དགེ་འདུན་ཆོས་འཕེལ་ལོ་རྒྱུས་བསྡུས་པ་

འཛམ་གླིང་དྲན་དབང་སྟོང་གི་ཡང་རྩེ་ན་རྣམ་དཔྱོད་ཟླ་བྲལ་གྱི་རིག་པའི་དཔའ་པོ་དགེ་འདུན་ཆོས་འཕེལ་ནི་མདོ་སྨད་རེབ་གོང་ཞོ་འཕང་ཞེས་བྱ་བའི་དགེ་བཅུ་ཚང་བའི་ཡུལ་དེ་རུ་ཡབ་སྔགས་འཆང་རྡོ་རྗེའི་མཚན་ཅན་ནམ་ཨ་ལགས་རྒྱལ་བོ་ཞེས་བྱ་བ་དང་ཡུམ་པད་མ་སྐྱིད་ཀྱི་སྲས་སུ་རབ་བྱུང་བཅོ་ལྔ་ཆུ་མོ་ཡོས་༡༩༠༣ལོའི་ཧོར་ཟླ་བརྒྱད་པའི་ནང་སྐུ་བསྟམས།དགོང་ལོ་བདུན་ཕེབས་སྐབས་ཡབ་གཤེཊ་རྗེས་ཡ་མ་བཀྲ་ཤིས་འཁྱིལ་དུ་ཁོང་ཡུམ་སྲས་གསུམ་བཞུགས།དགེ་གཤེས་ཨ་ཁུ་ཚུལ་ཁྲིམས་ཀྱི་དྲུང་ནས་སུམ་རྟག་དང་སྙན་ངག་སོགས་གསན།དགུང་ལོ་བཅུ་གཉིས་སྟེང་གཙོས་གཏེར་དགོན་གྱི་མདུན་ནས་རྩ་རླུང་འཁྲིད།དགུང་ལོ་བཅོ་ལྔའི་སྟེང་རྡི་ཚ་དགོན་དུ་རིག་ལམ་གྱི་སྐོར་སོགས་སློབ་གཉེར་མཛད།དགུང་གྲང་བཅུ་བདུན་ལ་ཕེབས་སྐབས་བླ་བྲང་བཀྲ་ཤིས་འཁྱུལ་དུ་བཞུགས་ཏེ་བསྡུས་གྲྭ་ནས་བརྩམས་ཏེ་མཚན་ཉིད་རིག་པར་སྦྱངས།དགུང་གྲངས་ཉེར་ལྔའི་སྟེང་ལྷ་སར་ཕེབས།དེ་ནས་འབྲས་སྤུངས་སུ་དགེ་གཤེས་ཤེས་རབ་རྒྱ་མཚོ་སོགས་མཁས་པ་དུ་མ་བསྟེན་ནས་ལོ་བདུན་ཙམ་བཞུགས།དགུང་ལོ་སུམ་ཅུ་སོ་གཉིས་ཕེབས་པ་ཤིང་ཁྱུ་༡༩༣༤ལོར་འཕན་ཡུལ་དང་། རྭ་སྒྲེང་།གཙང་ཁུལ་སོགས་ལ་གནས་གཟིགས་དང་སྦྲགས་བལ་ཡུལ་བརྒྱུད་རྒྱ་གར་དུ་ཕེབས།སཾསྐྲྀ་ཏའི་སྐད་ལ་སྦྱངས་མཐར་གནས་བརྟན་སྡེ་བའི་མདོ་ཆོས་ཀྱི་ཚིགས་སུ་བཅད་པ་ལ་སོགས་ལ་ཐོག་མེད་དུ་བརྒྱུར་བར་མཛད། དེ་ནས་རབ་བྱུང་བཅུ་དྲུག་པའི་ས་སྟག་༡༩༣༨ལོར་ཧུ་ལ་དང་རྒྱ་གར་རི་མོ་བ་གཅིག དཔར་འདེབས་མཁན་གཅིག་བཅས་ལྷན་དུ་བོད་དུ་ཕེབས་ནས་དཔལ་ལྡན་ས་སྐྱའི་དགོན་པ་སོགས་དབུས་གཙང་གི་གནས་དགོན་རྙིང་བ་ཁག་ལ་རྒྱ་དཔེ་ཇི་ཙམ་བཞུགས་པ་གཟིགས་ཞིབ་ཐོག་དཔེ་ཐོ་དཀར་ཆག་ཞིབ་ཚགས་བཀོད་པར་མཛད་དེ་སླར་རྒྱ་གར་དུ་ཕྱིར་ཕེབས་གནང་།སྐབས་དེར་དབྱིན་ཡིག་སློབ་སྦྱོང་རྒྱུན་དུ་མཛད་མུས་ནས་ཨུ་རུ་སུ་རོག་རིས་ཞེས་པ་དེའི་སར་བཞུགས་ཏེ་དེབ་ཐེར་སྔོན་པོ་དབྱིག་ཡིག་ཏུ་བརྒྱུར་བའི་རོགས་རམ་མཛད་དེ་ཀུ་ལུར་ལོ་གསུམ་ཙམ་བཞུགས།བོད་ཤིང་བྱ་༡༩༤༥ལོ་ནང་རྐྱེན་སྣ་ཚོགས་ཀྱིས་བོད་ལྗོངས་ལྷ་སར་ཞལ་ཕྱོགས་ཏེ།སྟོད་ལ་དྭགས་ག་ཤའི་རྒྱུད་དང་།དེ་ནས་རིམ་བཞིན་མོན་རྟ་དབང་བརྒྱུད་ལྷ་སར་ཕེབས།ལྷ་སར་བོད་ཀྱི་ལོ་རྒྱས་དང་རིག་གནས་ཀྱི་ཞིབ་འཇུག་མཛད་དེ་ལྗགས་རྩོམ་མཛད་བཞིན་པའི་མུར་དབྱིན་ཇི་བཙན་རྒྱལ་བས་དེ་སྔའི་བོད་ཀྱི་སྲིད་གཞུང་ལ་ངན་སྐུལ་བྱས་ནས་མ་ཉེས་ཁ་གཡོགས་ཀྱིས་བོད་མེ་ཁྱུ༡༩༤༦ལོར་ཧོར་ཟླ་བཞི་བའི་ནང་ཙམ་ལ་གློ་བུར་འཛིན་བཟུང་གིས་ཁྲིམས་གཅོད་བྱས་ཐོག་ལོ་གསུམ་རིང་བཙོན་ཁང་དུ་བཞུགས་དགོས་བྱུང་ཞིང་༡༩༤༩ལོར་བཙོན་གྲོལ་ཐོབ། ཁོང་གི་རྩོམ་པར་མཛད་པའི་བསྟན་བཅོས་ལ།རྒྱལ་ཁམས་རིག་པས་བསྐོར་བའི་གཏམ་རྒྱུད་གསེར་གྱི་ཐང་མ། བོད་ཆེན་པོའི་སྲིད་ལུགས་དང་འབྲེལ་བའི་རྒྱལ་རབ་བདེ་དཀར་པོ། སིང་ག་ལའི་ལམ་ཡིག་རྒྱལ་པོ་ར་མ་ཎའི་རྟོགས་བརྗོད། བྱ་ལེན་མའི་རྟོགས་བརྗོད། ནག་མོ་ཁོལ་གྱིས་མཛད་པ་རྒྱ་གར་སྐད་ནས་བོད་དུ་བརྒྱུར་བ་སྒྲའི་ཟིན་བྲིས། གངས་རའི་སྐོར། ཞང་དགའ་བའི་བློ་གྲོས་ལ་བྲིས་ལན། རྟུལ་ཆུང་དཔྱད་པའི་སྐོར། དབུ་ཚད་དཀའ་བའི་གནད། ལུ་བྱེད་མཐའ་དཔྱད། འདོད་པའི་བསྟན་བཅོས། རྡི་ཚ་སྐམ་པོས་ཕུལ་བའི་ཞུ་ཡིག་རྒྱ་གར་གྱི་གནས་ཆེན་བརྒྱད་ཀྱི་ལམ་ཡིག་ཀེ་ཏ་སོགས་ཀྱི་བཤད་པ་ཞབས་བརྟན་འཆི་མེད་དབྱངས་སྙན།  ལེགས་ལྡན་ནག་པོའི་ཀླུ། རང་བཞིན་གསུམ་ངེས་པ།གཏམ་གྱི་ཚོགས་ཉིན་མཚན་བདུན་པ།སིང་ག་ལའི་གནས་བརྟན་སྡེ་བའི་མདོ་དྷརྨ་པ་ད་ཞེས་བྱ་བ།ཆོས་ཀྱི་ཚིགས་སུ་བཅད་པ་རྒྱ་གར་ནས་བོད་སྐད་ད་དུ་བསྒྱུར་བ། ལེགས་སྦྱར་བང་མཛོད། སུམ་རྟག་ས་ཀྱི་སྐོར་ཕྲན་བུ། སྙན་ངག་གི་དཀའ་གནད་ཕྲན་བུ་སོགས་ལྷོ་གླིང་འཛིན་མའི་གྲོང་འདིར་རིན་ཐང་གཞལ་ཐབས་བྲལ་བའི་གསུངས་འབུམ་པོ་ཏི་ལྔ་ལྷག་ཡོད།དགུང་གྲངས་ཞེ་དགུ་སྟེ་བོད་རབ་བྱུང་བཅུ་དྲུག་པའི་ལྕགས་ཡོས་༡༩༥༡་ལོར་ཧོར་ཟླ་བརྒྱད་པའི་ཚེས་༡༤་དགོང་དྲོའི་ཆུ་ཚོད་བཞི་བ་ཙམ་ལ་ལྷ་ས་དགའ་རུ་ཤར་དུ་སྐུ་གཤེགས་སོ།།