ཆུ་བཟང་རི་ཁྲོད

མཚན་རྒྱས་པར་ཆུ་བཟང་རི་ཁྲོད་ཡིད་དགའ་ཆོས་འཛིན་ཞེས་ཞུ། སེ་ར་དགོན་ནས་གཡས་ངོས་སུ་སྤྱི་ལེ་བཞི་ལྔ་ཙམ་འཁོར་ལམ་བརྒྱུད་སོང་ན་སྤྱི་གསོ་སྐོར་ཞེས་པའི་གྲོང་གི་རི་ལྡེབས་སུ་རི་ཁྲོད་དེ་མཇལ་རྒྱུ་ཡོད། རི་ཁྲོད་དེ་ནི་སྤྱི་ལོ་༡༦༩༦ལོར་སྡེ་སྲིད་སངས་རྒྱས་རྒྱ་མཚོས་ཕྱག་བཏབ་གནང་མཛད། རྒྱལ་བ་ལྔ་པའང་གནས་དེར་ཞབས་བཅག་མྱོང་ཡོད། དེའང་རི་ཁྲོད་དེའི་རྟག་ཏུ་བྱ་རྒོད་ཆུ་མིག་ཅེས་པ་ཆུ་བཟང་བ་ཞིག་ཡོད་པ་དེ་ནས་བྱ་རྒོད་ཀྱིས་ཆུ་བཏུངས་པ་རྒྱལ་བ་ལྔ་པས་གཟིགས་པས་ཆུ་མིག་དེར་བྱ་རྒོད་ཆུ་མིག་དང་རི་ཁྲོད་དེར་ཆུ་བཟང་རི་ཁྲོད་ཅེས་འདོགས་གནང་མཛད། ཐོག་མར་གནས་དེ་སྡེ་སྲིད་སངས་རྒྱས་རྒྱ་མཚོས་ཡུམ་གྱི་ཚོགས་བསགས་གྲིབ་སྦྱངས་གནང་སར་བསྐྱོན་པ་ཡིན་ཞེས་གསུངས། སྡེ་སྲིད་སངས་རྒྱས་རྒྱ་མཚོ་ནི་ཉང་བྲན་གྲོང་སྨད་ཅེས་པར་སྐུ་འཁྲུངས (ཞེས་འཁྲུངས་ཁང་དེ་ནི་རི་ཁྲོད་དེ་དང་ཉེ་བའི་གཡས་ངོས་སུ་ཡོད)དེ་ནས་ཆུ་བཟང་བླ་མ་རིན་པོ་ཆེའམ་སྟག་ཕུའི་ཡོངས་འཛིན་ཡེ་ཤེས་རྒྱ་མཚོ་ཕེབས་ནས་དགོན་དེ་རྒྱ་བསྐྱེད་བྱུང་། སེ་ར་བྱེས་སྨད་གྲྭ་ཚང་སོ་སོ་ནས་དགེ་སློང་བརྒྱད་རེ་གཏན་བཞུགས་གནང་དགོས་པ་ཡིན། དེ་རྗེས་རིམ་བཞིན་རྒྱ་བསྐྱེད་བྱུང་སྟེ་ཕ་བོང་ཁ་རིན་པོ་ཆེ་དང་། ཁྲི་བྱང་རིན་པོ་ཆེ། བྲག་རི་རིན་པོ་ཆེ་སོགས་ཀྱི་བླ་བྲང་ཡོད་ལ་གནས་དེར་བླ་མ་དེ་དག་གིས་གསུང་ཆོས་རིམ་པར་གནང་བས་སྔོན་འདུ་ཁང་ཀ་བ་ཉི་ཤུའི་སར་ཆོས་རྒྱལ་སྲོང་བཙན་གྱིས་གཏེར་ལས་བཞེས་པའི་རྡོ་སྐུ་རིན་པོ་ཆེ་ཞེས་རྡོའི་ཐུབ་དབང་གི་སྐུ་བརྙན་སོགས་རྟེན་དང་བརྟེན་པར་བཅས་དང་། རྣལ་འབྱོར་ལྷ་ཁང་ནང་རྣལ་འབྱོར་མའི་སྐུ་བརྙན་ཐོག་སོ་གཅིག་ལྷག གུ་རུ་ལྷ་ཁང་ནང་གུ་རུ་མཚན་བརྒྱད་སོགས་བཞུགས་སུ་གསོལ་བ་མཇལ་རྒྱུ་ཡོད། ད་ལྟ་གསར་བཞེངས་འདུ་ཁང་ནང་སྔོན་གྱི་རྡོ་སྐུ་རིན་པོ་ཆེས་དབུས་སྔོན་གྱི་སྐུ་བརྙན་དེ་དག་གི་སྐུ་ཚབ་གསར་བཞེངས་གནང་བ་མཇལ་རྒྱུ་ཡོད།