Wikipedia talk:ད་ལྟའི་བྱ་བ།
རྩམ་པའི་ཕན་ནུས་།
རྩམ་པ་ནི་མཐོ་སྒངས་སུ་སྐྱེས་པས་ནས་རིགས་རྔོས་ནས་ཞིབས་འཐག་བྱས་པ་ཞིག་ཡིན་ལ། སྤྱིར་བོད་དུ་རྩམ་པ་ལ་ནས་རྩམ་དང་། གྲོ་རྩམ། སྲན་རྩམ་སོགས་རིགས་མང་པོ་ཡོད་པ་དང་། བོད་ཡོངས་རྫོགས་སུ་ཁྱབ་བརྡལ་ཤིན་ཏུ་ཆེ་བ་ནི་ནས་རྩམ་ཡིན། བོད་ཀྱི་གསོ་བ་རིག་པའི་སྨན་གཞུང་རྣམས་སུ་ནས་ནི་གྲ་མ་ཅན་གྱི་འབྲུ་ཡི་སྡེ་ལ་ངོས་འཛིན་པ་དང་། ནས་ལ་རིགས་མང་པོ་ཡོད་པ་དཔེར་ན། ནས་དཀར་དང་། ནས་སྔོན། ནས་ནག ནས་རྒོད་དམ་ནས་དམར་བཅས་ཡོད་ལ། ད་དུང་ཁྲ་མ་དང་། སོ་བ། ད་རྒན་སྟེ་ཡུག་པོ། སྲེ་ད་ཡང་ནས་ཀྱི་རིགས་སུ་འཇོག་ཚུལ་འདུག
ནས་ཀྱི་ནུས་པ་ནི།
ནས་དཀར་རྩུབ་བསིལ་ལྕི་མངར་ཁོང་ཅུང་འཁྲོག།
བཤང་བའི་རླུང་འཕེལ་རོ་ཙ་བརྟས་པར་བྱེད།།
གཅིན་ཚིལ་མཁྲིས་པ་བད་ཀན་ཆམ་པ་དང་།།
ལུད་པ་དབུགས་མི་བདེ་བ་སེལ་བར་བྱེད།། ཅེས་དང་།
ནས་སྔོན་བྱིས་གློ་ཚ་སུབ་རྒྱུ་གཟེར་སེལ།།
ནས་ནག་རྨ་དང་ཤུ་བ་གདོན་ལ་ཕན།།
ནས་རྒོད་གཞན་ལས་ཅུང་ཟད་དམན་པ་ཡིན།།
ད་རྒན་ལྐོག་མའི་ནད་དང་པགས་ནད་སེལ།།
སོ་བ་སྲེ་ད་བསིལ་ཡང བད་མཁྲིས་སེལ།།
བུ་དང་ཟུག་རྔུ་འབྱིན་པར་བྱེད་པ་ཡིན།། ཞེས་སོགས་གསུངས་པ་ལྟར་ནས་རྩམ་གྱི་ནུས་པ་བསམ་གྱིས་མི་ཁྱབ་པ་ཡོད།།
བོད་ཀྱི་རྩམ་པ་ཚོང་ཁང་།
ང་ཚོ་ནི་ཨ་རིས་གནས་སྡོད་བྱས་པའི་བོད་ཀྱི་རྩམ་པ་དྲ་ལམ་ཚོང་ཁང་ཡིན། ང་རང་ལོ་ན་ཆུང་ཆུང་ནས་རང་གི་ཕ་ཡུལ་དང་ཡོངས་སུ་ཁ་བྲལ་ནས་ཕྱི་རྒྱལ་ཀྱི་ཡུལ་གྲུ་མང་པོར་བསྡད་། རང་ཡུལ་དང་ཁ་བྲལ་ནས་ལོ་ངོ་ཅི་ཙམ་མང་པོ་སོང་བ་དེ་ཙམ་གྱིས་ཕ་ཡུལ་དང་ཕ་ཟས་ཤིན་ཏུ་དྲན། མི་ཡུལ་འདིར་འབད་པ་ཅི་ཙམ་བྱས་ཀྱང་།རང་ཡུལ་དེ་རང་ལག་དུ་ཐོན་རྒྱུ་ཤིན་ཏུ་རིང་ན་ཡང་། རང་གི་ནུས་པ་གང་ཡོད་བཏོན་ནས་ཚོད་བལྟ་དང་བརྟག་དཔྱད་གང་མང་བྱས་མཐར། བྲོ་བ་དང་ནུས་པ་བོད་གྱི་རྩམ་པ་དང་གཅིག་འཚུངས་སུ་ལྡན་པའི་རྩམ་པ་ཞིག་བཟོ་ཐུབ་སོང་པས། སེམས་ལ་སྤོབ་པ་དང་བཅས་ཏེ་བོད་པ་རྣམས་དང་། རྩམ་པ་ལ་དགའ་བ་རྣམས་པར་ཞུ་རྒྱུར། ངེད་ཚང་བོད་ཀྱི་རྩམ་པ་ཚོང་དུ་རྩམ་པ་བྲོ་བཅུད་ལྡན་ཞིག་དྲ་ལམ་བརྒྱུད་ནས་ཉོ་མཁན་
རྣམས་ཀྱི་འདོད་པ་ལྟར་འཚོང་རྒྱུ་ཡོད་། ཉོ་མཁན་རྣམས་ལ་སྟབས་ཤིན་དུ་བདེ་པོ་ཡོང་ཆེད་། དྲ་ལམ་དང་། མྱུར་འཕྲིན། ཁ་པར་ཏར་འཕྲིན་སོགས་གང་རུང་རྒྱུད་ནས་རྩམ་པ་མངག་ཉོ་བྱས་ཆོགས། www.tibetantsampa.com
གངས་སུལ་གྱི་རོལ་དབྱངས་ཀྱི་སྔོན་གླེང་།༼༢༠༡༡༽[རྩོམ་སྒྲིག]
སྔོན་གླེང་། གངས་སུལ་གྱི་རོལ་དབྱངས་ཀྱི་ལ་ཕུལ་བ། བེ་རི་འཇིགས་མེད། སྒྱུ་རྩལ་གངས་སུལ་ཉུལ་བའི་གྲུ་ག་ནས།། རྩོམ་རིག་རོལ་དབྱངས་འཁྲོལ་བའི་འབབ་སྟེགས་སྟེང་།། གནའ་དེང་ཚིག་རྒྱན་འཁྱོག་པའི་འཁྲབ་སྟོན་འདིས།། ཡིད་ཀྱི་བརྟན་པ་མི་འཕྲོག་དཔྱོད་ལྡན་སུ།། གངས་སུལ་གྱི་རོལ་དབྱངས་ནི། མི་ལོ་བཅུ་ཕྲག་ལྷག་གི་སྔོན་ནས་རང་རེའི་སློབ་གླིང་འདི་ནས་ཆེས་ཐོག་མར་འབུད་བཀྲོལ་བྱས་པའི་སྒྱུ་རྩལ་གྱི་རོལ་དབྱངས་ཤིག་ཡིན་ལ། འཛིན་བཅུ་པའི་སེམས་ཚོར་གྱི་སྣང་བརྙན་དང་། མཛུབ་རྩེའི་ཟློས་གར་རྩེན་སའི་གདེང་ཆ་ཆེས་ཐོག་མ་དེ་ཡང་འདི་ཉིད་ཡིན། བྱ་དངོས་གང་ཞིག་མེད་པ་ནས་ཡོད་པར་བསྒྱུར་བ་ལས་སླ་པོ་མིན་ལ། ཡོད་པ་ནས་གྲ་རྒྱས་སུ་བཏང་བའང་དེ་བས་ལས་སླ་པོ་མིན། ལོ་རབས་བཅུ་ཕྲག་ལྷག་གི་བྱུང་འདས་ལ་ཕྱི་འདང་རགས་ཙམ་བྱས་ནས་སྔོན་གླེང་འདི་ཉིད་འབྲི་མགོ་འཛུགས་འདོད་སྐྱེས། གྲྭ་ཚང་རིན་པོ་ཆེ་འདི་ཉིད་མི་ཐོགས་མིས་བརྗེས་ཤིང་ཐོགས་ལོ་མས་བརྗེས་པའི་བརྒྱུད་རིམ་གྱི་སྣེ་མོ་བཙན་བྱོལ་ལ་འཐེན་ནས་དེ་རིང་གི་བར་གྱི་བཤད་སྒྲུབ་ལས་གསུམ་གྱི་མཛད་རྗེས་རེ་རེ་བཞིན་བཤད་པས་མི་ཚར་བའི་ཁྲོད་ནས། གསར་དུ་བཙུགས་པའི་སློབ་གྲྭའི་བྱུང་བ་བརྒྱུད་པའི་ཁྲོད་དུ་བར་ལམ་ནས་བསམ་ཕོད་པ་དང་། བཤད་ཕོད་པ། བྱེད་ཕོད་པ་སྟེ་ཕོད་པ་གསུམ་ལྡན་གྱི་ཤེས་འཇོན་གཉིས་ལྡན་གྱི་ཕྱག་མཛོད་ཁག་གཅིག་གིས་དཔལ་ཡོན་ལྷན་ཅིག་རྒྱ་བསྐྱེད་གཏོང་བ་དང་ཆབས་ཅིག་ཤེས་སྤྱོད་ཡར་ལྡན་གྱི་སློབ་མ་ཁྱུ་གཅིག་ལ་ལམ་སྟོན་དང་མ་རྩ་གསར་འཛུགས་ཀྱིས་ལྷོ་མཐའི་ཚ་ལྗོངས་ནས་གངས་སུལ་འགྲིམ་པའི་སྒྱུ་རྩལ་གྱི་རོལ་དབྱངས་གསར་པ་ཞིག་འཕྲོ་མགོ་ཚུགས་པ་ཡིན་ལ། ཉམས་འགྱུར་གྱི་དབུ་ཁྱུད་གསར་པ་ཞིག་ཀྱང་འབྲི་མགོ་ཚུགས་པ་ཡིན། མི་ལོ་བཅུ་ཕྲག་ལྷག་གི་རིང་སློབ་གྲྭའི་ར་བ་འདི་ནས་ཐོན་པའི་སློབ་མ་སྐོར་ཞིག་ད་ཆར་རྩོམ་པ་པོ་དང་། ལོ་རྒྱུས་སྨྲ་བ། སྙན་ངག་པ། ཞིབ་འཇུག་པ། རིག་པ་སྨྲ་བ་བཅས་ཀྱི་གདན་གྲལ་དུ་འཛེགས་པར་མ་ཟད། འབུར་དུ་ཐོན་པའི་རྩོམ་རིག་གི་སྒྱུ་རྩལ་ལ་ཉམས་འགྱུར་གྱི་ཚོན་མདངས་བཀྲ་བ་ཡང་ཉུང་ཉུང་མིན། སྤྱི་ཚོགས་ནང་དུ་གཏམ་བཤད་ཀྱི་བགྲོ་གླེང་དང་། དུས་དེབ་ཁག་ཏུ་སྒྱུ་རྩལ་གྱི་ཆེད་རྩོམ། ཚོགས་སྡེ་ཁག་གི་ངོ་སྤྲོད་དང་གླེང་སློང་། དཔེ་སྐྲུན་ཁང་གི་ཞུས་ཆེན་དང་ཞུ་དག དཔེ་མཛོད་ཁག་གི་ཞུ་དག་དང་དེབ་བཟོ། གདན་ས་ཆེན་པོའི་རྩོད་གྲྭའི་ནང་གི་རིགས་པའི་དཔའ་བོ་ཐོན་པའང་དེ་བས་ཉུང་ཉུང་མིན། རྒྱུ་མེད་ལས་འབྲས་བུ་འབྱུང་བ་མེད་པ་དང་། མ་ཚང་མེད་རྒྱུ་དེ་ལས་ནི་འབྲས་བུ་གང་གིས་ཟློག་པ་མི་ནུས་པ་རྟེན་འབྲེལ་ལྟོས་གྲུབ་ཀྱི་གཤིས་སུ་གྲུབ་པས་ད་ལྟ་བའི་བར་རང་རེའི་སློབ་གྲྭ་ནས་ཐོན་པ་སྤྱི་དང་། ཆུ་ཆེན་ཆུ་རླབས་ཀྱི་དཔེ་ལྟར་ཉེ་བའི་ཁོར་ཡུག་ཁག་ནས་སྙན་ངག་དང་། སྒྲུང་རྩོམ། དཔྱོད་བརྗོད་དང་ངོ་སྤྲོད། རྒྱལ་རབས་དང་ཆོས་འབྱུང་སོགས་འབྲི་མཁན་ཇི་སྙེད་ཅིག་ཐོན་པ་དེ་དག་ཀྱང་། དུས་དེབ་འདི་ཉིད་དང་ལྟོས་གྲུབ་ཀྱི་འབྲེལ་བ་ངེས་ཅན་རེ་ཡོད་པ་ནི་བཤད་མ་དགོས་པ་རེད། ད་ལྟའི་སློབ་གྲྭའི་ནང་བོད་དགེ་རྣམ་པ་ཚོའང་སྒྲུང་དང་། སྙན་ངག ལོ་རྒྱུས་སོགས་ཀྱི་འཆད་འཁྲིད་དགེ་རྒན་ཙམ་དུ་མ་ཟད། དེ་དག་གི་རྩོམ་པ་པོར་ངོས་འཛིན་ཞུ་ནའང་ཚད་གཞི་དང་ཆ་ལག་ཡོངས་སུ་ཚང་བས། ཡིག་འཁྱོགས་རེ་གཉིས་ཙམ་བྲིས་ནས་རྩོམ་པ་པོའི་རུ་ཚོན་བརྫུན་མ་འཕྱར་མཁན་དེ་ཚོ་དང་ནམ་ཡང་བསྡུར་ས་མེད། སློབ་གྲྭ་འི་དུས་དེབ་གངས་སུལ་གྱི་རོལ་དངས་འདི་ཉིད་ད་བར་མུ་མཐུད་ནས་ད་ལྟའི་བར་གཟིམ་མེད་མར་མེ་ཞིག་དང་འདྲ་བར་གསལ་ལྷམ་མེར་འབར་བཞིན་མཆིས་ལ། ཕྱིས་ནས་ཀྱང་ལྷག་བསམ་དང་སྙིང་སྟོབས། ཆོད་སེམས་དང་ཕུགས་བསམ། བརྟན་ལྷིངས་དང་བསྟུན་མཁས་ཀྱིས་ནམ་ཡང་འགྱེལ་དུ་མེད་པའི་དཔའ་བོའི་རྡོ་རིང་བཞིན་ལང་དགོས་ལ། སློང་དགོས་པའང་རྡོ་ལག་བརྒྱུད་ཀྱི་དཔེ་ལྟར་གནང་རྒྱུའི་རེ་བ་ཞུ། ད་ལྟའི་བར་བཙན་བྱོལ་དུ། བོན་སྒོ། ལྡུམ་ར། ཆོས་དུང་དཀར་པོ། གངྒཱའི་བཞད་སྒྲ།ཁ་བའི་མེ་ཏོག མཐོ་སྒང་གི་ཉི་ཟེར། བློ་གསལ་རྩོམ་རིག་དགའ་ཚལ། རྩམ་པ། གངས་ལྷ་མེ་ཏོག པདྨའི་རང་མདངས། ལྗང་གཞོན། གཏམ་ཚོགས། ཤེས་རིག ཟླ་འོད་གཞོན་ནུ། ཟམ་པ། ཆོས་རྭའི་ནང་གི་དྷཱི་སྐད། གཏམ་ཚོགས། ཤཱཀྱའི་འོད་སྣང་། གངས་རིའི་ལང་ཚོ། གཡག་གུའི་ཧལ་སྒྲ། ཁ་བ། འོད། རླབས་ཕྲེང་། རིག་རླབས། མིག གངས་རྒྱུན། དཔྱིད་ཀ་སོགས། སྤེལ་ཞིང་བཏོན་པའི་དུས་དེབ་ཕལ་ཆེ་བ་ཞིག་ནི་རླུང་ཁྲོད་ཀྱི་མར་མེ་དང་། ཆུ་འགྲམ་གྱི་བྱེ་མ་བཞིན་ངེས་བརྟན་མེད་པའི་འགྱུར་འགྲོས་ཀྱི་ལྟད་མོ་ཆེས་མང་ཡང་། རང་རེི་གངས་སུལ་གྱི་རོལ་དབྱངས་འདི་ནི་སྲིད་པ་ཆགས་པའི་གངས་རྒན་བཞིན་བརྟན་ཅིང་། དབྱངས་ཅན་ཕྱག་གི་རོལ་དབྱངས་བཞིན་སྙན་པའི་ཁྱད་ཆོས་དང་ལྡན་ཞིང་། ད་ལྟའང་འཚོ་ཞིང་བཞུགས་ལ། ད་དུང་ཡང་མུ་མཐུད་འཚོ་བཞུགས་ཐུབ་པར་མ་ཟད། རྩོམ་རིག་གི་དར་ཆེན་བསྐྱོད་པའི་རླུང་རླབས་དང་། སྒྱུ་རྩལ་གྱི་སྦྲང་ཆར་འབེབས་པའི་སྤྲིན་པ་བཞིན་གནས་ལ། གནས་ཤིང་འཕེལ་བའི་འགན་འཁྲི་ཡང་ནམ་ཡང་མི་འདོར་བ་མཛད་དགོས། འཇིག་རྟེན་འདིར་མཁས་པ་རྒྱལ་གྱུར་ཅིག མཁས་པའི་བྱ་བ་རྒྱལ་གྱུར་ཅིག རྩོམ་རིག་རྒྱལ་གྱུར་ཅིག ། བརྟན་གཡོ་ཤེས་བྱའི་མཛེས་བཀོད་རི་མོ་འབུམ། ། སྒྱུ་རྩལ་རྟོག་པའི་པིར་གྱིས་འབྲི་མཁས་པ། ། རྣམ་གསུམ་ཚད་མ་སྨྲ་བའི་གྲལ་མགོ་ན། ། འཆད་རྩོད་རྩོམ་པའི་རོལ་དབྱངས་སྙན་གྱུར་ཅིག ། དགེ་མིང་ཟུར་ཙམ་འདྲེན་པ་བེ་རི་འཇིགས་མེད་ཀྱིས་གནས་མཆོག་དྲང་སྲོང་ལྷུང་བའི་ནགས་འདབས་ལྭཱ་ར་ཎཱ་སི་བོད་ཀྱི་ཆེས་མཐོའི་གཙུག་ལག་སློབ་གྲྭ་ཆེན་པོའི་ཞི་འཚོ་དཔེ་མཛོད་ཁང་དུ། སྤྱི་ལོ་ ༢༠༡༡།༠༡།༢༠ ཉིན་བྲིས་པ་དགེའོ། །
