ནུ་བོ་རྡོ་རྗེ་རྒྱལ་མཚན་གྱི་རྨི་ལམ་

ཀུན་བཟང་ཞི་ཁྲོའི་ལྷ་ལ་ཕྱག་འཚལ་ལོ། །ཕག་ལོའི་དགུན་ཟླ་འབྲིང་པོའི་བྱི་བའི་ཟླ་བ་ལ་ཀླས་ལ་དགོན་པར་གཅིག་པུར་མཚམས་ལ་བསྡད་པའི་ཚེ། དེ་ལོར་རྩི་དཀར་དུ་དམར་བཤལ་གྱི་རིམས་ཆེན་པོ་ཞིག་བྱུང་ནས་མི་ཉི་ཤུ་ཙམ་ཤི་བརྒྱ་ཙམ་ན་ནས་དྲག།།དེའི་དུས་སུ་རང་གི་ནུ་བོ་རྡོ་རྗེ་རྒྱལ་མཚན་ཞེས་བྱ་བ། ལོ་སུམ་ཅུ་རྩ་གཉིས་ལོན་པ་ཞིག་ཡོད་པ་དེ་ཕ་བུ་གཉིས་ཀྱང་ཤི་ནས་ཟླ་བ་གསུམ་ཙམ་སོང་། དེའི་ཚེ་གཅིག་པུར་སྡོད་དུས་ནུ་བོ་ཤི་བ་དྲན་པ་དང་སྐྱོ་བ་སྐྱེས་ནས། དེ་རྣམས་གར་སྐྱེས་སྙམ་ནས། ཇོ་བོ་རྗེ་ནས་བརྒྱུད་པའི་སྐྱེ་དྲན་གྱི་སྒྲུབ་པ་རྨི་ལམ་སྒྲུབ་པ་ཅིག་ཡོད་པ་དེ་སྔོན་གོང་ནས་བསྙེན་པ་ཐེམས་ནས་ཡོད་པ་དེ་ནུབ་ནུ་བོ་ལ་དམིགས་ནས་གར་སྐྱེས་བལྟས་པས། ཉི་ཤུ་གཉིས་ཀྱི་ཐོ་རངས་ཁར། ཀླས་ལ་དགོན་པར་ཉལ་བའི་རྨི་ལམ་དུ་ཆུ་ཆེན་ལ་བརྒལ་ནས་ཕྱིན་པས། ཆབ་ནག་གི་ནགས་གསེབ་ཅིག་ཏུ་མི་བསམ་གྱིས་མི་ཁྱབ་པ་མང་པོ་འཚོགས་ནས་གྲོས་རུབ་རུབ་བྱེད་པའི་རྩར་ཕྱིན་པ་དང་། ཨ་མ་མོ་སྔར་བས་གཞོན་པར་བྱས་ནས་བྱུང་སྟེ། རྟོགས་ལྡན་དང་། རྡོ་རྗེ་སྲི་ཐར་དང་། ང་རང་དང་གསུམ་ཀ་འདུས་པ་ལ་འབོད་ནས། ཁྱེད་རང་གསུམ་ཀ་ཆབ་ནག་འདི་རུ་མ་བསྡད་པར་ཆབ་དཀར་དུ་ཕྱིན་པ་དྲག།།ད་ང་མགྱོགས་པར་རྩི་དཀར་དུ་འགྲོ་དགོས་པ་ཡོད། ད་ཞག་རྩི་དཀར་དུ་རྐུན་མ་མང་པོ་བྱུང་ནས་ར་ལུག་དང་སེམས་ཅན་ཆེ་ཆུང་ཉི་ཤུ་ཙམ་རྐུ་ཤོར་ཟེར། ཉི་ཟླ་ཁྱེད་དང་རྡོ་རྗེ་སྲི་ཐར་གཉིས་སྔོན་ལ་འདོང་། རྟོགས་ལྡན་ཁྱོད་རང་རྟིང་ནས་ཤོག།།ཁྱེད་གསུམ་ཆབ་ནག་ཏུ་ལུས་འདུག་པས། ཨ་མ་བསུ་བ་ལ་ཕྱིན་པ་ཡིན།ཨ་མ་ད་ཞག་རྡོ་རྗེ་རྒྱལ་མཚན་སྡུག་པ་ལ། དགྲ་ཡོད་དོགས་པས་བྱ་ར་ལྟ་བར་ཕྱིན་པ་ཡིན། དེའི་ཤུལ་དུ་ཁྱིམ་དུ་རྐུན་མ་ཡོད་ཀྱིས་དོགས་ད་ཨ་མ་ཐད་ཀར་རབ་འདི་འབོགས་ནས། རྩི་དཀར་དུ་སྔོན་ལ་རྒྱུག་ནས་འགྲོ་རིང་ཡོད༔ ཁྱིམ་དུ་བོར་སྟོར་ཨེ་བྱུང་ལྟ་བ་དང་། ཨ་རྟ་ཤུལ་དུ་བསྲུང་ཡོད་པས། གོ་ཆོད་པར་ཨེ་སྣང་ལྟ་འགྲོ། རྡོ་རྗེ་རྒྱལ་མཚན་སྡུག་གེ་ཡང་གནས་ཁང་བཟང་པོ་དཀོན་དྲགས་ནས་ད་རུང་མ་རྙེད་པར་འདུག།།སྡིག་ཅན་གྱི་ཁྱིམ་དུ་ནི་ངས་མ་བཏང་། བཤེས་གཉེན་མཁན་པོའི་ཁྱིམ་གཙང་མ་གཅིག་མ་རྙེད་རིང་ལ་སྒུགས་བྱས་ཡོད། ད་ལྟ་ཁྱེད་གཉིས་དང་འཕྲད་པར་ཡོད།འཕྲད་བྱུང་ན་ལབ་ལབ་ཀྱིས། ཁོ་ཡང་སྐད་ངན་འགའ་རེ་བཤད་འདུག་སྟེ། ཨ་མས་སེམས་གསོ་བྱས་ཡོད། ད་ང་ཁྱིམ་དུ་སྔོན་འགྲོ་རིང་། རྐུན་མའང་ཨེ་བྱུང་ཆ་མེད། ཁྱེད་རང་གཉིས་པོ་ཁོ་སྡུག་པ་བྱུང་ན་ཁྲིད་ལ་གྲེ་ཤ་གདོང་ཀྱི་རབ་བརྒལ་རྩི་དུ་ཤོག་ཅིག་ཟེར་ནས། ཨ་མ་སྔོན་ལ་སྲིབ་ཆབ་གདོང་འདྲ་བ་གཅིག་ནས་ཆུ་ལ་རབ་ནས་སོང་།དེ་མ་ཐག་ཏུ་ཕྱི་དེ་ཚུར་ལ། རྡོ་རྗེ་རྒྱལ་མཚན་གྱིས་ཤིང་ཁུར་ཆེན་པོ་གཅིག་ཁུར་ནས་ཡུད་དེ་ཡུད་དེ་ལག་པས་འགྲམ་པ་བསྐྱོར་ནས། སྐྱོ་སྐྱོ་འདྲ་བ་གཅིག་བྱས་ནས་གླུ་འདྲ་བ་སྐྱོ་ཤས་རིང་པོ་གཅིག་འཐེན་ཞིང་འོང་འདུག།།དེ་ལ་ངེད་གཉིས་བསྒུགས་པས་རྩར་བྱུང་བ་དང་། དེར་ངས་ཁྱོད་གར་ཕྱིན། ཁྱོད་ཤི་བ་ཡིན་བསམ་ཙ་མ་ཤི་བ་སླེབ་བྱུང་། ད་ཁྱིམ་དུ་ལོག་འདོང་། ཆབ་དཀར་དུ་འགྲོ་བས་དགའ་བྱས་པས། ད་རུང་ཡིད་མ་ཆེས་པས། སྙིང་མི་དགའ་ཞིང་ཁོ་ལ་སྙིང་རྗེ་ཚད་མེད་པ་བྱུང་ཞིང་།ངེས་པར་གསོན་པོ་འཕྲད་པ་ནི་ཨེ་ཡིན་བསམ་པ་དང་། ཁོས་ན་རེ། ང་མ་ཕྱིན་ས་ཆ་མེད། ང་ལ་རོགས་འབུམ་ཚོ་བཅུ་བདུན་ཡོད་པ་དེ་རྣམས་ཐམས་ཅད་དོང་ཆེན་པོ་གཅིག་གི་མཐིལ་དུ་ཆ་གཉིས་པོ་སོང་། ཆ་གཅིག་ཤུལ་དུ་ཡོད་པ་དེ། ལ་ལ་ནི་ཆར་རླུང་ལ་ཞེད་ནས་ནགས་གསེབ་ཏུ་སོང་། ལ་ལ་ནི་ས་ཕུག་དང་གད་ཁུང་དུ་གབ་སོང་།ང་དང་གཞན་འགའ་ཁྱེད་ལ་བར་དོ་ཐོས་གྲོལ་གྱི་དབང་ཞུས་པའི་རྩི་དཀར་བ་གྲོང་པ་འགའ་ཞིག་འཛོམ་བྱུང་བ་རྣམས་ནི། ང་རང་གི་ཨ་མས་གོས་ཀྱི་སྐྱོར་བས་སེར་དྲག་དང་། ཆར་རླུང་དང་། རླུང་འཚུབས་བྱུང་ཡང་སྡུག་པོ་མ་བྱུང་། དོང་མོ་ཆེའི་ནང་དུའང་མ་སོང་། ཨ་ཁུ་ཁམས་པ་ལུས་ཁོ་ནི། རྩི་དཀར་བས་ཚོས་ཁུར་རེ་ལ་བཏང་མ་ཉན་བས། དོང་མོ་ཆེར་ཁྲིད་སོང་། ད་ཙམ་གེགས་ལ་ཐུག་ཚོད་ཡོད། དེ་ནས་ཨ་དོར་དང་ཉོས་བཙུན་གཉིས་དང་མཉམ་པོར་བྱུང་པས། ཨ་དོར་ནི་བླ་མ་ཉི་ཟླས་ང་རང་སླེབས་བྱུང་སྟེ། སྡིག་པོ་ཆེའི་ཁྱིམ་དུ་མ་འགྲོ་གྲིབ་འོང་ཟེར་ཀྱང་བཤེས་གཉེན་མཁན་པོའི་ཁྱིམ་གཙང་མ་མི་ཚེ་འདི་ལ་རྙེད་པར་མི་སྣང་། ད་ནི་གཉུག་བུད། འདུག་ཡུན་རིང་ན་དོང་མོ་ཆེའི་མཐིལ་དུ་འཐེན་ཉེན་སྣང་། དེ་སྔོན་ཁྱོད་དང་མཉམ་པོར་ཕྱིན་པས་ཕན་པ་ཡིན། ད་ང་རང་སྡིག་ཅན་ཡིན་ཡང་ཡིན། རྩོག་པ་སྣང་ཡང་མི་གཅིག་གི་ཁྱིམ་དུ་གནས་ཁང་གཡོར་བས་དགའ་ཟེར་ནས་སོང་། དུད་འགྲོ་ཡི་དྭགས་དམྱལ་བ་གསུམ་ལ་མ་སོང་། སྡིག་ཅན་གཅིག་གི་ཁྱིམ་དུ་ད་ཙམ་སླེབ་ཚོད་ཡིན་ཟེར་ནས། ཡང་གཏམ་བཤད་འཕྲོ་ལ་སྐྱོ་ཤས་ལྷང་ལྷང་འཐེན་ཞིང་འགྲོ་ཆས་བྱེད་འདུག་གོ །ཁྱིམ་ཁྱིམ་བཤེས་གཉེན་མཁན་པོའི་ཁྱིམ། །དཀོན་དཀོན་ས་སྟེང་འདི་ན་དཀོན། །རྩོག་རྩོག་སྡིག་ཅན་ཁྱིམ་རེ་རྩོག །ཅེས་སྐྱོ་ཤས་ལྷང་ལྷང་འཐེན་ཞིང་། ལག་པས་འགྲམ་པ་བསྐྱོར་ནས། ཡང་ཤིང་ཁུར་དེ་ཁུར་ནས་ཡུད་དེ་ཡུད་དེ་འཕྲང་ལ་འགྲོ་ཞིང་འདུག་གོ །ཡང་ངས་བོས་ནས། ཁོ་རེ་སྡོད་དོ་བྱས་ནས་ཡང་དྲིས་པས། འོ་ན་ད་ལོ་རྩི་དཀར་ཤི་བ་རྣམས་དང་འཕྲད་དམ། སུ་དང་འཕྲད། མཉམ་པོར་འགྲོ་རྒྱུ་བྱུང་ངམ། ད་ཁོང་ཚོ་གར་སོང་དྲིས་པས། ཡང་ཁོས་ན་རེ། ད་ལོ་རྩི་དཀར་བ་མང་པོ་དང་འཕྲད་རྒྱུ་བྱུང་སྟེ། ལ་ལ་ནི་ཡུད་ཙམ་ནས་བྲལ་སོང་། ལ་ལ་ནི་ཉིན་རེ་ཙམ་མཉམ་པོར་བྱུང་། ཁྱེད་ལ་དབང་ཞུས་པའི་མི་བཞི་ལྔ་ཞིག་དང་། ཞག་པོ་བཅུ་ཙམ་མཉམ་པོར་བྱུང་། ཉོས་བཙུན་མ་ནི་རི་གཅིག་ལ་འཛེགས་སོང་། སྐྱིད་སྡུག་ནི་ཇི་འདྲ་བྱུང་ཆ་མེད། གཞན་ཐམས་ཅད་ཀྱང་གློ་བུར་དུ་གར་སོང་ཆ་མེད་པར་གཅིག་ཟག་གཉིས་ཟག་ལ་སོང་། ཡིན་ཡང་བར་དོའི་ཆོས་དང་དེའི་ནང་ནས་ཀྱང་བར་དོ་ཐོས་གྲོལ་འདི་གསོན་པོའི་དུས་སུ་རྣ་ཡིད་ལ་ཡོད་དགོས་པར་སྣང་། ངེད་འགའ་ཡར་གཅིག་བར་དོ་ཐོས་གྲོལ་རྣ་བར་ཚོར་བ་རྣམས་གནས་བཟང་ངན་འདམ་ཤེས།བར་དོའི་སྨོན་ལམ་རྣམས་གྲབ་གཅིག་ཏུ་བསྒྲིགས་ནས་འཐེན་པས། མི་འབུམ་ཚོ་མང་པོ་ངུ་སྒྲ་ཏིར་གྱིས་བྱུང་། ཁྱེད་རྣམས་ཅི་ལ་ངུ་བ་ཡིན་བྱས་པས། ཁྱེད་རྣམས་པ་དེ་རེ་དགའ། དེ་འདྲའི་སྨོན་ལམ་གཉན་པོ་ཤེས་པས་གནས་ཁང་བདམ་ཤེས། ཁ་འཆམས་ཤིང་མཉམ་པོར་འགྲོགས་རྒྱུ་འདུག་པས་ཁྱེད་རྣམས་ལ་སྨོན་པ་ཡིན། ངེད་རྣམས་ནི་ཡི་མུག་སྐྱེས་ནས་ངུ་བ་ཡིན།ཁྱེད་ཀྱི་ཆོས་དེ་ངེད་ལ་ཤོད་ཟེར་བས། ངེད་བར་དོ་ཐོས་གྲོལ་མགོ་མཇུག་ཚང་ལ་ཁད་པ་ཙམ་མི་དེ་རྣམས་ལ་བཤད་རྒྱུ་བྱུང་བས། མི་དེ་ཀུན་ན་རེ། ཁྱེད་ཀུན་ཆོས་ཉིད་བར་དོའི་དུས་སུ་འོད་ལམ་ལེགས་པོ་དེ་འདྲ་བ་གཅིག་ལ་མི་འགྲོ་བ། ད་རུང་འདི་ལ་བསྡད་པ་ཅི་ཡིན་ཟེར་ནས། ངས་ཆོས་ཉིད་བར་དོའི་སྒྲ་འོད་ཟེར་གསུམ་ཟིལ་ཆེ་དྲགས་པས་བརྒྱལ་འཁོར་ཡུག་ཏུ་སོང་། འོད་ལམ་དང་གནས་ལུགས་ཀྱང་མི་སྣང་། ངས་གསོན་པོའི་དུས་སུ་བར་དོའི་ངོ་སྤྲོད་ལན་གཉིས་ཐོབ་པས་ཆོས་ཉིད་བར་དོ་ངོས་ཟིན་ལ་ཁད་ཁད་ལ་ཡང་ཡལ་ནས་འགྲོ་འདུག་ལན་གསུམ་ཐོབ་ན་ངོས་ཟིན་འདུག་སྟེ། ལན་གཉིས་བས་མ་ཐོབ་བས། ད་རུང་ངོས་མ་ཟིན་པ་ཡིན། ལར་ཡང་ད་རུང་བཤེས་གཉེན་མཁན་པོའི་བུ་གཅིག་ཏུ་སྐྱེས་ན་དགའ་བས་གནས་བཟང་པོ་གཅིག་ཏུ་བསྒུགས་པ་ཡིན་ཏེ། དཀོན་དྲགས་པས་མ་རྙེད་ཟེར་ནས་ཡང་ལབ་པའི་འཕྲོ་ལ། ཁྱིམ་ཁྱིམ་བཤེས་གཉེན་མཁན་པོའི་ཁྱིམ། །དཀོན་དཀོན་ས་སྟེང་འདི་ན་དཀོན། །རྩོག་རྩོག་སྡིག་ཅན་ཁྱིམ་རེ་རྩོག །མང་མང་ངན་སོང་མངལ་སྒོ་མང་། །སྐྱོ་སྐྱོ་བར་དོའི་འཕྲང་ལ་སྐྱོ། །ཞེས་ལྷང་ལྷང་འདོན་ཞིང་། ཡང་ཤིང་ཁུར་དེ་ཁུར་ནས་འཕྲང་དེ་ལ་ཡུད་དེ་ཡུད་དེ་འགྲོ་ཞིང་སྣང་བ་དང་། ཡང་ངས་བརྒྱུག་ནས་བོས་ཏེ། བཟུང་ནས་དྲིས་པས། ཁོ་རེ་ཁྱོད་དེ་འདྲ་རང་སྐྱོ་མི་དགོས། ངས་ཁྱོད་སྡུག་བསྔལ་མི་བཅུག་པ་བྱེད། ཁྱོད་ཀྱི་བར་དོའི་མི་ཐམས་ཅད་ལ་འཕྲིན་གྱིས། རྩི་དཀར་ཀླས་ལ་དགོན་པ་ཟེར་བ་གཅིག་ན། དམ་པ་ཉི་ཟླ་འོད་ཟེར་ཟེར་བ་གཅིག་ཡོད་པ་དེས་ནང་གི་རིགས་ལ་བར་དོ་ཐོས་གྲོལ་དང་བཏགས་གྲོལ་འདོན་ཞིང་ཡོད་དོ། །ཉན་པ་ལ་ཨེ་འོང་ཕྲིན་གྱིས་ཁྲིད་ལ་ཤོག ངས་ནངས་རེ་བཞིན་མ་ཆགས་པར་ཐོས་གྲོལ་དང་བཏགས་གྲོལ་འདོན། བརྒྱ་རྩ་དང་ཆུ་གཏོར་བར་དོ་ཆུ་སྦྱིན་དང་།བསྔོ་བ་སྨོན་ལམ་བཏབ་ཅིང་ཡོད་བྱས་པས། ཁོ་ན་རེ། ངེད་རང་རྩི་དཀར་བའི་མི་ཕལ་ཆེར་ནི། གནས་ཁང་བཟང་པོ་རེ་རྙེད་ཚོད་ཡོད། ཞག་འགའ་ནས་གྱེས་སོང་།མངལ་སྒོ་བདམ་ཤེས་བས་མི་ལུས་རེ་ཐོབ་ཚོད་ཡོད། བར་དོའི་མི་ཐམས་ཅད་ཀྱི་ཁྱེད་རྩི་དཀར་བའི་མི་རྣམས་རེ་དགའ་བ་ལ། བར་དོའི་ལམ་ལ་གྲོལ་ལུགས་ཀྱི་ཆོས་བཤད་མཁན་གཅིག་ཡོད་པར་འདུག་གོ །མངལ་སྒོ་བདམ་ཤེས་པར་སྣང་། རེ་དགའ་ཟེར་ནས་སྨོན་པ་བྱེད་སྣང་། ངས་རྩི་དཀར་བའི་མི་མང་དུ་ཡོད་པ་དེ་རྣམས་ཁ་ཁ་ནས་གནས་ཁང་མ་རྙེད་ཀྱི་བར་དུ་འགྲོ་མགོན་བྱས་ཤིང་གྲ་སྡེབ་དུ། བར་དོ་སྨོན་ལམ་འཇིགས་སྐྱོབ་མ་དང་། འཕྲང་སྒྲོལ་དང་། མར་མེའི་སྨོན་ལམ་བཏབ། ཁྱེད་ཀྱིས་ནང་པར་བར་དོའི་སྨོན་ལམ་བཏབ་པ་ཚོར་བས་དགའ་ཚོར་ཚད་མེད་པ་བྱུང་སྟེ། ང་རང་གི་མི་ལུས་གཅིག་ལེན་པ་ལ་དགའ་བས་ད་རུང་འདིར་བསྒུགས་པ་ཡིན། ངེད་རྣམས་ཀྱིས་སྨོན་ལམ་དི་རི་རི་བཏབ་པ་དང་། དེའི་ཕན་ཡོན་བར་དོའི་སེམས་ཅན་རྣམས་ཉུང་ཕྱམ་ཕྱམ་འགྲོ་འདུག །མངལ་སྒོ་བཟང་པོ་རེ་རྙེད་པ་འདྲ། བར་དོའི་སྐབས་སུ་མི་རིགས་མི་འདྲ་བ་འབུམ་ཚོ་དུང་ཕྱུར་ཙམ་འཚོགས་ཀྱང་། དེ་རྣམས་ཀྱི་ནང་ནས། ང་དང་བོད་ཀྱི་སྔགས་པ་གསུམ་དབང་ཆེར་བྱུང་། ཁོང་གསུམ་ནི་སྐྱེ་གནས་ཀྱི་དུས་ཞི་ཁྲོའི་ཐོས་གྲོལ་ཡི་དམ་ཡུན་རིང་དུ་བྱས་པ་ཡིན་ཟེར། གསང་སྔགས་ཀྱི་དབང་མང་པོ་ཐོབ་པའི་ཕན་ཡོན་རེད་བསམ་པ་བྱུང་། གནས་ཁང་གཙང་མ་ནི་བར་དོའི་སྐབས་ན་དཔེར་ན་མི་ཡུལ་དུ་ཡིད་བཞིན་ནོར་བུའི་གླིང་དེ་སྨོན་པས་ཀྱང་ས་སྟེང་ན་མི་རྙེད་པ་ཙམ་དུ་དཀོན་པར་འདུག