བྱ་ལེན་མ་མངོན་པར་ཤེས་པའི་ཟློས་གར།(འགྱུར)

ཡོང་ཁུངས་Wikipedia
Jump to navigation Jump to search

༄༅། །རྒྱ་གར་སྐད་དུ། ཨ་བྷི་ཛྙ་ན་ཤཱ་ཀུནྟ་ལཱ་ན་ཊ་ཀ་ནཱ་མཱ།། བོད་སྐད་དུ། བྱ་ལེན་མ ་མངོན་པར་ཤེས་པའི་ཟློས་གར་ཞེས་བྱ་བ།། སངས་རྒྱས་ལ་ཕྱག་འཚལ་ལོ།།

བྱེད་པོས་བྱས་པ་དང་པོ་གང་ཡིན་ཆོ་གས་ཕུལ་བའི་སྦྱིན་སྲེག་སྦྱིན་དང་ལེ་པོ་སུ།། གང་ལ་ཐོས་པའི་ཡུལ་གྱི་དཔལ་ལྡན་གང་གིས་ཀུན་ཁྱབ་གཉིས་པོ་གང་གིས་དུས་རྣམས་བྱས།། གང་ལ་ཀུན་གྱི་ས་བོན་ཞེས་བྱ་གང་གིས་མ་ལུས་སྐྱེ་རྒུ་གསོན་ཅིང་འཚོ་བྱེད་པའི།། མངོན་སུམ་ཉིད་ཀྱི་སྐུ་བརྒྱད་མངའ་བའི་དབང་ཕྱུག་དེ་ཡིས་ཁྱེད་ཅག་ཀུན་ཏུ་བསྲུང་གྱུར་ཅིག།།

དགའ་ལྡན་གྱི་མཐའ་ལ། མདོ་འཛིན་པས། ཡོལ་བ་ལ་གདོང་ཕྱོགས་ཏེ། འཕགས་མ༑ གལ་ཏེ་ཆས་བསྒྱུར་བའི་བྱ་བ་རྣམས་གྲུབ་ན་ཚུར་བྱོན་ཅིག། གར་མ། ནང་དུ་ཞུགས་ནས། རྗེའི་སྲས། བདག་འདི་ཡིན་ནོ།། གང་བགྱི་བར་འོས་པ་བཀའ་སྩོལ་ཅིག། མདོ་འཛིན་པས། འཕགས་མ༑ དེ་རིང་ཚོགས་འདི་དག་ནི་ཀུན་ནས་ཡིད་དུ་འོང་བ་ཉིད་ཡིན་ན། བདག་ཅག་གིས་དངོས་པོ་གང་ཞིག་ནག་མོའི་འཁོལ་ གྱིས་མེ་ཏོག་གི་ཕྲེང་རྒྱུད་དུ་བྱས་པ། བྱ་ལེན་མ་མངོན་པར་ཤེས་པ་ཞེས་བྱ་བའི་ཟློས་གར་གསར་པའི་སྐྱེས་ཀྱིས་བསྟབ་པར་བྱའོ། དེའི་སླད་དུ་སྣོད་ སོ་སོ་ནས་བརྩོན་པ་སྦྱིན་པར་རིགས་སོ།། གར་མས། འཕགས་པ༑ ཁྱོད་ནི་མཁས་པའི་ཐབས་ཀྱིས་རབ་ཏུ་སྦྱོར་བ་བྱེད་པར་འགྱུར་བས། སུ་ཞིག་གིས་ཀྱང་འཕྱ་བའི་གནས་སུ་འགོད་པར་མི་བྱེད་དོ།། མདོ་འཛིན་པས། ཅུང་ཟད་བགད་ནས། མཁས་རྣམས་དགྱེས་པ་འབྱུང་གི་བར།། རབ་སྦྱོར་ལེགས་ཞེས་བདག་མི་སེམས།། སློབ་པ་རྣམས་ཀྱི་རང་གི་བློ།། སྟོབས་དང་ལྡན་ཡང་ཡིད་རྟོན་ཅི།། གར་མས། གུས་པ་དང་བཅས་པས། འཕགས་པ༑ དེ་དེ་བཞིན་ནོ།། ད་ནི་གང་ཞིག་བགྱི་བར་བྱ་བ་བཀའ་སྩོལ་ཅིག མདོ་འཛིན་པས། ཚོགས་ཀྱི་རྣ་བ་གསལ་བར་བྱེད་པ་ལས་གཞན་ཅི་ཞིག། གར་མས། ནམ་ཟླ་གང་གི་དུས་མངོན་དུ་བྱས་ནས་གླུ་བླངས་པར་བགྱི།། མདོ་འཛིན་པས། ཚ་བའི་དུས་ཀྱི་ལོངས་སྤྱོད་བྱུང་ནས་རིང་པོ་མ་ལོན་པས་དེ་མངོན་དུ་བྱོས་ལ་གླུ་ལོངས་ཤིག། ད་ལྟ་ནི། དྲི་ཞིམ་མེ་ཏོག་རྡུལ་གཡོ་བའི། །སྐལ་བཟང་ནགས་ཀྱི་བསེར་མ་ཅན།། མངོན་པར་དགའ་བའི་གྲིབ་བསེལ་ནི། །འབད་མེད་རྙེད་པ་ཉིན་མོའི་མཐའ།། གར་མས། དེ་དེ་བཞིན་ནོ།། ཞེས་གླུ་བླངས་པ། རབ་གཉེན་གེ་སར་གཞོན་ནུའི་རྩེ་མོ་ལ།། རེག་ཙམ་བུང་བའི་ཚོགས་ཀྱིས་འོ་བྱེད་པའི།། ལེགས་ལྡན་ཤི་རི་ཥཿ ་ཡི་མེ་ཏོག་འདི།། ཀུན་ཏུ་མྱོས་པ་རྣམས་ཀྱིས་རྒྱན་དུ་འཛིན།། མདོ་འཛིན་པས། འཕགས་མ༑ གླུ་ལེགས་པར་བླངས་སོ།། དབྱངས་ཀྱིས་བཅིངས་པའི་ཚོགས་ཀྱི་དཀྱིལ་འཁོར་འདི་དག་རི་མོའི་གཟུགས་བརྙན་བཞིན་དུ་སྣང་ངོ་།། ད་ནི་བར་ཏུ་སྦྱོར་བ་གང་ལ་བརྟེན་ནས་སྐྱེས་འབུལ་བར་བྱ། གར་མས། འོ་ན་འཕགས་པས་སྔོན་བཀའ་སྩལ་པ་བྱ་ལེན་མ་མངོན་པར་ཤེས་པ་ཞེས་བྱ་བའི་སྔོན་མེད་པའི་ཟློས་གར་གྱི་བར་ཏུ་སྦྱོར་བ་ལ་བརྟེན་ཏེ་བྱའོ།། མདོ་འཛིན་པས། ཨེ་མ༑ འཕགས་མས་སྐད་ཅིག་འདི་ལ་ཡང་དག་པར་རྗེས་སུ་དྲན་པར་བྱས་སོ།། བདག་གིས་ནི་བརྗེད་དེ། གང་གི་ཕྱིར། ཇི་ལྟར་མི་སྐྱོང་དུཤྱནྟ། །རི༌དགས༌གཞོན༌ནུས༌དྲངས༌པ༌ལྟར།། ཁྱོད༌ཀྱི༌གླུ༌དབྱངས༌འཕྲོག༌བྱེད༌ཀྱིས། །འདིར༌ནི༌ཁོ༌བོ༌རིང༌དུ༌དྲངས།། ཞེས༌ཟླས༌ནས༌གཉིས༌ཀ༌སླར་ལོག༌གོ། ཞེས༌པ༌རབ༌བསྟོད༌དོ།།


