པྲ་ཏིའི་སུམ་རྟགས་

ཡོང་ཁུངས་Wikipedia
Jump to navigation Jump to search

༄༅། །པྲ་ཏི་རིན་ཆེན་དོན་གྲུབ་ཀྱི་སུམ་རྟགས་དགོངས་འགྲེལ་བཞུགས་སོ། །སུམ་ཅུ་པའི་རྣམ་བཤད་ཀུན་བཟང་དགོངས་རྒྱན།༄༅། །ཨོྂསྭ་སྟི་སིདྡྷཾ། བླ་མ་དང་སྨྲ་བའི་དབང་ཕྱུག་ལ་ཕྱག་འཚལ་ལོ།།ཆོས་ཀུན་སྒྲིབ་བྲལ་ཡེ་ཤེས་རང་བཞིན་སྲིད་ཞིའི་གདུང་སེལ་མཁྱེན་པ་སྤྲིན་གྱི་ཕྲེང་ཚོགས་རྒྱ་ཆེན་ལྡན། །ཟབ་དང་རྒྱ་ཆེའི་ལམ་གྱི་རང་བཞིན་འགྲོ་ལ་ཉེར་མཚོན་རྣམ་ཀུན་གསུང་གི་འབྲུག་སྒྲ་ཟབ་མོ་ཅན། །ཕ་མཐའ་བྲལ་བའི་སྙིང་རྗེའི་རླུང་ཤུགས་དྲག་པོས་བསྐྱོད་པའི་ཕན་བདེ་ཟད་པ་མེད་པའི་ཆར་རྒྱུན་གྱིས། །མཐར་དག་འགྲོ་བའི་ཀུན་བཟོད་རབ་བརླན་མ་ལུས་ལེགས་པའི་མྱུ་གུ་སྤེལ་མཛད་བཅོམ་ལྡན་ཤཱཀྱའི་གཙོ་དེར་འདུད། །གང་གི་བསྟན་པ་ཉི་མའི་སྣང་བ་ཆེ། །རྨོངས་པའི་སྨན་ཆེན་གྱིས་ཁྱབ་གངས་ཁྲོད་འདིར། །ལེགས་པར་འདྲེན་པའི་སྔོན་མེད་ཤིང་རྟ་པ། །འཇམ་དབྱངས་ཐོན་མིར་དུས་ཀུན་དང་བས་འདུད། །མཐའ་ཡས་རྒྱལ་བའི་མཁྱེན་བརྩེ་མཛད་པ་ཀུན། །གཅིག་ཏུ་སྤུངས་པ་གཟུགས་ཅན་བཞིན་གྱུར་པ། །ཡིད་འོང་མཚམས་སྤྲིན་གསར་པའི་བློ་གྲོས་ཀྱིས། །རྣམ་རོལ་བཙོང་ཁ་པ་དེར་སྙིང་ནས་འདུད། །གང་ཞིག་རྟོགས་ན་གསུང་རབ་ཐམས་ཅད་ལ། །རབ་འབྱམས་ཤེས་རབ་སྣང་བ་ཀུན་སྟེར་ཞིང་། །མཐའ་ཡས་མཁས་པ་དགྱེས་པའི་སྲོལ་བཟང་པོ། །གངས་ཅན་བརྡའ་སྤྲོད་ཀུན་གྱི་ཕྱི་མོ་མཆོག།སུམ་རྟགས་ཚིག་འཕྲེང་པད་མའི་ལྟོ་བ་རུ། །ཟབ་བརླིང་དགོངས་པའི་དྲི་བསུང་ལེགས་འཁྱིལ་བ། །རབ་གསལ་རྣམ་བཤད་ཉི་ཟེར་བྱེ་བ་བརྒྱས། །ཕྱེ་བའི་ངོ་མཚར་དགའ་སྟོན་འདིར་སྦྱིན་གྱི། །རྣམ་དཔྱོད་དད་པའི་འདབ་གཤོག་གདིངས་པ་ཅན། །དོན་གཉེར་འཕུར་ལྡིང་རྩེ་དགའ་ལྷུར་ལེན་པའི། །སྐལ་བཟང་རྐང་དྲུག་རྣམས་རོལ་ཅིག་དང་། །གསུང་རབ་སྦྲང་རྩིའི་དགའ་སྟོན་ཅི་ཡང་མྱོང་། །ཚུལ་འདིར་སྔོན་ནས་མཁས་པའི་ལེགས་བཤད་ཀྱི། །དགོངས་འགྲེལ་རྒྱས་བསྡུས་མཆན་སོགས་མཐའ་ཡས་མོད། །འོན་ཀྱང་དམ་པའི་བཀའ་ནན་མ་བཟློག་ཅིང་། །རང་ཡང་ཤེས་རབ་འཕེལ་ཕྱིར་འདི་བརྩམ་བྱ། །དེ་ལ་འདིར་འཇམ་པའི་དབྱངས་ཀྱི་རྣམ་འཕྲུལ་ཐོན་མི་སམྦྷོ་ཊ་ཞེས་གྲགས་པ་གང་དེས། ཆོས་ཀྱི་རྒྱལ་པོ་སྲོང་བཙན་སྒམ་པོའ་ིསྐུའི་རིང་ལ་ཡི་གེའི་སྲོལ་བཏོད་ཅིང་། གསུང་རབ་ཐམས་ཅད་ཀྱི་ཕྱི་མོར་གྱུར་པའི་བརྡའ་སྤྲོད་ཀྱི་གཞུང་རྩོམ་པ་སོགས་ཀྱི་མཛད་པ་དཔག་པར་དཀའ་བས་རྒྱལ་བའི་བསྟན་པ་ཉི་མ་ལྟར་གསལ་བར་མཛད་ཅིང་། ད་ལྟའི་བར་དུའང་བྱང་ཕྱོགས་ཀྱི་ཡུལ་གྲུ་མཐའ་དག་ལ་བཀའ་དྲིན་གྱིས་ཁྱབ་པར་མཛད་པ་ནི། མཁས་བླུན་ཀུན་ལ་བསྙོན་པར་མི་ནུས་པར་མངོན་སུམ་གྱིས་གྲུབ་ལ། མཁན་པོ་ཆེན་པོ་འདི་ཉིད་ཀྱིས་མཛད་པའི་བརྡའི་བསྟན་བཅོས་ཆེན་པོ་བརྒྱད་ཡོད་པར་གྲགས་པ་ལས། བསྟན་པ་འཕེལ་འགྲིབ་ཀྱི་དབང་གིས་ཕལ་ཆེར་ཉམས་ཤིང་ད་ལྟ་སུམ་ཅུ་པ་དང་། རྟགས་ཀྱི་འཇུག་པ་གཉིས་ལས་མེད་པར་གསུངས་པ་བཞིན། ད་ལྟ་དེ་གཉིས་གྲགས་ཆེ་ཞིང་དར་རྒྱས་ཀྱང་ཆེ་བས་མཁས་པ་དུ་མས་ཚིག་དོན་འགྲེལ་བའི་བསྟན་བཅོས་ཀྱང་མཐའ་ཡས་པ་མཛད་མོད།འོན་ཀྱང་མཁན་པོ་འདིའི་གཞུང་ཤིན་ཏུ་མཁོ་བར་མ་ཟད། བཀའ་དྲིན་གཟོ་བའི་སླད་དུའང་ཐོས་སོགས་ཀྱིས་འཇུག་པ་དང་གསལ་བར་བྱ་རིགས་པར་གསུངས་པ་བཞིན། འདིར་ཡང་རང་ཉིད་ལ་ཐོས་སོགས་ཀྱི་ཤེས་རབ་འཕེལ་བ་དང་། རང་གིས་ཇི་ལྟར་གོ་བའི་དོན། སྐལ་བ་མཉམ་པ་གཞན་དག་ལ་ཡང་གསལ་བར་བྱས་ནས། གཞུང་ལུགས་བཟང་པོ་འདི་ཡུལ་དུ་གནས་ཤིང་འཕེལ་ན་ཅི་མ་རུང་སྙམ་པའི་བསམ་པས་ཚིག་དོན་གྱི་ཆ་འགྲེལ་བར་སྤོབས་པ་སྐྱེས་སོ། །དེས་ན་འདི་ལ་གསུམ་སྟེ། མཚན་གྱི་དོན་དང་། གཞུང་གི་དོན་དང་།མཇུག་གི་དོན་ནོ། །དང་པོ་མཚན་གྱི་དོན་ནི། རྒྱ་གར་སྐད་དུ་བྱཱ་ཀ་ར་ཎ་ཏྲིཾ་ཤད་ནཱ་མ།བོད་སྐད་དུ། ལུང་སྟོན་པ་སུམ་ཅུ་པ་ཞེས་བྱ་བ། ཞེས་གསུངས་ཏེ། རྒྱ་གར་ན་སྐད་རིགས་ཆེན་པོ་བཞི་ཡོད་པའི་ལེགས་སྦྱར་གྱི་སྐད་དུ། བྱཱ་སོགས་སོ།།དེ་བོད་གངས་ཅན་གྱི་སྐད་དུ་བསྒྱུར་ན། ལུང་སྟོན་པ་སོགས་སུ་འགྱུར་རོ།།དེ་ལ་བྱཱ་ཀ་ར་ཎ་ནི་ལུང་སྟོན་པའམ་བརྡའ་སྤྲོད་པ་སྟེ། སྒྲའི་མཚན་ཉིད་མིང་ཚིག་ཡི་གེའི་རྣམ་འགྱུར་གྱི་སྒོ་ནས་དོན་ལུང་སྟོན་པའམ་བརྡའ་སྤྲོད་པས་དེ་སྐད་ཅེས་བྱའོ། །ཏྲིཾ་ཤད་ནི་སུམ་ཅུ་པ་སྟེ། ཀཱ་ལི་སུམ་ཅུ་པོའ་ིསྦྱོར་བ་རྒྱ་ཆེར་སྟོན་པས་བརྗོད་བྱའི་སྒོ་ནས་བཏགས་པའོ། །ནཱ་མ་ནི་ཞེས་བྱ་བ་ཞེས་པ་སྟེ།མིང་དེ་སྐད་ཅེས་བྱའོ་ཞེས་པའོ། །འགྱུར་ཕྱག་གི་ཚུལ་དུ། སྨྲ་བའི་དབང་ཕྱུག་ལ་ཕྱག་འཚལ་ལོ། །ཞེས་སྨོས་ཏེ། སྨྲ་བ་ནི་ངག་དང་། དབང་ཕྱུག་ནི་དབང་འབྱོར་བ་ཡིན་ལ། ངག་གི་རང་བཞིན་ཤེས་བྱའི་ངོ་བོ་དང་རྣམ་པ་མ་ལུས་པ་ཇི་ལྟ་བ་བཞིན་སྨྲ་བ་ལ་ཐོགས་པ་མེད་པར་རང་དབང་དུ་སྤྱོད་པའི་འཇམ་དཔལ་དབྱངས་ལ་ཕྱག་འཚལ་ལོ་ཞེས་པའོ། །འདིར་ཕྱག་འཚལ་བ་ནི་འདུད་པ་སྟེ། ལུས་དང་ངག་དང་ཡིད་ཉེ་བར་བསྙེན་ཅིང་བཏུད་པ་ཡིན་ལ། དེ་ཡང་ཡིད་ཡོན་ཏན་ལ་དང་བས་ཉེ་བར་ཕྱོགས་པ་དང་། དེས་ཀུན་ནས་བསླང་སྟེ་ངག་གིས་ཡོན་ཏན་བརྗོད་པ་དང་། ལུས་ཀྱིས་ཐལ་མོ་སྦྱར་ནས་མགོ་བོ་བདུད་བ་སོགས་ཉེ་བར་བསྙེན་པའི་རྣམ་འགྱུར་སྟོན་པ་སྟེ། མདོར་ན་ལུས་ངག་ཡིད་ཀྱི་ཕྱག་གསུམ་མོ། །གལ་ཏེ་འདི་བོད་ཀྱི་བསྟན་བཅོས་མ་ཡིན་ནམ། ཅི་རྒྱ་འགྱུར་དང་འདྲ་བར་རྒྱ་བོད་ཤན་སྦྱར་བའི་སྐད་ཐོག་མར་སྨོས་པ་དང་། འགྱུར་ཕྱག་གི་ཚུལ་འདིར་བཀོད་པས་ཅི་ཞིག་བྱ་ཞེ་ན། བདེན་ཏེ། འོན་ཀྱང་མཁན་པོ་འདིས་འཕགས་ཡུལ་དུ་ཐུན་མོང་བའི་རིག་གནས་སོགས་ལ་སྦྱངས་པས་མཁས་པའི་ཕུལ་དུ་ཕྱིན་ཏེ། རྒྱ་གར་མཁས་པ་དག་གིས་ཀྱང་འདིའི་སྙན་པ་བརྗོད་པར་གྲགས་པས། རྒྱ་གར་པའི་མཁས་པ་དང་དེས་མཛད་པའི་བསྟན་བཅོས་ཁུངས་དང་ཚད་མར་བྱེད་པ་བཞིན་དུ། མཁན་པོ་འདི་དང་འདིས་མཛད་པའི་བསྟན་བཅོས་ཀྱང་ཚུལ་དེ་དང་མཐུན་པར་ཡིད་ཆེས་པའི་གནས་སུ་གོ་བའི་ཆེད་ཡིན་ནོ། །གཉིས་པ་གཞུང་གི་དོན་ལ། བསྟན་བཅོས་ལ་འཇུག་པའི་སྒོ་དང་། སྒོ་དེ་དང་ལྡན་པའི་བསྟན་བཅོས་དངོས་བཤད་པ་གཉིས་སོ། །དང་པོ་༼བསྟན་བཅོས་ལ་འཇུག་པའི་སྒོ་༽ལ། མཆོད་བརྗོད་དང་།རྩོམ་པར་དམ་བཅའ་བ་གཉིས་ལས། དང་པོ་དཀོན་མཆོག་ལ་ཕྱག་བྱ་བ་ནི།གང་ལ་ཡོན་ཏན་མཆོག་མངའ་བའི། །དཀོན་མཆོག་དེ་ལ་ཕྱག་འཚལ་ལོ། །ཞེས་གསུངས་ཏེ། གང་ཞེས་བྱ་བ་ནི་སྤྱིའི་སྒྲའོ། །ལ་ཞེས་བྱ་བ་ནི་བདུན་པ་གནས་གཞིའི་སྒྲའོ། །ཡོན་ཏན་ཞེས་བྱ་བ་ནི། ཕན་ཡོན་ནམ་འབྲས་བུའི་ཁྱད་པར་ལེགས་པའི་མིང་སྟེ། རྒྱུ་ཁྱད་པར་བ་ལས་བྱུང་བའི་འབྲས་བུའོ། །མཆོག་ཅེས་བྱ་བ་ནི། རྩེ་མོ་དང་ཕུལ་དུ་བྱུང་བའི་མིང་དོན་ཏེ། ཚིག་གི་རྒྱན་ཡང་ཡིན་ནོ། །མངའ་བ་ཞེས་བྱ་བ་ནི། ཡོད་པའམ་ལྡན་པ་ཞེས་པའོ། །འི་ནི་གཞི་མཐུན་གྱི་དྲུག་པའོ། །དཀོན་མཆོག་ནི་འོག་ནས་འཆད་དོ། །དེ་ཞེས་བྱ་བ་ནི། ངེས་བཟུང་གི་སྒྲའོ། །ལ་ཞེས་བྱ་བ་ནི། བཞི་པ་དགོས་ཆེད་ཀྱི་སྒྲའོ།།ཕྱག་འཚལ་བ་ནི་བཤད་ཟིན་ཏོ། །དོན་བསྡུ་ན། དོན་གཉིས་མཐར་ཕྱིན་པ་དང་། འགོག་ལམ་དང་། རིགས་གྲོལ་གྱི་ཡོན་ཏན་མངའ་བ་ཞེས་སྨོས་ཏེ། དེ་གང་ལ་མངའ་ཞེས་སྤྱིའི་ཚུལ་དུ་བཀོད་ནས། སྤྱི་ལས་ངེས་པར་བཟུང་བའི་ཕྱིར། དཀོན་མཆོག་དེ་ཞེས་སྨོས་སོ། །ཡོན་ཏན་དེ་གཞན་ལས་ཁྱད་པར་དུ་བྱེད་པའི་ཕྱིར་མཆོག་ཅེས་སྨོས་སོ། །དེས་ན་ཡོན་ཏན་གྱི་ཁྱད་པར་མཆོག་ཏུ་གྱུར་པ་གང་ལ་མངའ་བའི་དཀོན་མཆོག་དེའི་ཆེད་དུ་ཕྱག་འཚལ་ལོ། །ཞེས་པའོ། །དཀོན་མཆོག་གི་དོན་ནི།རྒྱུད་བླ་མ་ལས།འབྱུང་བ་དཀོན་ཕྱིར་དྲི་མེད་ཕྱིར། །མཐུ་ལྡན་ཕྱིར་དང་འཇིག་རྟེན་གྱི། །རྒྱན་གྱུར་ཕྱིར་དང་མཆོག་ཉིད་ཕྱིར། །འགྱུར་བ་མེད་ཕྱིར་དཀོན་མཆོག་ཉིད། །ཅེས་པ་ལྟར་ཆོས་དྲུག་དང་ལྡན་པས་དཀོན་མཆོག་གོ། འདིར་རྣམ་གླིང་པཎ་ཆེན་གྱིས།གང་ལ་ཞེས་པའི་ལ་ཡིག་ངེས་བཟུང་གི་དོན་ཏེ། འཆད་འགྱུར་དེ་མ་ཐག་པའི་ཡོན་ཏན་རྣམས་དང་ལྡན་པ་དེ་ཉིད་ངོས་བཟུང་བ་དང།ཞེས་བཤད་པ་མི་འཐད་དེ། འདིར་མངའ་བ་ཞེས་པ་ཡོད་པའམ་བརྟེན་པའི་དོན་ཡིན་ལ། ཡོན་ཏན་མཆོག་ཡོད་པའམ་བརྟེན་པའི་གཞི། སྤྱིའི་ཚུལ་གྱིས་གང་ཞེས་སྨོས་ཏེ། དེ་ལ་བརྟེན་པར་བརྗོད་པའི་སྒྲ། ལ་ཞེས་སྨྲས་པ་ཡིན་ཞིང། སྤྱིའི་ཚུལ་གྱིས་གང་ཞེས་བརྗོད་པ་དེ་ཉིད་དམིགས་ཀྱིས། དཀོན་མཆོག་ལ་བཟུང་བའི་ཆེད་དུ། དེ་ཞེས་པའི་ངེས་བཟུང་གི་སྒྲ་སྦྱར་ཏེ། དཀོན་མཆོག་དེ་ལ་ཞེས་སྨོས་པར་ཚིག་ཉིད་ཀྱིས་གསལ་བའི་ཕྱིར་རོ། །གཞན་དུ་ན། གང་ཞེས་པ་དང་། ཡོན་ཏན་མཆོག་མངའ་བ། ཞེས་པ་གཉིས་སྦྲལ་མི་ནུས་ལ། འོག་ནས་དེ་ཞེས་པའི་ངེས་བཟུང་སྨོས་པ་དང་ཟློས་ཤིང་། དགོས་པ་གཞན་ཡང་མེད་དོ། །འཇམ་པའི་དབྱངས་ལ་ཕྱག་བྱ་བ་ནི།གང་གིས་སྒྲ་དབྱངས་གསུངས་པ་ཡི། །འཇམ་པའི་དབྱངས་ལ་ཕྱག་འཚལ་ལོ། །ཞེས་གསུངས་ཏེ། གང་ཞེས་པ་སྤྱིའི་སྒྲ་དང་། གིས་ཞེས་པ་རྣམ་དབྱེ་གསུམ་པ་བྱེད་པ་དང་། སྒྲ་དབྱངས་ནི་འདིར་དབྱངས་ཡིག་དང་། གསུངས་པ་ནི་དབྱངས་ཡིག་ཐོག་མར་གསུངས་པ་སྟེ། འོག་ཏུ་འཆད་དོ། །དེ་ལྟར་སྒྲ་དབྱངས་ཐོག་མར་གསུངས་པའི་བྱ་བ་བྱེད་པ་པོ་གང་། ཞེས་སྤྱིའི་ཚུལ་གྱིས་སྨོས་པ་དེ་ཉིད་རྣམ་དབྱེ་དྲུག་པ་ཡི་ཞེས་པའི་སྒྲས་ཁྱད་པར་དུ་བྱས་ཏེ་ངོས་བཟུང་བའི་ཕྱིར། འཇམ་པའི་དབྱངས་ཞེས་སྨོས་ཏེ། རྒྱུའི་སྐྱོན་ཆགས་སོགས་བག་ཆགས་དང་བཅས་པ་དང་། ངོ་བོའ་ིསྐྱོན་སྒྲ་དང་། ཡིག་འབྲུ་དང། མིང་ཚིག་སོགས་རིམ་པ་བཞིན་དུ་མི་སྙན་པ་དང་། ཉམས་པ་དང་།མ་འབྱོར་བ་དང་། མ་འབྲེལ་བ་སོགས་ཀྱི་རྩུབ་རེག་དང་བྲལ་བས་ན་འཇམ་པའོ། །འཇམ་པ་དེས་ཁྱད་པར་དུ་བྱས་པའི་གསུང་དབྱངས་དང་ལྡན་པས་ན་འཇམ་པའི་དབྱངས་ཏེ། པའི་ཞེས་པས་ཁྱད་པར་ཅན་དང་ཁྱད་པར་གཞི་མཐུན་དུ་བསྡུས་པའོ། །ཕྱག་འཚལ་ལོ་ནི་གོང་ལྟར་ཏེ། མདོར་ན། གསུང་བ་པོ་གང་གིས་སྒྲ་དབྱངས་སྔོན་གྱི་དུས་སུ་གསུངས་པར་གྲགས་པའི་འཇམ་པའི་དབྱངས་ལ་ཕྱག་བྱས་པའོ། །སྒྲའི་ལྷ་ལ་ཕྱག་བྱ་བ་ནི།གང་གིས་མིང་གཞི་སྔོན་གསུངས་པའི། །རྟག་ཞི་བ་ལ་ཕྱག་འཚལ་ལོ། །ཞེས་གསུངས་ཏེ་གཞན་རྣམས་གོང་ལྟར་ལ། མིང་ནི་འོག་ནས་འཆད་དོ། །མིང་གི་གཞི་ནི། མིང་གང་ལས་བྱུང་བའི་གཞི་སྟེ། ཀ་ལ་སོགས་པའོ།།ཇི་ལྟར་ཀ་ལ་སོགས་པའི་ཡི་གེ་ལ་སྔོན་འཇུག་རྗེས་འཇུག་མགོ་འདོགས་སོགས་རྣམ་འགྱུར་བྱས་པ་དང་ཡི་གེ་གཞན་དང་ཕྲད་པ་སོགས་ལས། དོན་གྱི་ངོ་བོ་དང་ཁྱད་པར་སྟོན་པའི་མིང་ཚིག་ལ་སོགས་པ་འབྱུང་བས་ན། ཀ་ལ་སོགས་པ་ལ་མིང་གཞི་ཞེས་སྨོས་སོ། །དེ་ལྟར་གིས་ཞེས་པའི་སྒྲ་སྦྱར་ཏེ། བྱེད་པ་པོ་སྤྱིའི་ཚུལ་གྱིས་གང་ཞེས་སྨོས་པ་དེའི་བྱ་བ་བསྟན་པའི་ཕྱིར།གསུངས་པ་ཞེས་སྨོས་སོ། །བྱ་བ་དེའི་ཁྱད་པར་བསྟན་པའི་ཕྱིར། མིང་གཞི་གསུངས་པ་ཞེས་སྨོས་སོ། །མིང་གཞི་གསུངས་པ་དེ་དུས་ཀྱི་ཁྱད་པར་དང་སྦྱོར་བའི་ཕྱིར་སྔོན་ཞེས་སྨོས་པའོ། །བྱེད་པ་པོ་སྤྱིའི་ཚུལ་གྱིས་གང་ཞེས་སྨོས་པ་དེ་ཉིད་ངོས་བཟུང་བའི་ཕྱིར། འི་ཞེས་དྲུག་པའི་སྒྲས་ཁྱད་པར་དུ་བྱས་ནས། རྟག་ཞི་བ་ཞེས་སྨོས་ཏེ། རྟག་པ་དང་ཞི་བའི་ལུས་གང་ལ་ཡོད་པའི་ཁྱབ་འཇུག་གམ་ཚངས་པའོ། །མདོར་ན་གསུང་བ་པོ་གང་གིས་མིང་གཞིའི་ཡི་གེ་སྔོན་ཏེ་ཐོག་མར་གསུང་བ་པོར་གྲགས་པའི་རྟག་ཞི་བ་ཁྱབ་འཇུག་གམ་ཚངས་པ་ལ་ཕྱག་བྱས་པའོ། །དེ་ཡང་ཡི་གེ་སྔོན་བྱུང་གི་ལོ་རྒྱུས་ལས།ཡི་གེ་ཁྱབ་འཇུག་ལྷ་ཡིས་བཀོད། །འཇམ་དཔལ་དབྱངས་ཀྱིས་ང་རོས་དྲངས། །ཞེས་གསལ་བྱེད་ཀྱི་ཡི་གེ་ཁྱབ་འཇུག་གིས་ཐོག་མར་བཀོད་པ་དང།དབྱངས་ཡིག་འཇམ་དཔལ་དབྱངས་ཀྱིས་ཐོག་མར་མཛད་པར་བཤད་པ་དང་། སྒྲའི་རིག་བྱེད་ཚངས་པས་ཐོག་མར་བྱས་པ་དང་། མིང་གཞི་ཀ་ཙ་ཊ་ཏ་པ་ཡ་ཤ་ཧ་རྣམས་སྔོན་དུ་གསུངས་པར་གྲགས་ཤིང་། བརྒྱ་བྱིན་གྱིས་དེ་ལས་བསྡུས་པའི་ཨིནྡྲ་བྱཱ་ཀ་ར་ཎ་བྱས་པར་གྲགས་པས་སྔོན་གྱི་དུས་སུ་གསུངས་པ་དང་། རྟག་ཞི་བ་ཡང་འགྲེལ་བ་སྤྱན་རས་གཟིགས་ཀྱི་བརྟུལ་ཞུགས་སུ། ཚངས་པ་དང་ཁྱབ་འཇུག་གཉིས་ཀ་ལ་རྟག་པ་དང་། ཞི་བའི་ལུས་ཡོད་པར་བཤད་ཅིང་། སོ་སོར་འབྲང་མའི་ལྟེ་བསྒྱུར་གྱི་སྐབས་སུ།དམངས་རིགས་ཕྱིར་ནི་རྟག་ཞི་བ། །ཁྱབ་འཇུག་ལེགས་པར་བྲི་བར་བྱ། །ཞེས་ཁྱབ་འཇུག་དང་། ཚངས་པ་རྟག་ཞི་བ་ཞེས་བསྟན་བཅོས་གཞན་ལས་ཀྱང་མཐོང་བས་ཚངས་པ་ལའང་འཇུག་པ་སོགས་ཀྱི་འཐད་པ་མང་ངོ་། །གཞན་དག་ནི་སྤྱན་རས་གཟིགས་དང་། སངས་རྒྱས་སོགས་ལ་བཤད་པ་མང་ཡང་། སངས་རྒྱས་ལ་བྱེད་པ་ནི་གོ་རིམ་ལོག་ཅིང་ཟློས་པ་དང་། དགོས་པ་གཞན་ཡང་མེད་པས་མི་འཐད་ལ། འཇམ་དབྱངས་བྱུང་ན་སྤྱན་རས་གཟིགས་སོགས་ཡོད་དགོས་པའི་ངེས་པ་མེད་ཅིང་། ཡི་གེའི་བསྡུ་བ་མཛད་པས་ཡི་གེ་གསུང་བ་པོ་ཙམ་དུ་གྲུབ་ཀྱང་། ཡི་གེའི་ཐོག་མའི་མཛད་པ་པོ་ཡིན་པའི་ཁུངས་དང་ཤེས་བྱེད་དྲངས་པ་སོགས། འགྲེལ་མཛད་རྣམས་ཀྱིས་རྙེད་ན་སྟོན་དགོས་པ་ལས་སུས་ཀྱང་མ་བསྟན་པའི་ཕྱིར་རོ། །རྣམ་གླིང་པཎ་ཆེན་གྱིས་ཀྱང་། སངས་རྒྱས་དང་། ཚངས་པ་དང་། ཁྱབ་འཇུག་སོགས་ལ་བྱེད་པ་བཀག་ནས། རང་སྡེ་ནང་པའི་ངོར་སྤྱན་རས་གཟིགས་ལ་བྱེད་པ་སྐབས་སུ་བབ་ཅེས་བཤད་མོད། སངས་རྒྱས་ལ་བྱེད་པ་བཀག་པ་ལྟར་ཡིན་ཡང་། ཚངས་པ་དང་ཁྱབ་འཇུག་ལ་བྱེད་པ་ལ་གནོད་བྱེད་ཡི་གེའི་བསྡུ་བ་མཛད་པ་ཙམ་གྱིས་དེར་ངེས་སོ་སྙམ་ན་མི་འཐད་ཅེས་པ་ཙམ་ལས་གཞན་མ་རྙེད་ཅིང་སྤྱན་རས་གཟིགས་ལ་བྱེད་པ་ཡང་རང་གི་འདོད་པ་ཙམ་ལས་ཤེས་བྱེད་གཞན་མ་རྙེད་པས། ཤེས་བྱེད་གང་ཡང་མེད་པས་ཤེས་བྱེད་དུ་མ་དང་ལྡན་པ་སུན་འབྱིན་པ་མི་འཐད་པའི་ཕྱིར་རོ། །སྐབས་འདིར་འགལ་བའང་སྣང་སྟེ། དྲག་པོ་དབང་ཕྱུག་སོགས་ལ་བྱེད་པ་དགོས་པ་ཡང་མ་མཆིས་ཞེས་སྨྲས་ནས། འོག་ཏུ་གཞན་སྡེ་རྣམས་རྗེས་སུ་འཛིན་པའི་ཕྱིར་སོ་སོའ་ིའདོད་པ་བཞིན་གྱི་ལྷར་འགྲེལ་དགོས་པའི་ཁུངས་སུ། མདོ་སྡེ་ཟ་མ་ཏོག་བཀོད་པའི་རྒྱལ་པོ་ལས། སྔོན་བྱུང་བ་ཞེས་སོགས་ནས། དེ་བཞིན་གཤེགས་པས་འདུལ་བའི་སེམས་ཅན་རྣམས་ལ་ནི། དེ་བཞིན་གཤེགས་པའི་གཟུགས་ཀྱིས་ཆོས་འཆད། དེ་བཞིན་དུ་སྦྱར་ཏེ་རང་སངས་རྒྱས་ཀྱིས། དགྲ་བཅོམ་པས།བྱང་ཆུབ་སེམས་དཔས། དབང་ཕྱུག་ཆེན་པོས། མཐུ་བོ་ཆེས། ཚངས་པས་ཞེས་སོགས་དང་བཅས་དགོས་པ་ཡོད་པར་བསྒྲུབས་པའི་ཕྱིར་རོ། །འདིར་འཇམ་དབྱངས་དང་། རྟག་ཞི་བ་གཉིས་མཆོད་བརྗོད་ཀྱི་ཡུལ་དུ་སྨོས་པ་ནི།ཡི་གེའི་ཐོག་མའི་འབྱུང་ཁུངས་གཙོ་ཆེ་བའི་དབང་དུ་བྱས་ནས་དོན་དུ་ན་ཚངས་པ་དང་། ཁྱབ་འཇུག་སོགས་སྤྱན་རས་གཟིགས་ཀྱི་སྐུ་ལས་བྱུང་བར་གོང་གི་མདོ་དེ་ལས་གསུངས་པ་བཞིན། ལྷ་དེ་དག་ལ་ཕྱི་རོལ་པ་ཁོ་ནས་མ་ཁྱབ་པས་འགལ་བ་མེད་པར་མ་ཟད། གང་ལས་ཡོན་ཏན་གྱི་ཁྱད་པར་བྱུང་བ་དེ་ཉིད་དྲིན་ཆེ་བས་བཀུར་འོས་པ་ཡིན་ནོ། །ཞེས་གཞན་ལ་འདོམས་པའི་ཆེད་དུ་ཡིན་ནོ། །ཐ་སྙད་སོགས་ཀྱི་རིག་གནས་ལ་བཀའ་དྲིན་ཆེ་བའི་དངོས་བརྒྱུད་ཀྱི་བླ་མ་ལ་ཡང་ཕྱག་བྱ་བ་ནི།སྡེབ་སྦྱོར་ལེགས་མཛད་མཁས་རྣམས་དང་། །བླ་མ་ལ་ཡང་ཕྱག་འཚལ་་་་་་་་ཞེས་གསུངས་ཏེ། འདིར་སྡེབ་སྦྱོར་ནི་རིག་གནས་ཆུང་བ་ལྔའི་ཡ་གྱལ་གྱི་སྡེབ་སྦྱོར་ཁོ་ན་མ་ཡིན་གྱི། ཡི་གེའི་སྦྱོར་བ་ཡིན་ལ། དེ་ཡང་ཡི་གེ་ཕན་ཚུན་རྣམ་དབྱེ་ཚིག་ཕྲད་རྐྱེན་ལ་སོགས་པའི་དབང་གིས་བསྒྱུར་བ་དང།དབྱེ་བའི་རྣམ་འགྱུར་གྱི་སྒོ་ནས་སྡེབ་ཅིང་སྦྱོར་བས་སྡེབ་སྦྱོར་ཏེ། སྒྲ་རིག་པ་གཙོ་བོ་དང་། དེའི་ཤུགས་ཀྱིས་ཚིག་རྒྱན་གྱི་སྦྱོར་བ་སྙན་དངགས་ཀྱི་རིག་གནས་དང་། ལྕི་ཡང་སོགས་ཀྱི་སྦྱོར་བ་སྡེབ་སྦྱོར་གྱི་རིག་གནས་ཀྱང་བསྡུ་བས། དེ་དག་མཛད་པའི་མཁས་པ་རྣམས་དང་། སློབ་དཔོན་རང་ཉིད་ལ་དངོས་སུ་བཀའ་དྲིན་ཆེ་བའི་བླ་མ་ལྷ་རིག་པའི་སེང་གེ་དང་། ཡིག་མཁན་ལེགས་བྱིན་ལ་ཡང་ཕྱག་འཚལ་བའོ། །ཡང་ནི་གོང་གི་དེ་རྣམས་སུ་མ་ཟད་པའོ། །གཉིས་པ་རྩོམ་པར་དམ་བཅའ་བ་ནི།་་་་་་་་་་་་་་་་་་་་་་་་་་་་་་་་་་་་་་་ནས། །བསླབ་པ་ཀུན་གྱི་གཞི་འཛིན་ཅིང་། །རིག་བྱེད་སྨྲ་བ་རྣམས་ཀྱི་རྒྱུ། །མིང་ཚིག་བརྗོད་པ་ཀུན་གྱི་གཞི། །ཡི་གེའི་སྦྱོར་བ་བཤད་པར་བྱ། །ཞེས་གསུངས་ཏེ། དེ་ལྟར་ཕྱག་འཚལ་བ་དང་དམ་བཅའ་བ་གཉིས་རྒྱུན་གཅིག་ཏུ་སྦྱོར་ཞིང་བྱ་བའི་གོ་རིམ་སྟོན་པའི་ཕྱིར། ནས་ཞེས་སྨོས་ལ། དེ་ནི་བྱ་བ་གཉིས་བྱེད་པ་པོ་གཅིག་གིས་རིམ་བཞིན་བྱེད་པར་སྟོན་པའི་མཚམས་སྦྱོར་གྱི་སྒྲའོ། །འདིར་དངོས་སུ་བསྟན་པའི་བསླབ་པ་ནི། རྟགས་འཇུག་གི་སྐབས་ནས།ཉན་ཐོས་རང་རྒྱལ་སངས་རྒྱས་ཀྱི། །བསླབ་པ་རྣམས་ཀྱང་མེད་པར་འགྱུར། །ཞེས་པ་ལྟར་ཐེག་པ་གསུམ་གྱི་བསླབ་པའོ། །དེ་ཡང་ཚུལ་ཁྲིམས་སམ། ཏིང་ངེ་འཛིན་ནམ། ཤེས་རབ་ཀྱི་བསླབ་པ་གསུམ་ལ་ཚང་བར་འདུ་བས། བསླབ་པ་འདི་གསུམ་ལ་ཡང་དོན་གྱིས་འཐོབ་བོ། །ཀུན་ནི་མང་ཚིག་སྟེ། མཐའ་དག་པ་དང་། ཕལ་མོ་ཆེའི་དོན་གཉིས་ལ་འཇུག་པ་ལས། འདིར་ནི་མཐའ་དག་པའི་དོན་ནོ། །གྱི་ནི་འབྲེལ་བ་སྟེ། འོག་གི་གཞི་ཞེས་པ་དེ་བསླབ་པ་ཀུན་གྱི་ཡིན་པར་བསྒྲུབས་པའོ། །གཞི་ཞེས་པ་ནི་རྩ་བའམ་རྒྱུའི་དོན་ནོ།།འཛིན་པ་ནི་ཡི་གེའི་སྦྱོར་བས་བསླབ་པ་དེ་ཀུན་གྱི་རྩ་བའམ་རྒྱུ་བྱེད་པའི་དོན་ཏེ། ཡི་གེའི་བྱེད་པ་སྟོན་པའོ། །འོ་ན་ཡི་གེའི་བྱེད་པ་དེར་ཟད་དམ་ཞེ་ན། ཅིང་ཞེས་སྨོས་ཏེ། དེར་མ་ཟད་ཕྱི་རོལ་རིག་བྱེད་སྨྲ་བ་རྣམས་ཀྱི་རྒྱུ་ཡང་ཡིན་ནོ། །ཞེས་པའོ། །དེ་ལ་རིག་བྱེད་ནི་བཞི་སྟེ། མཆོད་སྦྱིན། ངེས་བརྗོད།སྲིད་སྲུང་། སྙན་ཚིག་གི་རིག་བྱེད་རྣམས་སོ། །དེ་ཡང་མཆོད་སྦྱིན་ནི་མཐོ་རིས་ཀྱི་ཕྱིར་མཆོད་སྦྱིན་བྱེད་པའོ། །ངེས་བརྗོད་ནི་མིང་ཚིག་གི་ངེས་པ་སྒྲུབ་པའི་སྒྲའོ། །སྲིད་སྲུང་ནི་རྒྱལ་སྲིད་ལ་སོགས་པ་སྲུང་བ་དང་སྤེལ་བའོ། །སྙན་ཚིག་ནི་ཚིག་རྒྱན་གྱི་སྦྱོར་བའོ། །དེ་དག་གི་ཚུལ་སྟོན་པའི་གཞུང་ལུགས་ལ་རིག་བྱེད་ཅེས་བྱ་སྟེ། དེ་དག་གི་ངོ་བོ་དང་མཚན་ཉིད་དང་། བྱེད་ལུགས་ཀྱི་ཐབས་ལ་སོགས་པ་རིག་པར་བྱེད་ཅིང་གོ་བར་བྱེད་པའི་ཕྱིར་རོ། །སྨྲ་བ་ནི་དེ་དག་གི་གཞུང་ལུགས་སྨྲ་བའོ། །རྒྱུ་ནི་སྨྲ་བའི་བྱ་བ་དེའི་རྒྱུའམ་རྩ་བའང་ཡིན་ཞེས་པའོ། །མིང་ནི་ཀ་ལ་སོགས་པའི་ཡི་གེ་འདུས་ནས་དོན་གྱི་ངོ་བོ་ཙམ་བརྗོད་པ། ཀ་བ། བུམ་པ། ལྷ་མི་ཞེས་པ་ལྟ་བུའོ། །ཚིག་ནི་མིང་འདུས་ནས་དོན་གྱི་ཁྱད་པར་བརྗོད་པ། ཀ་བའི་གཟིགས། བུམ་པའི་ལྟོ་བ་ཞེས་པ་ལྟ་བུའོ། །བརྗོད་པ་ནི་ངག་སྟེ། བུམ་པ་ལ་གནས་པའི་ཆུས་ལུས་འཁྲུ་ཞེས་པ་ལྟ་བུ་ཚིག་གི་ཚོགས་པའམ་རྒྱུན་ནོ། །དེ་ཀུན་གྱི་གཞི་ནི། དེ་མཐའ་དག་གི་རྩ་བའམ་རྒྱུའོ། །འོ་ན་དེ་དག་གི་གཞིའམ་རྒྱུ་དེ་གང་ཡིན་ཞེ་ན། དེ་ངོས་བཟུང་བའི་ཕྱིར་ཡི་གེའི་སྦྱོར་བ་ཞེས་སྨོས་ཏེ། ཡི་གེ་ནི་ཀ་ལ་སོགས་པའོ། །དེའི་སྦྱོར་བ་ནི། དེ་དག་ཕན་ཚུན་རྣམ་དབྱེ་དང་ཚིག་ཕྲད་སོགས་ཀྱིས་སྦྲེལ་ཞིང་སྦྱོར་བའོ། །དེ་ཉིད་འདིར་བཤད་པར་དམ་བཅའ་བ་ནི། བཤད་པར་བྱ་ཞེས་པ་སྟེ། མདོར་ན་ཕྱི་རོལ་པ་རིག་བྱེད་ནས་བཤད་པ་བཞིན་སྒྲུབ་པ་དང་། ནང་པ་མངོན་མཐོ་དང་ངེས་ལེགས་སྒྲུབ་པ་ལ། དེའི་ཐབས་ཤེས་དགོས། དེ་ཤེས་པ་ལ་བསླབ་དགོས། བསླབ་པ་ལ་ཡང་བསླབ་བྱའི་གནས་བསླབ་པ་གསུམ་ལ་སོགས་པ་དང་། རིག་བྱེད་བཞི་སྟོན་པའི་གཞུང་ལུགས་སྡེ་སྣོད་གསུམ་དང་།རིག་བྱེད་ཀྱི་གཞུང་ལ་སོགས་པ་ཐོས་དགོས། སྡེ་སྣོད་དང་། གཞུང་དེ་དག་གིས་ཀྱང་བརྗོད་བྱ་སྟོན་པ་ལ། བརྗོད་བྱའི་ངོ་བོ་སྟོན་པ་ལ་མིང་དང་། ཁྱད་པར་སྟོན་པ་ལ་ཚིག་དང་། ཁོག་སྒྲིག་པ་ལ་ངག་གི་ཕྲེང་བ་རྣམས་མེད་དུ་མི་རུང་བས། གཞུང་དང་གདམས་པ་ཡང་ངག་ཚིག་མིང་གི་ཕྲེང་བ་ལས་མ་འདས་ལ། དེ་དག་ཀྱང་མཐར་གཏུགས་ན་ཡི་གེའི་ངོ་བོ་ལས་མ་འདས་པས།ཡི་གེའི་སྦྱོར་བ་ཉིད་དེ་དག་གི་གཞི་དང་རྒྱུའོ་སྙན་དུ་དགོངས་ནས། དེ་ཉིད་འདིར་བཤད་པར་བྱ་ཞེས་པའོ། །དེ་ལྟར་ན་ཡི་གེའི་སྦྱོར་བ་ཉིད་འདིའི་བརྗོད་བྱའོ། །བརྗོད་བྱ་དེ་འདིར་བཤད་པའི་དགོས་པ་ནི། མིང་ཚིག་གི་སྦྱོར་བ་ལ་མཁས་པའོ། །དེ་ལྟར་མཁས་པའི་དགོས་པ་ནི། དོན་གྱི་ངོ་བོ་དང་ཁྱད་པར་ཤེས་ནས་ཉམས་སུ་བླངས་པས། མཐར་ཐམས་ཅད་མཁྱེན་པ་འཐོབ་པའོ། །དེ་ལྟར་དོན་གྱི་ངོ་བོ་དང་། ཁྱད་པར་ཤེས་ནས་བླང་དོར་གྱི་སྒོ་ནས་ཉམས་སུ་བླངས་པས་ཐམས་ཅད་མཁྱེན་པ་འཐོབ་པ་དེ། མིག་ཚིག་གི་སྦྱོར་བ་ཤེས་པ་ལ་རག་ལས་ཤིང་། མིང་ཚིག་གི་སྦྱོར་བ་ཤེས་པ་ཡང་། ཡི་གེའི་སྦྱོར་བ་ལ་རག་ལས། དེ་ཉིད་གཞུང་འདིར་འབྲེལ་བ་ནི་བསླབ་པ་ཀུན་གྱི་ཞེས་པ་ནས།བཤད་པར་བྱ་ཞེས་པའི་བར་ཀྱི་དོན་ནོ། །གཉིས་པ་སྒོ་དེ་དང་ལྡན་པའི་བསྟན་བཅོས་དངོས་འཆད་པ་ལ། ཡི་གེའི་སྦྱོར་བ་དང་། ཚིགས་བཅད་འགྲོལ་བའི་མན་ངག་བཤད་པ་གཉིས་སོ། །དང་པོ་༼ཡི་གེའི་སྦྱོར་བ་༽ལ། ཡི་གེའི་སྦྱོར་བའི་གཞི་ཡི་གེའི་རྣམ་བཞག་དང་། ཡི་གེའི་སྦྱོར་བ་དངོས་ཀྱིས་མིང་ཚིག་གི་འཇུག་པ་བསྟན་པ་གཉིས་སོ། །དང་པོ་༼ཡི་གེའི་སྦྱོར་བའི་གཞི་ཡི་གེའི་རྣམ་བཞག་༽ལ། དབྱེ་བའི་སྒོ་ནས་ངོ་བོ་ངོས་བཟུང་བ་དང་། སྔོན་རྗེས་སུ་འཇུག་པ་དང་མི་འཇུག་པའི་ཁྱད་པར་བསྟན་པ་གཉིས་སོ། །དང་པོ་ལ་ཡང་རྩ་བའི་དབྱེ་བ་དང་། ཡན་ལག་གི་དབྱེ་བ་གཉིས་ལས། དང་པོ་༼རྩ་བའི་དབྱེ་བ་༽ནི།ཡི་གེ་ཨཱ་ལི་ཀཱ་ལི་གཉིས། །ཞེས་གསུངས་ཏེ། ཨཱ་ལི་ནི་ཨ་ཕྲེང་སྟེ་དབྱངས་དང་། ཀཱ་ལི་ནི་ཀ་ཕྲེང་སྟེ་གསལ་བྱེད་དོ། །གཉིས་ཞེས་པ་ཡི་གེའི་ངོ་བོ་ཉིད་དེ་གཉིས་སུ་ངེས་པར་སྟོན་པའོ། །གཉིས་པ་ཡན་ལག་གི་དབྱེ་བ་ནི།ཨཱ་ལོ་གསལ་བྱེད་ཨི་སོགས་བཞི། །ཀཱ་ལི་སུམ་ཅུ་ཐམ་པའོ། །ཞེས་གསུངས་ཏེ། ཨཱ་ལི་ནི་ཨ་ཕྲེང་དང་། གསལ་བྱེད་ནི་གསལ་བར་བྱེད་པ་སྟེ། མཚོན་པར་བྱེད་པ་ཞེས་བྱ་བའི་དོན་ནོ། །གང་གསལ་བར་བྱེད་ན། ཨཱ་ལི་སྟེ་ཨ་ཕྲེང་ངོ་། །ཚུལ་ཇི་ལྟར་མཚོན་པར་བྱེད་ན། བོད་ཀྱི་དབྱངས་ལ་ཨ་ཡིག་མེད་པས། ཨ་ཕྲེང་གི་དོན་དངོས་སུ་མེད་ཀྱང་། རྒྱ་གར་གྱི་དབྱངས་ལ་ཨ་ཡིག་ལ་སོགས་པའི་ཕྲེང་བ་དངོས་སུ་ཡོད་པས་དེ་ལ་ཨ་ཕྲེང་ཞེས་བཏགས་པ་བཞིན་དུ། བོད་ཀྱི་ཨི་ལ་སོགས་པ་ཡང་དེའི་ནང་ནས་ཕྱུངས་ཤིང་དེ་དང་ཆ་མཐུན་པས་ཨཱ་ལི་ཞེས་གདགས་སུ་རུང་བར་མཚོན་ཞིང་གོ་བར་ནུས་པའི་སྒོ་ནས་སོ། །དེའི་གྲངས་ངེས་བསྟན་པའི་ཕྱིར། ཨི་སོགས་བཞི། ཞེས་སྨོས་ཏེ། ཨི་ལ་སོགས་པ་ཨུ་ཨེ་ཨོ་བཞི་ཡོད་པས་དེར་ངེས་པའོ། །ཀཱ་ལི་ཀ་ཕྲེང་ནི་སུམ་ཅུ་ཐམ་པ་སྟེ། ཀ་ཁ་ག་ང་། ཅ་ཆ་ཇ་ཉ། ཏ་ཐ་ད་ན། པ་ཕ་བ་མ། ཙ་ཚ་ཛ་ཝ།ཞ་ཟ་འ་ཡ། ར་ལ་ཤ་ས། ཧ་ཨ་རྣམས་སུ་ངེས་པའོ། །འདིར་བོད་སྐད་སོར་བཞག་ལ། རིང་ཐུང་གི་རྣམ་བཞག་མེད་པས། རྒྱ་གར་གྱི་དབྱངས་ནས་ཨཱ་ཨཱི་ཨཱུ་ཨཻ་ཨཽ་རྣམས་དང་། རྀ་རཱྀ་ལྀ་ལཱྀ་བཞི་མི་མཁོ་བས་བོར་ཞིང་། དབྱངས་དང་པོ་ཨ་ཡིག་དེ་བོད་ཀྱི་གསལ་བྱེད་ཐ་མར་བསྣན་པས། དེའི་ལྷག་མ་ཨི་ཨུ་ཨེ་ཨོ་བཞི་ལ་དབྱངས་ཀྱི་ངེས་པ་མཛད་དོ། །གསལ་བྱེད་ཀྱང་རྒྱ་གར་གྱི་སྡེ་པའི་བཞི་པ་གྷ་ཛྷ་ཌྷ་དྷ་བྷ་དང་། ལོག་པ་ཊ་ཋ་ཎ་ཌ་སྟེ་དགུ་དང་། དྲོ་བ་ཥ་ཡིག་བཅས་པ་དང་བཅུ་བོར་པའི་ལྷག་མ་ཉེར་གསུམ་གྱི་སྟེང་དུ། བོད་སྐད་ལ་ཉེ་བར་མཁོ་བ་སྟོད་དུ་ཅ་ཆ་ཇ་གསུམ་དང་། འོག་ཏུ་ཞ་ཟ་འ་གསུམ་དང་དྲུག་གི་སྟེང་དུ། དབྱངས་ནས་བོར་བའི་ཨ་ཡིག་དང་བཅས་པ་བདུན་བསྣན་པས་སུམ་ཅུ་ཐམ་པར་ངེས་པ་མཛད་དོ། །ཨཱ་ལི་གསལ་བྱེད་ཅེས་པའི་གསལ་བྱེད་ལ། རྣམ་གླིང་པ་སོགས་མཁས་པ་སྔ་མ་དུ་མས་གཞན་དུ་བཤད་པ་མང་ཡང་། གོང་དུ་བཤད་པ་ལྟར་ཞཱ་ལུ་ལོ་ཆེན་གྱིས་ཀྱང་བཞེད་ཅིང་དེ་ཉིད་འཐད་པར་ངེས་ཏེ། འདི་ལྟར།འགའ་ཞིག་ལ་རྒྱ་གར་ན་ཨ་ཡིག་དང་པོར་བྱས་པའི་དབྱངས་ཀྱི་ཕྲེང་བ་ཡོད་པས་ཨ་ཕྲེང་ཞེས་གདགས་རིགས་ཀྱི། བོད་ཀྱི་དབྱངས་ལ་ཨ་ཡིག་མེད་ཀྱང་། ཨི་ཡིག་ལ་སོགས་པའི་ཕྲེང་བ་ཡིན་པ་ལ། ཅིའི་ཕྱིར་ཨ་ཕྲེང་ཞེས་བཏགས་སྙམ་པའི་དོགས་པ་སྐྱེ་བས། དེ་སེལ་བའི་ཕྱིར། བོད་ཀྱི་ཨི་ལ་སོགས་པ་རྒྱ་གར་གྱི་ཨ་ཕྲེང་གི་ནང་ནས་ཕྱུངས་པ་ཡིན་ཞིང་། ཨ་ཕྲེང་ཞེས་པ་རྒྱ་གར་ན་དབྱངས་ཀྱི་སྤྱི་མིང་མཛད་པ་ཡིན་པས། བོད་ན་ཡང་ཨི་སོགས་བཞི་ལ་ཨ་ཕྲེང་ཞེས་བཏགས་པ་ན། རྒྱ་གར་ན་ཨཱ་ལིར་གྲགས་པའི་དབྱངས་དེའི་ཆ་མཐུན་བོད་ན་ཡང་ཡོད་པར་གོ་ཞིང་མཚོན་པའམ་གསལ་བར་བྱེད་པ་དང་། བཏགས་པའི་དགོས་པ་ཡང་། འོག་ནས། དེ་ལ་ཨཱ་ལི་གསུམ་པ་སྦྱར། །ཞེས་སོགས་འབྱུང་བས་ན། ཨཱ་ལིའི་མིང་བརྗོད་པའི་ཚེ་ཨི་སོགས་བཞི་པོ་ཅི་རིགས་གོ་བའི་ཆེད་དུ་བཀོད་པའོ། །གཞན་ཡང་རྣམ་གླིང་པས། ཨཱ་ལི་ཤེས་རབ་ཀྱི་ཆ་དང་། ཀཱ་ལི་ཐབས་ཀྱི་རང་བཞིན་ཞེས་བཤད་པ་ཡང་། ཐུན་མོང་བའི་རིག་གནས་ཀྱི་སྐབས་སུ་གསང་སྔགས་ཀྱི་མཚོན་དོན་འཆད་པ་སྐབས་སུ་མ་བབ་ཅིང་། གཞུང་དོན་རྟོགས་པ་ལ་ཅུང་ཟད་ཀྱང་མི་མཁོའ།ོ །ཡང་དག་ཡིག་ངག་སྒྲོན་དུ། དབྱངས་ལྔ་ཡ་ར་ལ་ཝའི་འདོགས། །ཞེས་བཤད་པ་ཡང་གཞུང་འདི་དང་དངོས་སུ་འགལ་ལོ། །གཉིས་པ་སྔོན་རྗེས་སུ་འཇུག་པ་དང་མི་འཇུག་པའི་ཁྱད་པར་ལ།མདོར་བསྟན་པ་དང་། རྒྱས་པར་བཤད་པ་གཉིས་ལས། དང་པོ་༼མདོར་བསྟན་པ་༽ནི།དེ་ལས་རྗེས་འཇུག་བཅུ་ཡིན་ཏེ། །༡། །དེ་ལས་ལྔ་ནི་སྔོན་དུའང་འཇུག།མི་འཇུག་པ་ནི་ཉི་ཤུ་འོ། །ཞེས་གསུངས་ཏེ། དེ་ནི་བརྗོད་ཟིན་འདས་པ་དེའོ། །དེ་ཡང་གོང་གི་ཀཱ་ལི་སུམ་ཅུ་པོ་དེ་ལས་ཞེས་པ་སྟེ། ལས་ཞེས་པ་དགར་བའི་དོན་ནོ། །གང་དགར་ན། རྗེས་འཇུག་གི་ཡི་གེ་བཅུ་དགར་བ་སྟེ། དགར་གཞི་ཀཱ་ལི་སུམ་ཅུའི་ནང་ནས། དམིགས་སུ་བཀར་ཏེ་རྗེས་འཇུག་ཕྱུངས་པའོ། །ཏེ་ནི་ཚིག་གི་ལྷག་མ་གཞན་ཡོད་པ་སྟེ། རྗེས་འཇུག་གི་ཡི་གེ་བཅུ་པོ་དེ་ལས། ཡི་གེ་ལྔ་ནི་རྗེས་སུ་མ་ཟད་སྔོན་དུའང་འཇུག་ཅེས་པ་དེ་འདྲེན་པའོ། །དེ་ལས་ཞེས་པ་ནི་གོང་ལྟར་རོ། །འང་ནི་སྔ་མར་མ་ཟད་པའོ། །རྗེས་འཇུག་ཕྱུངས་ཟིན་པའི་ལྷག་མ་ཉི་ཤུ་པོ་རྣམས་ནི། སྔོན་རྗེས་གང་ལ་ཡང་མི་འཇུག་པར་མིང་གཞི་ཁོ་ནར་གནས་པའོ། །དེ་ལྟར་ཀཱ་ལི་སུམ་ཅུ་པོའ་ིནང་ནས་རྗེས་འཇུག་བཅུ་ཕྱུངས། རྗེས་འཇུག་བཅུའི་ནང་ནས་སྔོན་འཇུག་ལྔ་བཏོན་ཅིང་། དེའི་ལྷག་མ་ཉི་ཤུ་པོ་སྔོན་རྗེས་གང་ལའང་མི་འཇུག་ཅེས་པའོ། །གཉིས་པ་རྒྱས་པར་འཆད་པ་ལ།ཐོག་མར་སྡེ་ཚན་དབྱེ་བའི་ཕྱིར། །ཀཱ་ལི་ཕྱེད་དང་བརྒྱད་སྡེ་ནི། །བཞི་བཞི་དག་ཏུ་ཕྱེ་བ་ལས། །ཞེས་གསུངས་ཏེ། ཀཱ་ལི་སུམ་ཅུ་པོ་སྡེ་ཚན་ཕྱེད་དང་བརྒྱད་དུ་གནས་པ་ནི། ཡིག་འབྲུ་བཞི་ཚན་བཞི་ཚན་དག་ཏུ་ཕྱེ་བའི་དབང་དུ་བྱས་པའོ། །དེ་ཉིད་ལས།རྗེས་འཇུག་དབྱུང་བའི་ཕྱིར། །དང་པོ་གསུམ་པ་བཞི་པ་ཡི། །མས་གཉིས་དྲུག་པའི་གསུམ་པ་དང་། །བདུན་པ་ལ་ནི་ཤ་མ་གཏོགས། །རྗེས་འཇུག་ཡི་གེ་བཅུ་རུ་བཤད། །ཅེས་གསུངས་ཏེ། གོང་གི་བཞི་ཚན་གྱི་སྡེ་པ་ཕྱེད་དང་བརྒྱད་དུ་གནས་པ་དེ་ལས། སྡེ་ཚན་དང་པོ། ཀ་ཁ་ག་ང་དང་། སྡེ་ཚན་གསུམ་པ། ཏ་ཐ་ད་ན། སྡེ་ཚན་བཞི་པ། པ་ཕ་བ་མ་དང་བཅས་པ་སྡེ་ཚན་སོ་སོའ་ིཡི་གེ་མས་མ་གཉིས་གཉིས་སོ། །དེ་ཡང་སྡེ་བ་དང་པོའ་ིམས་མ་ག་ང་གཉིས། གསུམ་པའི་མས་མ་ད་ན་གཉིས་དང་། བཞི་པའི་མས་མ་བ་མ་གཉིས་ཏེ་ཡི་གེ་དྲུག་དང་། སྡེ་བ་དྲུག་པ་ཞའི་སྡེ་ཚན་གྱི་ཡི་གེ་གསུམ་པ་འ་ཡིག་དང་། བདུན་པ་རའི་སྡེ་ཚན་གྱི་ཤ་ཡིག་མ་གཏོགས་པའི་ར་ལ་ས་གསུམ་དང་བཅས་པ་བཏོན་པས། ཁྱོན་ག་ང་ད་ན་བ་མ་འ་ར་ལ་ས་སྟེ་བཅུ་པོ་དེ་ཉིད་རྗེས་འཇུག་གི་ཡི་གེ་བཅུ་རུ་བཤད་པ་ཡིན་ནོ། །ཞེས་སོ། །ཡང་རྗེས་འཇུག་གི་ནང་ནས་སྔོན་འཇུག་དབྱུང་བའི་ཕྱིར།རྗེས་འཇུག་ཡི་གེ་བཅུ་ཉིད་ལས། །དང་པོ་གསུམ་པ་ལྔ་པ་དྲུག།བདུན་པ་རྣམས་ནི་སྔོན་དུའང་འཇུག།ཅེས་གསུངས་ཏེ། རྗེས་འཇུག་གི་ཡི་གེ་ག་ང་ད་ན་བ་མ་འ་ར་ལ་ས་སྟེ་བཅུ་པོ་དེ་ཉིད་ལས། གྲངས་དང་པོ་གགསུམ་པ་ད། ལྔ་པ་བ། དྲུག་པ་མ།བདུན་པ་འ་ཡིག་སྟེ་ལྔ་པོ་དེ་རྣམས་ནི་རྗེས་སུ་འཇུག་པར་མ་ཟད་སྔོན་དུའང་འཇུག་གོ། ཞེས་པའོ། །དེ་ནས་མི་འཇུག་པ་བསྟན་པའི་ཕྱིར།མིང་གཞི་གཉིས་སམ་སུམ་སྦྲེལ་ལམ། །དེ་ལ་དབྱངས་ཀྱི་གཞི་ལྡན་ཡང་། །གང་དུའང་འཇུག་མིན་སྦྱར་བའང་མིན། །ཞེས་གསུངས་ཏེ། གོང་དུ་རྗེས་འཇུག་ཕྱུངས་ཟིན་པའི་ལྷག་མ། ཀ་ཁ།ཅ་ཆ་ཇ་ཉ། ཏ་ཐ། པ་ཕ། ཙ་ཚ་ཛ་ཝ། ཞ་ཟ་ཡ། ཤ། ཧ་ཨ་སྟེ། སྔོན་འཇུག་གང་དུའང་མི་འཇུག་པའི་མིང་གཞི་ཁོ་ནར་གནས་པ་ཉི་ཤུ་པོ་དེའི་ནང་ནས།ཀཏ། ཏཕ། ལྟ་བུ་ཀ་དང་ཏ་ཡིག་སྔོན་དུ་འཇུག་པ་དང་། ཆཀཐཝ་ལྟ་བུ། ཀ་དང་ཝ་རྗེས་སུ་འཇུག་པ་ཉིས་སྦྲེལ་ལམ། ཡང་ན། ཕཁཉ། ཀཞཝ་ལྟ་བུ་སྔོན་རྗེས་གཉིས་ཀ་ཡོད་པའི་སུམ་སྦྲེལ་ལམ། དེ་དག་ལ་དབྱངས་ཀྱི་གཞི་སྟེ། ཨི་ལ་སོགས་པའི་སྲོག་དང་ལྡན་པ། ཀཏི། ཏཕུ། ཆེཀཐོཝ། ཕཁོཉ། ཀཞིཝ་ལྟ་བུ་བོད་སྐད་ཀྱི་ཡི་གེ་ལ་འབྱུང་བ་མི་སྲིད་ལ། སྲིད་ན་ཡང་གསུང་རབ་ཀྱི་ཐ་སྙད་གང་དུའང་འཇུག་པ་མིན་ཞིང་། ཐུ་མི་བདག་གིས་སྦྱར་བའང་མིན་ནོ།།ཞེས་པའོ། །འདིར་ཡང་གཞན་དུ་བཤད་པ་མང་ཡང་མངས་སུ་དོགས་ནས་མ་བཀོད་ཅིང་། རྣམ་དཔྱོད་ཀྱིས་ལེགས་པར་བརྟགས་ན་འདི་ཁོ་ན་འཐད་པར་སེམས་སོ། །གཉིས་པ་ཡི་གེའི་སྦྱོར་བ་དངོས་ཀྱིས་མིང་ཚིག་གི་འཇུག་པ་བསྟན་པ་ལ། རྣམ་དབྱེ་འཕྲོས་དོན་དང་བཅས་པ་བཤད་པ་དང་། ཚིག་ཕྲད་རྐྱང་པ་བཤད་པ་གཉིས་སོ། །དང་པོ་༼རྣམ་དབྱེ་འཕྲོས་དོན་དང་བཅས་པ་བཤད་པ་༽ལ། རྣམ་དབྱེ་དང་པོ་དང་འབྲེལ་བ་གོ་ལ་སོགས་པ་བཤད་པ་དང་། རྣམ་དབྱེ་གཉིས་པ་སོགས་བཤད་པ་དང་། རྣམ་དབྱེ་དྲུག་པ་ཉིད་བསྟན་པ་དང་། རྣམ་དབྱེ་གསུམ་པ་ཉིད་བསྟན་པ་དང་། དེ་དག་གི་ཡི་གེའི་སྦྱོར་ཚུལ་ལས་འཕྲོས་ནས་ཚིག་རྒྱན་སོགས་བཤད་པ་དང་། རྣམ་དབྱེ་ལྔ་པ་སོགས་བཤད་པ་དང་། རྣམ་དབྱེ་བརྒྱད་པ་ཉིད་བསྟན་པ་དང་བདུན་ནོ། །དེ་དག་ལས། རྣམ་དབྱེ་དང་པོ་དང་འབྲེལ་བ་འཆད་པའི་དབང་དུ་བྱས་ཏེ། མཐའ་གང་དུ་འཇུག་པའི་ཡི་གེ་ངོས་བཟུང་བའི་ཕྱིར།རྗེས་འཇུག་ཡི་གེ་བཅུ་པོ་ནི། །མིང་གང་གི་ནི་མཐར་སྦྱར་བ། །དེ་ལ་ཨཱ་ལི་བཞི་པ་སྦྱར། །ཞེས་གསུངས་ཏེ། རྗེས་འཇུག་གི་ཡི་གེ་བཅུ་པོ་དེ་ཉིད་ནི། མིང་འབྲུགགླང་། དྲེད། བོན། ཤེས་རབ། ལམ། དགའ། གསེར། དངུལ། འདུས་བྱས་སོགས་གང་དང་གང་གི་མཐར་སྦྱར་བ་དེ་ལ། སླར་ཡང་རྗེས་འཇུག་རང་འདྲར་ཨཱ་ལི་བཞི་པ་ཨོ་སྦྱར་བའི་གོ་ངོ་དོ་ནོ་བོ་མོ་འོ་རོ་ལོ་སོ་ཞེས་པའི་སྒྲ་སྦྱར་ཏེ། འབྲུག་གོ། གླང་ངོ་། །དྲེད་དོ། །བོན་ནོ། །ཤེས་རབ་བོ། །ལམ་མོ། །དགའ་འོ། །གསེར་རོ། །དངུལ་ལོ། །འདུས་བྱས་སོ། །ཞེས་དང་། ཤུགས་ལ་བསྟན་པ་ད་དྲག་གི་དབང་གིས། ཕྱིནད་ཏོ། །གྱུརད་ཏོ། །སྩལད་ཏོ་ལ་སོགས་པ་འབྱུང་ངོ་། །དེ་ཉིད་ཀྱི་མིང་བསྟན་པའི་ཕྱིར།སླར་བསྡུ་བར་ནི་ཤེས་པར་བྱ། །ཞེས་གསུངས་ཏེ། དེའི་ཐ་སྙད་སླར་བསྡུ་བ་ཞེས་བྱ་བར་ནི་ཤེས་པར་བྱའོ། །དེ་ཡང་རང་གང་ལ་སྦྱར་བའི་མིང་ཟླ་སྡུད་པ་ཙམ་ཡིན་གྱི། ལྷག་མ་གཞན་མི་སྟོན་པ་མིན་ཏེ། སྨྲ་སྒོ་ལས། འོ་ལ་སོགས་པ་ཟླ་སྡུད་པའོ། །ཞེས་གསུངས་སོ། །དེའི་ཕྱིར་རྫོགས་ཚིག་ཅེས་ཀྱང་བྱ་སྟེ། དོན་དེ་རེ་ཞིག་རྫོགས་པར་སྟོན་པའི་ཕྱིར་རོ། །ལེགས་སྦྱར་གྱི་སྐད་ལ་རྣམ་དབྱེ་དང་པོའ་ིགཅིག་ཚིག་སྦྱར་བ་ན། མིང་ཙམ་དུ་མ་བསྡད་པར་ཚིག་ཏུ་གྲུབ་པ་ཡིན་དང་། བོད་འདིར་མིང་ཙམ་ཁོ་ན་ལ་རྣམ་དབྱེ་དང་པོ་ཞེས་བྱ་ཞིང་། རྫོགས་ཚིག་སྦྱར་ཡང་མིང་ཙམ་ལས་ཚིག་ཏུ་མི་འགྲུབ་བོ། །དེའི་ཕྱིར་བུམ་པའོ་ཞེས་བྱ་བ་ཡང་རྣམ་དབྱེ་དང་པོའ་ིགཅིག་ཚིག་ཁོ་ནའོ། །སྐབས་འདིར་ཞྭ་ལུ་ལོ་ཆེན་སོགས་མཁས་པ་དུ་མས་བྱའོ་སྙམ་ནས་ཡོད་དོ་ཞེས་པ་སླར་བསྡུ་རྫོགས་ཚིག་ཅན་དངོས་མིན་པར་སླར་བསྡུ་ཙམ་པོ་བ་ཡིན་ནོ། །གསུངས་པ་འཐད་པར་མི་སེམས་ཏེ། འོ་ན་སླར་བསྡུ་ཙམ་ཞིག་ཡིན་ན་སླར་བསྡུ་ཡིན་དགོས་སམ་མི་དགོས། མི་དགོས་ན་སླར་བསྡུ་ཡིན་ན། སླར་བསྡུ་དང་ཁྱད་པར་ཅན་ཡིན་དགོས་པར་འགྱུར་ལ། དེ་ལྟར་ན་སླར་བསྡུ་ཙམ་པོ་བ་ཁྱད་པར་ཅན་གཉིས་སུ་ཕྱེ་བ་འགལ་ལོ། །དགོས་ན་སླར་བསྡུ་ཙམ་པོ་བ་ཡང་། སླར་བསྡུ་ཡིན་པས། སླར་བསྡུ་དངོས་མིན་གསུངས་པ་དང་འགལ་ལོ། །གཞན་ཡང་སླར་བསྡུ་ཙམ་པོ་བ་ཞེས་པ་དེ། སླར་བསྡུ་ཙམ་གྱི་མིང་ཡིན་ནམ་མིན། མིན་ན་གང་གི་མིང་ཡིན་པ་འཆད་དགོས་ལ།ཡིན་ན་སླར་བསྡུ་ཙམ། སླར་བསྡུ་ཡིན་གསུངས་པར་འདུག་པས། མིང་ཙམ་ཡང་མིང་མིན་གསུང་ནུས་སམ། ནུས་ན་ནི། མིང་ལ་མིང་ཁྱད་པར་ཅན་གྱིས་ཁྱད་པར་འགྱུར་རོ། །གཞན་ཡང་བྱའོ་སྙམ་ནས། ཞེས་པའི་འོའ་ིསྒྲ་སླར་བསྡུ་རྫོགས་ཚིག་ཅན་མིན་པའི་རྒྱུ་མཚན། སྙམ་ནས་ཞེས་པ་དང་སྦྲེལ་བས་ཡིན་ན། འོ་ན་བསླབ་པར་བྱའོ། །ཞེས་སོགས་ལ་ཡང་ཕྱི་མར་ཞེས་དང་དེ་སྐད་སོགས་སྦྲེལ་བ་ཡོད་པས། དེ་དག་ཀྱང་སླར་བསྡུ་མིན་པར་འགྱུར་ཞིང།དེ་ལྟར་ན་ཕྱི་མར་ཚིག་གཞན་མེད་པའི་འོ་ལ་སོགས་པའི་སྒྲ་སྦྱར་བ་དཀོན་པས་སླར་བསྡུ་ཡང་རྙེད་དཀའ་བར་གྱུར་རོ། །དེས་ན་བྱའོ་ཞེས་པའི་འོའ་ིསྒྲ་རྫོགས་ཚིག་ཡིན་ཞིང་། དེའི་མཐར་མིང་གཞན་སྦྲེལ་བ་ཡོད་ཀྱང་། འོའ་ིསྒྲས་དེ་འདྲེན་པ་མིན་ནོ། །རྣམ་གླིང་པས་ཀྱང་། དེ་དང་ཆ་མཐུན་པར་མཛད་ཁུལ་བྱས་ནས། དཔེར་བརྗོད་ལ། རྟག་གོ། མཐོང་ངོ་སོགས་སླར་བསྡུ་རྫོགས་ཚིག་ཅན་དངོས་དང་། བརྟག་གོ། འབྱུང་ངོ་། །འདོད་དོ་སོགས་སླར་བསྡུ་ཙམ་པོ་བ་ཡིན་གསུངས་པ་ནི་ཧ་ཅང་དཔའ་ཐལ་ཞིང་བློ་ལྡན་རྣམས་ཁྲེལ་བའི་གནས་ཡིན་པར་རྟོགས་སླའོ། །འདི་རྣམས་སླར་བསྡུ་དངོས་ཡིན་པ་ལ་དོགས་པ་དེ་འདྲ་མི་དགོས་ཀྱི། དེ་བས་བྱེད་པ་པོ། ཚོང་བ་པོ། ཡིན་པར་གོད་ཀོབཙུན་མོ།སྦྱི་བོ་སོགས་བདག་པོ་དང་། མོ་རྟགས་དང་། རིགས་པ་དང་། ངེས་གཟུང་སོགས་དོན་གཞན་ལ་འཇུག་པ་དེ་རྣམས་དང་མ་འཁྲུལ་བ་དགོས་སོ་ཞེས་གསུངས་ན་དོན་ཆེའོ། །གཉིས་པ་རྣམ་དབྱེ་གཉིས་པ་སོགས་འཆད་པ་ལ། ཐོག་མར་འཇུག་པའི་ཡི་གེ་ངོས་བཟུང་བ་ནི།རྗེས་འཇུག་ཡི་གེ་བཅུ་པོ་ལས། །གང་མིང་མཐའ་ན་བཅུ་པ་གནས། །དེ་ལ་ཨཱ་ལི་གཉིས་པ་སྦྱར། །གང་མིང་མཐའ་ན་བརྒྱད་པ་གནས། །དེ་ལ་གཉིས་པ་ཨུ་ཡང་སྦྱར། །གང་མིང་མཐའ་ན་གསུམ་པ་གནས། །དེ་ལ་ཨཱ་ལི་གཉིས་པ་སྦྱར། །བཞི་པ་དགུ་པ་དངོས་ཀྱང་སྟེ། །ཞེས་གསུངས་ཏེ། རྗེས་འཇུག་གི་ཡི་གེ་བཅུ་པོ་ལས་ཏེ། དེའི་ནང་ནས། གང་ཡང་རུང་བའི་མིང་གི་མཐའ་ན། རྗེས་འཇུག་བཅུ་པ་ས་ཡིག་གནས་ཤིང་། དེ་དང་མཐུན་པའི་ས་ཡིག་ལ། ཨཱ་ལི་གཉིས་པ་ཨུ་སྦྱར་བ་སུ་དང་། གང་ཡང་རུང་བའི་མིང་གི་མཐའ་ན། རྗེས་འཇུག་བརྒྱད་པ་ལ་དོན་གྱི་ར་ཡིག་གནས་པ་དེ་ཉིད་ལ། ཨཱ་ལི་གཉིས་པ་ཨུ་ཡང་སྦྱར་བ་རུ་དང་། གང་ཡང་རུང་བའི་མིང་གི་མཐའ་ན། རྗེས་འཇུག་གསུམ་པ་ད་ཡིག་གནས་ཤིང།དེ་དང་མཐུན་པའི་ད་ཡིག་ལ་ཨཱ་ལི་གཉིས་པ་ཨུ་སྦྱར་བ་དུ་དང་། རྗེས་འཇུག་བཞི་པ་ན་དང་། དགུ་པ་ལ་ཡིག་གཉིས་པོ་དངོས་ཏེ། དབྱངས་སྦྱར་བ་ལ་མ་ལྟོས་པར་འོག་གི་དོན་རྣམས་ལ་འཇུག་པའོ། །ཀྱང་ནི་དབྱངས་སྦྱར་བ་རྣམས་སུ་མ་ཟད་པའོ། །སྟེ་ནི་ལྷག་མ་འདྲེན་པའོ། །དེ་ལྟར་ངོས་བཟུང་བའི་སུ་རུ་དུ་ན་ལ་རྣམས་ཀྱི་འཇུག་པ་བསྟན་པའི་ཕྱིར། ལས་དང་ཆེད་དང་རྟེན་གནས་དང་། །དེ་ཉིད་ཚེ་སྐབས་ལ་སྒྲ་ཡིན། །ཞེས་གསུངས་ཏེ། དེ་རྣམས་ཀྱི་འཇུག་ཡུལ་འདིར་དངོས་སུ་བསྟན་པ་ནི་ལྔ་སྟེ། རྣམ་དབྱེ་གཉིས་པ་ལས་སུ་བྱ་བ་དང་། བཞི་པ་དགོས་ཆེད་དང་། བདུན་པ་གནས་གཞིའམ་རྟེན་གནས་དང་། དེ་ཉིད་དམ་བདེན་པ་དང་། ཚེ་སྐབས་རྣམས་ལ་འཇུག་པ་ལ། ལའི་སྒྲ་དང་མཐུན་པ་ཡིན་ནོ། །དེ་ལྟར་སུ་ལ་སོགས་པ་རྣམས། རྣམ་དབྱེ་གཉིས་པ་ལས་སུ་བྱ་བ་ལ་འཇུག་པ་ནི། དཔེར་ན། གཡས་སུ་ཉལ། ཁོག་མ་རུ་ཤ་འཚོས། ལམ་དུ་ཕྱིན། སེ་ར་ན་ཆོས་ཉན། ཞེས་གསུངས་པ་སོགས་རྗེས་འཇུག་གི་དབང་གིས་ཡི་གེ་མི་མཐུན་ཡང་། དེ་རྣམས་ཐམས་ཅད་ལ། ལ་ཡིག་འཇུག་སྟེ། གཡས་ལ་ཉལ། ཁོག་མ་ལ་ཤ་འཚོས། སེ་ར་ལ་ཆོས་ཉན་ལྟ་བུ་དང་། ད་དྲག་སོགས་ཀྱི་དབང་གིས་འཐོབ་པ། ཕྱི་རོལ་ཏུ་བསྡད། ཐབ་ཏུ་མེ་བཏང་། ལག་ཏུ་སྤྲད་སོགས་ལྟ་བུའོ། །རྣམ་དབྱེ་བཞི་པ་དགོས་ཆེད་ལ་འཇུག་པ་ལ་ཡང་། ལའི་སྒྲ་དང་མཐུན་ཏེ། དཔེར་ན། མཐོ་རིས་སུ་སྨོན་ལམ་ཐོབ།ཐར་བ་ཐོབ་པ་རུ་བདག་མེད་བསྒོམ། གྲལ་གྱི་ཆེད་དུ་འཚངས། འགྱེད་ཀྱི་ཕྱིར་དུ་བསྒྲིམས། སྐལ་བའི་དོན་དུ་འཐབ། རྒྱན་དུ་གསེར་བརྡུབས། ཚོགས་ན་མང་ཇ་བསྐོལ། ཐར་པ་བསྒྲུབ་ཏུ་ངེས་འབྱུང་བསྐྱེད་སོགས་ལ། མཐོ་རིས་ལ་སྨོན་ལམ་ཐོབ། ཐར་པ་ཐོབ་པ་ལ་བདག་མེད་བསྒོམ་སོགས་ཐམས་ཅད་ལ་ལ་ཡིག་སྦྱོར་རུང་བ་ལྟ་བུའོ། །རྣམ་དབྱེ་བདུན་པ་གནས་གཞིའམ་རྟེན་གནས་ལ་འཇུག་པ་ནི། ཤར་ཕྱོགས་སུ་ཡོད། བུམ་པ་རུ་ཆུ་གནས། མདུན་དུ་མི་འདུགགཤམ་དུ་མེ་ལོང་གསལ། བྱང་དུ་ཚྭ་མང་། རྒྱ་གར་དུ་ཆོས་དར། བོད་དུ་སྣམ་བུ་ལེགས། རབ་གསལ་དུ་དཔོན་པོ་བཞུགས། མདུན་དུ་དཀར་ཡོལ་མཛེས། རྒྱ་ནག་ཏུ་དར་མང་། རྒྱལ་ཁབ་ཏུ་བཙུན་མོ་གནས། ཕྱི་རོལ་ཏུ་སློང་མོ་པ་འབྱོར་སོགས་ལ།ལ་ཡིག་འཇུག་པ་ནི། ཤར་ཕྱོགས་ལ་ཡོད། བུམ་པ་ལ་ཆུ་གནས། སོགས་ཐམས་ཅད་ལ་ལ་ཡིག་སྦྱར་དུ་རུང་བ་ལྟ་བུའོ། །དེ་ཉིད་དམ་བདེན་པ་ལ་འཇུག་པ་ནི། བརྗོད་བྱའི་དངོས་པོ་དེའི་རང་བཞིན་ནམ། ངོ་བོར་བདེན་པར་སྟོན་པ་སྟེ། བུམ་པ་ལྟ་བུ་འདུས་བྱས་ཀྱི་ཀུན་རྫོབ་པའི་གནས་ལུགས་སམ་རང་བཞིན་དེ་ཀ་རང་དུ་བདེན་པར་ཡིད་ཆེས་པ་ལ་འདུས་བྱས་སུ་གྲུབ།ཅེས་པ་དང་། དེ་བཞིན་དུ། ཆོས་སུ་གནས། མི་སླུ་བ་རུ་ངེས། ཆོས་ཉིད་དུ་གསལ། དོན་དུ་གནས། དགྲ་བཅོམ་དུ་གྲུབ། མི་རྟག་པ་རང་དུ་འདུགགསེར་དུ་གསལ། གསལ་དུ་བཏང་། དེ་ཀ་རང་ན་འདུགརྟག་ཏུ་གནས། རབ་ཏུ་གྲུབ།ཤིན་ཏུ་བདེན་སོགས་ལྟ་བུའོ། །དེ་རྣམས་ཀྱི། རྟག་ཏུ། རབ་ཏུ། ཤིན་ཏུ་སོགས་ལ། ལ་ཡིག་སྦྱར་ན་མི་མཛེས་ཤིང་བརྗོད་མི་བདེ་བས། དེ་འདྲའི་རིགས་མ་གཏོགས་པ་ཕལ་ཆེར་ལ་ལ་ཡིག་སྦྱར་དུ་རུང་ངོ་། །ཚེ་སྐབས་ལ་འཇུག་པ་ནི་དེའི་དུས་ཀྱི་ཚེ། དེའི་དུས་ཀྱི་སྐབས་ཞེས་པ་དང་དོན་གཅིག་པར་འཇུག་པ། དེའི་དུས་ན། དེའི་དུས་སུ། དེའི་དུས་ལ་ཞེས་པས་མཚོན་ཏེ། ཉིན་གུང་ལ་སླེབ་པ་རུ། ཉི་མ་ཕྱེད་དུ། ཉི་ཤར་དུ། ཕྱེད་ཡོལ་དུ། དུས་གཞན་དུ། ཉི་ནུབ་ཏུ། ཞེས་སོགས་པ་ལ། དེའི་དུས་ཀྱི་ཚེ། ཉིན་གུང་ལ་སླེབ་པའི་ཚེ། ཉི་མ་བྱེད་ཀྱི་ཚེ། ཉི་ཤར་གྱི་ཚེ། ཕྱེད་ཡོལ་གྱི་ཚེ། དུས་གཞན་གྱི་ཚེ། ཉི་ནུབ་ཀྱི་ཚེ་ཞེས་ཚེ་སྦྱར་བ་དང་འདྲ་བ་དང་། འདི་སྐད་བདག་གིས་ཐོས་པ་དུས་གཅིག་ན། ཞེས་པ་དང་། གཞན་ཡང་གཞུང་རྣམས་ནས་རྒྱ་ཆེར་འབྱུང་བ་རྣམས་ཀྱང་ལའི་སྒྲ་དང་དོན་མཐུན་ནོ། །རུ་བསྡུས་པའི་ར་ཡིག་ཀྱང་ལ་དང་མཐུན་ཏེ། དཔེར་ན། ཁོག་མར་ཤ་བཙོས་ཞེས་པ་གཉིས་པ་ལས་སུ་བྱ་བ་དང་། གྲྭ་སར་ཁང་པ་བརྩིགས་ལྟ་བུ་བཞི་པ་དགོས་ཆེད་དང།བུམ་པར་ཆུ་ཡོད་ལྟ་བུ་བདུན་པ་གནས་གཞི་དང་། མི་རྟག་པར་གྲུབ་ལྟ་བུ་དེ་ཉིད་དང་། སྔ་མོར་ཕྱིན་ལྟ་བུ་ཚེ་སྐབས་ལ་འཇུག་ཅིང་། དེ་རྣམས་ཀྱི། ར་ཡིག་འཐོབ་པ་ལ་ལ་ཡིག་ཀྱང་འཐོབ་བོ། །རྣམ་གླིང་པས། དེ་ལ་གཉིས་པ་ཨུ་ཡང་སྦྱར། ཞེས་པ་ལ་རྟེན་གཞིའི་སྒྲ་ར་ཡིག་ཉམས་པ་ཡིན་པས་གཉིས་པ་ཨུ་ཡང་སྦྱར། ཞེས་པ་འཐད་པའི་རྒྱུ་མཚན་ར་མཐར་རུ་མི་འབྱུང་ཞིང།འདིའི་གཉིས་པ་སྔོན་འཇུག་གི་གཉིས་པ་ད་ཡིག་ཡིན་པས། ད་ལ་ཨུ་སྦྱར་བའི་དུ་ཞེས་པ་ར་མཐར་མཐུན་པས་སོ། །ཞེས་འཆད་ཀྱང་། མ་དགོངས་པར་གསལ་ཏེ། འདིར་ཡང་གི་སྒྲ་དམིགས་ཀྱིས་སྦྱར་བ་ནི། དཔེར་ན། བུམ་པར་ཆུ་ཡོད། ཅེས་པ་ལྟ་བུ་ལ་མཚོན་ན། དེའི་ར་ཡིག་རྣམ་དབྱེ་བདུན་པར་འཇུག་པར་མ་ཟད། སུ་དང་དུ་ལྟ་བུ་རྗེས་འཇུག་སྔ་མ་ལས་ལོགས་སུ་རང་འདྲར་ཨུ་སྦྱར་བ་མིན་པར། ར་དེ་ཉིད་ལ་ཨུ་སྦྱར་བ་ཡང་འཇུག་པའི་དོན་དུ་གསལ་ཞིང་། ཨུ་སྦྱར་ཞེས་པའི་འཇུག་ཏུ་ཡང་འཐོབ་ཀྱང་། ཚིག་སྦྱོར་གྱི་དབང་གིས་ཡིན་ནོ། །ར་ཡིག་འཐོབ་པའི་དབང་དུ་བྱས་ན་ཡང་། རྟེན་གཞིའི་སྒྲ་ཡིན་པ་མི་འཐད་དེ། ཨུ་སྦྱོར་བའི་བྱ་བ་དངོས་སུ་བྱེད་པའི་གཞི་ད་ཡིག་ཡིན་པར་རྟོགས་སླ་བའི་ཕྱིར་རོ། །སྨྲ་སྒོར་ཡང་། འཇུག་ཚུལ་ཕལ་ཆེར་གཞུང་འདི་དང་མཐུན་པར།ལ་ནི་གཉིས་པ་བཞི་པ་དང་། །བདུན་པ་སྡུད་དང་སྦྱོར་བ་དང་། །སྨོན་དང་ཚད་འཛིན་གཞི་དང་ནི། །ཚེ་སྐབས་དག་ཏུ་འདོད་པ་ཡིན། །ཞེས་རྣམ་དབྱེ་གཉིས་པ་བཞི་པ་བདུན་པ་དང་། ཚེ་སྐབས་རྣམས་ལ་འཇུག་པར་བཤད་ཅིང་། གཞུང་འདིར་མ་བཤད་པ། སྡུད་པ་དང་། མཚམས་སྦྱོར་དང་། སྨོན་པ་དང་། ཚད་འཛིན་བཞི་ལ་འཇུག་པར་བཤད་ལ་དཔེར་བརྗོད་ཀྱང་། དེའི་འགྲེལ་བར། སྡུད་པ་ལ་ལག་པ་བསྙལ་ལ་ཟས་ཟ། ཞེས་པ་དང་། སྦྱོར་བ་ལ་འདི་ན་མེ་ཡོད་ལ། འདི་ན་མེད་དོ། །ཞེས་དང་། སྨོན་པ་ལ་བདག་ནམ་ཞིག་ན་འདི་ལྟ་བུ་ཞིག་ཏུ་གྱུར་ལ་གྱུར་ནས་ཀྱང་། ཞེས་དང། ཚད་འཛིན་ལ། ཇི་ཙམ་ལ། དེ་ཙམ་ལ་ཞེས་པ་རྣམས་བཀོད་མོད། འདི་དག་ལས་ཚད་འཛིན་མ་གཏོགས་གཞན་རྣམས། ལྷག་མ་འདྲེན་ལུགས་ཀྱི་རྣམ་གྲངས་མི་འདྲ་བ་ཙམ་ལས། དོན་དུ་ལྷག་བཅས་ཀྱི་སྟེའི་སྒྲ་དང་བྱ་བ་གཅིག་པ་ནི།ལག་པ་བསྙལ་ཏེ་ཟས་ཟ། འདི་ན་མེ་ཡོད་དེ་འདི་ན་མེད་དོ། །ཞེས་སོགས་བྱ་རྒྱུ་ཡིན་པས། ལྷག་བཅས་ལས་མ་འདས་སོ། །སྡུད་པ་དང་། མཚམས་སྦྱོར་ནི་འོག་ནས་འཆད་ལ། སྨོན་པ་དང་། ཚད་འཛིན་ནི། གྱུར་ཅེས་པ་དང། ཙམ་ཞེས་པས་སྟོན་ཅིང་། ལ་ཡིག་གི་ནུས་པ་མིན་ནོ། །དེ་ལྟ་མིན་ན། འདི་བུམ་པ་ཡིན་ལ་ཞེས་པའི་ལ་ཡིག་ཀྱང་བུམ་པ་ཡིན་པ་སྒྲུབ་པའི་ཕྲད་དུ་འགྱུར་དགོས་པ་ལས། བུམ་པ་ཡིན་པ་ནི་ལ་ཡིག་ལ་མི་ལྟོས་པའི་ཕྱིར་དང། དེའི་ལ་ཡིག་ནི་ཚིག་ཕྱི་མའི་ལྷག་མ་ཡོད་པ་སྟོན་པ་ཙམ་ཡིན་པའི་ཕྱིར་རོ། །གཞན་ཡང་སྨྲ་སྒོར།དུ་ལ་སོགས་པ་ལ་དང་མཐུན། །དེ་ཉིད་དག་ནི་ལྷག་པ་ཡིན། །དེ་བཞིན་ལྷག་བཅས་ལ་ལའོ། །ཞེས་ལ་ཡིག་དེ་ཉིད་ལ་མི་འཇུག་ཅིང་། དུ་ལ་སོགས་པ་ལྷག་བཅས་ལ་མི་འཇུག་པར་གསུངས་པ་ནི་མི་འཐད་པར་མཐོང་སྟེ། ལྷག་བཅས་ལ་དེ་ལྟར་ཡིན་དུ་ཆུག་ཀྱང་། ལ་ཡིག་དེ་ཉིད་ལ་མི་འཇུག་པར་བཤད་པ་ནི། གཞུང་འདིར།ལས་དང་ཆེད་དང་རྟེན་གནས་དང་། །དེ་ཉིད་ཚེ་སྐབས་ལ་སྒྲ་ཡིན། །ཞེས་ལ་ཡིག་དོན་ལྔ་པོ་དེར་འཇུག་པ་གཞིར་བཞག་ནས། དུ་ལ་སོགས་པ་ཡང་དོན་ལྔ་པོ་དེར་འཇུག་པ་ལ། ལའི་སྒྲ་དང་ཁྱད་པར་མེད་པར་བཤད་པ་དང་དངོས་སུ་འགལ་བས་སོ། །གལ་ཏེ་ལ་ཡིག་དེ་ཉིད་ལ་འཇུག་ཀྱང་ཁྱབ་ཆེ་ཆུང་ཡོད་པའི་དབང་དུ་བྱས་པ་ཡིན་ནོ་ཞེ་ན་ཡང་འཐད་པ་མ་ཡིན་ཏེ། གང་འཇུག་པ་མང་བའི་དཔེར་བརྗོད་ཀྱང་མང་དུ་བསྟན་ནས།འཇུག་པ་ཉུང་ཞིང་དཀོན་པ་དེ་ཉིད་རྟོགས་དཀའ་བས་རྩལ་དུ་བཏོན་ནས་འཆད་དགོས་པ་ལས། དཔེར་བརྗོད་ཙམ་ཡང་མ་བཤད་པས་མི་འཐད་པའི་ཕྱིར་རོ། །ན་ཡིག་ཀྱང་སྨྲ་སྒོར།ན་ཞེས་བྱ་བའི་ཚིག་གི་དོན། །དམིགས་ཀྱིས་འབྱེད་དང་རྒྱུ་མཚན་དང་། །རྒྱུ་མཚན་དོན་གྱིས་བསྟན་པ་དང་། །ལས་དང་ཆེད་དང་རྟེན་གནས་དང་། །ཕྱི་ཚིག་དེ་གཞན་སོགས་སྟོན་དང་། །འོས་པར་དཀའ་བ་མཆོག་འཛིན་པ། །ཕྱི་ཚིག་ངེས་པར་འབྱེད་པ་དང་། །དེ་ལས་བཟློག་པ་ཉིད་དང་ནི། །འགལ་དང་མི་འགལ་སྟོན་པ་དང་། །སྨོན་དང་འདྲི་དང་ཐེ་ཚོམ་གཞི། །ཚེ་སྐབས་རྣམས་ལ་འདི་མཐོང་ངོ་། །ཞེས་གསུངས་པ་ལས། དམིགས་ཀྱིས་འབྱེད་པ་ནི། དམིགས་ཀྱིས་བསལ་བའི་དོན་ཡིན་པས། དགར་བ་དང་དོན་གཅིག་གོ། འདི་ལ་གལ་འཛུགས་པ་དང་། གཞུང་འཛུགས་པ་གཉིས་ལས། གལ་འཛུགས་པ་ནི། ཡིན་གྲང་ན་ཞེས་སྔ་མ་མཐའ་གཉིས་སོགས་སུ་བཅད་ནས། ཕྱི་མ་ལ་དོན་གཅིག་གལ་དམིགས་སུ་འཛིན་པ་ལ་སོགས་པ་ལྟ་བུའོ། །གཞུང་འཛུགས་པ་ནི་དངོས་སུ་ན། མདོར་ན་ལྟ་བུ་གཞུང་གི་དོན་ཁྱད་པར་དུ་བཏོན་ནས་དམིགས་འབྱེད་པའོ། །རྒྱུ་མཚན་ནི། བྱས་པ་ན། མི་རྟག་གོ་ཞེས་པ་ལྟ་བུ་བྱས་པའི་རྒྱུ་མཚན་གྱིས་མི་རྟག་པར་སྒྲུབ་པ་དང་དོན་གཅིག་གོ། རྒྱུ་མཚན་དོན་གྱིས་བསྟན་པ་ནི། འདི་ན་དུ་བ་མེད་ན་ནི། མེ་ཇི་ལྟར་ཡོད་ཅེས་པ། རྒོལ་བ་གཞན་ལ་མེ་མེད་པར་སྒྲུབ་པའི་ཚེ། དངོས་སུ་དུ་བ་མེད་ན། མེ་ཇི་ལྟར་ཡོད། ཅེས་དྲིས་ནས་མེ་ཡོད་པ་དཀག་སྟེ། ཤུགས་ལ་མེ་ཡོད་པའི་རྒྱུ་མཚན་ནམ་གཏན་ཚིགས། དུ་བ་ཡོད་དགོས་པ་ན་ཡིག་གིས་ཐོན་པ་ལྟ་བུའོ། །རྣམ་གླིང་པས།འདིའི་དཔེར་བརྗོད་དུ། དེས་ན་ཆོས་ལ་བསླབ་པར་བྱའོ་ཞེས་པ་ལྟ་བུའོ། །ཞེས་གསུངས་པ་ཡང་། དེ་ཞེས་པས་གོང་དུ་རྒྱུ་མཚན་བརྗོད་པ་དེ་ཉིད་དངོས་སུ་ངེས་པར་བཟུང་ནས། འིས་ཞེས་པ་བསྡུས་པའི་ས་ཡིག་བྱེད་པའི་སྒྲ་སྦྱར་བས་གཞན་སྒྲུབ་པར་དངོས་སུ་སྟོན་ལ། ན་ཡིག་གིས་རྒྱུ་མཚན་དེ་ཉིད་ཆོས་ལ་བསླབ་པར་བྱ་བའི་རྒྱུ་མཚན་དུ་དངོས་སུ་འདྲེན་པ་ཞིབ་མོར་བརྟགས་ན་ཤེས་སོ། །དེ་ལྟ་མིན་ན། དེས་ན་ཞེས་པའི་ཚིག་གིས་གང་དངོས་སུ་བསྟན་པ་བརྗོད་དགོས་པ་ལས། གཞན་དངོས་སུ་སྟོན་པ་མི་རྙེད་པའི་ཕྱིར་རོ། །དེ་བཞིན་དུ། གང་དུ་ཤ་བ་ཡོད་པ་དེར་ཤིང་ཡོད་པ་ཡིན་ན། གནས་འདི་ནི་ཤིང་གིས་དབེན་པའི་ཐང་ངོ་ཞེས་ན་ཡིག་གིས་ཚིག་ཕྱི་མའི་དོན་སྔ་མའི་དོན་ལས་གཞན་དུ་སྟོན་པ་ལྟ་བུའོ།།འདིར་ཡང་རྣམ་གླིང་པས། གང་དུ་དུ་བ་ཡོད་ན་མེ་ཡོད་ཅེས་པའི་དཔེར་བརྗོད་བཀོད་པ་ནི་ཤིན་ཏུ་མ་དགོངས་པ་སྟེ། དེའི་ན་ཡིག་རྒྱུ་མཚན་ལ་འཇུག་པས་གོང་མ་དང་ཟློས་ལ། དོན་གཞན་ཞིག་སྟོན་པ་དང་། དོན་དེ་སྔ་མ་ལས་གཞན་དུ་སྟོན་པ་གཉིས་ཀྱི་དམིགས་མི་ཕྱེད་ཅིང་སོགས་ཀྱི་སྒྲ་ལའང་བརྟགས་པ་ཡེ་མ་བཅུག་པའི་འོལ་ཚོད་དོ། །གཞུང་དོན་ནི། ཚིག་ཕྱི་མའི་བརྗོད་བྱ། སྔ་མའི་དོན་དེ་ལས་གཞན་དུ་སྟོན་པར། འགྲེལ་བའི་དཔེར་བརྗོད་ཀྱིས་རྟོགས་པར་སླའོ། །སོགས་སྒྲས་སྔ་མ་དང་འགལ་བ་དང་། ཕྱི་མ་ཉིད་མེད་པར་སྟོན་པ་སོགས་བསྡུའོ། །འོས་པར་དཀའ་བ་སྟེ། མི་འོས་པ་དཔེར་ན་དཔོན་ལྟ་བུས་ངན་ལས་བྱ་མི་འོས་པ་ཡིན་པས། དེ་མཆོག་ཏུ་འཛིན་པ་ནི།དཔོན་གྱིས་ངན་ལས་བྱ་བ་ནི། ཤིན་ཏུ་མི་རིགས་པར་འཛིན་པ་ཡིན་ལ། དེ་ལྟར་བཟུང་བའི་སྒོ་ནས། དཔོན་གྱིས་ངན་ལས་བྱེད་ན། གཡོག་ལྟ་ཅི་སྨོས་ལྟ་བུ་དང་། གྲྭ་པས་ཆང་འཐུང་ན་མི་ནག་པ་ལྟ་ཅི་སྨོས་ལྟ་བུ། མི་འོས་པའི་ཚིག་གིས་ཕྱི་མའི་དོན་ངེས་པར་བྱེད་པའོ། །དེ་ལས་ལྡོག་པ་གཡོག་ལྟ་བུས་ལས་བྱེད་ན་དཔོན་ཡང་ལས་བྱེད་དོ་ལྟ་བུ་སྔ་མ་འོས་པའ་ིཚིག་གིས་ཕྱི་མ་ངེས་པར་བྱེད་པའོ། །འགལ་བ་དང་མི་འགལ་བར་སྟོན་པ་ནི། ཀུན་རྫོབ་ཏུ་ཡོད་ན་དོན་དམ་པར་ནི་ཡོད་པ་མ་ཡིན་ནོ་ལྟ་བུའོ། །འདི་བརྟག་པར་བྱ་བའི་གཞིའོ། །ཐེ་ཚོམ་གྱི་གཞི་ནི། མྱུ་གུ་ལ་རྒྱུ་དགོས་ན། རྒྱུ་གཅིག་གིས་ཆོག་གམ། དུ་མ་དགོས་ཞེས་མཐའ་གཉིས་སུ་དོགས་པ་ལྟ་བུའོ། །སྨོན་པ་ནི། བདག་བྱང་ཆུབ་ཐོབ་ན་ལྟ་བུའོ། །དྲི་བའི་གཞི་ནི་བུམ་པ་ཡོད་ན་དེ་ཇི་ལྟར་ཡོད་ལྟ་བུའོ། །རྣམ་དབྱེ་གཉིས་པ་དང་། བཞི་པ། བདུན་པ་རྣམས་དང་། དེ་ཉིད་དང་ཚེ་སྐབས་ལ་འཇུག་པ་ནི་བཤད་ཟིན་ཏོ། །འོན་ཀྱང་སྨྲ་སྒོའ་ིསྐབས་འདིར་དཔྱད་གཞི་ཤིན་ཏུ་ཆེ་བ་འདུག་ཀྱང་། འཇུག་པ་འདི་དག་ཤེས་རབ་སྐྱེ་བ་ལ་ཉེ་བར་མཁོ་བས་བཀོད་ཅིང་། འཐད་མི་འཐད་ཀྱི་དཔྱད་པ་བྱས་ན་མང་དུ་དོགས་ནས་བཞག་གོ། འདིར་ལ་དོན་གྱི་སྒྲ་རྣམས་དོན་ལྔ་ལ་འཇུག་ཚུལ་གྱི་དབྱེ་བ་རྟོགས་པར་དཀའ་བས། སླར་ཡང་བཤད་པར་བྱ་སྟེ། འདི་ལ་རྣམ་གླིང་པས།རྣམ་དབྱེ་གཉིས་པ་དང་བཞི་པ་མ་ཕྱེད་པར། དབང་བསྐུར་དུ་གསོལ་ཞེས་པ་གཉིས་པའི་དཔེར་བརྗོད་དུ་བཀོད་པ་མི་འཐད་དེ། དེ་དབང་བསྐུར་བའི་ཆེད་དུ་གསོལ་བ་འདེབས་པ་ཡིན་པས་བཞི་པ་ཡིན་ནོ། །བསམ་དུ་མེད། གསལ་དུ་བཏང་། ཞེས་པ་ཡང་བསམ་པར་བྱ་བའི་ངོ་བོ་ཉིད་དུ་མ་གྲུབ་པ་དང་། གསལ་བའི་ངོ་བོར་བཏང་། ཞེས་པ་ཡིན་ཞིང་། གཞི་གཞན་ལ་བྱ་བ་བྱས་པ་ལ་འཇུག་པ་མ་ཡིན་པས་དེ་ཉིད་ལ་འཇུག་གི། གཉིས་པའི་དཔེར་བརྗོད་དུ་མི་འཐད་ལ། ནང་དུ་ཆུག་ཅེས་པའང་གཞི་ནང་ལ་འཇུག་པའི་བྱ་བ་བྱོས་ཤིག་པའི་དོན་ཡིན་པས། དེ་ཉིད་ལ་མི་འཇུག་ཅིང་། རྣམ་དབྱེ་གཉིས་པའི་དཔེར་བརྗོད་དུ་འཐད་པའི་ཕྱིར་རོ། །གཞན་ཡང་དེ་ཁོ་ན་ཉིད་ཅེས་པའི་དེ་དང་ཁོ་དང་ན་དང་ཉིད་རྣམས་ཁ་ཕྲལ་ནས། དེ་ཞེས་པ་ཐ་སྙད་འདས་མ་ཐག་པའམ། དངོས་པོ་གཞན་ལ་འཇུག་པར་བཤད་པ་ནི། འོག་ནས་འཆད་པ་ལྟར་བདེན་པའི་དངོས་པོའམ་དེ་ཉིད་ལ་འཇུག་པའི་དཔེར་བརྗོད་དུ་རིགས་ཤིང་། ཁྱེད་རང་གིས་ཀྱང་། དེའི་དཔེར་བརྗོད་དུ་བཀོད་པ་དང་དངོས་སུ་འགལ་བ་དང་། ཁོ་ཞེས་པ་ལ་ཚིག་གྲོགས་ཀྱི་བཤད་པ་ལས་མ་བྱུང་བས་གསུང་རྒྱུས་རྟུགས་ཤིང་། སྐབས་དེར་རང་ཞེས་པའི་སྒྲ་དང་འདྲ་བར་ངེས་བཟུང་དུ་མ་དགོངས་པར་ཟད་དོ། །འདི་ལ་སོགས་པ་ནོར་ཞིང་མ་འབྲེལ་བ་ཤིན་ཏུ་མང་བར་སྣང་ཡང་། གོང་གི་དེ་རྣམས་ཀྱི་དཔྱད་པ་གཞུང་དོན་རྟོགས་པ་ལ་ཉེ་བར་མཁོ་བས་འདིར་བརྗོད་ཀྱི། ཐམས་ཅད་དགག་པར་མི་ལང་ངོ་། །དེས་ན་འདི་དག་གི་ཁྱད་པར་ནི། ཐབ་ལ་མེ་བཏང་ཞེས་པ་ལྟ་བུ། གཞི་གཞན་ལ་བྱ་བ་བྱས་པ་དང་། བྱེད་པ་སོགས་སྟོན་པའི་ལ་སྒྲ་རྣམས་རྣམ་དབྱེ་གཉིས་པ་དང་། མགྲོན་པོ་ལ་མེ་བཏང་ལྟ་བུ་བྱ་བ་བྱེད་པའི་གཞི་དངོས་མ་ཡིན་པར། དེ་ལ་མེ་བཏང་བ་ནི། དེའི་ཆེད་དུ་མེ་བཏང་བ་ཡིན་ལ། དེ་ལྟར་དགོས་པ་ལ། ལ་སྒྲ་སྦྱར་ཏེ། བྱ་བ་མེ་བཏང་བར་སྟོན་པའི་ལའི་སྒྲ་ནི་རྣམ་དབྱེ་བཞི་པའོ། །ཐབ་ལ་མེ་ཡོད་ལྟ་བུ། གཞི་ཐབ་ལ་མེ་བཏང་བ་སོགས་ཀྱི་བྱ་བ་བྱས་པ་མི་བརྗོད་པར། མེའི་ངོ་བོ་ཙམ་ཡོད་པར་བརྗོད་པའི་ལའི་སྒྲ་ནི་རྣམ་དབྱེ་བདུན་པའོ། །འདུས་བྱས་སུ་གྲུབ་ལྟ་བུ། གཞི་གཞན་ལ་མི་བརྩི་བར་ཆོས་རང་རང་གི་ངོ་བོ་ཉིད་ཙམ་དུ་གྲུབ་པ་སོགས་སྟོན་པའི་ལའི་སྒྲ་ནི།དེ་ཉིད་དམ་བདེན་པའི་དངོས་པོ་སྟོན་པ་ཞེས་བྱའོ། །རྣམ་དབྱེ་བདུན་པ་དང་འདི་གཉིས་ཀྱི་ཁྱད་པར་ནི། གཞི་གཞན་ལ་ཡོད་པས་གྲུབ་པ་དང་། རང་གི་ངོ་བོ་ཉིད་དུ་ཡོད་པས་གྲུབ་པ་གཉིས་ཀྱིས་དབྱེ་བར་བྱ་སྟེ། དེ་ཉིད་ཅེས་པ་དང་།དེ་ཁོ་ན་ཉིད་ཅེས་པ་རང་གི་ངོ་བོ་ཉིད་ལས་གཞན་དུ་མི་འཇུག་ལ། རྣམ་དབྱེ་བདུན་པ་གནས་གཞིའི་ལའི་སྒྲ་ནི། ཆོས་གང་ཡང་འཚོལ་བ་སོགས་ཀྱི་ཚེ།གཞི་གཞན་ཁོ་ན་ལ་ཡོད་མེད་ལྟ་བ་དང་འཚོལ་བ་སོགས་ལ་འཇུག་པ་མ་གཏོགས། རང་གི་ངོ་བོ་འཚོལ་བ་སོགས་ལ་མི་འཇུག་པ་མངོན་སུམ་གྱིས་གྲུབ་པའི་ཕྱིར་རོ། །ཚེ་སྐབས་ནི། ཚེ་དང་སྐབས་ཞེས་ཐོབ་པ་མང་པོར། དེའི་ཚབ་ཏུ་ལའི་སྒྲ་བཀོད་པ་ཐམས་ཅད་དེ། དཔེར་བརྗོད་གོང་གི་དེས་རྟོགས་སླའོ། །དེ་ལྟར་སུ་རུ་དུ་ན་ལ་རྣམས་མིང་མཐའ་གང་ལ་སྦྱོར་བའི་ངེས་པ་ནི།ས་སུ་ག་བ་ད་དྲག་ཏུ། །ང་ད་ན་མ་ར་ལ་དུ། །འ་དང་མཐའ་རྟེན་མེད་མཐར་རུ། །འདི་དང་ར་མཐའ་བྱ་བ་གཅིག། ཅེས་པ་ལྟར་རོ། །གསུམ་པ་རྣམ་དབྱེ་དྲུག་པ་འཆད་པ་ལ། ཐོག་མར་དམ་བཅའ་བ་ནི།རྗེས་འཇུག་ཡི་གེ་བཅུ་པོ་ནི། །ཨི་དང་མཐུན་ལུགས་འདི་ཞེས་བྱ། །ཞེས་གསུངས་ཏེ། མིང་གི་མཐའི་རྗེས་འཇུག་གི་ཡི་གེ་བཅུ་པོ་རྣམས་ནི། དབྱངས་ཨི་སྦྱར་བའི་རྣམ་དབྱེ་དྲུག་པ་དང་མཐུན་ལུགས་འདི་ཞེས་བྱའོ། །ཞེས་པའོ། །དེ་ནས་མཐུན་ལུགས་དངོས་བསྟན་པའི་ཕྱིར།དང་པོ་གཉིས་ལ་དང་པོ་མཐུན། །གསུམ་ལྔ་བཅུ་ལ་ཀྱ་དང་སྦྱར། །བདུན་པ་ཉིད་ལ་བདུན་པ་སྟེ། །ལྷག་མ་རྣམས་ལ་གྱ་སྦྱར་བ། །ཞེས་གསུངས་ཏེ། མིང་གི་མཐར་རྗེས་འཇུག་དང་པོ་ག་དང་གཉིས་པ་ང་གནས་པ་ལ། དྲུག་པའི་སྒྲ་འདྲེན་པའི་ཚེ་དང་པོ་ག་མཐུན་ཞིང་། མིང་མཐར་རྗེས་འཇུག་གསུམ་པ་ད་དང་། ལྔ་པ་བ་དང་། བཅུ་པ་ས་གནས་པ་ལ་ཀྱ་དང་སྦྱར་བར་བྱ་ལ། བདུན་པ་འ་ཉིད་དེ་འ་ཡིག་ཁོ་ན་གནས་པ་ལ། བདུན་པ་འ་ཉིད་སྦྱར་བར་བྱ་སྟེ། དེའི་ལྷག་མ་ན་མ་ར་ལ་རྣམས་གནས་པ་ལ་གྱ་སྦྱར་བ་མཐུན་ནོ། །དེ་དག་གང་ལ་འཇུག་པ་ནི།དེ་དག་ཨི་སྦྱར་འབྲེལ་བའི་ས། །ཞེས་གསུངས་ཏེ། དེ་ལྟར་སྦྱར་བ་དེ་དག་སྟེ། ག་ཀྱ་འ་གྱ་རྣམས་ལ་དབྱངས་དང་པོ་ཨི་སྦྱར་བས་གི་ཀྱི་འི་གྱི་ཞེས་འབྱུང་བ། དེ་རྣམས་དོན་གང་གི་སའམ་གནས་ལ་འཇུག་ན། རྣམ་དབྱེ་དྲུག་པ་འབྲེལ་བ་སྟེ། རང་གི་ཆ་ཤས་དང་། ཡོ་བྱད་ལ་སོགས་པ་འབྲེལ་ཆོས་རྣམས། རང་དང་འབྲེལ་བར་སྒྲུབ་པའམ་རང་གི་ཡིན་པར་སྒྲུབ་པ་ལ་འཇུག་གོ། དེ་ཡང་དང་པོ་གཉིས་ལ་དང་པོ་མཐུན་པའི་དཔེ་ནི། བདག་གི་མིགརང་གི་གཟུགས་ལྟ་བུའོ། །གསུམ་ལྔ་བཅུ་ལ་ཀྱ་དང་སྦྱར་བའི་དཔེ་ནི། ཁྱོད་ཀྱི་ནོར། ཁྲབ་ཀྱི་བྱང་བུ། ལས་ཀྱི་རྣམ་སྨིན་ལྟ་བུའོ། །བདུན་པ་ཉིད་ལ་བདུན་པ་མཐུན་པའི་དཔེ་ནི། བྱང་ཆུབ་སེམས་དཔའི་སྤྱོད་པ། ངའི་ལུས་ལྟ་བུའོ། །ལྷག་མ་རྣམས་ལ་གྱ་སྦྱར་བའི་དཔེ་ནི། གཞན་གྱི་ཚིགགཤམ་གྱི་མི། གསེར་གྱི་སྣོད། ཞལ་གྱི་སྒོ་ལྟ་བུའོ། །འདིར་དངོས་སུ་མ་བཤད་པ། ད་དྲག་གི་དབང་གིས་ཀྱི་ཐོབ་པ་ནི། རྣམ་ཐར་གྱི་སྒོ། ཕྱི་རོལ་གྱི་ཁང་པ་སོགས་དང་། འི་དང་བྱ་བ་གཅིག་པ་ཚིགས་བཅད་ཀྱི་རྐང་པ་ཁ་སྐོང་བ་ལ་ཡི་སྦྱོར་བ་ནི། འདས་པའི་སངས་རྒྱས་རྣམས་དང་ཕྱོགས་བཅུ་ཡི་ལྟ་བུ། ད་དྲག་གི་མཐར་གྱི་སྦྱོར་བ་ནི་ཕོ་ཡིས་ཕོའ་ིམིང་མཐའ་དྲངས་པའོ། །འདིར་དངོས་སུ་མ་བཤད་ཀྱང་ཀྱི་ལ་སོགས་པ་འཇུག་པ་ནི། རྣམ་དབྱེ་དྲུག་པ་མ་ཡིན་པ་གཞན་ལའང་མཐོང་སྟེ། དོན་འགལ་བ་དཔེར་ན། དྲང་པོ་དང་འཁྱོག་པོ་ལྟ་བུ་ལ་མཚོན་ན། སངས་རྒྱས་ནི་ཆོས་དྲང་པོ་ཁོ་ནར་གསུངས་མོད་ཀྱི། ཐབས་ལ་མཁས་པའི་དབང་གིས་འཁྱོག་པོར་ཡང་གསུང་ངོ་། །ལྟ་བུ་དང་། དེ་ལྟ་མོད་ཀྱི་སོགས་ལྟ་བུ་མི་མཐུན་པའི་རྒྱན་ལ་འཇུག་པ་ནི་སྨྲ་སྒོར་བཤད་པ་ལྟར་རོ། །དོན་དེ་ཁོ་ནར་ངེས་པར་བཟུང་ནས། གཞན་འགོག་པ་ལ་འཇུག་པ། བུམ་པ་ནི། མི་རྟག་པ་ཡིན་གྱི་རྟག་པ་ནི་མ་ཡིན་ནོ།།འདི་ནི་མི་ཡིན་གྱི་ལྷ་མ་ཡིན་ནོ། །འདི་ནི་རྒྱུ་ལས་འབྱུང་གིརྒྱུ་མེད་པ་ལས་མི་འབྱུང་ངོ་སོགས་ལྟ་བུའོ། །སྡོམ་ནི།ད་བ་ས་ཀྱི་ག་ང་གི།ན་མ་ར་ལའི་རྗེས་སུ་གྱི། །འ་དང་མཐའ་རྟེན་མེད་མཐར་འི། །རྐང་པ་སྐོང་ཚེ་ཡི་ཐོབ་བོ། །ཞེས་བྱའོ། །བཞི་པ་རྣམ་དབྱེ་གསུམ་པ་འཆད་པ་ནི།དེ་ཉིད་ལ་ནི་བཅུ་པ་སྦྱར། །བྱེད་པའི་སར་ནི་ཤེས་པར་བྱ། །ཞེས་གསུངས་ཏེ། རྣམ་དབྱེ་དྲུག་པར་འཇུག་པའི་གི་ཀྱི་གྱི་འི་བཞི་པོ་དེ་དག་ཉིད་ལ་བཅུ་པ་ས་ཡིག་སྦྱར་བས། གིས་ཀྱིས་གྱིས་འིས། ཞེས་གྲུབ་པ་ནི། རྣམ་དབྱེ་གསུམ་པ་བྱེད་པ་ཞེས་བྱ་བ། བྱེད་པ་པོ་གཙོ་བོར་སྟོན་པའི་རྣམ་དབྱེའོ། །ས་ཞེས་པ་གནས་ཀྱི་དོན་ཏེ། བྱེད་པ་པོ་སྟོན་པའི་གནས་སུ་ཤེས་པར་བྱའོ། །དེ་ཇི་ལྟར་ཤེས་པར་བྱ་ན། དཔེར་ན། བདག་གིས་ཐོས།རང་གིས་བྱས། ཁྱོད་ཀྱིས་བཤད། ཤེས་རབ་ཀྱིས་དཔྱད། སྲས་ཀྱིས་ཉན།སེམས་དཔའི་ས་བསླབས། གཞན་གྱིས་གོདགྲ་བཅོམ་གྱིས་སྤངས། གསེར་གྱིས་ཉོས། ཞལ་གྱིས་བཞེས་ལྟ་བུའོ། །ཤུགས་ལ་བསྟན་པ་ད་དྲག་གི་མཐར་ཡིད་ཀྱི་འདུས་ཏེ་རེག་པའི་རྐྱེན་གྱིས་ཚོར་བ། རབ་འབྱོར་གྱིས་གསོལ་བ།ཕ་རོལ་ཀྱིས་བཤད་ལྟ་བུའོ། །སྐད་གསར་བཅད་ལ། བྱང་ཆུབ་སེམས་དཔས་བསླབས། བླ་མས་བསྐྱབས། བུམ་པས་ཆུ་བཅུས་སོགས་མིང་མཐར་ས་ཡིག་རྐྱང་པ་སྦྱར་བས་ཀྱང་བྱེད་པ་སྟོན་ནོ། །ལྔ་པ་རྣམ་དབྱེ་དེ་དག་གི་ཡི་གེའི་སྦྱོར་ཚུལ་ལས་འཕྲོས་ནས་ཚིག་རྒྱན་སོགས་འཆད་པ་ལ། ཐོག་མར་རྒྱན་སྡུད་བསྟན་པའི་ཕྱིར།ཨཱ་ལི་ཕྱིས་ནས་གཉིས་པ་སྦྱར། །ཚིག་རྒྱན་གཉིས་དང་སྡུད་པར་འགྱུར། །ཞེས་གསུངས་ཏེ། གོང་དུ་རྣམ་དབྱེ་དྲུག་པའི་སྒྲ་དངོས་སུ་བསྟན་པ།ཀྱི་འི་གཉིས་པ་དང་། ཤུགས་ལ་ཁ་སྐོང་གི་ཡི་དང་བཅས་པ་གསུམ་གྱི་ཨཱ་ལི་ཨི་ཕྱིས་ནས། རྗེས་འཇུག་གཉིས་པ་ང་ཡིག་སྦྱར་བས། ཀྱང་འང་ཡང་།ཞེས་གྲུབ་པ་དེ་ནི། མཐུན་པ་དང་མི་མཐུན་པའི་ཚིག་རྒྱན་གཉིས་དང་། སྡུད་པའི་དོན་ལ་འཇུག་པར་འགྱུར་རོ། དེ་ལ་མཐུན་པའི་ཚིག་རྒྱན་ནི་མཐུན་པའི་ཆོས་གཉིས་གཞི་གཅིག་ལ་སྡུད་ཅིང་། ཁྱད་པར་ཚིག་མཛེས་པར་བྱེད་པ་སྟེ། དཔེར་ན། མཛེས་པའང་ཡིན་ཏེ་མདོག་ཀྱང་དཀར། དཔལ་ཡང་འབར་ལ་ཡིད་ཀྱང་འཕྲོག། ཅེས་པ་ལྟ་བུའོ། །མི་མཐུན་པའི་ཚིག་རྒྱན་ནི། མི་མཐུན་པའི་ཆོས་གཉིས་གཞི་གཅིག་ཏུ་སྡུད་ཅིང་། ཁྱད་པར་ཚིག་མཛེས་པར་བྱེད་པ་སྟེ། དཔེར་ན།ཕྱོགས་རིས་མེད་ཀྱང་བདུད་དཔུང་འཇོམས། །འཆིང་བ་སྤངས་ཀྱང་ཐུགས་རྗེས་བསྡམས། །ཆགས་པ་སྤངས་ཀྱང་འགྲོ་ལ་ཆགས། །ལྟ་བུའོ། །ཚིག་རྒྱན་དུ་མི་འགྱུར་བའི་སྡུད་པ་ལ་ཡང་། ཁྱད་པར་གྱི་གཞི་དང་།ཁྱད་པར་གྱི་ཆོས་གོང་འོག་གཉིས་ཀས་ཕན་ཚུན་སྡུད་པ། ཨུཏྤ་ལའང་ཡིན་ལ་སྔོན་པོ་ཡང་ཡིན་ནོ། ལྟ་བུ་གཞི་མཐུན་པར་སྟོན་པ་དང་། ཆོས་ཀྱང་དྲན་ཏེ། ཆོས་མ་ཡིན་པ་མིན་ནོ། །ལྟ་བུ་གོང་མས་འོག་མ་སྡུད་པ་དང་། ལྷས་ཆར་ཕབ་སྟེ། ཀླུས་ཀྱང་འབེབས་སོ། །ལྟ་བུ་འོག་མས་གོང་མ་སྡུད་པ་དང་། ཀྱང་འང་གཉིས་དང་འཇུག་པ་མི་མཐུན་པ་ཡང་གི་དོན། ཡང་ན་འདི་ལྟར་བྱ་སྟེ་ལྟ་བུ་རྣམ་གྲངས་གཉིས་ལ་སོགས་པ་བསྣན་པ་ལ་འཇུག་པ་སྟེ། སྨྲ་སྒོར། ཡང་ཞེས་བྱ་བ་བསྣན་པའང་ཡིན། ཞེས་སོ། །འདི་དོན་སྔ་མའི་སྟེང་དུ་རྣམ་གྲངས་གཞན་བསྣན་པ་ཡིན་པས། རྣམ་གླིང་པས། ངེས་བཟུང་གི་བརྣན་དུ་བཤད་པ་མི་འཐད་དོ། །དེ་བཞིན་དུ། ཡང་དང་ཡང་དུ་དང་། ཡང་ནས་ཡང་དུ་དང་། སླར་ཡང་དང་། དེ་ནས་ཡང་སོགས་བསྐྱར་བའི་དོན་ལ་འཇུག་ཅིང་། བསྐྱར་བ་ནི།དོན་སྔ་མ་ཉིད་བལྡབས་པ་ཡིན་ལ། སྡུད་པ་ནི་དོན་སྔ་མ་བལྡབས་པ་ཙམ་མ་ཡིན་པར། བྱ་བ་དང་། བྱེད་པ་དང་། དགག་པ་དང་། སྒྲུབ་པ་ལ་སོགས་པའི་ཁྱད་པར་རྣམས། དོན་སྔ་ཕྱིའི་སྦྱོར་བ་སྡུད་པར་བྱེད་པའོ། །འོ་ན་ལྷག་བཅས་དང་སྡུད་པའི་ཁྱད་པར་གང་ཞེ་ན། དེ་ཡང་སྡུད་པ་ནི།དོན་གྱི་གཞི་སྔ་མར་གང་སྦྱར་བྱའི་བྱ་བ་ལ་སོགས་པའི་ཁྱད་པར་དེ་དག་ཕྱི་མར་ཡང་ངེས་ཅན་དུ་སྦྱོར་བར་སྟོན་པ་སྟེ། དཔེར་ན། མོན་པས་འབྲས་ཟའོ།།རྒྱ་གར་པས་ཀྱང་འབྲས་ཟའོ། །ཞེས་པ་ལྟ་བུ་བྱ་བའི་ཁྱད་པར་འབྲས་ཟ་བ་གཞི་གཉིས་ཀ་ལ་སྦྱར་ནས། གཉིས་ཀའམ་གང་ཡང་རུང་བ་ལ། ཀྱང་སོགས་སྡུད་ཚིག་སྦྱར་རུང་གི། མོན་པས་འབྲས་ཟའོ། །རྒྱ་གར་པས་ཁྲུས་བྱེད་དོ།།ལྟ་བུ་འབྲས་ཟ་བ་དང་། ཁྲུས་བྱེད་པ་ལ་སོགས་པ་ཁྱད་པར་མི་མཐུན་པས།གཞི་མི་མཐུན་པ་ལ་སྦྱོར་བ་ལ་སྡུད་ཚིག་སྦྱར་མི་རུང་ངོ་། །ལྷག་བཅས་ནི། ཁྱད་པར་གཅིག་ལྟ་བུ། གཞི་ཐ་དད་པ་དུ་མ་ལ་སྦྱོར་བའི་ངེས་བཟུང་མི་དགོས་པར། དོན་སྔ་མ་མ་རྫོགས་པར། ལྷག་མ་ཡོད་པ་ཙམ་སྟོན་པའོ། །སྡོམ་ནི།ག་བ་ད་ས་ད་དྲག་མཐར། །ཀྱང་དང་རྗེས་འཇུག་གཞན་རྣམས་མཐར། །འང་ཐོབ་རྐང་པ་སྐོང་ཚེ་ཡང་། །ཞེས་བྱའོ། །དེ་ནས་ལྷག་བཅས་ཀྱི་སྒྲ་འཆད་པའི་དབང་དུ་བྱས་ཏེ།ལ་དོན་སུ་ལ་ཨུ་ཕྱིས་ནས། །དེ་ལ་གསུམ་པའི་དང་པོ་སྦྱར། །དེ་ལ་ཨཱ་ལི་གསུམ་པ་སྦྱར། །དེ་ནི་ལྷག་མ་དང་བཅས་པའོ། །ཞེས་གསུངས་ཏེ། གོང་གི་ལའི་སྒྲ་དང་མཐུན་པའི་སུ་ཡིག་ལ། དེའི་སྲོག་གི་དབྱངས་ཨུ་ཕྱིས་ནས། ས་རྐྱང་དུ་གནས་པ་དེ་ལ། སྡེ་བ་གསུམ་པ་ཏ་སྡེའི་ཡི་གེ་དང་པོ་ཏ་ཡིག་སྦྱར་བས། སྟ་ཞེས་པ་འབྱུང་ངོ་། །དེ་ལ་ཨཱ་ལི་གསུམ་པ་ཨེ་སྦྱར་བས། སྟེ་ཞེས་གྲུབ་པ་དེ་ཉིད་ནི། ཚིག་དོན་སྔ་མ་མ་རྫོགས་པར། སླར་ཚིག་ལྷག་མ་གཞན་སྟོན་རྒྱུ་ཡོད་པ་ལ་འཇུག་པས། ལྷག་མ་དང་བཅས་པའི་སྒྲའོ། །ཞེས་པ་འདིར་དངོས་སུ་བསྟན་པ་དང་། མ་བསྟན་ཀྱང་རྗེས་འཇུག་གི་དབང་གིས་ལྷག་བཅས་ལ། དེ་དང་ཏེ་ཡང་སྦྱོར་བ་ཡོད་དོ། །དེ་ཡང་མཚམས་སྦྱོར་བའི་ལྷག་བཅས་དང་། དམ་བཅའ་བའི་ལྷག་བཅས་དང་། གཞན་འདྲེན་པའི་ལྷག་བཅས་དང་གསུམ་མོ། །དེ་ལྟར་ཡང་སྨྲ་སྒོར།སྟེ་ནི་ལྷག་མ་ཡོད་པ་སྟེ། །མཚམས་སྦྱོར་བ་དང་དམ་བཅའ་དང་། །གཞན་འདྲེན་པ་དང་གསུམ་དུ་འདོད། །ཅེས་སོ། །དེ་ལ་མཚམས་སྦྱོར་བ་ནི། མདའ་འཕངས་ཏེ་ཕོགལག་པ་བརྐྱང་སྟེ་བཟུང་། ལྷ་མཆོད་དེ་ལས་བྱ་ལྟ་བུ། རིམ་ཅན་དུ་སྦྱོར་བ་དང་། འཛུམ་དམུལ་ཏེ་མདངས་ཕྱུང་། སོ་བསྟན་ཏེ་བགད་ལྟ་བུ། ཅིག་ཆར་དུ་སྦྱོར་བ་གཉིས། དེ་ལྟར་ཡང་སྨྲ་སྒོར།ཚིག་གཉིས་རིམ་དང་ཅིག་ཆར་དུ། །སྦྱོར་བར་བྱེད་པ་མཚམས་སྦྱོར་ཡིན། །ཞེས་པ་ལྟར་རོ། །དམ་བཅའ་བ་ནི་རྒྱུ་མཚན་ལ་སོགས་པ་འདྲེན་པའི་སྒོ་ནས་དམ་བཅའ་བ་སྟོན་པ་སྟེ། དེ་ཡང་རྒྱུ་མཚན་འདྲེན་པ་ནི། མི་རྟག་སྟེ། བྱས་པའི་ཕྱིར་ལྟ་བུ་དང་། ངེས་ཚིག་འདྲེན་པ་ནི། འདི་ནི་དགྲ་བཅོམ་པ་ཞེས་བྱ་སྟེ།ཉོན་མོངས་པའི་དགྲ་བཅོམ་པའི་ཆོས་དང་ལྡན་པས་སོ། །ལྟ་བུ་དང་། རྣམ་གྲངས་ཀྱི་དབྱེ་བ་འདྲེན་པ་ནི། ཕུང་པོ་ནི་ལྔ་སྟེ། གཟུགས་དང་། ཚོར་བ་དང།འདུ་ཤེས་དང་། འདུ་བྱེད་དང་། རྣམ་པར་ཤེས་པའོ། །ལྟ་བུ་རྣམས་སོ། །དེ་ལྟར་ཡང་སྨྲ་སྒོར།གང་ཞིག་གིས་ནི་སྔ་མ་ལ། །གསལ་བར་བྱེད་པ་དམ་བཅའ་བ། །ཞེས་སོ། །གཞན་ཡང་དེ་ལ་དཔེ་འདྲེན་པ་དང་། རྒྱས་བཤད་འདྲེན་པའི་དམ་བཅའ་སོགས་འགྲེལ་བ་ལས་བཤད་དོ། །གཞན་འདྲེན་པ་ནི་འདི་ནི་མི་སྟེ།འདི་ནི་ལྷའོ། །ལྟ་བུ་དོན་ལྷག་མ་ཡོད་པ་ཙམ་དུ་སྟོན་པའི་སྒོ་ནས། སྔ་མ་རྣམས་ལས་གཞན་དུ་འདྲེན་པའོ། །དེ་ལྟར་ཡང་དེ་ཉིད་ལས།ལྷག་མ་ཡོད་པ་སྟོན་གྱུར་ཅིང་། །དེ་ལས་གཞན་གྱུར་འདྲེན་པའོ། །ཞེས་སོ། །དེ་རྣམས་ཀྱིས་ཀྱང་རིག་པའི་འཇུག་པ་མང་དུ་འཕེལ་བའི་སྒོ་ཡིན་པས་འདིར་བཤད་དོ། །སྡོམ་ནི།ད་དེ་ན་ར་ལ་ས་དང་། །ད་དྲག་ཅན་མཐར་ཏེ་རྐྱང་ཐོབ། །ག་ང་བ་མ་འ་རྣམས་དང་། །མཐར་རྟེན་མེད་མཐར་ས་སྟེ་འོ། །ཞེས་སོ། །ཞར་ལ་འབྱེད་སྡུད་ཀྱི་སྒྲ་བསྟན་པའི་ཕྱིར།རྗེས་འཇུག་ཡི་གེ་བཅུ་པོ་ལ། །དྲུག་པ་སྦྱར་ན་འབྱེད་སྡུད་ཡིན། །ཞེས་གསུངས་ཏེ། རྗེས་སུ་འཇུག་པའི་ཡི་གེ་བཅུ་པོ་སོ་སོ་ལ། རྗེས་འཇུག་དྲུག་པ་མ་ཡིག་སྦྱར་བས་གམ་ངམ་དམ་ནམ་བམ་མམ་འམ་རམ་ལམ་སམ་ཞེས་འབྱུང་བ་ནི། དོན་སོ་སོར་འབྱེད་པ་དང་། སྡུད་པ་གཉིས་ལ་འཇུག་པའི་སྒྲ་ཡིན་ནོ། །དེ་ཡང་འབྱེད་པ་ནི། དབྱེ་བའི་གཞི་གཅིག་ལས། རྣམ་གྲངས་མང་པོར་འབྱེད་པ་སྟེ། དཔེར་ན། ཕུང་པོ་ནི་ལྔ་སྟེ། གཟུགས་སམ།ཚོར་བའམ། འདུ་ཤེས་སམ། འདུ་བྱེད་མ། རྣམ་པར་ཤེས་པའོ། །ལྟ་བུའོ། །དེ་བཞིན་དུ་གཟུགས་རྟག་གམ། མི་རྟག་ལྟ་བུ་བརྟག་པ་དང་དྲི་བའི་སྒོ་ནས་རྣམ་གྲངས་གཞན་དང་འབྱེད་པ་དང་། གསེར་ལེན་ནམ། དངུལ་ལེན་ལྟ་བུ་གདམ་ངའི་སྒོ་ནས་འབྱེད་པ་རྣམས་སོ། །སྡུད་པ་ལ་ཡང་གཟུགས་སམ། ཚོར་བའམ། འདུ་ཤེས་སམ། འདུ་བྱེད་དམ། རྣམ་པར་ཤེས་པ་ནི་ཕུང་པོའ།ོ །ལྟ་བུ་ཕྱོགས་གཅིག་ཏུ་སྡུད་པ་དང་།བུམ་པ་ནི་མི་རྟག་སྟེ། ཀ་བའམ་སྣམ་བུ་ཡང་ངོ་། །ལྟ་བུ་ཆོས་སྔ་མར་སྦྱར་བ་ཕྱི་མར་ཡང་སྦྱོར་བ་སྡུད་པ་དང་། བུམ་པའམ། ཀ་བའམ་སྣམ་བུ་ཡང་བདག་མེད་དོ། །ལྟ་བུ་ཕྱི་མའི་ཆོས་བདག་མེད་པ་སྔ་མར་སྦྱོར་བར་སྡུད་པ་སོགས་ཡོད་དོ། །ཐེ་ཚོམ་གྱི་ནང་ནས་མཐའ་གཉིས་པོ་ཆ་མཉམ་དུ་དོགས་པ་ལ་མཐའ་གཉིས་ཀ་བཀོད་ནས། ཡིན་ནམ་མིན་ཞེས་སྦྱོར་ལ། ཡིན་པ་ལ་མངོན་དུ་ཕྱོགས་པའམ། མིན་པ་ལ་ཤས་ཆེར་ཕྱོགས་པ་ལ་ནི། མཐའ་རེ་རེ་བ་རྐྱང་བར་འམ་ལ་སོགས་པ་སྦྱར་ཏེ། ཡིན་ནམ་ལྟ་བུ་དང་། མིན་ནམ་ལྟ་བུ་བྱ་ཞིང།དེ་དག་ཀྱང་མཐར་གཉིས་པོ་དངོས་སུ་འབྱེད་པ་དང་། དོན་གྱིས་འབྱེད་པ་ཅི་རིགས་སུ་ཡོད་དོ། །ད་དྲག་གི་དབང་གིས་ཕོ་མཐའ་དྲངས་པ། ཕྱིན་ཏམ།གྱུར་ཏམ། བཀའ་སྩལ་ཏམ་སོགས་ཀྱང་གོང་མ་བཞིན་དུ་འབྱེད་སྡུད་སྦྱོར་རོ། །སྡོམ་ནི།འབྱེད་སྡུད་སྐབས་སུ་རྗེས་འཇུག་བཅུར། །རང་འདྲར་མ་ཡིག་སྦྱར་བ་དང་། །ད་དྲག་ཐོབ་མཐར་ཏ་དང་སྦྱར། །ཞེས་པ་ལྟར་རོ། །དྲུག་པ་རྣམ་དབྱེ་ལྔ་པ་སོགས་འཆད་པའི་དབང་བྱས་ཏེ།རྗེས་འཇུག་ཡི་གེ་བཅུ་པོ་ཡི། །བཞི་པ་དགུ་པ་ལ་བཅུ་པ། །སྦྱར་བ་འབྱུང་ཁུངས་གནས་ཡིན་ཏེ། །དགར་དང་སྡུད་པའང་དེ་བཞིན་ནོ། །ཞེས་གསུངས་ཏེ། རྗེས་འཇུག་ཡི་གེ་བཅུ་པོ་ཡི། གྲངས་བཞི་པ་ན་དང་། དགུ་པ་ལ་ཡིག་གཉིས་ལ། བཅུ་པ་ས་ཡིག་སྦྱར་ཏེ། ནས་ལས་ཞེས་གྲུབ་པ་དེ་ནི། རྣམ་དབྱེ་ལྔ་པ་འབྱུང་ཁུངས་ཀྱི་གནས་ལ་འཇུག་པ་ཡིན་ཏེ། ལོགས་སུ་དགར་བ་དང་། སྡུད་པ་ལའང་། འབྱུང་ཁུངས་ལ་འཇུག་པ་དེ་བཞིན་དུ་འཇུག་པ་ཡིན་ནོ། །དེ་ཡང་རྣམ་དབྱེ་ལྔ་པ་ལ་འཇུག་པ་ནི། དཔེར་ན། རི་ནས་ཆུ་བྱུང་། གནམ་ལས་ཆར་བབས། ས་ལས་མྱུ་གུ་སྨིན། རྟ་ལས་ལྷུང་། ཆོས་ནས་བཤད་ལྟ་བུ་འབྱུང་ཁུངས་གང་ནས་བྱུང་བ་སྟོན་པའོ། །དགར་བ་ནི། རིགས་དང་བྱ་བ་ལ་སོགས་པའི་སྒོ་ནས་གཞན་ལས་ཁྱད་པར་དུ་བྱེད་པ་སྟེ། དཔེར་ན། སྐྱེ་བོ་ཐམས་ཅད་ཀྱི་ནང་ནས་རྒྱལ་པོའ་ིརིགས་ཕུལ་དུ་བྱུང་བའོ། །ལས་ཐམས་ཅད་ལས་ཡི་གེ་འབྲི་བ་ཁྱད་པར་དུ་འཕགས་པའོ། །སྣམ་བུ་ལས་དར་གོས་རེག་བྱ་འཇམ་མོ། །ལྷའི་ནང་ནས་རྡོ་རྗེ་རྩེ་བརྒྱ་འཛིན་པ་ནི་བརྒྱ་བྱིན་ནོ། །ལྟ་བུ་སྟེ། རིམ་པ་བཞིན་དུ་རིགས་དང།བྱ་བ་དང་། ཡོན་ཏན་དང་། རྫས་ཀྱི་སྒོ་ནས་བཀར་ཞིབ་ཕྱོགས་གཅིག་ཏུ་བྱེད་པའོ། །སྡུད་པ་ནི། གཟུགས་ནས་རྣམ་མཁྱེན་གྱི་བར་ལྟ་བུ་དང་སེ་ར་ནས་ལྷ་སའི་བར་ལྟ་བུའོ། །ལག་པ་བསྙལ་ནས་ཟས་ཟ་ལྟ་བུ་དང་། དེ་ནས་ལྟ་བུ་མཚམས་སྦྱོར་ལ་ཡང་འཇུག་པ་ཡོད་དོ། །འདི་དག་སྡུད་པ་ལ་ཡང་འཇུག་གོ། འདིར་སྨྲ་སྒོ་ལས།སྡུད་པ་དག་དང་མཚམས་སྦྱོར་ནི། །ནས་ལ་ཅུང་ཟད་ལྷག་པ་ཡིན། །ཞེས་ནས་ཀྱི་སྒྲའི་འཇུག་པ་ཕལ་ཆེར་ལས་དང་མཐུན་ཀྱང་། སྡུད་པ་དང་མཚམས་སྦྱོར་གཉིས་ལ། ལས་མི་འཇུག་ཅིང་ནས་འཇུག་པས། ནས་ཀྱི་འཇུག་པ་ལྷག་པར་བཤད་དོ། །དེ་ཡང་དཔྱད་པར་བྱ་སྟེ། དེང་སང་གཟུགས་ལ་སོགས་པ། ཞེས་ལ་དང་སོགས་ཀྱི་བར་དུ་ཚེག་བར་མང་ངོ་། །འོ་ན་དེའི་ལ་དེ་རྣམ་དབྱེ་སོགས་གང་ཡིན་འདྲིའོ། །གལ་ཏེ་རྣམ་དབྱེ་གཉིས་པ་དང་བཞི་པ་དང་བདུན་པ་གང་རུང་ངོ་སྙམ་ན་ཡང་འཐད་པ་མ་ཡིན་ཏེ། གཟུགས་ལ་བྱས་པ་སོགས་དང། གཟུགས་ཀྱི་ཆེད་དུ་བྱས་པ་སོགས་ཀྱི་བྱ་བ་གང་ཡང་མི་སྟོན་པ་ཤིན་ཏུ་གསལ་ཞིང་། སོགས་ཀྱི་སྒྲས་བསྟན་པའི་ཆོས་ཀྱང་གཟུགས་ལ་ཡོད་པ་སོགས་སུ་མི་སྟོན་པར་ཤིན་ཏུ་རྟོགས་སླ་བས། རྣམ་དབྱེ་དེ་གསུམ་གང་དུ་ཡང་མི་འཐད་དོ། །གཟུགས་ཀྱི་ངོ་བོ་ཉིད་དུ་མི་སྟོན་པས་དེ་ཉིད་ལ་མི་འཇུག་ཅིང་། དུས་མི་སྟོན་པས་ཚེ་སྐབས་ཀྱང་མིན་ལ། སྟེ་སོགས་ལྷག་བཅས་ཀྱི་སྒྲའི་འཇུག་པ་དང་མི་མཐུན་པས་ལྷག་བཅས་ཀྱང་མིན་པ་དང་།མཚམས་སྦྱོར་གྱི་སྒྲ་ཡིན་ན། དཔེར་ན། ལག་པ་བསྙལ་ནས་ཟན་ཟ། ཞེས་པ་ལ། ལག་པ་བསྙལ་ལ་ཟན་ཟ་ཞེས། ནས་ཀྱི་སྒྲ་དང་འཇུག་པ་གཅིག་པའི་ལ་ཡིག་ལྟ་བུ་དགོས་པ་ལས་དེ་ལྟ་བུ་མིན་པ་དང་། རྒྱུ་མཚན་གཞན་གྱི་སྒོ་ནས་ཀྱང་མཚམས་སྦྱོར་གྱི་སྒྲར་མི་འཐད་དོ། །སྡུད་པ་ཡིན་ནོ་ཞེ་ན་ཡང་མི་འཐད་དེ། ལ་ཡིག་གཞུང་འདིར་སྡུད་པར་མ་བཤད་ཅིང་། གོང་དུ། དགར་དང་སྡུད་པའང་དེ་བཞིན་ནོ། །ཞེས་ནས་ལས་གཉིས་ཐུན་མོང་དུ་སྡུད་པའི་དོན་ལ་འཇུག་པར་བཤད་པ་དང་། སྔོན་གྱི་མདོ་རྒྱུད་བསྟན་བཅོས་ཀྱི་ཡིག་རྙིང་ཕལ་མོ་ཆེར་ལས་སོགས་པ་དང་། ལས་སྩོགས་པ་ཞེས་པ་ཤ་སྟག་བྱུང་། འདི་དག་སྡུད་པའི་སྐབས་སུ་ཡང་ལ་སོགས་པ་དང་། ལ་སྩོགས་པ་ཞེས་ལ་དང་སའི་བར་ན་ཚེག་པར་མེད་པ་མཐའ་ཡས་པ་མཐོང་བས་ལས་སྡུད་པའི་དོན་ལ་འཇུག་པ་ཉིད་འཐད་པའི་ཕྱིར། །ཕྱིས་ཀྱི་དག་ཡིག་ངག་སྒྲོན་སོགས་མང་པོར་ལ་སོགས་པ་ཞེས་པའི་ལ་དང་། སའི་བར་དུ་ཚེག་བར་མ་བྱས་ན་ནོར་བར་བཤད་པ་ཡང་བོད་སྐད་སོར་བཞག་གི་ཡི་གེ་ལ་དབྱངས་ལྔ་བཤད་པ་གཞུང་འདི་དང་དངོས་སུ་འགལ་བས་མཚོན་ནུས་སོ། །ཡང་སྨྲ་སྒོར།ལས་ནི་རྒྱུ་དང་འབྱུང་ཁུངས་དང་། །དགར་བ་ཡིན་ཏེ་ནས་དེ་བཞིན། །ཞེས་བཤད་པ་ཡང་། རྒྱུའི་འཇུག་པ་འབྱུང་ཁུངས་ཀྱི་དོན་ལས་ལོགས་སུ་བྱེད་ན་མི་འཐད་ལ། སྤྱིར་འབྱུང་ཁུངས་ཙམ་དང་། དེའི་ཁྱད་པར་རྒྱུའི་དོན་ལ་འཇུག་པ་གཉིས་ཀྱི་དབྱེ་བར་བྱེད་ན་རིག་པའི་སྒོ་འཕེལ་བའི་ཐབས་སུ་འགྲོ་ཞིང་དོན་ལའང་གནས་པས་འཐད་དོ། །བདུན་པ་བོད་པའི་རྣམ་དབྱེ་འཆད་པའི་ཆེད་དུ།གང་མིང་བརྗོད་པའི་དང་པོ་རུ། །ཀྱེ་སྦྱར་བ་ནི་བོད་པ་ཡིན། །ཞེས་གསུངས་ཏེ། གང་ཟག་གང་ཡང་རུང་བའི་མིང་བརྗོད་པའི་དང་པོའམ་ཐོག་མར་ཀྱེ་ཞེས་སྦྱར་བ། དཔེར་ན། ཀྱེ་རྒྱལ་བའི་སྲས། ཀྱེ་གྲོགས་པོ། ཀྱེ་ལྷའི་དབང་པོ་ལྟ་བུའི་ཀྱེའི་སྒྲ་ནི་རྣམ་དབྱེ་བརྒྱད་པ་བོད་པ་ཡིན་ནོ། །འདིར་དངོས་སུ་མ་བཤད་ཀྱང་ཀྭ་ཡེ་གྲོགས་པོ་དག་སོགས་ད་ལྟ་བོད་དུ་གྲོང་པ་དག་མི་གཞན་ལ་སྐད་གཏོང་བའི་ཐོག་མར་ཝ་ཡེ་ཞེས་ཕལ་ཆེར་སྦྱར་ནས་འབོད་པ་ལྟ་བུའོ། །དེས་ན་རྣམ་དབྱེ་འཕྲོས་དང་བཅས་པ་བཤད་ཟིན་ཏོ། །གཉིས་པ་ཚིག་ཕྲད་རྐྱང་པ་འཆད་པ་ལ་ཡང་། དགར་བརྣན་གྱི་སྒྲ་བཤད་པ། འབྱེད་སྡུད་སོགས་བསྟན་པ། སྤྱི་སྒྲ་བཤད་པ། བདག་པོའ་ིསྒྲ་བཤད་པ། དགག་པའི་སྒྲ་བཤད་པ། ཐ་སྙད་སོགས་ཀྱི་དོན་ལ་འཇུག་པའི་ཚིག་ཕྲད་བཤད་པ་དང་དྲུག་གོ།དང་པོ་དགར་བརྣན་གྱི་སྒྲའི་དབང་དུ་བྱས་ཏེ།གང་མིང་མཐའ་དང་མཐུན་པ་ཡི། །བཞི་པ་ལ་ནི་ཨི་སྦྱར་བ། །དགར་དང་བརྣན་པའི་ཚིག་ཏུ་འགྱུར། །ཞེས་གསུངས་ཏེ། མིང་གང་ཡང་རུང་བའི་མཐའ་ན། མཐའ་དེ་དང་མཐུན་པ་སྟེ། མཐའ་དེར་འོས་ཤིང་སྐབས་སུ་བབ་པ་ཡི། རྗེས་འཇུག་བཞི་པ་ན་ཡིག་ལ་ཨི་སྦྱར་བས་ནི་ཞེས་གྲུབ་པ་དེ་ནི། ལོགས་སུ་དགར་བ་དང་། ནན་ཏན་དུ་བརྣན་པའམ་ངེས་པར་བཟུང་བའི་ཚིག་ཕྲད་དུ་འགྱུར་རོ། །དེ་ལ་དགར་བ་ནི། དགར་བའི་གཞི་དངོས་སུ་སྨོས་སམ་མ་སྨོས་པ་ཇི་ལྟར་ཡང་། དགར་གཞིའི་རིགས་མཐུན་པ་དང་། མི་མཐུན་པ་གང་ཡང་རུང་བའི་ནང་ནས། དམིགས་ཀྱིས་བཀར་བ་སྟེ། དཔེར་ན། ལྷའི་ནང་ནས་བརྒྱ་བྱིན་ནི་མིག་སྟོང་དང་ལྡན་ནོ། །ལྟ་བུ་དགར་གཞི་དངོས་སྨོས་ཤིང་། རིགས་མཐུན་པའི་ནང་ནས་དགར་བའོ། །མིག་སྟོང་དང་ལྡན་པ་འདི་ནི་བརྒྱ་བྱིན་ནོ།། ལྟ་བུ་དགར་གཞི་དངོས་སུ་མ་སྨོས་ཀྱང་ཁྱད་ཆོས་ཀྱི་སྒོ་ནས་གཞན་ལས་དམིགས་ཀྱིས་འབྱེད་པའོ། །རིགས་མི་མཐུན་པ་ལས་དགར་བ་ནི། ཉན་ཐོས་ལས་ནི་སངས་རྒྱས་མཆོག་ཏུ་འཕགས། གསེར་གྱི་བུམ་པ་ནི་ཟངས་ཀྱི་བུམ་པ་ལས་རྒྱུ་བཟང་།ལྷ་ནི་མི་ལས་མཛེས་ལྟ་བུའོ། །བརྣན་པ་ནི། གཞན་གྱི་ཟླ་བོ་ལ་ལྟོས་པ་མ་ཡིན་པར་ངོ་བོ་དང་ཁྱད་པར་བྱ་བྱེད་སོགས་རང་ས་རང་སར་ལྷག་པར་ངེས་པའམ། ནན་ཏན་ཏུ་ངེས་པར་བྱེད་པ་སྟེ། དཔེར་ན། ཁྲབ་ནི་གྱོན། རྨོག་ནི་གྱོན། གྲི་ནི་ཡོད། མདའ་ནི་ཡོད། མདུང་ནི་ཡོད། མེ་མདའ་ནི་ཡོད། ཅེས་སོགས་གཡུལ་དུ་འཇུག་པ་ན། རང་གི་གོ་ཆ་དང་མཚོན་ཆ་ལ་སོགས་པ་ཚང་མ་ཚང་ལྟ་བའི་ཚེ། དེ་དག་རེ་རེ་ནས་ངེས་ངེས་བྱེད་པ་ལྟ་བུའོ། །དེ་བཞིན་དུ་བཅོམ་ལྡན་འདས་ཆོས་ཐམས་ཅད་ནི་ཐུགས་སུ་ཆུད། ཆོས་ཀྱི་འཁོར་ལོ་ནི་རབ་ཏུ་བསྐོར། སློབ་མའི་ཚོགས་དུལ་བ་མཐའ་ཡས་པ་ནི་མངའ་ལྟ་བུ་རྣམས་སོ། །གཉིས་པ་འབྱེད་སྡུད་སོགས་འཆད་པའི་ཕྱིར།མིང་གང་རུང་བའི་བར་མཚམས་སུ། །གསུམ་པ་ལ་ནི་གཉིས་པ་སྦྱར། །དེ་ནི་སྡུད་དང་འབྱེད་པ་དང་། །རྒྱུ་མཚན་ཚེ་སྐབས་གདམས་ངག་ལྔའོ། །ཞེས་གསུངས་ཏེ། མིང་གང་ཡང་རུང་བ་ཚོགས་པའི་བར་སྐབས་སུ་རྗེས་འཇུག་གི་ཡི་གེ་གསུམ་པ་ད་ཡིག་ལ། གཉིས་པ་ང་ཡིག་སྦྱར་བས།དང་ཞེས་གྲུབ་པ་དེ་ནི། དོན་སྔ་ཕྱི་དང་། ཕྱོགས་གཅིག་ཏུ་སྡུད་པ་དང་། རྣམ་གྲངས་སོ་སོར་འབྱེད་པ་དང་། རྒྱུ་མཚན་སྟོན་པ་དང་། ཚེ་སྐབས་སྟོན་པ་དང་། གདམས་ངག་སྟོན་པ་སྟེ་ལྔ་ལ་འཇུག་པའོ། །དེ་ལ་ཐོག་མར་སྡུད་པ་ནི། བུམ་པ་མི་རྟག་སྟེ། ཀ་བ་དང་སྣམ་བུ་ཡང་ངོ་ལྟ་བུ་དོན་སྔ་མར་སྦྱར་བའི་ཆོས་ཕྱི་མར་ཡང་སྦྱོར་བ་སྡུད་པ་དང་། བུམ་པ་དང་ཀ་བ་དང་སྣམ་བུ་ཡང་བདག་མེད་དོ་ལྟ་བུ་ཕྱི་མའི་ཆོས་སྔ་མར་སྦྱོར་བ་སྡུད་པ་སོགས་སྔ་ཕྱི་སྡུད་པ་དང་། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ནི་ཕུང་པོའ།ོ ལྟ་བུ་ཕྱོགས་གཅིག་ཏུ་སྡུད་པའོ། །འབྱེད་པ་ནི། ཕུང་པོ་ནི་ལྔ་སྟེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའོ། །ལྟ་བུ་དབྱེ་བའི་གཞི་གཅིག་ལས།རྣམ་གྲངས་དུ་མར་འབྱེད་པ་སྟེ། གམ་ལ་སོགས་པ་བཞིན་ནོ། མདོར་ན།ཆོས་སྦྱོར་བ་སྔ་ཕྱི་སྡུད་པ་དང་། ངོ་བོ་སོ་སོར་བགྲངས་ནས་ཕྱོགས་གཅིག་ཏུ་སྡུད་པ་སྟེ་སྡུད་པ་གཉིས་དང་། གཞི་གཅིག་རྣམ་གྲངས་ཐ་དད་པར་འབྱེད་པ་དང་བཅས་པའི་ཁྱད་པར་ནི། འབྱེད་པ་ཙམ་དང་། ཕྱེ་ནས་ཕྱོགས་གཅིག་ཏུ་བྱེད་པའམ། ཁྱད་པར་གཅིག་ཏུ་སྦྱོར་བའོ། །རྒྱུ་མཚན་ནི། གཏན་ཚིགས་སྟོན་པ་ནི། དཔེར་ན། ལེགས་པར་བསླབས་པ་དང་མཁས་པར་འགྱུར་རོ།།བྱས་པ་དང་མི་རྟགནད་འཚེ་མེད་པ་དང་སྐྱིད་པོ་འབྱུང་ལྟ་བུ་མཁས་པར་འགྱུར་བ་དང་། མི་རྟག་པ་དང་། སྐྱིད་པོ་འབྱུང་བའི་རྒྱུ་མཚན་དུ་ལེགས་པར་བསླབས་པ་དང་། བྱས་པ་དང་། ནད་འཚེ་མེད་པ་སོགས་འགོད་པ་ན། དང་གི་སྒྲ་སྦྱོར་བ་ཡུལ་སྐད་དོན་མཐུན་རྣམས་སུ་མ་འཆོལ་བར་ཡོད་ཀྱང་། མདོ་རྒྱུད་བསྟན་བཅོས་རྣམས་སུ་འབྱེད་སྡུད་སོགས་དང་ཤིན་ཏུ་དབྱེ་བར་དཀའ་བས་ཕལ་ཆེར་མ་སྦྱར་བའམ། །སྦྱར་ཡང་མ་རྟོགས་པས་གྱ་ཚོམ་དུ་ལུས་པས། འགྲེལ་བྱེད་སོགས་ཀྱི་དཔེར་བརྗོད་དུ་མ་བཀོད་པ་ཞིག་གོ་སྙམ་མོ། །ཚེ་སྐབས་ལ་འཇུག་པ་ནི། དུས་སྟོན་པ་སྟེ། དཔེར་ན་ཉི་མ་ཤར་བའི་དུས་སམ། ཉི་མ་ཤར་བའི་ཚེ་འགྲོ་བ་ལ། ཉི་མ་ཤར་བ་དང་འགྲོ་ཞེས་པ་དང། དེ་བཞིན་དུ་ནམ་ལངས་པ་དང་འགྲོ། དེ་སྐད་ཅེས་བཀའ་བསྩལ་བ་དང་ལྡ་བུའོ། །གདམས་ངག་ལ་འཇུག་པ་ནི། གདམས་ངག་འདོམས་པ་སྟེ། ངག་གི་སྒོ་ནས་བྱ་བའི་ཐབས་སློབ་པ་དང་བསྐུལ་བའི་ཕྱིར་བརྗོད་པའོ། །དཔེར་ན།འདི་གྱིས་དང་། ཉོན་དང་། སློབས་དང་། སྒོམས་དང་། ཡིད་ལ་ཟུངས་དང་ལྟ་བུ་བྱ་བ་དེ་དང་དེ་ལ་བསྐུལ་ཞིང་གྱིས་ཤིག་པའི་བརྡའོ། །རྒྱུ་མཚན་དང་ཚེ་སྐབས་ལ་འཇུག་པ་གཉིས་མི་འགལ་བར་མཐོང་སྟེ། ཚིག་གསལ་ལས།འདིར་སྐྱེ་བ་བཀག་པ་བསྒྲུབ་པར་བྱ་བའི་ཆོས་སུ་འདོད་པ་དེའི་ཚེ། ཞེས་པ་འདིའི་དོན་འཆད་པ་ན། ལམ་རིམ་ཆེན་མོར། དོན་དམ་པར་སྐྱེ་བ་བཀག་པ་དེ། ཆོས་ཅན་དེ་དག་ལ་བསྒྲུབ་བྱའི་ཆོས་སུ་བརྟེན་པ་དེའི་ཚེ་སྟེ། དེའི་ཕྱིར་ཞེས་གསུངས་པས། ཚེའི་ཚིག་ཕྲད་རྒྱུ་མཚན་ལ་འཇུག་ཅིང་དུས་དང་ལྡན་པ་ཡང་ཡིན་པ་བཞིན་ནོ། །འདིས་མཚོན་ནས། ཚེ་དང་དོན་གཅིག་པ། རྒྱུ་ཡོད་པ་ན་འབྲས་བུ་འབྱུང་། རྒྱུ་ཡོད་པ་ལ་འབྲས་བུ་འབྱུང་། རྒྱུ་ཡོད་པ་དང་འབྲས་བུ་འབྱུང་ལྟ་བུ་རྒྱུ་ཡོད་པའི་ཚེ་འབྲས་བུ་འབྱུང་ཞེས་བྱ་བ་ཡིན་པས།དུས་དང་རྒྱུ་མཚན་ལྷན་ཅིག་སྟོན་པར་འགྱུར་རོ། །རྣམ་གླིང་པ་དང་། མཁས་པ་སྔ་མ་གཞན་མང་པོས། རྒྱུ་མཚན་གྱི་དཔེར་བརྗོད་དུ། སྒྲ་ཆོས་ཅན། མི་རྟག་སྟེ། བྱས་པའི་ཕྱིར་དང་། སྐྱེས་པའི་ཕྱིར་དང་། དངོས་པོ་ཡིན་པའི་ཕྱིར་ཞེས་པ་བཀོད་པ་ནི། །དཔེར་བརྗོད་དེའི་ཕྱིར་གྱི་སྒྲས་རྒྱུ་མཚན་དངོས་སུ་སྟོན་ཅིང་རྒྱུ་མཚན་དེའི་རྣམ་གྲངས་གཉིས་ལ་སོགས་པ་ཡོད་པ། དང་གི་སྒྲ་སོ་སོར་ཕྱེ་བ་ཡིན་པས་འཐད་པ་མ་ཡིན་ནོ། །གསུམ་པ་སྤྱིའི་སྒྲ་འཆད་པའི་ཆེད་དུ།མིང་གང་རུང་བའི་དང་པོ་རུ། །དང་པོ་ལ་ནི་གཉིས་པ་སྦྱར། །སྤྱི་ལ་ཁྱད་པ་ཉིད་དུ་འགྱུར། །ཞེས་གསུངས་ཏེ། མིང་གང་ཡང་རུང་བའི་དང་པོ་སྟེ་ཐོག་མ་རུ། རྗེས་འཇུག་གི་ཡི་གེ་དང་པོ་ག་ལ། གཉིས་པ་ང་སྦྱར་བས། གང་ཞེས་གྲུབ་པ་དེ་ནི། སྤྱི་ལ་ཁྱབ་པའི་སྒྲ་ཉིད་དུ་འགྱུར་ཏེ། སྤྱི་ལ་ཁྱབ་པ་ནི། དོན་གྱི་རིགས་དང་ཚོགས་པ་ལ་སོགས་པ་སོ་སོའ་ིདམིགས་མ་བཟུང་བར། མཐའ་དག་ལ་ཁྱབ་པར་སྤྱིར་བརྗོད་པའོ། །དཔེར་ན། གང་ལ་ཡོན་ཏན་མཆོག་མངའ་བའི།།དཀོན་མཆོག་དེ་ཞེས་པ་ལྟ་བུ། ཐོག་མར་རིགས་སོགས་ཀྱི་གཞི་གང་ཡང་མ་བརྗོད་པར་མཐའ་དག་ལ་ཁྱབ་པ་གང་ཞེས་སྤྱིར་སྨོས་ན། ཕྱིས་ཡོན་ཏན་གྱི་ཁྱད་པར་སོགས་ཀྱིས་ཁྱད་པར་དུ་བྱས་ནས་དེ་ཞེས་དམིགས་འཛིན་པ་དང་། ལྟོ་ལྡིར་བ་དང་། ཞབས་ཞུམ་པ་དང་ཆུ་བསྐྱོར་བའི་དོན་བྱེད་ནུས་པ་གང་ཡིན་པ་དེ་ནི་བུམ་པའོ། །ལྟ་བུ་རིགས་ཅན་མཐའ་དག་ལ་ཁྱབ་པའི་རིགས་ཀྱི་སྤྱི་ཙམ་བརྗོད་པ་དང་། རབ་ཏུ་བྱུང་བ་འདི་དག་ལས། མཁས་པ་ནི་གང་ཡིན། ལྟ་བུ་དོན་གྱི་སྤྱིའམ་ཚོགས་པ་བཀོད་ནས། མཁས་པ་སོགས་ཀྱི་ཡོན་ཏན་དང་ལྡན་པ་གཞི་གཅིག་ཏུ་མ་ཕེབས་པར་སྤྱིར་དྲི་བ་དང་། ཐེ་ཚོམ་དང་གདམ་ང་བྱེད་པའི་ཚེ་བརྗོད་ཅིང་། སྤྱིར་བརྗོད་པ་དེ་ཉིད་བྱེ་བྲག་ལ་ཡང་གདོན་མི་ཟ་བར་སྙེག་གོ། རྣམ་གླིང་པས། གང་གི་སྒྲ་དེ་སྤྱི་ཙམ་སྟོན་པའི་སྒྲ་ལ་ཁྱབ་པ་ཉིད་དུ་འགྱུར་ཞེས་འགྲེལ་པ་ནི་ཧ་ཅང་མ་བརྟགས་པའི་བཤད་པར་རྟོགས་སླའོ། །དེ་བཞིན་དུ་ཅི་དང་། སུ་དང་། ཇི་ལ་སོགས་པ་ཡང་གང་དང་ཕལ་ཆེར་མཐུན་ཅིང་། སྐབས་ཐོབ་ཀྱིས་ཁྱབ་ཆེ་ཆུང་འབྱུང་བ་ནི།སུ་ཞེས་པའི་སྒྲ་གང་ཟག་ཁོ་ན་ལ་བརྗོད་ཅིང་། བུམ་པ་ལ་སོགས་པའི་ཆོས་གཞན་ལ་མི་འཇུག་པ་དང་། གང་ཞེས་པ་གང་ཟག་དང་ཆོས་ཐམས་ཅད་ལ་བརྗོད་པ་བཞིན་དང་། ཇི་སྙེད་ལྟ་བུའི་སྐབས་སུ་གང་གི་སྒྲ་མི་སྦྱོར་བ་བཞིན་ནོ། །དེ་ལྟར་ཡང་སྨྲ་སྒོར།ཅི་ལ་སོགས་པ་དེ་བཞིན་ཏེ། །ཁྱབ་པ་སྐབས་ཀྱིས་བརྩི་བར་བྱ། །ཞེས་སོ། །བཞི་པ་བདག་པོའ་ིསྒྲ་འཆད་པའི་ཕྱིར།གང་མིང་གི་ནི་མ་མཐའ་ན། །པུ་ལིངྒ་ཡི་སྒྲ་མེད་པ། །དེ་ལ་པུ་ལིངྒ་སྦྱར་ན། །བདག་པོའ་ིསར་ནི་ཤེས་པར་བྱ། །ཞེས་གསུངས་ཏེ། གང་ཡང་རུང་བའི་མིང་གི་མ་མཐའ་ན། པུ་ལིངྒ་སྟེ་པུ་རུ་ཥ་སྐྱེས་པ་དང་། ལིངྒ་རྟགས་ཡིན་པས། པུ་རུ་ཥའི་རུ་དང་ཥ་ཕྱིས་ནས། པུ་ལིངྒར་བསྡུས་པ་ནི། སྐྱེས་པའི་རྟགས་སམ་ཕོ་རྟགས་ཞེས་པའོ། །རྟགས་དེ་ནི་ཕབ་པོ་ཅན་རྣམས་སོ། །པ་བ་པོ་ཅན་གྱི་སྒྲ་ཕོ་རྟགས་སུ་གྱུར་པ་དེ་རྣམས་མེད་པ་དཔེར་ན། རྟ། གསེར། སེ་ར། ལྷ་ས། སྨ་ར། བུམ་པ། ཀ་བ་ལ་སོགས་པའོ། །དེ་དག་ལ་པ་བ་པོ་ཅན་གང་ཡང་རུང་བ་སྦྱར་བས། རྟ་པ། གསེར་པ། སེ་ར་པ། ལྷ་ས་པ། སྨ་ར་ཅན། ཀ་བ་པ། བུམ་པ་བ། མྱོང་བ་པོ། བློ་ལྡན་ལ་སོགས་པ་རང་རང་གི་བདག་པོའམ་རང་ཉིད་གང་ལ་ལྡན་པའི་གཞི་སྟོན་པའི་སྒྲའོ། །བུམ་པ་དང་། ཀ་བ་ལྟ་བུའི་པ་དང་བ་ནི། རང་མིང་གི་ཆ་ཤས་སུ་ཐོག་མ་ནས་གྲུབ་པས་བདག་པོའ་ིསྒྲ་མིན་པ་ནི། པུ་ལིངྒ་ཡི་སྒྲ་མེད་པ། ཞེས་གསུངས་པ་ཉིད་ཀྱིས་ཤེས་སོ། །དེ་ལྟར་པ་བ་པོ་ཅན་གྱི་སྒྲ་ནི་བདག་པོའམ་ལྡན་པའི་དོན་དུ་སྦྱོར་ཞིང་། དེའི་སར་ནི་ཤེས་པར་བྱའོ། །དེ་ལྟར་ཡང་སྨྲ་སྒོ་ལས།པ་བ་ཅན་ནི་བདག་པོའམ། །ལྡན་པའི་དོན་དུ་སྦྱར་བར་བྱ། །ཞེས་སོ། །ལྔ་པ་དགག་སྒྲ་འཆད་པའི་ཕྱིར།མིང་གང་རུང་བའི་ཡ་མཐའ་རུ། །སྟྲཱི་ལིངྒ་ཡི་སྒྲ་མེད་པ། །དེ་ལ་སྟྲཱི་ལིངྒ་སྦྱར་ན། །དགག་པའི་གནས་སུ་ཤེས་པར་བྱ། །ཞེས་གསུངས་ཏེ། མིང་གང་ཡང་རུང་བའི་ཡ་མཐའ་རུ། །སྟྲཱི་བུད་མེད་དང་། ལིངྒ་རྟགས་ཡིན་པས། མོ་རྟགས་ཀྱི་སྒྲ་མ་ཡིག་མེད་པ་དེ་ལ། སྟྲི་ལིངྒའི་སྒྲ་མ་ཡིག་སྦྱར་ན། དགག་པའི་གནས་ཏེ། གང་གི་ཐོག་མར་སྦྱར་བའི་དོན་དེ་ཉིད་དགག་པའི་སྒྲར་ཤེས་པར་བྱའོ། །དཔེར་ན། སྐྱེས། འགགས། མཐོང་ལྟ་བུའི་ཡས་ཀྱི་མཐར་མ་ཡིག་སྦྱར་བས། མ་སྐྱེས། མ་འགགས། མ་མཐོང་ལྟ་བུ་བྱུང་ཟིན་བཀག་པ་དང་། འདིར་ཤུགས་ལ་བསྟན་པ་མི་ཡིག་སྦྱར་བ། མི་སྐྱེ། མི་འགགམི་མཐོང་ལྟ་བུ་ད་ལྟ་བ་དང་འབྱུང་འགྱུར་འགོག་པ་དང་། སྐྱེ་བ་མེད། འགག་པ་མེད། མཐོང་བ་མེད་ལྟ་བུ། དུས་གསུམ་ཀར་སྦྱོར་རུང་བ་དང་། དེ་བཞིན་དུ། སྐྱེས་པ་མིན། སྐྱེ་བ་མིན། འགགས་པ་མིན། འགག་པ་མིན། བྱུང་བ་མ་ཡིན། འབྱུང་བ་མ་ཡིན། མཐོང་བ་མ་ཡིན། ལྟ་བུ་མ་ཡིན་པ་དང་མིན་ཞེས་པའི་སྒྲ་ཡང་དུས་གསུམ་ཀ་ལ་སྦྱར་རུང་ངོ་། །དེ་ལྟར་མིང་གི་ཐོག་མར་སྦྱོར་བ་མ་དང་མི་དང་། མཐར་སྦྱོར་བ་མེད་དང་མིན་དང་མ་ཡིན་ཞེས་པའི་སྒྲ་རྣམས་དགག་པའི་སྒྲ་ཡིན་ནོ། །འོ་ན། མ་མོ། མོ་མ། ཆང་མ། ཇ་མ། དགའ་མ་ལ་སོགས་པའི་མ་ཡིག་ཀྱང་དགག་པའི་སྒྲ་ཡིན་ནམ་ཞེ་ན། དེ་རྣམས་དགག་པའི་སྒྲ་མ་ཡིན་ཏེ། གཞུང་འདིར་ཡ་མཐའ་རུ་ཞེས་དང་།སྟྲཱི་ལིངྒ་ཡི་སྒྲ་མེད་པ། །དེ་ལ་སྟྲཱི་ལིངྒ་སྦྱར་ན། །ཞེས་གསུངས་པས། མིང་གང་ལ་མོ་རྟགས་དང་པོ་ནས་མེད་པ་ལ།མོ་རྟགས་གོང་དུ་སྦྱར་ན་དགག་སྒྲར་འགྱུར་བའི་དོན་ཡིན་ལ། མ་མོ། མ་གཞི། མོ་མ་སོགས་ཀྱི་མ་ཡིག་མིང་ཉིད་ཀྱི་ཆ་ཤས་ཡིན་པའི་ཕྱིར། མིང་དེའི་མཐར་སྦྱར་བ་དང་། ཐོག་མར་སྦྱར་ཡང་མིང་རང་ལ་མེད་དུ་མི་རུང་བའི་ཡན་ལག་ཏུ་ཡོད་པའི་མ་ཡིག་ནི་དགག་སྒྲར་མི་འགྱུར་རོ། །དེས་ན་པ་བ་པོ་ཅན་རྣམས་ལ་ཕོ་རྟགས་ཞེས་བརྗོད་པ་ནི། བྱ་བ་དང་གནས་ལ་སོགས་པའི་སྒོ་ནས། དོན་ཕོ་བརྗོད་པ་ལ་ཡི་གེ་དེ་དག་དམིགས་བསལ་རེ་གཉིས་མ་གཏོགས་ཐམས་ཅད་ལ་སྦྱོར་བའི་རྒྱུ་མཚན་གྱིས་ཡིན་ཏེ། དཔེར་ན། རྟ་པ། ཁ་ལོ་པ། བྱེད་པ་པོ། སྨ་ར་ཅན་ལྟ་བུའོ། །འོན་ཀྱང་ལྷ་ཞེས་བྱ་བ། ཕོ་མོ་གཉིས་ཀའི་སྤྱི་བརྗོད་པ་ཡིན་པས། རེ་རེའི་རྟགས་སུ་མི་འགྱུར་བ་ལ། ལྷ་མོ་ཞེས་བྱ་བའི་ཟླ་དང་ཚོགས་ན། ལྷ་ཞེས་པ་ཕོར་གོ་བ་དང་།དེ་བཞིན་དུ། བུ་དང་། བུ་མོ། མི་དང་། མི་མོ། ཀླུ་དང་། ཀླུ་མོ་སོགས་ཀྱི་ཟླ་བོ་ཕྱི་མ་ལ་མོ་རྟགས་སྦྱར་བའི་ནུས་པས། སྔ་མ་ཕོར་གོ་བ་ནི། བ་ཡིག་སོགས་སྦྱར་བ་ལ་མ་ལྟོས་པ་ལྟ་བུའོ། །མ་ཡིག་ལ་མོ་རྟགས་ཞེས་བརྗོད་པ་ནི། གནས་ལ་སོགས་པའི་སྒོ་ནས། དོན་མོ་བརྗོད་པ་ལ་སྤྱིར་མ་ཡིག་སྦྱར་བའི་རྒྱུ་མཚན་གྱིས་ཡིན་ཏེ། དཔེར་ན། ཇ་མ། ཆང་མ། ཇོ་མོ། བཙུན་མོ་ལྟ་བུའོ། །དམིགས་བསལ་བླ་མ། གོང་མ་སོགས་དོན་མོ་མི་བརྗོད་ཀྱང་། རྟགས་མཐའི་དབང་གིས་མ་ཡིག་དྲངས་པ་ཡང་ཡོད་ལ། ལྷ་སྒྲོན། ལྟ་བུ་མ་ཡིག་མ་སྦྱར་ཡང་དོན་མོར་གོ་བ་ཡང་ཡོད་པས། ཐམས་ཅད་ལ་ཁྱབ་པའི་མིང་དང་ཁྱད་པར་རེ་རེ་བའི་སྐབས་བྱེད་པ་གལ་ཆེའོ། །དེ་ལྟར་པ་ལ་སོགས་པ། དོན་ཕོ་བརྗོད་པ་ལ་གཙོ་བོར་སྦྱོར་བས་ཕོ་རྟགས་དང་། མ་ཡིག་དོན་མོ་བརྗོད་པ་ལ་གཙོ་བོར་སྦྱོར་བས་མོ་རྟགས་ཞེས་བྱ་ཞིང་། ཕོ་གོ་བར་བྱེད་པའི་རྟགས། པ་ལ་སོགས་པ་མིང་མཐར་གསར་དུ་སྦྱར་བ་ནི་བདག་པོའ་ིསྒྲ་དང་། མོ་གོ་བར་བྱེད་པའི་མ་ཡིག་མིང་གི་ཐོག་མར་གསར་དུ་སྦྱར་བ་དགག་སྒྲར་འགྱུར། ཞེས་པ་གཞུང་གི་དགོངས་པ་ཡིན་གྱི། ཕོའ་ིརྟགས་གང་ཡིན་ཐམས་ཅད་བདག་པོའ་ིསྒྲ་དང་མོའ་ིརྟགས་གང་ཡིན་ཐམས་ཅད་དགག་པའི་སྒྲ་ཡིན་དགོས་པ་ནི་མིན་ནོ། །འདིར་མ་ཡིན་དགག་དང་མེད་དགག་གི་ཁྱད་པར་དང་། མ་ཡིན་དགག་གི་དབྱེ་བ་བཅུ་བཞི་དང་། མེད་དགག་གི་དབྱེ་བ་བཅུ་གཅིག་ལ་སོགས་པ་ནི་མངས་པར་འགྱུར་བས་མ་བྲིས་སོ། །དྲུག་པ་ཐ་སྙད་སོགས་ཀྱི་དོན་དགུ་ལ་འཇུག་པའི་ཕྲད་འཆད་པའི་ཕྱིར།གང་མིང་གི་ནི་ཡ་མཐའ་རུ། །གསུམ་པ་ལ་ནི་ཨེ་སྦྱར་བ། །ཐ་སྙད་དབང་དུ་གསུམ་ཡིན་ཏེ། །དངོས་པོའ་ིདབང་གིས་བཞི་རུ་འགྱུར། །དུས་ཀྱི་དབང་གིས་གཉིས་ཡིན་ནོ། །ཞེས་གསུངས་ཏེ། གང་ཡང་རུང་བའི་མིང་གི་ཡ་མཐའ་སྟེ། ཐོག་མ་རུ་རྗེས་འཇུག་གི་ཡི་གེ་གསུམ་པ་ད་ཡིག་ལ་དབྱངས་གསུམ་པ་ཨེ་སྦྱར་བས། དེ་ཞེས་གྲུབ་པ་དེ་ནི། དོན་དགུ་ལ་འཇུག་སྟེ། ཐ་སྙད་ཀྱི་དབང་དུ་བྱས་པ་གསུམ་ལ་འཇུག་ཅིང་། དངོས་པོའ་ིདབང་གིས་བཞི་རུ་འཇུག་པར་འགྱུར་ལ། དུས་ཀྱི་དབང་གིས་གཉིས་ལ་འཇུག་པ་ཡིན་པའི་ཕྱིར་རོ། །དེ་ལ་ཐ་སྙད་ཀྱི་དབང་དུ་བྱས་པ་གསུམ་ནི། འདས་པ་དང་། རྣམ་གྲངས་གཞན་བརྗོད་པ་དང་། ལྷག་བཅས་དང་གསུམ་མོ། །འདས་པའི་ཐ་སྙད་ནི། ད་ལྟ་འཆད་བཞིན་པའི་སྔོན་དུ་སོང་ཟིན་པའི་མིང་ཚིག་གི་ཐ་སྙད་དེ། གོང་དུ་སོང་མ་ཐག་པའི་མིང་ཚིག་རྣམས་སླར་ལེན་མི་དགོས་པར། དེ་ཞེས་བརྗོད་པས་གོ་བར་ནུས་པའོ། །དཔེར་ན། ཀ་བ་རིང་བོའ།ོ །དེ་སྲ་བའོ། །དེ་ལ་ཟུར་ཡོད་དོ། །ཞེས་ཁྱད་པར་སྔ་མ་སྦྱོར་བ་ན་རང་གི་མིང་སྨོས་ནས། ཕྱི་མ་རྣམས་སྦྱོར་བ་ན་དེ་ཞེས་སྨོས་པས་ཆོག་པ་ལྟ་བུའོ།།རྣམ་གྲངས་གཞན་བརྗོད་པ་ནི། བརྗོད་བྱ་སྟོན་རྒྱུའི་རང་མིང་དངོས་སུ་མ་སྨོས་པར་སྤྱི་ཁྱབ་ཀྱི་སྒྲ་གང་ཞེས་པ་ལྟ་བུས་བརྗོད་ནས། ཕྱིས་དེ་ཞེས་པའི་སྒྲ་གཉིས་བརྗོད་པ་ན། རྣམ་གྲངས་ཀྱི་དབྱེ་བ་དུ་མ་ཡོད་པར་གོ་བ་དཔེར་ན། གདུང་འདེགས་པ་གང་དང་གང་ཡིན་པ་དེ་དང་དེ་ནི་ཀ་བའོ། །ལྟ་བུ་དང།དེ་དང་དེ་ནི་མདོ་བཞིན་དུ། ལྟ་བུའོ། །ཡང་ན། རྣམ་བཤད་རིག་པར། རྣམ་གྲངས་དང་། མཚན་ཉིད་སོགས་ཀྱི་རྣམ་གྲངས། མིང་གི་རྣམ་གྲངས་ལ་བཤད་པ་བཞིན། དོན་གཅིག་མིང་གི་རྣམ་གྲངས་གཞན་དུ་མ་བརྗོད་པ། འདི་ནི་ཚངས་པ་སྟེ། གདོང་བཞི་པ་ཡང་དེ་ཡིན། མེས་པོ་ཡང་དེ་ཡིན། ལྟ་བུ་ཡང་གཞུང་དང་ཉེའོ། །ལྷག་བཅས་ནི། ཚིག་གི་ལྷག་མ་ཡོད་པར་སྟོན་པ་སྟེ། ལྷ་གཟུགས་མཛེས་པར་ཡོད་དེ། མིའི་གཟུགས་ལ་ལྟའོ། །ལྟ་བུ་གོང་དུའང་བསྟན་ཟིན་ཏོ། །དེ་ལྟར་ཡང་སྨྲ་སྒོར།དེ་ཞེས་བྱ་བའི་ཚིག་གི་དོན། །ཐ་སྙད་དངོས་དང་དུས་འཇུག་གསུམ། །འདས་དང་རྣམ་གྲངས་གཞན་ཅན་དང་། །ལྷག་མ་དག་དང་བཅས་པའོ། །ཞེས་གསུངས་པ་ལྟར་རོ། །དེ་དག་ལ་ཐ་སྙད་ལ་འཇུག་པ་ཞེས་བྱ་སྟེ།མིང་ཚིག་གི་ཐ་སྙད་དང་བརྗོད་བྱའི་དངོས་པོ་གཉིས་ཀྱི་ནང་ནས། གཙོ་བོར་མིང་ཚིག་གི་ཐ་སྙད་ཁོ་ན་ལ་ལ་འཇུག་པའི་ཕྱིར་རོ། །དངོས་པོ་ལ་འཇུག་པ་བཞི་ནི། བདེན་པ་དང་། གསང་བ་དང་། བདག་གི་བ་དང་། ཕ་རོལ་པོ་རྣམས་སོ། །དེ་ལ་བདེན་པའི་དངོས་པོ་ལ་འཇུག་པ་ནི།དངོས་པོ་རྣམས་ཀྱི་ཀུན་རྫོབ་པ་དང་དོན་དམ་པའི་ངོ་བོ་ཉིད་དྲང་པོར་གོ་བར་བྱེད་ཅིང་ཡིད་ཆེས་པར་བྱེད་པ་སྟེ། དཔེར་ན། དེ་བཞིན་ཉིད་དོ། །དེ་ཁོ་ནའོ།།དེའི་རང་བཞིན་ནི་དེ་ཉིད་དོ། །དེ་དེ་བཞིན་ནོ། །དེ་རང་ཡིན་ནོ། །དེ་ཁོ་ནར་འདུག་གོ། ཇི་སྐད་ཟེར་བ་དེ་བཞིན་དུ་གནས་སོ་ཞེས་སོགས་ལྟ་བུའོ། །གསང་བའི་དངོས་པོ་ལ་འཇུག་པ་ནི། མི་གཞན་དག་དང་ཐུན་མོང་མ་ཡིན་པའི་དངོས་པོ་དེ་གཞན་གྱིས་ཤེས་དོགས་ནས་གསང་བའི་སྐབས་སུ།རང་གི་བརྡ་སོང་བའི་གང་ཟག་ལ་མི་གཞན་དང་ཐུན་མོང་དུ་གཏམ་སྨྲ་བའི་ཚེ་དེ་ཞེས་བརྗོད་པས་གོ་བ་སྟེ། དཔེར་ན། དེ་མ་སྟོན། དེ་མ་ཟེར། དེ་བསྒྲག་པར་མི་བྱ་ལྟ་བུའོ། །བདག་གི་བ་ལ་འཇུག་པ་ནི། རྗོད་པ་པོ་བདག་ཉིད་དང་འབྲེལ་བའི་དངོས་པོ་ལ་འཇུག་པ་སྟེ། དཔེར་ན། རང་ཉིད་ཀྱི་ཡོ་བྱད་སོགས་ལ་མིག་གཏད་དེ། བདག་གི་དེ། ངའི་དེ། རང་གི་དེ་ལྟ་བུ་སྟེ། འདི་ཡང་རྗོད་པ་པོ་རང་ཉིད་ལ་དེ་ཞེས་མི་བརྗོད་ཅིང་། རང་ཉིད་དང་འབྲེལ་བའི་དངོས་པོ་གཞན་བརྗོད་པ་ན། དེ་ཞེས་པའི་སྒྲ་འཇུག་པའི་ཁྱད་པར་དབྱེ་བའི་ཕྱིར་མཛད་པའོ།།དངོས་པོ་ཕ་རོལ་པོ་ལ་འཇུག་པ་ནི། གང་ཟག་ཕ་རོལ་པོ་དང་། དེ་དང་འབྲེལ་བའི་དངོས་པོ་གཉིས་ཀ་ལ་འཇུག་པ་སྟེ། དཔེར་ན། མི་དེ། ལྷ་དེ།སྐྱེས་བུ་དེ་ལྟ་བུ་གང་ཟག་དང་། ཁྱོད་ཀྱི་དེ། གཞན་གྱི་དེ་ལྟ་བུ་ཕ་རོལ་པོ་དང་འབྲེལ་བའི་དངོས་པོ་སྟོན་པའོ། །དེ་ལྟར་ཡང་སྨྲ་སྒོར། བདེན་པ་དག་དང་གསང་བ་དང་། །བདག་གི་བ་དང་ཕ་རོལ་པོ། །དངོས་པོ་དག་ལ་འཇུག་པ་བཞི། །ཞེས་པ་ལྟར་རོ། །དུས་ལ་འཇུག་པ་གཉིས་ནི། འདས་དང་མ་འོངས་པའི་དུས་གཉིས་སོ། །འདས་པའི་དུས་ལ་འཇུག་པ་ནི། ད་ལྟ་བྱེད་བཞིན་པ་དང་། ཡོད་བཞིན་པའི་དུས་དེའི་སྐད་ཅིག་སྔ་མ་ཡན་ཆད་ཐམས་ཅད་ལ་འཇུག་གོ། མ་འོངས་པའི་དུས་ཀྱང་ད་ལྟ་བའི་སྐད་ཅིག་ཕྱི་མ་ཕན་ཆད་ཐམས་ཅད་ལ་འཇུག་གོ། དེ་ཡང་བསྐལ་བ་དང་། ལོ་དང་། ཟླ་བ་དང་། ཞག་གཅིག་དང་། སྐད་ཅིག་མ་གང་ལ་ད་ལྟ་བར་བཟུང་བ་དེ་ལ་ལྟོས་པའི་འདས་པ་དང་མ་འོངས་པ་ལ་འཇུག་པའི་སྐབས་ཕྱེད་དགོས་ཏེ། དཔེར་ན། དེ་རིང་གི་དུས་ད་ལྟ་བར་བཟུང་བའི་ཚེ། ཁ་སང་གི་དུས་དེ་ལ་ཞེས་ཁ་སང་ཡན་ཆད་ཀྱི་འདས་པ་ལ་དེ་འཇུག་པ་དང་། སང་གི་དུས་དེ་ཙ་ན་འདི་བྱེད་ལྟ་བུ། སང་ཉིན་ཕན་ཆད་ཀྱི་མ་འོངས་པ་ལ་དེ་འཇུག་པ་ལྟ་བུའོ། །དེ་ལྟར་ཡང་སྨྲ་སྒོར།འདས་པ་དང་ནི་མ་འོངས་པའི། །དུས་ཉིད་ལ་ནི་འཇུག་པ་གཉིས། །ཞེས་པ་ལྟར་རོ། །དེ་མི་འཇུག་པ་གཉིས་ཡོད་དེ། དངོས་པོའ་ིནང་ནས་བདག་དང་། དུས་ཀྱི་ནང་ནས་ད་ལྟ་བ་ལ་མི་འཇུག་གོ། དེ་ལྟར་ཡང་དེ་ཉིད་ལས།མི་འཇུག་པ་ནི་གཉིས་ཡིན་ཏེ། །བདག་ཉིད་ད་ལྟ་ཉིད་ལ་སྤང་། །ཞེས་པ་ལྟར་རོ། །འོ་ན། ད་ལྟ་བའི་དངོས་པོ་ལ་མི་འཇུག་གམ་ཞེ་ན།མ་ཡིན་ཏེ། སྨྲ་སྒོར།དངོས་པོ་དུས་ནི་མི་འདོར་ཏེ། །ཀུན་ལ་རབ་ཏུ་སྦྱར་བར་བྱ། །ཞེས་གསུངས་པས། དངོས་པོ་ལ་འཇུག་པ་ནི་དུས་གསུམ་ཀ་ལ་སྦྱར་རུང་ངོ་། །སྐབས་འདིའི་ཐ་སྙད་ཀྱི་དབང་དུ་བྱས་པ་གསུམ་ལ། མཁས་པ་ཁ་ཅིགཀུན་བརྟགས། གཞན་དབང་། ཡོངས་གྲུབ་གསུམ་ལ་བཞེད་དོ། །གཞན་དག་ནི། ཆོས་དང་། ཆོས་ཅན་དང་། གཉིས་ཀ་མ་ཡིན་པའི་ཐ་སྙད་ལ་བཞེད་དོ། །ལ་ལ་ལུས་ངག་ཡིད་ཀྱི་སྙད་གསུམ་ལ་བཞེད་དོ། །འདི་དག་ཐམས་ཅད་འཐད་པ་མ་ཡིན་པར་མཐོང་སྟེ། ཐ་སྙད་དམ་གྲགས་པར་དེ་ཞེས་བརྗོད་པའི་རྒྱུ་མཚན་གྱིས་ཡིན་ན་ནི། དེ་འཇུག་པའི་ཡུལ་གྱི་ཆོས་གང་ལ་ཡང་ཐ་སྙད་དམ་གྲགས་པར་དེ་ཞེས་བརྗོད་པ་ཤ་སྟག་ཡིན་པས། དེའི་འཇུག་པ་ཐམས་ཅད་ཐ་སྙད་ཀྱི་དབང་དུ་བྱས་པ་ཁོ་ནར་འགྱུར་ཞིང་། གསུམ་འདྲེན་རྒྱུ་ཡོད་པས་ཡིན་ན་ནི། དཀོན་མཆོག་གསུམ་དང་། སྔ་ཕྱི་བར་གསུམ་སོགས་ལའང་དེ་འཇུག་པས་ཧ་ཅང་ཐལ་བ་དང་། རྟོགས་དཀའ་བའི་གནས་འདི་ལ་རྒྱུ་མཚན་གཞན་ཡང་མ་བཤད་པས་ཐ་སྙད་དང་དངོས་པོའ་ིའཇུག་པ་གཉིས་ཀྱི་ཁྱད་པར་མ་ཕྱེད་པར། དཔེར་བརྗོད་ཀྱང་ཟློས་ཏེ་བཀོད་པ་མང་བའི་ཕྱིར་རོ། །རྣམ་གླིང་པས། རྗོད་བྱེད་ཀྱི་ཚིག་ལ་ཐ་སྙད་ཅེས་པ་དང་།བརྗོད་བྱའི་དོན་ལ་དངོས་པོ་ཞེས་མིང་བཏགས་པ་ཙམ་ཡིན་གསུངས་པ་ནི་ལེགས་པ་ཡིན་ཡང་། འདས་པའི་ཐ་སྙད་བརྗོད་པའི་དེ་ཞེས་པ། ངེས་བཟུང་གི་དོན་ཡིན་ཞེས་བཤད་པ་ནི། དོན་གྱི་དངོས་པོ་འདས་པ་ལ་འཇུག་པ་དང་ཐ་སྙད་འདས་པ་ལ་འཇུག་པ་གཉིས་མ་