དཀྱིལ་འཁོར།

དཀྱིལ་འཁོར་ནི་བོད་ཀྱི་མཚོན་རྟགས་གཅིག་ཡིན།

མིང་འབྱུང་ཚུལ།

སྤྱིར་དཀྱིལ་འཁོར་ཞེས་པ་ནི་ལྷ་གཙོ་འཁོར་རྟེན་དང་ བཅས་པའི་བཀོད་པ་སྟེ་རྒྱལ་བ་རྡོ་རྗེ་འཆང་གིས་གདུལ་བྱའི་དབང་གིས་རྒྱུད་དེ་དང་ དེ་གསུང་བའི་སྐབས་སུ་ལྷ་དེ་དང་ དེའི་དཀྱིལ་འཁོར་གྱི་བཀོད་པ་དངོས་སུ་སྤྲུལ་ཏེ་དབང་བསྐུར་ཅིང་རྒྱུད་བསྟན། ཕུང་པོ་ལྔས་མཚོན་པའི་ཁ་དོག་ལྔ་ནི་རྣམ་པར་སྦྱངས་པ་སྟེ་དག་པ་དང༌། དག་པ་གསུམ་གྱི་རྟོགས་པ་མཐར་ཐུག་གི་དག་པས་ཐུགས་ཀྱི་ར་བ་གསུམ་དང༌། དབང་བོ་ལྔ་རྣམས་ཀྱི་དག་པས་གསུང་གི་ར་བ་ལྔ་བ་དང༌། སྟོབས་ལྔ་རྣམས་ཀྱི་རྣམ་དག་གིས་སྐུའི་ར་བ་ལྔ་སྟེ། དེ་དག་ཐུགས་གསུང་སྐུ་ཡི་དཀྱིལ་འཁོར་ལ་དེ་ལྟར་སྦྱོར་དགོས་པའོ།། གཟུངས་རྣམས་ཀྱི་དག་པས་དཀྱིལ་འཁོར་གསུམ་ག་ལ་ཡོད་པའི་ཁ་ཁྱེར་ཞེས་བྱ་བ་སྟེགས་བུ་བཞི་ཚན་གསུམ་སྟེ། ཡེ་ཤེས་ཀྱི་ཕ་རོལ་ཏུ་ཕྱིན་པ་བཅུ་རྫོགས་པ་དག་པ་ཡིས་རིན་པོ་ཆེའི་སྣམ་བུ་རིན་པོ་ཆེའི་འཚར་བུ་རྣམ་པར་བཀྲ་བ་དང༌། སྤྱོད་པས་བསྡུས་པ་དྲུག་དང༌། རྟོགས་པས་བསྡུས་པ་དྲུག འཕྲིན་ལས་ཀྱིས་བསྡུས་པ་གསུམ། ཡེ་ཤེས་ཀྱིས་བསྡུས་པ་གསུམ་སྟེ་མ་འདྲེས་པའི་ཆོས་ནི་བཅོ་བརྒྱད་ཀྱི་དག་པས་དོ་ཤལ་དང་དོ་ཤལ་ཕྱེད་པ་དཀྱིལ་འཁོར་གསུམ་པོ་དེ་རྣམས་ལ་ཡོད་པ་ཉིད་དང༌། དབང་བཅུ་བོ་རྣམས་ཀྱི་དག་པས་ཀྱང་བ་ཀུ་ལི་ཤར་བུ། དགེ་བ་བཅུ་དག་པས་ཀྲ་མ་ཤིརྵ་སྟེ་མདའ་ཡབ་ཀྱི་ཕྲེང་བ། རྣམ་ཐར་གྱི་དག་པས་དྲིལ་བུའི་སྒྲ་ནི་རྫོགས་པར་སྒྲོགས་པ། རྫུ་འཕྲུལ་གྱི་རྐང་བ་བཞི་དག་པས་མདའ་ཡབ་ཀྱི་བར་རྒྱལ་མཚན་སྣ་ཚོགས་པས་གཏམས་ཤིང་དཀྲིགས་པ། ཡང་དག་སྤོང་བ་བཞི་དག་པས་མེ་ལོང་འོད་རབ་ཏུ་འབར་བ། བྱང་ཆུབ་ཡན་ལག་བདུན་གྱི་དག་པས་རྔ་ཡབ་སྣ་ཚོགས་གཡོ་བ། གསུང་རབ་ཡན་ལག་དགུ་ཡིཧ་དག་པས་མེ་ཏོག་གི་ཕྲེང་བ་སྣ་ཚོགས་པས་བརྒྱན་པ། བསྡུ་བའི་དངོས་པོ་བཞི་བོ་རྣམས་ཀྱི་དག་པས་ནི་གཞལ་ཡས་ཁང་གི་ཟུར་དུ་སྣ་ཚོགས་རྡོ་རྗེས་བརྒྱན་པ། བདེན་པ་བཞིའི་དག་པས་རིན་ཆེན་བཞི་རྣམས་ཀྱིས་སྒོ་དང་སྒོ་ཁྱུད་མཚམས་སུ་སྤྲས་པ། མངོན་ཤེས་ལྔ་ཡི་དག་པས་རྟག་ཏུ་ནི་འོད་ཕྲེང་གི་ཟླུམ་སྐོར་ཆེན་པོ་ལྔ་ཡིས་བསྐོར་པ། སྐུ་བཞིའི་བདག་ཉིད་རྣམ་པ་ཀུན་མཁྱེན་བྱང་ཆུབ་པ་དག་པས་ཕྱི་རོལ་ཏུ་རྡོ་རྗེ་ཕྲེང་བས་ལེགས་པར་བསྐོར་པ། ཟག་མེད་ཀྱི་བདེ་བ་གཅིག་པུའི་རང་བཞིན་བུ་གནས་པ་དག་པས་ལྕགས་རི་ཡིས་བསྐོར་པ་སྟེ། ཁོར་ཡུག་ཏུ་རྡོ་རྗེའི་ཕྲེང་བ། ཡེ་ཤེས་ལྔའི་རང་བཞིན་གྱི་རྡོ་རྗེའི་མེ་ལྕེ་འབར་བས་བསྐོར་པ། ཤེས་རབ་དང་ཐབས་གཉིས་ཀྱི་ཆ་ཡི་དག་པས་ནི་ཟླ་བ་ནུབ་བཞིན་པ་དང༌། ཉི་མ་རྟག་ཏུ་འཆར་བཞིན་པ། རྡོ་རྗེ་བཞི་དག་པ་ནི་སྐུ་དཀྱིལ་གྱི་རྟ་བབས་ཀྱི་ཆོས་ཀྱི་འཁོར་ལོ་དང༌། བུམ་པ་ཆེན་པོ་དང༌། རྔ་བོ་ཆེ་དང༌། བྱང་ཆུབ་ཀྱི་ཤིང་བཞི། ཡང་རྡོ་རྗེ་བཞི་བོ་དེ་དག་དག་པ་ནི་བདེ་ཆེན་གྱི་འཁོར་ལོའི་གྲྭ་བཞིར་གནས་པའི་ཡིད་བཞིན་ནོར་བུ་དཔག་བསམ་གྱི་ཤིང༌། ཆོས་ཀྱི་གཎྜི། ཆོས་ཀྱི་དུང་རྣམས་ཏེ་དེ་ལྟར་ཤེས་པར་བྱའོ