གནས་ཁང་མི་གཙང་བ་ནི་གྲོག་ཚང་ཁ་ཕྱེས་བ་བཞིན་མོད་པར་སྣང་། ངས་ནི་ད་རུང་གནས་ཁང་མ་རྙེད། ང་ལ་རོགས་འབུམ་ཚོ་བདུན་ཡོད་པ་ཟླ་བ་གཅིག་ནས་གྱེས་སོང་། གོང་གི་མི་ལྔ་བརྒྱ་གྲོས་བྱེད་པ་ཡོད་པ་དེ་ལུས་པ་ཡིན། དེ་ཀུན་ཞག་གསུམ་ལ་གནས་ཁང་རེ་རྙེད་ནས་གྱིས་འགྲོ་བར་སྣང་། ཡང་ཟླ་བ་རེ་ལ། ངོ་ཤེས་མི་ཤེས་མེད་པ་འབུམ་ཚོ་ས་ཡ་དུང་ཕྱུར་ཙམ་བརྗོད་ལས་འདས་པ་འདུག་ནའང་།ཟླ་བ་རེ་ལ་མི་སྔ་མ་རྣམས་གྱེས། ཕྱི་མ་རྣམས་འཚོགས་འདུག རྩི་དཀར་བའི་མི་རྣམས་ང་མིན་པ། གཞན་ཐམས་ཅད་འགྲོ་ས་རེ་རྙེད་ནས་གྱེས་སོང་། ང་ལ་ཨ་མས་སྡིག་ཅན་གྱི་ཁྱིམ་ལ་མ་འགྲོ་གྲིབ་འོང་། བཤེས་གཉེན་མཁན་པོའི་ཁྱིམ་གཙང་མ་གཅིག་མ་རྙེད་རིང་ལ་སྒུགས་ཟེར། ངས་ཨ་མ་ཁྱོད་བསམ་བློ་མི་གཏོང་བར་གནས་ཁང་གཙང་མ་སྒུགས་རིང་ལ་དོང་མོ་ཆེའི་མཐིལ་དུ་འཐེན་ན་གང་ཙུགས་བྱེད། ཞག་རེ་ལ་མི་བསམ་གྱིས་མི་ཁྱབ་པ་ཁྲིད་ནས་དོང་མོ་ཆེར་འགྲོ་བར་སྣང་། ང་ཡང་ཁྲིད་བྱེད་བྱུང་ན་ཅི་ཚུག་བྱེད་བྱས་པས། ཨ་མས་གནས་ཁང་གཙང་མ་མ་རྙེད་རིང་ལ་དོང་མོ་ཆེའི་མཐིལ་དུ་མི་གཏོང་བའི་རོག་བྱེད་ཟེར། ཉི་ཟླས་ཀྱང་སྨོན་ལམ་བཏབ་ཡོད་ཁྱོད་རང་ཨའུ་ཙི། ད་རུང་གཉུག་མ་བུད་ཟེར་བྱུང་སྟེ། ད་ནི་གཉུག་བུད་པ་ལ་ཟེར་ནས། ཡང་འཇིགས་འཇིགས་དོང་མོ་ཆེ་རེ་འཇིགས། །སྐྱོ་སྐྱོ་བར་དོའི་འཕྲང་རེ་སྐྱོ༑ ༑ལྗི་ལྗི་ཤིང་ཁུར་འདི་རེ་ལྗི། །བུད་བུད་བར་དོར་གཉུག་རེ་བུད། །ཁྱིམ་ཁྱིམ་བཤེས་གཉེན་མཁན་པོའི་ཁྱིམ། །དཀོན་དཀོན་ས་སྟེང་འདི་ན་དཀོན། །ཅེས་སྐྱོ་ཤས་འཐེན་ཞིང་། ལག་པས་འགྲམ་པ་བསྐྱོར་ཞིང་། ཤིན་ཏུ་སྐྱོ་བའི་ཚུལ་གྱི་ཡང་ཤིང་ཁུར་དེ་ཁུར་ནས་ཧུ་ཁྱུ་ཟེར་ནས་སྐྱོ་ཤས་དེ་བླངས་ཤིང་། ཡུད་དེ་ཡུད་དེ་འགྲོ་འདུག་པ་ལ། ང་ཡང་མཆི་མ་ཤོར་ཏེ། མཆི་མ་ཕྱིས་ནས་བལྟས་པས་ཁོ་མ་ཟད་དེ་ན་མར་ཡུད་དེ་སྐྱོ་ཤས་ལྷང་ལྷང་སོང་། ཡང་ངས་བོས་ནས་ཁོ་རེ་མ་འགྲོ་དང་། ངས་ཁྱོད་ལ་བཤད་རྒྱུ་གཅིག་ཡོད་བྱས་པས། ངལ་ཐེམ་གཅིག་གི་སྟེང་དུ་ཤིང་ཁུར་ཕོག་ནས་ཧུ་ཁྱུ་ཟེར་ཞིང་བསྒུགས་པས་ཁོའི་རྩར་ཕྱིན་ནས། ད་ཁྱོད་རང་སྡུག་མི་དགོས།ངས་ཀླས་ལ་ཁར་ཞི་ཁྲོའི་ཕོ་བྲང་གཅིག་བཞེངས་ཡོད། དེའི་དགེ་བའང་ཁྱོད་ལ་བསྔོ༑ དགེ་བཤེས་བློ་བཟང་ལ་ཟླ་བ་གཅིག་གི་རྒྱགས་དང་རྔན་པ་བྱིན་ནས་མ་ཎི་འདྲེན་དུ་བཅུག་གོ །ཀླས་ལ་ཁའི་མ་ཎི་རྒྱུན་དེ་ཡང་ངའི་བཙུགས་ནས་ཁྱོད་ལ་བསྔོའོ། །ང་རང་གིས་དགེ་སྦྱོར་བྱས་ཚད་ཀྱང་ཁྱོད་ལ་བསྔོའོ། །ཤུལ་གྱི་མ་སྨད་རྣམས་ལའང་མ་ཎི་བགྲངས་བྱས་ཡོད། ཁྱོད་ཀྱི་ཕྱི་ལ་སྡིག་པ་གཅིག་ཀྱང་མ་བྱས་ཕན་ཅི་ཐོགས་བྱས་ཡོད། གཞན་ཡང་ཁྱོད་རང་གཉུག་མ་བུད་ཅིག བཤེས་གཉེན་མཁན་པོའི་ཁྱིམ་རང་དགའ་བ་ཡིན་ནམ། ད་ལྟ་བར་དོའི་ཡིད་ལུས་ཡིན་པས། འདུན་པ་རྩེ་གཅིག་སེམས་ལ་བཟུང་བ་ཡིན་པས། འདུན་པ་གར་གཏད་འོང་བར་ཐོས་གྲོལ་དུ་བཤད་འདུག ཁྱོད་རང་ཟངས་མདོག་དཔའ་རིར་ཨོ་རྒྱན་རིན་པོ་ཆེའི་དྲུང་དུ་འདུན་པ་དྲག་པོ་གཏོད་ལ་སྨོན་ལམ་ཐོབ་དང་དེས་མི་དགའ་འམ་བྱས་པས། ཡང་ཁོས་མི་ཡུལ་དུ་འདུག་ཡུན་ཐུང་བས་ཞེ་མ་ཚིམ། ང་མི་ཡུལ་དུ་དེ་བས་རིང་བ་གཅིག་འདུག་རྒྱུ་ཡིན་པ་ལ། བྱུར་མོ་ཐང་ཆུང་མ་འདི་ལན། ད་ང་སྙིང་སྟོང་ཆེ། ང་རང་མི་ལུས་ཐོབ། བཤེས་གཉེན་མཁན་པོའི་བུ་རུ་སྐྱེ་བ་གསེར་བས་དཀོན་པ་དེ་ཐོབ། ཁྱེད་སྤུན་ཡ་རྣམས་ཀྱི་དྲིན་གྱིས་སྡིག་པའང་ཆུང་། དེ་དུས་ཆོས་གཅིག་བྱེད་མ་དྲན་པས་འགྱོད་པ་ནི་ཤིན་ཏུ་ཆེ།ཕ་མ་སྤུན་ཡ་ཁྱེད་རྣམས་དང་འགྲོགས་ལོང་མ་བྱུང་། འགྲོགས་ཡུན་ཐུང་བས་སྙིང་སྟོང་ཆེ། ད་དེ་འདྲ་གར་བཙལ་ཀྱང་མི་རྙེད། ཡོད་པ་དེ་ལ་རང་དབང་མ་ཐོབ་པས།ད་མེད་པ་གཅིག་རྨང་ནས་བཙལ་དགོས་པར་བསམ་པས་སྡུག་པ་ལས་མ་བྱུང་། ད་དུང་བཤེས་གཉེན་མཁན་པོའི་བུ་གཅིག་སྨོན་དྲག་པས་བསྒུགས་པ་ཡིན་ཟེར་ནས།མཆི་མ་ཤར་ཤར་ཤིན་ཏུ་ཡུས་བྱས་པའི་ཚུལ་གྱིས་སེམས་ཕམ་པར་འདུག འོ་ན་ཁྱོད་རང་གི་བུ་མོ་ཁྲ་ཧུ་རེ་གར་སོང་འཕྲད་དམ་བྱས་པས། ཟླ་བ་སྔོན་མ་ལ་ཁྲོམ་ཆེན་པོ་གཅིག་གི་དཀྱིལ་དུ་ཡུད་ཙམ་པ་གཅིག་འཕྲད། དེ་ནས་གར་སོང་ཆ་མེད་དུ་སོང་༑ དེ་རྟིང་མ་འཕྲད་ཟེར་ནས། བུ་མོ་དྲན་ནས་མཆི་མ་བཏོན་ཅིང་། སྐྱོ་ཤས་བླངས་ཤིང་ཤིང་ཁུར་དེ་ཁུར་ནས་འཕྲང་དེའི་མཇུག་ཏུ་ཡུད་དེ་ཡུད་དེ་འགྲོ་ཞིང་།སྐྱིད་སྐྱིད་མི་ཡུལ་མཐིལ་རེ་སྐྱིད། །སྡུག་སྡུག་བར་དོའི་འཕྲང་རེ་སྡུག །ཐུང་ཐུང་མི་ཚེ་འདི་ལས་ཐུང་། །སྐྱོ་སྐྱོ་འགྲོགས་ལོང་མེད་པ་སྐྱོ། །ཆུང་ཆུང་རང་དབང་འདི་ལས་ཆུང་། །ཟེར་ཞིང་འགྲོ་ཞིང་འདུག ཡང་བོས་ཏེ་ཁོ་རེ་དེར་སྒུགས་དང་དྲི་རྒྱུ་གཅིག་ཡོད་བྱས་ནས་ཁྱོད་ཆོས་ཀྱི་རྒྱལ་པོའི་དྲུང་དུ་ཕྱིན་ནམ་བྱས་པས། མ་ཕྱིན་དོང་མོ་ཆེའི་ནང་དུ་བབས་ནས་ཕྱིན་ན། མཇལ་ས་ཡོད་པར་སྣང་སྟེ་འགྲོ་ཕོད་པར་མི་སྣང་།དོང་མོ་ཆེའི་ཕྱོགས་སུ་ཉེ་བ་ཙམ་གྱིས་འཇིགས་སྣང་སྙིང་གས་ལ་ཁད་པ་ཙམ་འོང་འདུག ང་ནི་ཨ་མས་བསྲུང་བ་ཡིན་པས། གཞན་རྣམས་ནི་རང་དབང་མེད་པར་བསྲུང་མཁན་ནི་མི་སྣང་། མི་འགྲོ་བའི་རང་དབང་མེད་པར་འཇིགས་སྣང་གིས་སྙིང་གས་ལ་ཁད། ངོ་སེར་ཏང་ཏང་། བརྒྱལ་ལོག་ལོག