ཆོས་གྲགས་

ཡོང་ཁུངས་Wikipedia
Jump to navigation Jump to search

དཔལ་ལྡན་ཆོས་གྲགས་ཞབས་ནི་རྒྱ་གར་ལྷོ་ཕྱོགས་ཏྲི་མ་ལ་ཡ་རུ། །བྲམ་ཟེ་ཀུན་ཏུ་རྒྱུ་ཡི་སྲས་སུ་དུས་རབས་དྲུག་གམ་བདུན་པར་འཁྲུངས། །ཆུང་དུས་མུ་སྟེགས་གཞུང་བཅས་ཐུན་མོང་རིག་གནས་ཀུན་ལ་མཁས་པར་གྱུར། །ལྟ་ངན་དོར་ཞིང་ཡུལ་དབུར་བྱོན་ཏེ་ཆོས་སྐྱོང་དྲུང་དུ་རབ་ཏུ་བྱུང་། །དབང་ཕྱུག་སྡེ་སོགས་བཤེས་གཉེན་བསྟེན་ནས་མདོ་སྔགས་མ་ལུས་ཐུགས་སུ་ཆུད། །སྡེ་བདུན་དང་བཅས་རྡོར་སེམས་གྲུབ་ཐབས་མར་གྱུར་འགྲོ་བའི་དོན་དུ་བརྩམས། །ཤང་ཀ་ར་དང་གཞོན་ནུ་རོལ་པ་ལ་སོགས་རྩོད་པས་ཕམ་པར་མཛད། །ལྷ་ཤཱཀ་ལ་སོགས་སློབ་བ་སྐྱོང་སྟེ་མི་རྟག་བསྟན་ཕྱིར་འདི་ལས་འདས།།

   ~་ཞེས་པ་དེ་ཡང་རྒྱ་གར་རྫོང་གསར་བཤད་གྲྭར་རྣམ་འགྲེལ་འཛིན་གྲྭའི་སློབ་མ་ཤཱཀྱའི་དགེ་སློང་རཏྣ་མངྒལཾ་གྱིས་སྤྱི་ལོ་༢༠༡༩། ཟླ། ༠༧ ཚེས། ༡༥ ཉིན་དུ་བྲིས་པའོ།

ཆོས་གྲགས།[རྩོམ་སྒྲིག]