ཕྱེད་པ་དང་། ངེས་བཟུང་གི་དོན་ནན་ཏན་དུ་བརྣན་པ་ལ་མ་དགོངས་པར་གསལ་ཞིང་། དགར་བརྣན་གྱི་སྐབས་སུ་རང་ཉིད་ཀྱིས་བཤད་པ་བྱས་པ་དང་ཡང་འགལ་བའི་ཕྱིར་རོ། །དེས་ན་ཁོ་བོས་བཤད་པར་བྱ་སྟེ། སྤྱིར་ཐ་སྙད་ལ་བློའ་ིཐ་སྙད་དང་། མིང་ཚིག་གི་ཐ་སྙད་གཉིས་ཡོད་པ་ལས། འདིར་མིང་ཚིག་གི་རྗོད་པ་ལ་ཐ་སྙད་ཅེས་བྱའོ།།དངོས་པོ་ཡང་། དོན་བྱེད་ནུས་པ་ལ་མི་བྱེད་ཀྱི། དངོས་པོ་ཞེས་བཏགས་པ་ཙམ་ལ་བྱེད་དོ། །དེ་ཡང་བརྗོད་བྱའི་དོན་ལ་དངོས་པོར་བཏགས་པ་དང་།ཆོས་ཉིད་ལ་བཏགས་པ་དང་། དགག་བྱ་ལ་བཏགས་པ་སོགས་ཡོད་པ་ལས།འདིར་ནི་བརྗོད་བྱའི་དོན་ལ་བྱའོ། །དེ་ལ་ཐ་སྙད་གསུམ་གྱི་འདས་པ་ནི། མིང་ཚིག་གི་རྗོད་པ་འདས་པ་སྟེ།དཔེར་ན། སངས་རྒྱས་བྱམས་པ་འབྱོན་པར་འགྱུར་རོ། །དེ་ལ་འཁོར་གྲངས་མེད་དོ། ཞེས་བརྗོད་བྱའི་དངོས་པོ་འདས་པ་མ་ཡིན་ཡང་མིང་གི་བརྗོད་པ་འདས་པ་ལ། དེའི་སྒྲ་འཇུག་པ་ལྟ་བུ་དང་། དེས་མཚོན་ནས་དོན་འདས་པ་ཞིག་སྟོན་པ་ལ་མ་ལྟོས་པར། ཚིག་གམ་མིང་གི་བརྗོད་པ་འདས་པ་ལ་ཐ་སྙད་འདས་པ་དང་། དེ་ལ་འཇུག་པ་ལ་ཐ་སྙད་འདས་པ་ལ་འཇུག་པ་ཞེས་བྱའོ། །དེ་བཞིན་དུ་རྣམ་གྲངས་ཀྱི་ཐ་སྙད་ཀྱང་། དོན་གྱི་ངོ་བོ་ལ་རྣམ་གྲངས་ཕྱེ་བ་དང་མ་ཕྱེ་བ་ལ་མ་ལྟོས་པར། མིང་ཚིག་གི་ཐ་སྙད་ཙམ་དུ་རྣམ་གྲངས་དུ་མར་ཕྱེ་བ་ལ་དེའི་སྒྲ་འཇུག་སྟེ། དཔེར་ན། དེ་ནི་རྒྱལ་པོ་སྟེ། ས་སྤྱོད་ཀྱང་དེ་ཡིན། སའི་བདག་པོའང་དེ་ཡིན་ལྟ་བུའོ། །ལྷག་བཅས་ཀྱང་དོན་གཞན་ཞིག་འདྲེན་རྒྱུ་ཡོད་མེད་ལ་མི་ལྟོས་པར། ཚིག་ཕྱི་མའི་ལྷག་མ་འདྲེན་ཅིང་སྟོན་པ་ཞིག་སྟེ། གོང་དུ་བཤད་པ་གཉིས་ཀྱིས་རྟོགས་སོ། །དེའི་སྒྲ་དངོས་པོ་ལ་འཇུག་པ་ནི། བརྗོད་བྱའི་དངོས་པོའ་ིངོ་བོ་ཉིད་རང་མིང་གིས་བརྗོད་པ་དང་། མ་བརྗོད་པ་ལ་མ་ལྟོས་པར། དེ་ཞེས་བརྗོད་པས་གོ་བ་ཞིག་གོ། འགྲེལ་བ་གསལ་སྒྲོན་སོགས་སུ། ཐ་སྙད་ཀྱི་སྐབས་སུ་ཆོས། ཆོས་ཅན། གཉིས་ཀ་མ་ཡིན་པའི་ཐ་སྙད་གསུམ་བགྲངས་ནས། དངོས་པོའ་ིསྐབས་སུ་རིགས། བྱ་བ། ཡོན་ཏན། རྫས་བཞི་འདྲེན་པ་དང་། དེ་དག་གི་དཔེར་བརྗོད་ཀྱང་། ཆོས་ཅན་དང་རིགས་གཉིས་ཀ་ལ། དེ་བུམ་པ་ཞེས་བཀོད་པ་ནི་ཟློས་པར་མ་ཟད།དེ་བུམ་པའོ་ཞེས་བརྗོད་པའི་ཚེ། བུམ་པའི་མཚན་གཞི་ཞིག་ལ་དམིགས་ནས། དེ་ཞེས་བརྗོད་དེ། དེ་ནི་བུམ་པའོ་ཞེས་སྟོན་དགོས་པས། དེའི་སྒྲས་བུམ་པའི་མཚན་གཞིའམ། རིགས་གསལ་བར་བརྗོད་པར་འགྱུར་གྱི། ཆོས་ཅན་བུམ་པ་སྤྱི་ཙམ་པ་དང་། བུམ་པའི་སྤྱི་ཁྱབ་ཀྱི་རིགས་བརྗོད་པ་མ་ཡིན་པའི་ཕྱིར་རོ། །དེ་བཞིན་དུ་བྱ་བའི་དཔེ་ལ། དེ་འགྲོ་ཞེས་པ་དང་། ཡོན་ཏན་ལ། དེ་མཛེས་ཞེས་པ་དང་། རྫས་ལ། དེ་བུམ་པའི་རྡུལ་ཞེས་བཀོད་པའང་ཆེས་མི་འཐད་དེ། དེ་འགྲོ་ཞེས་པ་འགྲོ་བ་པོ་ཞིག་ལ་དམིགས་ནས་དེ་ཞེས་བརྗོད་པ་དང་། དེ་མཛེས་ཞེས་པའང་། མཛེས་པའི་ཁྱད་པར་གང་ལ་ཡོད་པའི་གཞི་དེ་ཉིད་ལ་དམིགས་ནས། དེ་ཞེས་བརྗོད་དེ། དེ་ནས་འགྲོ་བའི་བྱ་བ་དང་། མཛེས་པའི་ཡོན་ཏན་རང་མིང་གིས་བརྗོད་པ་ཡིན་པས་ན། ཚིག་དེའི་ཡོན་ཏན་དང་བྱ་བ་དེའི་འཇུག་ཡུལ་དུ་མི་འཐད་དོ། །དེ་བཞིན་དུ་དུས་ལའང་། དེ་སྔོན་གྱི་ཚེ་བྱུང་། དེ་མ་འོངས་པ་ན་འབྱུང། ཞེས་པའང་དུས་ཅན་གྱི་དངོས་པོའ་ིཐ་སྙད་དེ་སྒྲའི་བརྗོད་བྱར་འགྱུར་གྱི། དུས་དེའི་བརྗོད་བྱར་མི་འགྱུར་བས། མི་འཐད་པར་རྟོགས་སླའོ། །དེས་ན་ཐ་སྙད་ཀྱི་འདས་པ་དང་། དུས་ཀྱི་འདས་པ་གཉིས་ཀྱང་། སྔ་མ་མིང་ཚིག་གི་བརྗོད་པ་འདས་པ་དང་། ཕྱི་མ་དུས་འདས་པ་ཡིན་པས། དོན་དུ་གཉེར་ཞིང་བློ་དང་ལྡན་པ་དག་གིས་ཕྱོགས་ལྷུང་དང་བྲལ་བའི་སྒོ་ནས་ཅལ་སྒྲོག་ཏུ་མ་སོང་བའི་དཔྱད་པ་མཛོད་ལ་ལོངས་ཤིགའདི་ཞེས་པའི་ཚིག་ཕྲད་དུས་ཀྱི་ནང་ནས་ད་ལྟ་བ་དང་། དངོས་པོ་ཉེ་བ་དང་མངོན་སུམ་པ་སོགས་ལ་འཇུག་སྟེ། དཔེར་ན། དུས་འདི་ལྟ་བུ་ད་ལྟ་བ་དང་། རི་དེ་དང་ནགས་འདི་ཞེས་པ་རི་རིང་བ་ལ་དེ་ཞེས་བརྗོད་པ་ན།ནགས་དེ་ལ་ལྟོས་ཏེ་ཉེ་བར་གོ་བ་ལ་འདི་ཞེས་སྦྱོར་བ་ལྟ་བུ་དང་། བུམ་པའི་གཟུགས་ནི་འདིའོ་ཞེས་བུམ་གཟུགས་མངོན་དུ་གྱུར་པ་སྟོན་པ་ལ། འདི་ཞེས་བརྗོད་པ་ལྟ་བུའོ། །དེ་ལྟར་བསྟན་བྱ་དེ་ཉིད་དངོས་པོ་ཡིན་ན། འདས་པ་དང་མ་འོངས་པ་དང་སྐབས་སུ་བབས་པའི་དངོས་པོ་ཕ་རོལ་པོ་ལ་ཡང་འཇུག་པ་ཡོད་དོ། །དེ་ཡང་སྨྲ་སྒོར།འདི་ཚིག་འདས་དང་མ་འོངས་དང་། །སྐབས་ཀྱི་དངོས་གཞན་དག་ལ་འཇུག།གང་ཞིག་ལ་ནི་ལྟོས་བྱས་པའི། །ཉེ་བ་དག་དང་མངོན་སུམ་པའི། །དངོས་པོ་དག་ཀྱང་གཉིས་ཡིན་ནོ། །ཞེས་སོ། །བསྟན་བྱ་དུས་ཡིན་ན། འདས་མ་འོངས་གཉིས་དང་དངོས་པོ་ཡང་ལྐོག་གྱུར་པ་དང་། རིང་བ་ལ་མི་འཇུག་གོ། དེ་ལྟར་ཡང་དེ་ཉིད་ལས།སྤང་བར་བྱ་བ་འདི་ལྟ་སྟེ། །ལྐོག་ཏུ་གྱུར་དང་རིང་བ་དང་། །གལ་ཏེ་བསྟན་བྱ་དུས་ཉིད་ན། །འདས་དང་མ་འོངས་སྤང་བར་བྱ། །ཞེས་སོ། །འདི་ཞེས་པ་བརྗོད་པ་པོ་བདག་ཉིད་ལ་ཡང་མི་འཇུག་སྟེ།དེ་སྒྲ་བཞིན་ནོ། །ད་ཞེས་པའི་སྒྲ་ནི་བརྗོད་བྱ་སྟོན་པ་སྐབས་སུ་བབ་པའི་ཚིག་ཕྲད་ཡིན་ཏེ། དུས་ད་ལྟ་བ་ལ་སྦྱོར་གྱི། འདས་པའི་དུས་ལ་འཇུག་པ་མ་ཡིན་ནོ། །དེ་ཉིད་ལས།ད་ནི་སྐབས་སུ་བབ་པའི་ཚིག།ད་ལྟར་བྱུང་ལ་སྦྱོར་བ་སྟེ། །འདས་པའི་སྐབས་ལ་རྣམ་པར་སྤང་། །ཞེས་གསུངས་སོ། །གཞན་ཡང་ཚིག་ཕྲད་དུ་མ་ཞིག་སྨྲ་སྒོར་བཤད་ཅིང་། དེར་མ་བཤད་པ་ཡང་ཤིན་ཏུ་མང་བར་སྣང་ནའང་གཞུང་མང་དུ་དོགས་ནས་མ་བྲིས་སོ། །དེ་ལྟར་ན་རྣམ་དབྱེ་ཚིག་ཕྲད་དང་བཅས་པའི་འཇུག་པ་བཤད་ཟིན་ཏོ། །གཉིས་པ་ཚིགས་བཅད་འགྲོལ་བའི་མན་ངག་འཆད་པའི་ཕྱིར།ཚིགས་སུ་བཅད་པའི་སྦྱོར་བ་རྣམས། །ཅུང་ཟད་བསྡུས་པ་ཡོད་ན་ཡང་། །དེ་ནི་དེ་བཞིན་སྦྱར་བར་བྱ། །ཞེས་གསུངས་ཏེ། མདོ་རྒྱུད་བསྟན་བཅོས་རྣམས་སུ་ལྷུག་པ་ལས།ཚིགས་བཅད་བསྡུ་ཆེ་བ་ཡིན་པས། དེ་ལྟར་བསྡུ་ཆེ་བའི་ཚིགས་སུ་བཅད་པའི་སྦྱོར་བ་རྣམས་ཀྱི་བར་སྐབས་ཀྱི་རྣམ་དབྱེ་ཚིག་ཕྲད་སོགས་མང་པོ་བསྡུས་པ་ལྟ་ཅི་སྨོས་ཏེ། ཅུང་ཟད་ཙམ་བསྡུས་པ་ཡོད་ན་ཡང་། གང་བསྡུས་པའི་རྣམ་དབྱེ་ཕྲད་ལ་སོགས་པ་དེ་ནི། ཚིག་དང་མིང་སྔ་ཕྱིའི་དོན་གྱི་སྐབས་ལ་ལེགས་པར་བརྟགས་ཏེ། རང་རང་གི་འཇུག་པ་གོང་དུ་བཤད་པ་དེ་བཞིན་དུ་སྦྱར་ནས་དོན་མ་འཁྲུལ་བར་འགྲོལ་བར་བྱའོ། །ཞེས་པའོ། །འདིར་མཁས་པ་གཞན་དག་གིས། ལོ་ཙྪ་པ་ལ་གདམས་ཚུལ་དང་། བསྟན་བཅོས་འདི་ཀའི་ཚིགས་བཅད་འགྲོལ་ལུགས་སུ་བཤད་ཀྱང་གཞུང་དོན་དང་ཉེ་བར་མ་མཐོང་ངོ་། །གསུམ་པ་མཇུག་གི་དོན་ལ། རྗེས་འཇུག་གི་སྦྱོར་བ་ལ་བསླབ་དགོས་པའི་རྒྱུ་མཚན་བསྟན་པ་དང་། དེ་ལྟར་མཁས་པར་བསླབས་ནས་ཇི་ལྟར་བྱ་བ་དང་། མཁས་པར་བྱ་བའི་ཐབས་བསྟན་པ་དང་། སླར་ཡང་དོན་བསྡུས་ཏེ་གདམས་པ་དང་། གཞུང་འདི་ཉིད་འདོམས་པ་དང་མི་འདོམས་པའི་ཡུལ་ངོས་བཟུང་བ་དང་ལྔའོ། །དང་པོ་༼རྗེས་འཇུག་གི་སྦྱོར་བ་ལ་བསླབ་དགོས་པའི་རྒྱུ་མཚན་བསྟན་པ་༽ནི།རྗེས་འཇུག་གི་སྦྱོར་བ་ལ་མཁས་པར་བསླབ་དགོས་ཏེ། ལུང་གིས་དོན་སྟོན་པ་ལ་རྗེས་འཇུག་གི་སྦྱོར་བ་མེད་དུ་མི་རུང་ཞིང་། དེ་ཤེས་པ་ལ་དགོས་པ་ཁྱད་པར་ཅན་ཡོད་པའི་ཕྱིར་རོ། །དེ་ལ་རྒྱུ་མཚན་དེ་ལྟར་མེད་དུ་མི་རུང་བ་ཇི་ལྟར་ཡིན་ཞེ་ན། དེ་སྟོན་པའི་ཕྱིར།སྔོན་འཇུག་ཡོད་དམ་མེད་ཀྱང་རུང་། །མིང་གཞིའི་ཡི་གེ་གང་ཡིན་ལ། །ཉིས་སྦྲེལ་ཡོད་དམ་སུམ་སྦྲེལ་ཡོད། །ཨཱ་ལི་བཞི་ལས་གང་ལྡན་ཡང་། །རྗེས་འཇུག་བཅུ་པོ་མ་ཞུགས་ན། །མིང་གཞན་སྦྱོར་བ་ཡོད་མི་སྲིད། །ཅེས་གསུངས་སོ། །དེ་ཡང་སྔོན་འཇུག་ཡི་གེ་ལྔ་པོ་ཡོད་དམ་མེད་ཀྱང་རུང་སྟེ། དེ་ལྔ་པོ་ཡོད་མེད་ལ་མ་ལྟོས་པར་མིང་གཞི། ཀ་ལ་སོགས་པ་སུམ་ཅུ་ལ། ཉིས་སྦྲེལ་སྒྲ་ལྟ་བུ་ཡོད་དམ། སུམ་སྦྲེལ་སྒྲ་ལྟ་བུ་ཡོད་པ་དང་། དེ་ལ་ཨཱ་ལི་སྟེ་དབྱངས་བཞི་ལས་གང་ཡང་རུང་བ་དང་ལྡན་པ། སྒི། སྒུ། སྒེ། སྒོ་ལྟ་བུ་དང་། སྒྲི། སྒྲུ། སྒྲེ། སྒྲོ་ལྟ་བུ་བྱུང་ན་ཡང་། རྗེས་འཇུག་གི་ཡི་གེ་བཅུ་པོ་གང་རུང་མ་ཞུགས་ན། མིང་གཞན་དང་སྦྱར་ནས་དོན་སྟོན་པ་མི་སྲིད་པས།དེ་གང་རུང་ཞུགས་པ་ལས་གཞན་པའི་མིང་གི་སྦྱོར་བ་ནི། བོད་སྐད་ཀྱི་གསུང་རབ་ལ་ཡོད་པ་མི་སྲིད་དོ་ཞེས་པ་སྟེ། འདིའི་མིང་གཞི་ནི། སྔར་བཤད་པའི་སྔོན་རྗེས་སུ་མི་འཇུག་པའི་མིང་གཞི་ཁོ་ན་མ་ཡིན་གྱི། གང་གིས་མིང་གཞི་སྔོན་གསུངས་པ། ཞེས་པས་བསྟན་པ་ལྟར། གསལ་བྱེད་ལ་མིང་གཞིར་བཤད་པ་དེའོ། །ཉིས་སྦྲེལ་དང་སུམ་སྦྲེལ་ཡང་གོང་ལྟར་བརྩེགས་པ་མགོ་འདོགས་ཡོད་པ་ལ་གོ་བར་བྱ་ཡི། ཚེག་བར་གཅིག་ལ་སྔོན་རྗེས་ཡོད་པ་ལྟ་བུ་ལ་མི་བྱ་སྟེ། སྔོན་འཇུག་ཡོད་དམ་མེད་ཀྱང་རུང་། ཞེས་སྔོན་འཇུག་ལ་མ་ལྟོས་བར་བཤད་ཅིང་། རྗེས་འཇུག་བཅུ་པོ་མ་ཞུགས་ན། ཞེས་བཤད་པའི་ཕྱིར་རོ། །དེས་ན་རྣམ་གླིང་པ་དང་། མཁས་པ་གཞན་གྱིས་མིང་གཞིའི་ཡི་གེ་ཉི་ཤུ་པོ་གང་རུང་གི་མཐའ་ཅན་གྱི་སུམ་སྦྲེལ་ཞེས་པ་དང་། མིང་གཞིའི་ཡི་གེ་ཉིས་སྦྲེལ་སོགས་བཤད་པ་ནི་གཞུང་དོན་ལས་འཁྱམས་སོ། །གོང་གི་རྒྱུ་མཚན་ཕྱི་མ་སྟོན་པའི་ཕྱིར།རྗེས་འཇུག་བཅུ་པོའ་ིདོན་ཤེས་ན། །འབྲི་དང་ཀློག་དང་འཆད་རྣམས་ཀྱི། །མཚམས་སྦྱོར་སྒྲ་ལ་ཐོགས་མེད་ཅིང་། །འབྲེལ་བར་སྨྲ་བའི་མཆོག་ཏུ་འགྱུར། །གཞན་ཡང་རྗེས་འཇུག་ཤེས་པ་ཡིས། །དོན་གྱི་སྦྱོར་བ་མ་མཐོང་ཡང་། །དོན་དང་མཐུན་པའི་སྦྱོར་བ་ཤེས། །ཞེས་གསུངས་ཏེ། རྗེས་འཇུག་བཅུ་པོའ་ིདོན་ཤེས་པ་ལ་དགོས་པ་ཁྱད་པར་ཅན་ཡོད་དེ། རྗེས་འཇུག་བཅུ་པོ་དངོས་དང་། དེའི་རྣམ་འགྱུར་ལས་བྱུང་བའི་རྣམ་དབྱེ་ཕྲད་དང་བཅས་པའི་འཇུག་ཚུལ། དོན་གང་ལ་ཚུལ་ཇི་ལྟར་དགོས་པ་ཅིའི་ཕྱིར་འཇུག་པ་རྣམས་ཤེས་ན། མདོ་རྒྱུད་བསྟན་བཅོས་རྣམས་ཡི་གེར་འབྲི་བ་དང་། བྲིས་ཟིན་ཀློག་པ་དང་། དེའི་དོན་གཞན་ལ་འཆད་པ་དང་། དེས་མཚོན་ནས་རྩོམ་པ་དང་། རྩོད་པ་ལ་སོགས་པ་རྣམས་ཀྱི་ཚེ། མིང་ཚིག་སྔ་ཕྱི་འདྲེན་ལུགས་ལ་མཁས་པའི་དབང་གིས་རྗོད་བྱེད་མིང་ཚིག་སྔ་ཕྱིའི་མཚམས་སྦྱོར་བའི་སྒྲ་ལ་ཐོགས་པ་མེད་ཅིང་། དེར་མ་ཟད་བརྗོད་བྱ་དོན་གྱི་ངོ་བོ་དང་། ཁྱད་པར་ལ་སོགས་པ་སྔ་ཕྱི་མི་འགལ་བར་སྟོན་ཅིང་གཞན་ལ་གོ་བ་བདེ་བླག་ཏུ་སྟེར་ནུས་པས་འབྲེལ་བར་སྨྲ་བའི་མཆོག་ཏུ་འགྱུར་རོ། །དགོས་པ་གཞན་ཡང་། རྗེས་འཇུག་གི་འཇུག་ཚུལ་ཤེས་པ་ཡིས་ཏེ་ཤེས་པ་ལ་བརྟེན་ནས། གཞུང་དོན་ལེགས་པར་འབྱེད་པའི་འགྲེལ་བའི་སྦྱོར་བ་སྔར་བྱས་པ་མ་མཐོང་ཡང་། སྔར་བྱས་པས་འགྲེལ་བའི་སྦྱོར་ལུགས་སམ། དགོངས་པ་འགྲེལ་ལུགས་ཀྱི་དོན་དང་མཐུན་པའི་འགྲེལ་བའི་སྦྱོར་བ་རང་ཉིད་ཀྱིས་བྱེད་ཤེས་སོ། །གཉིས་པ་༼དེ་ལྟར་མཁས་པར་བསླབས་ནས་ཇི་ལྟར་བྱ་བ་༽ནི།འོ་ན། དེ་ལྟར་རྗེས་འཇུག་གི་སྦྱོར་བ་ལ་མཁས་པར་སྦྱངས་ནས་ཇི་ལྟར་བྱ་ཞེ་ན། དེ་སྟོན་པའི་ཕྱིར།རྗེས་འཇུག་སྦྱོར་བ་མཁས་པ་ན། །ལུང་གི་དོན་དང་སྦྱོར་བ་དང་། །བླ་མའི་མན་ངག་གསུམ་སྦྱར་ནས། །དོན་གྱི་ཐོག་ཏུ་དབབ་པར་བྱ། །ཞེས་གསུངས་ཏེ། དེ་ལྟར་རྗེས་འཇུག་གི་སྦྱོར་བ་མཁས་པར་ཤེས་པ་ན། གང་ཤེས་པའི་རྗེས་འཇུག་གི་སྦྱོར་བ་རྣམ་དབྱེ་ཕྲད་ལ་སོགས་པ་དེ་ཉིད་ལུང་གི་དོན་དང་སྦྱོར་བ་སྟེ་སྡེ་སྣོད་གསུམ་གྱིས་བསྡུས་པའི་ལུང་གི་དོན་གཏན་ལ་འབེབས་པའི་ཆེད་དུ་སྦྱོར་བའོ། །སྦྱོར་ཚུལ་ཡང་རྣམ་དབྱེ་ཚིག་ཕྲད་ལ་སོགས་པ་རྣམས་ཀྱི་ལུང་གི་ཚིག་དོན་སྔ་ཕྱི་འདྲེན་ཅིང་སྡུད་པ་དང་སྦྱོར་བ་ལ་སོགས་པའི་འཇུག་པ་མ་ནོར་བའི་སྒོ་ནས། དོན་གྱི་ངོ་བོ་དང་ཁྱད་པར་ལ་དཔྱོད་པའོ། །དེ་ཡང་དགོས་པའི་དབང་གིས་ལུང་གི་ཚིག་དོན་གབ་པ་དང་། དཀྲུགས་པ་ལ་སོགས་པ་ཡོད་པར་མ་ཟད། དགོངས་པ་མཆོག་ཏུ་ཟབ་ཅིང་ཕྲ་བས། རང་སྟོབས་ཀྱིས་ཞུགས་ཀྱང་དགོས་པ་བསྒྲུབ་མི་ནུས་པས་ན། བརྒྱུད་པ་མ་ཉམས་པའི་བླ་མའི་མན་ངག་ཀྱང་ངེས་པར་དགོས་སོ།།དེ་ལྟར་རྗེས་འཇུག་གི་སྦྱོར་བ་ལ་མཁས་པ་དང་། དེ་ལུང་དོན་དང་སྦྱོར་བ་དང་། བླ་མ་དམ་པའི་མན་ངག་སྟེ། དེ་གསུམ་སྦྱར་ནས་ཏེ་དེ་གསུམ་སྦྲེལ་ནས། རང་གིས་ཉམས་སུ་ལེན་རྒྱུའི་དོན་མ་ནོར་བ་དེའི་ཐོག་ཏུ་དབབ་ཅིང་བསྒྲིལ་བར་བྱའོ། །གསུམ་པ་༼མཁས་པར་བྱ་བའི་ཐབས་བསྟན་པ་༽ནི།རྗེས་འཇུག་གི་སྦྱོར་བ་ལ་མཁས་པར་བྱ་དགོས་ན། དེ་ལྟར་མཁས་པར་བྱེད་པའི་ཐབས་ཀྱི་རིམ་པ་གང་ཞེ་ན། དེ་ལ་དང་པོར་བསླབ་པའི་རིམ་པ་བསྟན་པའི་ཕྱིར།བསླབ་ལ་བརྩོན་པའི་གང་ཟག་གིས། །དང་པོར་ང་རོ་རྣམས་ལ་སྦྱང་། །སྔོན་འཇུག་མིང་གཞི་རྗེས་འཇུག་རྣམས། །ཀློག་གི་ཆེད་དུ་བསླབ་པ་ཡིན། །རྗེས་འཇུག་བཞི་ཡི་སྦྱོར་བ་ནི། །ཉན་བསམ་བསྟན་པའི་ཆེད་དུ་སྦྱང་། །ཡན་ལག་དེ་དག་མཐུ་ཡིས་ནི། །འབྲས་བུའི་ཆེད་དུ་གཏན་ལ་དབབ། །ཅེས་གསུངས་ཏེ། འབྲས་བུ་ཆེན་པོ་དོན་དུ་གཉེར་ཞིང་དེའི་རྒྱུ་བསླབ་པ་གསུམ་དང་དེ་སྟོན་པའི་སྡེ་སྣོད་གསུམ་ལ་སོགས་པ། བསླབ་བྱའི་གནས་ལ་སློབ་པར་བརྩོན་པའི་གང་ཟག་དེ་དག་གིས། བསླབ་པར་བྱ་བའི་རིམ་པ་ནི་འདི་ཡིན་ཏེ། དུས་དང་པོར་ཀ་ལ་སོགས་པའི་ཡི་གེ་རེ་རེའི་གདངས་ཀྱི་ང་རོ་རྣམས་ལ་རང་རང་གི་སྐྱེ་གནས་ལས་ཇི་ལྟར་འབྱུང་བ་ལྟར། སྒྲ་དམན་ལྷག་དང་བྲལ་བར་སྦྱང་བར་བྱའོ། །དེ་ལྟར་བྱང་བ་ན། དེ་ནས་སྔོན་འཇུག་མིང་གཞི་རྗེས་འཇུག་གསུམ་སྦྱར་ཏེ། ཚེག་ཁྱིམ་གཅིག་གི་ཡི་གེ་རྣམས་སྦྲེལ་བའི་སྒྲའི་རྣམ་པ་མ་ཉམས་པར་བཀླག་པར་བྱའོ། །དེ་ལྟར་ཡི་གེ་རེ་རེ་བ་དང།སྔོན་རྗེས་མིང་གཞི་སྦྱར་བའི་ཀློག་ཚུལ་དེ་ཡང་། ཀློག་གི་སྒྲ་འབྱོར་ཞིང་མ་ཉམས་པའི་ཆེད་དུ་བསླབ་པ་ཡིན་ནོ། །དེ་ལྟར་ཀློག་དག་ཅིང་ལེགས་པར་གྱུར་པ་ན། རྟགས་འཇུག་ནས་འབྱུང་བ་ལྟར། རྗེས་འཇུག་གང་གིས་གཞི་གང་ལ་ཚུལ་ཇི་ལྟར་དགོས་པ་ཅིའི་ཕྱིར་འཇུག་པ་བཞིའི་སྦྱོར་བ་ལ་བསླབ་སྟེ། དེ་ནས་བླ་མ་ལས་ཆོས་ཉན་པ་དང་། རང་ཉིད་ཀྱིས་དོན་བསམ་པ་དང་། གཞན་ལ་བསྟན་པའི་ཆེད་དུ་སྦྱང་བར་བྱའོ། །དེ་ལྟར་གནས་སྐབས་ཀྱི་དགོས་པ་ཀློག་པ་དང་། ཉན་བསམ་ལ་སོགས་པ་ལ་མཁས་པ་དང་། དེའི་ཆེད་དུ་ཡི་གེའི་སྐྱེ་གནས་ནས་བཟུང།རྗེས་འཇུག་གི་འཇུག་ཚུལ་བཞིའི་བར་ལ་སྦྱངས་པའི་ཐབས་སམ་རྒྱུའི་ཡན་ལག་དེ་དག་གི་མཐུ་ཡིས་ནི་སྟེ། དེ་དག་ལ་བརྟེན་ནས། གང་གཏན་ལ་འབེབས་ན་ཐམས་ཅད་མཁྱེན་པར་བགྲོད་པའི་ལམ་འབྲས་བུ་དང་བཅས་པ་སྟོན་པའི་གསུང་རབ་ཀྱི་དོན་གཏན་ལ་འབེབས་པ་ཡིན་ལ། དེ་གང་གི་ཆེད་དུ་གཏན་ལ་འབེབས་ན། འབྲས་བུ་ཐམས་ཅད་མཁྱེན་པ་ཉིད་འཐོབ་པའི་ཆེད་དུ་འབེབས་པ་ཡིན་ནོ། །སྐབས་འདིར་མཁས་པའི་བཞེད་པ་མི་མཐུན་པ་མང་ཡང་། བཤད་མ་ཐག་པའི་འཆད་ཚུལ་ཉིད་གཞུང་གི་དོན་ཡིན་པར་གཞུང་གི་ཚིག་ཉིད་ལ་བརྟགས་པས་ཤེས་སོ། །འོ་ན། རིམ་པ་དེ་ལྟར་དུ་བསླབ་པའི་ཕན་ཡོན་གང་ཞེ་ན། དེ་བསྟན་པའི་ཕྱིར།བསླབ་པའི་རིམ་པ་འདི་ཡིས་ནི། །གང་ཞིག་འབད་པ་ཆུང་ངུས་ཀྱང་། །ཤེས་རབ་མྱུར་དུ་གྲོལ་བར་འགྱུར། །ཞེས་གསུངས་ཏེ། བསླབ་པའི་རིམ་པ་འདི་ཡིས་ནི་སྟེ། གོ་རིམ་བཤད་མ་ཐག་པ་ལྟར་བྱས་པ་དེ་ལ་བརྟེན་ནས་ནི། གང་ཟག་གང་ཞིག་འབད་པ་ཆེན་པོས་འཇུག་པ་ལྟ་ཅི་སྨོས་ཏེ། འབད་པ་ཆུང་ངུས་ཞུགས་པར་གྱུར་ཀྱང་། དེའི་ཆོས་རབ་ཏུ་རྣམ་པར་འབྱེད་པའི་ཤེས་རབ་མྱུར་དུ་གྲོལ་བ་སྟེ། ཤེས་རབ་ཀྱི་སྒོ་ཚོགས་ཆུང་ངུས་མྱུར་དུ་དབྱེ་ཞིང་ཡངས་པ་ཉིད་ཐོབ་པར་འགྱུར་རོ། །བཞི་པ་སླར་ཡང་དོན་བསྡུས་ཏེ་གདམས་པ་ནི།དེ་ཕྱིར་དང་པོར་འདི་ཉིད་བསླབ། །དེ་ནས་རྒྱས་པའང་མཉན་བྱས་ནས། །བསླབ་པ་གང་ལ་དད་པ་ཡི། །གཞུང་ཉིད་བླ་མ་རྣམས་ལས་མཉན། །ཞེས་གསུངས་ཏེ། བསླབ་རིམ་དེ་ལྟར་བྱས་པས་ཤེས་རབ་ཡངས་པའི་མཁས་པ་འཐོབ་པ་དེའི་ཕྱིར། དུས་དང་པོར་བསླབ་རིམ་དེ་དག་གི་གཞིར་གྱུར་པའི་གཞུང་འདི་ཉིད་ལ་བསླབ་པར་བྱ་ཞིང་། དེའི་དོན་ཁོང་དུ་ཆུད་པ་ན།དེ་ནས་བརྡ་སྤྲོད་པའི་གཞུང་ལུགས་རྒྱས་པ་ཀ་ཙན་༼ཀ་ལཱ་པ་དང་ཙན་དྲ་པའི་བསྡུས་མིང་༽ལ་སོགས་པའང་མཉན་པར་བྱའོ། །དེའི་དོན་རྟོགས་པར་བྱས་ནས། རང་ཉིད་ཐེག་པ་གསུམ་གྱི་བསླབ་བྱའི་གནས་ཀྱི་གཙོ་བོ་ཚུལ་ཁྲིམས་ལ་སོགས་པ་གསུམ་པོ་གང་ལ་དད་པ་དེ་སྟོན་པའི་གཞུང་ཉིད་བླ་མ་མཁས་པ་རྣམས་ལས་མཉན་པར་བྱས་ཏེ། གཞུང་འདི་ཉིད་བླ་མའི་མན་ངག་ལ་བརྟེན་ནས། རང་ཉིད་ལ་ཕན་པའི་བླང་དོར་སྟོན་པའི་གདམས་པ་མཆོག་ཏུ་རྟོགས་པར་བྱས་ལ་ཉམས་སུ་ལེན་པའོ། །ལྔ་པ་གཞུང་འདི་ཉིད་འདོམས་པ་དང་མི་འདོམས་པའི་ཡུལ་གྱི་གང་ཟག་ངོས་བཟུང་བ་དེ་ཉིད་བསྟན་པར་བྱ་བའི་ཕྱིར།སློབ་དཔོན་དེ་ཉིད་དུ་འཛིན་ཅིང་། །ལེ་ལོ་གཡེང་བ་རྣམ་པར་སྤངས། །ཟོ་བཟང་དད་པ་ལ་བརྟེན་པ། །སྐྱེས་བུ་དེས་ནི་མྱུར་རྟོགས་ཏེ། །དེ་ལ་དུས་སུ་འདོམས་པར་བྱ། །ཅིག་ཤོས་དེ་ལས་ལྡོག་པའོ། །ཞེས་གསུངས་ཏེ། འདི་ལྟ་བུ་སྟོན་པའི་སྣོད་རུང་གི་སློབ་མ་ཕུན་སུམ་ཚོགས་པ་ལ། སྣོད་ཀྱི་ཡོན་ཏན་འདི་ལྟ་བུ་དགོས་ཏེ། སློབ་དཔོན་དེ་ལ་སློབ་དཔོན་ཉིད་དུ་འཛིན་པའི་གུས་པ་དང་བཅས་པའི་སྒོ་ནས། བསྟེན་ཚུལ་ཕྱིན་ཅི་མ་ལོག་པ་ཡོད་ཅིང་། སྙོམ་ལས་དང་སྒྱིད་ལུག་གི་ལེ་ལོ་དང་། བྱ་བ་ངན་ཞེན་གྱི་གཡེང་བ་རྣམ་པར་སྤངས་པ་དང་། ཟོ་ནི་ཁམས་སམ་རང་བཞིན་གྱི་དོན་ཡིན་པས་རང་བཞིན་བཟང་པོ་དྲང་ཞིང་བསམ་པ་དགེ་བ་དང་། ལས་འབྲས་དང་དཀོན་མཆོག་སོགས་སྤྱི་དང་། ཁྱད་པར་བསླབ་བྱའི་གནས་ལ་གུས་པའི་དད་པ་ལ་བརྟེན་པ་རྣམས་དང་ལྡན་དགོས་སོ། །ཡོན་ཏན་དེ་དག་དང་ལྡན་པས་སྐྱེས་བུ་དེས་ནི་གཞུང་དོན་མྱུར་དུ་རྟོགས་པར་འགྱུར་ཏེ། དེ་འདྲའི་སྐྱེས་བུ་དེ་ལ་དུས་སུ་བབ་ཅིང་། བློ་འདུན་པའི་ཚེ་འདོམས་པར་བྱའོ།།ཅིག་ཤོས་ནི། སྣོད་ལྡན་དེ་ཡི་ཅིག་ཤོས་ཏེ། སློབ་དཔོན་ལ་མི་གུས་ཤིང་ལེ་ལོ་ཅན་དང་། གཡེང་བ་ཅན། རང་བཞིན་ངན་པ། བསླབ་པ་ལ་མི་དད་པའི་སྐྱེས་བུ་དེའོ། །དེ་ལས་ལྡོག་པ་ནི་འདོམས་པ་ལས་ལྡོག་པ་སྟེ། མི་འདོམས་པའོ། །དེ་ལྟར་སྣོད་མིན་གྱི་གང་ཟག་དེ་ལྟ་བུ་ལ་འདོམས་པར་མི་བྱ། ཞེས་པའོ། །འདི་དག་ལ་གཞན་དག་གི་བཤད་པ་སྨོས་ཤིང་མ་འབྲེལ་བ་མཐའ་ཡས་ཀྱང་། གཞུང་དངོས་གཞིའི་སྐབས་དོན་གྱི་དཔྱད་པ་ལ་མཁོ་བ་རྣམས་ལ་དགག་སྒྲུབ་ཅུང་ཟད་རེ་བྱས་ཤིང་། ཧ་ཅང་མཚང་མི་ཆེ་བ་དུ་མ་ཞིག་ནི་ཕ་རོལ་པོ་བསམ་པ་ངན་པས་དམའ་ཕབ་པ་ལྟ་བུར་གོ་དོགས་ཀྱིས་དགག་བྱ་དང་བཅས་གསལ་ཁ་མ་བྱས་ཤིང་། མཇུག་གི་སྐབས་སུ་ནི་ཚིག་དོན་བཀྲོལ་བ་ཙམ་ལས། གཞུང་དངོས་ཀྱི་དོན་གཙོ་ཆེ་བ་གལ་པོ་ཆེར་བཤད་ཕྱིན། དེ་ཙམ་དུ་གལ་མི་ཆེ་བར་གོ་ནས་རྒྱས་པར་མ་སྤྲོས་སོ། །འགྲེལ་པ་བསྟན་པའི་སྒྲོན་མེར། བྱཱ་ཀ་ར་ཎའི་རྩ་བ་བརྒྱད་པ་ལས་ཀུན་ཏུ་བཟང་པོའ་ིབྱཱ་ཀ་ར་ཎ་དང་པོའ་ིསྐབས་ཏེ་ལྔ་པའོ། །ཞེས་གསུངས་པ་ལྟར་ན། ཐུ་མིས་མཛད་པའི་བརྡའ་སྤྲོད་པའི་བསྟན་བཅོས་ཀྱི་རྩ་བ་ཆེན་པོ་བརྒྱད་ཡོད་པའི་ནང་ནས། རྩ་བ་དང་པོའ་ིནང་གི་སྐབས་སམ་ལེའུ་ལྔ་པ་ནི་བསྟན་བཅོས་འདི་ཡིན་པར་བཞེད་འདུག་པ་ལ། རྣམ་གླིང་པས། འགྲེལ་བ་འདི་ལྟར་ན་འདི་ཉིད་བསྟན་བཅོས་བརྒྱད་ཀྱི་ལྔ་པ་ཡིན་པར་མངོན། ཞེས་མ་བརྟགས་པ་ཁོ་ནར་གསུང་ངོ་། །དེ་ལྟར་ལུང་སྟོན་པ་སུམ་ཅུ་པའི་ཚིག་དོན་རེ་ཞིག་བཤད་ཟིན་ཏོ། །སྨྲས་པ།གངས་ཅན་བརྡའ་དག་སྙིང་པོའ་ིགངྒཱ་མ། །རྣམ་དཔྱོད་རལ་པའི་ཀློང་དུ་སིམ་གྱུར་པ། །སླར་ཡང་བློ་གསལ་སྐལ་ལྡན་ཤིང་རྟའི་ཆེད། །རྣམ་དག་རིག་པའི་སྤར་མོས་མངོན་པར་བཙིར། །འགལ་འཁྲུལ་ར་རིའི་དྲི་མ་ཀུན་བཀྲུས་ཏེ། །རྒྱལ་བསྟན་རྒྱ་མཚོའི་འཇུག་ངོགས་གསལ་བྱེད་ཅིང་། །སྔོན་མེད་དགོངས་དོན་བདུད་རྩི་འབུམ་འཛག་པས། །སྔོན་དུ་གྲགས་པའི་གངྒཱ་འདི་མ་ཡིན། །ཨེ་མ་སྔོན་བྱོན་བསིལ་ལྡན་མཁས་རྣམས་ཀྱིས། །རྒྱལ་བསྟན་རྩ་བ་བརྡའ་སྤྲོད་གཞུང་ལུགས་འདིིའི། །མཐར་ཐུག་དགོངས་པའི་དཀའ་གནས་ནོར་བུའི་ཚོགས། །ཁོ་བོའ་ིབགོ་སྐལ་ཉིད་དུ་བཞག་གམ་སྙམ། །གྲངས་མེད་དཔའ་བོའ་ིདཔུང་དང་མི་ལྡན་ཞིང་། །སྟོང་གསུམ་དབང་ཕྱུག་ཐོབ་པར་མ་གྱུར་པར། །སྲིད་གསུམ་ནོར་གྱིས་མི་མཉམ་དགོངས་པ་དངོས། །རྙེད་འདི་ཁོ་བོའ་ིབསོད་ནམས་ཨེ་མ་མཚར། །ཞེས་པ་འདི་ཡང་བདག་གི་མཁན་རིན་པོ་ཆེ་བློ་བཟང་སྦྱིན་པའི་ཞལ་སྔ་ནས་དང་། གཞན་ཡང་དོན་གཉེར་ཅན་དུ་མས་ནན་གྱིས་བསྐུལ་བ་ལ་བརྟེན་ནས་དཀའ་བཅུའི་མིང་ཅན་རཏྣ་ཨརྠ་སི་དྡྷིས་བགྱིས་པའོ། །། །འཇམ་དབྱངས་ཐོན་མིའི་བཞེད་གཞུང་རིན་ཆེན་ནོར། །སྔོན་མེད་དགོངས་འགྲེལ་རྒྱལ་མཚན་རྩེར་བཀོད་ནས། །དགེ་ལེགས་འདོད་རྒུའི་ཆར་གྱིས་རང་གཞན་དོན། །ལྷུན་གྲུབ་ལྔ་རིག་སྨྲ་བ་དེ་བསྔགས་འོས། །ཆོས་སྦྱིན་ཟད་མི་ཤེས་པ་སྤེལ་བའི་སླད། །གཞུང་བཟང་པར་དུ་བསྐྲུན་པའི་ལེགས་བྱས་མཐུས། །ཕན་བདེའི་འབྱུང་གནས་རྒྱལ་བསྟན་བཤད་སྒྲུབ་ཀྱི། །སྲོལ་བཟང་ནམ་ཡང་མི་ཉམས་གོང་འཕེལ་ཤོག།རིས་བྲལ་བློ་གསལ་ངང་མོའ་ིཚོགས་རྣམས་ཀྱང་། །ལུང་རིགས་འདབ་ཟུང་བསྐྱོད་པའི་ཟློས་གར་གྱིས། །ཐུབ་བསྟན་དྭངས་བསིལ་མངར་བའི་མཚོ་གླིང་དུ། །ལེགས་བཤད་དབྱངས་སྙན་ངོམས་མེད་སྒྲོག་གྱུར་ཅིག།ཅེས་པཎྜི་ཏ་ཆེན་པོ་པྲ་ཏི་དགེ་བཤེས་རིན་ཆེན་དོན་གྲུབ་ཀྱིས་མཛད་པའི་སུམ་ཅུ་པའི་དགོངས་འགྲེལ་འདི་ཉིད་འགྲེལ་བ་གཞན་ལས་ཁྱད་པར་དུ་འཕགས་པར་ཀུན་མཁྱེན་འཇིགས་མེད་དབང་པོ་སོགས་སྔོན་དུས་ཀྱི་མཁས་པ་དུ་མས་བཞེད་འདུག་གཤིས། རྩ་བ་དང་བརྒྱུད་པའི་བླ་མ་དམ་པ་རྣམས་ཀྱི་བཞེད་དགོངས་རྫོགས་ཕྱིར་གང་ཅིའི་ཆ་རྐྱེན་སྦྱར་ཏེ་པར་ཡིག་པ་སྔགས་འཆང་པདྨ་ཐར་དང་། ཞུས་དག་པ་གསེར་ལག་བྱ་བཏང་འཇམ་དབྱངས་རྒྱ་མཚོ། རྐོ་མཁན་སྡེ་དགེའི་བཀྲ་ཤིས་དང་བུ་རྒྱལ་རྣམས་ཀྱིས་ལྕགས་ཁྱི་ལོར་པར་དུ་བསྒྲུབས་པའི་དགེ་བསྔོའ་ིསྨོན་ཚིག་ཏུ་གྱི་ན་པ་དགེ་འདུན་བསྟན་འཛིན་རྒྱ་མཚོས་བྲིས་པའོ། །། །རྟགས་ཀྱི་འཇུག་པའི་དགོངས་འགྲེལ།༄༅། །རྒྱ་གར་སྐད་དུ། ལིངྒ་ཨ་བ་ཏཱ་ར་ན་མ། བོད་སྐད་དུ། རྟགས་ཀྱི་འཇུག་པ་ཞེས་བྱ་བ། སྨྲ་བའི་དབང་ཕྱུག་ལ་ཕྱག་འཚལ་ལོ། །སྨྲ་བའི་སྐྱེས་མཆོག་སྨྲ་བའི་རྒྱལ། །ཐམས་ཅད་མཁྱེན་ལ་ཕྱག་འཚལ་ལོ། །ཕོ་ཡི་ཡི་གེ་འབའ་ཞིག་ལ། །སྡེ་བ་ཕྱེད་དང་བརྒྱད་གནས་པའང་། །སྡེ་ཚན་ལྔ་རུ་དྲིལ་བྱས་ཏེ། །ཡི་གེ་སུམ་ཅུ་ཐམ་པ་ལ། །ཕོ་དང་མ་ནིང་མོ་དང་ནི། །ཤིན་ཏུ་མོ་དང