ཀྲུང་གོ་གསར་པའི་ལས་འགུལ་
༡ མེ་འགོག་ཁྲའོ་རོགས།
[རྩོམ་སྒྲིག]༡༩༥༠ ནས་༥༣ བར། ༡༩༥༠ ལོའི་ཟླ་༦ ཚེས་༢༥ ཉིན། བྱང་ཀོ་རི་ཡའི་རྒྱ་སྐད་དུ་ཨ་རི་ལ་མེ་གོ་དང་བྱང་ཀོ་རི་ཡར་ཁྲའོ་ཞན་ཟེར། དམག་དཔུང་བྱང་གི་འཕྲེད་ཐིག་ཨང་ཚད་༣༨ ས་ཐིག་བརྒལ་ཏེ། ལྷོ་ཀོ་རི་ཡའི་ས་ཁོངས་སུ་དཔུང་འཇུག་བྱས་པ་དང༌། ཉིན་གསུམ་རྗེས་ཧན་ཁྲིན་Seoulབཟུང༌། ཨ་རིའི་སྲིད་འཛིན་གྱིས་ཉི་ཧོང་དུ་བཅའ་སྡོད་ཨ་རིའི་གྲུ་གཟིངས་དམག་སྡེ་ཨང་ བདུན་པ་ལྷོ་ཀོ་རི་ཡར་རོགས་སྐྱོར་དུ་བསྐྱོད་དགོས་པའི་བཀའ་བཏང༌། ཟླ་ ༡༠ ཚེས་༡༩ ཉིན། རྒྱ་ནག་གཞུང་གིས་ཕིན་ཏེ་ཧའེ་ཡིས་མགོ་འཁྲིད་པའི་" རྒྱ་ནག་མི་དམངས་དང་བླངས་དམག་" སྒྲིག་འཛུགས་བྱས་ཏེ། གསང་བའི་སྒོ་ནས་ཡ་ལུའུ་Yalu Riverགཙང་པོ་བརྒལ། ཉིན་དེར། ཨ་རིའི་དམག་གིས་ཕིན་རང་Pyongyangབཟུང་བ་དང༌། ལྷོ་ཀོ་རི་ཡའི་དམག་ཡ་ལུའུ་ཅང་གཙང་པོའི་ཉེ་འགྲམ་དུ་བཏེག ཨ་རིའི་གནམ་དམག་གིས་རྒྱ་ནག་གི་ཏན་ཏུང་གྲོང་ཁྱེར་གཏོར་བཅོམ་བྱས། ཚེས་༢༥ ཉིན། རྒྱ་དམག་གིས་ཝུན་ཅིན་བཟུང་བས། " མེ་འགོག་ཁྲའོ་རོགས་" ཀྱི་གཡུལ་འགྱེད་མགོ་ཚུགས། ཟླ་༡༢ ཚེས་༥ ཉིན། ཕིན་རང་བསྐྱར་དུ་རྒྱ་དམག་དང་བྱང་ཀོ་རི་ཡའི་དམག་གིས་བཟུང༌།
༡༩༥༡ ལོའི་ཟླ་༥ པར། ཨ་རིས་གཙོས་པའི་རྒྱལ་ཁབ་བཅོ་ལྔའི་མཉམ་འབྲེལ་དམག་དཔུང་ཨང་ཚད་༣༨ ས་ཐིག་བརྒལ་ཏེ་གཡུལ་བཤམས་པས། རྒྱ་དམག་ལ་བསད་རྨས་ཚབས་ཆེན་བཟོས། ༡༩༥༣ ལོའི་ཟླ་༣ པར། ཨ་རྒྱ་ཕྱོགས་གཉིས་ཀྱིས་བྱཀོ་རི་ཡའི་དམག་འཐབ་མཚམས་འཇོག་སྐོར་གྱི་གྲོས་མཐུན་ བྱལ་མིང་རྟགས་བཀོད། གཡུལ་འཐབ་འདི་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་ཕྱི་རྒྱལ་ལ་དྲག་པོའི་ གདོང་གཏུགས་ཐོག་མ་དེ་ཡིན་ཞིང༌། དེའི་ནང་མའོ་ཙེ་ཏུང་གི་བུ་མའོ་ཨན་དབྱིན་ཐེ་བའི་རྒྱ་དམག་བརྒྱད་འབུམ་སུམ་ཁྲི་ ཙམ་ཤི་གོད་བྱུང་ཡོད་ཀྱང༌། སྟོབས་ཆེན་ཨ་རིས་སྣེ་འཁྲིད་པའི་མཉམ་འབྲེལ་དམག་ས་ཡ་གཅིག་ལྷག་ཚར་བཅད་པས། བཙུགས་མ་ཐག་པའི་དམར་ཤོག་གི་སྲིད་གཞུང་འདི་རྒྱལ་སྤྱིའི་སྟེང་དཔའ་དང་དཔུང་གི་ གྲགས་པ་འཕེལ་ཡོད་པ་མ་ཟད།
དམར་ཤོག་གི་ཇོ་ཇོ་རྒན་པར་འབོད་པའི་ར་ཤི་ཡས་སུའུ་ལེན་རྒྱ་ནག་འདི་བཙན་རྒྱལ་ རིང་ལུགས་དཔུང་ཁག་གི་བཙན་འཛུལ་ལ་མཐའ་གཅིག་ཏུ་ངོ་རྒོལ་བྱེད་མཁན་ཞིག་ཡིན་སྙམ་ པའི་བློ་མགུ་སྟེ། རྗེས་ཀྱི་མནའ་འབྲེལ་ལ་རྨང་གཞི་བཙུགས་པ་དང༌། ༡༩༥༢ ལོ་ནས་བཟུང༌། སུའུ་ལེན་གྱིས་རྒྱ་ནག་ལ་གཏེར་ཁ་སྔོག་འདོན་དང་བཞུ་སྦྱངས༌། ཆུ་གློག འཕྲུལ་ཆས་བཟོ་སྐྲུན། ལྕགས་ལམ། རྒྱལ་སྲུང་དྲག་ཆས་བཟོ་སྐྲུན་སོགས་བཟོ་ལས་དང་ཚན་རིག་ལག་རྩལ་གྱི་གཙོ་གནད་ འཛུགས་སྐྲུན་རྣམ་གྲངས་༡༥༦ ཙམ་ལ་གཞི་རྒྱ་ཆེན་པོའི་སྒོ་ནས་རོགས་སྐྱོར་བྱས་ཡོད། ༡༩༦༠ ལོར་སུའུ་ལེན་གྱིས་རོགས་སྐྱོར་མི་སྣ་ཡོང་རྫོགས་ཕྱིར་འཐེན་བྱས། དེ་བཞིན་དུ་ཨ་རིའི་དམག་ཤུགས་ཐའེ་ཝན་མཚོ་འགག་ཏུ་སླེབས་ཏེ། ཅང་ཅེ་ཧྲི་ཡིས་བཟུང་བའི་ཐའེ་ཝན་དེ་ཨ་རིའི་སྲུང་སྐྱོབ་འོག་ཏུ་བཅུག་པ་དང༌། ༡༩༥༤ ལོའི་ཟླ་༡༢ པར། ཨ་རི་དང་ཐའེ་ཝན་དབར་ཐུན་མོང་འགོག་སྲུང་གི་ཆིངས་ཡིག་བཞག་ཡོད།
༢ བོད་ཞི་བའི་བཅིངས་འགྲོལ།
[རྩོམ་སྒྲིག]༡༩༥༠ ལོའི་ཟླ་༡༠ ཚེས་༡༧ ཉིན། རྒྱ་གཞུང་གིས་འབྲི་ཆུའི་ཤར་རྒྱུད་མདོ་ཁམས་གཉིས་ཀྱི་ས་སྡེ་ཕལ་མོ་ཆེ་" བཅིངས་འགྲོལ་" བཏང་ཟིན་པའི་རྨང་གཞིའི་སྟེང༌།➂ ཆབ་མདོ་གཡུལ་འཁྲུག་མགོ་ཚུགས། ཚེས་༡༩ ཉིན་བོད་ཀྱི་གཙོ་ཤུགས་དམག་དཔུང་ཕམ་ཉེས་སུ་བཏང་སྟེ། མདོ་སྤྱི་ང་ཕོད་སོགས་ངོ་ལས་རྣམས་འཛིན་བཟུང་བྱས་པ་དང༌། བཅིངས་འགྲོལ་དམག་ཆབ་མདོར་འབྱོར། ཟླ་༡༡ ཚེས་༡༧ ཉིན། ྋགོང་ས་ྋསྐྱབས་མགོན་ཆེན་པོ་མཆོག་གིས་བོད་ལྗོངས་ལུགས་གཉིས་ཆབ་སྲིད་ཀྱི་ཐུགས་ འགན་བཞེས། ཟླ་༡༢ ཚེས་༢༧ ཆབ་མདོ་ས་ཁུལ་མི་དམངས་བཅིངས་འགྲོལ་ཨུ་ཡོན་ལྷན་ཁང་དངོས་སུ་བཙུགས། ༡༩༥༡ ལོའི་ཟླ་༥ ཚེས་༢༣ ཉིན། ང་ཕོད་དབུ་བཞུགས་ཀྱི་བོད་གཞུང་གི་སྐུ་ཚབ་རྣམ་པས་རྒྱ་དཔོན་ཚོའི་འཇིགས་སྐུལ་ མ་བཟོད་པར། གཞུང་གིས་མངགས་དན་བྱས་པའི་རང་ཉིད་ཀྱི་དབང་ཚད་ལས་བརྒལ་བའི་སྒོ་ནས་" ཀྲུང་དབྱང་མི་དམངས་སྲིད་གཞུང་དང་བོད་ས་གནས་སྲིད་གཞུང་གི་བོད་ཞི་བའི་བཅིངས་ འགྲོལ་འབྱུང་ཐབས་སྐོར་གྱི་གྲོས་མཐུན་" ཟེར་བར་པེ་ཅིན་དུ་མིང་རྟགས་བཀོད། ༡༩༥༡ ལོའི་ཟླ་༡༠ ཚེས་༢༦ ཉིན་རྒྱ་དམག་ལྷ་སར་འབྱོར། བོད་ཀྱི་ས་སྡེ་ཕལ་མོ་ཆེ་རྒྱ་ནག་གི་མངའ་ཁོངས་སུ་དྲགས་ཤུགས་ཀྱིས་བཅུག
༣ གསར་བརྗེ་ངོ་ལོག་པ་དྲག་གནོན་གྱི་ལས་འགུལ། ༡༩༥༠ ནས་༥༡ བར།
[རྩོམ་སྒྲིག]
༡༩༥༠ ལོའི་ཟླ་༧ པར། ས་ཞིང་བཅོས་བསྒྱུར་དང་མེ་འགོག་ཁྲའོ་རོགས་ཀྱི་དམག་འཐབ་བདེ་བླག་ངང་འགྲུབ་ ཕྱིར། རྒྱལ་སྲིད་སྤྱི་ཁྱབ་ཁང་དང་ཆེས་མཐོའི་མི་དམངས་ཁྲིམས་ཁང་གིས་" གསར་བརྗེ་ངོ་ལོག་པའི་བྱ་སྤྱོད་དྲག་གནོན་ཐད་ཀྱི་མཛུབ་སྟོན་" བརྒྱུད་བསྒྲགས་བྱས་པ་དང༌། ལོ་དེའི་ཟླ་༡༠ བར། རྒྱ་ནག་དབུས་དམག་ཤོག་ཚོགས་པས་རིམ་པ་སོ་སོའི་འཐུས་མི་ལྷན་ཚོགས་ཀྱིས་" དྲག་གནོན་དང་གུ་བཤངས་ཟུང་འབྲེལ་" བྱེད་དགོས་པའི་སྲིད་ཇུས་ལག་བསྟར་བྱས་ཏེ། ཟླ་དེའི་ནང་ལས་འགུལ་མཇུག་བསྒྲིལ། ལས་འགུལ་འདིས་གོ་མིན་ཏང་གི་སྟོབས་ཤུགས་ལྷག་མ་དང༌། སྤྱི་ཚོགས་བདེ་འཇགས་ལ་གནོད་པའི་སྟོབས་ཤུགས་ཕལ་ཆེ་བ་རྩ་མེད་བཟོས་ཏེ་སྔར་མ་ གྲགས་པའི་བརྟན་ལྷིང་བྱུང་སྐད།
