དཀྱིལ་འཁོར་དང་ལྷའི་རྣམ་དག་མཐོང་བ་རང་གྲོལ་

༄༅། ། ཟབ་ཆོས་ཞི་ཁྲོ་དགོངས་པ་རང་གྲོལ་ལས༔ དཀྱིལ་འཁོར་དང་ལྷའི་རྣམ་དག་མཐོང་བ་རང་གྲོལ་ཞེས་བྱ་བ་བཞུགས༔འོ་རིགས་ཀྱི་བུ་དད་པ་དང་ལྡན་པ་རྣམས་དཀྱིལ་འཁོར་འདི་ལ་ལྟོས་ལ་ཉོན་ཅིགསེམས་ཅན་དང་སངས་རྒྱས་རྒྱུ་གཅིག་པའི་རྟགས་སུ། དཀྱིལ་འཁོར་འཇམ་ཞིང་སྲུབ་མེད་པའོ། །ཆོས་སྐུ་འགྱུར་བ་མེད་པའི་རྟགས་སུ། དཀྱིལ་འཁོར་གྱི་གཞི་མཐིང་ནག་ཏུ་ཡོད་པའོ། །ལོངས་སྐུ་གསལ་ལ་མ་འགགས་པའི་རྟགས་སུ། དཀྱིལ་འཁོར་ཁྲ་བོར་འདུག་པའོ། །ཐུགས་རྗེའི་སྤྲུལ་སྐུས་འགྲོ་དོན་མཛད་པའི་རྟགས་སུ། ཁ་དོག་དམར་སེར་སོ་སོར་གསལ་ཞིང་ཤར་བའོ། །ཡེ་ཤེས་ལྔ་ལྷུན་གྱིས་གྲུབ་པའི་རྟགས་སུ། དབུས་སུ་ཐིག་ལེ་མུ་ཁྱུད་ལྔ་ལྡན་དུ་ཡོད་པའོ། །ཤར་ཕྱོགས་ཐམས་ཅད་དཀར་པོར་འདུག་པ་ནི། ཀ་རི་ཀ་ཤེལ་ལས་གྲུབ་པའི་རྟགས་སོ། །ལྷོ་ཕྱོགས་ཐམས་ཅད་སེར་པོར་འདུག་པ་ནི། རིན་པོ་ཆེ་གསེར་ལས་གྲུབ་པའི་རྟགས་སོ། །ནུབ་ཕྱོགས་ཐམས་ཅད་དམར་པོར་འདུག་པ་ནི། པདྨ་རཱ་ག་ལས་གྲུབ་པའི་རྟགས་སོ། །བྱང་ཕྱོགས་ཐམས་ཅད་ལྗང་གུར་འདུག་པ་ནི། ཨིནྡྲ་ནཱི་ལ་ལས་གྲུབ་པའི་རྟགས་སོ། །དབུས་ཕྱོགས་ཐམས་ཅད་མཐིང་གར་འདུག་པ་ནི། བཻ ཌཱཪྱ་ལས་གྲུབ་པའི་རྟགས་སོ། །པདྨ་མུ་ཁྱུད་གསུམ་ལྡན་གྱིས་བསྐོར་བ་ནི། སྐུ་གསུམ་འདུ་འབྲལ་མེད་པའི་རྟགས་སོ༑ ༑ཚད་མེད་བཞི་དང་ལྡན་པའི་རྟགས་སུ་གྲུ་ཆད་བཞིར་འདུག་པའོ། །ཆོས་སྐུ་སྐྱེ་བ་མེད་པའི་ཕོ་བྲང་དུ་འགྲོ་བའི་རྟགས་སུ་རྣམ་པར་ཐར་པའི་སྒོ་བཞི་རུ་འདུག་པའོ། །ཡབ་ཡུམ་གཉིས་སུ་མེད་པའི་རྟགས་སུ་གྲུ་ཆད་མཛེས་ཚོན་དུ་འདུག་པའོ། །ཞི་ཁྲོ་རིགས་ལྔའི་ཞིང་ཁམས་སོ་སོར་ཡོད་པའི་རྟགས་སུ་སྒོ་བཞི་ཕྱོགས་ཚོན་དུ་འདུག་པའོ༑ ༑རིགས་ལྔའི་དགོངས་པ་ལམ་དུ་ཁྱེར་བའི་རྟགས་སུ། པདྨ་ར་གའི་རྩིག་པ་ལྔ་རུ་འདུག་པའོ། །རྣམ་ཤེས་ཚོགས་བརྒྱད་གནས་སུ་དག་པའི་རྟགས་སུ། ལྷ་ཆེན་བརྒྱད་ཀྱི་ཀ་བ་བརྒྱད་དུ་འདུག་པའོ། །རྣམ་ཤེས་ཡུལ་བརྒྱད་གཟུང་འཛིན་དང་བྲལ་བའི་རྟགས་སུ། རུས་སྦལ་བརྒྱད་ཀྱི་ཀ་གདན་ཡོད་པའོ། །འཇིག་རྟེན་ཆོས་བརྒྱད་གནས་ཡུལ་དང་བྲལ་བའི་རྟགས་སུ།ཆུ་སྲིན་གྱི་ཁ་རུ་རྡོ་རྗེ་འབྱུང་བའོ། །བཀྲ་ཤིས་ཡོན་ཏན་གྱི་རྟགས་བརྒྱད་དང་ལྡན་པའི་རྟགས་སུ། གཟའ་ཆེན་བརྒྱད་ཀྱི་ཀ་ཞུར་འདུག་པའོ།།རྣམ་ཐར་ཆེན་པོ་བརྒྱད་དང་ལྡན་པའི་རྟགས་སུ། ཀ་རྒྱན་རྣམ་པ་བརྒྱད་དུ་ཡོད་པའོ། །འབྱུང་བ་ཆེན་པོ་བཞི་གནས་སུ་དག་པའི་རྟགས་སུ། ལྷ་ཚངས་པའི་གདུང་མ་བཞི་རུ་འདུག་པའོ། །ཉི་ཤུ་ཉེ་བའི་ཉོན་མོངས་པ་ཐམས་ཅད་གནས་ཡུལ་གཉིས་མེད་དུ་དག་པའི་རྟགས་སུ།ལྷ་དང་ལྷ་བྲན་གྱི་དྲལ་ཕྱམ་བྱས་པའོ། །ཡོན་ཏན་ཐམས་ཅད་རང་བཞིན་ལྷུན་གྱིས་གྲུབ་པའི་རྟགས་སུ། རིམ་པ་ལྔའི་ཐོག་ཕུབ་ནས་ཡོད་པའོ། །ཐུགས་རྗེས་སེམས་ཅན་ལ་རྒྱུན་དུ་གཟིགས་པའི་རྟགས་སུ། ཉི་ཟླའི་མཐོང་ཁུང་བཞིར་ཡོད་པའོ། །ཐུགས་གཡོ་འགུལ་མེད་པའི་རྟགས་སུ་བདུད་རྩི་གར་སྤྱིན་གྱིས་སྦྱར་ནས་ཡོད་པའོ། །འགྱུར་མེད་དོན་གྱི་དགོངས་པ་མཐའ་རུ་ཕྱིན་པའི་རྟགས་སུ། གནམ་ལྕགས་ཁྲོ་ཆུའི་འཛེར་གྱིས་གདབ་ནས་ཡོད་པའོ། །འདོད་པའི་ཡོན་ཏན་ལྔ་མི་སྤངས་བའི་རྟགས་སུ།འདོད་ཡོན་གྱི་ལྷ་མོ་རྣམས་དམར་པོར་འདུག་པའོ། །ཆེ་བའི་ཡོན་ཏན་དུ་མ་དང་ལྡན་པའི་རྟགས་སུ། རིན་པོ་ཆེའི་ཕ་གུ་སེར་པོར་འདུག་པའོ། །སྐྱོན་བྲལ་ཡོན་ཏན་ལྔ་དང་ལྡན་པའི་རྟགས་སུ། ད་རུ་ཀད་དམར་ལྗང་དུ་ཡོད་པའོ། །བྱང་ཆུབ་ཀྱི་ཆོས་རྣམ་པར་དག་པའི་རྟགས་སུ། དྲ་བ་དང་དྲྭ་ཕྱེད་ཀྱིས་བརྒྱན་པའོ། །མཚན་དང་དཔེ་བྱད་བརྒྱ་རྩ་བརྒྱད་དང་ལྡན་པའི་རྟགས་སུ། མཆོད་རྟེན་བརྒྱ་རྩ་བརྒྱད་ཀྱིས་བསྐོར་བའོ༑ ༑དམ་པའི་ཆོས་མི་ནུབ་པའི་རྟགས་སུ་རྒྱལ་མཚན་བརྒྱད་དང་ལྡན་པའོ། །ཉོན་མོངས་པའི་རྣམ་རྟོག་ལས་དབེན་པའི་རྟགས་སུ་རི་དྭགས་གཉིས་གཉིས་ཀྱིས་བརྒྱན་པའོ། ། སེམས་ཅན་ལ་ཆོས་སྟོན་པའི་རྟགས་སུ། ཆོས་ཀྱི་འཁོར་ལོ་བཞིས་མཚན་པའོ། །བྱམས་པ་ཆེན་པོ་དང་ལྡན་པའི་རྟགས་སུ། རིན་པོ་ཆེའི་གདུགས་ཕུབ་ནས་ཡོད་པའོ། །ཐབས་དང་ཤེས་རབ་འདུ་འབྲལ་མེད་པའི་རྟགས་སུ། དར་གྱི་ཆུན་འཕྱང་ཟུར་བཞིར་བརྒྱན་པའོ། །རྣམ་རྟོག་འགྱུ་བ་དྲན་རིགས་དང་བྲལ་བའི་རྟགས་སུ། རླུང་རྡོ་རྗེ་རྒྱ་གྲམ་ཕྱོགས་བཞིར་གསལ་བའོ། །རྣམ་པར་ཤེས་པ་བརྒྱད་རང་སར་དག་པའི་རྟགས་སུ༑ དུར་ཁྲོད་ཆེན་པོ་བརྒྱད་ཀྱིས་བསྐོར་བའོ། །འགྲོ་བ་ཀུན་གྱི་དོན་བྱེད་ཅིང་བག་ཆགས་དྲི་མ་དང་བྲལ་བའི་རྟགས་སུ། སྣ་ཚོགས་ཀྱི་པད་མས་བསྐོར་བའོ། །ཆོས་ཉིད་སྐྱེ་འཇིག་དང་བྲལ་བའི་རྟགས་སུ་ཕྱི་རིམ་རྡོ་རྗེའི་ར་བས་བསྐོར་བའོ། །ཕྱིན་ཅི་ལོག་པའི་རྣམ་རྟོག་ཐམས་ཅད་བསྲེག་པའི་རྟགས་སུ་སྣ་ཚོགས་མེ་རིས་བསྐོར་བའོ། །དེའི་རྗེས་སུ་ལྷའི་རྣམ་དག་ངོ་སྤྲད་པ་ནི། དབུས་སུ་ཀུན་བཟང་ཡབ་ཡུམ་གཉིས་སུ་སྣང་བ་འདི་ཡང་ཀ་དག་ལྷུན་གྲུབ་གཉིས་སུ་མེད་པས་ཐབས་དང་ཤེས་རབ་སྣང་སྟོང་ངམ༑ ཡིད་ཆོས་གཉིས་རྣམ་པར་དག་པའི་རྟགས་སུ། རིགས་ཀྱི་ཡབ་ལྔར་སྣང་བ་འདི་ཡང་ཕུང་པོ་ལྔ་རྣམ་པར་དག་པའི་རྟགས་སོ། །རིགས་ཀྱི་ཡུམ་ལྔར་སྣང་བ་འདི་ཡང་འབྱུང་བ་ལྔ་རྣམ་པར་དག་པའི་རྟགས་སོ། །ཟུང་སྦྱོར་དུ་སྣང་བ་འདི་ཡང་འཁོར་བ་ཟིལ་གྱིས་མནན་ཞིང་སྐྱོན་གྱིས་མ་གོས་པའི་བདེ་བ་ཆེན་པོར་གཅིག་པའི་རྟགས་སོ༑ ༑སེམས་དཔའ་བརྒྱད་དུ་སྣང་བ་འདི་ཡང་། རྣམ་ཤེས་ཚོགས་བརྒྱད་གནས་སུ་དག་པའི་རྟགས་སོ། །སེམས་མ་བརྒྱད་དུ་སྣང་བ་འདི་ཡང་ཡུལ་བརྒྱད་རྣམ་པར་དག་པའི་རྟགས་སོ། །ཐུབ་པ་དྲུག་ཏུ་སྣང་བ་འདི་ཡང་འགྲོ་དྲུག་དབྱིངས་སུ་འདྲེན་ཞིང་ཉོན་མོངས་པ་དྲུག་རྣམ་པར་དག་པའི་རྟགས་སོ། །སྒོ་བ་ཡབ་ཡུམ་བརྒྱད་ཟུང་དུ་སྣང་བ་འདི་ཡང་རྟག་ཆད་མུ་བཞི་རྣམ་པར་དག་ཅིང་ཚད་མེད་པ་བཞིས་འགྲོ་བའི་དོན་མཛད་པའི་རྟགས་སོ། །དེ་དག་སོ་སོའི་སྐུ་མདོག་ལྔར་སྣང་བ་འདི་ཡང་ཉོན་མོངས་པ་མ་སྤངས་གནས་སུ་དག་ཅིང་ཡེ་ཤེས་ལྔ་ལྡན་ལྷུན་གྱིས་གྲུབ་པ་ལ། སྐུ་གསུང་ཐུགས་ཡོན་ཏན་འཕྲིན་ལས་ཀྱི་དགོངས་པ་འདུས་པའི་རྟགས་སོ། །ཐམས་ཅད་སྐྱིལ་ཀྲུང་དུ་མཛད་པ་འདི་ཡང་བདུད་ཀྱིས་ཀྱང་མི་འཕྲོགས་ཤིང་དུས་གསུམ་དུ་འཕོ་འགྱུར་མེད་པའི་དགོངས་པ་ལ་བཞུགས་པའི་རྟགས་སོ། །རྒྱན་སྣ་ཚོགས་པས་བརྒྱན་པ་འདི་ཡང་ཡོན་ཏན་ཕུན་སུམ་ཚོགས་པའི་རྟགས་སོ། །རིག་སྟོང་། གསལ་སྟོང་། ཤར་སྟོང་། བདེ་སྟོང་།སྣང་སྟོང་།ཟུང་འཇུག་གི་རྟགས་སུ་རིགས་ལྔའི་ཕྱག་མཚན་སོ་སོར་མཛེས་པའོ། །སྣང་སྲིད་སྣ་ཚོགས་ཡེ་སྟོང་རྩ་བ་དང་བྲལ་བའི་རྟགས་སུ། འཁོར་རྣམས་ཀྱིས་ཕྱག་མཚན་སྣ་ཚོགས་འཛིན་པའོ། །རིག་འཛིན་ཡབ་ཡུམ་བཅུ་ཟུང་སྦྱོར་དུ་སྣང་བ་འདི་ཡང་། བག་ཆགས་དབྱིངས་སུ་དག་པའི་རྟགས་སོ། །སྐུ་མདོག་ལྔ་ལྡན་དཀར་སེར་དམར་ལྗང་དུ་སྣང་བ་འདི་ཡང་། ལྷན་ཅིག་སྐྱེས་པའི་ཡེ་ཤེས་འོད་ཁ་དོག་ལྔ་དང་ལྡན་པའི་རྟགས་སོ། །ཞལ་གཅིག་ནི་དུ་མ་རོ་གཅིག་གོ །སྤྱན་གསུམ་ནི་སྐུ་གསུམ་མོ། །ཕྱག་གཉིས་ནི་ཐབས་དང་ཤེས་རབ་བོ། །ཞབས་གཉིས་ནི་བདེན་གཉིས་ཟུང་འཇུག་གོ །སྐྱང་བསྐུམ་ནི་སྲིད་ཞིའི་མཐའ་ལ་མི་གནས་པའོ། །གྲི་གུག་དང་ཐོད་ཁྲག་ནི་ཤེས་རབ་དང་སྙིང་རྗེའི་རྟགས་སོ། །ཆེ་མཆོག་ཧེ་རུ་ཀ་ཡབ་ཡུམ་གཉིས་སུ་སྣང་བ་འདི་ཡང་། མ་རིག་ཉོན་མོངས་མ་སྤངས་གནས་སུ་དག་པའི་རྟགས་སོ། །ཁྲག་འཐུང་ཁྲོ་བོ་ཡབ་ཡུམ་བཅུ་རུ་སྣང་བ་འདི་ཡང་། ཉོན་མོངས་དུག་ལྔའི་ཡུལ་ཆེན་མ་སྤངས་གནས་སུ་དག་པའི་རྟགས་སོ། །ཀཽ་རི་བརྒྱད་དུ་སྣང་བ་འདི་ཡང་། རྣམ་ཤེས་ཚོགས་བརྒྱད་མ་སྤངས་གནས་སུ་དག་པའི་རྟགས་སོ། །སིང་ཧ་བརྒྱད་དུ་སྣང་བ་