ཡན༌ལག༌དང༌པོ༌ནི། དེ་ནས་རི་དྭགས་ཀྱི་རྗེས་སུ་འགྲོ་བའི་རྒྱལ་པོ་ལག་ན་མདའ་གཞུ་ཅན་ཤིང་རྟ་ལ་ཞོན་པ་ཁ་ལོ་པ་དང་བཅས་པ་བྱུང་ནས། ཁ༌ལོ༌པས། རི༌དྭགས༌དང༌རྒྱལ༌པོ༌ལ༌བལྟ༌བཞིན། བྷོ༑ ཚེ༌དང༌ལྡན༌པ༑ བཀང༌བའི༌གཞུ༌ལ༌མདའ༌བརྟེན༌ཅིང༌། །ཀྲིཥྞ་སཱ་ར༌ བལྟ༌བ༌ཁྱོད།། རི༌སྐྱེས༌བུ༌ ཡི༌རྗེས༌སྙེགས༌པའི། །མདའ༌ལྡན་ མངོན༌སུམ༌བཞིན༌དུ༌མཐོང༌།། རྒྱལ༌པོས། ཀྱེ༌ཁ༌ལོ༌པ༑ རི༌དྭགས༌འདིས༌ཡུ༌བུ༌ཅག༌རྒྱང༌རིང༌པོར༌དྲངས་ན། དེ་ནི༌ད༌དུང༌ཡང༌་་་་། སྒེག༌པའི༌མགྲིན༌པ༌འཁྱོག༌པོའི༌གདོང༌གིས༌སྐད༌ཅིག༌རེ༌བཞིན༌ཤིང༌རྟ༌ལ༌ནི༌བལྟ༌བྱེད༌ཅིང༌།། རྣོན༌པོའི༌ཉག༌ཕྲན༌ འབབ༌ལ༌འཚེར༌བས༌རོ༌སྨད༌དག༌ནི༌བྲང་གི༌ཁོངས༌སུ༌སྡུད༌པར༌བྱེད།། ངལ༌བའི༌ཁ༌ནས༌ཀུན༌ཏུ༌ལྷུང༌བའི༌ཕྱེད༌ཟས༌རྩ༌རྣམས༌ལམ༌གྱི༌ངོས༌སུ༌བཀྲམ༌བཞིན༌དུ།། རྨིག༌རྩེ༌ས༌ལ༌ཡུད༌ཙམ༌རེག༌སྟེ༌ནམ༌མཁའི༌དབྱིངས༌ན༌མཆོངས༌ཤིང༌རྒྱུགས༌པར༌བྱེད༌ལ༌ལྟོས།། ངོ༌མཚར༌དང༌བཅས། ཀྱེ་མ་རི་དྭགས་འདི་དེང་ཁོ་ནར་རྗེས་སུ་འགྲོ་བ་བདག་ཅག་གིས་བསྒྲིམ་སྟེ་མཐོང་བར་བྱ་བའི་ཡུལ་ཉིད་དུ་གྱུར་ཏོ།། ཁ་ལོ་པས། ཚེ་དང་ལྡན་པ༑ བདག་གིས་ས་འབུར་གཤོངས་ཅན་དུ་མཐོང་ནས་སྲབ་འཐེན་ཏེ། དེའི་ཕྱིར་འདི་རིང་དུ་གྱུར་ཏོ། འོན་ཀྱང་ད་ནི་ཐང་འཁོད་སྙོམས་པར་སླེབས་པས་དཀའ་ཚེགས་མེད་དོ།། རྒྱལ་པོས། དེའི་ཕྱིར་སྲབ་གློད་ཅིག ཁ་ལོ་པས། གང་ཚེ་དང་ལྡན་པས་བཀའ་གནང་པའོ།། ཞེས་སྲབ་ལྷོད་པོར་བྱས་ནས་ཤིང་རྟའི་ཤུགས་ལ་ལྟ་བཞིན་དུ། ཚེ་དང་ལྡན་པ༑ གཟིགས་ཤིག༑ གཟིགས་ཤིག༑ སྲབ་ལས་ཐར་ནས་མགྱོགས་འགྲོ་ འདི་རྣམས་གཉའ་བ་ཀུན་ཏུ་བརྐྱངས་གྱུར་ཅིང་།། གཡོ་མེད་འགྲེང་བའི་རྔ་ཡབ་ཅོད་པན་ སྤྱི་བོའི་གཙུག་ན་ལྷང་ངེར་གནས།། རང༌གིས༌བཙུབ༌པའི༌ཆེ༌བའི༌རྡུལ༌གྱི༌རྡུལ༌ཕྲན༌དག༌ཀྱང༌མ༌རེག༌པར།། རི༌དྭགས༌བང༌ལ༌འགྲན༌པ༌བཞིན༌དུ༌རྣ༌བ༌ཀྲོང༌ཞིང༌རྒྱུགས༌པར༌བྱེད།། རྒྱལ༌པོས། དགའ༌བ༌དང༌བཅས། བདེན་པ་ཉིད་དོ། རྟ་ལྗང་ཁུ་ ཡང་ཕམ་པར་བྱེད་པ་བདག་ཅག་གི་རྟ་འདི་དག་གོ། དེ་བཞིན་དུ། བདག་ལ་གློ་བུར་ཕྲ་རབ་དག་ཀྱང་ཆེ་བའི་ཕུང་པོ་ཉིད་དུ་སྣང་།། རང་བཞིན་ཉིད་ཀྱིས་འཁྱོག་པ་དག་ཀྱང་རིམ་པ་གཅིག་པའི་དྲང་པོར་གྱུར།། སོ་སོར་ཆད་པའི་ཆ་ཤས་ཀུན་ཀྱང་ལྷན་ཅིག་འབྱར་བའི་རྒྱུད་དུ་སྟེ།། སྐད་ཅིག་རེ་ལ་མཐོང་བའི་ཆ་རྣམས་རྒྱང་ན་མ་ཡིན་དྲུང་ན་མིན།། ཀྱེ༌ཁ༌ལོ༌པ༑ མཛེས༌པ༌འདི༌ལ༌ལྟོས༌ཤིག ཅེས༌མདའ༌བཀང༌ངོ༌།

ཡོལ་བའི་ཕུག་ནས། ཀྱེ་ཀྱེ་རྒྱལ་པོ༑ མ་གསོད་ཅིག བསྟི་གནས་ ཀྱི་རི་དྭགས་འདི་མ་གསོད་ཅིག ཁ༌ལོ༌པས། མཉན༌ཅིང༌བལྟས༌ནས། ཀྱེ༌ཚེ༌དང༌ལྡན༌པ༑ མདའ་བའི་ལམ་དུ་མཆིས་པའི་ཀྲྀཥྞ་སཱ་ར་དང་། ཁྱོད་ཀྱི་བར་འདིར་དཀར་ཐུབ་པ་ཞིག་ཉེ་བར་གནས་སོ།། རྒྱལ༌པོས། འོ༌ན༌རྟ༌རྣམས༌མྱུར༌དུ༌ཟུངས༌ཤིག། ཁ༌ལོ༌པོས། དེ་བཞིན་ནོ། ཞེས་ཤིང་རྟ་བཀག་གོ དེ་ནས་རང་ཉིད་གཉིས་དང་བཅས་པའི་བཀའ་ཐུབ་པ་ ནང་དུ་སླེབས་ཏེ། དཀའ་ཐུབ་པས། ཐལ་མོ་བློང་བཞིན། ཀྱེ་མ་རྒྱལ་པོ། མ་གསོད་ཅིག བསྟི་གནས་ཀྱི་རི་དྭགས་འདི་མ་གསོད་ཅིག། མ་ཡིན་མ་ཡིན་འཇམ་པའི་རས་བལ་དག་ལ་དྲག་པོའི་མེ་ལྕེ་བཞིན།། མཛེས་པའི་རི་དྭགས་འདི་ཡི་ལུས་ལ་སྒྲོ་ལྡན་ མཚོན་གྱིས་མ་བཏབ་ཅིག། ཨ་ཧོ་སྡུག་གུ་ཉམ་ཆུང་འདི་ཡི་འདར་བའི་སྲོག་ནི་ཅི་ཙམ་ཞིག། རྡོ་རྗེའི་སྙིང་པོ་རྣོ་ངར་འབབ་པ་ཁྱོད་ཀྱི་ཉག་ཕྲན་ཅི་ལྟ་ཞིག།

རྒྱལ་པོ་དེའི་ཕྱིར་ལེགས་པར་སྦྱར་བ་ཡི།། མདའ་འདི་བོར་ཅིག་གང་ཕྱིར་ཁྱོད་ཀྱི་མཚོན།། ཉོན་མོངས་སྐྱེས་བུ་བསྲུང་བའི་སླད་དུ་སྟེ།། ཉེས་པ་མེད་རྣམས་གཞོམ་པའི་སླད་དུ་མིན།།

རྒྱལ་པོས། གུས་པ་དང་བཅས་གཞུ་རྒྱུད་ལྷོད་དེ། འདི་མི་བསད་དོ། ཞེས་སྨྲས་ནས་དེ་བཞིན་དུ་བྱས་སོ།། དཀའ་ཐུབ་པས། དགའ་བ་དང་བཅས། པུ་རིའི་རིགས་ཀྱི་སྒྲོན་མ་ ཁྱོད་ནི་ཆོས་བཞིན་དུ་མཛད་དོ།། འདི་ལྟར་གང་དུ་འཁྲུངས་གྱུར་པའི། །པུ་རིའི་རིགས་ཀྱི་ཆོས་བཞིན་དུ།། ལེགས་མཛད་ཡོན་ཏན་ལྡན་པ་གང་། འཁོར་ལོས་བསྒྱུར་བའི་སྲས་འགྲུབ་ཤོག།

གཞན་གཉིས་ཀྱང་། ལག་པ་གྱེན་དུ་བཏེག་སྟེ། ངེས་པར་འཁོར་ལོས་བསྒྱུར་བའི་སྲས་ཉིད་དང་ལྡན་པར་ཤོག་ཅིག། དཀའ་ཐུབ་པས། ཀྱེ་རྒྱལ་པོ། འདི་ནི་ཆུ་ཀླུང་ཕྲེང་ལྡན་མའི་འགྲམ། རིགས་ཀྱི་བདག་པོ་ཀ་ན་ཝའི་ བསྟི་གནས་ལགས་ཏེ། བདག་ཅག་ཡམ་ཤིང་ འཐུ་རུ་འགྲོ་བ་ལགས་ན། གལ་ཏེ་བགྱི་བ་གཞན་མེད་ན་མགྲོན་གྱི་བཀུར་བསྟི་དག་བཞེས་པར་རིགས་སོ།། གཞན་ཡང་།

སྙིང་རྗེར་འོས་པའི་དཀའ་ཐུབ་ལུས་ཅན་ཡང་།། ཡིད་འོང་ལས་ཀྱིས་ཕས་རྒོལ་གཞོམ་བྱས་ཏེ།། གཞུ་རྒྱུད་དྲེགས་པའི་མཚན་མ་ཆགས་པའི་ཕྱག། ཇི་ལྟར་བསྲུང་བ་གཟིགས་ན་མཁྱེན་པར་འགྱུར།།

རྒྱལ་པོས། རིགས་ཀྱི་བདག་པོ་ འདིར་བཞུགས་སམ། དཀའ་ཐུབ་པས། ད་ལྟ་ནི་བུ་མོ་བྱ་ལེན་མ་གྲོང་པ་རྣམས་ཀྱི་བཀུར་བསྟིའི་ཡུལ་ཉིད་དུ་བཞག་ནས། མོའི་བསོད་ནམས་ཀྱི་མི་མཐུན་པ་དག་ཞི་བར་བྱ་བའི་སླད་དུ་ཀུན་ཏུ་རྒྱུའི་ཟླ་བ་ ལ་གཤེགས་སོ།། རྒྱལ་པོས། འོ་ན་བདག་ཅག་གིས་ཇི་ལྟར་གུས་པར་བྱས་པ་རྣམས་སྲས་མོས་གཟིགས་ནས་དྲང་སྲོང་ཆེན་པོ་ལ་སྦྲན་པར་འགྱུར་ཏུ་ངེས་པས། བདག་ཅག་དེར་མཆིའོ།། དཀའ་ཐུབ་པས། ལེགས་སོ།། འོ་ན་བདག་ཅག་སྔོན་དུ་འགྲོ་བར་འཚལ་ལོ།། ཞེས་སློབ་མ་དང་བཅས་སོང་ངོ།།

རྒྱལ་པོས། ཀྱེ་ཁ་ལོ་པ༑ བསོད་ནམས་ཀྱི་གཞི་བལྟ་བ་ནི་རང་ཉིད་དག་པར་བྱེད་པ་ཡིན་པས། རྟ་རྣམས་ཁ་སྒྱུར་ཅིག། ཁ་ལོ་པས། གང་ཚེ་དང་ལྡན་པས་བཀའ་སྩལ་པའོ། ཞེས་སླར་ཡང་ཤིང་རྟའི་ཤུགས་སྣང་བར་བྱས་སོ།། རྒྱལ་པོས་ཕྱོགས་ཀུན་ཏུ་བལྟས་ཏེ། ཀྱེ་ཁ་ལོ་པ༑ རེ་ཞིག་མ་སྨོས་ན་ཡང་ཕྱོགས་འདི་ནི་དཀའ་ཐུབ་ཀྱི་ནགས་ཚལ་ཡིན་ནོ་ཞེས་བདག་གིས་ཤེས་སོ།། ཁ་ལོ་པས། ཅི་ལྟར།

རྒྱལ་པོས། ཅི་ཁྱོད་མི་མཐོང་ངམ། ཤིང་སྦུབས་ནེའུ་ཙོའི་ཚང་ནས་ལྷུང་བའི་མ་རྨོས་སཱ་ལུ་ ལྗོན་པ་རྣམས་ཀྱི་དྲུང་ན་སྟེ།། འགའ་ཞིག་དག་ན་ཨངྒུ་དི་ཡི་འབྲས་བུ་བརྡུང་བའི་སྣུམ་གྱིས་བགོས་པའི་རྡོ་དག་མཐོང་།། ཆུ་ངོགས་ལམ་གྱི་ངོས་རྣམས་ཀུན་ན་ཤིང་ཤུན་གོས་ཀྱི་འདབ་མ་ཞུ་བའི་ཆུ་ཐིག་སྟེ།། ཡིད་བརྟན་ཐོབ་སླད་མྱུར་དུ་མི་འབྲོས་རི་དྭགས་ཚོགས་རྣམས་ཅ་ཅོའི་སྒྲ་ལ་འཇིགས་མི་བྱེད།། གཞན་ཡང་། རླུང་གིས་བསྐྱོད་པའི་ཆུ་ངོགས་རླབས་ཀྱིས་རྩ་བ་བཀྲུས་པའི་ཡལ་ག་ཅན།། སྦྱིན་སྲེག་དུ་བའི་ཚོན་གྱིས་བསྒྱུར་བའི་རྣམ་པ་གཞན་གྱི་ལོ་འདབ་འཛིན།། ཀུ་ཤ་གཞོན་ནུའི་མྱུ་གུ་འཐོར་བའི་ཉེ་བའི་ས་ཡི་མཐོང་དག་ནས།། འཇིགས་པ་མེད་པའི་རི་དགས་བུ་རྣམས་མདུན་གྱི་ངོས་སུ་དལ་བུར་རྒྱུ།། ཁ་ལོ་པས། བལྟས་ནས། ཐམས་ཅད་དེ་དེ་བཞིན་ནོ།། རྒྱལ་པོས། ཀྱེ་ཁ་ལོ་པ༑ དཀའ་ཐུབ་པ་རྣམས་ལ་མི་གནོད་པའི་ཕྱིར་ཤིང་རྟ་འདིར་ཞོག་ཅིག བདག་འབབ་པར་བགྱིའོ།། བབས་ནས། ཀྱེ་ཁ་ལོ་པ༑ ང་ཞི་བའི་ཆས་ཀྱིས་བསྟི་གནས་སུ་འདོང་བར་བྱ་ཡི་འདི་རྣམས་ལོངས་ཤིག། ཅེས་མདའ་གཞུ་དང་རྒྱན་ཕུད་ནས་གཏད་དོ། ཀྱེ་ཁ་ལོ་པ༑ ཇི་སྲིད་དུ་ང་བསྟི་གནས་ནས་ལྡོག་གི་བར་ཁྱོད་འདིར་སྡོད་ལ་རྟ་རྣམས་ཀྱི་རྒྱབ་བསིལ་བར་གྱིས་ཤིག། ཁ་ལོ་པས། དེ་བཞིན་ནོ།། ཞེས་སྨྲ་ནས་སོང་ངོ་།། རྒྱལ་པོས། ཅུང་ཟད་འཆག་ སྟེ་ཀུན་ཏུ་བལྟས་ནས། འདི་ནི་བསྟི་གནས་ཀྱི་སྒོ་ཡིན་ནོ།། འོ་ན་བདག་འཇུག་པར་བགྱིའོ།། ཞུགས་པ་དང་མཚན་མ་མཐོང་ནས་ངོ་མཚར་དང་བཅས། དཀའ་ཐུབ་དགོན་པར་དཔུང་པ་འགུལ་གྱུར་ན།། ཞི་བའི་ནགས་སུ་འདི་ལ་འབྲས་བུ་གང་།། འོན་ཏེ་ཡང་ན་མ་འོངས་དངོས་པོ་རྣམས།། འབྱུང་བའི་སྒོ་ནི་ཕྱོགས་རྣམས་ཀུན་ན་མཆིས།།

ཡོལ་བའི་ཕུག་ནས། འདི་ན། འདི་ན། གྲོགས་མོ༑ རྒྱལ་པོས། རྣ་བ་གཏད་དེ། ཨེ་མ། སྐྱེད་ཚལ་གྱི་ལྗོན་པའི་གཡོན་ལོགས་ནས་གཏམ་འདྲ་བ་མཐོས་སོ།། འོ་ན་དེར་འགྲོ་བར་བྱའོ།། ཅུང་ཟད་སོང་བ་དང་བལྟས་ནས། ཨེ་མ། དྲང་སྲོང་གི་བུ་མོ་རྣམས་རང་རང་གི་བོང་ཚོད་དང་འཚམ་པའི་བུམ་པ་དག་ཐོགས་ཏེ་ཤིང་གཞོན་ནུ་རྣམས་ལ་ཆུ་འགྲེམས་པའི་སླད་དུ་འོངས་སོ།། ཨེ་མ་ཧོ། འདི་དག་གི་བྱད་ཀྱི་མཛེས་སྡུག གལ་ཏེ་སླས་ སུ་རྙེད་དཀའི་ལང་ཚོ་མ།། དཀའ་ཐུབ་ནགས་ཀྱི་ལུས་ཅན་འདི་དག་ན།། ནགས་ཀྱི་འཁྲི་ཤིང་རང་གི་ཡོན་ཏན་གྱིས།། ཀུན་དགའ་རྭ་བའི་འཁྲི་ཤིང་ཕམ་པ་ཉིད།། འོ་ན་ཤིང་གི་གྲིབ་མ་འདི་ལ་ཡིབ་ནས་བལྟ་བར་བྱའོ།། ཞེས་དེ་བཞིན་དུ་དང་བྱས་སོ།།

