Wikipedia:Users
༄༅།།འབྲུག་རྗེ་དགེ་ལེགས་དར་རྒྱས་གླིང་གི་ལོ་རྒྱུས་ལེགས་བཤད་གཅེས་བཏུས་ཞེས་བྱ་བ་བཞུགས་སོ།། སྤྲོས་བྲལ་ཆོས་ཉིད་ཀ་དག་ཆོས་ཀྱི་སྐུ། །ཡེ་ཤེས་ལྔ་ལྡན་ལོངས་སྤྱོད་རྫོགས་པའི་སྐུ། ། སོ་སོར་གང་འདུལ་དེར་སྟོན་སྤྲུལ་པའི་སྐུ། །སྐུ་གསུམ་བདག་ཉིད་རྡོ་རྗེ་རྒྱལ་ལ་འདུད། ། རྒྱལ་ཀུན་ཕྲིན་ལས་གཅིག་བསྡུས་ཀརྨ་པའི། །རྒྱལ་ཚབ་མཚན་གྱི་ཅོད་པན་ལེགས་འཆང་བ། ། རྒྱལ་བསྟན་གསལ་བྱེད་ཆོས་ཀྱི་སྒྲོན་མེ་མཆོག །རྒྱལ་ཚབ་ཆོས་དཔལ་བཟང་པོ་ཕྱག་གི་གནས། ། དེ་ལྟར་སྐྱབས་ཡུལ་དམ་པ་རྣམས་ལ་མི་ཕྱེད་པའི་དད་པ་ཐོབ་ཅིང་བཀའ་དྲིན་དྲན་པའི་སྒོ་ནས་མཆོད་པར་བརྗོད་པ་སྔཽན་དུ་སོང་ནས། འབྲུག་རྗེ་དགོན་དགེ་ལེགས་དར་རྒྱས་གླིང་གི་ལོ་རྒྱུས་ཅུང་ཟད་སྤྲོ་བར་བྱ་བ་ནི། ༼ས་དབྱིབས་ཆགས་ཚུལ་གྱི་སྐོར། དེ་ཡང་ལྷོ་འཛམ་བུ་གླིང་གི་ས་ཡི་ལྟེ་བ།རྒྱ་གར་རྡོ་རྗེ་གདན་ནི། དུས་གསུམ་གྱི་སངས་རྒྱས་རྣམས་མངོན་པར་སངས་རྒྱས་པའི་གནས་ཁྱད་པར་ཅན། དེའི་བྱང་ཕྱོགས་གངས་རིའི་རྭ་བས་ཕྲེང་ལྟར་ཡོངས་སུ་བསྐོར་བའི་ཞིང་མཆོག འཕགས་མཆོག་ཐུགས་རྗེ་ཆེན་པོ་སྤྱན་རས་གཟིགས་ཀྱི་གདུལ་ཞིང་དུ་གྱུར་པ། གངས་ཅན་བོད་ཀྱི་ལྗོངས་ཆེན་པོ། དེ་ལ་སྟོད་མངའ་རིས་སྐོར་གསུམ། བར་དབུས་གཙང་རུ་བཞི། སྨད་མདོ་ཁམས་སྒང་དྲུག་དང༌། ཆུ་བོར། རྨ་ཆུ། འབྲི་ཆུ། རྫ་ཆུ། རྒྱ་མོ་དངུལ་ཆུ་སྟེ་ཆུ་བཞི་སྒང་དྲུག་ཅེས་གྲགས་པའི་ནང་གི་འབྲི་ཆུའི་ཤར་བརྒྱུད་མདོ་ཁམས་ས་ཡི་ཆར། ཡུལ་སྤོ་འབོར་སྒང་དུ་གཏོགས་པའི་ལྷ་གནས་སུམ་ཅུ་རྩ་གསུམ་གྱི་ཡུལ་འདབས་དང་འདྲ་བས་ན་སུམ་ཅུའི་འདབས་པ་ཞིག་གྲགས་པའི་སར། དེང་གི་ཆར་དཀར་མཛེས་བོད་རིགས་རང་སྐྱོང་ཁུལ་དུ་གཏོགས། གནས་ཆེན་རི་བོ་འབྲུག་རྗེ་བྱ་ཁྱུང་ཞེས་པ། རྩེ་མོ་བྱ་ཁྱུང་གནམ་དུ་འཕྱོ་བ་ལྟ་བུ་མཐོ་ཞིང་བརྗིད་ཆགས་ལ་བལྟ་ན་སྡུག་པ། རི་ངོས་སུ་བཀྲ་ཤིས་རྟགས་བརྒྱད་ཀྱི་གཟུགས་རིས་གསལ་བ། རྫ་དང༌། སྤང་ལྗོངས། ནགས་ཚལ་ཕུན་སུམ་ཚོགས་པ་སོགས་ཀྱིས་བརྒྱན་པ་དེར་ཕྱོགས་ཀུན་ནས་རྩི་ཤིང་འདྲ་མིན་གྱིས་ཕྱུར་བུར་གཏམས་ཏེ་བྱ་དཀར་སོགས་བྱ་རིགས་བརྒྱ་ཕྲག་མང་པོས་སྐད་སྙན་སྒྲོགས་པ། རི་དྭགས་ཐམས་ཅད་བག་ཡངས་ཤིང་གཅན་གཟན་དང་ཆོམ་རྐུན་སོགས་ཀྱིས་འཚེ་བ་དབེན་ཞིང་ཉམས་དགའ་བ་སོགས་ལེགས་ཚོགས་ཀྱི་མཐུན་རྐྱེན་མཐའ་དག་མ་ཚང