ཐུར་དུ་ཁྲིད་འགྲོར་སྣང་ཟེར་ནས་འགྲོ་གྲབས་བྱེད་ཅིང་། འཇིགས་འཇིགས་དོང་མུན་ནག་པོ་འཇིགས། །མགྱོགས་མགྱོགས་ལས་རླུང་ནག་པོ་མགྱོགས། །ཚ་ཚ་ལས་ཀྱི་མེ་རེ་ཚ། །འཁྱམས་འཁྱམས་གྲོགས་མེད་གཅིག་པུར་འཁྱམས། །ལུས་ལུས་ཐམས་ཅད་ཤུལ་དུ་ལུས། །ལྕི་ལྕི་ལས་ངན་སྡིག་སྒྲིབ་ལྕི། །ཟེར་ནས་ཡང་། ཤིང་ཁུར་དེ་བསིགས་པ་བྱས་ནས། ཧུ་ཁྱུ་ཟེར་ནས་སེམས་ཕམ་པའི་ཚུལ་གྱིས་ཡུད་དེ་ཡུད་དེ་སོང་། ང་ཡང་བ རྒྱུགས་ནས།ཁོ་རེ་ཁྱོད་ལ་ངེས་པར་ཅི་ཕན་གང་ཕན་དེ་ངས་བྱེད། དེ་ལྟ་བུའི་སྡུག་བསྔལ་མ་བྱེད།ཁྱོད་མི་ཡུལ་བཟང་པོའི་གནས་རྙེད་པ་དང་། ཕྱི་མ་ཆོས་དང་འཕྲད་པ་དང་། ང་རང་སྤུན་དང་ཡང་ཁྱོད་སྐྱེ་བ་ཕྱི་མ་འཕྲད་པའི་སྨོན་ལམ་རྒྱ་ཆེན་པོ་ངས་བཏབ་བོ། །སྡུག་མི་དགོས། ཁྱོད་གཅིག་པུ་མིན། ངེད་རྣམས་ཀྱང་འདི་འདྲ་རེས་མོས་བྱེད་དགོས་ཡོད། སེམས་ཅན་ཀུན་ལ་འོང་། ཁྱོད་རང་སེམས་ཕམ་མི་དགོས། ལྷོད་ཀྱི་ལྷོད་ལ་ཇོ་བོ་ཐུགས་རྗེ་ཆེན་པོའམ། ཡང་ན་ཨ་མས་རོགས་ལྡན་བྱེད་པ་དེ། ཡི་དམ་རྡོ་རྗེ་ཕག་མོ་ཡིན་འོང་ཁྱོད་རང་དབང་ཐོབ་པ་དང་། ཁྲོས་མའི་ཕྲིན་ལས་ཤེས་པའི་བྱིན་རླབས་ཀྱིས། ཁྱོད་བར་དོར་བསྲུངས་སྐྱོབས་མཛད་པ་ཡིན་ངེས་པས་ཡུམ་ཆེན་རྡོ་རྗེ་ཕག་མོ་ང་ལ་ཐུགས་རྗེས་ཟུངས་ཤིག་གྱིས་ལ་གསོལ་བ་ཐོབ་དང་ངས་ཀྱང་ཚེས་བཅུ་མ་ཆགས་པར་བྱེད། གསོལ་བ་གདབ་བོ། །བྱས་པས་ཁོས་ན་རེ། རང་བཞིན་བར་དོར་སྡུག་དྲག་པས་དེ་སྐད་སྨྲེ་སྔགས་འདོན་པ་ཡིན། གཞན་དང་བར་དོ་ཕལ་ཆེར་ལས་ང་རང་སྐྱིད་པར་བྱུང་། ཁྱེད་ཀྱི་སྐྱེ་བདུན་རིལ་བུ་སྦྱིན་བསྲེགས་དང་།བཏགས་གྲོལ་སྦྲགས་མ་དེས་ང་རང་ལ་ཤིན་ཏུ་ཕན་པ་བྱུང་། བར་དོའི་སེམས་ཅན་ཀུན་ལའང་ཕན་པ་རྒྱ་ཆེན་པོ་བྱུང་། ད་རུང་ཡང་ངའི་རུས་པ་སྐམ་པོ་ཚོ་ལ་ཚ་ཚ་བཏབ། བཏགས་གྲོལ་དང་སྐྱེ་བདུན་རིལ་བུ་སྦྲགས་ནས་མེ་ལ་བསྲེགས་བཅོལ།དེ་རང་ཕན་པར་བྱུང་། ན་རཀ་བསྐོངས་བཤགས་འདིས་ཕན་པར་སྣང་བས་འབངས་འབུང་ཐོན་ཟེར། ཡང་ལངས་ནས། ཁྲིམས་ཁྲིམས་འདུལ་ཁྲིམས་ཆུ་ལ་བསྐྱུར། །ཅེས་འཐེན་ཅིང་འགྲོ་འདུག ཁོ་རེ་ཁྱོད་ཀྱི་དེ་ཅི་ལ་ཟེར། ཁ་རོགས་སྡོད། འདུལ་ཁྲིམས་ཆུ་ལ་སུས་བསྐྱུར་སྣང་བྱས་པས། ང་གནས་ཁང་འ ཚོལ་བ་ལ་ཕྱིན་པས། དེ་ནུབ་བནྡེ་གསུམ་གྱིས་འདུལ་ཁྲིམས་ཆུ་ལ་བསྐྱུར་བ་མཐོང་ཟེར་ནས། ཆུ་དེ་ལ་བསྒྲལ་བ་ཙམ་དུ་འདུག དེ་ནས་རྡོ་རྗེ་སྲི་ཐར་དང་། རྡོ་རྗེ་རྒྱལ་མཚན་སྡུག་གེ་དང་།ང་རང་དང་གསུམ་ཆབ་ནག་གི་འཕྲང་རིང་པོ་གཅིག་ལ་བརྒལ་ནས་ཐང་གཅིག་གི་མགོར་སླེབ་པ་དང་། མ་ཀི་དེ་ན་སྔགས་པ་མགོ་སེ་གཅིག་གི་རྟ་གཅིག་འཛེག སྔགས་པ་གཅིག་དང་བནྡེ་གཅིག་གཉིས་ཀྱིས་རྟ་ཁ་ཁྲིད་ནས་བྱུང་བས་མཐོང་མ་ཁད་དུ་རྡོ་རྗེ་རྒྱལ་མཚན་བྲོས་ཆས་བྱེད་འདུག་པས། ངས་ཁོ་རང་བཟུང་ནས་ཁྱོད་གར་འགྲོ་བྱས་པས་སྔགས་པ་དེས་ང་ཟ་འོང་། དེ་མཐོང་བ་དང་ང་ལ་སྔངས་སྐྲག་ཆེན་པོ་བྱུང་ཟེར༑ ཁྱོད་ཞེད་མི་དགོས། སྔགས་པ་དེ་སུ་ཡིན་དྲིས་པས། སྤང་ཁུ་ལའི་དགོན་པར་ཡོད་ཟེར། མིང་ཆེན་པོ་སྣང་སྟེ་ངས་ཁར་འདོན་མི་ཕོད་ཟེར་ནས། ཁོ་ཞེད་ནས་འདར་ཡེད་ཡེད་བྱེད་འདུག་པ་དང་། སྔགས་པ་རྟ་བ་དེ་བླ་མའི་ཆ་ལུགས་སུ་མགོ་སེ་བ། བེར་ཐུལ་ཅན་གཅིག་ཏུ་སོང་ནས། བླ་མ་དེས་ན་རེ། བླ་མ་ཉི་ཟླ་ཁྱོད། རྒྱ་མཚོ་ཧུབ་ཀྱིས་འདེབས། རི་བོ་ཁར་བཅུག་པའི་མི་གཅིག་འདུག་ཟེར། ངས་རྒྱ་མཚོ་ཧུབ་ཀྱིས་འདེབས་པ་ཙམ་དུ་སུ་ལ་ཟ་འདོད་མ་བྱས། ངས་ནི་སུ་ལ་གནོད་པ་སྐྱེལ་མ་མྱོང་། རང་ཟས་ཟ་ཞིང་མཚམས་ལ་སྡོད་པ་ཡིན། རི་བོ་ཁར་བཅུག་རྒྱ་མཚོ་ཧུབ་ཀྱིས་འདེབས་མི་དེ་ཁྱོད་ཡིན་མོད། ཁྱོད་འདྲ་བས་ང་ལ་བྱས་ནས་ང་རྒྱལ་གཅིག་བསྐྱེད་པ་དང་། ངའི་རྩ་དེར་ང་རང་གི་སློབ་མ་ཡིན་ཟེར་བའི་སྔགས་ཆུང་བཞི་བྱུང་ནས༑ བནྡེ་རྟ་པ་དེ་ལ་ངའི་ཁ་རོགས་བྱེད་ནས། ཁོ་ལ་ཁ་བསད་མང་པོ་འབོད་དོ། །ཀུ་ཅོ་ཏིར་གྱིས་བྱུང་། ངོ་ཚ་བཅུག་འདུག བནྡེ་དཔོན་གཡོག་རྣམས་སྐྱེངས་བཞིན་བྱས་ནས་གྱང་སྲིབ་ཏུ་འགྲོ་ཟེར་ནས་སོང་། ངས་བུ་ཚ་ལ་ང་རང་རྣམས་ཆབ་དཀར་དུ་འགྲོ་བྱས་པས། ཨ་མ་མོ་སྒྲོལ་མ་འདོན་ཞིང་ཆབ་དཀར་གྱི་ཆུ་འགྲམ་དེར། རྡོ་རྗེ་རྒྱལ་མཚན་དང་ངེད་རང་རྣམས་བསུ་བ་ལ་ཕྱིན་པ་ཡིན་ཟེར་ནས། ཆུ་ཁ་དེར་བྱེ་མ་སྐམ་པོ་ལུས་པོ་ལ་འཕུར་ཞིང་འདུག དེར་ངེད་རྣམས་གྲེ་ཤ་གདོང་འདྲ་བ་གཅིག་ཏུ་ཆུ་ལ་བརྒལ་ནས་ཤི་རི་ཚ་འཇུག་འདྲ་བ་གཅིག་ཏུ་ཆུའི་ཚུ་རིར་སླེབས་ནས། ད་རྩི་ད ཀར་དུ་འགྲོ་བསམ་པས། གཉིད་སད་པ་དང་། འདར་ཡེད་ཡེད་མཆི་མ་ཙ་རེ་སྐྱོ་ལྷང་ལྷང་འདུག་གོ །དེ་མ་ཐག་ཏུ་ཐོས་གྲོལ་དང་། བཏགས་གྲོལ་བཏོན། སྨོན་ལམ་མང་པོ་བཏབ་བོ། །བསྔོ་བ་བྱས་རྨི་ལམ་འདིའང་ཡི་གེར་བྲིས་སོ། །སེམས་ཅན་ཐམས་ཅད་ལ་ཕན་ཐོགས་པར་གྱུར་ཅིག རྫོགས་སོ། །ཡང་ཟླ་བ་དེའི་ཕྱི་མ་དགུན་ཟླ་ཐ་ཆུང་། གླང་ཟླའི་ཚེས་བཅུ་གཅིག་ནུབ་ཐོ་རངས་ཁར་རྨི་ལམ་དུ། མྱོག་དམ་ལུང་པའི་ཕུ་འདྲ་བའི་ཆབ་ནག་གཅིག་གི་ཤུལ་དུ། མི་ཕོ་མོ་ལྔ་བརྒྱ་ཙམ་འཚོགས་འདུག་པ་ལ། དེ་རྣམས་མགྲོན་འགྱེད་ལ་སོགས་དང་། གཏོར་མ་བཏང་དུས་སེར་སྣ་དང་ཕངས་སེམས་མི་ཉན་པ་ལ་སོགས་གཙང་སྦྲ་ཆུང་བ། གཏོར་མ་ཆུང་བ་སེར་སྣ་ཕངས་སེམས་བྱས་པ་དེ་རྣམས་སྤངས་པ་དང་། མཐར་ཆོས་བཤད་ཡིག་དྲུག་བསྐུལ་བ་ལ་སོགས་དེ་རྣམས་ཤིན་ཏུ་ཕན་ཡོན་ཆེ་བའི་རྨི་ལྟས་མང་པོ་བྱུང་འདུག་པས་ཐུགས་ལ་ཞོག་ཅིག།།དེ་ནས་མི་ཁྲོམ་རྣམས་གྱེས་ནས་སོང་བ་དང་། བདག་གིས་ལུང་པ་དེའི་ཕུ་ལ་ཁ་གཏད་ནས་ཕྱིན་པས། ཕ་ཀི་ནགས་གསེབ་གཅིག་ཏུ་ཤིང་གསེ་མི་གཅིག་གྲག་པས།ང་ཡང་དེར་ཕྱིན་པ་དང་། རྡོ་རྗེ་རྒྱལ་མཚན་དཔྲལ་བ་རྔུལ་ཆི་ལེ་བ་སྒྲོན་མེ་ཆེན་པོ་གཅིག་གསེ་ཤིང་འདུག ཁོ་རེ་ཁྱོད་དེ་གསེ་ནས་ཅི་བྱེད། ཁྱོད་ད་ཞག་གནས་ཁང་མ་རྙེད་ཟེར་བ་ད་རྙེད་དམ་དྲིས་པས། ཁོས་ན་རེ། ངས་གནས་ཁང་ཕ་ཟད་ཐག་རིང་གཅིག་ཏུ་བཙལ་ན་རྙེད་ཚོད་སྣང་སྟེ། ངེད་རང་རྩི་དཀར་སྐོར་འདིར་སེམས་ཆགས་པས་གཞན་དུ་འགྲོ་མ་ཕོད། ཐད་ནས་གཡུང་དྲུང་སྐྱིད་མོས་གནས་ཁང་ཡོད་ཟེར་ཏེ།ང་མེ་རྟ་གསེ་བ་ལ་བྲེལ་བས་མ་ཁོམ་ཟེར། ཁྱོད་སྒྲོན་འདིས་ཅི་བྱེད་བྱས་པས། ང་གར་ཕྱིན་ཀྱང་ཉི་ཟླ་མ་མཐོང་བས་མུན་ནག་པར་བྱུང་བས་མེ་རྟའི་རྗེས་སུ་འགྲོ་བསམ་པ་ཡིན་ཟེར། ཁྱོད་ད་རུང་གནས་མ་རྙེད་པས་འདིར་བསྡད་པས་གཉུག་མ་བུད་དམ།བར་དོ་ཐོས་གྲོལ་ནང་ནས་སྲིད་པ་བར་དོ་ངོ་སྤྲོད་ཀྱི་སྐབས་སུ་མངལ་སྒོ་གདམ་པ་ལ་རིགས་མི་གཅིག་པ་དེ་ཙམ་ཡོད་པ་ལ། དག་པ་མཁའ་སྤྱོད་ཀྱི་ཞིང་དུ་འཕོ་བ་དང་༑ མ་དག་འཁོར་བའི་མངལ་སྒོ་གདམ་པ་གཉིས་ཡོད་པ་ལ་ཁྱོད་རང་ཡིད་ལ་མེད་དམ། འཁོར་བའི་མངལ་སྒོ་རང་གི་ཅི་བྱེད་སྡུག་པ་ཡིན་པས། ཁྱོད་རང་ནུབ་ཕྱོགས་བདེ་བ་ཆེན་པོའམ། སངས་རྒྱས་ཀྱི་ཞིང་གང་མོས་པ་གཅིག་ཏུ་འདུན་པ་གཏོད་དང་༑ ངེས་པར་ཞིང་དེར་སྐྱེ་བར་བཤད་འདུག ཁྱོད་རང་ལ་གདོས་བཅས་ཀྱི་ལུས་ནི་མེད། བག་ཆགས་ཡིད་ལུས་ཡིན་པས། ཁ་ལོ་བསྒྱུར་སླ་བ་ཡིན། ཁྱོད་ཡིད་མ་ཆེས་ན། ང་རྨི་ལམ་བག་ཆགས་ཀྱི་ལུས་ཡིད་ལུས་སྟོང་པ་ཡིན། ངའི་ལུས་པོ་བེམ་པོ་དེ་ཉལ་མལ་དུ་འོང་རྒྱུ་མེད། ཁྱོད་བར་དོ་སྟོང་ལུས་ཡིན་པས། ངེད་རང་གཉིས་ཀ་སྟོང་གཟུགས་ཡིན། ལག་པས་འཇུ་རྒྱུ་མི་འོང་། ཨེ་བདེན་ལྟོས་ཤིག་བྱས་པས།ཁོའི་ལག་པ་ལ་འཇུ་ནས་བསྡོམས་པས། ལག་པ་ཁྲོད་ཐང་ཐང་གཟུང་རྒྱུ་བྱུང་བས།ཟང་ཐལ་དུ་འགྲོ་མི་ཉན་པར་གདོས་བཅས་ཀྱི་ལུས་འདྲ་བ་བྱུང་བས། ཁོས་ན་རེ།ང་ཡལ་མ་ཉན་མངོན་སྣང་ཡོད་བྱས་པས་ཟེར་བ་དང་། བདག་གི་བསམ་པ་ལ། ང་ནི་རྨི་ལམ་ཡིན་པ་ཐག་ཆོད། ཁོ་ནི་ཤི་ཚར་བ་ལ་ཤི་གསོན་གཉིས་པོ་ལུང་རིང་འདི་ནས་འཕྲད་པ་ག་ལ་སྲིད་པ་ལ། ལག་པ་ནས་བཟུང་བས་གཟུང་རྒྱུ་འདུག ངེས་པ་མི་བདེན་ནམ་བསམ་ངེས་པར་ཨེ་བདེན་ནམ་བསམས་ནས། ཁོ་ཡི་གདོང་པ་ལ་ལེགས་པོར་བལྟས་པས། ཁོས་ཀྱང་ཚུར་མིག་འབྲུ་ཚུགས་སུ་བལྟས་ནས། ངེད་རང་གཉིས་ད་ལན་མིན་པ་ཨེ་འཕྲད་མི་ཤེས། འཕྲད་པའི་རྟིང་མ་ཡིན་པས་བལྟ་ཡག་བྱེད་དགོས་ཟེར་ནས། ངས་ཕར་བལྟས། ཁོས་ཚུར་བལྟས་ཡུན་རིང་དུ་ཅི་རེད་བལྟས་ནས་ངའི་བསམ་པ་ལ། ཨ་ཙ་མ་སྣང་བ་ལ་མངོན་ཞེན་གྱི་འཁྲི་བ་མ་ཆོད་པར། བདེན་འཛིན་ཨ་འཐས་འདི་ཐོགས་མེད་ནས་རྒྱུད་ལ་འབྱར་བས། ད་བཤིག་ཐུབ་པར་མི་སྣང་༑ བར་དོའི་ཡིད་ལུས་སྟོང་པ་དང་རྨི་ལམ་གྱི་ལུས་སྟོང་གཉིས་ཕྲད་པ་ལས།ཡང་ལག་པས་འཇུ་རྒྱུ་ཨེ་བྱུང་ལེགས་པོར་བལྟས་ཀྱང་མ་ཡལ་བར་བལྟ་རྒྱུ་བྱུང་བས།འཁྲུལ་སྣང་བདེན་འཛིན་འདི་བཤིག་ཐུབ་པར་ནི་མི་སྣང་། བླ་མ་དཀོན་མཆོག་བསམ་པ་གཅིག་བྱུང་བ་དང་། ཡང་ཁོས་ན་རེ། ང་ནི་ད་རུང་སངས་རྒྱས་ཀྱི་ཞིང་དུ་འདུན་པ་གཏད་ནས་འཕོ་བསམས་ཀྱང་། འཚེར་བ་ལ་ཚད་མེད་པ་བྱུང་། ལས་ངན་གྱི་སྒྲིབ་པ་ཡིན་པ་འདྲ། དམྱལ་བ་ཡི་དྭགས་དུད་འགྲོ་གསུམ་ལ་ནི། འགྲོ་བསམ་ཡང་མ་བྱུང་། འགྲོ་མི་དགོས་པ་འདྲ། ད་རུང་མི་ལུས་གཅིག་ཐོབ་ན་མི་ཡུལ་དུ་འདུག་ལོང་མ་བྱུང་བ་སྙིང་སྟོང་ཆེ་དྲགས་པས། སངས་རྒྱས་ཀྱི་ཞིང་ལས་ཀྱང་། མི་ལུས་གཙང་མ་གཅིག་རང་ཡིད་ལ་བྱུང་ཟེར་བས། དེར་ངས་ཁོ་རེ་ཁྱོད་སངས་རྒྱས་ཀྱི་ཞིང་ཡ་མཚན་དང་བདེ་བའི་ཡོན་ཏན་ཚད་མེད་པ་ཡོད་པ་དེར་མི་དགའ་བར། བསྐལ་བ་སྙིགས་མའི་ལུས་ངན་གཅིག་ལ་ཞེན་པ་མ་ཆོད་པ་དེ་སྒྲིབ་པ་རང་ཡིན་པར་ཐག་ཆོད༑ འོ་ན་ངས་རོགས་བྱའོ། །ངེད་རང་གཉིས་གནས་ཁང་གཙང་མ་འཚོལ་བ་ལ་འདོང་བྱས་ནས། ངས་ཁོ་ཁྲིད་ནས་ལུང་དེའི་མདོར་ཕྱིན་པས། ལུང་པའི་མདའ་དེ་ན་ཁང་པ་སུམ་ཐོག་པ་ཧོ་སོང་གཅིག་འདུག ཁོ་རེ་ཁྱོད་རང་གནས་ཁང་མ་རྙེད་ཟེར་བ༑ ཁྱིམ་འདིས་གནས་ཁང་མི་འོང་ངམ། འདིའི་ནང་དུ་འདོང་བྱས་པས། ཁོས་ན་རེ།འདི་འདྲ་བའི་གནས་ཁང་ཚོད་མེད་པ་སྣང་། ང་འདི་འདྲ་བའི་ནང་དུ་འགྲོ་བསམ་ངོམས་པ་མིན་ཟེར། འོ་ན་ཐད་ན་གནས་ཁང་བཏང་ངོ་ཟེར་བ་དེར་མི་འགྲོ་བ་ཅི་ཡིན་བྱས་པས། ཁོས་ན་རེ། ཐད་ལ་གནས་བཏང་ཟེར་ནས་སྒོ་རྩར་ཕྱིན་པས། ནང་དེ་ན་གཙང་མའང་མིན་པ་འདྲ་སྟེ། ནང་དེ་ན་ཨོ་ངལ་ཟེར་མཁན་གཅིག་ཡོད་གྲགས་པས༑ ཕྱིར་ལོག་ཕྱིན་པ་ཡིན་ཟེར། འོ་ན་ཁྱིམ་འདིའི་ནང་ན་འདུག་ཉན་ཨི་སྣང་ལྟོས། རྒྱབ་དེར་འཛེག་འདོང་བྱས་ནས། ཁང་པའི་རྒྱབ་ནས་རྩིགས་པ་ལ་འཛེག་ནས། ཡང་རྩེ་དེར་གཉིས་ཀ་སླེབ་བྱུང་ནས། རྒྱ་མཐོང་གི་ནང་དུ་སྐས་གཅིག་བཙུགས་པ་དེར་ང་སྔོན་ལ་བབས། ཁོ་རེ་ཁྱོད་རང་ཡང་ཤོག་དང་། ཅི་འདྲ་སྣང་བལྟའོ་བྱས་པ་དང་། ཁོ་མར་བབས་མི་འོང་བར་སྟེང་ནས་མར་མིག་གཅིག་བལྟས་མ་ངོམ་པ་འདྲ་གཅིག་བྱས་ནས་དགྱེད་དེ་ལོང་འདུག །ང་མར་བབས་ནས་བར་ཁང་དེར་ཕྱིན་པས། མི་འདུག་པའི་རྗེས་མེད་པ་ཧང་ལ་རྒོག་པ། གདུང་མ་ཆད་ལ་ཁད་པ། ཀ་བའང་གས་ནས་ཞིག་ལ་ཁད་པ་གཅིག་འདུག འོག་ཁང་དེར་ཕྱིན་པ་དང་། རྩོག་པ་ཞིག་ལ་ཁད་ནས་འཇིགས་པ། སེམས་ཅན་མང་པོ་བསད་པའི་སློ་དང་འདམ་རྫབ་དང་༑ རྒྱུ་མ་ཉག་ཉིག་མང་པོ་ཡོད་པ། འོག་གཞི་ཁྲག་རུལ་དང་འདམ་རྫབ་འདྲེས་མས་གང་བ། ལོགས་ཐམས་ཅད་ཕྲུ་མ་རློན་པ་འདྲ་བའི་ཡོལ་བ་བྱས་པས་སྐྱུགས་བྲོ་བ་གཅིག་འདུག ང་ཡང་སྐྱུགས་བྲོ་བ་དང་གྲིབ་འོང་དོགས་པས། ཕྱིར་སྒོ་ཆུང་གཅིག་འདུག་པ་ལ་འགྲོ་བར་བརྩམས་པ་ནས་ཁོ་སྡུག་པ། ཁྱིམ་རྩོག་པ་ཞིག་ལ་ཁད་པ་འདིར་བཞག་པས་མི་འོང་། ཁང་པ་གཙང་མ་བཟང་པོ་གཅིག་འཚོལ་རོགས་འགྲོ་དགོས་བསམ་པ་དང་། ཁོ་ཡང་རྩ་དེར་སྐྱོ་ཤས་ལྷང་ལྷང་འཐེན་ཞིང་། རྩོག་རྩོག་སྡིག་ཅན་ཁྱིམ་རེ་རྩོག །དཀོན་དཀོན་གནས་ཁང་བཟང་པོ་དཀོན། །སྐྱོ་སྐྱོ་བར་དོའི་འཕྲང་ལ་སྐྱོ། །ཆུང་ཆུང་རང་དབང་འདི་ལས་ཆུང་། །འགྲོ་འགྲོ་འདི་འགྲོ་མེད་པར་འགྲོ། །ཟེར་བའི་རྩིགས་པའི་རྒྱབ་ལོགས་སུ་བབས་ནས་ཕྱི་རོལ་དུ་འགྲོ་གྲགས་པས། ང་ཡང་བརྒྱུགས་ནས་ཁོ་བཟུང་ནས་ལབ་ལབ་བྱེད། བློ་སྤྲོ་གནས་ཁང་ཚོལ་རོགས་བྱེད་དགོས་བསམ་ནས། སྒོ་དོག་མོ་ཞིག་ལ་ཁད་ལ་མ་ཐར་བའི་རིང་ལ། ཁོ་ཕ་ཟད་གཅིག་ནས་སྐྱོ་ཤས་ལྷང་ལྷང་འཐེན་ཞིང་འགྲོ་གྲགས། སྒོ་དེ་ཕྱིན་ནས། རྡོ་རྗེ་རྒྱལ་མཚན། རྡོ་རྗེ་རྒྱལ་མཚན། ཞེས་སྐད་རིང་པོ་བཏང་ནས་བོས་ཀྱང་། ཅི་ཡང་ཆ་མེད་པར་གར་སོང་ཆ་མེད་དུ་སོང་། དེ་སྐྱོ་བ་ཚད་མེད་པ་བྱུང་ཞིང་ཁོ་ལ་སྙིང་རྗེ་ཚད་མེད་པ་བྱུང་། ཨ་ཙ་མ། ད་ལན་ཁོ་སྡུག་པ་དང་འཕྲད་ཀྱང་ལབ་ལབ་ཡིད་ཆེས་པ་གཅིག་བྱེད་ལོང་མ་བྱུང་། སྡུག་ཁྱིམ་འདི་ལན་པ་ཡིན། ད་ཅི་ནས་ལོག་པ་ལ་མ་ཤོར་བ་གཅིག་བྱས་ནས། ལབ་ལབ་ཡིད་ཚིམ་པ་གཅིག་བྱེད་རྒྱུ་ཡིན་པར་འདུག་པ་ལ། ད་ནི་གར་སོང་ཅི་ཆ། ཕྱིན་ཆད་ནི་ཁོ་དང་མི་འཕྲད། ད་རུང་ཁོ་གར་འདུག་བཙལ་ནས་ལོ་རྒྱུས་ཡིད་ཆེས་པ་གཅིག་དྲི། ཆོས་བཤད་ནས་དག་པ་མཁའ་སྤྱོད་ཀྱི་ཞིང་དུ་འཕོ་བཅུག་པས་དྲགས། དེ་མི་ཉན་ནའང་གནས་ཁང་བཟང་པོ་གཅིག་བཙལ་ནས་མ་བསྐྱལ་ན་འོང་བར་མི་འདུག ཁོའི་སྐྱོ་ཤས་དེ་ཚོར་བས་རང་གི་སྡུག་པ་སྐྱོ་བ་ལ་ཚད་མེད་པ་འདུག ཁོ་རང་ཀུན་སྡུག་པ་ལ་ཚད་ཅི་ཡོད། ད་ཁོ་བོ་ལ་འབོད་ཀྱིན་འཚོལ་དགོས་བསམ་པ་དང་། གཉིད་སད་ནས། ནངས་པར་རྨི་ལམ་ཡི་གེར་བྲིས་སོ། །ཕྱིས་ཁོ་དལ་འབྱོར་བཅོ་བརྒྱད་ལྡན་པའི་མི་ལུས་རིན་པོ་ཆེ་གཅིག་ཐོབ་ནས་ཐོས་གྲོལ་གྱི་ཆོས་སྐོར་ཉམས་སུ་ལེན་ཅིང་བརྒྱུད་པ་འཛིན་པ་དེ་ཡིན། ཀྱེ་མ་ཀྱི་ཧུད་བར་དོའི་སེམས་ཅན་རྣམས། །སྡུག་བསྔལ་ཁོ་ན་མིན་པ་བདེ་བ་མེད། །ལྷན་ཅིག་སྐྱེས་པའི་ཤ་རུས་སོ་སོར་བྲལ། །བཤེས་གཉེན་ཉེ་དུ་ཟས་ནོར་རྒྱབ་ཏུ་ལུས། །སྡིག་པ་ཕྲ་མོ་ཡན་ཆད་རང་ལ་འཕྲད། །བར་དོའི་སྡུག་བསྔལ་སེམས་ཅན་ཉོན་རེ་མོངས། །རང་ངོ་རང་གི་མ་ཤེས་སྙིང་རེ་རྗེ། །དེ་འདྲའི་སེམས་ཅན་སྐྱབས་མགོན་མེད་པ་ལ། །ཐུགས་རྗེས་ཟུངས་ཤིག་ཞི་ཁྲོའི་ལྷ་ཚོགས་རྣམས། །བར་དོའི་སེམས་ཅན་ཞི་ཁྲོའི་སྐུ་ཐོབ་ཤོག །དེ་སྐད་རྨི་ལམ་ཚུལ་དུ་བརྗོད་པ་ཡང་། །བར་སྐབས་མཚམས་སུ་བར་དོར་དངོས་སུ་ཕེབས། །བདེན་པར་བཤད་པ་ཡིན་གྱི་ལྡེམ་དགོངས་མིན། །རེ་རེ་ཙམ་ལ་ཕན་བསམ་བྲིས་པ་ཡིན། །སེམས་ཅན་ཐམས་ཅད་རང་ངོ་ཤེས་པར་ཤོག །བར་དོའི་སྡུག་བསྔལ་ཐམས་ཅད་གྲོལ་གྱུར་ཅིག །ཅེས་པ་འདི་གུ་རུ་ཉི་ཟླ་འོད་ཟེར་གྱིས་བྲིས་པ་རྫོགས་སོ།། །།ཡང་ལྷོ་ནུབ་ཏུ་ཕྱིན་དུས། ཁ་ལྷོ་ལ་བལྟས་པའི་ལུང་པ་གཅིག་གི་མདོར་སླེབས་པ་དང་། བུད་མེད་གཅིག་བྱུང་ནས་འདི་གསུངས། ལུང་པ་འདི་གནས་ངོ་མཚར་ཅན་གཅིག་ཡིན། འདིའི་ནང་དུ་ངོ་མཚར་ཅན་གྱི་སྐུ་མང་པོ་བྱོན་ནས་ཡོད། མཇལ་བ་ལ་འདོང་ཟེར་ནས་ཕྱིན་པས། བྲག་གི་འགགས་ཐམས་ཅད་ཀེང་རུས་མི་གཟུགས་མང་པོ་ཤར་ནས་འཇིགས་འཇིགས་ལྟར་འདུག བདག་གིས་བུད་མེད་དེ་ལ་སྨྲས་པས།ཀེང་རུས་ཀྱི་མི་གཟུགས་བྲག་ལ་ཤར་བ་ལ་ངོ་མཚར་ཅི་ཡོད། ང་ནི་ཅུང་ཟད་འཇིགས་པའི་སྣང་བའང་བྱུང་སྨྲས་པས། བུ་མོས་ན་རེ། ཀྱེ་ཧོ། འདི་ནི་མི་རྟག་རང་ཁ་བརྡའ་འདི་བསྟན། །རེ་ཞིག་ཁྱོད་ཀྱི་གོ་བར་མ་གྱུར་ན། །སྲ་ཞིང་མཁྲེགས་པའི་བྲག་རི་ཆེན་པོ་འདི། །བདག་འཛིན་བྲག་རིར་ཡུན་དུ་ཞེན་པ་ན། །ཀེང་རུས་སྒྱུ་མའི་ལུས་འདི་ཡང་ནས་ཡང་། །ཞིག་པར་གྱུར་ཀྱང་བདག་འཛིན་བྲག་མ་ཞིག །གང་གིས་ཐོག་མེད་དུས་ནས་བདག་ཏུ་འཛིན། །སྲ་ཞིང་མཁྲེགས་ལ་གཞིག་པར་དཀའ་བའི་བརྡའ། །གང་ཞིག་གཅེས་པར་འཛིན་པས་བསླུ་གྱུར་པའི། །བདག་མེད་འཇིག་ལ་སྙིང་པོ་མེད་པའི་ལུས། །ལྷན་ཅིག་སྐྱེས་པའི་ཤ་རུས་སོ་སོར་གྱེས། །ཁ་ཅིག་རྩ་ཡི་དྲ་བ་ཙམ་དུ་འབྲེལ། །ཁ་ཅིག་རྣམ་པར་བམ་ཅིང་དྲི་ངའི་ཚུལ། །ཁ་ཅིག་བྱ་གཅན་ཁྱི་ཟོས་རྣམ་པར་དམར། །ཁ་ཅིག་འབུ་ཡིས་བཤིག་ཅིང་གཡེངས་བར་སྣང་། །ཁ་ཅིག་རུས་པ་དག་ཀྱང་རྣམ་པར་འཐོར། །ལྷན་ཅིག་སྐྱེས་པའི་ཤ་རུས་བྲལ་གྱུར་ནས། །མཛའ་བཤེས་གཉེན་འདུན་བྲལ་བ་སྨོས་ཅི་དགོས། །དེ་སྐད་བརྡའ་ཡི་ཆོས་རྣམས་གསུངས་གྱུར་ནས། །སྐྱེས་བུ་ཁྱོད་ནི་རྟག་པར་འཛིན་ལགས་སམ། །ཞེས་ཟེར་བ་དང་༑ བདག་གི་ཡིད་ལ་ཨ་ཙ་མ། མཛའ་བཤེས་གཉེན་འབྲེལ་ནོར་རྫས་རྣམས་དང་བྲལ་བ་ཨ་ཅང་ཡང་ཆེ་སྟེ། རང་གི་ལུས་འདི་ཡང་ནམ་ཤི། རྣམ་པར་དམར་བ་དང་། རྣམ་པར་བམ་པ་དང་། འབུ་ཅན་དང་། རྣམ་པར་འཐོར་བའི་ཀེང་རུས་འདི་ཁོ་ན་ལས་མ་འདས་སོ། །བདག་འཛིན་གྱི་བྲག་རི་འདི་ནི་ཞིག་པར་དཀའ་འོ། །ཟེར་བའི་བརྡའ་རུ་འདུག་གནས་བཟང་པོ་མཇལ་བ་ཡོན་ཏན་ཡོད་ཟེར་བ་དེ་མི་རྟག་པ་ཁོ་ན་བསྟན་པའི་བརྡར་གོ་ནས། བུ་མོ་དེ་ལ་ད་རུང་གནས་མཇལ་ཡོད་དམ་བྱས་པས། བུ་མོ་དེས་ན་རེ། ད་རུང་འདིའི་ཕུ་ནའང་ངོ་མཚར་བའི་གནས་ལ་ཟད་པ་མེད་དེ། འདོང་དང་ཟེར་ནས་ཕྱིན་པས་བྲག་རིའི་རྒྱུད་གོང་མ་དེ་མགོན་པོའི་སྐུ། ཁ་དོག་མཐིང་ནག་ལ། མིག་ཚེས་བཅོ་ལྔའི་ཟླ་བ་ཙམ་བསྒྲད་པ། མཆེ་བ་མཁར་ཙམ་གཙིགས་པ། ཤིན་ཏུ་འཇིགས་པ་གཅིག་བྲག་ལ་ཤར་ནས་མཐོང་། དེ་མཐོང་མ་ཁད་དུ་འཇིགས་པའི་སྣང་བ་དཔག་ཏུ་མེད་པ་ཤར་ནས། དེའི་ཕྱོགས་སུ་ཉེ་མ་ནུས་ཤིང་། བདག་འདར་བ་དང་། བུ་མོས་ན་རེ། ཧ་ཧ་བྲག་ལ་ཤར་བའི་སྐུ་ལ་ཡང་། །འདི་ཙམ་འཇིགས་པ་ཁྱོད་སྐྱེས་ན། །བར་དོའི་འཕྲང་ལ་འགྲོ་ཙམ་ན། །གཤིན་རྗེ་ཆོས་ཀྱི་རྒྱལ་པོ་ནི། །སྐུ་ནི་རི་བོ་མཆོག་རབ་ཙམ། ། གསུང་ནི་འབྲུག་སྟོང་ལྡིར་བ་ཙམ། །འོད་ཟེར་ཉི་མ་འབུམ་གྱི་ཟེར། །གཤིན་རྗེའི་འཁོར་ཚོགས་ཐམས་ཅད་ཀྱང་། །རི་བྲན་མང་པོའི་གར་བྱེད་འདྲ། །ཕྱག་མཚན་མཚོན་ཆ་ཐམས་ཅད་ཀྱང་། །ཐོག་སྟོང་དུས་གཅིག་བབས་པ་འདྲ། །དེ་འདྲའི་དྲུང་དུ་འགྲོ་དགོས་པས། །དེ་དུས་ཁྱེད་ཉིད་ཅི་ཚུགས་བྱེད། །གབ་ནས་སྒྲིབ་ས་དེ་ན་མེད། །བྲོས་པས་བཟུར་ས་དེ་ན་མེད། །ཨ་ཆུང་ད་རུང་སྒྱུ་ལུས་སྦྱངས། །ད་རུང་བར་དོ་རྩལ་སྦྱང་གྱིས། །ཟེར་བས། བདག་གི་བསམ་པ་ལ། བུ་མོ་འདི་རེ་བདེན། ད་ལྟ་བྲག་ལ་ཤར་བའི་སྐུ་གཅིག་ལ་འདི་ཙམ་འཇིགས་པ་འདུག་པ་ལ། ནམ་ཞིག་འཆི་ངེས་པར་ཐག་ཆོད། བར་དོར་ཕྱིན་ནས་གཤིན་རྗེ་ཆོས་ཀྱི་རྒྱལ་པོའི་དྲུང་དུ་འགྲོ་བར་ཐག་ཆོད། དེ་དུས་ཅི་ཚུགས་བྱེད།བྲོས་ས་ནི་མེད། ཚུར་ལོག་ཀྱུ་ནི་མེད། ང་འདྲ་བ་ལ་ཨ་རྫི། ད་ནི་སྙོམས་ལས་ལ་སྡོད་ཕོད་དམ། ད་ནི་ཆོས་ཀྱི་རྒྱལ་པོའི་དྲུང་དུ་ནམ་འགྲོ་ཅི་ཆ་སང་ཕོད་ད་ཙམ་སླེབ་ཟིན་ནས་འོང་ཅི་ཆ་ཨ་ཕ་ཨ་མ། འཇིགས་པ་ནི་སྒྱུ་ལུས་ཁོ་ན་ལ་སྦྱང་ནས་བར་དོ་ལ་འཇིགས་པ་ཆུང་དུ་འགྲོ་ཨེ་འོང་ན། གཞན་ནི་བར་དོ་ལ་གྲོལ་ལུགས་ཅི་ཚུགས་བྱེད། ཕ་ང་འདྲ་བ་སྙམ་པ་གཅིག་བྱུང་ནས། ཡང་བུ་མོ་དེ་ལ་སྨྲས་པ། ང་ནི་ད་འདི་ནས་ཡར་འགྲོ་ཕོད་པར་མི་སྣང་མར་ལོག་འགྲོ་སྙིང་འདོད་འཇིགས་སྣང་ཆེན་པོ་ཤར།བར་དོའི་འཇིགས་པ་རྣམས་དྲན་ནས། སྙིང་གས་ལ་ཁད་པ་བྱུང་། ད་ཡར་མི་འགྲོ་བྱས་པས། བུ་མོས་ན་རེ། རེ་སྡུག་སྨྲས་ཀྱང་གོ་རྒྱུ་མེད་པའི་མི་ཁྱོད་ལ། ད་ལྟ་འདི་ལ་འཇིགས་ཀྱང་ལོག་དབང་ཡོད། ད་རེས་ལོག་པས་བར་དོར་གྲོལ་ལམ་ཅི། བར་དོའི་འཇིགས་སྐྲག་བྱུང་དུས་ལོག་གམ་ཅི། ལོག་དབང་ཡོད་དམ་རེ་སྡུག་ཁྱེད་འདྲ་བ།ད་རུང་ཡར་ལ་འདོང་ངོ་མཇལ་རྒྱུ་ཡོད། ཟེར་བ་དང་། ཡང་བུ་མོ་ལ་སྨྲས་པ། བྲག་ལ་ཤར་བའི་མགོན་པོ་ཡི་སྐུ་འདི་ལ་འཇིགས་སྐྲག་པས་ཡར་ལ་འགྲོ་མི་ནུས་པ་འདྲ།འདི་ནི་རང་བྱོན་མིན་པ་འདྲ། སྐུ་འདི་ནི་འཁྲུལ་སྣང་། ང་ཟར་འོང་བྱས་པས་བུ་མོས་ན་རེ། ཀྱེ་ཧོ་གང་ཞིག་གཞན་ལ་སྨྲས་མཁས་རང་ཉིད་གྲོལ་གྲོལ་འདྲ་ན་ཡང་། །རྨི་ལམ་འཇིགས་པ་ཙམ་གཅིག་མ་གྲོལ་ཆོས་བཤད་མཁན་པོ་རྣམས། །གང་ཞིག་གཞན་ལ་བར་དོ་ཐོས་གྲོལ་བཤད་ཟེར་ཁ་བདེ་ཅན། །སྟོང་པ་ཉིད་ཀྱི་སྟོང་པ་ཉིད་ལ་གླགས་མི་རྙེད་པར་སྐད། །གཞན་ལ་སྨྲ་བའི་ཆོས་དེ་རང་གི་རྒྱུད་ལ་སྦྱོར་མཛོད་དང་༑ ༑མགོན་པོའི་སྐུ་འདི་བྲག་ལ་ཤར་ཡང་རང་བཞིན་ཅིས་མ་གྲུབ། །ཁྱེད་རང་རྨི་ལམ་སྒྱུ་མའི་ལུས་ཡིན་རང་བཞིན་ཡེ་ནས་མེད། །བླ་མས་བསྟན་པའི་གདམས་པ་ད་ལྟ་དྲན་པར་གྱིས་མཛོད་དང་། །འཇིགས་སྣང་ཐམས་ཅད་རང་སེམས་ལས་བྱུང་སེམས་ཉིད་སྟོང་པའོ། །དེ་དོན་བར་དོར་དྲན་ན་འཇིགས་སྣང་ཅི་ལ་ཡོང་གི་ཨཾ། །བར་དོར་འགྲོ་མཁན་རང་རིག་གསལ་སྟོང་འདི་ཉིད་ཁོ་ན་ཡིན། །གཤིན་རྗེའི་འཇིགས་པ་དག་ཀྱང་རང་རིག་ཁོ་རྩལ་ལས་ཤར་བའོ། །ཞེས་ཟེར་བ་དང་བདག་གི་བསམ་པ་ལ།བུ་མོ་འདི་རེ་བདེན། བདག་གིས་གཞན་ལ་བར་དོ་ཐོས་གྲོལ་བཤད་པ་བྱས་ཀྱང་ང་རང་འདི་ཙམ་འཇིགས་ན་ཁ་ཆོས་མཁན་པོ་ནེ་ཙོའི་ཆོས་བཤད་དང་འདྲ་བར་འདུག་ད་ནི་ཕྱི་རོལ་གྱི་འཇིགས་གཟུགས་འདིའི་རང་བཞིན་དུ་གྲུབ་པ་མེད། འདི་བཟོ་བའི་མཁན་པོ་མེད། འཇིག་རྟེན་འདི་ན་རང་རྒྱུད་ཅན་དུ་ཅིས་ཀྱང་གྲུབ་པ་མེད་པ་ལ།འདི་གཅིག་པུ་ལ་ཅི་ལ་འཇིགས། ཐམས་ཅད་རང་བཞིན་གྱི་སྟོང་པ་ཉིད་ཡིན་སྙམ་ནས་མ་བཅོས་པའི་ངང་ལ་བཞག་པས་ཐ་མལ་གྱི་ཤེས་པ་གསལ་སྟོང་དུ་རྗེན་ནེ།ཅེ་རེ་གནས་ཤིང་འདུག་པ་དང་། འཇིགས་པའི་སྣང་བ་མེད་ནས་ཟང་ཐལ་དུ་ཕྱམ་ཕྱམ་དུ་སོང་བ་དང་། བུ་མོ་དེས་ན་རེ། འོ་དེ་ཀ་ལྟར་དུ་བྱས་ན་གཤིན་རྗེ་ཆོས་ཀྱི་རྒྱལ་པོ་འབུམ་ཕྲག་གཅིག་གི་དཀྱིལ་དུ་ཚུད་ཀྱང་འཇིགས་པ་ཅི་ལ་ཡོད། ཐམས་ཅད་སྟོང་པ་ཉིད་དུ་གོ་ན། བར་དོར་ད་ལྟ་ཉིད་དུ་གྲོལ་བ་ཡིན་ནོ། །ཟེར་རེ། །དེ་ནས་ཡར་ལ་ཕྱིན་པ་དང་། བྲག་རི་ཆེན་པོ་ཁ་ཕྱོགས་སུ་བལྟས་པའི་ལོགས་གཅིག་ལ༑ ཤཱཀྱ་ཐུབ་པའི་སྐུ་གཅིག་བྱོན་ནས་འདུག་པ་དེ་སྐུ་ཆེ་ཆུང་ནི་རི་བོ་ཆེ་ཤོས་ཙམ་པ་བྱོན་ལེགས་པ། མདངས་ཚོན་གྱི་བཀྲག་མདངས་ཤིན་ཏུ་གསལ་བ་གཅིག་མཐོང་།བདག་གིས་བུ་མོ་དེ་ལ་སྨྲས་པ་གནས་རྣམས་སུ་ལྷ་བྱོན་ཟེར་བ་མང་པོ་ཐོས་ཀྱང་།འདི་ལྟ་བུའི་གསལ་བ་དང་དོད་མོ་ཡོད་སྐད་མི་སྣང་། འདི་མངོན་སུམ་ཡིན་པ་གཅིག་མིན་ནམ། རྨི་ལམ་ཨེ་ཡིན་བྱས་པ་དང་། བུ་མོས་ན་རེ། ཧ་ཧ། མངོན་སུམ་བྱས་པ་སྟོང་གསུམ་འདི་ན་མེད། །ཐམས་ཅད་རྟག་མི་ཐུབ་པ་རྨི་ལམ་ཡིན། །ཐམས་ཅད་འགྱུར་ཞིང་འགྲོ་བ་སྒྱུ་མ་ཡིན། །གཅིག་ཏུ་ཐེར་ཟུག་གནས་པ་གང་ན་ཡོད། །མངོན་སུམ་འགྱུར་དེ་གནས་པ་གང་ཡང་མེད། །གང་ཞིག་འབྱུང་བ་ལྔ་ལ་གྲུབ་པ་ཡི། །འཇིག་རྟེན་སྟོང་གསུམ་འདི་ཡང་ཞིག་ནས་འགྲོ། །གང་ཞིག་ལྷན་ཅིག་སྐྱེས་པའི་གཟའ་ཚང་ཡང་། ། ལོ་དང་ཟླ་བ་ཤོལ་ནི་མ་ཐེམ་པར། །གཅིག་ཏུ་མི་གནས་གྱེས་པའི་ཆོས་ཅན་ཡིན། །གང་ལ་གཅེས་པར་བྱས་པའི་ལུས་འདི་ཡང་། །ནམ་ཞིག་ཐལ་བ་དག་ཀྱང་རླུང་གིས་ཁྱེར། །མངོན་སུམ་སྣང་ནའང་དོན་ལ་སྟོང་པ་ཡིན། །རྨི་ལམ་ཉིད་ཀྱང་གནས་སྐབས་མངོན་སུམ་ཡིན། །ཐམས་ཅད་རྨི་ལམ་སྒྱུ་མའི་རང་བཞིན་ནོ། །ཅེས་ཟེར་བས། བདག་གི་བུ་མོ་དེའི་ཁ་ལ་བལྟས་པའི་རིང་ལ། ཅི་ཚུགས་བྱས་ཆ་མེད་པ་གཅིག་ལ་ཐུབ་པའི་སྐུ་དེ་ལ་ཨོ་རྒྱན་གྱི་སྐུ་ཆེན་པོ་གཅིག་ཏུ་སོང་། དེ་ལ་བལྟས་ནས། བདག་གིས་བསམ་པ་ལ། ཨོ་རྒྱན་སྐུ་གཅིག་ཏུ་སོང་འདུག་སྟེ། པད་ཞྭ་དང་། རྡོ་རྗེ། བྷན་དྷ་རྣམས་ནི་འདི་ཀ་ཡིན་ཏེ། ཁ་ཊཱཾ་ཁའང་མི་འདུག ཆོས་གོས་གསེར་གྱི་པ་ཏྲ་ཅན་དེའང་མི་འདུག ཟ་འོག་བེར་སྔོ་བཀྲ་དེའང་མེད་པར་གོས་ཅན་ལྕགས་ནག་གི་ན་བཟའ་བེར་ནག་འདི་རྐྱང་པ་གསོལ་བ་འདི། ཨོ་རྒྱན་མིན་པ་ཨེ་ཡིན། བདག་གི་འདི་རྨི་ལམ་ཡིན་པ་འདྲ། མཐོང་སྣང་འདི་ད་ཅི་ཐུབ་པ་ཡིན་པ་ལ།ད་ཨོ་རྒྱན་དུ་སོང་འདུག ཨོ་རྒྱན་ཡང་མཐིང་ཀ་འདི་འདྲ་ཆོས་གོས་དང་ཁ་ཊཱཾ་ཡང་མེད་པ་འདི་རྒྱལ་འགོང་གི་ཆོས་འཕྲུལ་གཅིག་རྨི་ལམ་དུ་བསྟན་པ་གཅིག་བྱུང་བསམ་པ་དང་། ཨོ་རྒྱན་གྱི་སྐུ་དེའི་ཞལ་ནས་འདི་སྐད་གསུངས། ཨེ་མ་ཧོ། ངོ་མཚར་མི་ཆེའམ། གང་གི་རང་སྣང་རྣམ་པར་མ་དག་ན། །སངས་རྒྱས་དངོས་ཀྱང་པེ་ཀར་གཟུགས་སུ་མཐོང་། །གང་གི་རང་སེམས་རྣམ་པར་དག་པའི་ཚེ། །པེ་ཀར་ཉིད་ཀྱང་སངས་རྒྱས་བཅོམ་ལྡན་འདས། །བདུད་དང་སངས་རྒྱས་གཉིས་ཀྱང་སེམས་སྣང་ལས༑ ༑སངས་རྒྱས་གུད་ན་རྒྱལ་འགོང་ལོག་ན་མེད། །ངེས་པར་སངས་རྒྱས་བྱ་བ་ཐེར་ཟུག་མེད། །ངེས་པར་བདུད་ཅེས་བྱ་བ་རྟག་བརྟན་མེད། །གང་དག་སངས་རྒྱས་ཉིད་ལ་གཟུགས་སུ་མཐོང་། །དེ་བཞིན་སངས་རྒྱས་ཉིད་ལ་སྒྲར་ཤེས་པ། །དེ་ཉིད་ལོག་པའི་ལམ་ལ་ཞུགས་ཞེས་གསུངས། །གང་གི་སངས་རྒྱས་རྟག་པ་མེད་དེ་སྟོང་། །དེ་བཞིན་ཆད་པ་མ་ཡིན་རིག་ཅིང་གསལ། །རྟག་ཆད་གཉིས་མེད་དེ་ཉིད་སངས་རྒྱས་ལ། །དེ་ལྟར་མ་ཤེས་ཀྱང་ཡང་རྒྱལ་འགོང་ཡིན། །རབ་རིབ་ཅན་གྱིས་མཁའ་ལ་སྐྲ་ཤད་འཛག །མཁྲིས་ནད་ཅན་གྱིས་དུང་དཀར་སེར་པོར་མཐོང་། །ཆང་གི་བཟི་བས་ས་ནི་འཁོར་སྙོམས་བྱེད། །མངོན་ཞེན་ཅན་གྱིས་སྒྱུ་མ་བདེན་པར་བཟུངས། །ནམ་མཁའ་ལ་ནི་སྐྲ་ཤད་འཛགས་པ་མིན། །དུང་དཀར་ལ་ནི་སེར་པོ་མ་གྲུབ་བོ། །ས་འདི་ལ་ནི་གཡོ་ཞིང་འཁོར་བ་མེད། །སྒྱུ་མ་ལ་ནི་བདེན་པར་ཡེ་མ་གྲུབ། །པདྨ་འབྱུང་གནས་རྒྱལ་འགོང་ཡེ་ནས་མིན། །བཅོམ་ལྡན་འདས་ལ་པེ་ཀར་ཡེ་མ་གྲུབ༑ ༑གྲུབ་པ་མེད་པར་ཤེས་ནས་སོང་བ་མིན། །ཡེ་ནས་གནས་ལུགས་ཁོ་རང་རང་གཤིས་ཡིན། །ཧ་ཧ་ཟེར་བ་དང་། བུ་མོ་དེས་ན་རེ། ཐམས་ཅད་རང་གི་སེམས་རྣམ་པར་དག་མ་དག་གི་བྱེད་པ་ཁོ་ན་ལས། ཕྱི་རོལ་ནས་སངས་རྒྱས་བྱ་བ་རྟག་བརྟན་ཐེར་ཟུག་པ་གཅིག་ཡོད་མ་མྱོང་། བདུད་དང་རྒྱལ་འགོང་བྱ་བ་རྟག་བརྟན་ཐེར་ཟུག་གཅིག་དེ་བས་ཀྱང་མེད། རྒྱལ་འགོང་ཡིན་པར་འཛིན་ན་རང་སྣང་མ་དག་པའི་ཉེར་ལེན་དེས་བར་ཆད་འོང་ནས་སངས་རྒྱས་རྒྱལ་འགོང་དུ་འགྲོ། སངས་རྒྱས་ཡིན་བསམ་ནས་མོས་གུས་བྱས་ན། ནང་གི་ཉེ་བར་ལེན་པ་དེའི་གནད་ཀས་བྱིན་བརླབ་འབྱུང་། བར་ཆད་དང་བྱིན་བརླབ་གཉིས་ཕྱི་ནས་འབྱུང་བ་མིན། ནང་གི་ཉེ་བར་ལེན་པའི་རྒྱུ་དང་། རང་སེམས་དག་མ་དག་གི་བྱེད་པ་ཁོ་ན་ལས་གཞན་དུ་མེད་པར་ཤེས་པར་གྱིས། ད་རུང་འདིའི་ཕུ་ན་ངོ་མཚར་ཆེ་བའི་ལྟས་མང་པོ་ཡོད་དོ། །དེས་ཆོག །ཅེས་པ་རྨིས་སོ། །མངྒ་ལཾ་ས རྦ་ཤུ་བྷཾ།