བྱ་ལེན་མས། འདི་ན༑ འདི་ན༑ གྲོགས་མོ༑ མ་སྨད་མས། ཀྱེ་བྱ་ལེན་མ༑ མེས་པོ་ཀ་ན་ཝ་ནི་ནགས་ཀྱི་མལླི་ཀའི་མེ་ཏོག་དང་འདྲ་བའི་མཛེས་མ་ཁྱོད་ཀྱང་ཤིང་ལ་ཆུ་འགྲེམ་པའི་སླད་དུ་བསྐུལ་ན། ཅི་བསྟི་གནས་ཀྱི་ཤིང་ཕྲན་འདི་དག་ལ་ཁྱོད་ལས་ཀྱང་བྱམས་པ་ཉིད་དུ་ལྟ། བྱ་ལེན་མས། ཡབ་ཀྱི་བཀའ་ཁོ་ན་མ་ཡིན་གྱི་བདག་རང་ཉིད་ཀྱང་ཤིང་ལྗོན་པ་འདི་དག་ལ་སྤུན་གྱི་བརྩེ་བ་ཉིད་མཆིས་སོ།། ཞེས་ཤིང་ལ་རྫིང་སྐྱིལ་བར་བྱེད་དོ།། རྒྱལ་པོས། རང་ལ། (ཆིག་ལབ་ཏུ་) ཀ་ན་ཝའི་བུ་མོ་ནི་འདི་ཡིན་ནོ།། ངོ་མཚར་དང་བཅས། ཀྱེ་མ༑ ཀ་ན་ཝ་ནི་ལེགས་པར་མི་སེམས་པ་ཉིད་དེ། གང་གི་ཕྱིར་བུ་མོ་འདི་འདྲ་བ་ཡང་བསྟི་གནས་ཀྱི་ཆོས་སུ་བཅུག་གོ། ཐུབ་པ་གང་ཞིག་ཡིད་འཕྲོག་འདི་ལུས་ཀྱིས།། ངེས་པར་དཀའ་ཐུབ་གྲུབ་པ་དོན་གཉེར་བ།། དེ་ནི་ཨུཏྤལ་སྔོན་པོའི་འདབ་མ་ཡིས།། མཆོད་སྦྱིན་ ཡམ་ཤིང་གཅོད་ལ་བརྩོན་པ་ཉིད།། འོ་ན་ཤིང་གི་གསེབ་ཏུ་བག་ལྷོད་ལ་བལྟ་བར་བྱའོ།། ཞེས་དེ་བཞིན་དུ་བྱས་སོ།།

དེ་ནས་བཤད་པར་ལྟར་གྱི་ལས་བྱེད་པའི་བྱ་ལེན་མ་གྲོགས་མོ་གཉིས་དང་བཅས་པ་སླེབས་ནས། བྱ་ལེན་མས། ཀྱེ་གྲོགས་མོ་མ་སྨད་མ༑ པྲི་ཡཾ་བ་དཱས་བདག་ལ་ཤིང་ཤུན་བསྐོན་པ་འདི་ཤིན་ཏུ་ཡང་བསྡམས་པ་གྱུར་གྱིས། ཅུང་ཟད་གློད་ཅིག། མ་སྨད་མས། དེ་བཞིན་དུ་བྱའོ།། ཞེས་ལྷོད་པོར་བྱས་སོ།། པྲི་ཡཾ་བ་དཱས། གད་མོ་དང་བཅས། ཀ་ཡེ༑ བྱ་ལེན་མ༑ ཁྱོད་རང་གི་ནུ་མ་འཕེལ་བར་བྱེད་པའི་རང་ཉིད་ཀྱི་ལང་ཚོ་ལ་སྐྱོན་བརྗོད་པར་རིགས་ཀྱི་བདག་ལ་སྐྱོན་དུ་མ་སྨྲ་ཞིག། རྒྱལ་པོས། (རང་ལ་) ལེགས་པར་སྨྲས་སོ།། ཕྲག་པའི་ཡུལ་དུ་ཕྲ་མོའི་མདུད་པ་བཅས།། ནུ་མའི་འབུར་གྱིས་མཐོ་བའི་ཤིང་ཤུན་འདིས།། ལོ་མ་སེར་སྐྱེས་གཡོགས་པའི་མེ་ཏོག་བཞིན།། གཞོན་ལུས་འདི་ལ་ལང་ཚོ་སྤེལ་བ་བྱས།། ཡང་བསམ་ནས། རྣམ་པ་གཅིག་ཏུ་ན་ཤིང་ཤུན་འདི་འདིའི་ཚེ་དང་མི་མཐུན་དུ་ཆུད་ཀྱང་ཅིའི་ཕྱིར་འདི་ལ་རྒྱན་གྱི་བྱ་བ་དག་ཀྱང་མ་བྱས།། འདམ་བུའི་ཚལ་ན་མཚོ་སྐྱེས་མཛེས་པ་སྟེ།། ར་རིས་བརྒྱན་པའི་ཟླ་བ་ཡིད་འོང་ཉིད།། ཤིང་ཤུན་གྱོན་ཡང་ཕྲ་ལ་ལྡེམ་པའི་ལུས།། མཛེས་སྡུག་ཅན་ལ་རྒྱན་དུ་མི་འགྱུར་གང་། བྱ་ལེན་མས། སྔོན་དུ་བལྟས་ནས། ཀེ་ས་རའི་ཤིང་ལྗོན་པ་འདིས་རླུང་གིས་བསྐྱོད་པའི་སོར་མོས་བདག་ལ་འབོད་པར་བྱེད་དོ།། འོ་ན་འདིར་འགྲོ་བར་བྱའོ།། བྱ་ལེན་མ་དེར་སོང་ནས་ཤིང་ལ་སྙེས་ཏེ་འགྲེང་བཞིན་གནས། པྲི་ཡཾ་བ་དཱས། ཀྱེ་བྱ་ལེན་མ༑ འདིར་ཅུང་ཟད་སྡོད་ཅིག ཁྱོད་དང་ལྷན་ཅིག་པའི་ཀེ་ས་རའི་ཤིང་ལྗོན་པ་འདི་འཁྲི་ཤིང་དང་བཅས་པ་བཞིན་དུ་མཐོང་ངོ་།། བྱ་ལེན་མས། ཀྱེ༑ དེའི་ཕྱིར་ཁྱོད་པྲི་ཡཾ་བ་དཱ། ཡིན་ནོ།། རྒྱལ་པོས། རང་ལ། སྨྲ་འཇམ་མ་ཡིན་དུ་ཟད་མོད། སྨྲས་པ་དེ་ནི་དེ་ཁོ་ན་བཞིན་ནོ།། གསར་སྐྱེས་འདབ་མའི་མདངས་ལྡན་མཆུ་ཡི་སྒྲོས།། ཡིད་འོང་ལྕུགས་མའི་རྗེས་བྱེད་ལག་པ་ཟུང་།། ཡང་དག་འདོད་བྱ་མེ་ཏོག་ལྟ་བུ་ཡི།། ལང་ཚོའི་དཔལ་གྱིས་ཡན་ལག་རྣམས་ལ་འཁྱུད།། མ་སྨད་མས། ཀྱེ་བྱ་ལེན་མ༑ ཁྱོད་གང་ལ་ནགས་ཀྱི་འོད་ཟེར་མ་ ཞེས་རྟག་ཏུ་འབོད་པ། བདག་པོ་ཨ་མྲའི་རྐང་འཐུང་གི་ཆུང་མར་གྱུར་པའི་མལླི་ཀ་གསར་པ་འདི་མཆིས་ན། ཅི་ཁྱོད་དེ་ལ་ཆུ་སྦྱིན་པ་བརྗེད་པར་གྱུར་ཏམ། བྱ་ལེན་མས། དེ་བརྗེད་པ་ནི་བདག་ཉིད་བརྗེད་པ་ཡིན་ནོ།། འཁྲི་ཤིང་ལ་བལྟས་ནས། ཨེ་མ། འཁྲི་ཤིང་གཞོན་ནུ་མ་རྐང་འཐུང་དང་བཅས་པ་འདི་ལ་ཡིད་འཕྲོག་པའི་དུས་ཀྱི་འགྱུར་བ་དག་གསལ་ཏེ། ནགས་ཀྱི་འོད་ཟེར་མའི་ལང་ཚོའི་མེ་ཏོག་ནི་ཤར། འཇམ་ལ་མཉེན་པའི་ཨམྲའི་ལོ་འདབ་རྣམས་ནི་ལོངས་སྤྱོད་པར་འོས་པ་ཉིད་དུ་གྱུར་ཏོ།། པྲི་ཡཾ་བ་དཱས། འཛུམ་དམུལ་ཏེ། མ་སྨད་མ༑ གང་གི་སླད་དུ་བྱ་ལེན་མ་ནགས་ཀྱི་འོད་ཟེར་མ་ལ་ནན་ཏན་ཏུ་ལྟ་བར་བྱེད། མ་སྨད་མས། གྲོགས་མོ༑ མི་ཤེས་ཀྱི་སྨོས་ཤིག། པྲ་ཡཾ་བ་དཱས། ཇི་ལྟར་ནགས་ཀྱི་འོད་ཟེར་མ་འདི་མཐུན་པའི་རྐང་འཐུང་དང་ལྷན་ཅིག་པ་བཞིན་དུ་བདག་ཀྱང་བདག་ཉིད་མཐུན་པའི་བདག་པོ་དང་ལྷན་ཅིག་ཏུ་ནམ་ཞིག་ན་གནས་པར་འགྱུར་སྙམ་དུ་རྗེས་སུ་སེམས་ཤིང་བལྟའོ།། བྱ་ལེན་མས། སྨད་དུ་བྱུང་བ་དང་བཅས། ཁྱོད་རང་ཉིད་དེ་ལྟར་འདོད་པ་ཡིན་ནོ།། ཞེས་བུམ་པ་བཏེགས་སོ།། རྒྱལ་པོས། རང་ལ། ཀྱེ་མ༑ འདི་ནི་རིགས་ཀྱི་བདག་པོའི་རང་རིགས་ཀྱི་ཞིང་ལས་བྱུང་བ་ཡིན་པས་དེ་ལྟ་ན་ནི་རིགས་མཆོག་གི་བྲམ་ཟེ་བུ་མོ་རྒྱལ་རིགས་ལ་ཅི་ལྟར་སྦྱིན། ཡང་ན་ནི་རྟོག་པ་དོན་མ་མཆིས་པ་ཉིད་དེ། རང་སེམས་འཕགས་པས་འདམ་ཕྱིར་ན་ཅུང་འདི།། ངེས་པར་རྒྱལ་པོའི་རིགས་ཀྱིས་བཟུང་བྱར་ཤེས།། གང་ཕྱིར་ཐེ་ཚོམ་དོན་ལ་དཔྱོད་པ་ན།། དམ་པ་རྣམས་ལ་རང་བློ་ཚད་མ་ཉིད།། འོན་ཀྱང་འདིའི་ངེས་པ་ཉིད་མོ་ལས་ཤེས་པར་བྱའོ།།