་བ་མེད་པ། གྲུབ་ཐོབ་ཁམས་པ་མི་གསུམ་གཙོས་པའི་སྔོན་བྱོན་མཁས་གྲུབ་མང་པོས་བྱིན་གྱིས་བརླབས་པའི་གནས་མཆོག་ཁྱད་པར་ཅན་དེར། འབྲུག་རྗེ་དགེ་ལེགས་དར་རྒྱས་གླིང་གི་གཙུག་ལག་ཁང་ཆེན་པོ་རྒྱབ་བྱང་དང༌། ཁ་ལྷོར་བསྟན་ནས་ཆགས་ཡོད། མདུན་དུ་སྤང་རིའི་སྟེང་དུ་མེ་ཏོག་འདྲ་མིན་དང་སྤང་སྤོས་སོགས་ཀྱི་དྲི་ཞིམ་གྱིས་ཁྱབ་པ། གཡས་གཡོན་ཕྱོགས་ཀུན་ནས་རྫ་ཆུ་དང༌། གཡའ་ཆུ། སྤང་ཆུ་སོགས་དལ་བའི་ངང་ལྷུང་ལྷུང་དུ་འབབ་ཅིང་མདུན་ཕྱོགས་ཆུ་ཆེན་འདབས་ཆུ་ཞིག་པར་འདུ་བ། གཡས་གཡོན་རྣམས་སུ་རི་ཐམས་ཅད་གཟུགས་དབྱིབས་ལེགས་པ། མདུན་ཕྱོགས་ཀྱི་རི་རྣམས་གཡུའི་གཞོང་པར་ནོར་བུ་བསྟར་བ་ལྟ་བུས་གུས་པའི་ཚུལ་དུ་བསྐོར་བ་དང༌། གཞན་ཡང་སའི་དཔྱད་པ་མཐའ་དག་ལེགས་པར་མ་ཚང་བ་མེད་པ་སོགས་ཀྱིས་ངོ་མཚར་དང་མཛེས་སྡུག་གིས་སྐྱེ་བོ་ཀུན་གྱི་ཡིད་དབང་འཕྲོག་པའི་ཡུལ་ལྗོངས་ཁྱད་པར་ཅན་དུ་སྣང་ངོ༌།། ༼སྔོན་གྱི་ཡིག་ཆ་ཁག་ལས་ཡུལ་གནས་ཀྱི་ཆེ་བ། འབྲུག་རྗེ་ཡུལ་ལྷ་དགྱེས་པའི་བསངས་མཆོད་ལས། འཛམ་གླིང་བོད་ཁམས་ཁ་བ་ཅན་གྱི་ལྗོངས། །མདོ་ཁམས་ཆོས་གླིང་སྤོ་འབོར་སྒང་གི་ཕྱོགས། །སྒྲུབ་གནས་ཁྱད་འཕགས་འབྲུག་རྗེ་གླིང་ཞེས་པར། །ཕྱི་ན་རི་བོ་རྔམས་བརྗིད་མངོན་པར་མཐོ། །ནང་དུ་གཞལ་ཡས་མཚན་ཉིད་རྫོགས་པའི་དབུས། །རང་བཞིན་ཡེ་ཤེས་རྣམ་ལྔའི་ཀློང་དཀྱིལ་དུ། །སྣ་ཚོགས་པདྨ་ཟླ་བའི་དཀྱིལ་འཁོར་སྟེང༌། །དུས་གསུམ་རྒྱལ་བའི་ཕྲིན་ལས་རྨད་བྱུང་བ། །རྡོ་རྗེ་འཆང་དངོས་ཕག་མོ་གྲུབ་ཐོབ་ལ། །བཀའ་བརྒྱུད་བླ་མ་རྣམས་དང་སངས་རྒྱས་དང༌། །ཉེ་བའི་སྲས་བརྒྱད་བྱང་སེམས་རྣམས་ཀྱིས་བསྐོར། ཅེས་དཔལ་ལྡན་ཕག་མོ་གྲུ་པའི་སྒོམ་སྒྲུབ་གནང་ཡུལ་གྱི་གནས་རི་ཡིན་པར་དངོས་སུ་བསྟན་པ་དང༌། ། ཡང་འབྲུག་རྗེ་བྱ་ཁྱུང་གི་བསངས་ཡིག་ལས། །དབུས་ཕྱོགས་མི་འགྱུར་སྤང་ཕུག་དང༌། །ཤར་ཕྱོགས་མི་འགྱུར་འབྲུག་རྗེ་དང༌། །ལྷོ་ཕྱོགས་མི་འགྱུར་རྫ་སྒོ་དང༌། །ནུབ་ཕྱོགས་མི་འགྱུར་དབུ་སྟིའི་བྲག །བྱང་ཕྱོགས་མི་འགྱུར་ཡར་སྟོད་ཀྱི། །ཞེས་པར་འབྲུག་རྗེ་དགོན་ནི་ཀརྨ་པ་སྐུ་ཕྲེང་དང་པོས་གདན་ས་བཏབ་པའི་འདབས་པ་སྤང་ཕུག་དགོན་ནས་ཤར་ཕྱོགས་རིའི་བརྒྱུད་སྤྱི་ལེ་བདུན་ཙམ་གྱི་སར་ཆགས་ཡོད། སངས་རྒྱས་ཆོས་འཕེལ་གྱིས་བྲིས་པའི་དཀར་ཆག་བསྡུས་པ་མུ་ཏིག་ཕྲེང་བ་ལས། དེ་ལ་གནས་ཀྱི་མིང་དོན་ནི། །ལྷ་ཆེན་འབྲུག་རྗེ་ཞེས་བྱ་བ། །སྟེང་ན་ཁྱུང་ཆེན་འབུམ་ལྡིང་ཞིང༌། །རྒྱབ་ནས་འབྲུག་སྔོན་མཁའ་ལ་འཕྱོ། །གཅན་གཟན་མང་པོ་རོལ་དུ་འཁྲིད། །དེ་ཡི་བདག་བཟུང་དོན་དེའི་ཕྱིར། །རི་ལ་འབྲུག་རྗེ་བྱ་ཁྱུང་གྲགས་ཞེས། རིའི་མིང་དགོན་པ་ལ་ཐོགས་པས་འབྲུག་རྗེ་དགོན་པ་ཞེས་གྲགས་སོ།། ཀརྨ་བསྟན་པའི་ཉི་མས་བྲིས་པའི་གནས་ཆེན་ཁྱུང་རི་གནམ་རྫོང་གི་གནས་ཡིག་བསྡུས་པ་མཐོང་བ་དོན་ལྡན་ལས། །འབྲུག་དགོན་ཡང་དབེན་ཁྱུང་རི་གནམ་རྫོང་ནི༔ སྔོན་བྱོན་རྒྱ་བོད་གྲུབ་ཆེན་ལོ་པན་དང༔ རྒྱལ་བ་སྲས་བཅས་བྱིན་གྱིས་བརླབས་པའི་གནས༔ ཁྱད་པར་གྲོ་ལོད་ཡང་གསང་ཐུགས་ཀྱི་གནས༔ གཏེར་ཆེན་སྔོན་བྱོན་རྣམས་ཀྱི་ལུང་ལས་གསལ་ཞེས་དང༔
ཡང་ཁོང་གིས་པདྨ་རྣམ་གྲོལ་གླིང་པ་དེ་ཉིད་ཀྱི་གཏེར་ལུང་ཞེས་པ་ལས༔ ཕག་མོའི་ཡོན་ཏན་ལྷུན་གྲུབ་གནས་ཞེས་ཡི་དམ་རྡོ་རྗེ་ཕག་མོའི་ཡོན་ཏན་གྱི་གནས་སུ་བཤད་འདུག༔
ཡང་ཁོང་གི་ལུང་ལས༔ རབ་འཕྲོས་རྡོ་རྗེ་གྲོ་བོ་ལོད༔ ཡང་གསང་བསྟན་པའི་གནས་ཀྱི་མཆོག༔ གནས་མཆོག་ཁྱུང་རི་གནམ་རྫོང་ཞེས༔ གུ་རུ་བྱིན་གྱིས་བརླབས་པའི་གནས༔ ཡི་དམ་དངོས་གྲུབ་ཀུན་འབྱུང་གནས༔ མཁའ་འགྲོ་འབུམ་གྱིས་རྟེན་གནས་ཡིན་ཞེས་རྒྱ་ཆེར་གསུང་འདུག་པ་སོགས། སྐྱེས་བུ་དམ་པ་རྣམས་ཀྱི་བྱིན་བརླབས་ཀྱིས་རྩལ་ལས་སྣང་བར་མཛད་པའི་བཀའ་དྲིན་གྱིས་བསྟན་འགྲོའི་རྒུད་པ་མཐའ་དག་ཞི་ཞིང༌། ཡིད་ཅན་རྣམས་ཀྱིས་མཐོང་བ་དང༌། ཐོས་པ། དྲན་པ་ཙམ་གྱིས་ཀྱང་དུས་དང་རྣམ་པ་ཀུན་ཏུ་འདི་ཕྱིའི་ལེགས་ཚོགས་ཀྱི་རྒྱུ་རུ་འགྲོ་བའི་གནས་མཆོག་ཁྱད་པར་ཅན་དུ་གསུངས་སོ།།
༼གྲུབ་པའི་ཕྱག་རྗེས་ཁག གཙུག་ལག་ཁང་གི་གཡོན་ཕྱོགས་སུ་ཕ་བོང་ཞིག་ལ་རྒྱ་གར་གྱི་གྲུབ་ཆེན་ཕ་དམ་པའི་ཡིན་ཞེས་པའི་དབུ་ཐོད་ཀྱི་རྗེས་ཡོད། དེ་ནི་ཕ་དམ་པ་རྒྱ་ནག་བརྒྱུད་དེ་བོད་ལ་ཕེབས་པའི་སྐབས་སུ་མིན་ནམ་སྙམ། དགོན་པའྀ་མདུན་ཕྱོགས་སུ་འདུ་ར་ཞེས་པའི་སར་ཕ་བོང་ཆེན་པོའི་སྟེང་དུ་བདེ་གཤེགས་ཕག་མོ་གྲུ་པ་གཙོས་པའི་ཁམས་པ་མི་གསུམ་གྱི་ཡིན་པར་གྲགས་པའི་ཞབས་རྗེས་མང་དུ་མཇལ་རྒྱུ་ཡོད་པ་དེ་དག་ནི། བྱིས་པ་ལོ་བཅུ་དྲུག་ཡས་མས་ཁག་ཅིག་གིས་འདམ་དུ་བརྫིས་པ་ལྟར་ད་ལྟ་ཤིན་ཏུ་གསལ་པོ་དང་མང་པོ་མཇལ་རྒྱུ་འདུག