ཇོ་མོ་བྱང་ཆུབ་རྗེ་

འབྲོ་བཟའ་ཁྲི་རྒྱལ་མོ་བཙུན་ནམ་ཇོ་མོ་བྱང་ཆུབ་རྗེ།

ཆོས་རྒྱལ་ཁྲི་སྲོང་ལྡེ་བཙན་གྱི་སྐུ་དུས་སུ་བོད་ཀྱི་ཆོས་དང་རིག་གཞུང་དར་ཁྱབ་ཆེ་ཤོས་ཀྱི་དུས་སྐབས་ཤིག་ཡིན་ཅིང་། ཆོས་རྒྱལ་ཁོང་གིས་དམིགས་བསལ་རྒྱ་གར་འཕགས་པའི་ཡུལ་ནས་མཁས་པ་གདན་དྲངས་གནང་སྟེ། ནང་ཆོས་སྲ་བརྟན་གནས་ཐབས་ཕྱིར། འབད་བརྩོན་གནང་ནས། བོད་མི་རིགས་དེ་བཞིན་རིག་གཞུང་གིས་ཕྱུག་པ་དང་། སྤོབས་པ་ལྡན་པའི་མི་རིགས་ཤིག་ཏུ་གྱུར་ཡོད། ཐོག་མར་ཆོས་རྒྱལ་ཁྲི་སྲོང་ལྡེ་བཙན་གྱི་སྐུ་དུས་སུ་སད་མི་བདུན་ཞེས་རབ་ཏུ་བྱུང་བའི་སྐྱེས་བུ་བདུན་བྱུང་བ་དང་། དེ་ནས་ཆོས་རྒྱལ་ཁོང་གི་བཙུན་མོ་འབྲོ་བཟའ་ཁྲི་རྒྱལ་མོ་བཙུན་ནི་བོད་ཀྱི་ལོ་རྒྱུས་ཐོག་བུད་མེད་རབ་ཏུ་བྱུང་བའི་ཐོག་མ་དེ་ཡིན།  

སྐབས་དེ་དུས་བོད་ཀྱི་འདུལ་བའི་མཁན་པོར་གྲགས་པའི་སྦ་རཏྣའི་མདུན་ནས་འབྲོ་བཟའ་ཁྲི་རྒྱལ་མོ་བཙུན་གྱིས་དགེ་ཚུལ་མའི་སྡོམ་པ་ཞུས་ཡོད་པ་ལས་དགེ་སློང་མའི་སྡོམ་པ་ཞུས་ཡོད་པའི་སྐོར་ཁ་གསལ་མེད།

ལོ་རྒྱུས་ཐོག་འཁོད་པར་གཞིགས་ན་ཆོས་རྒྱལ་ཁྲི་སྲོང་ལྡེ་བཙན་གྱི་བཙུན་མོ་འབྲོ་བཟའ་ཁྲི་རྒྱལ་མོ་བཙུན་རབ་ཏུ་བྱུང་བའི་རྗེས། མཚན་ལ་ཇོ་མོ་བྱང་ཆུབ་རྗེར་（སྒྲོན）གསོལ་བ་དང་། དད་ལྡན་ཕོ་མོ་མང་པོས་དགའ་སྟོན་བྱས་པ་འཁོད་འདུག་ལ་བོད་དུ་བུད་མེད་རབ་ཏུ་བྱུང་བ་ཐོག་མ་ཡིན་པར་ཡོངས་སུ་གྲགས་ཡོད། འོན་ཀྱང་དེའི་སྔོན་ལ་དགེ་བསྙེན་མའི་སྡོམ་པ་ཞུ་མཁན་བུད་མེད་བྱུང་ཡོད་པ་གསལ་འདུག

ཇོ་མོ་བྱང་ཆུབ་སྒྲོན་གྱིས་བསམ་ཡས་དྲིལ་བུ་དང་། ཁྲ་འབྲུག་དྲིལ་ཆེན་བཞེངས་ཡོད་པ་མ་ཟད། བསམ་ཡས་ལྕགས་རིའི་ཕྱི་རོལ་གྱི་ནུབ་ངོས་སུ་དགེ་རྒྱས་བྱེ་མ་གླིང་གི་ལྷ་ཁང་བཞེངས་པ་དང་། བསམ་ཡས་སུ་ནང་པའི་བསྟན་པ་བོད་ཡིག་ཐོག་ཕབ་བསྒྱུར་གནང་བའི་སྐབས། རབ་ཏུ་བྱུང་བ་སུམ་བརྒྱ་ལ་ཟས་སྣ་འདྲེན་པའི་ལག་དཔོན་ཇོ་མོ་བྱང་ཆུབ་རྗེས་མཛད་པ་ལོ་རྒྱུས་ལྡེབས་རིས་ཐོག་བཀོད་འདུག