ་ནོར་བུས་གྲུབ་ཐོབ་ལྷ་ཁང་གསར་བཞེངས་གནང་བ་སོགས་མཇལ་རྒྱུ་ཡོད། རི་དེའི་རྒྱབ་མདུན་གཉིས་ཀ་ནས་ཆུ་མིག་བདུད་རྩིའི་སྨན་ཆབ་འབབ་ཅིང་། ཆུ་དེ་ནི་དྭངས་ཤིང་བསིལ་ལ་འཇམ་པ། དྲི་ཞིམ་ལ་ཡང་བ། ཕོ་བ་མགྲིན་པར་མི་གནོད་པ་བཅས་ཀྱི་ཕན་ཡོན་ཡོད་པ་འཁོད། དེ་སྔ་ནོར་གླིང་དང་རྩེ་ཕོ་བྲང་སོགས་ཀྱི་ཆབ་དེ་ནས་བཞེས་ཀྱི་ཡོད།

གཞན་ཡང་་་་

མཚན་རྒྱས་པར་བྲག་ལྷ་བཀྲ་ཤིས་གཞལ་ཡས་ཁང་ཞེས་ཞུ། ལྕགས་པོ་རིའི་ཤར་ངོས་སུ་ཕོ་བྲང་པོ་ཏ་ལར་ཞལ་ཕྱོགས་པ། ཕོ་བྲང་པོ་ཏ་ལ་ནས་སྤྱི་ཁྲི་ཉིས་བརྒྱ་ཙམ་གྱི་ས་ན་བྲག་ལྷ་ཀླུ་སྒུག་ལྷ་ཁང་དེ་མཇལ་རྒྱུ་ཡོད། ལྷ་ཁང་དེ་ནི་ཆོས་རྒྱལ་སྲོང་བཙན་གྱིས་མཐའ་འདུལ་ཡང་འདུལ་གྱི་གཙུག་ལག་ཁང་བཞེངས་སྐབས་སམ། ར་ས་གཙུག་ལག་ཁང་བཞེངས་གྲུབ་རྗེས་སུ་ལྷ་ཁང་དེ་བསྐྲུན་པ་ཡིན། དེའང་ཐོག་མར་གནས་དེར་བྲག་ཕུག་ཅིག་ཡོད་པ་ལ་དེར་གཙོ་བོ་ཐུབ་པ་བྲག་ལྷ་མགོན་པོ་དང་། དེའི་གཡས་ན་ཤཱ་རིའི་བུ། གཡོན་ན་མོོང་གལ་གྱི་བུ། དེའི་གཡས་ན་རྒྱལ་བ་བྱམས་པ། གཡོན་ན་སྤྱན་རས་གཟིགས་བཅས་བྲག་ལ་གསལ་བར་རང་བྱོན་དུ་ཡོད་པ་ལ། ་དེ་ནས་ཆོས་རྒྱལ་གྱིས་མ་འོངས་སེམས་ཅན་བསོད་ནམས་གསོག་པའི་ཕྱིར་དུ་བལ་པོའི་ལྷ་བཟོས་འབུར་དུ་བརྐོས་ཏེ་བྲག་ལ་སྐོར་ཁང་བརྐོ་བར་མཛད་པ་ལ་ཚྭ་གོང་ཆེ་བའི་སྐབས་སུ་བྲག་བྲེ་གང་བརྐོས་པར་ཚྭ་བྲེ་རེ་གནང་བ་བཅས་ཀྱིས་སྐོར་ཁང་ཡང་འགྲུབ། བྲག་ལྷ་ཞེས་པ་ནི་དེ་ལྟར་དང་། ཀླུ་སྒུག་ཅེས་པ་ནི། མ་འོངས་པར་ར་ས་གཙུག་ལག་ཁང་གི་ཇོ་བོ་ཤཱཀྱ་མུ་ནེ་འོག་ཕྱོགས་ཀླུ་ཡུལ་དུ་གདན་འདྲེན་པས་དེའི་སྐབས་སུ་སེམས་ཅན་གྱི་བསོད་ནམས་གསོག་ཕྱིར་ཐུབ་པ་བྲག་ལྷ་མགོན་པོ་འདི་ཉིད་མི་ཡུལ་དུ་བཞུགས་པ་ཡིན་ཞེས་ཟེར་། གཞན་ ཡང་སྲོང་བཙན་གྱི་སྒྲུབ་ཕུག་འོག་ཏུ་མོང་བཟའ་ཁྲི་ལྕམ་གྱིས་མཐུན་རྡོ་འབུལ་ས་ཞེས་སྙན་སེང་ཞུ་སའི་ཁུང་བུ་སོགས་ཡོད། ལྷ་ཁང་དེའི་ཉེ་འདབས་བྲག་ལྷའི་ནིའུ་ཐང་ཞེས་པར་སྟར་ཁའི་སྡོང་པོ་ཞིག་ཡོད་པ་དེའོ་འོག་ཏུ་བློན་པོ་དྲུག་གིས་རྒྱ་བཟའ་ཇི་ལྟར་གདན་དྲངས་ཀྱི་གྲོས་གནང་ས་ཡིན་ཞེས་དང་། གཞན་ཡང་མོང་བཟའ་ཁྲི་ལྕམ་ལ་སྲས་གུང་རུ་གུང་བཙན་འཁྲུངས་སའང་བྲག་ལྷ་བཀྲ་ཤིས་གཞལ་ཡས་ཁང་དུ་ཡིན་ཞེས་གསུངས། སྔོན་ལྷ་ཁང་དེར་གོང་གསལ་རང་བྱོན་འབུར་དུ་བརྐོས་པའི་ལྷ་ཁང་རྟེན་དང་བརྟེན་པ་བཅས་བཞུགས་སུ་གསོལ་ཡོད། ད་ལྟ་སྔོན་ཤུལ་དུ་ཉམས་གསོ་རྒྱ་སྐྱེད་གནང་བའི་ནང་སྔོན་གྱི་བྲག་ལྷ་མགོན་པོ་བྱིན་ཅན་དེ་དང་། སྟོན་སྐུ་གསར་བཞེངས་གནང་བ་དང་། ལྡེབས་རིས་གསར་བཞེངས་བ་སོགས་མཇལ་རྒྱུ་ཡོད། བྲག་ཕུག་དེར་ཇོ་ནང་ཀུན་མཁྱེན་ཤེས་རབ་རྒྱལ་མཚན་ཡང་བཞུགས་ཞེས་གསུངས།