ཁ

ཁ 1.བོད་ཡིག་གསལ་བྱེད་གཉིས་པ། འདིའི་ང་རོ་འདོན་ཚུལ་ལ་སྐྱེ་གནས་མགྲིན་པ་དང༌། བྱེད་པ་མགྲིན་པ། ནང་གི་རྩོལ་བ་མགྲིན་པ་ཕྱེ་བ་དང༌། ཕྱིའི་རྩོལ་བ་སྲོག་ཆེན་སྒྲ་མེད། 1.2མིང་གཞིའི་མ་ནིང་ཡི་གེ་ཞིག 2.མིང་སྔོན་གྱི་ཆ་ཤས་ཤིག་སྟེ།

     (དཔེར་ན།)  ཁ་དོག ཁ་འཐོར། ཁ་བསྒྱུར་ཞེས་པ་ལྟ་བུ།
3.རྟགས་མཚུངས་འདྲེན་སྐབས་རྗེས་འཇུག་མ་ནིང་གིས་དྲངས་པའི་མིང་མཐའ་ཞིག་སྟེ།
     (དཔེར་ན།)   དགུན་ཁ།  གཏེར་ཁ།   གསོལ་ཁ།

4. སྐྱེ་འགྲོའི་ཟས་ཟ་བ་དང་སྨྲ་བའི་སྒོ་སྟེ།

        (དཔེར་ན།) ཁ་ལྐུགས་པ།  བོང་བུའི་ཁ་ནས་གསེར་བསྐྱུག་མི་ཡོང༌ཞེས་པ་ལྟ་བུ།   མིང་གི་རྣམ་གྲངས་ལ་ངག་འདོན་དང༌། གཏམ་གྱི་འབྱུང་གནས། བདུད་རྩིའི་རྟེན། མུ་ཁ། སྨྲ་བའི་སྒོ། སྨྲ་བྱེད། ཞལ། ཟ་བྱེད། གསུང་བྱེད་བཅས་སོ། ། 

4.1.ཁ་དང་འདྲ་བའི་ཡོད་བྱད་ཀྱི་ཆ་ཤས་ཏེ།

        (དཔེར་ན།)  སྣོད་ཀྱི་ཁ།  ཕོར་བའི་ཁ།   བུམ་པའི་ཁ།  ཤེལ་དམ་གྱི་ཁ་གཅོད་པ་ལྟ་བུ།

5. མདུན་ཕྱོགས་དང་སྔོན་གྱི་དོན་ཏེ།

        (དཔེར་ན།)  ཁང་པ་ཕན་ཚུན་ཁ་སྤྲོད་པ།  ཁ་ཕྱོགས་ཞེས་པ་ལྟ་བུ།

6. ཉེ་འགྲམ་གྱི་དོན་ཏེ།

         (དཔེར་ན།)  མཚོ་ཁ།  གཙང་པོའི་ཁ།  

7. སྟེང་ངམ་སྒང་གི་ཕྱོགས་ཆའི་དོན་ཏེ།

         (དཔེར་ན།) ཁྲི་ཁ།   དཔེ་ཆ་ཅོག་ཙེའི་ཁ་ལ་བཏིང་བ།

8.དུས་སྐབས་ཀྱི་དོན་ཏེ།

         (དཔེར་ན།) ཕྱོགས་ལ་འགྲོ་ཁ། ལས་ཀ་བྱེད་ཁར་བསམ་བློ་གཟབ་གཟབ་གཏོང་དགོས།

9. སྐད་ཆའམ་ངག་གི་དོན་ཏེ།

        (དཔེར་ན།) རྫུན་ཤོད་མཁན་གྱི་ཁ་ལ་མཉན་རྒྱུ་མེད།  གྲོས་བསྡུར་བྱེད་མི་ཚང་མ་ཁ་མཐུན་པ།

10.སྒོ་ཕྱུགས་ཀྱི་ལོ་ཚད་དེ།

       (དཔེར་ན།)   གཡག་ཁ་རྒན།   རྟ་ཁ་ཆུང༌།

11.རས་ཀྱི་འཇལ་ཚད་ཞེང་དཀྱུས་འདྲ་བ་ཞིག་

       (དཔེར་ན།) རས་ཁ་གང༌།  གོས་ཆེན་ཁ་དོ་ཞེས་པ་ལྟ་བུ།