གོམས་གཤིས་ལགས། བདག་གི་སྙིང་གཏམ་འདི་ལ་གསོན།

ཡོང་ཁུངས་Wikipedia
Jump to navigation Jump to search

གོམས་གཤིས་ལགས། བདག་གི་སྙིང་གཏམ་འདི་ལ་གསོན།[རྩོམ་སྒྲིག]

རྩོམ་པ་པོ། དཔལ་དོན་གྲུབ་རྒྱལ། རང་གྲོལ།

ས་སྲོད་ཀྱི་ཡོལ་བ་ནུབ་ཕྱོགས་ནས་འཐེན་པའི་སྐབས་སུ།

ང་རང་གི་སེམས་ལ་འཆར་སྣང་མང་པོ་ཞིག་འཁོར་བྱུང་།

ངོ་མ།

འཇིག་རྟེན་གྱི་དངོས་པོ་ཐམས་ཅད་ལ།

རང་རང་གི་གོམས་སྲོལ་དང་ལོབས་ཕྱོགས་ནི་ཡོད་ངེས་རེད།

ཆུ་བོ་ཡིན་ན་ཐུར་དུ་འབབ་པ་དང་།

མེ་ལྕེ་ཡིན་ན་གྱེན་ན་འབར་ཞིང་།

མེ་ཏོག་མཁའ་ནས་མི་གད་ལ།

མི་རིགས།

ཁྱོད་ནི་ཅི་འདྲའི་གསང་བ་ལྐོག་གྱུར་གྱི་ཐ་སྙད་ཅིག་རེད་ཨང་།

གོམས་གཤིས།

ཁྱོད་ནི་ཅི་འདྲའི་ཁ་ལ་བདེ་ཞིང་རྣ་ལ་སྙན་པའི་མགུར་མ་ཞིག་རེད་ཨང་།

འཇིག་རྟེན་གྱི་མི་རིགས་ལ།

རང་གི་ལོ་རྒྱུས་དང་།

རང་གི་སྐད་ཡིག

རང་གི་ཁྱད་ཆོས།

རང་གི་བསམ་བློ།

རང་གི་ཡུལ་སྲོལ།

རང་གི་གོམས་གཤིས་དང་།

རང་གི་མངའ་རིས་ཤིག་ལོས་ཀྱང་ཡོད།

ཡིན་ནའང་།

གོམས་གཤིས་ཀྱི་མཛེས་མ་ལགས།

གཅིག་བྱས་ན་བདག་གི་ཚིག་འདི་དག

སངས་རྒྱས་ལ་ཀ་ཁ་དང་།

ཉི་མ་ལ་སྒྲོན་མེ་ཡི་དཔེ་ལྟར་འགྱུར་ཀྱང་སྲིད་མོད།

འོན་ཀྱང་།

བོད་ཁ་བ་ཅན་གྱི་གཞོན་ནུ་ཞིག་གི

སེམས་ཀྱི་གཏིང་།

མཆིན་པའི་ཞབས།

མདོར་ན།

སྙན་པའི་བསྔགས་བརྗོད།

དད་པའི་སྙིམ་པ།

དགྱེས་པའི་མཆོད་སྤྲིན་འབུལ་བའི་ཞོར་ལ།

གོམས་གཤིས་ཀྱི་མཛེས་མ་ཁྱེད་ལ།

སྐྱོན་གྱི་རྨང་།

ཉེས་བའི་གཞི།

ངན་གྱི་མཚང་།

དེ་དང་དེ་ལ་སོགས་པའི་གནད་དོན་འགའ་ཞིག་འདྲི་བར་འདོད་དེ།

གལ་སྲིད་གོམས་གཤིས་ཀྱི་མཛེས་མ་ཁྱེད་ལ་མཚང་ལ་ཕོག་པ་དང་།

ཡང་ན་གོམས་གཤིས་ཀྱི་མཛེས་མ་ཁྱེད་ལ་མི་འདོད་པའི་ཕོག་ཐུག་བཏང་བ་ཡིན་ན།

མཛེས་མ་ཁྱེད་ཀྱི་སྙིང་རྗེའི་བྱིན་རླབས་དང་།

མཛེས་མ་ཁྱེད་ཀྱི་ཐུགས་རྗེའི་ལྕགས་ཀྱུ་ཡིས།