བྱ་ལེན་མས། འཇིགས་པ་དང་བཅས། ཨེ་མ༑ ཆུའི་ཉར་མ་ ཕོགས་པ་ལས་སྦྲང་རྩི་བྱེད་པ་ རྣམས་མལླི་ཀ་བོར་ནས་བདག་གི་གདོང་ལ་འོངས་སོ།། ཞེས་སྨྲས་པ་དང་སྦྲང་རྩི་བྱེད་པ་རྣམས་གར་བྱེད་དོ།། རྒྱལ་པོས། རང་ལ་བལྟས་ནས། ཨེ་མ༑ རེ་ཞིག་འདི་འཇིགས་པའི་དབང་གིས་གདོང་བསྒྱུར་པ་ཉིད་ཀྱང་ཡིད་དུ་འོངས་པ་ཉིད་ཡིན་ནོ།། གང་དང་གང་དུ་བུང་བ་ལྡིང་འཁོར་བ།། དེ་དང་དེ་རུ་རྣམ་པར་གཡོ་བའི་མིག། དེ་རིང་གློ་བུར་འཇིགས་པའི་བྲེད་ཤ་ འདིས།། མི་འདོད་མཛེས་མའི་རྣམ་འགྱུར་ཁྱོད་ལ་བརླབ།། སྨད་དུ་བྱུང་བ་དང་བཅས། རྣམ་པར་འཕྲུལ་བའི་བལྟ་བ་དང་བཅས་བསྐྱོད་ཅིང་བསྐྱོད་པའི་ལུས་ཅན་ལུས་ལ་རེག་བྱེད་ཅིང་།། ཉེ་བར་འཁོར་ནས་རྣ་བའི་དྲུང་དུ་གསང་བའི་གཏམ་བཞིན་འཇམ་པའི་དབྱངས་དག་བླངས་བྱས་ཏེ།། ཀུན་ནས་མྱོས་བྱེད་དམར་བའི་མཆུ་སྒྲོས་མ་ལུས་ཆང་གི་ཉིང་ཁུ་ལ་ནི་འཐུང་བྱེད་པ།། ཀྭ་ཡེ་རེ་འབྲས་རྫོགས་པའི་བུང་བ་དོན་དམ་བསམ་ན་ཁྱོད་ཀྱིས་ཁོ་བོ་བསད་པ་ཉིད།། བྱ་ལེན་མས། ངན་པ་འདི་དག་ད་དུང་ཡང་མི་འགྲོ་ན་བདག་གཞན་དུ་མཆིའོ།། གོམ་པ་འགའ་བོར་ནས་མིག་གཡོ་བཞིན། ཅི་ལྟ་བུ་ཞིག། འདིར་ཡང་སླེབས་སོ།། ཀྱེ༑ གྲོགས་མོ་དག༑ སྦྲང་བུ་མ་དུལ་བ་དག་གིས་བདག་གཙེར་པར་བྱས་ཀྱི་སྲུང་ཤིག གཉིས་ཀས། གད་མོ་དང་བཅས། བདག་ཅག་གིས་ག་ལ་བསྲུང་བར་ནུས། དཀའ་ཐུབ་ཀྱི་ནགས་ཚལ་འདི། གང་གིས་བསྲུང་བའི་རྒྱལ་པོ་དུཥྱནྟ་ལ་སྨོས་ཤིག། རྒྱལ་པོས། བདག་རྣམ་པར་གསལ་བའི་དུས་ནི་འདི་ཡིན་ནོ་སྙམ་ནས། མ་འཇིགས། ཞེས་ཕྱེད་ཙམ་སྨྲས་ནས། བདག་རྒྱལ་པོ་ཉིད་དུ་འཚལ་བར་འགྱུར་གྲང་། འོ་ན་འདི་ལྟར་སྨྲའོ།། བྱ་ལེན་མས། གོམས་སྟོབས་བཅས་མིག་གིས་བལྟས་ཏེ། ཅི་འདིར་ཡང་བདག་གི་རྗེས་སུ་འོངས་སོ།།

རྒྱལ་པོས། མྱུར་དུ་ཉེ་བར་སླེབས་ནས། ངན་པ་རྣམ་འཇོམས་གང་པོའི་རིགས། །ས་འདི་སྐྱོང་བར་གྱུར་བ་ན།། རྨོངས་མ་དྲང་སྲོང་བུ་མོ་རྣམས། །སུ་ཞིག་གིས་ནི་གཙེས་པར་བྱས།། ཐམས་ཅད་རྒྱལ་པོ་ལ་བལྟས་ནས་ཅུང་ཟད་ངོ་ཚ་བཞིན་གནས་སོ།།