རྒྱལ་གཞི་འཕྲང་འགག་འདབས་ཆུའི་འགྲམ་དུ་སློབ་དཔོན་པདྨ་འབྱུང་གནས་ཀྱིས་འདྲེ་སྲིན་འདུལ་ནས་ཕ་བོང་གི་ཐོག་ཏུ་དབུ་ཞྭའི་རྗེས་དང༌། སྐུ་རྒྱབ་ཀྱི་རྗེས། སློབ་དཔོན་པདྨ་འབྱུང་གནས་ཀྱི་སྐབས་སུ་མིན་ནམ་སྙམ་པའི་མཎི་རྡོ་བརྐོ་སོགས་མཇལ་རྒྱུ་ཡོད་དོ། །རྒྱལ་གཞི་མཁར་ནག་ཁང་ཤུལ་གཡས་ཕྱོགས་གཞུང་ལམ་གྱི་ཟུར་དུ་རྗེ་ཀརྨ་པའི་ཞབས་རྗེས་དང༌། ད་དུང་འབྲུག་རྗེ་དགོན་པའི་ཉེ་འཁོར་དུ་ཞབས་རྗེས་དང་ཕྱག་རྗེས་སོགས་མང་པོ་མཇལ་རྒྱུ་འདུག་པ་རྣམས་ནི་རྗེ་ཀརྨ་པ་སྐུ་ཕྲེང་ན་རིམ་རྣམས་ཀྱི་ཡིན་པར་སྣང༌། མ་ཟད་དེང་སང་མདོ་ཁམས་ཕྱོགས་སུ་སྐད་གྲགས་ཆེ་བ་གནས་ཆེན་གངས་དཀར་རིགས་གསུམ་མགོན་པོའམ་འདབས་པའི་ཉིན་སྟེང་ཡང་ཐོག་མར་གནས་སྒོ་འབྱེད་མཁན་ཀྱང་རྗེ་ཀརྨ་པ་ཡིན་པའི་གནས་ཡིག་ཅིག་ཀྱང་སྔར་ཡོད་ཀྱང་ད་ལྟ་མི་མངོན་པའི་དབྱིངས་སུ་ཡལ་ནས་ལག་སོན་མ་བྱུང༌། གཞན་པ་ཡང་སྟེང་དགོན་པའི་འོག་ཏུ་གླིང་སྟོད་གྲོང་དུ་ཞབས་རྗེས་ཞིག་འདུག་པར་དེ་ཡང་རྗེ་ཀརྨ་པའི་རེད་ཅེས། ཡང་སྟེང་དགོན་གྱི་མཆོག་སྤྲུལ་སྐུ་ཞབས་རྒྱལ་མཚན་གྱིས་སེ་ར་འགོ་ཚང་གི་བུ་ཐོ་ལ་གསུང་འདུག འབྲུག་དགོན་གཙུག་ལག་ཁང་ནས་སྤྱི་ལེ་གསུམ་ཙམ་གྱི་སར། དཔལ་ཆེན་རྡོ་རྗེ་ཕུར་པའི་གནས་སེང་ལྕམ་གངས་རྭའི་ཕུག་ཏུ་ཀཱི་ལི་ཀཱི་ལའི་རང་བྱོན་དང༌། སྤང་ལྗོངས་ཀྱི་དཀྱིལ་དུ་དྭངས་ཤིང་ཡིད་དུ་འོང་བའི་མཚོ་དང༌། རྫ་རི་དང༌། རྩི་ཤིང་གི་གསེབ་ཏུ་བྲག་ལས་གྲུབ་པའི་སྒྲུབ་ཕུག་སོགས་ཡོད། ཁྲག་འཐུང་དཔལ་གྱིས་བྲིས་པའི་གནས་མཆོག་སེང་ལྕམ་གངས་རྭའི་བསང་མཆོད་ཕྲིན་ལས་མྱུར་འགྲུབ་ལས། ཀྱེ༑ མདོ་ཁམས་གནས་མཆོག་སེང་ལྕམ་གངས་ཀྱི་རིར༔ ཕྱི་ལྟར་ས་རྡོ་རི་བྲག་རྫ་ཤིང་མཚོ༔ གསང་བ་བྷན་དྷའི་གཞལ་ཡས་མཚན་རྫོགས་དབུས༔ པད་ཉི་བྲག་ཆེན་ཏི་ར་གན་རྐྱལ་སྟེང༔ ནང་དུ་དཔལ་ཆེན་རྡོ་རྗེ་གཞོན་ནུ་མཐིང༔ ཞལ་གསུམ་གཡས་དཀར་གཡོན་དམར་དབུས་མཐིང་རྔམ༔ ཕྱག་དྲུག་རྡོ་རྗེ་རྩེ་དགུ་རྩེ་ལྔ་དང༔ མེ་དཔུང་ཁ་ཊཾ་མཐའ་གཉིས་ཕུར་བུ་འདྲིལ༔ ཡུམ་མཆོག་འཁོར་ལོ་རྒྱས་འདེབས་གྲི་བྷཱན་འཁྱུད༔ ཡབ་ཡུམ་དུར་ཁྲོད་དཔལ་གྱི་ཆས་བརྒྱད་རྫོགས་ཞེས་གསུངས། དེའི་ཅུང་མི་རིང་བའི་སར་རྒྱལ་གཞི་གྲོང་ཚོ་རུ་ཁག་དང་པོའི་ཡུལ་ལྷའམ་གནས་རིར་གྲགས་པའི་འཛུམ་བྲག་ཅེས་པར་རྩི་ཤིང་ནགས་ཚལ་ཕུན་སུམ་ཚོགས་པའི་བྲག་རིའི་སྟེང་དུ་རྗེ་ཀརྨ་པ་ཆོས་དབྱིངས་རྡོ་རྗེས་སྒོམ་སྒྲུབ་གནང་སའི་སྒྲུབ་ཕུག་དང༌། གཅན་གཟན་སྟག་དང་དེ་བཞིན་