ཁོ་བོའང་མར་གྱུར་སེམས་ཅན་ཐམས་ཅད་དང་འདྲ་བར།

མཐོ་དམན་ཉེ་རིང་མེད་པར་རྗེས་སུ་འཛིན་པར་གནང་།

གོམས་གཤིས་ཀྱི་མཛེས་མ་ལགས།

ཁྱོད་ནི་ལོ་ངོ་དུང་ཕྱུར་མང་པོའི་རིང་གི་མཛེས་མ་ཡིན་ལ།

དོན་སྔ་དང་སྣོད་དྲུག་གི་ཨ་སྔོན་གྱི་དབྱིངས་སུ།

ལེགས་པར་ཀུན་སློང་གི་ཆུ་འཛིན་ལང་ལོང་དུ་འཁྲིགས་པ་དང་།

དགེ་བའི་ལྷག་སེམས་ཀྱི་གློག་ཞགས་འཕྲུལ་འཕྲུལ་དུ་འཁྱུག་ཅིང་།

རྣམ་དཀར་འཕྲིན་ལས་ཀྱི་གྲུ་གར་ཟིམ་ཟིམ་དུ་འཇོ་བའི་ཁྲོད་ན།

བསམ་བློ་འཆིང་བྱེད་ཀྱི་ལྩགས་སྒྲོག་རང་ཤུགས་སུ་གྲོལ་བའི།

དབྱར་སྐྱེས་རྔ་གསེང་གི་སྙིང་གཏམ་འདི་ལ།

ཁྱོད་རང་འོ་བརྒྱལ་ཡིན་ཀྱང་།

ལན་ཅིག་གསན་པར་གནང་།

གོམས་གཤིས་ཀྱི་མཛེས་མ་ལགས།

ཁྱེད་རང་ཤ་ཟན་གདོང་དམར་གྱི་རྒྱུད་ལས་འཁྲུངས་པའི་ཕྱིར།

ཁྱེད་ཀྱི་ཤ་རྩ་སྨུག་ཅིང་གཞོན་ཤ་ཆགས་ལ་མཁུར་ཚོས་དམར།

ཁྱེད་རང་བསིལ་ལྡན་གངས་རིའི་ལྗོངས་ནས་ལང་ཚོ་དར་སྟབས།

ཁྱེད་ཀྱི་ངང་རྒྱུད་འཇམ་ཞིང་ལྷག་བསམ་དཀར་ལ།

བྱམས་དང་སྙིང་རྗེ་ལྡན།

ངོ་མ། ཁྱེད་ཀྱི་མཛངས་ཡོན་ནི་བརྗོད་ལས་འདས་པ་དང་།

ཁྱོད་ཕན་ཡོན་ཀྱང་བསམ་གྱིས་མི་ཁྱབ་པ་ཞིག་རེད།

ཡིན་ན་ཡང་།

ངས་ཁྱོད་ལ་བསྟོད་པའི་གླུ་དབྱངས་དང་།

ལུས་ཀྱི་གཞོན་ཤ་ནི་ལོ་རྒྱུས་ཀྱི་འཕེལ་འགྲོས་དང་།

མདོང་གི་དམར་བ་ཡང་ལོ་ཟླ་ཡི་འཆར་ནུབ་དང་བསྟུན་ནས་ཆགས་པ་ཡིན་མོད།

འོན་ཀྱང་།

ད་ལྟའི་དུས་འདིར་ཁྱོད་ནི་ཆོག་ཤེས་སེམས་ཀྱི་དུག་ཆང་གིས་མྱོས་ཏེ།

རང་གི་གདོང་ལ་མི་འོས་པའི་གཉེར་མ་གོན་པ་དང་།

རང་ཉིད་ནི་འཛམ་གླིང་མཛེས་མའི་གཙུག་རྒྱན་ཡིན་ཞེས།

རང་མགོ་རང་གིས་གཡོགས་པར་མ་ཟད།

རང་སེམས་རང་གསོས་ཏེ།

རང་ཉིད་ཀྱི་རང་ཚུགས་དོར་བ་དང་།

མི་རིགས་ཀྱི་ལ་རྒྱ་དོར་ཞིང་།

ངའོ་སྙམ་པའི་ང་རྒྱལ་ཁེངས་ནས།

བག་ཏུ་འཁུམ་པའི་བཟོ་ལྟ་དེ་མཛེས་སམ།

གོམས་གཤིས་ཀྱི་མཛེས་མ་ཁྱེད་ལ།