མ་སྨད་མས། ཇོ་བོ༑ སུས་ཀྱང་གཙེས་པར་མ་བྱས་ཀྱི། བུང་བ་རྣམས་ཀྱིས་བདག་ཅག་གི་མཛའ་བོ་གྲོགས་མོ་འདི་ཞུམས་པར་བྱས་སོ།། ཞེས་བྱ་ལེན་མ་བསྟན་ནོ།། རྒྱལ་པོས། བྱ་ལེན་མ་ལ་མངོན་དུ་བལྟས་ཏེ། དཀའ་ཐུབ་འཕེལ་ལམ། བྱ་ལེན་མས། གདོང་བཏུད་དེ་ལན་མི་སྨྲ་བར་སྡོད་དོ།། མ་སྨད་མས། དེང་མགྲོན་གྱི་དམ་པ་སྩལ་ནའོ།། བྱ་ལེན་མ་ལ་ཕྱོགས་ཏེ། ཀྱེ་བྱ་ལེན་མ༑ སྤྱིལ་པོར་ སོང་ལ་ཤིང་འབྲས་དང་མཆོད་ཡོན་ཁྱེར་ལ་ཤོག་ཅིག། འདིས་ཞབས་བསིལ་བར་བགྱིའོ།། ཞེས་ཆུ་འབུམ་ལ་བལྟའོ།། རྒྱལ་པོས། ཁྱེད་ཅག་གིས་ལེགས་པར་འདོན་པའི་ཚིག་ཉིད་ཀྱིས་གློ་བུར་བའི་ བསྙེན་བཀུར་བསྟབ་ཟིན་ཏོ།། པྲི་ཡཾ་བ་དཱས། འོ་ན་ལོ་མ་བདུན་པའི་ འཇུག་སྟེགས་ ཀྱི་གྲིབ་བསིལ་འདིར་བཞུགས་ལ་སྙེལ་ བསངས་པར་མཛོད་ཅིག། རྒྱལ་པོས། འོ་ན་ཁྱེད་ཅག་ཀྱང་ལས་ཀྱིས་དུབ་པར་ཤེས་སོ།། མ་སྨད་མས། བྱ་ལེན་མ་གློ་བུར་བ་རྣམས་ལ་བསྙེན་པ་ནི་རིགས་པ་ཉིད་ཡིན་པས་བདག་ཅག་ཀྱང་འདིར་སྡོད་དོ།། བྱ་ལེན་མས། རང་ལ། ཅི་ལྟ་བུ་ཞིག་བདག་གིས་འདི་ལ་དྲང་སྲོང་གི་གནས་དང་མི་མཐུན་པའི་སེམས་ཀྱི་རྣམ་འགྱུར་དག་མཐོང་ངོ་།། རྒྱལ་པོས། གསུམ་ཀ་ལ་བལྟས་ནས། ཨེ་མ་ཁྱེད་ཅག་གཟུགས་དང་ན་ཚོད་མཉམ་པ་བཞིན་དུ་ལེགས་པའི་སེམས་ཉིད་ཀྱང་ཡིན་ནོ།། པྲི་ཡཾ་བ་དཱས། གྲོགས་ཀྱི་ནང་དུ་ཕྱོགས་ནས། མ་སྨད་མ༑ འདིས་འཇམ་པར་སྨྲས་པའི་ཚིག་འདི་ཉིད་ཀྱིས་མཁས་པ་ཟབ་མོའི་གཡོ་བ་ཅན་དུ་སྟོན་པར་བྱེད་དོ།། མ་སྨད་མས། གྲགས་མོ༑ བདག་ཀྱང་ངོ་མཚར་རོ།། འོ་ན་ཁོ་རང་ལ་དྲིའོ།། རབ་ཏུ་གསལ་བར་བྱས་ནས། ཁྱོད་ཀྱིས་འཇམ་པར་གསུངས་པ་ཉིད་ཀྱིས་བསྐྱེད་པའི་སྤོབས་པ་འདིས་ངན་བུ་ ལ་གཏམ་བྱ་བའི་སྐབས་ཉིད་བསྟན་ན། ཇོ་བོ་ཁྱོད། རྒྱལ་པོའི་དྲང་སྲོང་གི་རིགས་གང་གི་རྒྱན་ཏུ་གྱུར། གང་ཞིག་བྲལ་བ་ལས་ཐུགས་ལ་བཅགས་པའི་ལུས་ཅན་དག་ཀྱང་གང་དུ་མཆིས། གང་གི་སླད་དུ་གཞོན་ཤ་ཅན་གྱི་སྐུ་དཀའ་ཐུབ་ཀྱི་ནགས་སུ་ཉོན་མོངས་པར་མཛད། བྱ་ལེན་མས། རང་ལ། ཀྱེ༑ ཡིད་བྲལ་མ་བྱེད་ཅིག མ་སྨད་མས་ཁྱོད་གང་འདོད་པ་དྲིས་སོ།། རྒྱལ་པོས། རང་ལ། བདག་གིས་གང་ཞིག་གསལ་བར་བྱ། ཅི་ལྟར་རང་ཉིད་༼རྫུན་སྨྲས་ནས༽ བསླུ་བར་ཡང་བགྱིད། འོ་ན་འདི་ཙམ་སྨྲ་བར་བྱའོ།། རབ་ཏུ་གསལ་བར་བྱས་ནས། གང་ལ་པུ་རིའི་རིགས་ཀྱི་རྒྱལ་པོས་ཆོས་ཀྱི་གོ་འཕང་དུ་བཞག་པ་ དེ་ང་ཡིན་ཏེ། བྱ་བ་གེགས་མེད་པར་གྲུབ་པའི་སླད་དུ་ཆོས་ཀྱི་ནགས་ཚལ་འདིར་འོངས་སོ།། མ་སྨད་མས། ཆོས་སྤྱོད་པ་རྣམས་མགོན་དང་བཅས་པའོ།། བྱ་ལེན་མ་ངོ་ཚ་དང་བཅས་སྟེ་སྡོད་དོ།། གྲོགས་མོ་གཉིས་ཀས། རྒྱལ་པོ་དང་བུ་མོའི་རྣམ་འགྱུར་མཐོང་ནས་ཚུར་ཁ་ཕྱོགས་ཏེ། བྱ་ལེན་མ༑ དེ་རིང་ཡབ་ཉེ་བར་བཞུགས་ན་ཨང་། བྱ་ལེན་མས། ཅུང་ཟད་ཁྲོ་བ་དང་བཅས། དེས་ན་ཅིར་འགྱུར། གྲོགས་མོ་གཉིས་ཀས། འདི་ལྟ་བུའི་མགྲོན་ཁྱད་པར་བ་ནི་འཚོ་བའི་བར་དུ་ འབྲས་བུ་དང་བཅས་པར་བྱེད་ནུས་སོ།། བྱ་ལེན་མས། ཕར་སོང་ཞིག ཁྱེད་ཅག་ནི་གཞན་སེམས་ཤིང་གཞན་སྨྲ་བར་བྱེད་པས་བདག་མཉན་པར་མི་སྤྲོའོ།། རྒྱལ་པོས། བདག་ཀྱང་ཁྱོད་ཀྱི་གྲོགས་མོའི་གཏམ་འགའ་ཞིག་འདྲི་བར་འདོད་དོ།། གྲོགས་མོ་གཉིས་ཀྱིས། གསུངས་བར་ཅི་གནང་། རྒྱལ་པོས། སྐལ་ལྡན་ཀ་ན་ཝ་ནི་ཚངས་པར་སྤྱོད་པ་ ཉིད་ཡིན་ནོ། ཞེས་ཀུན་ཏུ་གྲགས་ན། ཁྱེད་ཅག་གི་གྲོགས་མོ་འདི་ལ་གང་གི་སྲས་མོ་ཞེས་སྨྲ་བ་ཅི་ལྟ་བུ་ཞིག མ་སྨད་མས། ཇོ་བོ་གསན་ཏུ་གསོལ། ཀཽ་ཤི་ཀ་ཞེས་བྱ་བའི་རིགས་ཀྱི་མཚན་ཅན་རྒྱལ་པོའི་དྲང་སྲོང་རྫུ་འཕྲུལ་ཆེ་བ་ཞིག་མཆིས་སོ།། རྒྱལ་པོས། དེ་ཡིན་ནོ།། མ་སྨད་མས། དེ་ནི་བདག་ཅག་གི་གྲོགས་མོ་འདིའི་སྐྱེད་པའི་ཡབ་ཡིན་ནོ་ཞེས་དགོངས་ཞིག གང་གི་ཚེ་བོར་བ་ན་བདག་གིར་མཛད་ནས་སྐྱེད་སྲིང་བའི་ཡབ་ནི་མེས་པོ་ཀ་ན་ཝ་ཉིད་ཡིན་ནོ།། རྒྱལ་པོས། བོར་བ་ཞེས་བྱ་བའི་ཚིག་གིས་བདག་ཡ་མཚན་པ་ཉིད་དུ་འགྱུར་གྱི། གཏམ་གྱི་གཞི་ནས་མཉན་པར་འདོད་དོ།། མ་སྨད་མས། གསན་ཏུ་གསོལ། གང་གི་ཚེ་དྲང་སྲོང་དེ། གོོ་ཏ་མའི་ཆུ་བོའི་འགྲམ་ན་དྲག་པོའི་དཀའ་ཐུབ་ལ་གཞོལ་བ་ན། ལྷ་རྣམས་འཇིགས་ནས་གེགས་བྱེད་པའི་སླད་དུ་མཻ་ན་ཀ་ ཞེས་བྱ་བའི་ལྷའི་བུ་མོ་ཞིག་བཏང་ངོ་།། རྒྱལ་པོས། ལྷ་རྣམས་ནི་ཆོས་ཉིད་ཀྱིས་ནི་གཞན་གྱི་བསམ་གཏན་ལ་འཇིགས་པའོ།། དེ་ནས། དེ་ནས།་་་་་་་་་་ མ་སྨད་མས། ནམ་དཔྱིད་ཟླ་ར་བ་ལ་བབས་པ་ན་དྲང་སྲོང་གིས་མྱོས་བྱེད་ཀྱི་གཟུགས་ཅན་མ་དེ་མཐོང་ནས་་་་་་་། ཞེས་ཕྱེད་སྨྲས་ནས་ངོ་ཚ་བས་བསྡད་དོ། དེ་ནས། མཻ་ན་ཀ་དྲང་སྲོང་དང་འདུས་པ་ལས་བུ་མོ་ཞིག་བཙས་ཏེ་བོར་བ། བྱ་རྣམས་ཀྱིས་བསྐོར་ཅིང་བསྲུང་བ་ན། ཀ་ན་ཝས་མཐོང་ནས་བསྐྱེད་པ་ནི་བྱ་ལེན་མའོ། ཞེས་བཤད་དོ།། རྒྱལ་པོས། ཕ་རོལ་ཏུ་ཤེས་སོ། ཐམས་ཅད་དུ་ལྷ་ལས་བྱུང་བ་ཉིད་ཡིན་ནོ།། མ་སྨད་མས། དེ་ལས་གཞན་དུ་ཅི། རྒྱལ་པོས། མཇལ་ཏོ། གཞན་དུ་ན། མི་མོ་མི་ལས་སྐྱེས་པ་ལ། །ལང་ཚོ་འདི་ལྟ་ག་ལ་འོངས།། རབ་གསལ་ཟླ་བའི་འོད་དག་ནི། །ས་ཡི་མཐིལ་ལས་འབྱུང་བ་མིན།། བྱ་ལེན་མ་གདོང་སྨད་ནས་གནས་སོ།། རྒྱལ་པོས། རང་ལ། བདག་གི་རེ་བའི་འབྲས་བུ་མ་སྟོང་ངོ་།། འོན་ཀྱང་གྲོགས་མོ་གད་མོ་དང་བཅས་ཁྱིམ་ཐབ་ཀྱི་རེ་བ་ཡང་གསལ་བར་བྱས་པ་འདི་ནི་རེ་ཞིག་ཐེ་ཚོམ་གྱི་གནས་སོ།། པྲི་ཡཾ་བ་དཱས། བྱ་ལེན་མའི་གདོང་ལ་བལྟས་ནས་ཅུང་ཟད་འཛུམ་སྟེ། འདྲེན་པའི་གདོང་དུ་ཕྱོགས་ནས། ཇོ་བོ་ནི་དོན་གཞན་ཡང་ཅུང་ཟད་ཅིག་གསུང་བཞེད་པ་ལྟར་སྣང་ངོ་།། བྱ་ལེན་མས། གྲོགས་མོ་དེ་ལྟར་མ་སྨྲ་ཞིག ཞེས་པའི་སོར་བརྡ་བྱེད་དོ།། རྒྱལ་པོས། ཁྱོད་ལེགས་པར་རིགས་ཏེ། དམ་པའི་སྤྱོད་པ་འཚོལ་བའི་ཕྱིར་བདག་གཞན་ཡང་དྲི་བར་འདོད་དོ།། པྲི་ཡཾ་བ་དཱས། དཀའ་ཐུབ་ཀྱི་སྐྱེས་བུ་རྣམས་ནི་དྲི་བ་ལ་དགག་པ་ཅི་ཡང་མ་མཆིས་ཀྱི། ཅི་བཞེད་པ་གསུང་ཞིག རྒྱལ་པོས། ཅི་ཞེས་ཁྱོད་ཀྱི་གྲོགས་མོའི་ཚུལ་ཅུང་ཟད་ཅིག་ཤེས་པར་འདོད་དོ།། ཅི་འདི་ཡིད་སྲུབས་བསམ་པ་རྣམ་འགོག་པའི།། དཀའ་ཐུབ་ཚུལ་འདིས་བག་མའི་བར་དུའམ།། འོན་ཏེ་རི་དྭགས་མྱོས་པའི་མིག་ཅན་མ།། འདི་རྣམས་འགྲོགས་ནས་རྟག་ཏུ་སྡོད་པ་ལ།། པྲི་ཡཾ་བ་དཱས། ཇོ་བོ༑ རེ་ཞིག་ལུས་ཅན་མ་འདི་ཆོས་སྤྱོད་པ་ཡང་གཞན་གྱི་དབང་ཅན་ཡིན་མོད། འོན་ཀྱང་འདིའི་བླ་མ་ ནི་མཐུན་པའི་བདག་པོ་ལ་སྟེར་བར་བཞེད་དོ།། རྒྱལ་པོས། བཞེད་པ་དེ་ལ་ཚེགས་མེད་དོ།། རང་ལ། ཀྭ་ཡེ་ཡིད་གཉིས་རྣམ་སྤོང་ལ། །དགའ་བའི་རེ་འདོད་ལྡན་པར་མཛོད།། གང་ལ་མེ་ཞེས་ཁྱོད་སེམས་པ། །རེག་པར་བྱ་བའི་ནོར་བུ་ཉིད།། བྱ་ལེན་མས། འཇིགས་པ་ལྟར་ཡར་ལངས་ཏེ། མ་སྨད་མ༑ བདག་འགྲོ་བར་བགྱིའོ།། མ་སྨད་མས། ཅིའི་ཕྱིར། བྱ་ལེན་མས། པྲི་ཡཾ་བ་དཱས་མི་རིགས་པའི་གཏམ་འདི་སྙེད་ཅིག་སྨྲས་པ་དག་བདག་འཕགས་མ་གོོ་ཏ་མི་ལ་ཞུ་བའི་སླད་དུ་འགྲོའོ།། མ་སྨད་མས། གྲོགས་མོ༑ དེ་ལྟར་མ་བྱེད་ཅིག གློ་བུར་བའི་མགྲོན་ལ་གུས་པ་མེད་པར་སྤངས་ནས་རང་འདོད་ཀྱིས་འགྲོ་བ་དེ་ནི་མི་རིགས་སོ།། བྱ་ལེན་མས། ལན་མ་སྨྲ་བར་སོང་ངོ།། རྒྱལ་པོས། བཟུང་ན་སྙམ་ཡང་རང་ཉིད་བསྡམས་ནས། ཀྱེ་མ་འདོད་པའི་སྐྱེས་བུ་རྣམས་ཀྱི་ལུས་ཅི་ལྟ་བ་དེ་ལྟ་བུར་སེམས་ཀྱང་ཡིན་ནོ།། དྲང་སོང་བུ་མོའི་རྗེས་སྙེགས་པ། །སྐད་ཅིག་དུལ་བས་བསྡམས་བྱས་ཏེ།། གནས་ལས་གཡོ་བར་མ་བྱས་ཀྱང་། །སོང་ནས་ལྡོག་པ་ཡིན་སྙམ་བྱེད།། པྲི་ཡཾ་བ་དཱས། མྱུར་དུ་བྱ་ལེན་མ་བཟུང་ནས། ཀྱེ༑ ཁྱོད་འགྲོ་བ་མི་རིགས་སོ།། བྱ་ལེན་མས། སྨིན་མའི་རྣམ་འགྱུར་དང་བཅས། ཅིའི་སླད་དུ། པྲི་ཡཾ་བ་དཱས། ཁྱོད་ད་དུང་རང་གི་སྐལ་བའི་ཤིང་ཕྲན་གཉིས་ལ་ཆུ་མ་བཏང་ངོ་།། ཤོག་ཅིག རྗེ་རང་ཉིད་ཐར་པར་གྱིས་ལ་དེ་ནས་སོང་ཞིག ཅེས་ཤུགས་ཀྱིས་དྲངས་སོ།། རྒྱལ་པོས། ཀྱེ༑ བཟང་མོ་འདི་ལས་མང་དུ་བྱས་པས་ངལ་ལོ་སྙམ་སྟེ། འདི་ལྟ་བུའི་ཕྱིར། ཆུ་འབུམ་སྟེགས་ལས་དམར་བའི་ལག་པ་ཕྲག་པའི་ངོས་ནས་ལྷུང་གྱུར་ཅིང་།། བཞིན་རས་རྔུལ་ཆུའི་དྲ་བའི་ཁུར་གྱིས་རྣ་བའི་མེ་ཏོག་འཕྱང་བར་ལྡན།། བཅིང་བ་རབ་བྲལ་འཛིངས་པའི་མགོ་སྐྱེས་ཡ་གཅིག་ལག་པས་འཛིན་བཞིན་དུ།། ད་དུང་ཚད་ལས་འདས་པའི་དབུགས་ཀྱིས་ནུ་མ་ཟུང་དག་འགུལ་བར་བྱེད།།

