Wikipedia:ཡི་སྐོར།

ཡོང་ཁུངས་Wikipedia
གནས་སྤོ། དཀར་ཆག, འཚོལ།
                    ཆུ་ཤིང་བསྟན་བཅོས
                                                                             གུང་ཐང་
      རྒྱལ་ངན་ཆབ་འབངས་གཟིར་བ་དེར།།  ནམ་ཞིག་གཡོག་ཀྱང་འཁོར་མི་འགྱུར།།  སྲན་ཕུང་དབྱུག་པས་གཏོར་ན་ཡང།།  དབྱུག་པའི་ངོས་ལ་འབྱར་མི་སྲིད།།
      ཚེར་མའི་ཤིང་ལ་བརྟེན་བྱས་ན།།   གནད་དུ་ཟུག་པའི་སྡུག་བསྔལ་སྐྱེ།།  སྐྱེ་བོ་ངན་ལ་བརྟེན་བྱས་ཀྱང།།  ཕྱི་ཕྱིར་སྡུག་བསྔལ་འབའ་ཞིག་བསྐྱེད།།
      ཕྱིན་ནང་སྨིན་དང་མ་སྨིན་པའི།།  ཨ་མྲའི་འབྲས་བུ་རིགས་བཞིར་གསུངས།།   མི་ཡང་སེམས་དང་སྤྱོད་པ་གཉིས།།  དག་དང་མ་དག་དབྱེ་བ་མང།།
      མཁས་པ་ཡོན་ཏན་ཀུན་ལྡན་དེ།།  རློམ་སེམས་མེད་པར་ཞི་ཞིང་དུལ།།  སྙེ་མའི་ཁུར་གྱི་ལྗིད་པ་ཡི།།  ལྗོན་ཤིང་རྩེ་མོ་དུད་དེ་གནས།།
      ཡོན་ཏན་མེད་པའི་སྐྱེ་བོ་དེ།།  ང་རྒྱལ་མགོ་འཕང་ཅི་ལས་མཐོ།།  འབྲས་བུའི་བཅུད་ཀྱིས་མ་བཟུང་བའི།།   ལྗོན་པ་ རེངས་པ་ཆོས་ཉིད་ཡིན་།།
      སློབ་སྦྱོང་དུས་ན་གཡེལ་བ་དེས།།  མཁས་འདོད་རེ་བ་འབྲས་མེད་ཡིན།།  མེ་ཏོག་སད་ཀྱིས་ཁྱེར་བ་ཡི།།  ཤིང་ལ་འབྲས་བུའི་རེ་བ་མེད།།
      ལོངས་སྤྱོད་མངའ་ཐང་མཉམ་ན་ཡང།། བཟང་ངན་ལས་འབྲས་ལ་སྦྱར་ན་ཤེས།།  ཕྲ་སྦོམ་མཉམ་ཡང་ཆུར་འཕངས་ན།།  ཤིང་གི་མགོ་མཇུག་ཤེས་པར་ནུས།།
      སྐྱོན་གྱིས་གོས་པར་ཆེས་སླ་སྟེ།།  ཡོན་ཏན་སློབ་པ་དེ་ལྟ་མིན།།  ཤིང་ལ་མེ་ལྕེ་མཆེད་སླ་ཡང།།  ཆུ་བོ་སོ་སོར་འགྱེས་པ་དཀའ།།
      འབྲས་ལྡན་ཤིང་གཉིས་སྦྱར་བ་ལས།།  འབྲས་བུ་ཕུང་གསུམ་འབྱུང་བ་ལྟར།།  བློ་དང་ལྡན་པ་གཉིས་འགྲོགས་ན།། སྔོན་མེད་ལེགས་པའི་བློ་གྲོས་སྐྱེ།།
      བུར་ཤིང་གཅོད་པ་རོ་ཡི་ཕྱིར།།  ཝ་སྐྱེས་གསོད་པ་པགས་པའི་སླད།།  དོན་མཐུན་འཛོམས་པ་ནོར་གྱི་དོན།།  རྒྱལ་པོར་རྒོལ་བ་འབངས་ཀྱི་ཆེད།།
      ཤིང་ལ་ཐོག་མར་ཐིག་འདེབས་ཀྱི།།  དྲས་ཤིང་བཏབས་ནས་བསྒྱུར་དུ་མེད།།  བྱ་བའི་ཐོག་མར་བསམ་དགོས་ཀྱི།། རྗེས་ནས་འགྱོད་བརྡལ་བླུན་པོའི་རྟགས།།