སུམ་རྟགས་ཀྱི་ཚིག་དོན་མདོར་བསྡུས་པ་བློ་གསར་མགུལ་རྒྱན།[རྩོམ་སྒྲིག]
༄༅། །སུམ་རྟགས་ཀྱི་ཚིག་དོན་མདོར་བསྡུས་པ་བློ་གསར་མགུལ་རྒྱན་ཞེས་བྱ་བ་བཞུགས་སོ།།
Tsewang Rigzin Sherpa (talk) ༢༠:༠༢, ༡༦ ཟླ་བཅུ་བ། ༢༠༡༢ (UTC)
༄༅། །ཨོཾ་སྭསྟི། བླ་མ་དང་ནི་འཇམ་དབྱངས་ལ། །སྒོ་གསུམ་གུས་པས་རབ་བཏུད་ནས། །བོད་ཀྱི་བརྡ་སྤྲོད་སུམ་ཅུ་པའི། །ཚིག་དོན་མདོར་བསྡུས་བརྗོད་པར་བྱ། །བོད་རྒྱལ་སྲོང་བཙན་སྒམ་པོ་ཡི། །ཆོས་བློན་ཐོན་མི་སཾ་བྷོ་ཊས། །རྒྱ་གར་མཁས་པ་མང་བསྟེན་ཏེ། །བོད་ཡིག་བརྡ་སྤྲོད་གསར་རྩོམ་མཛད། །དེ་ཡང་བོད་ཀྱི་ཡི་གེ་འདི། །དབྱངས་དང་གསལ་བྱེད་གཉིས་སུ་འདུས། །དབྱངས་ཡིག་ཨི་ཨུ་ཨེ་ཨོ་བཞི། །གསལ་བྱེད་ཀ་སོགས་སུམ་ཅུ་ཡིན། །རྗེས་འཇུག་ག་ང་ད་ན་བ། །མ་འ་ར་ལ་ས་དང་བཅུ། །སྔོན་འཇུག་ག་ད་བ་མ་འ། །ཡང་འཇུག་ད་དང་ས་གཉིས་ཡིན། །རྗེས་འཇུག་ན་ར་ལ་ལ་ད། །ག་ང་བ་མའི་རྗེས་སུ་ས། །མགོ་ནི་ར་ལ་ས་གསུམ་དང་། །འདོགས་ནི་ཡ་ར་ལ་ཝ་བཞི། །ར་མགོ་བཅུ་གཉིས་ལ་མགོ་བཅུ། །ས་མགོ་ཅན་ནི་བཅུ་གཅིག་གོ། །ར་བཏགས་བཅུ་གཅིག་ཡ་བཏགས་བདུན། །ཝ་བཏགས་བཅུ་གཉིས་ལ་བཏགས་དྲུག །གསུམ་བརྩེགས་ར་ཡ་ལྡན་པ་གསུམ། །ས་ཡ་ལྔ་དང་ས་ར་དྲུག །བརྩེགས་པར་ཝ་བཏགས་བཞི་དང་བཅས། །བོད་ཡིག་འབྲི་སྲོལ་གཙོ་རྣམས་ཡིན།། ༈ རྫོགས་ཚིག་གོ་ངོ་དོ་ནོ་བོ། །མོ་འོ་རོ་ལོ་སོ་ཏོ་ཡིན། །སྦྱོར་ཚུལ་རང་འདྲའི་རྗེས་སུ་དང་། །མཐའ་མེད་འོ་ཡིན་ད་དྲག་ཏོ།། ༈ རྣམ་དབྱེ་བརྒྱད་དང་ཚིག་ཕྲད་ལ། །རང་དབང་ཡོད་མེད་སྣ་ཚོགས་ལས། །རྣམ་དབྱེ་དང་པོ་དོན་གང་ཞིག །མིང་ངམ་ངོ་བོ་བརྗོད་པ་ཡིན། །དེ་མཐར་གོ་སོགས་སྦྱར་བ་ན། །དང་པོ་དང་འབྲེལ་སླར་བསྡུ་སྟེ། །དཔེར་ན་མཆོག་གོ་བཟང་ངོ་ནས། །བྱས་སོ་ཕྱིནད་ཏོ་ལྟ་བུ་ཡིན།། ༈ ལ་དོན་སྒྲ་ནི་སུ་རུ་ར། །ན་ལ་ཏུ་དུ་བདུན་ཡིན་ཏེ། །རྣམ་དབྱེ་གཉིས་བཞི་བདུན་དང་ནི། །ནང་ཚན་དེ་ཉིད་དུས་ལ་འཇུག །ས་སུ་ག་བ་ད་དྲག་ཏུ། །ང་ད་ན་མ་ར་ལ་དུ། །འ་དང་མཐའ་མེད་ར་རུ་གཉིས། །ཚེག་གིས་བྱེད་པ་སྦྱོར་ཚུལ་ཡིན།། ༈ གཉིས་པ་ལས་སུ་བྱ་བ་ནི། །བྱ་བའི་ཡུལ་ཞིག་གཞིར་བཟུང་ནས། །དེ་ལ་བྱ་བ་བྱེད་པ་ཞིག །གཙོ་བོར་གོས་ནུས་སྒྲ་ཞིག་ཡིན། །དཔེར་ན་སྔས་སུ་དཔེ་ཆ་བཞག །ཟ་མ་ཁ་རུ་བཅུག་སོགས་བཞིན། །བྱ་བའི་གཞི་དང་བྱ་རྒྱུའི་དངོས། །སྔོན་ལ་གང་བསྟན་ཁྱད་མེད་དོ།། ༈ རྣམ་དབྱེ་བཞི་པ་དགོས་ཆེད་ནི། །བྱ་གཞི་གང་ཡང་མི་སྟོན་པར། །དགོས་པའི་ཆེད་དུ་བྱ་བ་ཞིག །བྱེད་པ་གཙོ་བོར་གོ་ནུས་སྒྲ། །དཔེར་ན་མཛེས་སུ་རྒྱན་ཆ་བཏགས། །ཐར་པའི་ཆེད་དུ་དགེ་སྒྲུབ་བཞིན། །ཆེད་ཕྱིར་སླད་དོན་དབང་ལ་སོགས། །གསལ་བྱེད་སྒྲ་ཡིན་སྐབས་དང་སྦྱོར།། ༈ རྣམ་དབྱེ་བདུན་པ་གནས་གཞི་ནི། །བརྟེན་བྱའི་ཆོས་ཤིག་རྟེན་གཞི་ལ། །བརྟེན་ཏེ་གནས་སམ་ཡོད་པ་ཙམ། །གོ་བར་བྱེད་པའི་སྒྲ་ཡིན་ཏེ། །དཔེར་ན་དབུས་སུ་བླ་མ་གནས། །ཐབ་ཏུ་མེ་ཡོད་ལྟ་བུ་སོགས། །འདུག་དང་བརྟེན་ལ་སོགས་པ་ནི། །གསལ་བྱེད་སྒྲ་ཡིན་སྐབས་ཀྱིས་ཕྱེ།། ༈ གཉིས་པའི་ནང་ཚན་དེ་ཉིད་ནི། །དངོས་པོ་ཀུན་ལ་རང་བཞིན་ནམ། །དེ་ཉིད་དུ་ཡོད་བྱ་བ་ཙམ། །སྟོན་པའི་སུ་ལ་སོགས་པ་ཡིན། །དཔེར་ན་འོད་དུ་གསལ་དང་ནི། །མེ་རུ་འབར་བ་ལྟ་བུ་སྟེ། །འདི་སྐབས་ན་དང་ལ་གཉིས་པོ། །མི་བདེ་ཕྱིར་ན་མཁས་རྣམས་དོར།། ༈ བདུན་པའི་ནང་ཚན་ཚེ་སྐབས་ནི། །གང་ཚེ་གང་ཞིག་གོ་ནུས་སྒྲ། །དཔེར་ན་རྒས་སུ་ཆོས་དྲན་བཞིན། །ཚེ་སྐབས་དུས་སྐོར་ཁ་གསལ་བྱེད།། ༈ འབྲེལ་སྒྲ་ཀྱི་གི་གྱི་འི་ཡི། །བྱེད་སྐྲ་ཀྱི་སོགས་ས་སྦྱར་ཡིན། །རིམ་བཞིན་རྣམ་དབྱེ་དྲུག་པ་དང་། །རྣམ་དབྱེ་གསུམ་པ་སྟོན་པར་བྱེད། །ད་བ་ས་ཀྱི་ག་ང་གི། །ན་མ་ར་ལ་བཞི་ལ་གྱི། །འ་དང་མཐའ་བརྟེན་མེད་ལ་འི། །འདི་གཉིས་ཚེག་ཡོད་ཡི་ཐོབ་བོ།། ༈ རྣམ་དབྱེ་དྲུག་པ་ཆོས་གང་ཞིག །གང་དང་འབྲེལ་བར་སྟོན་ནུས་སྒྲ། །དཔེར་ན་བདག་གི་ལག་པ་དང་། །ཤིང་གི་སྡོང་པོ་སོགས་ཡིན།། ༈ རྣམ་དབྱེ་གསུམ་པ་བྱེད་པ་པོས། །ཉེ་རྒྱང་བྱ་བ་བྱེད་པའི་སྒྲ། །དཔེར་ན་བདག་གིས་ཆོས་་་་དང་། །གྲོགས་ཀྱིས་ཡི་གེ་བྲིས་སོ་བཞིན།། ༈ འབྱུང་ཁུངས་སྒྲ་ནི་ནས་ལས་ཏེ། །རྣམ་དབྱེ་ལྔ་པ་ཆོས་གང་ཞིག །གང་ནས་འབྱུང་བར་སྟོན་པའི་སྒྲ། །དཔེར་ན་མེ་ལས་དུ་བ་བཞིན། །ནས་ནི་སྡུད་དང་ལྷག་བཅས་ལ། །ལས་ནི་རྒྱུ་དང་དགར་ལ་འཇུག །གཡས་ནས་གཡོན་དང་ཟོས་ནས་བཤད། །ཕ་ལས་མ་བཟང་ལ་སོགས་བཞིན།། ༈ འབོད་སྒྲ་ཀྱེ་དང་ཀྭ་ཡེ་སྟེ། །རྣམ་དབྱེ་བརྒྱད་པ་གང་ཟག་འབོད། །དཔེར་ན་ཀྱེ་ཕ་མ་ཀྱེ་བཞིན། །མིང་གི་ཐོག་མཐར་ཅི་བདེར་སྦྱར།། ༈ རྒྱན་སྡུད་སྒྲ་ནི་ཀྱང་ཡང་འང་། །གསུམ་ཡིན་ག་ད་བ་ས་ཀྱང་། །ང་ན་མ་ར་ལ་མཐར་ཡང་། །འ་དང་མཐའ་མེད་འང་ཡང་ཕྱེ། །མཐུན་དང་མི་མཐུན་ཚིག་གཉིས་གཉིས། །གཞི་གཅིག་སྦྱོར་བྱེད་པར་རྒྱན་དང་། །སྔ་ཕྱིའི་དོན་གཉིས་ཚིག་གཅིག་གིས། །གོ་བར་བྱེད་པའི་སྡུད་པའང་ཡིན། །དཔེར་ན་མཐུན་པ་ཐུག་ཀྱང་ཐུག །མི་མཐུན་ཡོད་ཀྱང་མེད་ལྟ་བུ། །སྡུད་པ་གྲོགས་ཀྱིས་ཆོས་བཤད་པ། །དེ་བཞིན་བདག་གིས་ཀྱང་ངོ་བཞིན།། ༈ ལྷག་བཅས་དེ་ཏེ་ས་སྟེ་གསུམ། །ད་དེ་ན་ར་ལ་ས་ཏེ། །ག་ང་བ་མ་འ་དང་ནི། །མཐའ་བརྟེན་མེད་མཐའ་ས་སྟེ་ཐོབ། །དོན་ནི་རྗོད་བྱེད་ཚིག་ལྷག་མ། །ལུས་པ་གོ་བར་ནུས་པའི་སྒྲ། །དཔེར་ན་བསྡད་དེ་ཆོས་མཉན་དང་། །སྡིག་པ་བཀག་སྟེ་དགེ་བསྒྲུབ་བཞིན།། ༈ འབྱེད་སྡུད་གམ་ངམ་དམ་ནམ་བམ། །མམ་འམ་རམ་ལམ་སམ་ཏམ་སྟེ། །རང་འདྲའི་རྗེས་འཇུག་རྗེས་སུ་དང་། །ད་དྲག་ཅན་མཐར་ཏམ་སྦྱོར་དགོས། །གཅིག་ཉིད་དུ་མར་འབྱེད་པ་དང་། །དུ་མ་གཅིག་ཏུ་སྡུད་པ་སྟེ། །དཔེར་ན་མཐའ་ནི་རྟག་གམ་ཆད། །རྟག་གམ་ཆད་པ་མཐའ་ཞེས་བཞིན།། ༈ ནི་སྒྲ་ལོགས་སུ་དགར་བ་དང་། །ནན་གྱིས་བརྣན་པའི་སྒྲ་ཡིན་ཏེ། །དགར་བ་དཔེར་ན་ཕ་མ་ནི། །རྙེད་པར་དཀའ་འོ་ཞེས་པ་བཞིན། །བརྣན་པ་བུ་ནི་གཟུགས་བྱད་མཛེས། །བུ་ནི་ནོར་ལྡན་བུ་ནི་བཟང་། །བསྡུས་ན་ནི་སྒྲ་བརྣན་པ་སྟེ། །ཁྱེད་ནི་འདི་ནི་ཞེས་པ་བཞིན།། ༈ དང་སྒྲ་སྡུད་དང་འབྱེད་པ་དང་། །རྒྱུ་མཚན་ཚེ་སྐབས་གདམས་ངག་ལྔ། །སྡུད་པ་དཔེར་ན་ས་དང་ཆུ། །མེ་དང་རླུང་དང་འབྱུང་བའོ། །འབྱེད་པ་འབྱུང་བ་ས་དང་ཆུ། །མེ་དང་རླུང་དང་བཞི་ཞེས་བཞིན། །རྒྱུ་མཚན་དུད་པ་མཐོང་པ་དང་། །མེ་ཡོད་ཤེས་ཟེར་ལྟ་བུ་ཡིན། །ཚེ་སྐབས་ཉི་མ་ཤར་བ་དང་། །མལ་ནས་ལྡང་བར་བྱ་ཟེར་བཞིན། །གདམས་ངག་དམ་པའི་ཆོས་བསྒྲུབས་དང་། །ཐར་པ་ཐོབ་བོ་ཞེས་པ་བཞིན།། ༈ གཞན་ཡང་དེ་སྒྲ་འཇུག་ཚུལ་ནི། །ཐ་སྙད་དབང་དུ་བྱས་པ་གསུམ། །དངོས་པོའི་དབང་དུ་བྱས་པ་བཞི། །དུས་ཀྱི་དབང་དུ་གཉིས་ཡིན་ནོ། །ཐ་སྙད་འདས་དང་རྣམ་གྲངས་གཞན། །ལྷག་བཅས་དང་ནི་གསུམ་ཡིན་ཏེ། །འདས་པ་མེ་ཏོག་དམར་པོ་དེ། །མཛེས་སོ་དེ་དགོས་ཞེས་པ་བཞིན། །རྣམ་གྲངས་གཞན་སྦྱོར་ཞེས་པ་ནི། །དཔེར་ན་ནམ་མཁའི་དཀར་པོ་དེ། །ཉི་མ་དེ་ཡིན་མེ་ཤེལ་དེ། །འོད་དཀར་ཅན་ཡང་དེ་ཞེས་བཞིན། །ལྷག་བཅས་དབྱེ་བ་ལྔ་ཙམ་ཡོད། །དེ་ཡང་རིམ་བཞིན་འདི་ལྟ་སྟེ། །མཚམས་སྦྱོར་ཉི་མ་ཤར་ཏེ་དྲོ། །གྲོས་ཐག་བཅད་དེ་ལས་བྱས་བཞིན། །རྒྱུ་མཚན་འདྲེན་པ་མེ་ཡོད་དེ། །དུད་པ་མཐོང་བའི་ཕྱིར་ཞེས་བཞིན། །ངེས་ཚིག་འདྲེན་པ་སྲུང་སྐུད་དེ། །བར་ཆད་སྲུང་བའི་སྐུད་པ་བཞིན། །དབྱེ་བ་འདྲེན་པ་འཕགས་ལམ་ནི། །བརྒྱད་དེ་ལྟ་རྟོག་སོགས་སོ་བཞིན། །གཞན་འདྲེན་ཞེས་པ་འདིར་ཡོད་དེ། །དེར་ནི་མེད་དོ་ལྟ་བུ་ཡིན། །དངོས་པོ་བདེན་པ་གསང་བ་དང་། །བདག་དང་གཞན་དངོས་བཞི་ཡིན་ཏེ། །བདེན་པ་དེ་ནི་དེ་བཞིན་ནོ། །གསང་བ་དེ་ནི་བཤད་མི་བྱ། །བདག་གི་དངོས་ནི་ངའི་ཁྱིམ་དེ། །ཁྱོད་ཉོས་ཟེར་བ་ལྟ་བུ་ཡིན། །གཞན་གྱི་དངོས་ནི་ཁྱེད་ཀྱི་ཁྱིམ། །དེ་ཉིད་བདག་ལ་ཚོངས་ཟེར་བཞིན། །དུས་ནི་འདས་དང་མ་འོངས་ཏེ། །འདས་པ་ན་ནི་ལོ་དེ་བཟང་། །མ་འོངས་སར་ཕོད་ལོ་དེ་ལ། །གནས་སྐོར་བྱ་འོ་ཟེར་བ་བཞིན། །ད་ལྟའི་དུས་དང་ཉེ་དངོས་ལ། །དེ་ཚབ་འདི་སྒྲ་འཇུག་པའི་དཔེ། །ད་ལོའི་དུས་འདི་ཅི་འདྲ་དང་། །ཉེ་ཁོར་མི་འདི་ལྟོས་ཞེས་བཞིན། །དེ་ལྟ་རྣམ་གྲངས་སྣ་ཚོགས་ཀྱིས། །ཕྱེས་ན་ཕྲད་རེར་གྲངས་མེད་འགྱུར། །འོན་ཀྱང་བསྡུས་ན་དེ་སྒྲ་ཡང་། །ངེས་བཟུང་ལྷག་བཅས་གཉིས་ལ་འདུས།། ༈ སྤྱི་སྒྲ་གང་སུ་ཅི་ཇི་བཞིན། །གང་ནི་ངེས་མེད་ཀུན་ལ་སྦྱར། །སུ་ནི་མིས་གཙོ་གང་ཟག་ལ། །དོན་ལ་ཅི་དང་དཔེར་ཇི་སྦྱོར། །གཙོ་བོར་འདི་ལ་གསལ་བྱེད་གྲོགས། །གང་སུ་གཉིས་ལ་ངེས་པ་མེད། །ཅི་ལ་ཞིག་སྟེ་སླད་འདྲ་ཕྱིར། །ཇི་ལ་སྙེད་སྲིད་ལྟར་བཞིན་སྐད། །གང་དཔེ་གང་འདུག་གང་བྱེད་སོགས། །སུ་དཔེ་སུ་ཡིན་སུ་བསླེབས་བཞིན། །ཅི་དཔེ་ཅི་ཞིག་ཅི་སྟེ་འགྲོ། །ཇི་དཔེ་ཇི་ལྟར་ཡིན་སོགས་བཞིན།། ༈ བདག་སྒྲ་དངོས་ནི་པོ་ཡིན་ལ། །ཆ་མཐུན་པ་བ་མ་མཁན་སོགས། །དེ་ཡང་མིང་གི་ཆ་ཤས་དང་། །བདག་སྒྲ་སོ་སོར་གོ་དགོས་ཏེ། །སྔར་ཡོད་མིང་ཡིན་གསར་སྦྱར་ཚེ། །བདག་དབང་སྟོན་པ་བདག་སྒྲ་ཡིན། །དཔེར་ན་དམར་པོ་ལག་པ་དང་། །བྱེད་པོ་ཞིང་པ་ཁྱད་ཡོད་བཞིན། །མིང་མའི་པ་བ་འཇུག་ཚུལ་ནི། །ག་ད་བ་ས་ན་མ་པ། །ང་འ་ར་ལ་མཐའ་མེད་བ། །མ་མོ་པོ་སོགས་ཅི་བདེར་འཇུག །དགག་སྒྲ་མ་མི་མིན་མེད་བཞི། །མ་མི་ཐོག་སྦྱོར་མིན་མེད་ནི། །མིང་འཇུག་དཔེར་ན་མ་མཐོང་དང་། །མི་བྱེད་ལྷ་མི་འདྲེ་མེད་བཞིན།། ༈ ཅིང་ཅེས་ཅེ་འོ་ཅེ་ན་ཅིག །ག་ད་བ་དང་དྲག་མཐར་སྦྱོར། །འདུག་ཅིང་བཤད་ཅེས་གདབ་ཅེའོ། །ཆོས་བསྟནཏ་ཅེ་ན་གནས་སྐོརད་ཅིག །ཞིང་ཞེས་ཞེ་འོ་ཞེ་ན་ཞིག །ང་ན་མ་འ་ར་ལ་དང་། །ཅིས་སོགས་ཀྱི་དོད། (ནིས་ཟི་ནི་ ཟི་ནོག ཟི་སིན བཞིག)ཡིན། མཐའ་བརྟེན་མེད་མཐར་ཐོབ་སྟེ་དཔེར། །མཐོང་ཞིང་གསན་ཞེས་གོང་བཞིན་སྦྱར། །ས་མཐར་དམིགས་གསལ་ཞེས་མ་གཏོགས། །ཤིང་ཤིག་ཤེ་འོ་ཤེ་ན་ཐོབ། །དཔེར་ན་བྱས་ཤིང་བསགས་ཞེས་དང་། ལྟོས་ཤིག་ལ་སོགས་ཤེས་པར་གྱིས།།
༈ ད་ནི་རྟགས་ཀྱི་འཇུག་པ་ཡི། །གཞུང་དོན་མདོར་བསྡུས་འཆད་པ་ལ། །སྤྱིར་བཏང་གསལ་བྱེད་སུམ་ཅུ་ཕོ། །དབྱང་བཞི་མོ་ཡིན་གསལ་བྱེད་ཀྱང་། །ཀ་ཅ་ཏ་པ་ཙ་ལྔ་ཕོ། །ཁ་ཆ་ཐ་ཕ་ཚ་མ་ནིང་། །ག་ཇ་ད་བ་ཛ་ཝ་ཞ། །ཟ་འ་ཡ་ཤ་ས་ནི་མོ། །ང་ཉ་ན་མ་ཤིན་ཏུ་མོ། །ར་ལ་ཧ་ནི་མོ་གཤམ་མོ། །ཨ་ནི་བརྡ་སྤྲོད་མང་པོ་ལས། །ཕོ་མོའི་ཐ་སྙད་མེད་པར་གསུངས།། ༈ ཤིན་ཏུ་མོ་དང་མོ་གཤམ་གཉིས། །མོ་ཡིག་ནང་དུ་བསྡུས་བྱས་ཏེ། །མོ་ཡི་ཡེ་གེ་བཅུ་དགུ་ལས། །རྗེས་འཇུག་ཡི་གེ་བཅུ་དབྱུང་བྱ།། ༈ རྗེས་འཇུག་བཅུ་པོ་དེ་ཉིད་ལས། །སྔོན་འཇུག་ཡི་གེ་ལྔ་དབྱུང་བྱ། །དེ་ཡང་ཕོ་མོ་མ་ནིང་དང་། །ཤིན་ཏུ་མོ་དང་བཞི་རུ་དབྱེ། །སྔོན་འཇུག་བ་ནི་ཕོ་ཡིག་ཡིན། །ག་དང་ད་གཉིས་མ་ནིང་དང་། །འ་ནི་མོ་དང་མ་ཡིག་ནི། །ཤིན་ཏུ་མོ་རུ་ཀུན་གྱིས་བཞེད། །སྔོན་རྗེས་མིང་གཞི་གང་ཡིན་ཡང་། །ཕོ་མོ་སོགས་ཀྱི་ཁྱད་པར་ནི། །སྒྲ་གདངས་དྲག་ལ་གྲིམ་པ་ཕོ། །གྲོམ་ལྷོད་རན་པ་མ་ནིང་ཡིན། །ཞན་ལ་ལྷོད་པ་མོ་ཡིག་དང་། །དེ་ལས་ཀྱང་ལྷོད་ཤིན་ཏུ་མོ། །ཧ་ཅང་ལྷོད་ཞན་མོ་གཤམ་སྟེ། །མི་སྐད་དཔེར་བྱས་རྣམ་གཞག་མཛད།། ༈ སྔོན་འཇུག་འཇུག་ཚུལ་རྒྱས་བཤད་ལ། །དེ་དག་རེ་རེའང་བཞིར་དབྱེ་སྟེ། །གང་གིས་འཇུག་བྱེད་གང་ལ་འཇུག །ཇི་ལྟར་འཇུག་བྱེད་ཅིའི་ཕྱིར་འཇུག། ༈ དེ་ཡང་སྔོན་འཇུག་གང་གིས་ནི། །མིང་གཞི་གང་ལ་འཇུག་ཅེ་ན། །ཕོ་ཡིག་བ་ནི་ཀ་ཅ་ཏ་ཙ་དང་། །མོ་ཡི་ག་ད་ཞ་ཟ་ཤ །ས་བཅས་བཅུ་ཡི་སྔོན་དུ་འཇུག །ང་ཇ་ཉ་ན་ཛ་ར་དྲུག །མགོ་འདོགས་སྐབས་འགར་བ་འཕུལ་ཐོབ། །སྔོན་འཇུག་མ་ནིང་ག་ཡིག་ནི། །ཕོ་ཡིག་ཅ་ཏ་ཙ་མོ་ཡིག །ཉ་ད་ན་ཞ་ཟ་ཡ་ཤ །ས་དང་བཅུ་གཅིག་སྔོན་དུ་འཇུག །ད་ནི་ཕོ་ཡིག་ཀ་པ་མོ། །ག་བ་ང་མ་དྲུག་ལ་འཇུག །མོ་ཡིག་སྔོན་འཇུག་འ་ཡིག་ནི། །མོ་ཡིག་ག་ཇ་ད་བ་ཛ། །མ་ནིང་ཁ་ཆ་ཐ་ཕ་ཚ། །བཅུ་པོ་ཁོ་ནའི་སྔོན་དུ་འཇུག །སྔོན་འཇུག་ཤིན་ཏུ་མོ་མ་ནི། །མ་ནིང་ཁ་ཆ་ཐ་ཚ་མོ། །ག་ཇ་ད་ཛ་ཤིན་ཏུ་མོ། །ང་ཉ་ན་བཅུ་གཅིག་ལ་འཇུག །སྤྱིར་ནི་འདོགས་རྐྱང་མ་གཏོགས་པ། །བརྩེགས་འཕུལ་བ་ཡིག་ཁོ་ནར་ངེས།། ༈ ཇི་ལྟར་འཇུག་པར་བྱེད་ཅེ་ན། །ཕོ་ནི་དྲག་པའི་ཚུལ་གྱིས་ཏེ། །མ་ནིང་རན་པར་འཇུག་པ་ཡིན། །མོ་ནི་ཞན་པའི་ཚུལ་གྱིས་ཏེ། །ཤིན་ཏུ་མོ་ཡིག་མ་ཉིད་ནི། །ཤིན་ཏུ་ཞན་ཅིང་ལྷོད་པར་འཇུག །མིང་གཞི་གང་ལའང་སྔོན་འཇུག་གི །འཇུག་ཚུལ་སོ་སོར་རྟོགས་པ་དཀོན།། ༈ ཅིའི་ཕྱིར་འཇུག་པར་བྱེད་ཅེ་ན། །ཕོ་ཡིག་སྔོན་འཇུག་བ་ཡིག་ནི། །བྱེད་པོ་འབྲེལ་བ་གཞིར་བཞག་སྟེ། །བྱ་བ་བྱས་ཟིན་འདས་པ་དང་། །བྱ་རྒྱུའི་དངོས་པོ་གཞན་དང་ནི། །མ་འོངས་བྱ་བ་བསྒྲུབ་ཕྱིར་འཇུག །དཔེར་ན་ལྷ་བསྒྲུབས་བསྒྲུབ་བྱ་ལྷ། །བསྒྲུབ་པར་བྱ་འོ་ཞེས་པ་བཞིན། །མ་ནིང་ག་ད་གཉིས་པོ་ནི། །བདག་གཞན་གཉིས་དང་ད་ལྟར་ཆེད། །དཔེར་ན་གཤོག་མཁན་གཤག་བྱ་ཤིང་། །གཤོག་པར་བྱེད་དོ་ལྟ་བུ་ཡིན། །མོ་ཡིག་འ་ནི་བདག་ཉིད་དང་། །མ་འོངས་ད་ལྟ་དག་ལ་འཇུག །དཔེར་ན་འཐོར་པོ་འཐོར་བྱ་ཆུ། །འཐོར་བར་བྱེད་དོ་ལ་སོགས་བཞིན། །སྔོན་འཇུག་ཤིན་ཏུ་མོ་མ་ནི། །བདག་གཞན་དུས་གསུམ་ཁྱད་མེད་འཇུག །དཔེར་ན་མཇལ་པོས་བླ་མ་མཇལ། །མཇལ་བྱ་མཇལ་བྱེད་སོགས་བཞིན་ནོ།། ༈ དུས་གསུམ་བྱ་བྱེད་བསྐུལ་ཚིག་དང་བཅས་པའི། །གྲགས་ཆེའི་དཔེར་བརྗོད་གོ་བདེར་ཅུང་ཟད་དགོད། །སྤྱིར་བཏང་འདས་ལ་བ་འཕུལ་ཡང་འཇུག་ཡོད། །མ་འོངས་པ་ལ་འཕུལ་ཡོད་ཡང་འཇུག་མེད། །ད་ལྟ་བ་ལ་བ་འཕུལ་ཡང་འཇུག་མེད། །བསྐུལ་ཚིག་ལ་ནི་འཕུལ་མེད་ཡང་འཇུག་ཡོད། །བྱ་བ་བསྒྲུབས་ཟིན་བསྒྲུབ་བྱ་སྒྲུབ་བྱེད་སྒྲུབས། །སྨན་སོགས་བསྐུས་ཟིན་བསྐུ་བྱ་སྐུད་བྱེད་སྐུས། །ཁྲི་ལ་བསྐྱོནད་ཟིན་བསྐྱོན་བྱ་སྐྱོན་བྱེད་སྐྱོནད། །ཁུར་པོ་བསྐྱལད་ཟིན་བསྐྱལ་བྱ་སྐྱོལ་བྱེད་སྐྱོལད། །ཟས་ནོར་བསྐུངས་ཟིན་བསྐུང་བྱ་སྐུང་བྱེད་སྐུངས། །ཆོས་ལ་བསྐུལད་ཟིན་བསྐུལ་བྱ་སྐུལ་བྱེད་སྐུལད། །མགྲོན་པོ་བསྐྱངས་ཟིན་བསྐྱང་བྱ་སྐྱོང་བྱེད་སྐྱོངས། །ཁ་ཏོན་བསྐངས་ཟིན་བསྐང་བྱ་སྐོང་བྱེད་སྐོངས། །ཡན་ལག་བསྐུམས་ཟིན་བསྐུམ་བྱ་སྐུམ་བྱེད་སྐུམས། །དེ་ལ་སོགས་པའི་མགོ་ལྡན་ཀུན་ལ་འགྲེས།། ༈ ད་ནི་རྐྱང་པར་འདས་ལ་བ་འཕུལ་དང་། །མ་འོངས་ག་ད་ད་ལྟར་འ་འཕུལ་གཙོ། །བསྐུལ་ཚིག་འཕུལ་མེད་ཚུལ་རྣམས་བྲི་བར་བྱ། །སྲོལ་ངན་བཀག་ཟིན་དགག་བྱ་འགོག་བྱེད་ཁོགས། །སྣོད་དུ་བཀང་ཟིན་དགང་བྱ་འགེང་བྱེད་ཁོངས། །མལ་ཆས་བཀབ་ཟིན་དགབ་བྱ་འགེབ་བྱེད་ཁོབས། །ཟུར་དུ་བཀར་ཟིན་དགར་བྱ་འགོར་བྱེད་ཁོརད། །ཡི་གེ་བཀྲམ་ཟིན་དགྲམ་བྱ་འགྲེམ་བྱེད་ཁྲོམས། །བདེ་ལ་བཀོད་ཟིན་དགོད་བྱ་འགོད་བྱེད་ཁོད། །གཡོག་ཏུ་བཀོལ་ཟིན་དགོལ་བྱ་འགོལ་བྱེད་ཁོལད། །ཤིང་སོགས་བཀས་ཟིན་དགའ་བྱ་འགོ་བྱེད་ཁོས། །བུ་ལ་བཅལ་ཟིན་གཞལ་བྱ་འཇོལ་བྱེད་ཆོལད། །དགྲ་དཔུང་བཅོམ་ཟིན་གཞོམ་བྱ་འཇོམ་བྱེད་ཆོམས། །ནང་དུ་བཅུག་ཟིན་གཞུག་བྱ་འཇུག་བྱེད་ཆུགས། །སྐེ་རགས་བཅིངས་ཟིན་གཅིང་བྱ་འཆིང་བྱེད་ཆིངས། །གྲོས་ཐག་བཅད་ཟིན་གཅད་བྱ་འཆོད་བྱེད་ཆོད། །འགྲིགས་ལ་བཅུན་ཟིན་གཅུན་བྱ་འཆུན་བྱེད་ཆུནད། །ཉེས་སྐྱོན་བཅབ་ཟིན་གཅབ་བྱ་འཆབ་བྱེད་ཆོབས། །མིག་སོགས་བཅར་ཟིན་གཅར་བྱ་འཆོར་བྱེད་ཆོརད། །དམ་དུ་བཅུར་ཟིན་གཅུར་བྱ་འཆུར་བྱེད་ཆུརད། །ཁྲིམས་སོགས་བཅས་སོ་གཅའ་བྱ་འཆའ་བྱེད་ཆོས། །ཡིད་ལ་བཅག་ཟིན་གཞག་བྱ་འཇོག་བྱེད་ཆོགས། །མཁོ་ཆས་བཅང་ཟིན་གཅང་བྱང་འཆང་བྱེད་ཆོངས། །གསོལ་བ་བཏབ་ཟིན་གདབ་བྱ་འདེབས་བྱེད་ཐོབས། །གྱེན་དུ་བཏེག་ཟིན་གདེག་བྱ་འདེགས་བྱེད་ཐེགས། །གདན་སོགས་བཏིང་ཟིན་གདིང་བྱ་འདིང་བྱེད་ཐིངས། །ལག་ཏུ་བཏད་ཟིན་གཏད་བྱ་འཐོད་བྱེད་ཐོད། །སྐྱབས་འགྲོ་བཏན་ཟིན་གདན་བྱ་འདོན་བྱེད་ཐོནད། །ཤ་སོགས་བཏུབ་ཟིན་གཏུབ་བྱ་འཐུབ་བྱེད་ཐུབས། །གོས་ཀྱིས་བཏུམ་ཟིན་གཏུམ་བྱ་འཐུམ་བྱེད་ཐུམས། །ཆུ་སོགས་བཏོར་ཟིན་གཏོར་བྱ་འཐོར་བྱེད་ཐོརད། །མི་གླང་བཏུལ་ཟིན་གདུལ་བྱ་འདུལ་བྱེད་ཐུལད། །མེ་ཏོག་བཏུས་ཟིན་གཏུ་བྱ་འཐུ་བྱེད་ཐུས། །གཞན་ལ་བཏུག་ཟིན་གཏུག་བྱ་འཐུག་བྱེད་ཐུགས། །བཟང་པོ་བཏམ་ཟིན་གདམ་བྱ་འདེམ་བྱེད་ཐོམས། །བུག་པ་ཕུགས་ཟིན་དབུག་བྱ་འབུག་བྱེད་ཕུགས། །གཏན་ལ་་ཕབས་ཟིན་དབབ་བྱ་འབེབ་བྱེད་ཕོབས། །མཆོད་པ་ཕུལད་ཟིན་དབུལ་བྱ་འབུལ་བྱེད་ཕུལད། །ཅོག་རྩེ་ཕྱིས་ཟིན་དབྱི་བྱ་འཕྱི་བྱེད་ཕྱིས། །བསྟན་པ་བཙུགས་སོ་གཟུག་བྱ་འཛུག་བྱེད་ཚུགས། །ཟོང་སོགས་བཙོངས་ཟིན་གཙོང་བྱ་འཚོང་བྱེད་ཚོངས། །གྲལ་དུ་བཙུད་ཟིན་གཟུད་བྱ་འཛུད་བྱེད་ཚུད། །གོས་སོགས་བཙེམས་ཟིན་གཙེམ་བྱ་འཚེམ་བྱེད་ཚེམས། །སྦང་མ་བཙིར་ཟིན་གཙིར་བྱ་འཚིར་བྱེད་ཚིར། །དམ་ཆོས་བཙལ་ཟིན་གཙལ་བྱ་འཚོལ་བྱེད་ཚོལད། །ཚགས་ལ་བཙགས་ཟིན་གཙག་བྱ་འཚེག་བྱེད་ཚེགས། །ཁ་སོགས་བཙུམས་ཟིན་གཙུམ་བྱ་འཚུམ་བྱེད་ཚུམས། །འོ་མ་བཞོས་ཟིན་གཞོ་བྱ་འཇོ་བྱེད་ཞོས། །མར་ཁུ་བཞུས་ཟིན་གཞུ་བྱ་འཇུ་བྱེད་ཞུས། །ཤིང་སོགས་བཞོགས་ཟིན་གཞོག་བྱ་འཇོག་བྱེད་ཞོགས། །སྐྲ་སྤུ་བཞར་ཟིན་གཞར་བྱ་འཇོར་བྱེད་ཞོར། །ལག་པས་བཟུང་ཞིང་གཟུང་བྱ་འཛིན་བྱེད་ཟུངས། །ལག་པ་བཟེད་ཟིན་གཟེད་བྱ་འཛེད་བྱེད་ཟེད། །ནད་ལ་བཟེམས་ཟིན་གཟེམ་བྱ་འཛེམ་བྱེད་ཟེམས། །དགྲ་ལ་བཟུར་ཟིན་གཟུར་བྱ་འཛུར་བྱེད་ཟུརད། །སྲོལ་ངན་བཤིག་ཟིན་གཞིག་བྱ་འཇིག་བྱེད་ཤིགས། །ནང་སྦུབས་བཤངས་ཟིན་གཞང་བྱ་འཇོང་བྱེད་ཤོངས། །མཉམ་དུ་བཤིབས་ཟིན་གཞིབ་བྱ་འཇིབ་བྱེད་ཤིབས། །མེ་ལ་བཤུར་ཟིན་གཞུར་བྱ་འཇུར་བྱེད་ཤུརད། །དེ་རྣམས་ཅིའི་ཕྱིར་འཇུག་པའི་དགོངས་དོན་དངོས།། ༈ འདི་ནས་ཞར་ཅུང་ཟད་བཤད་པར་བྱ། །དེ་ཡང་བརྗོད་བདེ་འོས་མེད་ཡིག་འབྱམས་གསུམ། །མིང་གང་བརྗོད་བདེ་ཞེ་སའི་རིགས་རྣམས་ནི། །གོང་དུ་བཀུར་ཟིན་བཀུར་བྱ་བཀུར་བྱེད་བཀུར། །བཀའ་ཡིས་བཀྱོན་ཟིན་བཀྱོན་བྱ་བཀོན་བྱེད་བཀྱོན། །གནོད་པར་བཀོན་ཟིན་བཀོན་བྱ་བཀོན་བྱེད་བཀོན། །འོད་སོགས་བཀྱེས་ཟིན་བཀྱེ་བྱ་བཀྱེ་བྱེད་བཀྱེས། །རོལ་མོ་དཀྲོལ་ཟིན་དཀྲོལ་བྱ་དཀྲོལ་བྱེད་དཀྲོལ། །ཡོས་སོགས་དཀྲུགས་ཟིན་དཀྲུག་བྱ་དཀྲུག་བྱེད་དཀྲུགས། །ཞོ་སོགས་དཀྲོགས་ཟིན་དཀྲོག་བྱ་དཀྲོག་བྱེད་དཀྲོགས། །རྡོ་སོགས་དཀྲུམས་ཟིན་དཀྲུམ་བྱ་དཀྲུམ་བྱེད་དཀྲུམས། །མགུལ་ནས་འཁྱུད་ཟིན་འཁྱུད་བྱ་འཁྱུད་བྱེད་འཁྱུད། །ཞབས་བྲོ་འཁྲབས་ཟིན་འཁྲབ་བྱ་འཁྲབ་བྱེད་འཁྲོབས། །བླ་མ་དགྱེས་ཟིན་དགྱེས་བྱ་དགྱེས་བྱེད་དགྱེས། །མི་ཡུལ་འགྲིམས་ཟིན་འགྲིམ་བྱ་འགྲིམ་བྱེད་འགྲིམས། །ཡོན་ཏན་བསྔགས་ཟིན་བསྔགས་བྱ་བསྔགས་བྱེད་བསྔགས། །བུ་ལ་གཅེས་ཟིན་གཅེས་བྱ་གཅེས་བྱེད་གཅེས། །ཚིག་ལ་འཆེལ་ཟིན་འཆེལ་བྱ་འཆེལ་བྱེད་འཆེལ། །དེ་བཞིན་ཐག་འཇུ་སྐས་ལ་འཛེག་པ་དང་། །དམན་ལ་བསྙས་དང་ལྷ་བསྙེན་དོན་གཉེར་བྱེད། །གྲོགས་དང་བསྟུན་ཏེ་བསྟོད་པ་བླ་མ་བསྟེན། །ཆུ་འཐུར་ཚུར་འཐེན་དགྲར་འཐབ་ཤིང་འཐུ་བ། །སྤོས་བདུག་ཁ་གདང་ལག་གདེངས་མཉམ་དུ་འདོངས། །འདྲེས་གནོད་ཚོད་དཔག་དར་འཕྱར་མེ་འབུད་པ། །ལྷར་དམིགས་ལས་ལ་བརྩོན་སོགས་འདས་འོངས་མེད། །གོང་སྨོས་རྣམས་ལ་ཕལ་ཆེར་ཚང་ན་ཡང་། །འོས་མེད་ཅེས་པ་དཔེར་ན་འདི་ལྟ་སྟེ། །གོས་ཀྱིས་གཡོགས་ཟིན་གཡོག་བྱ་གཡོགས་བྱེད་གཡོགས། །མདའ་དར་གཡབས་ཟིན་གཡབ་བྱ་གཡོབ་བྱེད་གཡོབས། །གཞན་ཡང་ཡིག་འབྱམས་གཏུག་བྱ་གཏུག་བྱེད་གཏུགས། །དེ་སོགས་ཞིབ་ཆ་གཞན་དུ་ཤེས་པར་གྱིས།། ༈ རྗེས་འཇུག་རྟགས་ཀྱི་འདོད་ཚུལ་ནི། །ད་བ་ས་ཕོ་དེ་ལ་ཡང་། །ས་རབ་ད་འབྲིང་བ་ཐ་མ། །ག་ར་ལ་གསུམ་མོ་ཙམ་དང་། །ང་ན་མ་གསུམ་ཤིན་ཏུ་མོ། །འ་ཡིག་མ་ནིང་གསུམ་གར་འདོད།། ༈ དེ་ཡང་ཅུང་ཟད་རྒྱས་བཤད་ན། །དེ་དག་བཅུ་པོའང་ཚུལ་བཞིས་དབྱེ། །གང་ལ་འཇུག་ཅིང་གང་གིས་འཇུག །ཇི་ལྟར་འཇུག་ཅིང་ཅིའི་ཕྱིར་འཇུག །གང་ལ་ཡེ་གེ་ཐམས་ཅད་ལ། །གང་གིས་རྗེས་འཇུག་བཅུ་པོ་ཡིས། །ཇི་ལྟར་འཇུག་པའི་ཚུལ་ལ་གཉིས། །སྒྲ་དང་དོན་གྱི་འཇུག་ཚུལ་ལོ།། ༈ དང་པོ་སྒྲ་ཡི་འཇུག་ཚུལ་ནི། །སྤྱིར་ན་ཕོ་མོ་མ་ནིང་གསུམ། །དྲག་ཞན་བར་མའི་ཚུལ་གྱིས་འཇུག །བྱེ་བྲག་སྔོན་རྗེས་མིང་གསུམ་ག །ཕོ་ཡིག་ནང་ཕྲད་དྲག་པ་དང་། །མོ་ཡིག་ནང་ཕྲད་ཞན་པ་སྟེ། །དཔེར་ན་ཕོ་ཕྲད་བཀས་ནི་བཅད། །གོས་བ་བཏབ་སྟེ་བུ་བཙས་བཞིན། །མོ་ཡིག་ནང་ཕྲད་འགོག་ཅིང་འཇོར། །འདུལ་པ་ཞུས་ཏེ་འབུལ་སོགས་བཞིན། །མོ་དང་ཤིན་ཏུ་མོ་ཕྲད་ན། །ཞན་པའི་ཞན་པར་འཇོག་པ་ཡིན། །དཔེར་ན་འགོང་པོ་འཇུན་འདེམ་བཞིན། །འདི་སྐབས་ཀློག་ཚུལ་མཁས་ན་ཤེས། །མ་ནིང་འ་ཡིག་འཇུག་ཚུལ་ནི། །ཕོ་དང་ཕྲད་ན་དྲག་པ་དང་། །མོ་དང་ཕྲད་ན་ཞན་པས་ན། །འགྱུར་བ་མ་ནིང་ཞེས་བྱ་དང་། །སྔོན་འཇུག་ཕོ་དང་མིང་གཞི་མོ། །གཉིས་ཀ་དག་དང་ཕྲད་པའི་ཚེ། །དྲག་ཞན་གཉིས་ཀའི་ཆ་ལྡན་ཕྱིར། །མཚན་གཉིས་མ་ནིང་ཞེས་པར་བརྗོད། །མ་ནིང་ཙམ་དང་ཕྲད་པ་ན། །དྲག་ཞན་གང་དང་མི་ལྡན་ཕྱིར། །མཚན་མེད་མ་ནིང་ཞེས་པ་སྟེ། །གྲོགས་ཀྱི་དབང་གིས་ཕྱེས་པ་ཡིན། །རིམ་བཞིན་ཕོ་ཕྲད་བཀའ་བཅའ་བཙའ། །མོ་ཕྲད་འགའ་འཇའ་འབའ་ལྟ་བུ། །གཉིས་ཕྲད་བཟའ་བདའ་བཞའ་དང་ནི། །མ་ནིང་ཙམ་ཕྲད་འཆའ་བཞིན་ནོ།། ༈ གཉིས་པ་དོན་གྱི་འཇུག་ཚུལ་ལ། །སྔ་མ་གང་ལྟར་གྱུར་པ་དང་། །ཕྱི་མ་གང་ལྟར་འགྱུར་པ་གཉིས། །སྔ་མ་སྔོན་འཇུག་གྲོགས་ཀྱིས་ཏེ། །དཔེར་ན་བཟུང་དང་འཛིན་པར་བྱེད། །བསྐམས་ཟིན་བསྐམ་བྱ་ལ་སོགས་བཞིན། །ཕྱི་མ་གང་ལྟར་འགྱུར་ལ་གཉིས།། ༈ དང་པོ་རྣམ་དབྱེ་འདྲེན་ཚུལ་ནི། །དཔེར་ན་ཕྱོགས་སུ་ཕྱིན་དང་ནི། །མིག་གིས་བལྟས་པ་ཤེས་ཆེད་དུ། །མེ་ནས་དུད་པའི་དངོས་པོ་བྱུང་། །ཁྱིམ་དུ་འོད་ཀྱང་ཡོད་དོ་བཞིན།། ༈ གཉིས་པ་མིང་མཐའ་འདྲེན་ཚུལ་ནི། །རྗེས་འཇུག་ཕོ་ཡིས་མིང་གཞི་ཕོ། །དེ་བཞིན་མོ་ཡིས་མོ་ཡིག་དང་། །མ་ནིང་གིས་ནི་མ་ནིང་དྲངས། །རིམ་བཞིན་དཔེར་ན་ཐབ་ཀ་དང་། །མཐིང་ཀ་དང་ནི་འདའ་ཁ་བཞིན། །སྐབས་འགར་རྟགས་མཚུངས་མིན་ན་ཡང་། །རྗོད་བདེའི་དབང་དུ་བྱས་པའང་ཡོད།། ༈ ཅི་ཕྱིར་འཇུག་པར་བྱེད་ཅེ་ན། །ཡི་གེ་འདུས་ནས་མིང་ཕྱུང་སྟེ། །མིང་འདུས་པ་ལས་ཚིག་ཕྱུང་ནས། །ཚིག་གིས་དོན་རྣམས་སྟོན་པར་བྱེད། །དེ་ཡང་མིང་ཚིག་གཞིར་གྱུར་པའི། །སྐད་ཀྱི་གདངས་ནི་ཡི་གེ་དང་། །དོན་གྱི་ངོ་བོ་སྟོན་པ་མིང་། །ཁྱད་པར་སྟོན་པ་ཚིག་ཡིན་ནོ། །དེ་འདྲའི་མིང་ཚིག་རྗོད་པ་ལས། །འཇིག་རྟེན་འཕགས་པའི་རྣམ་གཞག་དང་། །བླང་དོར་མཐའ་དག་གསལ་བྱེད་པས། །རང་རང་དགོས་དོན་ཀུན་འགྲུབ་འགྱུར།། ༈ ཞར་བྱུང་ཚིགས་བཅད་མཐར་ཉིས་ཤད། །ཀ་ག་ཤ་རྐང་ཤད་རེར་བརྩི། །ང་དང་ཤད་བར་ཚེག་རེ་དགོས། །གཞན་ལ་འབྲི་བའི་སྲོལ་མེད་དོ། །ཐིག་མགོར་ཡིག་རྡོག་གཅིག་བྱུང་ན། །སྤུངས་ཤད་གཅིག་དགོས་ཀ་སོགས་ལའང་། །ཚིགས་ལྷུག་བཅད་མཚམས་ཤད་རེ་སྟེ། །རྫོགས་ཚིག་བྱུང་ན་ཉིས་ཤད་དགོས། །བམ་པོ་ལེ་འུའི་མཚམས་དང་ནི། །སྡེ་ཚན་རྫོགས་ཚེ་བཞི་ཤད་བྱ། །འོ་འུ་འམ་གྱི་གོང་དུ་ཚེག །མེད་ན་མཉམ་འདོན་ཡོད་ན་ཕྱེ། །དང་ཀྱོག་གིས་ནི་དབུ་འཛིན་བྱེད། །ཤད་ཀྱིས་ཡིག་ཕྲེང་བར་མཚམས་འབྱེད། །འོན་ཀྱང་སྤུངས་ཤད་ཡིད་དོད་བྱེད། །སྦྲུལ་ཤད་ཀྱིས་ཀྱང་མཚམས་ཆུང་འཛིན། །ཚེག་གིས་མིང་ཡིག་སྡོམ་པར་བྱེད། །མཐའ་ཡིག་གིས་ནི་ཡིག་ཕྲེང་སྡོམ། །དེ་ལ་སོགས་པ་ཡི་གེའི་ཚུལ། །ལེགས་པར་བསླབས་ཏེ་སྤེལ་བར་བྱའོ།། ༈ སྨྲས་པ། དེང་སང་དྲི་མེད་ཐུབ་བསྟན་བཤད་སྒྲུབ་གཞུང་། །མ་ཉམས་ཇི་བཞིན་བོད་སྐད་ཡི་གེར་བཞུགས།། དེ་ཕྱིར་བོད་ཀྱི་བརྡ་སྤྲོད་གཞུང་རྣམས་ལ། །སྦྱང་པ་མཐར་ཕྱིན་མཛོད་ཅིག་སྐལ་བཟང་རྣམས།།
གཞན་ཕན་བློ་ཡིས་ངལ་བ་འདི་བགྱིས་ན། །དགེ་འདིས་འགྲོ་བའི་རྨོངས་པ་དྲུང་ཕྱུང་སྟེ།། ཇི་ལྟ་ཇི་སྙེད་མཁྱེན་པའི་ཡེ་ཤེས་ལ། །དབང་བའི་སྐལ་བཟང་མྱུར་དུ་ཐོབ་པར་ཤོག།
ཅེས་པ་འདི་ནི་གསུང་རབ་རྒྱ་མཚོས་མཛད་པའི་སུམ་རྟགས་ཚིགས་བཅད་དང་ཚིགས་ལྷུག་སྤེལ་མར་ཡོད་པ་དེ་ལ་གཞི་བྱས་ཏེ་བློར་ལེན་བདེའི་ཆེད་དུ་འཕྲིས་སྣོན་ཅུང་ཟད་དང་། དབུ་ཞབས་ཚང་མ་ཚིགས་བཅད་དུ་གསེར་དགོན་སངས་རྒྱས་བསྟན་འཛིན་གྱིས་རབ་བྱུང་བཅུ་དྲུག་པའི་ཆུ་སྟག་ལོར་བསྡེབས་པ་དགེ་ལེགས་སུ་གྱུར་ཅིག། །། ༼གོར་རྒྱལ་མངའ་འོག་གཤོར་རོང་གསེར་དགོན་བཤད་སྒྲུབ་ཟུང་འབྲེལ་གླིང་གི་ཤིང་པར་ལས་བཤུས་པའོ།།༽