དེའི་ཕྱིར་བདག་འདི་ལ་བུ་ལོན་མེད་པར་བྱ་བའི་ སླད་དུ་སོར་གདུབ་འདི་སྟེར་བར་བྱའོ།། སྙམ་ནས་སོར་གདུབ་གཏད་དོ།། གཉིས་ཀས། སོར་གདུབ་ཀྱི་ཡི་གེ་བཀླགས་ཏེ། སོར་རྒྱའི་སྟེང་དུ། རྒྱལ་པོས་ཡོངས་སུ་བཟུང་བ། བྱ་བ་ཡོད་པས་ཕན་ཚུན་མིག་གིས་ལྟ་བར་བྱེད་དོ།། རྒྱལ་པོས། བཟང་མོ་དག༑ གཞན་དུ་མ་སེམས་ཤིག གང་། རྒྱལ་པོས་ཡོངས་སུ་བཟུང་བ། ཞེས་བྱ་བས་ནི། བདག་ལ་ རྒྱལ་པོའི་སྐྱེས་བུ་ཉིད་དུ་ལྟ་བར་བྱ་བའོ།། པྲི་ཡཾ་བ་དཱས། འོ་ན་སོར་རྒྱན་འདི་སོར་མོ་ལས་ཕྲལ་བར་ཡང་མི་དགོས་ཀྱི། ཇོ་བོའི་གསུང་ འབའ་ཞིག་གིས་འདི་ལ་བུ་ལོན་མེད་པར་བྱའོ།། བྱ་ལེན་མ༑ ད་ནི་སྙིང་རྗེ་ཅན་གྱི་ཇོ་བོའམ་རྒྱལ་པོ་ཆེན་པོ་འདིས་ཁྱོད་རྣམ་པར་ཐར་པར་བྱས་ཟིན་པས་གང་དགའ་བར་སོང་ཞིག། བྱ་ལེན་མས། རང་ལ། གལ་ཏེ་ཁྱོད་འགྲོ་ནུས་ན་འགྲོ་བར་ཟད་དོ།། ངག་ཏུ་གསལ་བར་བྱས་ནས། བདག་སྐད་ཅིག་སྐད་ཅིག་གིས་འཆིང་བ་དང་ཐར་བྱེད་པ་ཁྱོད་སུ་ཞིག། རྒྱལ་པོས། བྱ་ལེན་མ་ལ་བལྟས་ནས་རང་ལ། ཇི་ལྟ་བུ། འོན་ཏེ་བདག་འདི་ལ་ཡིན་པ་བཞིན་དུ་འདི་བདག་ལ་ཡང་ཡིན་ནམ། ཡང་ན་ནི་བསམ་པའི་གནས་གཞན་ཏེ། གང་གི་ཕྱིར། ལྷན་ཅིག་སྨྲ་བའི་ཚིག་ལན་མི་སྟེར་ཡང་།། བརྗོད་པའི་གཏམ་ལ་རྣ་བ་གཏོད་པ་བཞིན།། གདོང་ལ་གདོང་དུ་ཕྱོགས་པར་མི་སྡོད་དེ།། གཞན་ལ་གཡེང་བ་དྲན་པ་བསྡུས་པ་བཞིན།། ཡོལ་བའི་ཕུགས་ནས། ཀྱེ་ཀྱེ༑ བཀའ་ཐུབ་པ་རྣམས། བཀའ་ཐུབ་ཀྱི་ནགས་བསྲུང་བའི་སྟ་གོན་གྱིས་ཤིག ས་སྐྱོང་དུཥྱནྟ་རྔོན་བྱེད་དུ་ཉེ་བར་སླེབས་སོ།། འདི་ལྟར་མགྱོགས་འགྲོའི་རྨིག་པས་བརྡུང་བའི་རྡུལ།། འཛིན་པའི་ཤིང་ལས་ཆུ་ཐིག་དམར་པོའི་ཚོགས།། མཚམས་ཀྱི་འོད་ཆགས་ནུབ་ཀའི་སྦྲང་ཚོགས་བཞིན།། ཤིང་ཤུན་གྱོན་པའི་སྟེང་དུ་འབེབས་པར་བྱེད།། གཞན་ཡང་། སྟོབས་ཀྱིས་བཅགས་པའི་ཤིང་ཆེན་ཡལ་ག་མཆེ་བ་གཅིག་གིས་རྣམ་ཐོགས་ཤིང་།། མྱུར་མགྱོགས་རྐང་པས་འཐེན་ཅིང་དྲངས་པའི་འཁྲི་ཤིང་ཞགས་པའི་གདུབ་ཀོར་ཅན།། ཤིང་རྟ་མཐོང་ནས་འཇིགས་པའི་གླང་པོ་རི་དྭགས་ཚོགས་རྣམས་དབྱེར་བྱེད་པ།། དཀའ་ཐུབ་གེགས་བྱེད་གཟུགས་ཅན་བཞིན་ དུ་ཆོས་ཀྱི་ནགས་ཚལ་ནང་འདིར་སླེབས།།

