བོད་སྤྱིའི་སྣོད་བཅུད་ཀྱི་བཀོད་པ་རགས་ཙམ་གླེང་བ།

བེ་རི་འཇིགས་མེད། (༡) བོད་ཀྱི་ཡུལ་ལྗོངས་ཆགས་ཚུལ།

  དེ་ཡང་ཇི་སྐད་དུ་འཇམ་དཔལ་རྩ་རྒྱུད་ལས། ང་ནི་འདས་ནས་ལོ་བརྒྱ་ན། །ཁ་བ་ཅན་གྱི་མཚོ་བྲི་ནས།།སཱ་ལའི་ནགས་ནི་འབྱུང་བར་འགྱུར། །ཞེས་འབྱུང་བ་ལྟར་ད་ལྟའི་གྲོང་ཁྱེར་ལྷ་སའི་ལྟེ་གནས་འདི་ཉིད་གནའ་བོའི་བསྐལ་པ་ཡར་ཐོག་གི་སྐབས་སུ་ཆུས་ཁེངས་པའི་རྒྱ་མཚོ་ཡིན་ཞིང་། མིང་ལ་འོ་ཐང་སྨན་མཚོ་ཟེར་ལ་སྟོན་པ་བདེ་བར་གཤེགས་ནས་དུས་རབས་གཅིག་གི་རྗེས་ནས་མཚོ་འདི་རིམ་བཞིན་འབྲི་བའི་མགོ་ཚུགས་ཏེ། བོད་ཀྱི་རྒྱལ་ཐོག་སོ་གསུམ་པ་སྲོང་བཙན་སྒམ་པོའི་སྐབས་འོ་མཚོ་འདི་ཉིད་སྐམ་ལ་ཉེ་བའི་ཐོག་ར་ས་འཕྲུལ་སྙང་གི་གཙུག་ལག་ཁང་བཏབ་པ་ནས་མཚོ་འདི་མེད་པར་གྱུར། དེའི་བར་དུ་ལྷ་ས་ལ་འོམ་ཐང་ཞེས་འབོད་དེ་བོད་ཀྱི་རྒྱལ་ས་ཡང་དེ་ཉིད་དུ་གྱུར། མཚོ་བྲི་ནས་ར་ས་ར་མོ་ཆེའི་གཙུག་ལག་ཁང་གསར་བཞེས་གྲུབ་པ་དང་ལྷ་ས་ལ་ར་ས་ཞེས་པའི་མིང་ཐོགས། དུས་ཕྱིས་བོད་ཀྱི་ལྷ་བཙན་པོ་རིམ་པར་བཞིན་ཕེབས་པ་དག་གི་གདན་སའམ་རྒྱལ་ས་བྱས་པས་ལྷ་ས་ཞེས་པའི་མིང་འདི་བྱུང་བ་ཡིན། དེ་ལྟར་ཁ་བ་ཅན་གྱི་མཚོ་ནི་ད་ལྟའི་གྲོང་ཁྱེར་ལྷ་སའི་ལྟེ་གནས་འོ་ཐང་གི་མཚོ་ཁོ་ན་ལས་གཞན་བོད་ཀྱི་ཞིང་ཁམས་ཡོངས་རྫོགས་མཚོའི་རང་བཞིན་དུ་བསྟན་པ་མིན་པར་ལྷ་སའི་ཇོ་བོའི་དཀར་ཆག་དང་། དངོས་ཡོད་ཀྱི་རིགས་པ་གཉིས་ཀས་གྲུབ་པར་སེམས། དུས་རབས་རིག་གསར་གྱིས་དཔྱོད་པའི་སྒོ་འཕར་ཕྱེས་ནའང་ད་ལྟའི་གྲོང་ཁྱེར་ལྷ་སའི་མཚོ་བྲི་བ། བོད་ཡུལ་ཡོངས་རྫོགས་སངས་རྒྱས་འཇིག་རྟེན་དུ་བྱོན་པའི་སྐབས་སུ་མཚོའི་རང་བཞིན་དུ་མེད་པར་ནགས་