(སློབ་དཔོན་ཆོས་ཀྱི་གྲགས་པ)སློབ་དཔོན་ཕྱོགས་ཀྱི་གླང་པོའི་སློབ་མ་སློབ་དཔོན་དབང་ཕྱུག་སྡེའི་དངོས་སློབ་ཡིན། སློབ་དཔོན་འདི་དང་བོད་ཀྱི་རྒྱལ་པོ་སྲོང་བཙན་སྒམ་པོ་གཉིས་དུས་ཐོག་གཅིག་ཡིན་པར་ཇོ་ནང་ཏཱ་ར་ནཱ་ཐས་བརྩམས་པའི《རྒྱ་གར་ཆོས་འབྱུང》ལས་བཤད། རྒྱ་གར་ལྷོ་ཕྱོགས་ཏྲི་མ་ལ་ཡ་ཟེར་བའི་ཡུལ་དུ་འཁྲུངས། ཡབ་བྲམ་ཟེའི་རིགས་ཀྱི་མུ་སྟེགས་རོ་྅ནནྡྲ་ཞེས་ཟེར། ཆུང་དུས་རིག་གནས་ལྔ་དང་མུ་སྟེགས་ཀྱི་གྲུབ་མཐའ་ལ་ཤིན་ཏུ་མཁས་པར་སྦྱངས་ནས་ལོ་བཅོ་བརྒྱད་སོན་ཚེ་མུ་སྟེགས་ཀྱི་ལྟ་བ་ལ་ཤིན་ཏུ་མཁས་པར་གྱུར། རྗེས་སུ་སངས་རྒྱས་ཆོས་ལུགས་ཀྱི་གཞུང་ལ་གཟིགས་ནས་མུ་སྟེགས་ཀྱི་གྲུབ་མཐའ་དོར་བས་ཕ་མ་ཞང་པོ་དང་བཅས་པས་ཁྱིམ་ནས་བསྐྲད། རྒྱ་གར་ཡུལ་དབུས་སུ་བྱོན་ནས་དེའི་སློབ་དཔོན་ཆོས་སྐྱོང་གི་དྲུང་དུ་རབ་ཏུ་བྱུང་ནས་སངས་རྒྱས་ཆོས་ལུགས་ཀྱི་གསུང་རབ་མཐའ་དག་ལ་མཁས་པར་སྦྱངས། སློབ་དཔོན་དབང་ཕྱུག་སྡེའི་དྲུང་དུ《ཚད་མ་ཀུན་བཏུས》ཚར་གསུམ་གསན། ན་ལེནྡྲར་རྩོད་གླེང་དུ་འོངས་པའི་མུ་སྟེགས་པའི་མཁས་པ་གྲགས་ཅན་མང་པོ་སྔ་རྗེས་སུ་ཕམ་པར་མཛད། རྒྱ་གར་ཤར་ཕྱོགས་དང་ལྷོ་ཕྱོགས་ཀྱི་རྒྱུད་དུ་ཕེབས་ནས་མུ་སྟེགས་པ་མང་པོ་བཏུལ་ཞིང་སངས་རྒྱས་ཆོས་ལུགས་དར་བར་མཛད་དེ་ལྷ་ཁང་དང་ཆོས་གཞི་བརྒྱ་ལྷག་ཙམ་གསར་དུ་བཙུགས། སློབ་མ་ཁྲི་ཕྲག་མང་པོ་ཡོད་ཀྱང་མཉམ་དུ་གནས་པ་ནི་ལྔ་ལས་མེད། སྐུ་ཚེའི་མཐར་རྒྱ་གར་ལྷོ་ཕྱོགས་ཀྱི་རྒྱུད་དུ་བཞུགས་ནས། ཡུལ་ཀ་ལིངྐར་མྱ་ངན་ལས་འདས། སློབ་དཔོན་འདིས་བརྩམས་པའི་བསྟན་བཅོས་མང་པོ་ཡོད་ཀྱང་ཡོངས་སུ་གྲགས་ཤིང་བོད་དུ་བསྒྱུར་བའི་གྲས《ཚད་མ་རྣམ་ཐིགས་པ》དང་། 《ཚད་མ་རྣམ་ངེས》《རིགས་པའི་ཐིགས་པ》བཅས་གསུམ་དུས་རབས་བཅུ་གཅིག་པའི་མཇུག་ཏུ་རྔོག་ལོ་ཙཱ་བ་བློ་ལྡན་ཤེས་རབ་ཀྱིས་བསྒྱུར་ཞིང་། 《གཏན་ཚིགས་ཐིགས་པ》དང་། 《 འགྲེལ་པ་བརྟག་པ》《རྒྱུད་གཞན་སྒྲུབ་པ》《རྩོད་པའི་རིགས་པ》བཅས་དུས་རབས་བརྒྱད་པའི་དཀྱིལ་དུ་ལོ་ཙཱ་བ་བནྡེ་ནམ་མཁའ་སོགས་ཀྱིས་བསྒྱུར་བ་བསྟན་འགྱུར་མདོ་ཕྱོགས་པོད་[ཅེ]པར་ཡོད། སློབ་དཔོན་འདིའི་ལོ་རྒྱུས་རྒྱས་པ་བུ་སྟོན་རིན་པོ་ཆེས་མཛད་པའི་《བུ་སྟོན་ཆོས་འབྱུང》དང་ཇོ་ནང་ཏཱ་ར་ནཱ་ཐས་བརྩམས་པའི་《རྒྱ་གར་ཆོས་འབྱུང》གཉིས་སུ་གསལ་བས་དེར་གཟིགས།