༤ ས་ཞིང་བཅོས་བསྒྱུར་གྱི་ལས་འགུལ། ༡༩༥༠ ནས་༥༢ བར།
[རྩོམ་སྒྲིག]༡༩༥༠ ལོའི་ཟླ་༦ པར། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ས་ཞིང་བཅོས་བསྒྱུར་གྱི་བཅའ་ཁྲིམས་ ཁྱབ་བསྒྲགས་བྱས་ཏེ། ས་ཞིང་ཡོངས་རྫོགས་སྤྱི་ཚོགས་ཐུན་མོང་ལ་དབང་བ་གཏན་ལ་ཕབ་པ་དང༌། ཟླ་༨ པར། ས་གནས་སོ་སོའི་སྲིད་གཞུང་གིས་སྔ་རྗེས་སུ་" ས་ཞིང་བཅོས་བསྒྱུར་ལས་དོན་ཚོགས་ཆུང་" ཟེར་བ་༣༥༧༣༠ ལྷག་གྲོང་གསེབ་ཁག་ཏུ་ས་ཞིང་བཅོས་བསྒྱུར་གྱི་ལས་འགུལ་སྣེ་ཁྲིད་བྱེད་དུ་བཏང༌། ལས་འགུལ་དེའི་ནང་ཁྲལ་བུན་ཡོད་མཁན་གྱི་ཞིང་བདག་ཆིག་འབུམ་ལྷག་དྲག་གནོན་བྱས་པ་ དང༌། ཞིང་བདག་དང་ཞིང་ཕྱུག་བརྒྱད་ཁྲིར་ཉེ་བ་དུས་མིན་རྐྱེན་ལམ་དུ་བཏང༌། ༡༩༥༢ ལོའི་དགུན་ཁ་བར་དུ། གྲངས་ཉུང་མི་རིགས་གནས་ཡུལ་ས་ཁུལ་ཕུད་པའི་རྒྱ་ནག་རྒྱལ་ཡོངས་སུ་ས་ཞིང་བཅོས་ བསྒྱུར་གྱི་ལས་འགུལ་མཇུག་བསྒྲིལ་ཞིང༌། ས་ཞིང་མེད་པའམ་ཉུང་ངུ་ལས་མེད་པའི་ཞིང་པ་དུང་ཕྱུར་གསུམ་ཙམ་ལ་ས་ཞིང་མུའུ་ཁྲི་ བདུན་ཙམ་དང༌། ཐོན་སྐྱེད་རྒྱུ་ཆ་གཞན་དག་བགོ་འགྲེམས་བྱས། ༡༩༥༨ ལོར་མི་དམངས་ཀུང་ཧྲེ་འཛུགས་གཉེར་སྐབས་འདི་དག་ཚང་མ་ཕྱིར་བསྡུ་བྱས།
༥ གསུམ་རྒོལ་དང༌། ལྔ་རྒོལ་ལས་འགུལ། ༡༩༥༡ ནས་༥༢ བར།
[རྩོམ་སྒྲིག]གསུམ་རྒོལ་ནི་" ལྐོག་ཟ་ལ་ངོ་རྒོལ་དང༌། ཆུད་ཟོས་ལ་ངོ་རྒོལ། དཔོན་ངན་རིང་ལུགས་ལ་ངོ་རྒོལ་" བཅས་ལ་ཟེར་ཞིང༌། ༡༩༥༡ ལོའི་ཟླ་༡༢ ནས་མགོ་བརྩམས་ཏེ། རུལ་སུངས་ཀྱི་ལས་བྱེད་མང་དག་ཅིག་སྲོག་ཐོག་ཏུ་བཏང༌། ལོ་རྗེས་མར། " ལྐོག་རྔན་སྤྲོད་ལེན་ལ་ངོ་རྒོལ་དང༌། ཁྲལ་རིགས་སྐུང་གཡོལ་ལ་ངོ་རྒོལ། རྒྱལ་ཁབ་ཀྱི་རྒྱུ་ནོར་རྐུ་འཁྱེར་ལ་ངོ་རྒོལ། རྒྱུ་ཆ་རྐུ་འཕྲི་སླ་བཅོས་ལ་ངོ་རྒོལ། རྒྱལ་ཁབ་ཀྱི་དཔལ་འབྱོར་གསང་གནས་རྐུ་འཁྱེར་ལ་ངོ་རྒོལ་" བཅས་" ལྔ་རྒོལ " ་གྱི་ལས་འགུལ་སྤེལ། ལས་བྱེད་རྣམས་ཇེ་སྡུག་ཏུ་སོང་བའི་རྒྱུ་རྐྱེན་དེ་མ་རྩ་ཅན་གྱི་བསླུ་བྲིད་འོག་ ཚུད་པ་ལས་བྱུང་བར་ངོས་བཟུང་བས། " ལྔ་རྒོལ་" གྱི་དམིགས་གཏད་གཙོ་བོ་དེ་མ་རྩ་ཅན་ཡིན་ལ། འབྱོར་ལྡན་ཅན་དང་དེའི་ནང་མི་མང་དག་ཅིག་ལས་འགུལ་འདིས་འཆི་ལམ་དུ་བསྐྱལ་ཡོད།
༦ བསྒྱུར་བཀོད་ཆེན་པོ་གསུམ། ༡༩༥༡ ནས་༥༦ བར།
[རྩོམ་སྒྲིག]ཞིང་ལས་དང་ལག་ཤེས། བཟོ་ཚོང་ལས་རིགས་ལ་" སྤྱི་ཚོགས་རིང་ལུགས་ཀྱི་བསྒྱུར་བཀོད་" བྱས་ཏེ། རྒྱ་ནག་རྒྱལ་ཡོངས་འཆར་འགོད་དཔལ་འབྱོར་གྱི་ལམ་ལུགས་ལ་འཁྲིད་པ་ཞིག་སྟེ། " ཞིང་ལས་ཀྱི་སྤྱི་ཚོགས་རིང་ལུགས་བསྒྱུར་བཀོད་" དམ་" ཞིང་ལས་མཉམ་ལས་ཅན་གྱི་ལས་འགུལ་" དེས་རྒྱལ་ཡོངས་ཀྱི་ཞིང་པ་ཁྱིམ་དུད་བརྒྱ་ཆའི་༩༦།༣ མཉམ་ལས་ཁང་དུ་བཅུག་པ་དང༌། " ལག་ཤེས་ལས་རིགས་ཀྱི་སྤྱི་ཚོགས་རིང་ལུགས་བསྒྱུར་བཀོད་" ཀྱིས་རྒྱ་ནག་རྒྱལ་ཡོངས་ཀྱི་ལག་ཤེས་ལས་རིགས་གཉེར་མཁན་བརྒྱ་ཆའི་༩༠ ཡན་མཉམ་ལས་ཁང་དུ་བཙུད། " མ་རྩ་རིང་ལུགས་བཟོ་ཚོང་ལས་རིགས་ཀྱི་སྤྱི་ཚོགས་རིང་ལུགས་བསྒྱུར་བཀོད་" ཁྲོད། " ཞི་བའི་བླུ་ཉོ་" ཡི་བྱེད་ཐབས་སྤྱད་དེ། བཤུ་གཞོག་བྱེད་མཁན་རྣམས་རང་སྟོབས་རང་སྤེལ་གྱི་ངལ་རྩོལ་བར་བསྒྱུར་བ་ཞིག་ཡིན། ༡༩༥༦ ལོར་" བསྒྱུར་བཀོད་ཆེན་པོ་གསུམ་" མཇུག་བསྒྲིལ་བ་དང༌། སྤྱི་ལ་དབང་བའི་ལམ་ལུགས་ཀྱི་དཔལ་འབྱོར་ཐོན་འབོར་དེ་བཟོ་ལས་སྤྱིའི་ཐོན་འབབ་ ཀྱི་བརྒྱ་ཆའི་༩༠ ཡན་ཟིན་ཡོད་པ་དང༌། གུང་ཁྲན་རིང་ལུགས་ཀྱི་དཔལ་འབྱོར་མཚོན་རྟགས་སུ་བགྲང་བའི་འཆར་འགོད་དཔལ་འབྱོར་ དངོས་སུ་གྲུབ་པས། རྒྱལ་ཁབ་ཀྱི་དཔལ་འབྱོར་ཡོངས་རྫོགས་སྲིད་གཞུང་གི་དོ་དམ་འོག་ཏུ་བཅུག་པ་དང༌། ཐ་ན་ཚོང་ཟོག་གི་ཐོན་ཚད་ཀྱང་གཞུང་གི་འཆར་འགོད་ནང་དུ་བཅད། སྒེར་གྱི་རྒྱུ་ནོར་སོ་སོར་བདག་དབང་མེད་པ་དང༌། ཐོན་སྐྱེད་རྒྱུ་ཆ་ཡོངས་རྫོགས་སྤྱི་བར་བདག་གི་ཡོད།
