གསང་ཆེན་རྒྱུད་སྨད་གྲྭ་ཚང་

གནས་ཚུལ་

གྲུབ་མཐའ། དགེ་ལུགས།
ཆགས་ཡུལ། ལྷ་ས་གྲོང་ཁྱེར།
འདེབས་ལོ། རབ་བྱུང་བདུན་པའི་ཆུ་གླང་སྤྱི་ལོ་༡༤༣༣
འདེབས་མཁན། རྗེ་ཙོང་ཁ་པའི་དངོས་སློབ་མཁས་གྲུབ་ཤེས་རབ་སེང་གེ
ལོ་རྒྱུས།

དེ་ཡང་ས་ཕག་ལོ་སྤྱི་ལོ་༡༤༡༩ སྟོན་དུས་སུ་རྗེ་ཙོང་ཁ་པས་སེ་ར་ཆོས་སྡིངས་ཁང་དུ་བྱམས་ཆེན་ཆོས་རྗེ་ལ་རྒྱུད་གྲྭ་འཛུགས་དགོས་པའི་ཞལ་ཏ་གནང་བ་ལྟར་སྐབས་དེར་རྒྱལ་བ་ཙོང་ཁ་པའི་རྗེས་འབྲང་གི་མཁས་པ་ཤིན་ཏུ་མང་བ་འདུས་པར་རྟེན་འབྲེལ་གྱི་གནད་ཆེ་བར་གཟིགས་ནས་གསང་བདེ་གཉིས་ཀྱི་རྩ་རྒྱུད་ཀྱི་དབུ་ནས་ཆོས་ཐུན་རེ་གནང་ཞིང་། མཁས་མང་འདུས་པ་རྒྱ་མཚོའི་དབུས་སུ་<<འགྲེལ་པ་བཞི་སྦྲགས་>>ཀྱི་གླེགས་བམ་ཕྱག་ཏུ་བསྣམས་ནས། ཁྱེད་ཅག་མཁས་པ་རྣམས་ཀྱི་ཁྲོད་ནས་དཔལ་གསང་བ་འདུས་པའི་རྒྱུད་ཀྱི་བཤད་སྲོལ་འཛིན་ནུས་པ་སུ་ཡོད་ཅེས་བཀའ་ལན་གསུམ་བསྩལ་བ་ན་མཁས་པ་གཞན་སུས་ཀྱང་ཞལ་བཞེས་མཛད་མ་ནུས་པའི་ཚེ། རྗེ་ཤེས་རབ་སེང་གེས་ཡར་བཞེངས་ནས་སྐུ་ཕྱག་ལན་གསུམ་འཚལ་ཏེ། དེ་ལྟ་བུ་བདག་གི་བགྱིའོ་ཞེས་ཞལ་བཞེས་མཛད་པ་ན་རྗེ་ཙོང་ཁ་པ་ཐུགས་ཤིན་ཏུ་དགྱེས་ནས་གསང་བ་འདུས་པའི་གསེར་སྐུ་ཁྱད་འཕགས་དང་<<འགྲེལ་པ་བཞི་སྦྲགས་>>ཀྱི་གླེགས་བམ་ནང་མཆོད་ཀ་པཱ་ལ་གང་བ་ཆོས་རྒྱལ་གྱི་ཞལ་འབག འཆམ་གོས་དབྱུག་ཏོ་ཞགས་པ་སོགས་གནང་ནས་གསང་ཆེན་སྔགས་ཀྱི་བསྟན་པའི་བདག་པོར་མངའ་གསོལ། ལྕགས་ཕག་ལོ་སྤྱི་ལོ་༡༤༣༡ ལོར། རྗེ་ཤེས་རབ་སེང་གེས་གཙང་ཕྱོགས་སེང་གེ་རྩེར་ཕེབས་ཏེ་འདུལ་ནག་པ་དཔལ་ལྡན་བཟང་པོ་ལ་རྒྱུད་ཀྱི་འཆད་ཉན་གྱིས་ཤིག་གསུངས་ནས་《འགྲེལ་པ་བཞི་སྦྲགས་》དང་ཤོག་ལྷུང་རྣམས་གནང་སྟེ། འདུལ་ནག་པས་སྲས་དགའ་ལྡན་ཕོ་བྲང་དུ་རྒྱུད་གྲྭ་བཙུགས་པ་ལ་གཙང་སྟོད་རྒྱུད་དུ་གྲགས་པ་དེ་བྱུང་། དེ་རྗེས་རབ་བྱུང་བདུན་པའི་ཆུ་གླང་སྤྱི་ལོ་༡༤༣༣ ལོར་མཁས་གྲུབ་རྗེས་དབུས་སུ་རྒྱུད་ཅིག་འཛུགས་དགོས་པའི་ཞལ་ཏ་གནང་བ་ལྟར། རྗེ་ཤེས་རབ་སེང་གེས་དབུས་གཙང་ཁག་ནས་མང་བསྡུས་ཏེ། ལོ་འདིར་ལྷ་སར་རྒྱུད་སྨད་པའི་འཆད་ཉན་བཙུགས། རྗེ་ཤེས་རབ་སེང་གེ་ཉིད་ཀྱིས་རྒྱུད་སྨད་གྲྭ་ཚང་འདི་ཉིད་ལོ་བཅུ་གསུམ་བསྐྱངས་ཏེ། དེ་ནས་རྒྱུད་ཀྱི་འཆད་ཉན་སློབ་དཔོན་སྦྱིན་པ་དཔལ་བ་ལ་གཏད་དོ། ། གསང་ཆེན་སྨད་རྒྱུད་གྲྭ་ཚང་གི་བླ་བརྒྱུད་རབ་བྱུང་བདུན་པ་ཆུ་གླང་སྤྱི་ལོ་༡༤༣༣ ལོར་རྗེ་ཤེས་རབ་སེང་གེ་ནས་རབ་བྱུང་བཅུ་དྲུག་ས་ཕག་སྤྱི་ལོ་༡༩༥༩ ལོར་སྨད་རྒྱུད་མཁན་པོ་དགེ་བཤེས་བསམ་གཏན་ཆོས་འཕེལ་བར་རིམ་པ་ལྟར་བྱོན་པ་རྣམས་ཀྱིས་རྒྱུད་ཀྱི་འཆད་ཉན་མཛད་དོ། ། སྨད་རྒྱུད་གྲྭ་ཚང་དུ་ཁང་ཚན་ལྔ་ཡོད་པ་སྟེ་ ༡ ཨ་མདོ་ཁང་ཚན། ༢ ཚ་བ་ཁང་ཅན། ༣ རྒྱལ་རོང་ཁང་ཚན། ༤ སེར་ཀོང་ཁང་ཚན། ༥ ཏྲེ་ཧོར་ཁང་ཚན་བཅས་དང་གྲྭ་ཚང་གི་ལས་སྣེ་ཇི་ཡོད་སྐོར་ལ་སྨད་རྒྱུད་དགེ་བཤེས་ཨང་ཡོད་ཀྱི་ཁོངས་ནས་རྒྱུད་པ་མཁན་པོ་དང་། བླ་མ་དབུ་མཛད། རྒྱུད་པ་ཕྱག་མཛོད་ལྔ་དང་། བྱང་འདྲེན་ཆེ་ཆུང་། ཞལ་ཏ་བ་བསྐྱེད་རིམ། སྐྱོར་དཔོན། ཆབ་རིལ། ལག་བདེ་དཔོན། དུང་རྒན་བཅས་ནི་རྒྱུད་པ་བསྐྱེད་རིམ་པ་ནས་གནང་སྲོལ་ཡོད་དོ། ། ་