འདི་ཡང་། ཡུལ་བརྒྱད་མ་སྤངས་གནས་སུ་དག་པའི་རྟགས་སོ། །སྒོ་མ་བཞི་རུ་སྣང་བ་འདི་ཡང་། སྐྱེ་གནས་བཞི་མ་སྤངས་གནས་སུ་དག་པའི་རྟགས་སོ། །དབང་ཕྱུག་མ་ཉི་ཤུ་རྩ་བརྒྱད་དུ་སྣང་བ་འདི་ཡང་།ཉོན་མོངས་པའི་རྟོགས་ཚོགས་ཉི་ཤུ་རྩ་བརྒྱད་མ་སྤངས་གནས་སུ་དག་པའི་རྟགས་སོ༑ ༑ཁྲག་འཐུང་ཁྲོ་བོ་འཇིགས་པའི་སྐུ་རུ་སྣང་བ་འདི་ཡང་། གདུལ་བྱ་ཞི་བས་མི་འདུལ་བའི་བདུད་དང་དགྲ་བགེགས་རྣམས་འདུལ་བའི་རྟགས་སོ། །གར་གྱི་ཉམས་དགུ་མཛད་པ་འདི་ཡང་། ཐེག་པ་རིམ་དགུ་ཡོངས་སུ་རྫོགས་པའི་རྟགས་སོ། །དུར་ཁྲོད་ཀྱི་ཆས་བརྒྱད་གསོལ་བ་འདི་ཡང་། བདུད་དང་མུ་སྟེགས་ལོག་ལྟ་གདུག་པ་ཅན་རྣམས་འཇོམས་པའི་རྟགས་སོ། །མགོ་བརྙེན་སྣ་ཚོགས་སུ་སྣང་བ་འདི་ཡང་།སྤྲུལ་སྐུའི་མཛད་པ་ཅིར་ཡང་མ་ངེས་པར་སྟོན་པའི་རྟགས་སོ། །དེ་དག་ཕྱི་ལྟར་ན་ཞི་བའི་ལྷ་ཚོགས་བཞི་བཅུ་རྩ་གཉིས་སུ་ཡོད། ནང་ལྟར་ན་ཁྲག་འཐུང་གི་ལྷ་ཚོགས་ལྔ་བཅུ་རྩ་བརྒྱད་དུ་ཡོད། གསང་བ་ལྟར་ན་མཁའ་འགྲོ་སྡེ་ལྔའི་ལྷ་ཚོགས་སུ་ཡོད།ཡང་གསང་ལྟར་ན་ལྷུན་གྲུབ་རྫོགས་ལྡན་གྱི་ལྷ་ཚོགས་སུ་ཡོད། བླ་མེད་ལྟར་ན་རིག་པ་ཐིག་ལེ་ཉག་ཅིག་གི་སྐུ་རུ་ཡོད། ངོ་བོ་འགྱུར་བ་མེད་པ་ཆོས་ཀྱི་སྐུ་རུ་ཡོད།རང་བཞིན་ངང་གིས་གསལ་བ་ལོངས་སྤྱོད་རྫོགས་པའི་སྐུ་རུ་ཡོད། ཐུགས་རྗེས་རང་གྲོལ་དུ་ཡོད་པས་སྤྲུལ་པའི་སྐུ་རུ་ཡོད། ལྟ་སྒོམ་ཡིད་ཡུལ་དུ་གསལ་བས་གཟུགས་ཀྱི་སྐུ་རུ་ཡོད། དེ་ནས་བུམ་པ་དང་རྒྱན་ངོ་སྤྲད་པ་ནི། འོ་རིགས་ཀྱི་བུ་དད་པ་དང་ལྡན་པ་རྣམས་ཉོན་ཅིག ཆོས་སྐུ་སྤྲོས་པ་དང་བྲལ་བའི་རྟགས་སུ། དབང་གི་བུམ་པ་ལྔ་ཟླུམ་པོར་འདུག་པའོ། །ལོངས་སྐུ་ཡེ་ཤེས་ལྔ་དང་ལྡན་པའི་རྟགས་སུ། བུམ་པ་ཁ་དོག་ལྔ་ལྡན་དུ་འདུག་པའོ། །ཐུགས་རྗེ་སྤྲུལ་སྐུ་འོད་ཟེར་ཞི་ཁྲོའི་ཚུལ་དུ་ཡོད་པའི་རྟགས་སུ། བུམ་པའི་ཁ་རྒྱན་དཔག་བསམ་ཤིང་ལས་བྱས་པའོ། །རང་གི་རིག་པ་ལ་འགྱུར་བ་མེད་པའི་རྟགས་སུ།གཟུངས་ཐག་གི་སྣ་ལ་རྡོ་རྗེ་བཏག་པའོ། །ཉོན་མོངས་པ་ལྔ་སྣང་ཡུལ་དག་པའི་རྟགས་སུ། མགུལ་ཆིངས་ཁ་དོག་ལྔ་ལྡན་དུ་འདུག་པའོ། །ཐུགས་རྗེས་འཁོར་བ་ནས་འདྲེན་པའི་རྟགས་སུ། གཟུངས་ཐག་ལྔ་སྒྲིལ་དུ་ཡོད་པའོ། །རང་རིག་པའི་ཡེ་ཤེས་ལ་དྲི་མ་མེད་པའི་རྟགས་སུ། ཤེལ་དཀར་དང་མེ་ལོང་གཉིས་ཀྱིས་བརྒྱན་པའོ། །སྟོང་གསལ་མི་འགྱུར་བའི་མདངས་ལྔ་དང་ལྡན་པའི་རྟགས་སུ། རིན་པོ་ཆེ་ལྔ་བུམ་སྙིང་དུ་ཡོད་པའོ། །སྒྲོན་མ་བཞི་མིག་ཡུལ་དུ་གསལ་བའི་རྟགས་སུ། རྨ་བྱའི་ཕོད་མདོངས་གཟུགས་པའོ། །རིག་པ་ལུག་གུ་རྒྱུད་དུ་གནས་པའི་རྟགས་སུ། རྒྱན་དྲྭ་བ་རིས་སུ་བྲིས་ནས་ཡོད་པའོ། །སངས་རྒྱས་ཀྱི་བསྟན་པ་མི་ནུབ་པའི་རྟགས་སུ། རྒྱལ་མཚན་བ་དན་ཕྱར་བའོ། །བླ་མ་ཡི་དམ་མཁའ་འགྲོ་ཆོས་སྐྱོང་མཉེས་པར་བྱ་བའི་རྟགས་སུ། མཆོད་གཏོར་དང་ཚོགས་འཁོར་བཤམས་པའོ། །རྒྱབ་བརྟེན་དཀོན་མཆོག་གསུམ་དང་མི་བྲལ་བའི་རྟགས་སུ། ཡོལ་བ་དང་བླ་རེ་གཉིས་ཀྱིས་བརྒྱན་པའོ། །བདུད་བཞི་ཟིལ་གྱིས་གནོན་པའི་རྟགས་སུ། གདན་ཁྲི་བཀོད་པ་དང་ལྡན་པ་རྩིག་པའོ། །ཉོན་མོངས་པའི་བག་ཆགས་དྲི་མས་མ་གོས་པའི་རྟགས་སུ། སྤར་གཡོབ་དང་རྡུལ་ཁེག་གི་གཡོགས་ནས་ཡོད་པའོ། །ཆོས་ཀྱི་སྒྲ་ཕྱོགས་བཅུར་སྒྲོགས་པའི་རྟགས་སུ། ལྷ་ཆ་རོལ་མོ་སྣ་ཚོགས་སུ་ཡོད་པའོ། །ཐེག་པ་ཆེན་པོའི་ཆོས་རྒྱུན་མི་ཆད་པའི་རྟགས་སུ། སྨན་ཕུད་དང་རཀྟས་བྲན་ཞིང་བལྟམས་པའོ། །དབང་བསྐུར་བ་ལ་ཕུན་སུམ་ཚོགས་པ་ལྔ་དང་ལྡན་པའི་རྟགས་སུ། མཆོད་པའི་བྱེ་བྲག་བསམ་གྱིས་མི་ཁྱབ་པའོ། །དབང་བསྐུར་བྱིན་རླབས་ཕེབས་པའི་རྟགས་སུ། བདག་རྡོ་རྗེ་སློབ་དཔོན་ཁྲི་ལ་བཞུགས་པའོ། ། ཅེས་གསེར་ཐུར་གྱིས་དཀྱིལ་འཁོར་དང་ལྷ་དང་རྒྱན་རྣམས་ངོ་སྤྲད་དོ། །མངྒ་ལཾ། ཤུ་བྷཾ། ཞུས་སོ། །