ཁོང་གི་སྙིང་དང་དཔྲལ་བའི་མིག་ལྟར་གཅེས་སྲུང་བྱེད་ཀྱིན་ཡོད་ལ།

གོམས་གཤིས་ཀྱི་མཛེས་མ་ཁྱེད་དང་བྲལ་ན་ནི་བདག་ནི་འཚོ་ཐབས་བྲལ་ཞེས་སྨྲ་ན་ཡང་།

དེ་དག་ལ་ཁོ་བོ་ནི་ཡིད་རྟེན་མི་འཕེར་ཏེ།

མཛེས་མ་ཁྱོད་ལ་གཅེས་སྲུང་དང་།

མཛེས་མ་ཁྱེད་ལ་བསྔགས་བརྗོད་བྱེད་པ་ནི།

སྐབས་མང་ཤོས་སུ་ཁོ་རང་གི་ཁེ་ཕན་དང་ཐོབ་ཤོར་ལ་རགས་ལས་པའི་ཕྱིར་རོ།

ཀ་ཡེ། གོམས་གཤིས་ཀྱི་མཛེས་མ་ལགས།

གལ་སྲིད་རྒྱ་གར་གྱི་ཏིག་ཏ་དང་།

བལ་བོ་ཡི་གུར་ཀུམ།

རྒྱ་ནག་གི་དུག་འཇོམས།

འབྲུག་ཡུལ་གྱི་གངས་སྦལ།

སྟག་གཟིག་གི་དར་ཟབ།

དེ་དང་དེ་ལ་སོགས་པའི་རམ་འདེགས་དང་་གཞོགས་འདེགས་མེད་ན་ཡིན་ན།

གོམས་གཤིས་ཀྱི་མཛེས་མ་ཁྱེད་ལའང་།

ལང་ཚོའི་དཔལ་ཡིན་རྒྱས་མི་ཐུབ་ལ།

གདོང་གི་དམར་བའང་ཡོང་སྲིད་ཀྱི་མ་རེད།

གོམས་གཤིས་ཀྱི་མཛེས་མ་ལགས།

ཁྱེད་ལའང་མི་མཛེས་པར་སྒྲོན་མོར་རྒྱུ་བའི་དུས་སྐབས་ཤིག་ཡོད་ལ།

ཁྱོད་ལའང་གོས་སུ་ཤིང་ལོ་གྱོན་པ་ནས་རི་དྭགས་ཀྱི་པགས་པ་གྱོན་པའི་ལོ་རྒྱུས་ནི་ངེས་པར་ ཡོད་ཚོད་དུ་གདའ།

གལ་སྲིད།

ཁྱོད་ཀྱིས་གོམས་སྲོལ་གྱི་འཆིང་སྒྲོག་དེ་གཏོར་ཐུབ་རྒྱུ་ན།

ཁྱེད་རང་རྗེས་ལུས་ཀྱི་སྤྱི་ཚོགས་དེའི་གནས་སྒོར་འགྲིམས་པའི་སྡུག་བསྔལ་ཀྱང་ཡོད་སྲིད་རྒྱུ་མ་ རེད།

གལ་སྲིད།

ཁྱོད་རང་རྡོ་ཆས་དང་རུས་པའི་ཡོ་བྱད་ལ་མོས་པ་མེད་པ་ཡིན་ན།

ཁྱོད་རང་ལ་ལོ་རྒྱུས་ཀྱི་ཐོབ་ཐང་དང་སྤྱི་ཚོགས་ཀྱི་རིན་ཐང་ཡང་ཡོད་ག་ལ་སྲིད།

དེའི་ཕྱིར།

གོམས་གཤིས་ཀྱི་མཛེས་མ་ལགས།

ཁྱོད་ཀྱི་ལང་ཚོ་ནི་ཅི་འདྲའི་དར་དཀའ་བ་ཞིག་དང་།

ཁྱོད་ཀྱི་ལུས་སྟོབས་ཀྱང་ཅི་འདྲའི་རྒྱས་དཀའ་བ་ཞིག་རེད་ཨང་།

ཁྱོད་ལ་གསལ་འདེབས་བྱེད་པའི་དགོས་པ་ནི་ངེས་པར་དུ་མ་མཆིས་མོད་ཀྱང་།

གསར་བྱུང་གི་སྟོབས་ཤུགས་མེད་པ་ཡིན་ན།

རྒྱ་མཚོ་ཡིན་ཀྱང་རུལ་བར་འགྱུར་ལ།

གསར་གཏོད་ཀྱི་སྙིང་སྟོབས་མེད་མ་ཡིན་ན།

གསར་པ་ཡིན་ཀྱང་སྙིང་པོ་ག་ལ་ཡོད།