      དཀའ་སྤྱད་ཁུར་དུ་འཁྱེར་ནུས་ན།།  བྱ་བ་གང་ཡང་དཀའ་བ་མེད།།  ཆུ་ཡི་ནང་དུ་ཞུགས་པ་དེར།།  ཆར་གྱིས་ལྷག་པར་གནོད་མི་འགྱུར།།
      བྱ་བ་ཆེན་པོ་ཡུན་གྱིས་བསྒྲུབ།།  ངང་ཐུང་འབད་པས་མཐར་མི་ཕྱིན།།  ཀླུང་ཆེན་དལ་ཡང་རིང་འགྲོ་ལ།།  རྦ་རླབས་དྲག་ཀྱང་ཆེར་མི་འགྲོ།།
      རྒྱལ་ངན་འབངས་ཀྱི་ཟས་ནོར་ཀུན།།  འཕྲོགས་ཀྱང་ད་དུང་ལྟོགས་ཤིང་བཀྲེན།།  རྒོད་མ་ཁ་ཡིས་རྒྱ་མཚོའི་ཆུ།།  འཐུངས་ཀྱིན་རྟག་དུ་འབར་དང་མཚུངས།།
       ཁེངས་དྲེགས་གདུག་རྩུབ་ཆེ་བ་ཡི།།  དཔོན་ལ་སུ་ཡང་བརྟེན་མི་སྤྲོ།།  ཤིན་དུ་འཁྲུག་པའི་རྦ་ཀློང་དུ།།  ཉ་ལ་སོགས་ཀྱང་སྡོད་མི་བྱེད།།
    ཡངས་པའི་རྒྱལ་ཁམས་མ་མཐོང་བ།།  ས་མཐོའི་བློན་པོ་རང་མཐོང་ཆེ།།  ཁྲོན་པའི་ཆུ་ལ་འགྱིངས་པའི་ཡི།།  རུས་པའི་རྒྱ་མཚོའི་གཏམ་གྱི་ཤི།།
   ལུས་ཅན་ནང་གི་སྐྱོན་ཡོན་རྣམས།།  ཕྱི་རོལ་སྤྱོད་པས་མཚོན་ནུས་ཏེ།།  ཆུ་སྐྱར་ལྡིང་བས་ཆུ་བོ་དང།།  དུ་བ་ལས་ནི་མེར་ཤེས་བཞིན།།
   གཞན་གྱི་སྐྱོན་ཡོན་མཐོང་སླ་ཡང།།  རང་གི་སྤྱོད་ཚུལ་མཐོང་བར་དཀའ།།  མཚོ་ནང་ནམ་མཁའི་སྒྱུ་སྐར་ཀུན།། གསལ་ཡང་རང་གི་གཏིང་མ་མཐོང།།
   བསམ་ངན་གཡོ་སྒྱུའི་བྱ་བ་ནི།།  ལམ་རྒྱུག་འདྲ་ཡང་ཕུགས་སུ་འཕུང།།  ཆུ་ཀླུང་གྱ་གྱུར་བགྲོད་པ་ཡང་།།  བབས་ཀྱིས་ཐུར་ནས་ཐུར་དུ་འགྲོ།།
   དེ་བས་དགྲ་ལས་རྒྱལ་འདོད་ན།།  ཡོན་ཏན་སྒྲུབ་ལ་འབད་པར་བྱ།། ཆ་བོ་ཆེ་ལ་བརྒལ་བའི་ཐབས།།  ཐང་ནས་གྲུ་གཟིངས་འཆོས་པ་ཡིན།།
   བློ་དང་མི་ལྡན་སྐྱེ་བོ་ཡིས།།  འབྱོར་པ་རྙེད་ཀྱང་སྤྱོད་མི་ཤེས།།  ཁྱི་ནི་སྐོམ་ཡང་ཆུ་ཀླུང་ལ།།  ཧུབ་ཀྱིས་མི་འཐུང་ལྡག་པར་བྱེད།།
   ཁ་བཤད་མང་ངམ་ཉུང་ཡང་རུང།།  དགོས་དོན་ལག་དུ་བླངས་ན་གོ།།  ཆུ་ཞེང་ཆེ་ཆུང་ཅི་འདྲ་ཡང།།  ཟབ་དང་མི་ཟབ་བརྒལ་ན་ཤེས།།
   རྟག་རྒུས་བརྩོན་པ་མ་བཏང་ན།།  མི་འགྲུབ་བྱ་བ་གང་ཡང་མེད།།  ཆུ་ཐིགས་རྟག་ཏུ་འབབ་པ་ཡི།།  བྲག་གི་རི་བོ་འབིགས་ལ་ལྟོས།།