རི་དྭགས་རྣམས་ལ་རྩམ་ཕྱེའི་ཐུག་པ་ཟས་སྦྱིན་གནང་ས་རྡོའི་གཞོང་པ། དེ་བཞིན་སྤང་ཕུག་དགོན་པ་ལས་རྒྱང་ཐག་སྤྱི་ལེ་ལྔ་ཙམ་གྱི་སར་གཞི་བདག་རྒོད་ཚང་ཞབས་ཀྱི་ལམ་ཟུར་དུ་བྲག་གི་དཀྱིལ་དུ་ཤྭ་བའི་གཟུགས་བརྙན་གྱི་ཕྱག་བྲིས། ཡི་གེ་ཨ་དང༌། བསྲོ་ཚང་གྲོང་ཚོ་གཉིས་པ་བེ་ར་གེ་ཏེ་རུ་རྗེ་ཀརྨ་པ་བཅུ་དྲུག་པ་ཆེན་པོའི་ཞབས་རྗེས་བཅས་མཇལ་རྒྱུ་མང་ངོ༌། །དགོན་པའི་ཞབས་སུ་ཕ་བོང་ཞིག་གི་སྟེང་དུ་རྒྱལ་ཚབ་ཆོས་དཔལ་བཟང་པོའི་ཕྱག་ཆས་བཀལ་སའི་མཛོའི་རྨིག་རྗེས་ཡོད་པ་མ་ཟད། གཞན་ཡང་རྒྱལ་གཞིར་རྨུག་སྟེང་ཚང་གི་ཁང་པའི་རྟ་རྭར་རྡོ་ཆེན་གཅིག་གི་སྟེང་དུ་ཆིབས་རྟས་རྨིག་རྗེས་སོ་སོར་བཞག་པ་གཉིས། མཁར་ནག་ཁང་ཤུལ་དུ་རྡོ་ལེབ་ཁག་གཉིས་ཀྱི་སྟེང་དུ་མཛོའི་རྨིག་རྗེས་འདམ་དུ་བརྫིས་པ་ལྟ་བུ་རེ་དང༌། རྒྱལ་གཞི་གྲོང་ཚོ་གསུམ་པའི་ནང་དུ་ཆིབས་རྟ་འདོག་སའི་ཕ་བོང་ཞིག་ལ་ཐག་པའི་ཤུལ་ཤིན་ཏུ་གསལ་ཁ་ཅན་དང༌། རྒྱལ་གཞི་གྲོང་ཚོ་བཞི་པའི་ཡུལ་ལྷ་གསང་བྱོན་གྱི་ཉེ་འཁྲིས་སུ་ཁན་མཚོ་སྟེང་མ་ཁར། ཕ་བོང་གི་ཐོག་ཏུ་རྡོ་ལས་བཟོས་པའི་བཞུགས་ཁྲི་དང༌། སྒང་གཟེར་སྟེང་དུ་ཞབས་རྗེས། ཚེ་རིང་མ་ལའི་རྒྱབ་ཏུ་སྤང་ཁོག་ཚར་བརྒྱན་དུ་ཕ་བོང་ཞིག་གི་ཐོག་ཏུ་ཞབས་རྗེས་སོགས་མཇལ་རྒྱུ་ཡོད་པ་རྣམས་ནི་རྒྱལ་ཚབ་སྐུ་ཕྲེང་བརྒྱད་པ་ཆོས་དཔལ་བཟང་པོའི་ཡིན་པར་གྲགས་འདུག་གོ །
རྗེ་ཀརྨ་པ་རང་བྱུང་རིག་པའི་རྡོ་རྗེ་མཆོག་གིས་བསྭོ་ཚང་གྲོང་ཚོ་དང་པོར་བེ་ར་གེ་ཏེཻ་ལ་ཕ་བོང་ཞིག་གི་ཐོག་ཏུ་ཞབས་རྗེས་བཞག སྤང་ཕུག་དགོན་པའི་ཆོས་རྭར་སི་ཏུ་པདྨ་དབང་མཆོག་གི་ཆིབས་རྟའི་རྨིག་རྗེས་བཅས་ཡོད། རྒྱལ་ཚབ་བཅུ་གཉིས་པ་འབྲུག་དགོན་དུ་ཕེབས་སྐབས་བསྭོ་ཚང་གྲོང་ཚོ་རུ་ཁག་གཉིས་པ་བེ་ར་གེ་ཏེ་ཞེས་པའི་ཕེབས་ལམ་དུ་རྡོ་ཆེན་པོ་གཅིག་གི་སྟེང་དུ་ཆིབས་རྟས་རྨིག་རྗེས་བཞགཔ་གསལ་པོ་ཞིག་མཇལ་རྒྱུ་འདུག ཀརྨ་པ་སྐུ་ཕྲེང་ན་རིམ་ཕལ་ཆེ་བ་འདབས་པ་ཕྱོགས་སུ་ཆིབས་བསྒྱུར་བསྐྱངས་མྱོང་བ་རྣམས་ནི། ད་ལྟ་སྤང་ཕུག་དགོན་པའི་རྒྱབ་ཏུ་བྲག་གི་ངོས་སུ་རྒྱལ་དབང་ཀརྨ་པ་སྐུ་ཕྲེང་ན་རིམ་གྱིས་བྲིས་བར་གྲགས་པའི་ཡི་གེ་རེ་རེ་ནས་མཇལ་རྒྱུ་འདུག་གོ།།
༼སྔོན་གྱི་བྱུང་རབས་དང་གདན་ས་བཏབ་ཚུལ། དགོན་པ་འདི་ཉིད་ཐོག་མར་ཆགས་བཏབ་མཁན་ཡོངས་གྲགས་སུ་བདེ་གཤེགས་ཕག་མོ་གྲུ་པ་ཡིན་པར་འདོད། ཁོང་ནི་མདོ་ཁམས་འབྲི་ཆུའི་བརྒྱུད་རྨེ་ཤོད་ཀྱི་རྟག་ངོས་སབ་ཁང་དུ་སྐུ་འཁྲུངས། མཁན་པོ་ཚུལ་ཁྲིམས་འབར་དང་སློབ་དཔོན་ལྡིང་ངེ་འོད་ཟེར་རྒྱལ་མཚན་གཉིས་ལས་དགུང་ལོ་དགུ་བཞེས་པའི་ཚེ་རབ་ཏུ་བྱུང༌། མཚན་རྡོ་རྗེ་རྒྱལ་པོར་གསོལ། ཁམས་སུ་ལོ་བཅུ་དགུ་ལྷག་ཙམ་བཞུགས་རིང་བླ་མ་བཅུ་དྲུག་ཙམ་བསྟེན་ཅིང་མདོ་སྔགས་ཀྱི་ཆོས་མང་པོ་གསན། དགུང་ལོ་བཅུ་དགུ་ལ་དབུས་ཕྱོགས་སུ་ཕེབས། བཀའ་གདམས་གྱི་དགེ་བཤེས་མང་པོའི་མདུན་ནས་ཆོས་གསན། དགུང་ལོ་ཉེར་ལྔ་ལ་བྱ་འདུལ་བ་འཛིན་པ་མཁན་པོ་དང༌། དགེ་བཤེས་རྒྱ་དམར་གྱིས་ལས་སློབ་དང༌། ཨར་གྱིས་གསང་སྟོན་མཛད་དེ་བསྙེན་པར་རྫོགས། དེབ་ཐེར་སྔོན་པོ་དང༌། འབྲུག་རྗེ་དགོན་གྱི་དཀར་ཆག་བསྡུས་པ་མུ་ཏིག་ཕྲེང་བ་སོགས་ལས་དགུང་ལོ་བཅུ་དགུར་དབུས་སུ་བྱོན་ཞེས་དང༌། དེ་མིན་དཔའ་བོ་གཙུག་ལག་ཕྲེང་བའི་ཆོས་འབྱུང་མཁས་པའི་དགའ་སྟོན་སོགས་ལས་དགུང་ལོ་ཉེར་གཉིས་ལ་དབུས་སུ་བྱོན། ཞེས་བྲིས་འདུག་གང་ཡིན་དཔྱད་པར་ཞུ། གཞན་ཡང་བླ་མ་མང་པོའི་དྲུང་ནས་གསང་སྔགས་ཀྱི་ཆོས་མང་པོ་གསན། དགུང་ལོ་ཞེ་གཅིག་ལ་བླ་མ་ཞང་དང་མཉམ་དུ་ཆོས་རྗེ་སྒམ་པོ་པ་མཇལ་བར་ཕེབས། དེའི་དྲུང་དུ་ཆོས་མཐའ་ཡས་པ་གསན་ཏེ་ལོ་གསུམ་ཙམ་བཞུགས། ཕྱག་རྒྱ་ཆེན་པོའི་རྟོགས་པ་མངོན་དུ་གྱུར། སྔར་གྱི་རྟོགས་པ་ཐམས་ཅད་ཕྱི་ཤུན་དང་སྦུན་པ་ལྟར་གཟིགས། རྗེ་སྒམ་པ་པའི་ལུང་སྟོན་ལྟར། ཀུན་བཟང་ནགས་ཁྲོད་དུ་༼ལྷོ་ཁ་ཕྱོགས་སུ༽གདན་ས་བསྐྱངས་ནས། སློབ་མ་རྣམས་ལ་བརྡ་དང་རྣམ་འགྱུར་བསྟན་པ་ཙམ་གྱིས་རྟོགས་པ་སྐྱེས་ཤིང་གྲོལ་བ་མང་དུ་བྱུང༌། བཀའ་བརྒྱུད་ཆུང་བརྒྱད་དུ་གྲགས་པ་ཡང་ཁོང་གི་སློབ་མ་དག་ལས་བྱུང་བ་ཡིན་ནོ། ། སི་ཏུ་པདྨ་དབང་མཆོག་གིས་མཛད་པའི་འབྲུག་རྗེ་བྱ་ཁྱུང་གི་བསང་ཡིག་ཡུལ་གནས་གཞི་བདག་གི་བསངས་མཆོད་ཅེས་པ་ལས་དཔལ་ལྡན་ཕག་མོ་གྲུ་པའི་གདན་ས་འབྲུག་དར་རྒྱས་ཆོས་གླིང་ཞེས་དང༌།
ཛེ་སྨད་སྤྲུལ་སྐུ་བློ་བཟང་དཔལ་ལྡན་བསྟན་འཛིན་ཡར་རྒྱས་ཀྱིས་མཛད་པའི་འདབས་ཡང་སྟེང་པའི་ལོ་རྒྱུས་ལས་འགྲོ་མགོན་ཕག་མོ་གྲུ་པ་རྡོ་རྗེ་རྒྱལ་པོས་འབྲུག་རྗེ་དགོན་པ་བཏབ་ཅེས་བྲིས་སྣང༌ངོ།།