༧ བསམ་བློ་བཅོས་བསྒྱུར་གྱི་ལས་འགུལ། ༡༩༥༢ ནས་༥༦ བར།
[རྩོམ་སྒྲིག]འདི་ནི་དེ་སྔ་༡༩༤༢ ལོ་ཡན་ཨན་དུ་དམར་ཤོག་ཚོགས་པ་ནང་ཁུལ་ལ་" ཀུན་སྤྱོད་དག་ཐེར་ལས་འགུལ་" ཟེར་བ་ཞིག་སྤེལ་ཡོད་པ་དེ་བསྐྱར་ཟློས་བྱས་པ་ཞིག་ཡིན་པ་དང༌། མི་འདྲ་ས་ནི་ཐེངས་འདིའི་ལས་འགུལ་སྤེལ་ཡུལ་ཤེས་ཡོན་ཅན་ཡིན་ཞིང༌། དེ་ཡང་མཐོ་སློབ་ཁག་ཏུ་ཡོད་པའི་རང་དབང་གི་བསམ་བློ་འཛིན་མཁན་དགེ་རྒན་དང་ལས་ བྱེད་ཚོར་འབྱོར་ལྡན་གྲལ་རིམ་གྱི་བསམ་བློ་ལྡན་ལུགས་སྐྱོན་དུ་བཟུང་སྟེ། དེ་དག་ལ་སྐྱོན་བརྗོད་དང་རང་སྐྱོན་རང་བརྗོད་རྒྱུན་མཐུད་བྱེད་དུ་བཅུག་པ་ཞིག་ ཡིན་ལ། བྱེད་ཐབས་འདི་བརྒྱུད་དེ་" མར་ལེ་རིང་ལུགས་དང་མའོ་ཙེ་ཏུང་གི་དགོངས་པ་" དང་མི་མཐུན་པའི་སྒེར་གྱི་བསམ་བློ་དོར་དུ་བཅུག་པའི་ལས་འགུལ་ཞིག་ཡིན།
༨ མེ་ཏོག་མཉམ་བཞད་དང༌། གཡས་ལྷུང་ལ་ངོ་རྒོལ།
[རྩོམ་སྒྲིག]༡༩༥༦ ལོའི་ཟླ་༢ པར་སུའུ་ལན་གྱི་སྲིད་འཛིན་ཧི་རོ་ཆིཕ་ཡིས་སི་ཏ་ལིན་གྱི་བྱས་རྗེས་ལ་སྐྱོན་ འདོན་བྱས་པ་དེའི་ཤུགས་རྐྱེན་འོག ཟླ་༤ ཚེས་༢༨ ཉིན་མའོ་ཙེ་ཏུང་གིས་" མེ་ཏོག་མཉམ་བཞད་དང་མཁས་བརྒྱ་འགྲན་གླེང་" སྤེལ་རྒྱུའི་གྲོས་མགོ་བཏོན་པར། དབུས་ཆབ་སྲིད་ཅུས་ཀྱིས་རྒྱབ་སྐྱོར་བྱས། འབོད་ཚིག་འདི་སྤྱིར་བཏང་ཚན་རིག་དང་རིག་གནས་ལས་དོན་གྱི་བྱེད་ཕྱོགས་ཤིག་ཡིན་ ཡང༌། དམར་ཤོག་དང་སྲིད་དོན་ཚོགས་པ་གཞན་དག་གིས་དབུས་གཞུང་ལ་བཤད་རྒྱུ་གཏམ་རྒྱུ་མང་ དག་ཅིག་བྱུང་བས། མའོ་ཙེ་ཏུང་སྐུ་རླུང་བཞེངས་ཐེངས་གཅིག་གིས་ལས་འགུལ་འདིའི་ངོ་བོར་འགྱུར་བ་ བཏང་སྟེ། " ཁ་སྡོད་མི་ཚུགས་པ་" མང་པོ་ཞིག་ཁྲིམས་མུན་དུ་བརྫངས། ལས་འགུལ་མགོ་ཚུགས་ནས་ཟླ་བ་གཉིས་ཀྱི་རྗེས། མའོ་ཡིས་དེའི་ཐད་གཏམ་གླེང་བྱེད་སྐབས། " སྦྲུལ་ཕྱི་ལོགས་སུ་ཡོང་དུ་བཅུག་ན་མ་གཏོགས་ག་འདྲ་བྱས་ནས་འཛིན་ནམ། ང་ཚོས་མི་ངན་དེ་དག་ཕྱིར་ཐོན་ནས་སྐད་ཅོར་རྒྱག་ཏུ་བཅུག ཚགས་པར་སྟེང་རྟུག་དྲི་གཏོང་དུ་བཅུག་ནས་ཁོ་ཚོར་སྙིང་སྟོབས་རྒྱས་སུ་ཆུག དེ་ནས་མི་དམངས་ལ་གསལ་བོར་བལྟ་རུ་བཅུག་ན། མི་དམངས་ཀྱིས་ཁོ་ཚོ་ངོ་ཤེས་ཀྱི་རེད། ང་ཚོས་" གཅིག་བཙིར་གཅིག་འཇུས། " " གཅིག་བརྡུང་གཅིག་འཇུས " ། གྲོང་ཁྱེར་ནང་ནས་འཇུས། གྲོང་གསེབ་ནས་བརྡུང་བ་ཡིན་ན། བྱེད་བདེ་བོ་རེད། གཅིག་གློད་པ་ཡིན་ན། གྲལ་རིམ་སོ་སོ་ཕྱིར་མངོན་པ་དང༌། གདོང་རིས་ངོ་མ་ཡང་སྟོན་གྱི་རེད། དམར་ཤོག་ཚོགས་པས་སྲིད་དབང་བཟུང་ནས་ལོ་བརྒྱད་ཀྱང་འགོར་མེད་མོད། བསམ་ཚུལ་དང་ནོར་འཁྲུལ། ནག་ཉེས་དཔང་རྟགས་ཁྲི་སུམ་ཅུ་ལྷག་བྱུང་བ་རེད། དེས་ན་དམར་ཤོག་ཚོགས་པ་སྲིད་སྟེགས་ལས་འབབ་དགོས་པ་རེད་དམ། མའོ་ཙེ་ཏུང་ཡང་བསྐྱར་ཅིན་ཀང་རི་བོར་བསྐྱོད་དགོས་སམ་" ཞེས་ལས་འགུལ་འདིའི་དམིགས་ཡུལ་ངོ་མ་གསལ་སྟོན་བྱས་ཡོད། ༡༩༥༧ ལོའི་ཟླ་༦ ཚེས་༨ ཉིན། མི་དམངས་ཉིན་རེའི་ཚགས་པར་སྟེང་" འདི་ནི་ཅིའི་ཕྱིར་" ཟེར་བའི་ཆེད་གཏམ་ཞིག་སྤེལ་ཏེ། " གཡས་ལྷུང་ཕྱོགས་ཁག་" ལ་ངོ་རྒོལ་བྱེད་པའི་འཐབ་རྩོད་དངོས་སུ་བསླངས་པ་དང༌། རྒྱལ་ཡོངས་སུ་ཏང་ཡོན་འབུམ་བརྒྱད་ལྷག་དང༌། ལས་བྱེད་དང་ཤེས་ཡོན་ཅན་ས་ཡ་གཉིས་དང་དགུ་འབུམ་ལྷག་" གཡས་ལྷུང་" དུ་བཀར། འཐབ་རྩོད་བྱེད་ཐེངས་འདིས་" མི་དམངས་ནང་ཁུལ་གྱི་འགལ་བ་" དེ་" དགྲ་དང་རང་ཕྱོགས་ཀྱི་འགལ་བ་" ལ་རྩིས་ཡོད།