ཀླུང་དང་། སྤྲ་སྤྲེལ་རྒྱུ་བའི་སྲོག་ཆགས་ཀྱི་གནས་ཞིག་ཡིན་པར་ར་འཕྲོད་ཤིན་ཏུ་གསལ་པོར་བྱེད་ནུས་པ་ཞིག་ཡིན། དེས་ན་མི་མཇེད་འཛམ་བུ་གླིང་གི་འཇིག་རྟེན་ཧྲིལ་པོ་འདིའི་ཐོག་མར་གངས་ཅན་བོད་ཀྱི་ཞིང་ཁམས་འདི་ཉིད་ཁོ་ན་ཆགས་པ་ནི། མདོ་སྔགས་ཀྱི་གསུང་རབ་དང་དེང་དུས་ཀྱི་རིག་གསར་གཉིས་ཀའི་ལམ་ནས་གྲུབ་པ་ཡིན་ཏེ། གླིང་འདི་ཐོག་མར་ཆུའི་རང་བཞིན་ཡིན་པ་དང་། དེ་རིམ་གྱིས་མཚོ་བྲི་ནས་འགྲོ་བ་མི་དང་སྲོག་ཆགས་གཞན་རྣམས་གྲུབ་པ་ཡིན་ཞིང་། མཚོ་བྲི་བའི་ཤུལ་དུ་ས་བབ་མཐོ་ཤོས་དེ་སྔོན་དུ་འབུར་ཞིང་དེ་ལ་བརྟེན་ནས་ནང་བཅུད་ཀྱི་སེམས་ཅན་ཀྱང་དེར་སྔོན་དུ་གྲུབ་པར་ཤིན་ཏུ་འཐད་པས་སོ། །

གང་ལྟར་ཡང་སེམས་ཅན་སོ་སོའི་བསམ་པས་བག་ཆགས་སོ་སོར་བཞག་པའི་ལས་སྣང་གི་ནུས་པ་བསམ་གྱིས་མི་ཁྱབ་པའི་མཐུས་དངོས་པོ་གཅིག་ཉིད་ཆེ་ཆུང་མདོག་དབྱིབས་བཟང་ངན་མི་འདྲ་བ་དུ་མར་མཐོང་བ་མངོན་སུམ་དུ་གྲུབ་པ་མངོན་པ་གོང་འོག གདགས་པ་དྲན་པ་ཉེར་གཞག ཕལ་ཆེན། མཁའ་འགྲོ་རྒྱ་མཚོ། དུས་འཁོར་སོགས་མདོ་རྒྱུད་མང་པོ་ནས་འབྱུང་བ་ལྟར་ཡིན་ལ། དུས་ཀྱི་འཁོར་ལོར་ལོངས་སྤྱོད་ཀྱི་གླིང་དྲུག་དང་། བདུན་པ་ལས་ཀྱི་ས་པ་འཛམ་གླིང་ཆེན་པོ་ནི། མཁའ་འགྲོ་རྒྱ་མཚོར། འཛམ་བུ་གླིང་ནི་ཆེན་པོ་ཡི། །དུམ་བུ་བཅུ་གཉིས་ཀྱི་ནི་དབུས། །ཞེས་ལྷོ་གླིང་འཛམ་གླིང་ཆུང་ངུ་ཤིང་འཛམ་བུ་པྲིཥས་མཚན་པ། མཆོག་ཏུ་གྱུར་པའི་རྒྱུ་མཚན་ཤར་ཕྱོགས་ན་འཕགས་པ་འཇམ་དབྱངས་ཀྱི་ཞིང་རི་བོ་རྩེ་ལྔ། །ལྷོ་ཕྱོགས་ན་དཔལ་ལྡན་འབྲས་སྤུངས་ཀྱི་མཆོད་རྟེན་དང་རི་བོ་པོ་ཏ་ལ། ནུབ་ཕྱོགས་ན་ཨོ་རྒྱན་མཁའ་འགྲོའི་གསང་མཛོད། བྱང་ཕྱོགས་ན་ཤམ་„བྷ་ལའི་གྲོང་། གངས་ལྡན་མཚོ་མ་དྲོས་པ་ནས་ཆུ་བོ་བཞི་འབབ་པ། སྤོས་ངད་ལྡན། བྲག་གསེར་གྱི་བྱ་སྐྱིབས། ཤིང་སཱ་ལ་རབ་བརྟན། གཞན་ཡང་ཡུལ་ཉེར་བཞི་དང་གནས་སུམ་ཅུ་རྩ་གཉིས། དུར་ཁྲོད་བརྒྱད་སོགས་དཔའ་བོ་མཁའ་འགྲོ་རྣམས་རང་བཞིན་གྱིས་འདུ་བའི་གནས་དང་། དུས་འཁོར་ལས། འཕགས་ཡུལ་བོད་ལི་རྒྱ་ནག་དང་། ། ཀཻ་ལ་ཤ་དང་གངས་ཅན་མཚོ། །

 ཞེས་འབྱུང་བ་ལྟར་འཛམ་གླིང་དུམ་བུ་དྲུག་བགོས་པའི་དབུས་འགྱུར་རྡོ་རྗེ་གདན་ནས་བརྩིས་པའི་བྱང་ཕྱོགས་འཛམ་གླིང་ཧྲིལ་པོའི་ཡང་ཐོག་འཇིག་རྟེན་ཐོག་མར་ཆགས་པའི་ཡུལ་གྲུ་ཁ་བ་གངས་ཅན་ལྗོངས་ཀྱི་ཞིང་ཁམས་འདི་ཉིད།ལྷུན་སྟུག་གངས་ཀྱི་རི་བོ་ཏི་སེ་དང༌། གངས་མཐོན་མཐིང་རྒྱལ་མོ། གངས་དཀར་ཤ་མེད། ཤར་གྱི་ཡར་ལྷ་ཤམ་པོ། ལྷོའི་ཕག་རི་ཇོ་མོ། ནུབ་ཀྱི་གནོད་སྦྱིན་གངས་བཟང་། བྱང་གི་གཉན་ཆེན་ཐང་ལྷ།  གནས་ཆེན་ཙ་རི་ཊ།  རོང་བཙན་ཁ་བ་དཀར་པོ། མི་ཉག་གངས་དཀར་རི་བོ། ཤར་སྟོད་ཁ་བ་ལང་རི། ཨ་མྱེས་རྨ་ཆེན་སྤོམ་ར་སོགས། མཐོ་ཞིང་བརྗིད་ཆགས་ལྡན་པའི་གངས་རིའི་ར་བས་ཕྱོགས་མཚམས་ཀུན་ནས་ཡོངས་སུ་བསྐོར་བ། ཆོས་མངོན་པར་མཛོད་ལས་མ་དྲོས་པ་ཞེས་བསྔགས་པར་བརྗོད་པ་མ་ཕམ་གཡུ་མཚོ་དང་། ཡར་འབྲོག་གཡུ་མཚོ། ཁྲི་ཤོར་རྒྱ་མོ་བྱང་གི་གནམ་མཚོ་ཕྱུག་མོ་སོགས་ཆེ་ཆུང་གཅིག་ཏུ་མ་ངེས་པའི་མཚོ་དང་མཚེ་འུ་དུ་མ་ཕྱོགས་དང་མཚམས་རྣམས་སུ་གནམ་སྔོན་བཞུས་པའི་ཁུ་བ་ལྟར་འཁྱིལ་བ། སྟོད་མ་ཕམ་གཡུ་མཚོ་ལས་སེངྒེ་ཁ་འབབ་དང་། རྟ་མཆོག་ཁ་འབབ། རྨ་བྱ་ཁ་འབབ། གླང་ཆེན་ཁ་འབབ་བཅས་ཆུ་བོ་ཆེན་པོ་བཞི་དལ་གྱིས་འབབ་ཅིང་། སྨད་དུ་གདང་ལ་རི་བརྒྱུད་ནས་རྒྱལ་མོ་རྔུལ་ཆུ་དང་། འབྲི་རྒྱུ། རྫ་ཆུ་གསུམ། མཚོ་སྐྱ་རིང་སྔོ་རིང་གཉིས་ལས་རྨ་ཆུ་སྟེ། སྨད་ཀྱི་ཆུ་བོ་ཆེན་པོ་བཞི་ལ་ཆུ་ཕྲན་དུ་མ་འདུས་ནས་འབབ་པ། གཞན་ཡང་སྤང་རི་དང་། རྫ་རི། བྲག་རི་རྣམས་སུ་རྩི་ཤིང་མེ་ཏོག་སྣ་ཚོགས་དང་། ལྗོན་ཤིང་སྣ་ཚོགས་པའི་ནགས་ཀླུང་དང་། སྨན་སྣ། ས་འོག་གཏེར་གྱི་ཁྱད་པར་དུ་མས་ཕྱུག་པ་དང་། མཁའ་རླུང་གཙང་ཞིང་གནམ་གཤིས་བསིལ་བ། འབྱུང་བཞི་མཉམ་ཞིང་འཚེ་བ་ཉུང་བ་བག་ཕེབས་པའི་ཡུལ་ཏེ་འཛམ་གླིང་གི་ཡུལ་གྲུ་གཞན་ལས་ཤིན་ཏུའང་ཁྱད་པར་འཕགས་པ་ཡིན་ཏེ། དཀོན་མཆོག་འབངས་ཀྱི་སྐྱེ་རབས་ལས། 

ཤར་རྡོ་རྗེ་གདན་གྱི་བྱང་ཕྱོགས་ན།། གནས་པུར་རྒྱལ་བོད་ཅེས་བྱ་བ་ཡོད།། རི་མཐོན་པོ་གནམ་གྱི་ཀ་བ་ཡོད།། མཚོ་དམའ་པོ་གཡུ་ཡི་མ’‘ཎྜལ་ཡོད།། གངས་དཀར་པོ་ཤེལ་གྱི་མཆོད་རྟེན་ཡོད།། སྤང་སེར་པོ་གསེར་གྱི་ལྷུན་པོ་ཡོད།། དྲི་ཞིམ་པོ་སྨན་གྱི་བ་དུག་སྤོས་ཡོད།། སྟོན་བཀྲ་བ་གསེར་གྱི་མེ་ཏོག་ཡོད།།

  དབྱར་བཀྲ་བ་གཡུ་ཡི་མེ་ཏོག་ཡོད།།ཅེས་སོགས་ཚད་མའི་ལུང་གིས་ཡང་ཡང་བསྔགས་པ་ལྟར་ཡིན་ཞིང་། དེ་ཡང་སྟོད་མངའ་རིས་སྐོར་གསུམ་རྫིང་དང་འདྲ་བ། བར་དབུས་གཙང་རུ་བཞི་ཡུར་བ་དང་འདྲ་བ། སྨད་མདོ་ཁམས་སྒང་དྲུག་ཞིང་ས་དང་འདྲ་བ་ཞེས་རྒྱ་རབས་སོ་གསུམ་པ་སྲོང་བཙན་སྒམ་པོའི་སྐབས་སུ་ཁོར་ཡུག་དང་འབྲེལ་བའི་ཐ་སྙད་དེ་ལྟར་གྲགས་པ་བྱུང་། ལྷག་པར་སྲོང་བཙན་གྱི་རིང་ལ་ས་ཁྱོན་རྒྱ་བསྐྱེད་བྱུང་བ་ལས་ཤར་གྱི་ཆང་ལེན་དང་། ལྷོ་ཡི་བལ་ཡུལ་དང་། ཆུ་བོ་གངྒཱ་ཚུན་ཆད། ནུབ་ཀྱི་ལི་ཡུལ་དང་ཀ་ཤི་སྨི་རི། བྱང་གི་སོག་པོ་སོགས་མདོར་ན་འཛམ་གླིང་སུམ་གཉིས་ཀྱི་ས་ཁྱོན་ཡོངས་རྫོགས་བོད་ཀྱི་མངའ་ཁོངས་སུ་གྱུར།