སངས་རྒྱས་ཆོས་འཕེལ་གྱིས་བྲིས་པའི་འབྲུག་རྗེ་དགོན་གྱི་དཀར་ཆག་བསྡུས་པ་མུ་ཏིག་ཕྲེང་བ་ལས་དབུས་སུ་ཕེབས་གྲུབ་ནས་དེ་རྗེས་གནས་འདི་ཉིད་དུའང་ཞབས་ཀྱིས་བཅག་ཤིང་བྱིན་གྱིས་བརླབས་ནས་འགྲོ་བ་རྣམས་སྨིན་པ་ལ་བཀོད་ཅེས་གསུངས། དེས་ན་འབྲུག་རྗེ་དགོན་པ་ནི་ཕག་གྲུ་དབུས་ནས་མར་ཕེབས་གྲུབ་སྟེ་བཞེངས་པར་གསལ། དེ་མིན་ཕག་གྲུ་རྡོ་རྗེ་རྒྱལ་པོ་འདིེར་ཕེབས་ཚུལ་དངོས་སུ་ལོ་རྒྱུས་གཞན་དག་ཕྲན་གྱིས་མཇལ་མྱོང་མེད་ནའང་སྔར་རྒན་རབས་རྣམས་ཀྱི་ངག་ལམ་ལས་ཐོས་པ་ནི། གྲུབ་ཐོབ་ཁམས་པ་མི་གསུམ་འདབས་པར་ཞབས་སོར་བཀོད་ནས། རྗེ་ཀརྨ་པ་དུས་གསུམ་མཁྱེན་པས་སྤང་ཕུག་དགོན་པ་ཕྱག་བཏབ། བདེ་གཤེགས་ཕག་མོ་གྲུ་པས་འབྲུག་རྗེ་དགོན་པ་ཕྱག་བཏབ། གསལ་སྟོང་ཤོ་སྒོམ་གྱིས་གནས་སྒོ་ས་གནོན་ལྷ་རྟེན་ཁང་རྟེན་དང་བརྟེན་པར་བཅས་པ་རྫུ་འཕྲུལ་གྱིས་བཞེངས། གཞན་ཡང་བྱ་སྐྱ་ལུང་པའི་འདབས་སུ་དེང་སང་དགོན་ཤུལ་དགོན་སྒོག་ཅེས་པ་ཞིག་འདུག་པར། དེ་ཡང་གསལ་སྟོང་ཤོ་སྒོམ་གྱིས་ཕྱག་བཏབ་པར་གྲགས། ད་ལྟ་ཡང་སྟེང་དགོན་པའི་ཞབས་སུ་གླིང་སྟོད་གྲོང་ཚོར་དགོན་ཤུལ་ཆེན་པོ་ཞིག་འདུག་པ་དེ་ཡང་གསལ་སྟོང་ཤོ་སྒོམ་གྱིས་བཏབ་པ་མིན་ནམ་སྙམ། དེ་ནི་སྔར་འདབས་པར་བཀའ་བརྒྱུད་ཀྱི་དགོན་སྡེ་ཆེ་ཤོས་ཤིག་ཡིན་པར་ཛེ་སྨད་སྤྲུལ་སྐུ་བསྟན་འཛིནཡར་རྒྱས་ཀྱིས་བྲིས་འདུག དུས་རབས་བཅུ་བདུན་པའི་ནང་ཚན་དུ་ཡང་སྟེང་དགོན་པར་ཟླ་བསྒྲིལ་གྱིས་དགེ་ལུགས་དགོན་པར་གྱུར། གནས་སྒོ་ས་གནོན་ལྷ་ཁང་ནི། གསའ་ནང་གྲོང་ཚོར་གངས་འབར་རི་འདབ་ཏུ་སྤང་རི་ཆུང་ངུ་ཞིག་གི་ཐོག་ཏུ་ཆགས་ཡོད། སྐབས་དེ་དུས་འབྲུག་རྗེ་དགོན་པ་ནི་རི་ཁྲོད་ལྟ་བུ་དགོན་པ་ཆུང་ངུ་ཞིག་ལས་མེད་པར། ད་ལྟ་རྒྱལ་གཞི་རྨུག་སྟེང་ཚང་གི་གྲྭ་ཤག་གི་ཉེ་འཁོར་དུ་ཡོད་འདུག དེ་དུས་དགོན་པ་འཛིན་སྐྱོང་སྤེལ་གསུམ་སོགས་རྒྱལ་གཞི་གྲོང་ཚོ་རུ་ཁག་གསུམ་པ་ནང་དུ་དགའ་བ་ཚང་གི་སྒྲུབ་བླ་མངོན་དགའ་དང་བསམ་གཏན་ཚང་གི་སྒྲུབ་བླ་གཉིས་ཀྱིས་གནང་འདུག དེའི་རྗེས་སུ་དགོན་པའི་གཙོ་འགན་ཡོངས་རྫོགས་སངས་རྒྱས་ཆོས་འཕེལ་གྱིས་བཞེས་མཛད། སངས་རྒྱས་ཆོས་འཕེལ་ནི་བསྭོ་ཚང་གྲོང་ཚོ་དང་པོར་ཨ་ཀྲོང་ཚང་གི་ནང་དུ་སྐུ་འཁྲུངས་ཤིང༌། ཆུང་དུས་སུ་ལི་ཐང་དགོན་ཆེན་ཐུབ་བསྟན་བྱམས་ཆེན་གླིང་གི་གྲྭ་སར་བཅུག དེར་བཞུགས་འདོད་མི་གནང་བར་ཉིན་རྟག་པར་ཁྱིམ་དུ་ཕག་རྫིར་འགྲོ་དགོས་སོགས་གསུང་པར་བརྟེན་ཕ་ཡུལ་དུ་ཕྱིར་སློག