་བཞི་བཞི་རུ། །སྡེ་བ་བཞི་པ་ཡན་ཆད་དབྱེ། །ལྷག་མ་བཅུ་བཞི་གནས་པ་ལ། །ཙ་སོགས་གསུམ་ནི་ཅ་སོགས་སྦྱར། །ཝ་ནི་བ་དང་སྦྱར་བར་བྱ། །ལྷག་མ་དྲུག་ནི་མོ་རུ་སྦྱར། །ཀ་ཅ་ཏ་པ་ཙ་རྣམས་ཕོ། །ཁ་ཆ་ཐ་ཕ་ཚ་མ་ནིང་། །ག་ཇ་ད་བ་ཛ་དང་ཝ། །ཞ་ཟ་འ་ཡ་ཤ་ས་རྣམས། །མོ་ཡི་ཡི་གེ་བཅུ་གཉིས་སོ། །ང་ཉ་ན་མ་ཤིན་ཏུ་མོ། །ར་ལ་ཧ་ནི་མོ་གཤམ་སྟེ། །མ་ནིང་མཚན་མེད་ཅེས་ཀྱང་བྱ། །ཤིན་ཏུ་མོ་དང་མོ་གཤམ་གཉིས། །མོ་ཡི་ནང་དུ་བསྡུས་བྱས་ཏེ།མོ་ཡི་ཡི་གེའི་ནང་ནས་ནི། །འཇུག་པའི་ཡི་གེ་བཅུ་དབྱུང་བྱ། །འཇུག་པ་བཅུ་ཡི་ནང་ནས་ནི། །སྔོན་འཇུག་ཡི་གེ་ལྔ་དབྱུང་བྱ། །འཇུག་པ་བཅུ་ཡི་ནང་ནས་ནི། །སྔོན་འཇུག་ཡི་གེ་ལྔ་དབྱུང་བྱ། །སྔོན་འཇུག་ཡི་གེ་ལྔ་པོ་ལ། །ཕོ་དང་མ་ནིང་མོ་དང་ནི། །ཤིན་ཏུ་མོ་དང་བཞི་རུ་དབྱེ། །བ་ཕོ་ག་ད་གཉིས་མ་ནིང་། །འ་མོ་མ་ནི་ཤིན་ཏུ་མོ། །དེ་དག་རེ་རེའང་བཞི་བྱེད་དེ། །གང་གིས་འཇུག་བྱེད་གང་ལ་འཇུག། །ཇི་ལྟར་འཇུག་བྱེད་ཅིའི་ཕྱིར་འཇུག། །གང་ལ་འཇུག་པར་བྱེད་ཅེ་ན། །ཕོ་ནི་ཕོ་དང་མོ་ལ་འཇུག། །མོ་ནི་མོ་དང་མ་ནིང་ལ། །མ་ནིང་ཡང་ནི་ཕོ་མོ་ལའོ། །ཤིན་ཏུ་མོ་ནི་མ་ནིང་དང་། །མོ་དང་ཤིན་ཏུ་མོ་ཉིད་ལའོ། །ཕོ་ཡིག་སྔོན་འཇུག་བ་ཡིག་ནི། །ཕོ་ཡིག་ཀ་ཅ་ཏ་ཙ་དང་། །མོ་ཡིག་ག་ད་ཞ་ཟ་ཤ། །ས་བཅས་བཅུ་ཡི་སྔོན་དུ་འཇུག། མ་ནིང་སྔོན་འཇུག་ག་ཡིག་ནི། །ཕོ་ཡིག་ཅ་ཏ་ཙ་གསུམ་དང་། །མོ་ཡི་ཡི་གེ་ཉ་ད་ན། །ཞ་ཟ་ཡ་དང་ཤ་ས་སྟེ། །བཅུ་གཅིག་ཁོ་ནའི་སྔོན་དུ་འཇུག། མ་ནིང་སྔོན་འཇུག་ད་ཡིག་ནི། །ཕོ་ཡི་ཡི་གེ་ཀ་དང་པ། །མོ་ཡིག་ག་ང་བ་མ་སྟེ། །དྲུག་པོ་ཁོ་ནའི་སྔོན་དུ་འཇུག། །མོ་ཡིག་སྔོན་འཇུག་འ་ཡིག་ནི། །མོ་ཡིག་ག་ཇ་ད་བ་ཛ། །མ་ནིང་ཁ་ཆ་ཐ་ཚ། །བཅུ་པོ་ཁོ་ནའི་སྔོན་དུ་འཇུག། །སྔོན་འཇུག་ནང་གི་ཤིན་ཏུ་མོ། །མ་ཡིག་ཅེས་བྱ་བཞི་པ་ནི། །མ་ནིང་ཁ་ཆ་ཐ་ཚ་དང་། །མོ་ཡིག་ག་ཇ་ད་ཛ་དང་། །ཤིན་ཏུ་མོ་ནི་ང་དང་ཉ། །ན་བཅས་བཅུ་གཅིག་ཁོ་ན་ལའོ། །དེ་དག་རྐྱང་འཕུལ་དབང་དུ་བྱས། །བརྩེགས་འཕུལ་བ་ཡིག་ཁོ་ནར་ངེས། །དེ་ཡང་མིང་གཞི་ང་ཉ་ན། །ཇ་དང་ཛ་བཅས་ལྔ་པོ་ནི། །ར་མགོ་བྱུང་ཚེ་ལྔ་ཀ་དང་། །ས་མགོ་ཚེ་ན་ང་དང་ཉ། །ན་བཅས་གསུམ་པོ་ཁོ་ནར་ངེས། །མི་འཇུག་པ་ནི་འདི་ལྟ་སྟེ། །ཕོ་ནི་མ་ནིང་ལ་མི་འཇུག། །མོ་ཡང་ཕོ་ལ་འཇུག་པ་མིན། །མ་ནིང་རང་ལ་རང་མི་འཇུག། །རང་གི་སྡེ་དང་ཕྲད་པ་ན། །ཕོ་ཡང་མོ་ལ་འཇུག་མི་འགྱུར། །མ་ནིང་མོ་ཡང་དེ་བཞིན་ནོ། །ཇི་ལྟར་འཇུག་པར་བྱེད་ཅེ་ན། །ཕོ་ནི་དྲག་པོའ་ིཚུལ་གྱིས་འཇུག། །མ་ནིང་རན་པར་འཇུག་པ་ཡིན། །མོ་ནི་ཞན་པའི་ཚུལ་གྱིས་ཏེ། །ཤིན་ཏུ་མོ་ནི་མཉམས་པས་སོ། །ཅིའི་ཕྱིར་འཇུག་པར་བྱེད་ཅེ་ན། །ཕོ་ནི་འདས་དང་གཞན་བསྒྲུབ་ཕྱིར། །མ་ནིང་གཉིས་ཀ་ད་ལྟར་ཆེད། །མོ་ནི་བདག་དང་མ་འོངས་ཕྱིར། །ཤིན་ཏུ་མོ་ནི་མཉམ་པས་སོ། །དེ་ཡང་དངོས་པོ་ལས་དང་ནི། །དུས་དང་རྣམ་པ་གསུམ་དུ་འདོད།།དངོས་པོ་བདག་གཞན་གཉིས་ཀ་དང་། །བྱ་བའི་ཡུལ་དང་རྣམ་པ་བཞི། །ལས་ནི་བྱ་བ་བྱེད་པ་གཉིས། །དུས་ནི་འདས་དང་མ་འོངས་དང་། །ད་ལྟར་དང་བཅས་གསུམ་དུ་འགྱུར། །བྱེད་པ་པོ་ནི་བདག་ཡིན་ཏེ། །བྱ་བའི་དངོས་པོ་གཞན་ཡིན་ནོ། །བྱ་བ་བསྒྲུབ་པའི་ཡུལ་ལ་ནི། །ལས་ཀྱི་དངོས་པོ་ཞེས་པར་བརྗོད། །བྱེད་པ་པོ་དང་འབྲེལ་བའི་ལས། །བྱེད་པའི་ལས་ཞེས་བྱ་བ་སྟེ། །བྱ་བའི་ཡུལ་དང་འབྲེལ་བའི་ལས། །བྱ་བའི་ལས་ཞེས་འདོགས་པ་ཡིན། །བྱ་བ་ཟིན་དང་བྱེད་འགྱུར་དང་། །ད་ལྟ་བྱེད་བཞིན་པ་རྣམས་ལ། །འདས་དང་མ་འོངས་ད་ལྟར་འདོད། །དུས་གསུམ་བྱ་བྱེད་བདག་གཞན་ཏེ། །ཀུན་ལ་མཉམ་པར་འཇུག་པ་ནི། །མཉམ་པར་འཇུག་པའི་དོན་ཅན་ནོ། །རྗེས་འཇུག་ཡི་གེ་བཅུ་པོ་ལ། །ཕོ་མོ་མ་ནིང་གསུམ་དུ་དབྱེ། །ས་བ་ད་གསུམ་པོ་ཡིན་ཏེ། །ག་ང་ན་མ་ལ་དང་ར། །དྲུག་པོ་མོ་ཡི་ཡི་གེར་དྲན། །འ་ཡི་ཡི་གེ་མ་ནིང་ངོ་། །ཕོ་ལ་སྐྱེས་བུ་རབ་འབྲིང་གསུམ། །ས་རབ་ད་འབྲིང་བ་ཐ་མ། །མོ་ལ་མོ་དང་ཤིན་ཏུ་མོ། །ག་ལ་ར་གསུམ་མོ་ཙམ་སྟེ། །ང་ན་མ་གསུམ་ཤིན་ཏུ་མོ། །མ་ནིང་འགྱུར་དང་མཚན་གཉིས་དང་། །མཚན་མེད་དག་དང་གསུམ་དུ་འདོད། །འ་ཡིག་ཁོ་ནའི་བྱེད་པ་ཡིན། །དེ་ཡང་བྱེད་པ་བཞི་བྱེད་དེ། །གང་ལ་འཇུག་བྱེད་གང་གིས་བྱེད། །ཇི་ལྟར་འཇུག་བྱེད་ཅིའི་ཕྱིར་བྱེད། །གང་ལ་ཡི་གེ་ཐམས་ཅད་ལ། །གང་གིས་བཅུ་པོ་དེ་དག་གིས། །ཇི་ལྟར་རྣམ་པ་གཉིས་ཡིན་ཏེ། །སྒྲ་ཡི་འཇུག་ཚུལ་དོན་གྱི་ཚུལ། །དང་པོ་སྒྲ་ཡི་འཇུག་ཚུལ་ནི། །ཕོ་གསུམ་མོ་གཉིས་མ་ནིང་གསུམ། །རིམ་བཞིན་འདོན་ཚེ་སྐད་ཀྱི་གདངས། །དྲག་ཞན་བར་མ་གསུམ་དུ་འཇུག། །ཕོ་ཡི་རྗེས་འཇུག་ནང་ནས་ནི། །དྲག་པ་གསུམ་ཉིད་ནང་ཕྲད་དམ། །མོ་ཡི་རྗེས་འཇུག་ནང་གིས་ནི། །གལ་ཏེ་ཞན་པ་ནང་ཕྲད་ན། །དྲག་ཞན་དབྱེ་བ་སྤྱིར་བྱས་པ། །དེ་ལའང་ནང་གི་ཆ་ཤས་ཀྱིས། །དྲག་པོའ་ིདྲག་པོ་དྲག་པོའ་ིའབྲིང་། །དྲག་པོའ་ིཞན་པ་གསུམ་དང་ནི།།ཞན་པའི་དྲག་པོ་ཞན་པའི་འབྲིང་། །ཞན་པའི་ཞན་པ་ལ་སོགས་ཏེ། གང་ལ་བལྟོས་པའི་ནང་གསེས་ཀྱིས། །དེ་ཡང་དྲག་ཞན་གཉིས་སུ་དབྱེ། །མ་ནིང་གསུམ་དུ་གང་གཏོགས་པ། །མ་ནིང་འ་ཡིག་གཅིག་པུ་ནི། །རང་ཉིད་གང་ལ་སྦྱར་བའི་གྲོགས། །དྲག་དང་ཕྲད་ན་དྲག་པར་འགྱུར། །ཞན་དང་ཕྲད་ན་ཞན་པར་འགྱུར། །མིང་གཞིའི་ཡི་གེ་དྲག་དང་ཞན། །གཉིས་ཀ་དག་དང་ཕྲད་གྱུར་ན། །རྗེས་འཇུག་མ་ནིང་ཡི་གེ་འ། །དེ་ནི་གཉིས་ཀ་ཅན་དུ་འགྱུར། །མིང་གཞིའི་ཡི་གེ་དྲག་དང་ཞན། །གཉིས་ཀ་དག་དང་མ་ཕྲད་ན། །རྗེས་འཇུག་འ་དེ་དྲག་ཞན་གཉིས། །གང་དུ་ཡང་ནི་མི་འགྱུར་རོ། །གྲོགས་ཀྱི་དབྱེ་བས་ཕྱེ་བའི་ཚུལ། །དེས་ན་འགྱུར་དང་མཚན་གཉིས་དང་། །མཚན་མེད་མ་ནིང་གསུམ་དུ་འདོད། །ཕོ་དང་མོ་ནི་རྗེས་འཇུག་གི། སྟོབས་ལས་མིང་གཞི་འགྱུར་བ་སྟེ། །མ་ནིང་ཡི་གེ་གཅིག་པུ་ཉིད། །མིང་གཞིའི་སྟོབས་ཀྱིས་འགྱུར་བ་ཡིན། །དེ་ནི་སྒྲ་ཡི་འཇུག་ཚུལ་ལོ། །སྒྲ་དོན་གཉིས་ཀྱི་འཇུག་ཚུལ་ལས། །དོན་ནི་རྣམ་པ་གཉིས་ཡིན་ཏེ། །རང་ཉིད་གང་ལ་འཇུག་པའི་དོན། །སྔ་མ་གང་ལྟར་གྱུར་པ་དང་། །ཞུགས་པའི་རྗེས་སུ་འདྲེན་རྒྱུའི་དོན། །ཕྱི་མ་གང་ལྟར་འགྱུར་བའོ། །དོན་གྱི་འཇུག་ཚུལ་དེ་གཉིས་ལས། །སྔ་མ་སྔོན་འཇུག་ལྔ་བཞིན་སྦྱར། །ཕོ་ནི་འདས་དང་གཞན་བསྒྲུབ་ཕྱིར། །ཞེས་སོགས་སྔར་བཤད་ཇི་བཞིན་ནོ། །དོན་གྱི་འཇུག་ཚུལ་གཉིས་པོ་ལས། །ཕྱི་མ་དག་གི་འདྲེན་ཚུལ་ནི། །མིང་གཅིག་ཉིད་ལ་ངོ་བོ་ཡི། །ཁྱད་པར་རྫོགས་པའི་མཐའ་འདྲེན་ཚུལ། །རྗེས་སུ་འཇུག་པའི་ཡི་གེ་ནི། །ཕོ་ཡིས་ཕོ་ཡི་མིང་མཐའ་དྲངས། །ཐུགས་ཀ་ཐད་ཀ་ཐབ་ཀ་བཞིན། །མོ་ཡིས་མོ་ཡི་མིང་མཐའ་དྲངས། །སྙིང་ག་དབྲལ་བ་ལ་སོགས་བཞིན། །མ་ནིང་གིས་ནི་མ་ནིང་ངོ་། །སྐྱེ་ཁ་མ་དང་འདའ་ཁ་བཞིན། །དེ་ལྟར་རྗེས་འཇུག་གིས་དྲངས་པའི། །མིང་མཐའ་དེ་དག་ཉིད་ཀྱིས་ནི། །རང་ཉིད་གཞིར་བཟུང་ཁྱད་པར་དོན། །གང་དང་ག་ལ་སྦྲེལ་འོས་པ། །དེ་ཉིད་རང་གི་སྒྲ་མཐུན་པའི། །ཆོས་དངོས་ལས་དང་བྱེད་པ་དང་། །སྦྱིན་དང་འབྱུང་ཁུངས་འབྲེལ་བ་དང་། །གནས་དང་བོད་པའི་སྒྲ་ཡང་དྲངས། །རྣམ་དབྱེའི་སྒྲ་རྣམས་འདྲེན་ཚུལ་ཡིན། །ཆོས་དངོས་བརྗོད་པ་དང་པོ་དང་། །ལས་སུ་བྱ་བ་གཉིས་པ་སྟེ། །བྱེད་པ་རྣམ་དབྱེ་གསུམ་པའི་སྒྲ། །སྦྱིན་པ་ཞེས་བྱ་བཞི་པ་ཆེད། །འབྱུང་ཁུངས་ལྔ་པ་འབྲེལ་བ་དྲུག། གནས་གཞི་བདུན་པ་བོད་པ་ནི། རྣམ་དབྱེ་བརྒྱད་པ་ཞེས་བྱའོ། །གཞན་ཡང་སླར་བསྡུ་ལྷག་བཅས་དང་། །འབྱེད་སྡུད་བསྣན་དང་བདག་པོ་དང་། །དགག་སྒྲུབ་རྒྱན་དང་དུས་ལའང་འཇུག། །དེ་ལྟར་འཇུག་པའི་ཚིག་ཕྲད་སྒྲ། །གོ་སོགས་ཏེ་སོགས་འམ་ལ་སོགས། །སླར་བསྡུ་སོགས་ལ་འཇུག་པའི་ཚུལ། །དེ་དག་སྔ་ཤུགས་འདྲེན་པས་འབྱུང་། །དཔེར་ན་ཐད་ཅེས་བྱ་བ་ན། །ཀ་ཞེས་བྱ་བའི་མཐའ་སྦྱར་ནས། །རང་ཉིད་གང་ལ་སྦྲེལ་འོས་པའི། །རྣམ་དབྱེ་ཚིག་ཕྲད་སྦྱོར་བ་བཞིན། །རྣམ་དབྱེ་དང་ནི་ཚིག་གི་ཕྲད། །དེ་དག་ནང་གསེས་གང་འཇུག་པ། །དེ་དག་མིང་ཚིག་སོ་སོ་ཡི། །མཐར་སྦྱར་འོག་མའི་མིང་དོན་ལས། །འཇུག་ཚུལ་མི་འདྲ་ཤེས་བྱས་ཏེ། །དཔེར་ན་ངོ་བོ་ཙམ་བརྗོད་པའི། །སྤྱིར་འཇུག་ཡོད་དམ་བྱེད་པ་ཡོད། །དེ་བཞིན་ཆེད་བྱེད་རྟེན་བྱེད་དང་། །ལས་བྱ་བླང་བྱ་བསྒྲུབ་པར་བྱ། །སྔོན་དུ་བོད་པ་གནས་པའམ། །གཞན་ཡང་ཚིག་དོན་འོག་མ་ལས། །བསྡུ་རྒྱུ་ཡོད་དམ་མེད་པ་དང་། །གོང་མ་ལས་ཀྱང་དེ་བཞིན་ཏེ། །རྣམ་གྲངས་དག་ནི་བཀོད་པ་ལས། །བསྐྱར་བ་ཡོད་དམ་མེད་པ་དང་། །ཕོ་སྒྲ་དང་ནི་མོ་སྒྲ་དག། །མིང་གི་མཐའ་ན་ཡོད་མེད་དང་། །རྒྱན་དུ་གྱུར་པ་རྣམས་ལ་ཡང་། །དོན་ལ་སྙེག་པ་ཡོད་མེད་དང་། །བསྟན་བྱ་ལྷག་མ་ཡོད་མེད་དང་། །ཚིག་དོན་རྫོགས་དང་མ་རྫོགས་ཀྱིས། །གོང་དུ་འཇུག་ཚུལ་གང་བཤད་པ། །དེ་དག་ནང་གསེས་རྣམ་པར་དབྱེ། །སྤྱིར་འཇུག་དང་པོར་མཁས་པས་བཤད། །རྟེན་བྱེད་བདུན་པ་གནས་ཡིན་ཏེ། །ལས་བྱ་གཉིས་པ་བླང་བྱ་ནི། །ལྔ་པ་འབྱུང་ཁུངས་གནས་ཡིན་ལ།།བསྒྲུབ་བྱ་དྲུག་པ་འབྲེལ་བའི་གནས། །དེ་འདྲའི་དོན་ཅན་ཕྱི་མ་ལ། །གནས་ཚེ་སྔ་མའི་དོན་གསལ་བྱེད། །ཕྱི་མར་ཚིག་དོན་ལྷག་མ་ནི། །མེད་པར་སྟོན་ཚེ་སླར་བསྡུ་དང་། །དེ་འདྲའི་ཚིག་དོན་ལྷག་མ་ནི། །ཡོད་པར་སྟོན་ཚེ་ལྷག་བཅས་སྦྱོར། །དེ་བཞིན་འབྱེད་སྡུད་སོགས་ལ་ཡང་། །དེ་ཡི་རིག་པས་ཤེས་པར་བྱ། །ཅིའི་ཕྱིར་འཇུག་པར་བྱེད་ཅེ་ན། །ཡི་གེའི་ཁོངས་ནས་མིང་ཕྱུངས་ཏེ། །མིང་གི་ཁོངས་ནས་ཚིག་ཕྱུངས་ནས། །ཚིག་གིས་དོན་རྣམས་སྟོན་པར་བྱེད། །ཡི་གེ་ཀ་སོགས་རེ་རེ་སྟེ། །དེ་དག་འདུས་ནས་དོན་རྣམས་ཀྱི། །ངོ་བོ་སྟོན་པ་མིང་ཡིན་ཞིང་། །མིང་འདུས་པ་ལས་དོན་རྣམས་ཀྱི། །ཁྱད་པར་སྟོན་པ་ཚིག་ཡིན་ནོ། །དེ་འདྲའི་ཚིག་གིས་བརྗོད་པ་ལས། །དོན་གྱི་རྣམ་པ་ཀུན་རྟོགས་འགྱུར། །དབྱངས་ཡིག་ཨི་ལ་སོགས་པ་ཡི། །མོ་ཡི་ཡི་གེ་མེད་པ་ན། །གདངས་ཀྱི་ང་རོ་དང་བྲལ་བས། །ཀ་སོགས་གསལ་བྱེད་རྐྱང་བ་ཡི། །ཕོ་ཡིག་བརྗོད་པ་མེད་པར་འགྱུར། །ཨི་སོགས་དབྱངས་དང་ལྡན་པ་ཡི། །ཕོ་ཡིག་དེ་དག་རྣམས་ལ་ཡང་། །སྔོན་དང་རྗེས་ནས་འཇུག་པ་ཡི། །འཇུག་པར་བཅས་པ་མེད་པར་ནི། །ངོ་བོ་ཁྱད་པར་སྟོན་བྱེད་པའི། །མིང་དང་ཚིག་ཀྱང་གསལ་མི་ནུས། །མིང་ཚིག་གསལ་བ་མེད་ན་ནི། །བླང་དོར་འབྲས་བུའི་རྣམ་པ་ཡི། །དོན་རྣམས་བརྗོད་པར་མི་འགྱུར་རོ། །དེ་འདྲའི་དོན་བརྗོད་ཚུལ་མེད་པ། །དེ་ལྟར་གྱུར་ན་འཇིག་རྟེན་ན། །བླང་དོར་གསལ་བྱེད་ཚིག་མེད་པས། །དོན་མཚོན་བརྗོད་པ་ཀུན་ཀྱང་མེད། །ཕྱི་རོལ་གྲུབ་མཐའ་སྨྲ་བྱེད་པ། །རིག་བྱེད་སྨྲ་བའང་ཡོད་མི་འགྱུར། །ནང་པའི་སྡེ་སྣོད་ལ་སོགས་པའི། །ཉན་ཐོས་རང་རྒྱལ་སངས་རྒྱས་ཀྱི། །བསླབ་པ་རྣམས་ཀྱང་མེད་པར་འགྱུར། །མིང་ཚིག་བརྗོད་པ་ཀུན་ཡོད་ཀྱང་། །ཡི་གེའི་འཇུག་ཚུལ་མི་ཤེས་ན།།དོན་གྱི་ཚུལ་རྣམས་མི་ཤེས་ཏེ། །དེ་ཡི་དཔེ་འདི་ཤེས་པར་བྱོས། །ཇི་ལྟར་འཇིག་རྟེན་སེམས་ཅན་དག། །རང་རང་རྒྱུད་ལ་གནས་པ་ཡི། །ཕུང་པོ་ཁམས་དང་སྐྱེ་མཆེད་དང་། །དགག་སྒྲུབ་དོན་དང་མཐུན་པ་ཡི། །གྲུབ་མཐའ་གཞན་ཡང་ཡོད་མོད་ཀྱི། །རང་ཉིད་ཀྱིས་ནི་མི་ཤེས་བཞིན། །དེ་བཞིན་ཡི་གེའི་འཇུག་ཚུལ་རྣམས། །སྨྲ་བ་ཀུན་ལ་གནས་གྱུར་ཀྱང་། །ཕན་ཚུན་ངག་གི་སྨྲ་ལུགས་ཀྱི། །རང་ཚུལ་དེ་ཉིད་མི་ཤེས་པས། །ངོ་བོ་ཉིད་དང་ཁྱད་པར་གྱི། །དོན་ལ་སྦྱོར་བ་ག་ལ་ཤེས། །ཡི་གེའི་ཚུལ་ལ་མི་མཁས་པས། །དོན་ཚུལ་ཁོང་དུ་ཆུད་མིན་པ། །དེ་ཕྱིར་སྨྲ་བའི་དབང་ཕྱུག་གི །རྗེས་སྨྲས་འདི་ཀུན་རྟོགས་གྱུར་ཅིག། །བླ་མ་དང་རྗེ་བཙུན་མཁྱེན་པའི་གཏེར་ལ་ཕྱག་འཚལ་ལོ། །རྟགས་ཀྱི་འཇུག་པའི་དཀའ་བའི་གནས། །ཕོ་མོའ་ིའཇུག་ཚུལ་གསལ་བྱ་སྟེ། །དེ་ཡང་ཐོག་མར་དེ་ཉིད་ལས། །ཕོ་ནི་འདས་དང་གཞན་བསྒྲུབ་ཕྱིར། །ཞེས་གསུངས་འདས་པ་བསྒྲུབས་ཟིན་དང་། བསྒྲུབ་པར་བྱ་བ་དངོས་པོ་གཞན། །བསྒྲུབ་པར་བྱ་ཞེས་བརྗོད་པ་ནི། །བྱ་བའི་ལས་ཉིད་བསྒྲུབ་པའོ། །དེ་བཞིན་བསྒགས་དང་བསྒག་བྱའི་དངོས། །བསྒག་པར་བྱ་རྣམས་རིམ་པ་བཞིན། །འདས་དང་དངོས་གཞན་བསྒྲུབ་པའོ། །གཞན་ཡང་བསྐྱངས་དང་བསྐྱང་བྱ་དང་། །བསྐྱང་བར་བྱ་ཞེས་བྱ་རྣམས་དང་། །བསྐྱངས་དང་བསྐྱང་བྱ་བསྐྱང་བ་དང་། །བསྐུལ་དང་བསྐུལ་བྱ་བསྐུལ་བ་དང་། །བསྐུར་དང་བསྐུར་བྱ་བསྐུར་བ་དང་། །བསྒར་དང་བསྒར་བྱ་བསྒེར་བ་སོགས། །དཔེར་བརྗོད་མཐའ་ཡས་རྣམས་ཀྱིས་ཤེས། །དེ་བཞིན་དངོས་དང་ཉེ་བ་ཡི། །བྱ་བ་བཀག་དང་བཀར་བ་དང་། །བཀལ་དང་བཏང་སོགས་འདས་པའོ། །མ་ནིང་གཉིས་ཀ་ད་ལྟར་ཆེད། །ཅེས་གསུངས་མ་ནིང་ག་ཡིག་ནི། །གཏང་བྱ་གཅད་བྱ་གཟུང་བྱ་སོགས། །དངོས་པོ་གཞན་ལ་འཇུག་པ་སྟེ། །གཏོང་དང་གཅོད་དང་གནོན་པ་སོགས། །དངོས་པོ་བདག་དང་འབྲེལ་བའི་ལས། །བྱེད་ལས་ད་ལྟ་བ་ཡང་ཡིན། །གཏོང་བ་པོ་སོགས་བདག་པོ་ཉིད། །མ་ནིང་ད་ནི་བདག་དངོས་དང་། །བདག་དང་འབྲེལ་བའི་ལས་མི་འཇུག། དགག་བྱ་དགང་བྱ་དབྱུང་བྱ་དང་། །དགག་བྱ་ལ་སོགས་དངོས་གཞན་དང་། །དགག་དང་དགང་དང་དབྱུང་བ་སོགས། །གཞན་དང་འབྲེལ་བའི་བྱ་བའི་ལས། །དེ་ཉིད་ད་ལྟ་བ་ཡང་ཡིན། །མོ་ནི་བདག་དང་མ་འོངས་ཕྱིར། །ཞེས་གསུངས་མོ་ཡིག་འའི་འཇུག་ཚུལ། །འགོག་དང་འགེགས་དང་འདྲེན་པ་སོགས། །བདག་དང་འབྲེལ་བའི་བྱེད་ལས་ཉིད། །འགོག་པ་པོ་སོགས་བདག་དངོས་ཡིན། །འགྱུར་དང་འབྱུང་དང་འགྲུབ་པ་སོགས། །མ་འོངས་པ་ཡི་དུས་ལ་འཇུག། ཤིན་ཏུ་མོ་ནི་མཉམ་ཕྱིར་རོ། །ཞེས་གསུངས་ཤིན་ཏུ་མོའ་ིཡི་གེ། མ་ནི་དུས་གསུམ་བྱ་བྱེད་སོགས། །མཉམ་པ་ཉིད་ལ་འཇུག་པ་སྟེ། །དཔེར་ན་མཛད་ཟིན་མཛད་བྱ་དང་། །མཛད་པར་བྱ་དང་མཛད་བྱེད་དང་། །མཛད་པ་པོ་དང་མཛོད་ཅིག་ཅེས། །དུས་གསུམ་བདག་གཞན་བྱ་བྱེད་ཀུན། །མ་ཡིག་ཁོ་ནས་སྟོན་པ་བཞིན། །དེ་བཞིན་མཁས་སོགས་མཁས་བྱ་ལ། །མཁས་པར་བྱ་དང་མཁས་པར་བྱེད། །མཁས་པ་པོ་སོགས་རྒྱ་ཆེར་ཤེས། །རྗེས་འཇུག་ཡི་གེ་བཅུ་པོ་ལ། །ཕོ་མོ་མ་ནིང་གསུམ་དུ་དབྱེ། །ས་ད་བ་ཕོ་འ་ནི་མོ། །ག་ར་ལ་གསུམ་མ་ནིང་སྟེ། །ང་ན་མ་གསུམ་ཤིན་ཏུ་མོ། །ཕོ་ལ་སྐྱེས་བུ་རབ་འབྲིང་གསུམ། །ས་རབ་ད་འབྲིང་བ་ཐ་མ། །མོ་ལ་མོ་དང་ཤིན་ཏུ་མོ། །འ་མོ་ང་ན་མ་གསུམ་ནི། །ཤིན་ཏུ་མོ་ཞེས་བྱ་བར་ཤེས། །མ་ནིང་འགྱུར་དང་མཚན་གཉིས་དང་། །མཚན་མེད་དག་དང་གསུམ་དུ་འདོད། །མ་ནིང་ག་ར་ལ་གསུམ་པོ། །གྲོགས་ཀྱི་དབང་གིས་དེ་ལྟར་འགྱུར། །རང་གི་ངོ་བོས་མ་ཡིན་ནོ། །དྲག་པ་གསུམ་ནི་ནང་ཕྲད་དམ། །དྲག་པོ་ས་ད་བ་གསུམ་པོ། །ཞུགས་པའི་སྟོབས་ཀྱིས་མིང་གཞི་ལ། །དྲག་ཞན་བར་མ་གསུམ་དུ་དབྱེ། །མོ་དང་ཤིན་ཏུ་མོ་གཉིས་ཀྱང་། །ཞུགས་པའི་སྟོབས་ཀྱིས་ནང་གི་ཆར།། དྲག་ཞན་གཉིས་སུ་ཕྱེ་བས་འགྲུབ། །དེ་རྣམས་གྲོགས་ཀྱིས་བསྒྱུར་བས་མིན། །མ་ནིང་གསུམ་དུ་གང་གཏོགས་པ། །ཡི་གེ་ག་ར་ལ་གསུམ་ནི། །དྲག་དང་ཕྲད་ན་དྲག་པར་འགྱུར། །ཀག་དང་ཀར་དང་ཀལ་སོགས་བཞིན། །ཞན་དང་ཕྲད་ན་ཞན་པར་འགྱུར། །གག་དང་གར་དང་གལ་སོགས་བཞིན། །དེའི་ཕྱིར་འགྱུར་བ་མ་ནིང་ཡིན། །གཉིས་ཀ་དག་དང་ཕྲད་གྱུར་ན། །དེ་ནི་གཉིས་ཀ་ཅན་དུ་འགྱུར། །གགས་དང་གརད་དང་གལད་སོགས་བཞིན། །དྲག་ཞན་གཉིས་ཀའི་ཆ་ལྡན་ཕྱིར། །མཚན་གཉིས་མ་ནིང་ཞེས་བྱའོ། །གཉིས་ཀ་དག་དང་མ་ཕྲད་ན། །ཁག་དང་ཁར་དང་ཁལ་སོགས་བཞིན། །མ་ནིང་ཙམ་དང་ཕྲད་པ་ཡིས།།གང་དུ་ཡང་ནི་མི་འགྱུར་རོ། །དེས་ན་མཚན་མེད་མ་ནིང་ངོ་། །ཞེས་པ་འདི་ཡང་དོན་གཉེར་ཅན་དུ་མའི་ངོར། །དཀའ་བཅུའི་མིང་ཅན་རཏྣ་ཨརྠ་སིད་དྷིས་བགྱིས་པ་དགེ་ལེགས་སུ་གྱུར་ཅིག། མངྒ་ལཾ། །ཨ་ཀྱཱ་ཡོངས་འཛིན་དབྱངས་ཅན་དགའ་བའི་བློ་གྲོས།རྟགས་ཀྱི་འཇུག་པའི་དགོངས་འགྲེལ་རབ་གསལ་སྣང་བ།༄༅། །པད་དཀར་ལྟར་བསྔགས་རྣམ་འདྲེན་ཤཱཀྱའི་ཏོག།རྒྱལ་ཀུན་མཁྱེན་པའི་རང་གཟུགས་འཇམ་དཔལ་དབྱངས། །གངས་ཅན་འགྲོ་བའི་མིག་གཅིག་སམྦྷོ་ཊ། །འཇམ་མགོན་རྒྱལ་བ་གཉིས་པ་རྣམས་ལ་འདུད། །འདིར་བརྡ་སྤྲོད་པའི་བསྟན་བཅོས་རྟགས་ཀྱི་འཇུག་པའི་དོན་མདོར་བསྡུས་ཏེ་འཆད་པ་ལ། །རྟགས་ཀྱི་འཇུག་པ་ཞེས་པ་ནི། ཡི་གེ་ཕོ་མོ་མ་ནིང་གི་རྟགས་ཀྱི་འཇུག་ཚུལ་རྒྱས་པར་སྟོན་པས་ན་བརྗོད་བྱའི་སྒོ་ནས་བཏགས་པ་སྟེ། སྤྱི་སྡོམ་ནི། སྤྱིར་ཡི་གེ་ལ་ཕོ་མོ་གཉིས་སུ་དབྱེ་བ་དང་། བྱེ་བྲག་མིང་གཞིའི་ཡི་གེ་ལ་ནང་གསེས་ཀྱི་ཕོ་མོ་མ་ནིང་གི་རྟགས་ཀྱི་དབྱེ་བ་བཤད་པ།སྔོན་འཇུག་གི་ཕོ་མོ་མ་ནིང་གི་འཇུག་པ་བཤད་པ། རྗེས་འཇུག་གི་ཕོ་མོ་མ་ནིང་གི་འཇུག་པ་བཤད་པ་སྟེ་བཞི་པོ་དེར་འདུས་སོ། །དབྱེ་ཚུལ་དང་པོ་གཉིས་འཆད་པ་ལ།ཕོ་ཡི་ཡི་གེ་འབའ་ཞིག་ལ། །ཞེས་པ་ནས། མ་ནིང་མཚན་མེད་ཅེས་ཀྱང་བྱ། །ཞེས་པའི་བར་ཚིགས་བཅད་ཕྱེད་དང་བཞི་གསུངས། །དེ་ཡང་ཚིགས་རྐང་དང་པོ་གཉིས་ཀྱིས་གསལ་བྱེད་སུམ་ཅུ་ཕོ་ཡིག་ཏུ་དངོས་སུ་བསྟན་པའི་རྟགས་ཀྱི་འཇུག་པའི་དགོངས་འགྲེལ་རབ་གསལ་སྣང་བ།ཤུགས་ལ། དབྱངས་ཡིག་བཞི་མོ་ཡིག་ཏུ་གྲུབ་བོ། །གསལ་བྱེད་རྣམས་རྗོད་པའི་རླུང་ཤུགས་གསལ་ཞིང་གྲིམ་པས་ཕོ་ཡིག་དང་། དབྱངས་ཡིག་བཞི་རྗོད་པའི་རླུང་ཤུགས་མི་གསལ་ཞིང་ལྷོད་པས་སྤྱིར་མོ་ཡིག་ཏུ་གསུངས་སོ།།དེ་ནས་མིང་གཞི་གསལ་བྱེད་སུམ་ཅུ་པོ་ལ་ནང་གསེས་ཀྱི་སྡེ་ཚན་ལྔར་དབྱེ་སྟེ། ཕོ་དང་། མ་ནིང་དང་། མོ་དང་། ཤིན་ཏུ་མོ་དང་། མོ་གཤམ་མམ་མ་ནིང་མཚན་མེད་དོ། །དེ་ཡང་འཇིག་རྟེན་ན་ཕོ་སྐད་ཀྱི་གདངས་གྲིམ་ཞིང་དྲག་པ་དང་། མོ་སྐད་ཀྱི་གདངས་ལྷོད་ཅིང་ཞན་པ་དང་། མ་ནིང་གྲིམ་ལྷོད་རན་པ་སོགས་ཀྱི་དཔེ་བཞིན། གསལ་བྱེད་ཀྱི་ཡི་གེ་རྣམས་མིང་གཞིར་སོང་བའི་ཚེ། རྗོད་པའི་རླུང་ཤུགས་གྲིམ་ཞིང་དྲག་པ་ཕོ་ཡིག་དང་། གྲིམ་ལྷོད་རན་པ་མ་ནིང་དང་། ཅུང་ཟད་ལྷོད་པ་མོ་དང་། དེ་ལས་ཀྱང་ལྷོད་པ་ཤིན་ཏུ་མོ་དང། ཤིན་ཏུ་ལྷོད་ཅིང་ཞན་པ་མོ་གཤམ་གྱི་ཡི་གེར་བཞག་པ་ཡིན་ནོ། །དེས་ན་པ་སྡེ་ཡན་ཆད་སྡེ་བ་བཞིའི་དང་པོ་ཀ་ཅ་ཏ་པ་བཞི་ཕོ་དང་། ཁ་ཆ་ཐ་ཕ་བཞི་མ་ནིང་། ག་ཇ་ད་བ་མོ། ང་ཉ་ན་མ་བཞི་ཤིན་ཏུ་མོ་ཡིན་ལ། དེ་ནས་ལྷག་མ་བཅུ་བཞིའི་ཙ་ཚ་ཛ་གསུམ་ཅ་ཆ་ཇ་དང་སྦྱར་ཏེ་རིམ་པར་ཕོ་མ་ནིང་མོ་དང་། ཝ་ནི་བ་དང་འདྲ་བར་མོ་ཡིག་ཏུ་ཤེས་པར་བྱའོ། །ཞ་ཟ་འ་ཡ་ཤ་ས་དྲུག་ནི་མོ་ཡིག་དང་། ར་ལ་ཧ་གསུམ་མོ་གཤམ་སྟེ། མིང་གཞན་མ་ནིང་མཚན་མེད་ཅེས་ཀྱང་བྱའོ། །ཨ་ཡིག་ནི་མིང་གཞིའི་ཕོ་མོ་མ་ནིང་གང་དུའང་མི་གཏོགས་ཏེ། ལོ་ཆེན་ནམ་མཁའ་བཟང་པོས། ཨ་ཡིག་རྟགས་མེད་པའོ། །ཞེས་དང་། དག་ཡིག་ཟ་མ་རྟོག་ལས། སུམ་ཅུ་པ་ནི་ཕྱོགས་ལྷུང་མེད། །ཅེས་ཨ་ཀྱཱ་ཡོངས་འཛིན་དབྱངས་ཅན་དགའ་བའི་བློ་གྲོས།གསུངས་སོ། །དེ་དག་གི་སྡོམ་ནི། སྤྱིར་བཏང་གསལ་བྱེད་སུམ་ཅུ་ཕོ། །དབྱངས་བཞི་མོ་དང་མིང་གཞི་ལའང་། །ཀ་ཅ་ཏ་པ་ཙ་ལྔ་ཕོ། །ཁ་ཆ་ཐ་ཕ་ཚ་མ་ནིང་། །ག་ཇ་ད་བ་ཛ་དང་ཝ། །ཞ་ཟ་འ་ཡ་ཤ་ས་སྟེ། །མོ་ཡི་ཡི་གེ་བཅུ་གཉིས་ཡིན། །ང་ཉ་ན་མ་ཤིན་ཏུ་མོ། །ར་ལ་ཧ་གསུམ་མོ་གཤམ་སྟེ། །མིང་གཞན་མ་ནིང་མཚན་མེད་ཟེར། །ཨ་ཡིག་འདིར་ནི་རྟགས་མེད་ཡིན། །ཞེས་སོ། །གཉིས་པ་སྔོན་འཇུག་གི་རྟགས་ཀྱི་དབྱེ་བ་འཇུག་ཚུལ་དང་བཅས་པ་རྒྱས་པར་བཤད་པ་ལ།མོ་ཡི་ཡི་གེ་ནང་ནས་ནི། །ཞེས་པ་ནས། ཤིན་ཏུ་མོ་ནི་མཉམ་པས་སོ།།ཞེས་པའི་བར་ཤོ་ལོ་ཀ་བརྒྱད་དང་རྐང་པ་གཅིག་གསུངས་ཏེ། ཤིན་ཏུ་མོ་དང་མོ་གཤམ་གཉིས་མོ་ཡིག་ཏུ་བསྡུས་ནས། མོ་ཡིག་བཅུ་དགུའི་ནང་ནས་རྗེས་འཇུག་གི་ཡི་གེ་ག་ང་ད་ན་བ་མ་འ་ར་ལ་ས་སྟེ་བཅུ་དབྱུང་བར་བྱ་ལ། ད་དང་ས་གཉིས་ཡང་འཇུག་ཏུའང་བཤད་དེ། ད་ཡིག་ནི། ན་ར་ལ་གསུམ་གྱི་མཐའ་ཅན་འདས་ཚིག་དང་སྐུལ་ཚིག་ལ་འཇུགས་ཡིག་ནི། ག་ང་བ་མ་བཞིའི་མཐར་ཕལ་ཆེར་འདས་ཚིག་དང་སྐུལ་ཚིག་ལ་འཇུག་གོ། རྗེས་འཇུག་བཅུ་པོའ་ིནང་ནས་ག་ད་བ་མ་འ་ལྔ་སྔོན་འཇུག་ཀྱང་ཡིན་ཞིང་། དེ་ལ་ནང་གསེས་ཀྱི་སྒོ་ནས་དབྱེ་བ་ནི། སྔོན་འཇུག་ལྔ་ཡང་མིང་གཞིའི་ཡི་གེའི་སྔོན་དུ་སོང་བ་ན། དེའི་དབང་གིས་སྐད་གདངས་དྲག་པ་ཕོ་དང་། སྐད་གདངས་རྟགས་ཀྱི་འཇུག་པའི་དགོངས་འགྲེལ་རབ་གསལ་སྣང་བ།རན་པ་མ་ནིང་དང་། སྐད་གདངས་ཅུང་ཟད་ཞན་པ་མོ་དང་། དེ་ལས་ཀྱང་ཞན་པ་ཤིན་ཏུ་མོ་རུ་བཞག་པ་ཡིན་པས་ན། བ་སྔོན་འཇུག་གི་ཕོ་ཡིག་དང་། ག་ད་གཉིས་མ་ནིང་། འ་མོ། མ་སྔོན་འཇུག་གི་ཤིན་ཏུ་མོ་ཡིག་གོ།སྔོན་འཇུག་གི་འཇུག་པ་རྒྱས་པར་བཤད་པ་ནི། གང་གིས་འཇུག་པ།གང་ལ་འཇུག་པ། ཇི་ལྟར་འཇུག་པ། ཅིའི་ཕྱིར་འཇུག་པ་སྟེ་བཞི་ལས། དང་པོ་གཉིས་ལྷན་ཅིག་ཏུ་བཤད་དེ། སྔོན་འཇུག་གང་གིས་མིང་གཞིའི་ཡི་གེ་གང་ལ་སྔོན་དུ་འཇུག་པ་ནི། སྔོན་འཇུག་གི་ཕོ་ཡིག་བ་ཡིག་ནི། མིང་གཞིའི་ཕོ་ཡིག་ཀ་ཅ་ཏ་ཙ་བཞི་དང་། མོ་ཡིག་ག་ད་ཞ་ཟ་ཤ་ས་དྲུག་སྟེ་བཅུའི་སྔོན་དུ་འཇུག་པ་ཡིན་ཏེ། དཔེར་ན། བཀས་བཅད་རྒྱས་བཏབ་མ་ནོར་བཙལ། །གོ་བགོས་མདུན་བདར་བཞད་གད་སྤང་། །བསམ་བཟང་སྡིག་བཤགས་ཚོགས་བསགས་གྱིས། །ཞེས་པ་ལྟ་བུའོ། །སྔོན་འཇུག་གི་མོ་འ་ཡིག་ནི། མིང་གཞིའི་མོ་ཡིག་ག་ཇ་ད་བ་ཛ་ལྔ་དང་། མ་ནིང་ཁ་ཆ་ཐ་ཕ་ཚ་ལྔ་སྟེ་བཅུ་པོ་ཁོ་ནའི་སྔོན་དུ་འཇུག་སྟེ། འགའ་ཞིག་འཇིག་རྟེན་འདིར་འབད་འཛེར། །འཁོན་འཆང་འཐབ་རྩོད་འཕུང་བྱེད་འཚལ། །ལྟ་བུའོ། །སྔོན་འཇུག་གི་མ་ནིང་ག་ཡིག་ནི། མིང་གཞིའི་ཕོ་ཅ་ཏ་ཙ་གསུམ་དང།མོ་ཡིག་ཉ་ད་ན་ཞ་ཟ་འ་ཡ་ཤ་ས་བརྒྱད་བཅས་བཅུ་གཅིག་ཁོ་ནའི་སྔོན་དུ་འཇུག་སྟེ།གཅེས་གཏམ་གཙོ་བོར་གཉེན་ལ་གདམས། །ཨ་ཀྱཱ་ཡོངས་འཛིན་དབྱངས་ཅན་དགའ་བའི་བློ་གྲོས།གནས་ལུགས་གཞལ་བྱ་གཟོད་ནས་ཞི། །གཡར་དམ་གཤའ་མ་གསང་བར་བྱ། །ལྟ་བུའོ། །སྔོན་འཇུག་གི་མ་ནིང་ད་ཡིག་ནི། མིང་གཞིའི་ཕོ་ཀ་དང་པ་གཉིས་དང་། མོ་ག་ང་བ་མ་བཞི་སྟེ་དྲུག་པོ་ཁོ་ནའི་སྔོན་དུ་འཇུག་སྟེ། དཀའ་གནད་དཔོག་པའི་དགའ་སྤྲོ་ཅན། །དངོས་གྲུབ་དབང་ཕྱུག་མི་དམན་འཐོབ། །ལྟ་བུའོ། །སྔོན་འཇུག་གི་ཤིན་ཏུ་མོ་ཡིག་མ་ནི། མིང་གཞིའི་མ་ནིང་ཁ་ཆ་ཐ་ཚ་བཞི། མོ་ཡིག་ག་ཇ་ད་ཛ་བཞི་དང་། ཤིན་ཏུ་མོ་ང་ཉ་ན་གསུམ་བཅས་བཅུ་གཅིག་ཁོ་ནའི་སྔོན་དུ་འཇུག་སྟེ།མཁས་མཆོག་བྱིན་མཐུ་ངོ་མཚར་རྨད། །མགོན་པོ་མཇལ་བས་འཛུམ་མདངས་མཛད། །མངའ་བདག་ཐུགས་མཉེས་གདམས་པ་མནོས། །ཞེས་པ་ལྟ་བུའོ། །དེ་དག་མིང་གཞི་རྐྱང་འཕུལ་གྱི་དབང་དུ་བྱས་པ་ཡིན་ཞིང་། བརྩེགས་པ་མགོ་ཅན་ལ་ར་མགོ་ལྡན་པ་བཅུ་གཉིས། ལ་མགོ་ཅན་བཅུ། ས་མགོ་ཅན་བཅུ་གཅིག་གི་འཕུལ་ཡིག་ནི་བ་ཡིག་ཁོ་ནར་ངེས་ཏེ། དེ་ཡང་མིང་གཞི་ང་ཉ་ན་ཇ་ཛ་ལྔ་རྐྱང་པ་ལ་བས་འཕུལ་མི་འཐོབ་ཀྱང་ར་མགོ་བྱུང་ཚེ་བས་འཕུལ་འཐོབ། ས་མགོ་བྱུང་ན་ང་ཉ་ན་གསུམ་ཁོ་ན་ལ་བས་འཕུལ་འབྱུང་སྟེ། དཔེར་ན། རྩྭ་བརྔ་གཟུགས་བརྙན་ཟས་ཀྱིས་བརྣངས།།གཟི་བརྗིད་གྱེན་བརྫེས་བསྟོད་བསྔགས་དང་། དགེ་བསྙེན་ཕྲེང་བསྣམས་ལྟ་རྟགས་ཀྱི་འཇུག་པའི་དགོངས་འགྲེལ་རབ་གསལ་སྣང་བ།བུའོ། །ལ་མགོ་ཅན་ལ་འཕུལ་ཡིག་མེད་དོ། །བོད་ཡིག་ཡ་ར་ལ་ཝའི་འདོགས་བཞི་ལ་བརྩེགས་པའི་ཐ་སྙད་མི་བྱེད་དོ། །དེ་རྣམས་ཀྱི་སྡོམ་ཚིག་ནི། ག་ང་ད་ན་བ་མ་འ། །ར་ལ་ས་རྣམས་རྗེས་འཇུག་བཅུ། །ད་དང་ས་གཉིས་ཡང་འཇུག་གོ། ག་ད་བ་མ་འ་སྔོན་འཇུག། བ་ཕོ་ག་ད་གཉིས་མ་ནིང་། །འ་མོ་མ་ནི་ཤིན་ཏུ་མོ། །ཕོ་ཡིག་སྔོན་འཇུག་བ་ཡིག་ནི། །ཕོ་ཡིག་ཀ་ཅ་ཏ་ཙ་དང་། །མོ་ཡིག་ག་ད་ཞ་ཟ་ཤ། །ས་བཅས་བཅུ་ཡི་སྔོན་དུ་འཇུག། །མོ་ཡིག་སྔོན་འཇུག་འ་ཡིག་ནི། །མོ་ཡིག་ག་ཇ་ད་བ་ཛ། །མ་ནིང་ཁ་ཆ་ཐ་ཕ་ཚ། །བཅུ་པོ་ཁོ་ནའི་སྔོན་དུ་འཇུག། སྔོན་འཇུག་མ་ནིང་ག་ཡིག་ནི། །ཕོ་ཡིག་ཅ་ཏ་ཙ་གསུམ་དང་། །མོ་ཡི་ཡི་གེ་ཉ་ད་ན། །ཞ་ཟ་ཡ་དང་ཤ་ས་སྡེ། །བཅུ་གཅིག་ཁོ་ནའི་སྔོན་དུ་འཇུག། །སྔོན་འཇུག་མ་ནིང་ད་ཡིག་ནི། །ཕོ་ཡི་ཡི་གེ་ཀ་དང་བ། །མོ་ཡིག་ག་ང་བ་མ་སྟེ། །དྲུག་པོ་ཁོ་ནའི་སྔོན་དུ་འཇུག།སྔོན་འཇུག་ཤིན་ཏུ་མོ་མ་ནི། །མ་ནིང་ཁ་ཆ་ཐ་ཚ་དང་། །མོ་ཡིག་ག་ཇ་ད་དང་ཛ། །ཤིན་ཏུ་མོ་ཡིག་ང་དང་ཉ། །ན་བཅས་བཅུ་གཅིག་ཁོ་ན་ལའོ། །དེ་རྣམས་རྐྱང་འཕུལ་དབང་དུ་བྱས། །བརྩེགས་འཕུལ་བ་ཡིག་ཁོ་ནར་ངེས། །དེ་ཡང་མིང་གཞི་ང་ཉ་ན། །ཇ་དང་ཛ་བཅས་ལྔ་པོ་ལ། །ར་མགོ་བྱུང་ཚེ་ལྔ་ཀ་དང།།ས་མགོ་བྱུང་ན་ང་ཉ་ན། །གསུམ་པོ་ཁོ་ནའི་སྔོན་དུ་འབྱུང་། །ལ་མགོ་ལྡན་ལ་འཕུལ་ཡིག་སྤང་། །མགོ་ཅན་གསུམ་ལ་བརྩེགས་པ་ཟེར། །འདོགས་ལ་བརྩེགས་པའི་ཐ་སྙད་མེད། །ཅེས་བྱའོ། །སྔོན་འཇུག་གི་འཇུག་པ་དེའི་མཐའ་གཅོད་པའི་ཕྱིར་ཞར་ལ་མི་ཨ་ཀྱཱ་ཡོངས་འཛིན་དབྱངས་ཅན་དགའ་བའི་བློ་གྲོས།འཇུག་པ་བཤད་པ་ནི། སྔོན་འཇུག་རྣམས་ཀྱི་འཇུག་ཚུལ་ཇི་ལྟར་བཤད་པ་དེ་ལས་གཞན་དུ་སྔོན་འཇུག་གི་ཕོ་བ་ཡིག་ནི། མིང་གཞིའི་མ་ནིང་ཁ་ཆ་ཐ་ཕ་ཚ་རྣམས་ཀྱི་སྔོན་དུ་མི་འཇུགདེ་བཞིན་དུ་མོ་འ་དང་ཤིན་ཏུ་མོ་མ་ཡིག་མིང་གཞིའི་ཕོ་ཡིག་གི་སྔོན་དུ་མི་འཇུགམ་ནིང་ག་ད་གཉིས་མིང་གཞིའི་མ་ནིང་གི་སྔོན་དུ་མི་འཇུག་གོ། དམིགས་བསལ་མདོར་བསྡུ་ན། སྔོན་འཇུག་ལྔ་པོ་གསལ་བྱེད་བཞི་ཚན་རེ་བཅད་པའི་རང་རང་གི་སྡེ་བའི་ཡི་གེ་གང་གིའང་སྔོན་དུ་འཇུག་པ་མི་སྲིད་པར་ཤེས་པར་བྱའོ། །གཉིས་པ་ཇི་ལྟར་འཇུག་པ་ནི། སྔོན་འཇུག་གི་ཕོ་ཡིག་བ་ནི། རང་གི་འཇུག་ཡུལ་མིང་གཞིའི་ཡི་གེ་ལ་སྐད་གདངས་དྲག་པའི་ཚུལ་གྱིས་འཇུགམ་ནིང་ག་དང་ད་ཡིག་ནི། སྐད་གདངས་དྲག་ཞན་རན་པའི་ཚུལ་གྱིས་འཇུགམོ་འ་ཡིག་ནི། སྐད་གདངས་ཞན་པའི་ཚུལ་གྱིས་འཇུགཤིན་ཏུ་མོ་མ་ཡིག་ནི། སྐད་གདངས་མཉམ་པ་སྟེ་ཤིན་ཏུ་ཞན་ཅིང་ལྷོད་པའི་ཚུལ་དུ་འཇུག་པར་བཤད་དོ། །གསུམ་པ་དགོས་པ་ཅིའི་ཕྱིར་འཇུག་པ་ནི།ཕོ་ནི་འདས་དང་གཞན་བསྒྲུབ་ཕྱིར། །མ་ནིང་གཉིས་ཀ་ད་ལྟར་ཆེད། །མོ་ནི་བདག་དང་མ་འོངས་ཕྱིར། །ཤིན་ཏུ་མོ་ནི་མཉམ་པས་སོ། །༡༡། །རྟགས་ཀྱི་འཇུག་པའི་དགོངས་འགྲེལ་རབ་གསལ་སྣང་བ།ཞེས་པའི་དོན། མཁྱེན་གཏེར་རྗེས་བཟུང་མཁས་པ་རིན་ཆེན་དོན་གྲུབ་མཚན་ཅན་གྱིས།དེ་ཡང་དངོས་པོ་ལས་དང་ནི། །དུས་དང་རྣམ་པ་གསུམ་དུ་འདོད། །དངོས་པོ་བདག་གཞན་གཉིས་ཀ་དང་། །བྱ་བའི་ཡུལ་དང་རྣམ་པ་བཞི། ལས་ནི་བྱ་བ་བྱེད་པ་གཉིས། །དུས་ནི་འདས་དང་མ་འོངས་དང་། །ད་ལྟར་དང་བཅས་གསུམ་དུ་འགྱུར། །བྱེད་པ་པོ་ནི་བདག་ཡིན་ཏེ། །བྱ་བའི་དངོས་པོ་གཞན་ཡིན་ནོ། །བྱ་བ་བསྒྲུབ་པའི་ཡུལ་ལ་ནི། ལས་ཀྱི་དངོས་པོ་ཞེས་པར་བརྗོད། །བྱེད་པ་པོ་དང་འབྲེལ་བའི་ལས། །བྱེད་པའི་ལས་ཞེས་བྱ་བ་སྟེ། །བྱ་བའི་ཡུལ་དང་འབྲེལ་བའི་ལས། །བྱ་བའི་ལས་ཞེས་འདོགས་པ་ཡིན། །བྱ་བ་ཟིན་དང་བྱེད་འགྱུར་དང་། །ད་ལྟ་བྱེད་བཞིན་པ་རྣམས་ལ། །འདས་དང་མ་འོངས་ད་ལྟར་འདོད། །དུས་གསུམ་བྱ་བྱེད་བདག་གཞན་ཏེ། །ཀུན་ལ་མཉམ་པར་འཇུག་པ་ནི། །མཉམ་པར་འཇུག་པའི་དོན་ཅན་ནོ། །ཞེས་ཚིགས་སུ་བཅད་པའི་སྒོ་ནས་རྩ་བའི་དཀའ་གནས་གསལ་བར་མཛད་དོ། །དེ་ཡང་དོན་བསྡུ་ན། དངོས་པོ་དང་། ལས་དང་། དུས་ལ་འཇུག་པ་སྟེ་རྣམ་པ་གསུམ་དུ་འདུས་སོ། །དང་པོ་དངོས་པོ་ལ། དངོས་པོ་བདག་དང།གཞན་དང་། བདག་གཞན་གཉིས་ཀ་དང་། བྱ་བའི་ཡུལ་ལ་འཇུག་པ་སྟེ་བཞིའོ། །གཉིས་པ་ལས་ལ་གཉིས་ཏེ། བྱ་བའི་ལས་དང་། བྱེད་པའི་ལས་ལ་ཨ་ཀྱཱ་ཡོངས་འཛིན་དབྱངས་ཅན་དགའ་བའི་བློ་གྲོས།འཇུག་པ་གཉིས་སོ། །གསུམ་པ་དུས་ནི། འདས་མ་འོངས་ད་ལྟ་ལ་འཇུག་པ་གསུམ་དུ་འགྱུར་རོ། །ལས་གང་བྱེད་པ་པོ་ལ་བདག་ཅེས་བྱ་སྟེ། དཔེར་ན། ཤིང་གཅོད་པ་པོ་ལྟ་བུའོ། །གང་བྱ་བའི་དངོས་པོ་ནི་གཞན་ཡིན་ཏེ། ཤིང་གཅད་པའི་བྱ་བ་ལྟ་བུའོ། །བྱ་བ་བསྒྲུབ་པར་བྱ་བའི་ཡུལ་ལ་ལས་ཀྱི་དངོས་པོ་ཞེས་བརྗོད་དེ།གཅད་བྱའི་ཤིང་ལྟ་བུའོ། །བྱེད་པ་པོ་ཤིང་མཁན་དང་འབྲེལ་བའི་ལས་ལ་བྱེད་པའི་ལས་ཞེས་བྱ་སྟེ། ཤིང་མཁན་གྱིས་སྟ་རེས་ཤིང་གཅོད་པ་ལྟ་བུའོ། །བྱ་བའི་ཡུལ་ཤིང་དང་འབྲེལ་བའི་ལས་ལ་བྱ་བའི་ལས་ཞེས་འདོགས་པ་ཡིན་ཏེ།དཔེར་ན། ཤིང་བཅད་ནས་དུམ་བུར་སོང་བའི་ཆ་ལྟ་བུའོ། །བྱ་བ་གང་ཡང་རུང་བ་ཞིག་བྱས་ཟིན་པ་ནི་འདས་པ་དང་། བྱེད་པར་འགྱུར་བ་ནི་མ་འོངས་པ་དང་། བྱེད་བཞིན་པ་ནི་དུས་ད་ལྟ་བར་འདོད་པའོ། །མདོར་ན་ཤིང་མཁན་ནི་བྱེད་པ་པོ་དང་། སྟ་རེ་བྱེད་པ་དང་། ཤིང་ལས་ཡིན་ཞིང་། སྟ་རེས་ཤིང་གཅོད་པའི་བྱ་བ་ནི། སྟ་རེ་དང་འབྲེལ་ནས་ངོ་བོ་གཅིག་ཏུ་ཡོད་པས་ན་བྱེད་པ་པོ་དང་འབྲེལ་བའི་ལས་དང་། ཤིང་བཅད་ནས་དུམ་བུར་སོང་བའི་ཆ་ཤིང་ཁོ་རང་དང་འབྲེལ་ནས་ཡོད་པས་བྱ་བའི་ལས་ཞེས་བྱའོ། །བྱེད་པ་པོ་དང་།བྱེད་པ་དང་། བྱེད་པའི་ལས་རྣམས་དངོས་པོ་བདག་དང་། བྱ་བའི་ཡུལ་ཤིང་དང་། བྱ་བའི་ལས་ཤིང་དུམ་བུར་བཅད་པའི་ཆ་དངོས་པོ་གཞན་དུ་འཇོག་པའོ། །རྟགས་ཀྱི་འཇུག་པའི་དོན་དཔྱིས་ཕྱིན་པར་ཤེས་པ་དེ་དག་གོ་བ་ལ་རག་ལས་པ་ཡིན་ནོ། །ཤེས་བྱའི་སྤུ་རིས་ཕྲ་བ་དག། མ་འདྲེས་གསལ་བར་རྟགས་ཀྱི་འཇུག་པའི་དགོངས་འགྲེལ་རབ་གསལ་སྣང་བ།ཕྱེ་བ་འདི། །གཅེས་ནོར་ཕལ་གྱིས་ཁུགས་ནུས་མིན། །བློ་ལྡན་དགྱེས་པའི་སྐྱེས་བུ་འབུལ། །དེ་ནས་སྔོན་འཇུག་རྣམས་དགོས་པ་ཅིའི་ཕྱིར་འཇུག་པ་ལ། སྔོན་འཇུག་གི་ཕོ་བ་ཡིག་ནི། དུས་འདས་པ་དང་། དངོས་པོ་གཞན་དང་། བྱ་བ་བསྒྲུབ་པའི་ཕྱིར་འཇུག་པ་ལས། འདས་པ་ལ་འཇུག་པ་ནི།དཔེར་ན། ཆུ་བཀགགོང་དུ་བཀུར་ཏོ། །གོས་བསྐོན་ཏོ། །བརྩེ་བས་བསྐྱངས། ཆུ་ལས་བསྒྲལ་ཏོ། །ལྷ་བསྒྲུབས། བདག་མེད་བསྒོམས། ཚོད་བགམས། ལམ་བསྒགས། དུས་བསྐྱངས། བུ་རམ་བསྒར་ཏོ། །སྒྲོ་འདོགས་བཅད། རྩྭ་བརྔས། དགྲ་བཅོམ། བརྗོད་ཟིན། བསྙེན་པར་བྱས། མིག་གིས་བལྟས། སྨན་བསྡེབས། མཚོན་བསྣམས། བུ་བཙས། གཞུང་བརྩམས། དྲུས་མ་བཞོས། གོས་བཟར། ལག་ཏུ་བཟུང་། སྔགས་བཟླས། ཡི་གེ་བསླབས།བྱིན་གྱིས་བརླབས། སྡིག་པ་བཤགས། མཆོད་པ་བཤམས། ཕྱོགས་གཅིག་བསྲེས། མེར་བསྲེགས། ཞེས་སོགས་དང་། དངོས་པོ་གཞན་ལ་འཇུག་པ་ནི།བཀུ་བྱའི་སྨན། བཀུར་བྱའི་བླ་མ། བསྒག་བྱ། བསྒྱང་བྱ། བསྒར་བྱ། བསྒོམ་བྱ། བསྐུབ་བྱ། བརྔ་བྱའི་རྩྭ། བསྔོ་བྱའི་དགེ་རྩ། བཅོལ་བྱའི་རྫས། བརྗོད་བྱའི་དོན། བརྙན་བྱའི་གོས། བཏུ་བྱའི་སྔགས། བལྟ་བྱའི་གཟུགས། བསྟན་བྱ།བདར་བྱའི་ཕྱེ་མ། བསྡེབ་བྱ། བསྣམ་བྱ། བཙོ་བྱའི་ཤ། བརྩམ་བྱའི་ཆོས། བཞོ་བྱའི་འོ་མ། བཟེད་བྱའི་སྣོད། བཟླ་བྱའི་སྔགས། བཤག་བྱའི་ཉེས་པ། བསག་བྱའི་དགེ་བ། ཞེས་སོགས་ལྟ་བུའོ། །བྱ་བའི་ལས་བསྒྲུབ་པའི་ཕྱིར་འཇུག་པ་ཨ་ཀྱཱ་ཡོངས་འཛིན་དབྱངས་ཅན་དགའ་བའི་བློ་གྲོས།ནི། བཀུར་བར་བྱ། བསྐྱང་བར་བྱ། བསྒོམ་པར་བྱ། བསྔོ་བར་བྱ། བཏུ་བར་བྱ། བརྩི་བར་བྱ། བཞུ་བར་བྱ། བསྲུང་བར་བྱ་སོགས་བཤད་མ་ཐག་པ་ལ་བྱ་ཚིག་སྦྱར་བ་རྣམས་སོ། །དེ་དག་གི་འཇུག་ཚུལ་རིམ་པ་བཞིན་དཔེར་བརྗོད་པ་ནི། བཀུར་ཏོ་བཀུར་བྱ་བཀུར་བར་བྱ། །བསྐྱེད་ཟིན་བསྐྱེད་བྱ་བསྐྱེད་པར་བྱ། །བསྐྱབས་དང་བསྐྱབ་བྱ་བསྐྱབ་པར་བྱ། །བསྐྱངས་དང་བསྐྱང་བྱ་བསྐྱང་བར་བྱ།བསྐུམས་དང་བསྐུམ་བྱ་བསྐུམ་པར་བྱ། །བརྐྱངས་དང་བརྐྱང་བྱ་བརྐྱང་བར་བྱ། །བསྐུར་ཏོ་བསྐུར་བྱ་བསྐུར་བར་བྱ། །བསྐུལ་ཏོ་བསྐུལ་བྱ་བསྐུལ་བར་བྱ། །དཔོན་བསྐོས་བསྐོ་བྱ་བསྐོ་བར་བྱ། །སྣུམ་བསྐུས་བསྐུ་རྒྱུ་བསྐུ་བར་བྱ། །ནོར་བརྐུས་བརྐུ་བྱ་བརྐུ་བར་བྱ། །ལྷ་བསྒོམས་བསྒོམ་བྱ་བསྒོམ་པར་བྱ། །ཆོས་བསྒྲུབས་བསྒྲུབ་བྱ་བསྒྲུབ་པར་བྱ། །མནའ་བསྒགས་བསྒག་བྱ་བསྒག་པར་བྱ། །དུས་བསྒྱངས་བསྒྱང་བྱ་བསྒྱང་བར་བྱ། །བསྒར་ཏོ་བསྒར་བྱ་བསྒར་བར་བྱ། །བསྒྲལ་ཏོ་བསྒྲལ་བྱ་བསྒྲལ་བར་བྱ། །བརྒྱན་ཏོ་བརྒྱན་བྱ་བརྒྱན་པར་བྱ། །ཕྲེང་བརྒྱུས་བརྒྱུ་བྱ་བརྒྱུ་བར་བྱ། །ཞིང་བརྔས་བརྔ་བྱ་བརྔ་བར་བྱ། །དགེ་བསྔོས་བསྔོ་བྱ་བསྔོ་བར་བྱ། །བརྗོད་ཟིན་བརྗོད་བྱ་བརྗོད་པར་བྱ། ། བསྙད་ཟིན་བསྙད་བྱ་བསྙད་པར་བྱ། མིག་བལྟས་བལྟ་བྱ་བལྟ་བར་བྱ། །ངག་བསྡམས་བསྡམ་བྱ་བསྡམ་པར་བྱ། །སྨན་བསྡེབས་བསྡེབ་བྱ་བསྡེབ་པར་བྱ། །དོན་བསྡུས་བསྡུ་བྱ་བསྡུ་བར་བྱ། །མཚོན་བསྣམས་བསྣམ་བྱ་བསྣམ་པར་བྱ། །ཤ་བཙོས་བཙོ་བྱ་བཙོ་བར་བྱ། །ཆོས་བརྩམས་བརྩམ་རྟགས་ཀྱི་འཇུག་པའི་དགོངས་འགྲེལ་རབ་གསལ་སྣང་བ།བྱ་བརྩམ་པར་བྱ། །གྲངས་བརྩིས་བརྩི་བྱ་བརྩི་བར་བྱ། །བཞར་ཟིན་བཞར་བྱ་བཞར་བར་བྱ། །བཞོས་དང་བཞོ་བྱ་བཞོ་བར་བྱ། །སྔགས་བཟླས་བཟླ་བྱ་བཟླ་བར་བྱ། །ཆོས་བསླབས་བསླབ་བྱ་བསླབ་པར་བྱ། །བཤད་ཟིན་བཤད་བྱ་བཤད་པར་བྱ། །མཆོད་བཤམས་བཤམ་བྱ་བཤམ་པར་བྱ། །བསྲེས་དང་བསྲེ་བྱ་བསྲེ་བར་བྱ། །ཤིང་བསྲེགས་བསྲེག་བྱ་བསྲེག་པར་བྱ། །ཁྲིམས་བསྲུངས་བསྲུང་བྱ་བསྲུང་བར་བྱ། །ཞེས་སོགས་ལྟ་བུ་སྟེ་རིམ་པ་བཞིན་དུས་འདས་པ་དང་དངོས་པོ་གཞན་དང་བྱ་བ་བསྒྲུབ་པ་ལ་འཇུག་པའོ། །དེ་ཡང་སྣོད་བཀང་། ཆུ་བཀགལག་ཏུ་བཟུང་ལྟ་བུ་སྔོན་འཇུག་ཁོ་ནའི་ནུས་པས་འདས་ཚིག་ཏུ་གྲུབ་པས་ཡང་འཇུག་མེད་ཅིང་། བསྒོམས་བསྒྲུབས་ལྟ་བུ་གཙོ་བོར་ཡང་འཇུག་གི་ནུས་པས་འདས་ཚིག་ཏུ་གྱུར་པ་ཡིན་གྱི། ཡང་འཇུག་མེད་ན་འདས་ཚིག་ཏུ་མི་འགྲོའ།ོ །ན་ར་ལའི་མཐར་སླར་བསྡུའི་ཏོ་སྦྱར་བ་འདས་ཚིག་ལ་ད་དྲག་འཐོབ་པའི་དོན་དུ་ཡིན་ལ། འདས་ཚིག་མིན་ན་བསྐོན་ནོ། །བསྐུར་རོ། །བསྒྲལ་ལོ་ཞེས་པར་འགྱུར་གྱི་བསྐོན་ཏོ་སོགས་སུ་མི་འགྱུར་རོ། །ཡང་བྱ་ཚིག་མེད་ཀྱང་བཟའ་བ། བཏུང་བ། བགོ་བ། བཅིབ་པ། བཞོ་བ། བཟླ་བ་སོགས་དངོས་པོ་གཞན་ལ་འཇུག་པ་སོགས་ཀྱི་ཁྱད་པར་ཤེས་པ་གལ་ཆེ་ཞིང་། དེ་བཞིན་དུ་འཆད་འགྱུར་མ་ནིང་དང་མོ་ཡིག་སོགས་ཀྱི་འཇུག་པའི་སྐབས་སུའང་ཤེས་པར་བྱའོ། །དེ་དག་གི་ཟླས་དྲངས་པའི་བྱེད་པ་པོ་དང་། བྱེད་པའི་ཚིག་ད་ལྟ་བ་ལ་བས་འཕུལ་མེད་དེ།སྐྱེད་པ་པོ་དང་། སྐྱོང་བ་པོ། སྐྱོབ་པ་པོ། དཔོན་སྐོ་བ་པོ། ནོར་རྐུ་བ་པོ། ཆོས་ཨ་ཀྱཱ་ཡོངས་འཛིན་དབྱངས་ཅན་དགའ་བའི་བློ་གྲོས།ལ་སྐུལ་བ་པོ། གཏམ་སྒྲོག་པ་པོ། སྒོམ་པ་པོ། སྒྲུབ་པ་པོ། སྒྲོལ་བ་པོ། ཕྲེང་བ་རྒྱུད་པ་པོ། ཆོས་སྒྱུར་བ་པོ། ཞིང་རྔ་བ་པོ། དགེ་བ་སྔོ་བ་པོ། རྗོད་པ་པོ། ལྟ་བ་པོ། སྡུད་པ་པོ། སྡོམ་པ་པོ། ཆོས་རྩོམ་པ་པོ། རྒྱུ་སྐར་རྩི་བ་པོ། ཁང་པ་རྩིག་པ་པོ། མཆོད་པ་ཤོམ་པ་པོ། མེ་ལ་སྲོ་བ་པོ། མེས་སྲེག་པ་པོ། ཆོས་སེམས་པ་པོ། ཞེས་སོགས་དང་། བྱེད་ཚིག་ལ་འཇུག་པ་ནི། སྐྱེད་པར་བྱེད། སྐྱེད་བྱེད། སྒྲོག་པར་བྱེད། སྒོམ་པར་བྱེད། སྒྲུབ་བྱེད། ཅེས་སོགས་གོང་དུ་བཤད་མ་ཐག་པ་ལ་བྱེད་ཚིག་སྦྱར་བ་རྣམས་སོ། །བསྐུལ་ཚིག་ལ་བས་འཕུལ་མེད་དེ། སྐྱོངས་ཤིགསྐྱོབས་ཤིགསྒོམས་ཤིགསྒྲུབས་ཤིགསྒྲོགས་ཤིག་སྒྲོགས་ཤིག་སོགས་ག་ང་བ་མའི་མཐར་ཡང་འཇུག་ས་ཡིག་དང་། ན་ར་ལའི་མཐར་ཆོས་སྟོན་ཅིགདབང་སྐུར་ཅིགསེམས་ཅན་སྒྲོལ་ཅིག་ཅེས་ཡང་འཇུག་ད་དྲག་འཐོབ་བོ། །དེ་སྐད་རྗོད་ཅིགཞིང་རྔས་ཤིགདགེ་བ་སྔོས་ཤིགམིག་གིས་ལྟོས་ཤིགཉེས་པ་སྡོམས་ཤིགབརྩོན་འགྲུས་རྩོམས་ཤིགགྲངས་རྩིས་ཤིགསྡོམ་པ་སྲུངས་ཤིགཉི་མར་སྲོས་ཤིགམེར་སྲེགས་ཤིགདོན་སོམས་ཤིགཅེས་སོགས་ཕལ་ཆེར་སའི་མཐའ་རྟེན་འཐོབ། དེས་ན་བྱ་བྱེད་ཀྱི་ཚིག་གང་ཡང་མ་སྦྱར་བ་བསྒོམས་དང་། བསྒོམ། སྒོམ། སྒོམས་སོགས་འབྱུང་ཚེ་རིམ་བཞིན་འདས་པ་དང་། བསྒོམ་བྱ་དང་། སྒོམ་པ་པོའམ་སྒོམ་བྱེད་དང་། བསྐུལ་ཚིག་ཏུ་གོ་བ་སོགས་གཞན་ལའང་རིགས་འགྲེའོ། །གཉིས་པ་སྔོན་འཇུག་གི་མ་ནིང་ག་དང་ད་ཡིག་དགོས་པ་ཅིའི་ཕྱིར་འཇུག་པ་ནི། དངོས་པོ་བདག་དང་། གཞན་གཉིས་དང་། དུས་ད་ལྟ་བ་སྟོན་རྟགས་ཀྱི་འཇུག་པའི་དགོངས་འགྲེལ་རབ་གསལ་སྣང་བ།པའི་ཆེད་དུ་འཇུག་པ་གཙོ་ཆེ་སྟེ། གས་འཕུལ་དངོས་པོ་བདག་ལ་འཇུག་པ་དཔེར་ན། ཤིང་གཅོད་པ་པོ། དོན་གཉེར་བ་པོ། སྦྱིན་པ་གཏོང་བ་པོ། གྱེན་དུ་གདེག་པ་པོ། འོག་ཏུ་གནོན་པ་པོ། སྲོལ་འཛུགས་པ་པོ། བློས་གཞིག་པ་པོ།དགྲ་གཞོམ་པ་པོ། གོས་གཟར་བ་པོ། ལག་ཏུ་འཛིན་པ་པོ། ཟས་གཡོ་བ་པོ།སེམས་གཡེང་བ་པོ། ཤིང་གཤོག་པ་པོ། མཆོད་པ་ཤོམ་པ་པོ། དགྲ་གསོད་པ་པོ། ནོར་གསོག་པ་པོ། ཞེས་པ་ལྟ་བུ་དང་། བདག་དང་འབྲེལ་བའི་ལས་སམ་བྱེད་པའི་ལས་ལ་འཇུག་པ་ནི། གཅོད་པར་བྱེད། དོན་དུ་གཉེར་བར་བྱེད། ཁྲག་གཏར་བར་བྱེད། གཏུབ་པར་བྱེད། གདེག་པར་བྱེད། གནོད་པར་བྱེད། མ་གཙུབ་པར་བྱེད། ནང་དུ་གཞུག་པར་བྱེད། དོན་ལ་གཞོལ་བར་བྱེད།ཕྲག་པར་གཟར་བར་བྱེད། གོས་གཡོག་པར་བྱེད། གྲལ་ཏུ་གཤིབ་པར་བྱེད།དགེ་བ་གསོག་པར་བྱེད། ཅེས་སོགས་གོང་སྨོས་རྣམས་ལ་བྱེད་ཚིག་སྦྱར་བ་སྟེ། བྱེད་ལས་ད་ལྟ་བ་ཡང་ཡིན། ག་ཡིག་དངོས་པོ་གཞན་ལ་འཇུག་པ་ནི། གཅད་བྱའི་ཤིང་། གཏང་བྱའི་རྫས། གཉེར་བྱའི་དོན། གཉུལ་བྱའི་ནགས།གདག་བྱའི་མིང་། གཞག་བྱ། གཟུང་བྱ། གསོ་བྱ། ཞེས་སོགས་བྱ་ཚིག་སྦྱར་བ་རྣམས་དང་། གཞན་དང་འབྲེལ་བའི་ལས་སམ་བྱ་བ་ཉིད་ལ་འཇུག་པ་ནི། གཅད་པར་བྱ། གཏང་བར་བྱ། གཉེར་བར་བྱ། གཉུལ་བར་བྱ། གཏུབ་པར་བྱ། གདབ་པར་བྱ། བློ་གཞོལ་བར་བྱ། བཞག་པར་བྱ། གཟུང་བར་བྱ།གསོག་པར་བྱ་སོགས་བྱ་ཚིག་སྦྱར་བ་རྣམས་ཏེ། གཞན་དང་འབྲེལ་བའི་བྱ་བའི་ལས་ད་ལྟ་བར་བཤད་དོ། །སྔོན་འཇུག་གི་ད་ཡིག་དངོས་པོ་བདག་ལ་ཨ་ཀྱཱ་ཡོངས་འཛིན་དབྱངས་ཅན་དགའ་བའི་བློ་གྲོས།འཇུག་པ་ནི། སྐུད་པ་དཀྲི་བ་པོ། ཞོ་དཀྲོག་པ་པོ། རོལ་མོ་དཀྲོལ་བ་པོ། ཕན་ཚུན་དཀྲུག་པ་པོ། ལོགས་སུ་དགར་བ་པོ། ཡི་གེར་དགོད་པ་པོ། མདུད་པ་དགྲོལ་བ་པོ། མཚར་དུ་དངར་བ་པོ། སྐྲག་པའི་དངང་བ་པོ། གཏིང་དཔོག་པ་པོ། རིགས་པས་དཔྱོད་པ་པོ། ལས་ལ་དབང་བ་པོ། མདུང་དབྱུག་པ་པོ། ལྷ་ལ་དམིགས་པ་པོ། གཞན་ལ་དམོད་པ་པོ། འཛུམ་དམུལ་བ་པོ།བྱེད་པའི་ལས་ལ་འཇུག་པ་ནི། དཀྲི་བར་བྱེད། དཀྲོལ་བར་བྱེད།དགར་བར་བྱེད། དགྲོལ་བར་བྱེད། དཔོག་པར་བྱེད། དཀྲི་བྱེད། དཀྲོག་བྱེད།དཀྲོལ་བྱེད། ཅེས་སོགས་བྱེད་ཚིག་སྦྱར་བ་རྣམས་དང་།ད་ཡིག་དངོས་པོ་གཞན་ལ་འཇུག་པ་ནི། དཀྲི་བྱའི་སྐུད་པ། དཀྲོག་བྱའི་ཞོ། དཀྲོལ་བྱའི་དྲིལ་བུ་དང་། དགག་བྱ། དགང་བྱ། དགར་བྱ། དབུལ་བྱ། དབྱུང་བྱ། དཔྱད་བྱ། དཔག་བྱ། ཞེས་དང་། ག་དང་ད་ཡིག་བདག་གཞན་གཉིས་ཀ་ལ་ཁྱད་པར་མེད་པར་འཇུག་པའང་མང་སྟེ། གཅེས་དང་གཉེར་དང་གཏོར་བ་སོགས། །གཅེས་པ་པོ་དང་གཅེས་བྱའི་ནོར། །གཉེར་བ་པོ་དང་གཉེར་བྱའི་དོན། །གཏོར་བ་པོ་དང་གཏོར་བྱའི་འབྲུ། །གདུ་པ་པོ་དང་གདུ་བྱའི་སྨན། །གནོད་པ་པོ་དང་གནོད་བྱའི་ལུས། །གཙུག་པ་པོ་དང་གཙུག་བྱའི་ཤིང་། །གཞོལ་བ་པོ་དང་གཞོལ་བྱའི་ལས། །གཟར་བ་པོ་དང་གཟར་བྱའི་གོས། །གཡེང་བ་པོ་དང་གཡེང་བྱའི་ཡུལ། །གཤོ་བ་པོ་དང་གཤོ་བྱའི་ཆུ། །གསོ་བ་པོ་དང་གསོ་བྱའི་ནད། །དཀྲི་བ་པོ་དང་དཀྲི་བྱའི་དར། །དཀྱུ་བ་པོ་དང་དཀྱུ་བྱའི་རྟ། །དགར་བ་པོ་དང་དགར་བྱའི་གནས། །དགྱེས་པ་པོ་དང་རྟགས་ཀྱི་འཇུག་པའི་དགོངས་འགྲེལ་རབ་གསལ་སྣང་བ།དགྱེས་བྱའི་ཡུལ། །དབང་པོ་དང་དབང་བྱའི་ནོར། །དམོད་པ་པོ་དང་དམོད་བྱའི་ཡུལ། །དམིགས་པ་པོ་དང་དམིགས་བྱའི་རྟེན། །ཞེས་སོགས་དངོས་པོ་བདག་གཞན་གཉིས་ཀ་ལ་འཇུག་པར་འདྲ་བའོ། །དངོས་པོ་གཞན་དང་འབྲེལ་བའི་བྱ་བའི་ལས་ལ་འཇུག་པ་ནི། དཀྲི་བར་བྱ། དཀྲོལ་བར་བྱ། དགག་པར་བྱ། དགང་བར་བྱ་སོགས་སྦྱར་བ་རྣམས་དང་། ད་ཡིག་ད་ལྟ་བ་ལ་འཇུག་པ་ནི། དཀྲི་བཞིན་པ། དཀྲོལ་བཞིན་པ། དཀྲོག་བཞིན་པ། ཚིག་གྲོགས་མ་སྦྱར་ཡང་། དགགདགང་། དགའ་བ། དགྱེས་པ།དགྲམ། དགྲོལ། དགུགདགོད། དབུལ། དབབ། དབུགདབྲོལ། དབྱེ། དབྱུང་སོགས་སྐབས་འཐོབ་ཀྱིས་ད་ལྟ་བ་དང་མ་འོངས་པ་ཅི་རིགས་པར་འཇུག་པ་དང་། བདག་གཞན་དང་འབྲེལ་བའི་བྱ་བྱེད་ལས་ཀྱི་སྒྲ་རྣམས་ཀྱང་ད་ལྟ་བར་བཤད་དེ། དཔེར་ན། སྟ་རེས་ཤིང་གཤོག་པའི་བྱ་བ་བྱེད་བཞིན་པ་ལ་བྱེད་པའི་ལས་དང་། ཤིང་ལ་ཕོག་པས་དུམ་བུར་འགྲོ་བཞིན་པ་དེ་ལ་བྱ་བའི་ལས་ཞེས་བཏགས་པས་ན་ལས་དེ་གཉིས་ཀ་དུས་ད་ལྟ་བར་འཇོག་ཅིང་། ཞ་ལུ་ལོ་ཆེན་གྱིས་བྱ་བའི་ལས་མ་འོངས་པར་གསུངས་ཤིང་། མཁས་པ་མང་པོས་ད་ལྟ་བར་བཞེད་ལ། འོན་ཀྱང་རྗོད་པ་པོའ་ིབསམ་དོན་གྱི་དབང་དང་། ཚིག་གྲོགས་ལས་ཀྱང་མ་འོངས་པ་ལ་འཇུག་པར་གསལ་བས་འགལ་བ་མིན་ནོ། །གསུམ་པ་སྔོན་འཇུག་གི་མོ་འ་ཡིག་དགོས་པ་ཅིའི་ཕྱིར་འཇུག་པ་ནི།དངོས་པོ་བདག་གཞན་གཉིས་ལས་བདག་དང་། དུས་གསུམ་ལས་གཙོ་བོར་མ་འོངས་པ་སྟོན་པའི་ཕྱིར་འཇུག་གོ། དངོས་པོ་བདག་ལ་འཇུག་པ་དཔེར་ཨ་ཀྱཱ་ཡོངས་འཛིན་དབྱངས་ཅན་དགའ་བའི་བློ་གྲོས།ན། སྐུད་པ་འཁལ་བ་པོ། ཁུར་འཁུར་བ་པོ། འཁོར་བ་པོ། འཁྱམས་པ་པོ།སེམས་འཁྲེན་པ་པོ། འཁྲིད་པ་པོ། དྲི་མ་འཁྲུད་པ་པོ། ལམ་ལ་འགོད་པ་པོ།ཕྱེ་འགམ་པ་པོ། འགྲོ་བ་པོ། འཆག་པ་པོ། འཆད་པ་པོ། ལས་འཆོལ་བ་པོ།བྱེད་དུ་འཇུག་པ་པོ། དགྲ་འཇོམས་པ་པོ། འཐབ་པ་པོ། འདོན་པ་པོ། འདྲེན་པ་པོ། འཕོ་བ་པོ། འཕྲོག་པ་པོ། འབད་པ་པོ། འཚོལ་བ་པོ། བཞིན་འཛུམ་པ་པོ།ཞེས་པ་ལྟ་བུ་དང་།བདག་དང་འབྲེལ་བའི་བྱེད་པའི་ལས་ལ་འཇུག་པ་ནི། སྐུད་པ་འཁལ་བར་བྱེད། ཁུར་འཁུར་བར་བྱེད། འཁྱུད་པར་བྱེད། ཁྱིམ་ལ་འཁྲེན་པར་བྱེད།འདྲེན་པར་བྱེད། ཅེས་སོགས་གོང་སྨོས་དཔེར་བརྗོད་དང་སྦྱར་ཏེ་ཤེས་པར་བྱ། དུས་མ་འོངས་པ་ལ་འཇུག་པ་ནི། འཁལ་བར་འགྱུར། འགྲོ་བར་འགྱུར།འཆག་པར་འགྱུར། དེ་བཞིན་དུ། འགྱུར། འགྲུབ། འཆར། འདག འབྱུང།འཛད། ཅེས་སོགས་རྣམས་སོ། །རྩ་བར་དངོས་སུ་མ་གསུངས་ཀྱང་འས་འཕུལ་ད་ལྟ་བ་ལ་འཇུག་པ་མང་བར་བཤད་དེ། སྲང་གིས་འཇལ་བཞིན་པ།གདན་འདིང་གི་སྣང་། རྒྱན་འདོགས་གྱིན་འདུགསེམས་འདུལ་བར་བྱེད། དེ་བཞིན་དུ། འཇིགའཇིལ། འཇོམ། འཇོགའཇུགའཛུགའཛིན་སོགས་དུས་ད་ལྟ་བ་ལ་འཇུག་པར་ཡང་ཞ་ལུ་ལོ་ཆེན་གྱིས་གསུངས་པས་ཚིག་གྲོགས་ལས་ཤེས་པར་བྱའོ། །བཞི་པ་སྔོན་འཇུག་གི་ཤིན་ཏུ་མོ་ཡིག་མ་ནི། དགོས་པ་ཅིའི་ཕྱིར་འཇུག་པ་ནི། དངོས་པོ་བདག་དང་གཞན་གཉིས་ཀ་དང་དེ་དག་དང་འབྲེལ་རྟགས་ཀྱི་འཇུག་པའི་དགོངས་འགྲེལ་རབ་གསལ་སྣང་བ།བའི་བྱ་བྱེད་ཀྱི་ལས་དང་། དུས་འདས་མ་འོངས་ད་ལྟ་བ་གསུམ་སྟེ་ཐམས་ཅད་ལ་ཁྱད་མེད་དུ་མཉམ་པར་འཇུག་སྟེ། དངོས་པོ་བདག་ལ་འཇུག་པ་དཔེར་ན། མཁས་པ་པོ། མཆོད་པ་པོ། མཐོང་བ་པོ། མཚོན་པ་པོ། མཁྱེན་པ་པོ། དེ་བཞིན་དུ། མགུ། མངགམངོན། མཇལ། མཉམ། མདུད། མནོ། མཛད་སོགས་ལ་སྦྱར་ཏེ་ཤེས་པར་བྱ། བདག་དང་འབྲེལ་བའི་ལས་ལ་འཇུག་པ་ཡང་། མཁས་པར་བྱེད། མཆོད་པར་བྱེད། འཕོ་བར་བྱེད་སོགས་བྱེད་ཚིག་ཅན་རྣམས་དང་།དངོས་པོ་གཞན་ལ་འཇུག་པ་ནི། མཁས་བྱ། མཆོད་བྱ། མཚོན་བྱ།ཞེས་སོགས་དང་། གཞན་དང་འབྲེལ་བའི་ལས་ལ་འཇུག་པ། མཁས་པར་བྱ།མཆོད་པར་བྱ། མཚོན་པར་བྱ་ཞེས་སོགས་བྱ་ཚིག་སྦྱར་ཏེ་ཤེས་པར་བྱའོ།།དུས་འདས་པ་ལ་འཇུག་པ་ནི། གོང་སྨོས་ལྟ་བུ་ལ་མཁས་ཟིན། མཆོད་པར་བྱས། མཐོང་བར་གྱུར་སོགས་སྦྱར་བ་རྣམས་དང་། མ་འོངས་པ་ལ་འཇུག་པ། མཁས་པར་འགྱུར། མཆོད་པར་འགྱུར། ཞེས་སོགས་དང་། དུས་ད་ལྟ་བ་ལ་འཇུག་པ་ནི། མཁས་བཞིན་པ། མཆོད་གྱིན་སྣང་། མཐོང་གི་འདུགཅེས་སོགས་ཚིག་གྲོགས་ལས་གསལ་ཏེ་གོ་སླའོ། །འདིར་སྔོན་འཇུག་རྣམས་དུས་དང་བདག་གཞན་སོགས་ལ་འཇུག་ཚུལ་གྱི་དཔེར་བརྗོད་གལ་ཆེ་བ་འགའ་ཞིག་བཀོད་པ་ནི། རིམ་པ་བཞིན་དངོས་པོ་གཞན་དང་། བདག་གམ་བདག་དང་འབྲེལ་བའི་བྱེད་ལས་དང་།དུས་འདས་པ་ལ་འཇུག་པར་ཤེས་པར་བྱ་སྟེ། གཅད་བྱ་གཅོད་བྱེད་བཅད་ཨ་ཀྱཱ་ཡོངས་འཛིན་དབྱངས་ཅན་དགའ་བའི་བློ་གྲོས།པ་དང་། །གཏང་བྱ་གཏོང་བྱེད་བཏང་བ་དང་། །གདིང་བྱ་འདིང་བྱེད་བཏིང་བ་དང་། །གདགས་བྱ་འདོགས་བྱེད་བཏགས་པ་དང་། །གདབ་བྱ་འདེབས་བྱེད་བཏབ་པ་དང་། གདུལ་བྱ་འདུལ་བྱེད་བཏུལ་བ་དང་། གདེག་བྱ་འདེགས་བྱེད་བཏེག་པ་དང་། །གདོན་བྱ་འདོན་བྱེད་བཏོན་པ་དང་། །གནན་བྱ་གནོན་བྱེད་མནན་པ་དང་། །གཞལ་བྱ་འཇལ་བྱེད་བཅལ་བ་དང་། །གཞོམ་བྱ་འཇོམས་བྱེད་བཅོམ་པ་དང་། གཞག་བྱ་འཇོག་བྱེད་བཞག་པ་དང་། །གཞིག་བྱ་འཇིག་བྱེད་བཤིག་པ་དང་། གཞིལ་བྱ་འཇིལ་བྱེད་བཅིལ་བ་དང་། །གཞུག་བྱ་འཇུག་བྱེད་བཅུག་པ་དང་། །གཟུག་བྱ་འཛུག་བྱེད་བཙུག་པ་དང་། །གཟུང་བྱ་འཛིན་བྱེད་བཟུང་བ་དང་། །གསད་བྱ་གསོད་བྱེད་བསད་པ་དང་། །ཞེས་སོགས་ཀྱི་གཅད་བྱ། གཏང་བྱ། གདིང་བྱ་ཞེས་བྱ་ཚིག་སྦྱར་བ་དངོས་པོ་གཞན་དང་། གཅོད་པ་པོ། གཅོད་བྱེད། གཏོང་བ་པོ། འདིང་བ་པོ། འདིང་བྱེད་ཅེས་སོགས་བྱེད་ཚིག་སྦྱར་བ་དངོས་པོ་བདག་དང་བདག་དང་འབྲེལ་བའི་བྱེད་ལས་ལའང་འཇུགའདིའི་བས་འཕུལ་འདས་ཚིག་གོ།དེ་བཞིན་དུ་དས་འཕུལ་དངོས་པོ་གཞན་ལ་འཇུག་པ་སོགས་ནི།དགང་བྱ་འགེང་བྱེད་བཀང་བ་དང་། །དགག་བྱ་འགོག་བྱེད་བཀག་པ་དང།།ཟོང་དགྲམ་འགྲེམ་བྱེད་བཀྲམ་པ་དང་། །འགྲོལ་བྱ་འགྲོལ་བྱེད་བཀྲོལ་བ་དང་། །དགུག་བྱ་འགུག་བྱེད་བཀུག་པ་དང་། །དགོད་བྱ་འགོད་བྱེད་བཀོད་པ་དང་། །དབུལ་བྱ་འབུལ་བྱེད་ཕུལ་བ་དང་། །དབབ་བྱ་འབེབ་བྱེད་ཕབ་པ་དང་། །དབུག་བྱ་འབིག་བྱེད་ཕུག་པ་དང་། །དབྲོག་བྱ་འཕྲེག་བྱེད་ཕྲོགས་རྟགས་ཀྱི་འཇུག་པའི་དགོངས་འགྲེལ་རབ་གསལ་སྣང་བ།པ་དང་། །དབྱེ་བྱ་འབྱེད་བྱེད་ཕྱེ་བ་དང་། སུན་དབྱུང་སུན་འབྱིན་སུན་ཕྱུངས་སོགས། །ཞེས་པ་ལྟ་བུ་འདི་དག་གིས་མཚོན་ནས་རྒྱ་ཆེར་རྟོགས་པར་བྱའོ།།གསུམ་པ་རྗེས་འཇུག་གི་རྟགས་ཀྱི་འཇུག་པ་བཤད་པ་ནི། རྗེས་འཇུག་ཡི་གེ་བཅུ་པོ་ལ། །ཞེས་པ་ནས། འཇུག་གི་སྨོན་ཚིག་ཚིགས་རྐང་གཉིས་བཅས་ཤོ་ལ་ཀ་ཕྱེད་དང་ཉི་ཤུ་རྩ་གསུམ་གསུངས།དེ་ལ་རྗེས་འཇུག་གི་རྟགས་ཀྱི་དབྱེ་བ་བཤད་པ་དང་། དེའི་འཇུག་པ་རྒྱས་པར་བཤད་པ་གཉིས།དང་པོ་༼རྗེས་འཇུག་གི་རྟགས་ཀྱི་དབྱེ་བ་བཤད་པ་༽ནི།མཁན་པོ་ཐོན་མི་སམྦྷོ་ཊས་ཡི་གེའི་བསྟན་བཅོས་བརྒྱད་བརྩམས་པར་གྲགས་ནའང་ཕལ་ཆེར་ནུབ་པའི་དབང་གིས་རྗེས་འཇུག་གི་རྟགས་ཀྱི་དབྱེ་ཚུལ་མི་གསལ་བར་བརྟེན། མཁས་པ་སོ་སོའ་ིབཞེད་པ་མི་མཐུན་པ་མང་ཙམ་སྣང་ཡང་། རེ་ཞིག་བཤད་སྦྱར་ཚིགས་བཅད་མ་ལྟར་ན། ད་བ་ས་གསུམ་རྗེས་འཇུག་གི་ཕོ་དང་། ག་ད་ན་མ་ར་ལ་དྲུག་མོ། འ་རྗེས་འཇུག་གི་མ་ནིང་དུ་བྱས་ནས། སླར་ཡང་ནང་གསེས་ཀྱི་དབྱེ་བ་ནི། ཕོ་ལ་གསུམ་སྟེ།ས་སྐྱེས་བུ་རབ། ད་འབྲིང་། བ་སྐྱེས་བུ་ཐ་མ་དང་། མོ་ལ་ག་ར་ལ་གསུམ་མོ་ཙམ་དང་། ང་ན་མ་གསུམ་ཤིན་ཏུ་མོ་སྟེ་གཉིས། འ་ཡིག་གྲོགས་ཀྱི་དབང་གིས་མ་ནིང་གསུམ་དུ་འགྱུར་རོ། །རྗེས་འཇུག་རྟགས་ཀྱི་དབྱེ་བ་ནི། །ད་བ་ས་གསུམ་ཕོ་ཡིན་ཏེ། །ག་ང་ན་མ་ར་ལ་དྲུག། མོ་ཡིན་འ་ནི་མ་ནིང་ངོ་། །ས་རབ་ད་འབྲིང་བ་ཐ་མ། །ག་ར་ཨ་ཀྱཱ་ཡོངས་འཛིན་དབྱངས་ཅན་དགའ་བའི་བློ་གྲོས།ལ་གསུམ་མོ་ཙམ་སྟེ། །ང་ན་མ་གསུམ་ཤིན་ཏུ་མོ། །འ་ཡིག་མ་ནིང་གསུམ་གར་འགྱུར། །གཉིས་པ་དེའི་འཇུག་པ་རྒྱས་པར་བཤད་པ་ལ་བཞི། གང་ལ་འཇུག་པ། གང་གིས་འཇུག་པ། ཇི་ལྟར་འཇུག་པ། ཅིའི་ཕྱིར་འཇུག་པ་བཤད་པའོ། །དང་པོ་གང་ལ་གང་གིས་འཇུག་པ་གཉིས་ནི། རྗེས་འཇུག་བཅུ་པོ་དེ་སྔོན་འཇུག་དང་མི་འདྲ་བར་མིང་གཞིའི་ཡི་གེ་ཐམས་ཅད་ལ་འཇུག་སྟེ།དཔེར་ན། ཀགཀང་། ཀད། ཀན། ཀབ། ཀམ། ཀའ། ཀར། ཀལ། ཀས་ཞེས་པ་སོགས་ཐམས་ཅད་ལ་ཁྱད་པར་མེད་པར་འཇུག་གོ།གསུམ་པ་ཇི་ལྟར་འཇུག་པ་ལ་གཉིས། སྒྲ་ཡི་འཇུག་ཚུལ་དང་། དོན་གྱི་འཇུག་ཚུལ་ལོ། །དང་པོ་ལ་དྲག་ཞན་སྤྱིའི་འཇུག་ཚུལ་ནི། ཕོ་ཡིག་ད་བ་ས་གསུམ་སྐད་གདངས་དྲག་པའི་ཚུལ་དང་། མོ་ཙམ་དང་། ཤིན་ཏུ་མོ་སྐད་གདངས་ཞན་པའི་ཚུལ་དང་། མ་ནིང་སྐད་གདངས་བར་མའི་ཚུལ་གྱིས་འཇུག་གོ།ནང་གསེས་ཀྱི་འཇུག་ཚུལ་ནི། སྔོན་འཇུག་མིང་གཞི་རྗེས་འཇུག་གསུམ་རང་རང་གི་སྡེ་བའི་ཕོ་ཡིག་ཚེག་བར་གཅིག་ཏུ་ཚོགས་པ་ནི། དྲག་པ་གསུམ་ཁ་ན་ཕྲད་པས་སྒྲ་དྲག་པ་སྟེ། དེ་ལའང་བཀས། བཅས། བཏུས།བཙས་ལྟ་བུ་དྲག་པའི་དྲག་པ་དང་། བཀད། བཅད། བཏད། བཙད་ལྟ་བུ་དྲག་པའི་འབྲིང་དང་། བཀབ། བཅབ། བཙབ་ལྟ་བུ་དྲག་པའི་ཞན་པ་སྟེ། རིམ་པ་བཞིན་སྐྱེས་བུ་རབ་འབྲིང་ཐ་མ་སུ་རྗེས་སུ་འཇུག་པས་སོ། །སྔོན་རྗེས་མིང་རྟགས་ཀྱི་འཇུག་པའི་དགོངས་འགྲེལ་རབ་གསལ་སྣང་བ།གསུམ་མོ་ཡིག་ཁོ་ན་ཚོགས་པ་ཞན་པ་སྟེ། དེ་ཡང་འགགའགར། འགལ།འདགའདར། འཇལ་ལྟ་བུ་མོ་ཙམ་དང་ཕྲད་པ་ཞན་པའི་དྲག་པ་དང་། འགང་།འདོན། འཇམ། འབང་། འཛམ་ལྟ་བུ་ཤིན་ཏུ་མོ་དང་ཕྲད་པ་ཞན་པའི་ཞན་པར་འཇོག་པའོ། །མ་ནིང་འ་ཡིག་གི་འཇུག་ཚུལ་ནི། རྒྱལ་བའི་བཀའ། བཅའ་བ།གཏའ་མ། མེ་བཙའ་ལྟ་བུ་ཕོ་ཡིག་དང་ཕྲད་ན་སྒྲ་དྲག་པ་དང་། འགའ། འཇའ།འདའ། འབའ། ལྟ་བུ་མོ་ཡིག་དང་ཕྲད་ན་ཞན་པར་འགྱུར་བས་ན་འགྱུར་བ་མ་ནིང་དང་། བགའ། བདའ། བཟའ་བ། བཤའ་མ་ལྟ་བུ་སྔོན་འཇུག་ཕོ་དང་མིང་གཞི་མོ་ཡིག་སྟེ། ཕོ་མོ་གཉིས་ཀ་དང་ཕྲད་ན་དྲག་ཞན་གཉིས་ཀའི་ཆ་དང་ལྡན་ཕྱིར་མཚན་གཉིས་མ་ནིང་དང་། ཁའོ། །ཆའ། ཐའ། ཕའ། ཚྭའོ་ལྟ་བུ་མིང་གཞི་མ་ནིང་ཙམ་དང་ཕྲད་ན་དྲག་ཞན་གང་དུ་ཡང་མི་འགྱུར་བས་ན་མཚན་མེད་མ་ནིང་ཞེས་བྱ་སྟེ། འ་ཡིག་གཅིག་པུ་གྲོགས་ཀྱི་དབང་གིས་གསུམ་གར་འགྱུར་བ་ཡིན་གྱི་ངོ་བོའ་ིསྒོ་ནས་མིན་ནོ། །མིང་རྗེས་འཇུག་མེད་པའི་མཐར་འ་ཡིག་འཐོབ་ཀྱང་སྐད་གསར་བཅད་ལ་ཡིག་ཚོགས་སྐྱུང་བའི་ཆེད་མ་བཞག་པའོ། །དེ་ལ་བཤད་ཚུལ་མང་ཡང་རེ་ཞིག་དེ་ཙམ་མོ། །གཉིས་པ་དོན་གྱི་འཇུག་ཚུལ་ལ་གཉིས་ལས། སྔ་མ་གང་ལྟར་གྱུར་པ་ནི། རྗེས་འཇུག་རྣམས་རང་ཉིད་འཇུག་པའི་མིང་དེ་ཉིད་ཀྱི་སྔོན་རྗེས་གཉིས་གས་ཐུན་མོང་དུ་དོན་སྟོན་ཚུལ་ལ། སྔ་མ་སྔོན་འཇུག་གི་ནུས་པ་ནི། ཕོ་ནི་འདས་དང་གཞན་བསྒྲུབ་ཕྱིར། ཞེས་སོགས་ལྟར་ཏེ། ལྷ་བསྒོམས། ཆོས་བསྒྲུབས་སོགས་འདས་པ་དང་། བསྒོམ་བྱ། བསྒྲུབ་བྱ་སོགས་དངོས་པོ་ཨ་ཀྱཱ་ཡོངས་འཛིན་དབྱངས་ཅན་དགའ་བའི་བློ་གྲོས།གཞན་དང་། བསྒོམ་པར་བྱ། བསྒྲུབ་པར་བྱ་སོགས་བྱ་བའི་ལས་བསྒྲུབ་པ་སོགས་སྔོན་འཇུག་ཏུ་མ་ཟད། རྗེས་འཇུག་གིའང་ནུས་པ་ཡིན་པ་དང་། དེ་བཞིན་དུ་མ་ནིང་ག་ད་གཉིས་དང་། མོ་ཙམ་དང་། ཤིན་ཏུ་མོ་རྣམས་ཀྱི་དཔེར་བརྗོད་གོང་དུ་བཀོད་པ་ཐམས་ཅད་ཀྱང་དོན་སྟོན་པ་སྔོན་རྗེས་གཉིས་ཀའི་ནུས་པར་ཤེས་པར་བྱའོ། །གཉིས་པ་ཕྱི་མ་གང་ལྟར་འགྱུར་བ་ལ་གསུམ་ལས། དང་པོ་མིང་མཐའ་དྲག་ཞན་འདྲེན་ཚུལ་ནི། རྗེས་འཇུག་གི་ནུས་པས་ཕྱི་མ་ཚིག་ཕྲད་རྟགས་མཚུངས་སོགས་ཇི་ལྟར་འདྲེན་པ་ནི། མིང་མཐའི་རྗེས་འཇུག་ཕོ་ཡིག་གིས་མིང་གཞིའི་ཕོ་ཡིག་དྲངས་ཏེ། དཔེར་ན། ཐུགས་ཀཐད་ཀཐབ་ཀཐབས་ཅིགསྐད་ཅིགཆོས་པ། ཁྱབ་སྟེ། འཆོས་ཏེ། ལྟ་བུའོ། །དེ་བཞིན་དུ་མོ་ཡིག་གིས་མོ་དྲངས་ཏེ། ལྟག་གམཐིང་གགསུམ་གཉན་གའཆར་གརལ་གདགར་བ། རལ་བ། འབྱུང་བ། ཉུང་མ། ཟར་མ་ཞེས་སོགས་དང་། མ་ནིང་གིས་མ་ནིང་དྲངས་པ་ནི། འདའ་ཁ། སྐྱེ་ཁ་མ། དགའ་ཁ། བུ་བཙའ་ཁ། ཟས་འཇུ་ཁ་སོགས་ལྟ་བུ་རྟགས་མཚུངས་དྲངས་པ་དང་། ཕྱིན་ཏོ། །གྱུར་ཏོ། །བསལ་ཏོ་ལྟ་བུ་ད་དྲག་ཐོབ་པ་དང་། དགོན་པ། འཇམ་པ། དམ་པ། འདོན་པ། རྟག་སྟེ། འབྱུང་སྟེ། འདོན་ཏེ། ཤར་ཏེ། གལ་ཏེ་སོགས་རྟགས་མཚུངས་མིན་ཡང་བརྗོད་བདེ་བའི་དབང་དུ་བྱས་པའོ། །གཉིས་པ་རྣམ་དབྱེ་སྔ་ཤུགས་འདྲེན་པའི་ཚུལ་ནི། བཤད་མ་ཐག་པའི་མིང་མཐའ་དེ་ཉིད་ཀྱིས་རང་གི་སྒྲ་མཐུན་པའི་རྣམ་དབྱེ་དང་ཚིག་ཕྲད་འདྲེན་རྟགས་ཀྱི་འཇུག་པའི་དགོངས་འགྲེལ་རབ་གསལ་སྣང་བ།ཏེ། སྔར་སུམ་ཅུ་པར་བཤད་པ་ལྟར་རྗེས་འཇུག་ས་ཡིག་གི་མཐར་སུ་དང།ག་བ་ད་དྲག་གི་མཐར་ཏུ་དང་། ང་ད་ན་མ་ར་ལའི་མཐར་དུ་དང་། འ་དང་མཐའ་རྟེན་མེད་པའི་མཐར་རུ་དང་། ད་བ་སའི་མཐར་ཀྱི་དང་། ག་ངའི་མཐར་གི་དང་། ན་མ་ར་ལའི་མཐར་གྱི་དང་། འ་དང་མཐའ་རྟེན་མེད་པའི་མཐར་འི་དང་ཡི་གང་རུང་དང་། རྣམ་དབྱེ་ལྔ་པའི་ནས་ལས་དང་། རྣམ་དབྱེ་བརྒྱད་པའི་བོད་པའི་སྒྲ་ཀྱེ་དང་ཀ་ཡེ་སོགས་འདྲེན་ནོ། །གཞན་ཡང་ཚིག་ཕྲད་འདྲེན་པ་ནི། སླར་བསྡུའི་སྒྲ་གོ་ངོ་དོ་ནོ་སོགས་དང་། ལྷག་བཅས་ཀྱི་སྒྲ་སྟེ་ཏེ་དེ་དང་། འབྱེད་པ་དང་སྡུད་པ་གམ་ངམ་དམ་སོགས་དང་། ངེས་གཟུང་ངམ་བརྣན་པ་ནིའི་སྒྲ་དང་། ནས་དང་ནིའི་སྒྲ་དགར་བ་ལའང་འཇུག་པ་དང་། བདག་པོའ་ིསྒྲ་པ་བ་པོ་ཅན་སོགས་དང་། དགག་སྒྲ་མ་མེད་མིན་དང་། བདག་པོའམ་དགག་སྒྲ་གསར་དུ་སྦྱར་བ་མ་ཡིན་པ་བུམ་པ། ཀ་བ། གོང་མ། འོག་མ་ཞེས་པ་ལྟ་བུའི་པ་བ་མ་རྣམས་མིང་གི་ཆ་ཤས་སྒྲུབ་བྱེད་དུ་གནས་པའི་སྒྲུབ་པ་དང་། ཀྱང་ཡང་འང་ཚིག་རྒྱན་དང་སྡུད་པ་ལའང་འཇུག་པ་དང་། དེ་ཞེས་པའི་སྒྲ་དུས་འདས་པ་དང་མ་འོངས་པ་ལའང་འཇུག་པ་སོགས་དོན་འདྲ་ནའང་ཡིག་གཟུགས་མི་འདྲ་བར་འབྱུང་བ་དེ་དག་ཐམས་ཅད་མིང་མཐའ་སྔ་མའི་ཤུགས་ཀྱིས་རང་རང་གི་སྒྲ་མཐུན་དང་རྟགས་མཚུངས་ཅི་རིགས་འདྲེན་པའི་ཆེད་འབྱུང་བ་ཡིན་ཏེ། དཔེར་བརྗོད་སུམ་ཅུ་པའི་སྐབས་འབྱུང་བ་རྣམས་ཡིན་ནོ། །དོན་བསྡུ་ན།ཨ་ཀྱཱ་ཡོངས་འཛིན་དབྱངས་ཅན་དགའ་བའི་བློ་གྲོས།མིང་མཐའ་དེ་དག་ཉིད་ཀྱིས་ནི། །ནས། དེ་དག་སྔ་ཤུགས་འདྲེན་པས་འབྱུང་། །ཞེས་པའི་བར་གྱི་ཚིགས་རྐང་དགུ་ནི། མིང་སྔ་མའི་མཐའ་རྟེན་སོ་སོའ་ི དབང་གིས་རང་རང་གི་རྟགས་མཚུངས་སམ་སྒྲ་མཐུན་བརྗོད་བདེ་འདྲེན་པའི་ཕྱིར་རྣམ་དབྱེ་དང་ཚིག་ཕྲད་གཟུགས་མི་འདྲ་བ་འབྱུང་ངོ་། །ཞེས་པའི་དོན་ཏེ། ཆོས་དངོས་ནི་རྣམ་དབྱེ་དང་པོ་དང་། སྦྱིན་པ་རྣམ་དབྱེ་བཞི་པའི་མིང་ངོ་། །གསུམ་པ་དེའི་ནང་གསེས་འཇུག་ཚུལ་ནི།དེ་དག་ནང་གསེས་གང་འཇུག་པ། །ནས། དེ་དག་ནང་གསེས་རྣམ་པར་དབྱེ། །ཞེས་པའི་བར་ཤོ་ལོ་ཀ་ཕྱེད་དང་ལྔ་གསུངས།དེ་ཡང་རྣམ་དབྱེ་དང་ཚིག་ཕྲད་དེ་དག་གང་དང་གང་འཇུག་ཚུལ་ནི།མིང་ཚིག་སྔོན་མ་སོ་སོའ་ིའཕྲོ་ལ་དེ་མ་ཐག་སྦྱར་རྒྱུའི་ཚིག་དོན་འོག་མ་གང་ཡིན་དེའི་ནུས་པས་ཤེས་དགོས་ཏེ། དཔེར་ན། ངོ་བོ་ཙམ་བརྗོད་པའི་མིང་ལྷ་ཞེས་པའི་འཕྲོ་ལ་ལེགས་སྦྱར་ལ་རྣམ་དབྱེ་དང་པོ་སྦྱར་ཡོད་ན་མིང་ཙམ་དུ་མ་བསྡད་པར་ཚིག་ཏུ་གྱུར་པ་ཡིན་ཀྱང་། བོད་ལ་མིང་དེ་ཀ་རང་ལ་རྣམ་དབྱེ་དང་པོ་ཞེས་པ་མ་གཏོགས་རྣམ་དབྱེ་ལོགས་སུ་སྟེར་རྒྱུ་མེད་དོ། །རྣམ་དབྱེ་སྦྱར་བའི་མིང་ཙམ་ལ་སྤྱིར་འཇུག་ཅེས་བྱ་སྟེ། །མིང་དེ་རྣམ་དབྱེ་དང་ཚིག་ཕྲད་རྣམས་སྦྱར་རྒྱུའི་སྤྱི་ལ་འཇུག་པས་ན་སྤྱིར་འཇུག་ཅེས་བཏགས་རྟགས་ཀྱི་འཇུག་པའི་དགོངས་འགྲེལ་རབ་གསལ་སྣང་བ།པར་མངོན་ནོ། །མིང་དེའི་མཐར་དེ་མ་ཐག་སྦྱར་བའི་དོན་གསལ་བྱེད་ཆར་འབེབས་པར་བྱེད་ཅེས་པ་ལྟ་བུ་བྱེད་པའི་སྒྲ་ཡོད་ན་མིང་སྔོན་མའི་མཐར་རྣམ་དབྱེ་གསུམ་པ་འཇུག་སྟེ། ལྷས་ཆར་འབེབས་པར་བྱེད། ཅེས་པ་ལྟ་བུའོ། །དེ་བཞིན་དུ་ཚིག་དོན་འོག་མར་ཆེད་དུ་བྱེད་པའི་སྒྲ་མཆོད་པ་འབུལ་ལྟ་བུ་ཡོད་ན་རྣམ་དབྱེ་བཞི་པ་འཇུག་སྟེ། ལྷ་ལ་མཆོད་པ་འབུལ་ལྟ་བུ་དང་།བདུད་རྩི་ཡོད་ལྟ་བུ་རྟེན་བྱེད་ཀྱི་སྒྲ་ཡོད་ན་རྣམ་དབྱེ་བདུན་པ་འཇུག་སྟེ། ལྷ་ལ་བདུད་རྩི་ཡོད། ལྟ་བུ་དང་། བལྟ་བར་བྱ་ལྟ་བུ་ལས་སུ་བྱ་བའི་སྒྲ་ཡོད་ན་རྣམ་དབྱེ་གཉིས་པ་འཇུག་སྟེ། ལྷ་རུ་བལྟ་བར་བྱ། ལྟ་བུ་དང་། དངོས་གྲུབ་བླང་ལྟ་བུ་འབྱུང་ཁུངས་ཀྱི་སྒྲ་ཡོད་ན་རྣམ་དབྱེ་ལྔ་པ་འཇུག་པ་སྟེ། ལྷ་ལས་དངོས་གྲུབ་བླང་། ལྟ་བུ་དང་། ཚིག་དོན་འོག་མར་བསྒྲུབ་པར་བྱ་བ་དར་གོས་ལྟ་བུ་འབྲེལ་བའི་སྒྲ་ཡོད་ན་མིང་སྔ་མའི་མཐར་རྣམ་དབྱེ་དྲུག་པ་འཇུག་སྟེ།ལྷ་ཡི་དར་གོས། ལྟ་བུ་དང་། མིང་དེའི་སྔོན་དུ་བོད་པའི་སྒྲ་ཀྱེ་ལྟ་བུ་ཡོད་ན་རྣམ་དབྱེ་བརྒྱད་པ་འདྲེན་པ་ཡིན་ཏེ། ཀྱེ་ལྷ། ཞེས་པ་ལྟ་བུའོ། །གཞན་ཡང་ཚིག་ཕྲད་འདྲེན་པ་ནི། ཚིག་དོན་འོག་མ་ལས་གོང་མའི་དོན་ལྷག་མ་འདྲེན་རྒྱུ་ཡོད་པ་རྣམ་མཁྱེན་གྱི་བར་ཞེས་པ་ལྟ་བུ་ཡོད་ན། མིང་སྔ་མའི་མཐར་ནས་ལྟ་བུ་སྡུད་པའི་སྒྲ་འདྲེན་ཏེ། གཟུགས་ནས་རྣམ་མཁྱེན་གྱི་བར། ཞེས་པ་ལྟ་བུ། དོན་ལྷག་མ་བསྡུ་རྒྱུ་མེད་ན་གཟུགས་སོ། །ཚོར་བའོ་ལྟ་བུ་སླར་བསྡུའི་སྒྲ་འདྲེན་ནོ། །ཚིག་དོན་གོང་མ་ལས་ཀྱང་དེ་བཞིན་དུ་དོན་ཕྱི་མ་འདྲེན་ཏེ། ཇི་སྙེད་ཅེས་པས་དེ་སྙེད་ཅེས་པ་འདྲེན་པ་དང་། ཇི་སྐད་ཀྱིས་དེ་ཨ་ཀྱཱ་ཡོངས་འཛིན་དབྱངས་ཅན་དགའ་བའི་བློ་གྲོས།སྐད་དང་། ཇི་ལྟར་གྱིས་དེ་ལྟར་དང་། གང་ཡིན་གྱིས་དེ་ཡིན་ཞེས་པ་འདྲེན་པ་ལ་སོགས་པའོ། །མིང་ཚིག་གི་རྣམ་གྲངས་དག་བཀོད་པ་ནི། དཔེར་ན།འདམ་སྐྱེས་རྣམས་ནི་རབ་ཏུ་བྱེ། །འདབ་རྒྱས་ཀེ་སར་སོ་ཕྲེང་རྒོད། །དྲི་བསུང་འཐུལ་བས་ཕྱོགས་ཀུན་ཁྱབ། །བུང་བའི་དགའ་སྟོན་རྣམ་པར་འཕེལ། །ཞེས་པ་ལྟ་བུ་སྟེ། རབ་ཏུ་བྱེ། རྒྱས། རྒོད། འཐུལ། ཁྱབ། འཕེལ་རྣམས་དོན་པདྨ་ཁ་བྱེ་ནས་རྒྱས་པ་ལ་འཇུག་པས་དོན་བསྐྱར་ཡང་ཚིག་མི་འདྲ་བས་བསྐྱར་བལྡབ་ཀྱི་སྐྱོན་མེད་ཅིང་། ལེགས་སོ་ལེགས་སོ་ལེགས་པར་གསུངས། །ཞེས་དང་། མེ་ཏོག་གཏོར། མངོན་པར་གཏོར། མངོན་པར་རབ་ཏུ་གཏོར། ཞེས་པ་ལྟ་བུ་ཚིག་བསྐྱར་ཡང་དོན་ལེགས་སོ་འབུལ་བ་ཆུང་འབྲིང་ཆེ་གསུམ་དང་། གཏོར་བ་ཆུང་འབྲིང་ཆེ་གསུམ་ལ་བྱེད་པས་དོན་བསྐྱར་བའི་སྐྱོན་མི་འབྱུང་ངོ་། ཕྱི་མར་མིང་ཚིག་གི་རྣམ་གྲངས་གཉིས་གསུམ་སོགས་བཀོད་ཡོད་ན་དོན་སྔ་མ་བསྐྱར་བ་ལ་འཇུག་པ་དང་། ཕྱི་མར་ཕོ་སྒྲ་སྟེ་བདག་པོའ་ིསྒྲ་མེད་པ་ལ་གསར་དུ་སྦྱར་ཡོད་ན་མིང་སྔ་མ་བདག་པོའ་ིསྒྲར་འགྱུར་ཞིང་། མོ་སྒྲ་དགག་ཚིག་མེད་པ་ལ་གསར་དུ་སྦྱར་བ་ཡིན་ན་མིང་སྔ་མ་དེ་ཉིད་དགག་སྒྲ་ཅན་དུ་འགྱུར་རོ། །རྒྱན་དུ་གྱུར་པ་ཀྱང་ཡང་འང་རྣམས། དོན་མཐུན་པ་ཡིན་ན་མིང་སྔ་མ་ལ་མཐུན་པའི་ཚིག་ཕྲད་སྦྱར་ཞིང་། ཚིག་སྔ་ཕྱི་རྟགས་ཀྱི་འཇུག་པའི་དགོངས་འགྲེལ་རབ་གསལ་སྣང་བ།མི་མཐུན་ན་མི་མཐུན་པའི་ཚིག་ཕྲད་སྦྱར་རོ། །ཚིག་གི་རྒྱན་ལའང་དོན་ལ་སྙེག་པ་སྟེ་དོན་ལོགས་སུ་སྟོན་རྒྱུ་ཡོད་ན་ངེས་པར་སྦྱར་དགོས་ལ། དོན་ལྷག་པ་སྙེག་རྒྱུ་མེད་པ་ཚིག་གི་ཁ་སྐོང་ངམ་མཛེས་བྱེད་ཙམ་དུ་སྦྱར་བ་རྣམ་པར། ངེས་པར། རབ་ཏུ་ཞེས་པ་ལྟ་བུ་ཡིན་ཚེ་དོན་ལ་སྦྱོར་མི་སྦྱོར་གང་བྱས་ཀྱང་རུང་ངོ་། །དོན་སྔ་མའི་འཕྲོ་དེ་མ་ཐག་བསྟན་བྱ་ལྷག་མ་ཡོད་ན་སྔ་མར་ལྷག་བཅས་ཀྱི་སྒྲ་སྦྱར་ཞིང་། བསྟན་བྱ་ལྷག་མ་མེད་ན་སླར་བསྡུའི་སྒྲ་རྫོགས་ཚིག་སྦྱར་རོ། །དེ་ལྟར་བརྗོད་བྱའི་དོན་རྫོགས་པ་དང་མ་རྫོགས་ཀྱིས་རྣམ་དབྱེ་དང་ཚིག་ཕྲད་དེ་དག་གི་ནང་གསེས་གང་དང་གང་འཇུག་ཅིང་དོན་ཇི་ལྟར་སྟོན་ཚུལ་རྣམ་པར་དབྱེ་བར་བྱའོ། །གོང་གི་མིང་མཐའ་དེ་དག་ཉིད་ཀྱིས་ནི། ཞེས་སོགས་ཀྱིས་མིང་སྔ་མའི་མཐའི་རྗེས་འཇུག་གི་ནུས་པས་རྣམ་དབྱེ་སོགས་འདྲེན་ཚུལ་ཡིན་ལ།འདིར་ནི་ཚིག་དོན་འོག་མའི་ནུས་པས་མིང་སྔ་མ་ལ་རྣམ་དབྱེ་དང་ཚིག་ཕྲད་འཐོབ་ཚུལ་འཆད་བྱེད་ཡིན་པས་ཁྱད་པར་ཡོད་དོ། །མིང་མཐའི་རྗེས་འཇུག་གི་ཤུགས་ཀྱིས་རྣམ་དབྱེ་དང་ཚིག་ཕྲད་འཐོབ་ཚུལ་ནི། སླར་བསྡུའི་སྐབས་སུ་རྗེས་འཇུག་བཅུ། །རང་འདྲར་རྣ་རུ་སྦྱར་བ་དང་། །ན་ར་ལ་གསུམ་རྗེས་སུ་ནི། །ད་དྲག་ཐོབ་ཚེ་ཏ་ལ་སྦྱར། །ས་སུ་ག་བ་ད་དྲག་ཏུ། །ང་ད་ན་མ་ར་ལ་དུ། །འ་དང་མཐའ་རྟེན་མེད་པའི་མཐར། །ར་དང་རུ་ནི་གང་རིགས་སྦྱར། །ད་བ་ས་ཀྱི་ག་ང་གི། ན་མ་ར་ལའི་རྗེས་སུ་གྱི། །འ་དང་མཐའ་རྟེན་མེད་མཐར་འི། །རྐང་པ་སྐོང་ཚེ་ཡི་ཐོབ་བོ། །ག་ད་བ་ས་ད་ཨ་ཀྱཱ་ཡོངས་འཛིན་དབྱངས་ཅན་དགའ་བའི་བློ་གྲོས།དྲག་མཐར། །ཀྱང་དང་རྗེས་འཇུག་གཞན་གྱི་མཐར། །འང་ཐོབ་རྐང་པ་སྐོང་ཚེ་ཡང་། །ད་དེ་ན་ར་ལ་ས་ཏེ། །ག་ང་བ་མ་འ་རྣམས་དང་། །མཐའ་རྟེན་མེད་མཐར་ས་སྟེ་ཐོབ། །འབྱེད་སྡུད་སྐབས་སུ་རྗེས་འཇུག་བཅུ། །རང་འདྲར་མ་ཡིག་སྦྱར་བ་དང་། །ད་དྲག་ཐོབ་ཚེ་ཏ་དང་སྦྱར། །ག་ད་བ་ས་ན་མའི་མཐར། །པ་བྱེད་ང་འ་ར་ལ་བ། །ག་ད་བ་དང་ད་དྲག་མཐར། །ཅིང་ཅེས་ཅེའོ་ཅེ་ན་ཅིག།ང་ན་མ་འ་ར་ལ་དང་། །རྗེས་འཇུག་མེད་པའི་མིང་གི་མཐར། །ཞིང་ཞེས་ཞེའོ་ཞེ་ན་ཞིག། ས་མཐར་དམིགས་བསལ་ཞེས་མ་གཏོགས། །ཤིང་ཤིག་ཤེའོ་ཤེ་ན་འཐོབ། །ཁ་ཅིག་ལྷན་ཅིག་ཅིག་ཅར་སོགས། །ཅིག་ནི་མིང་གི་ཆ་ཤས་ཡིན། །ཞེས་པ་སྟེ། དཔེར་བརྗོད་རྣམས་དག་ཡིག་ཟ་མ་ཏོག་དང་། ངག་སྒྲོན་སོགས་ལས་ཤེས་པར་བྱའོ། །རྣམ་དབྱེ་ཞེས་པ་ནི། ཆོས་གཉིས་མ་འདྲེས་པར་སོ་སོར་འབྱེད་པར་བྱེད་པའི་སྒྲའི་ཆ་ཤས་སམ་ཚིག་ཕྲད་ཅིག་ལ་རྣམ་དབྱེ་ཞེས་པ་ཡིན་ཏེ། རྣམ་དབྱེ་དང་པོ་དོན་གྱི་ངོ་བོ་ཙམ་རྗོད་པ་བུམ་པ་ཞེས་པ་ལའང་བུམ་པའི་ངོ་བོ་ཆོས་གཞན་དང་མ་འདྲེས་པར་འབྱེད་པའི་སྒྲའི་ཆ་ཤས་ཤིག་ཡོད་པར་ཁས་ལེན་དགོས་སོ། །རྣམ་དབྱེ་གཉིས་པ་ལས་སུ་བྱ་བ་ནི། ལས་དང་བྱ་བ་གཉིས་སོ་སོར་འབྱེད་ཅིང་གཙོ་བོར་ལས་ལ་ཉེ་བའི་རྣམ་དབྱེ་ཡིན།རྣམ་དབྱེ་གསུམ་པ་བྱེད་པ་ནི། བྱེད་པ་པོ་དང་བྱ་བ་གཉིས་སོ་སོར་འབྱེད་ཅིང་གཙོ་བོར་བྱེད་པ་པོ་ལ་ཉེ་བ་དང་།རྟགས་ཀྱི་འཇུག་པའི་དགོངས་འགྲེལ་རབ་གསལ་སྣང་བ།རྣམ་དབྱེ་བཞི་པ་དགོས་ཆེད་ནི། དགོས་པ་དང་བྱ་བ་གཉིས་སོ་སོར་འབྱེད་ཅིང་གཙོ་བོར་དགོས་པ་ལ་ཉེ་བ་དང་།ལྔ་པ་འབྱུང་ཁུངས་ནི། འབྱུང་ཁུངས་དང་བྱུང་བ་གཉིས་སོ་སོར་འབྱེད་ཅིང་གཙོ་བོར་འབྱུང་ཁུངས་ལ་ཉེ་བ་དང་།དྲུག་པ་འབྲེལ་བ་ནི། འབྲེལ་ཡུལ་དང་འབྲེལ་ཆོས་གཉིས་སོ་སོར་འབྱེད་ཅིང་གཙོ་བོར་འབྲེལ་ཡུལ་ལ་ཉེ་བ་དང་།རྣམ་དབྱེ་བདུན་པ་རྟེན་གནས་ནི། གནས་དང་གནས་པ་པོ་གཉིས་སོ་སོར་འབྱེད་ཅིང་གཙོ་བོར་གནས་ལ་ཉེ་བའི་རྣམ་དབྱེ་ཡིན་ཞིང་།རྣམ་དབྱེ་བརྒྱད་པ་བོད་པ་ནི། འབོད་པའི་བརྡ་སྦྱར་བ་ཙམ་མ་གཏོགས་དོན་རྣམ་དབྱེ་དང་པོ་ལས་ལོགས་སུ་མེད་ལ། རྣམ་དབྱེ་རྣམས་ཚིག་ཕྲད་ཡིན་ཡང་ཚིག་ཕྲད་རྐྱང་པ་མིན་ནོ། །ཚིག་ཕྲད་ནི། ཚིག་སྔ་ཕྱིའི་བར་དུ་མཚམས་སྦྱོར་བྱེད་དུ་འབྱུང་བ་ཤས་ཆེ་བ་ཞིག་ལ་བྱེད་པ་ཡིན་ཞིང་། ལེགས་སྦྱར་གྱི་ཚིག་ཕྲད་ནི་པཱ་ད་དང་དོན་མི་འདྲའོ། །བཞི་པ་ཅིའི་ཕྱིར་འཇུག་པ་བཤད་པ་ལ། ཅིའི་ཕྱིར་འཇུག་པར་བྱེད་ཅེ་ན། ཞེས་པ་མན་ཆད་དེ། རྗེས་འཇུག་རྣམས་དགོས་པ་ཅིའི་ཕྱིར་འཇུག་པ་ནི། དོན་བསྡུ་ན། སྤྱིར་ཡི་གེ་ནི་མིང་ཚིག་རྗོད་པ་ཐམས་ཅད་འབྱུང་བའི་རྩ་བའི་རྒྱུ་ཡིན་ཏེ། ཡི་གེ་རེ་རེ་བ་འདུས་པའི་ཁོངས་ནས་མིང་ཕྱུངས། མིང་འདུས་པ་ལས་ཚིག་ཕྱུངས་ནས་བརྗོད་བྱའི་དོན་ཐམས་ཅད་སྟོན་པར་བྱེད་ཨ་ཀྱཱ་ཡོངས་འཛིན་དབྱངས་ཅན་དགའ་བའི་བློ་གྲོས།པའི་ཕྱིར། ཚིག་ནི་མིང་གཞི་ལ་རྗེས་འཇུག་གང་ཡང་རུང་བ་ཞིག་མ་ཞུགས་ན་རྣམ་དབྱེ་དང་ཚིག་ཕྲད་སོགས་སྦྱར་བ་མི་སྲིད་དེ། རྗེས་འཇུག་གི་ཤུགས་ཀྱིས་རྣམ་དབྱེ་དང་ཚིག་ཕྲད་འདྲེན་པ་ཡིན་པའི་ཕྱིར་རོ། །རང་འབྲས་མིང་ཚིག་གི་གཞིར་གྱུར་པའི་སྐད་ཀྱི་གདངས་དེ། ཡི་གེའི་མཚན་ཉིད་ཡིན། དབྱེ་ན། དབྱངས་དང་། གསལ་བྱེད་གཉིས་ཡོད། དོན་གྱི་ངོ་བོ་ཙམ་རྗོད་པའི་སྒྲ་དེ། མིང་གི་མཚན་ཉིད། དཔེར་ན། ཀ་བ། བུམ་པ་ཞེས་པ་ལྟ་བུ། དེ་འདྲའི་སྒྲ་དེ་ཀ་བ་དང་བུམ་པའི་ངོ་བོ་ཙམ་གྱི་མིང་ཡིན་པའི་ཕྱིར། དོན་གྱི་ངོ་བོ་དང་ཁྱད་ཆོས་སྦྱར་ནས་སྟོན་པའི་སྒྲ་དེ། ཚིག་གི་མཚན་ཉིད། དཔེར་ན། ཙན་དན་གྱི་ཀ་བ། གསེར་གྱི་བུམ་པ་ཞེས་པ་ལྟ་བུའོ། །སྒྲ་དེ་དོན་གྱི་ངོ་བོ་ཀ་བ་དང་ཁྱད་ཆོས་ཙན་དན་སྦྱར་ནས་སྟོན་པའི་སྒྲ་ཡིན་པའི་ཕྱིར། མོ་ཡིག་དབྱངས་མེད་ན། ཕོ་ཡིག་གསལ་བྱེད་རྐྱང་བ་གདངས་ཀྱི་ང་རོ་དང་བྲལ་བས་བརྗོད་པ་མེད་པར་འགྱུར་ལ། ཕོ་ཡིག་དེ་དག་དབྱངས་དང་ལྡན་ནའང་སྔོན་འཇུག་ཡོད་མེད་གང་ཡང་རུང་། རྗེས་འཇུག་མ་ཞུགས་ན་མིང་དང་རྣམ་དབྱེ་ཚིག་ཕྲད་སོགས་སྦྱར་བའི་ཚིག་ཀྱང་གསལ་མི་ནུས་ཤིང་། མིང་ཚིག་གསལ་བ་མེད་ན་བརྗོད་བྱའི་དོན་རྣམས་གཞན་ལ་མཚོན་ཞིང་གོ་བར་བྱེད་པའི་རྗོད་བྱེད་ངག་ཀྱང་ཡོད་པར་མི་འགྱུར་རོ། །འདིར་དབྱངས་ཡིག་ཅེས་པ་དབྱངས་མཚོན་བྱེད་གུ་གུ། ཞབས་ཀྱུ། འགྲེང་བུ། རྣ་རུ་བཞི་ལ་བྱ་སྟེ། ཨ་ཡིག་ནི་གང་ལ་འདོགས་པའི་གཞི་བརྗོད་དོན་ཙམ་མ་གཏོགས་གསལ་བྱེད་ཡིན་པའི་ཕྱིར། དེས་ན་བོད་ལ་ལེགས་སྦྱར་ལྟར་དབྱངས་ཡིག་སྲོག་ཞུགས་ཀྱི་ཐ་སྙད་རྟགས་ཀྱི་འཇུག་པའི་དགོངས་འགྲེལ་རབ་གསལ་སྣང་བ།མེད་ཅིང་རྗེས་འཇུག་ཞུགས་པས་གོ་ཆོད་པར་མཛད་དེ། སུམ་ཅུ་པ་ལས།རྗེས་འཇུག་བཅུ་པོ་མ་ཞུགས་ན། །མིང་གཞན་སྦྱོར་བ་ཡོད་མི་སྲིད། །ཅེས་དང་།འདིར་ཡང་རྗེས་འཇུག་གི་འཇུག་པ་འཆད་པ་ན། རྗེས་འཇུག་ནི་ཡི་གེ་ཐམས་ཅད་ཀྱི་འཇུག་ཏུ་ཁྱད་པར་མེད་པར་འཇུག་པར་གསུངས་པ་དང་།འཇུག་པར་བཅས་པ་མེད་པར་ནི། །མིང་དང་ཚིག་ཀྱང་གསལ་མི་ནུས། །ཞེས་གསུངས་པའི་ཕྱིར་རོ། །དེས་ན་རྗེས་འཇུག་གཞན་དགུ་པོ་གང་རུང་མེད་པའི་མཐར་འ་ཡིག་རེ་ངེས་པར་བཞག་པ་སྒྲ་བསྒྱུར་སྔ་མ་རྣམས་ཀྱིས་མཛད་ལ། དཔེར་ན། ཀ་ཞེས་བརྗོད་པའི་ཚེ་རྗེས་འབྲེལ་དུ་འ་ཡིག་མི་གསལ་བའི་ཚུལ་དུ་ཡོད་པའི་ཕྱིར་རོ། །སྐད་གསར་བཅད་ལ། དགའ། མདའ།བཟའ་ལྟ་བུ་ཡིག་རྐྱང་འཕུལ་ཡིག་ཅན་ལ་འ་ཡིག་མཐའ་རྟེན་དངོས་སུ་མེད་ན་མིང་གཞི་རྗེས་འཇུག་ཏུ་འཁྲུལ་ལ། བརྩེགས་པ་དང་འདོགས་ཅན་ལ་འཁྲུལ་གཞི་མེད་པས་ཡིག་ཚོགས་སྐྱུང་བའི་ཆེད་མ་བཞག་པ་ཡིན་ཏེ། རྔོག་ལོ་ཆེན་པོའ་ིདག་ཡིག་ཉེར་མཁོ་བསྡུས་པ་ལས། རྐྱང་བ་འཕུལ་ལ་འ་མཐའ་དགོས། །བརྩེགས་པ་བུ་དྲུག་ཅན་ལ་སྤང་། །ཞེས་གསུངས་སོ། །བུ་དྲུག་ནི་གུ་གུ་སོགས་བཞི་དང་ར་བཏགས་ཡ་བཏགས་བཅས་དྲུག་ལ་བཤད་དོ། །དེ་ལྟར་གོང་སྨོས་བཞིན་མིང་ཚིག་བརྗོད་པ་ཐམས་ཅད་མེད་ན་ནི་འཇིག་རྟེན་དུ་དོན་མཚོན་པའི་རྗོད་བྱེད་ཀྱི་སྒྲ་ཀུན་ཀྱང་མེད་པར་འགྱུར་བས། རིག་པའི་གནས་སྤྱི་དང་བྱེ་བྲག་ཏུ་གཞན་སྡེའི་རིག་བྱེད་བཞིའི་དོན་སྨྲ་བ་དང་། རང་སྡེའི་ཐེག་པ་གསུམ་གྱི་སྡེ་སྣོད་དང་། དེའི་བརྗོད་བྱ་བསླབ་པ་གསུམ་རྣམས་ཀྱང་མེད་པར་འགྱུར་རོ། །དཔེར་ན་འཇིག་རྟེན་དུ་སེམས་ཅན་རང་རྒྱུད་ཀྱིས་བསྡུས་པའི་ཕུང་ཁམས་སྐྱེ་མཆེད་སོགས་དང་། གྲུབ་མཐའ་མཆོག་དམན་དང་། གཞན་ཡང་དོན་གྱི་ཁྱད་པར་སྣ་ཚོགས་པ་ཡོད་མོད་ཀྱི། དེ་དག་འདི་དང་འདིའོ་ཞེས་ཚིག་གིས་བརྡ་མ་སྤྲད་པར་རང་ཉིད་ཀྱིས་མི་ཤེས་པ་བཞིན་ནོ། །དེ་བཞིན་དུ་ཡི་གེའི་འཇུག་ཚུལ་རྣམས་རང་རང་གི་སྨྲ་བའི་ངག་ཀུན་ལ་རང་ཆས་སུ་ཡོད་ཀྱང་། བརྡ་མ་སྤྲད་པར་ཚིག་རང་གི་གནས་ཚུལ་དེ་ཉིད་ཇི་བཞིན་མི་ཤེས་པས། ཚིག་འདིས་དོན་འདི་སྟོན་ནོ་ཞེས་དོན་ལ་སྦྱོར་ཚུལ་ག་ལ་ཤེས་ཏེ་མི་ཤེས་སོ། །རྒྱུ་མཚན་དེའི་ཕྱིར་འཕགས་ཡུལ་གྱི་སྨྲ་བའི་དབང་ཕྱུག་མཁས་པ་རྣམས་ཀྱི་བརྡ་སྤྲོད་པའི་བསྟན་བཅོས་ཀྱི་རྗེས་སུ་འབྲངས་ནས་ཐོན་མི་སམྦྷོ་ཊ་བདག་གིས་བོད་ཀྱི་བརྡ་སྤྲོད་ཀྱི་ཚུལ་སྨྲས་པ་འདིའི་དོན་གངས་ཅན་གྱི་སྐྱེ་བོ་ཀུན་གྱིས་རྟོགས་པར་གྱུར་ཅིག་ཅེས་ཐུགས་སྨོན་རྒྱ་ཆེར་མཛད་པའོ། །སྨྲས་པ།གང་ཞིག་རྟོགས་ན་གསུང་རབ་དོན། །མ་ནོར་ལྟ་བའི་འདྲེན་བྱེད་མཆོག།སྦྱིན་མཛད་རྣམ་དག་བརྡ་སྤྲོད་གཞུང་། །གོ་སླའི་ངག་གིས་ཅུང་ཟད་བཀྲལ། །