ཆ

ཆ་ཡི་འགྲེལ་པ།

བོད་ཡིག་གསལ་བྱེད་དྲུག་པ།

འདིའི་ང་རོ་འདོན་ཚུལ་ལ་སྐྱེ་གནས་རྐན་དང༌། བྱེད་པ་ལྕེ་དབུས། ནང་གི་རྩོལ་བ་མགྲིན་པ་ཕྱེ་བ་དང༌། ཕྱིའི་རྩོལ་བ་སྲོག་ཆེན་སྒྲ་མེད།

མིང་གཞིའི་མ་ནིང་ཡི་གེ་ཞིག

བརྗོད་བདེའི་དབང་གིས་དྲངས་པའི་མིང་གི་ཆ་ཤས་ཤིག (དཔེར་ན།)སྐད་ཆ། རྒྱན་ཆ། དཔེ་ཆ། མཚོན་ཆ། ཡིག་ཆ། རས་ཆ། ལག་ཆ་ལྟ་བུ།

ཟུང༌ངམ་གཉིས་ཀྱི་དོན་ཏེ།

(དཔེར་ན།) ཆ་སྒྲིག་པ། ཆ་འགྲིག་པ། ཆ་མིན་ཡ་མིན། ལྷམ་ཆ་གཉིས། གདུང་མ་རིང་ཐུང་ཕྲ་སྦོམ་ཆ་མ་ཡིན་པ་ལྟ་བུ།

རྒྱུས་མངའི་དོན་ཏེ།

(དཔེར་ན།) ཆ་མ་མཆིས། གར་སོང་ཆ་མེད། སང་ཕོད་ཐན་པ་གཏོང་མིན་ད་ལྟ་ཆ་མ་འཚལ་ལྟ་བུ།

དུམ་བུའམ་ཚན་ཁག་གི་དོན་ཏེ།

(དཔེར་ན།) བརྒྱ་ཆ། སྟོང་ཆ། སྟོད་ཆ། སྨད་ཆ། ཐོབ་ཆ། ཆག་ཆ། འཕར་ཆ། ཟླ་བའི་དཀར་ཆ། བྱི་ལ་ནི་གཅན་གཟན་གྱི་ཆར་གཏོགས་པ་རེད་ཅེས་པ་ལྟ་བུ།

ངག་འཕྲིན་དང་ཡིག་བསྐུར་གྱི་དོན་ཏེ།

(དཔེར་ན།) ཆ་སྐུར་བ། ཕན་ཚུན་གྱི་བར་དུ་ངག་ཐོག་ནས་ཆ་འབུལ་བ་ལྟ་བུ།

ཞེང་ཚད་དམ་ཚད་ཀྱི་དོན་ཏེ།

(དཔེར་ན།) ལྷའི་ཆ་ཚད་ལྟ་བུ།