རྒྱལ་པོས། རང་ལ། ཨ་ཧོ༑ གྲོང་པ་རྣམས་བདག་ལ་བལྟ་བའི་ཕྱིར་ནགས་ཚལ་གང་ཞིག་ན་ལྷགས་སོ།། འོ་ན་དེ་དག་གི་མདུན་དུ་འགྲོ་བར་བྱའོ།། གྲོགས་མོ་གཉིས་ཀྱིས། ཇོ་བོ༑ ནགས་ཀྱི་ཅ་ཅོ་འདིས་ཡིད་བློང་བློང་པར་བྱེད་པས། བདག་ཅག་སྤྱིལ་པོ་ལ་འགྲོ་བའི་སླད་དུ་གནང་བར་མཛད་དུ་གསོལ།། རྒྱལ་པོས། མྱུར་དུ། ཁྱེད་རྣམས་གཤེགས་པར་མཛོད་ཅིག བདག་ཀྱང་བསྟི་གནས་ལ་མི་གནོད་པའི་སླད་དུ་བརྩོན་པར་བྱའོ།། ཐམས་ཅད་ཡར་ལངས་ནས། གྲོགས་མོ་གཉིས་ཀྱིས། ཇོ་བོ་ལ་གློ་བུར་བའི་བསྙེན་བཀུར་ཉིད་ཀྱང་བསྟབ་མ་ནུས་པས། སླར་མཇལ་བའི་སླད་དུ་གསལ་བ་ལ་ཡང་གཡར་ཚའོ།། རྒྱལ་པོས། མ་ཡིན་ནོ།། དེ་ལྟར་མ་ཡིན་ནོ།། ཁྱེད་ཅག་དང་མཇལ་བར་ཉིད་བདག་གི་བསྙེན་བཀུར་ཡིན་ནོ།། བྱ་ལེན་མས། རྒྱལ་པོ་ལ་བལྟས་ནས་ཕྱི་བཤོལ་ཅུད་ཟད་དང་བཅས་གྲོགས་མོ་གཉིས་དང་ལྷན་ཅིག་ཏུ་སོང་ངོ།། རྒྱལ་པོས། རང་ལ། བདག་གྲོང་དུ་འགྲོ་བ་ལ་འདོད་པ་མ་མཆིས་ཀྱི། མ་ལ༑ རྗེས་སུ་འབྲང་བ་རྣམས་དང་འཕྲད་པར་བྱས་ལ་ནགས་དང་ཉེ་བར་བཞག་པར་བྱའོ།། ཀྱེ་མ་བདག་གི་ཡིད་ནི་བྱ་ལེན་མས་རྣམ་པ་འདི་ལས་འབྲལ་བར་མི་ནུས་སོ།། ལུས་ནི་མདུན་དུ་འགྲོ་བྱེད་ཅིང་། །སེམས་ནི་རྒྱབ་ཏུ་སླར་རྒྱུགས་པ།། བཟློག་སྟེ་རླུང་ལ་འཁྱེར་བ་ཡི། །རྒྱ་ནག་དར་གྱི་བ་དན་བཞིན།། ཅེས་ཐམས་ཅད་ཕྱིར་ལོག་གོ།། ཞེས་པ་ཡན་ལག་དང་པོའོ།།

བྱ་ལེན་མ་མངོན་པར་ཤེས་པའི་ཟློས་གར་ཅེས་བྱ་བ་སློབ་དཔོན་བདག་ཉིད་ཆེན་པོ་ནག་མོའི་འཁོལ་གྱིས་མཛད་པ་ལས་ཡན་ལག་དང་པོ་ཟུར་དུ་ཕྱུངས་པ་རེ་ཞིག་རྫོགས་སོ།། །། བདག་དགེ་འདུན་ཆོས་འཕེལ་གྱིས་ཡོས་ལོའི་སོས་ཀ་ཡུལ་དབུས་ཀྱི་གྲོང་ཁྱེར་སྐྱ་ནར་གྱི་བུ་ བྱ་བར་བསྡད་ཅིང་སུག་བྲིས་སུ་བྱས་པའི་དཔེ་ལགས།།

དུས་རབས་ཉི་ཤུ་པའི་ལོ་ཙ་བ་མཁས་དབང་དགེ་འདུན་ཆོས་འཕེལ་གྱིས་བསྒྱུར་བའི། བྱ་ལེན་མ་མངོན་པར་ཤེས་པའི་ཟློས་གར་འདི་ཡང་། རབ་གནས་ཆུ་སྦྲུལ་ལོའི་སྣྲོན་ཟླ་ཡར་ངོའི་ཚེས་ལ།༼15/6/2013༽མཐོ་རིམ་ལོ་ངོ་གསུམ་པའི་སློབ་ཕྲུག་པདྨ་མཚོ་མོ་དང་། ངག་དབང་རྒྱལ་མཚན་གཉིས་ཀྱིས་བྲིས་ཤིང་། བསམ་གཏན་རང་གིས་ཞུ་དག་དང་མཆན། བལྟ་བདེ་བའི་བཀོད་བསྒྲིགས་དང་བཅས་པར་བཟོས་པ་འདིས་ཀྱང་། སྙན་ངག་འབྲི་བར་འདོད་པ་རྣམས་ལ་ཕན་པའི་རྒྱུར་གྱུར་ཅིག། །།