སླར་སྡེ་དགེ་དཔལ་སྤུངས་ཀྱི་གྲ་སར་འཛུལ་ཏེ་རིག་པའི་གནས་མཐའ་དག་ལ་སྦྱང་པ་དཔྱིས་ཕྱིན་པར་མཛད་དེ། འབྲུག་རྗེ་དགོན་དུ་ཕེབས་ཏེ་རླབས་ཆེན་གྱི་འཕྲིན་ལས་རྒྱས་ཞིང་དགེ་འདུན་གྱི་སྡེ་བསྐྱངས། དེ་དུས་འབྲུག་རྗེ་དགོན་དུ་གྲྭ་པ་བཅུ་གསུམ་ལྷག་ཙམ་ལས་མེད་པར་གྲགས། གྲ་པ་རྣམས་ལ་ཁོང་གསུམ་ཡུལ་མིའི་ཁྱིམ་དུ་སྐུ་རིམ་ལ་ཕེབས་པའི་འབུལ་བ་དང་གཞན་ཟང་ཟིང་གི་རྒྱུ་ནོར་གང་རྙེད་པ་སོགས་ཀྱིས་གྲ་པ་རྣམས་ལ་འཚོ་བའི་མཐུན་རྐྱེན་དང༌། འབྲུག་རྗེ་དགོན་གྱི་ནང་རྟེན་ཀྱང་བཞེངས་པར་གྲགས་སོ།།
༼བར་གྱི་དར་རྒྱས་ཇི་ལྟར་བྱུང་ཚུལ། སངས་རྒྱས་ཆོས་འཕེལ་གྱིས་འཇང་ཡུལ་ནས་མཚུར་ཕུ་ཀན་ཏིང་ཏཱའི་གོ་ཤྲི་རྒྱལ་ཚབ་པ་ཆོས་དཔལ་བཟང་པོ་གདན་དྲངས། འབྲུག་རྗེ་དགེ་ལེགས་དར་རྒྱས་གླིང་གི་བསྟན་པའི་བདག་པོར་མངའ་གསོལ་ཞིང༌། གཙུག་ལག་ཁང་ཀ་རིང་གཉིས་ཅན་རྟེན་དང་བརྟེན་པར་བཅས་པ་གསར་བཞེངས་ལེགས་པར་གྲུབ་པའི་རབ་གནས་ཀྱིས་མེ་ཏོག་འཐོར། འབྲུག་རྗེ་དགོན་གྱི་སྒྲུབ་མཆོད་དང༌། ཆོ་གའི་ཕྱག་ལེན། གཏོར་བཟོ་དཀར་རྒྱན། འདོན་རྟ་དབྱངས་སོགས་དགེ་འདུན་གྱི་སྡེ་རྣམས་ལ་བཅའ་ཁྲིམས་དང་བཅས་པ་ཀཾ་ཚང་རང་ལུགས་མཚུར་ཕུ་མཆོད་ཁང་གོང་གི་ལུགས་སུ་སྲོལ་གཏད། སངས་རྒྱས་ཆོས་འཕེལ་གྱིས་བྲིས་པའི་དཀར་ཆག་བསྡུས་པ་མུ་ཏིག་ཕྲེང་བ་ལས། །ཆོས་གྲའི་མིང་ལ་སྔོན་གཏམ་ལས། །བཀྲ་ཤིས་དར་རྒྱས་གླིང་ཞེས་བགྱི། །འཇམ་མགོན་སི་ཏུས་གནང་བ་མངོན། །དེ་ནི་དྲིས་པའི་ལན་ཡིན་ནོ་ཞེས། གསུངས་པ་དང་མཛད་བྱང་གི་མཐར་དགེ་ལེགས་དར་རྒྱས་གླིང་དུ་ཤཀྱཱ་དགེ་སློང་སངས་རྒྱས་ཆོས་འཕེལ་གྱིས་བྲིས་ཞེས་གསལ། དེ་སྔོན་དགོན་པ་རྙིང་པར་མཚན་བཀྲ་ཤིས་དར་རྒྱས་གླིང་ཞེས་འདུག་ཀྱང༌། གཙུག་ལག་ཁང་གསར་པར་མཚན་དགེ་ལེགས་དར་རྒྱས་གླིང་ཞེས་གསོལ་གནང་མཛད་དེ་དགེ་འདུན་གྱི་སྡེ་བཅུ་ཕྲག་བརྒྱད་ཙམ་འཕེལ་རྒྱས་བྱུང༌། རྒན་རབས་རྣམས་ཀྱི་ངག་རྒྱུན་དུ་འབྲུག་རྗེ་བླ་གྲ་བརྒྱད་བཅུ་ཞེས་པའང་དུས་དེ་ནས་བྱུང་བར་འདུག སངས་རྒྱས་ཆོས་འཕེལ་གྱིས་རྒྱལ་ཚབ་ཆོས་དཔལ་བཟང་པོ་རྩ་བའི་བླ་མར་དངོས་སུ་བརྟེན་ཏེ་འབྲུག་རྗེ་དགོན་གྱི་འདོན་ཆ་དང་དཔེ་མཛོད་ཀྱི་པར་ཤིང་དུའང་བཀའ་བརྒྱུད་བླ་ཕྲེང་རྣམས་སུ་གཽ་ཤྲི་ཆོས་དཔལ་བཟང་པོ་བཞག་པ་མ་ཟད་ད་ལྟའང་འབྲུག་རྗེ་དགོན་དུ་དགེ་འདུན་པ་རྣམས་ཀྱིས་བླ་ཕྲེང་ཁོངས་སུ་འདོན་སྲོལ་འདུག གཞན་སྒྲུབ་སྡེ་ཞིག་ཀྱང་གསར་འཛུགས་གནང་ནས་ཀཾ་ཚང་རང་ལུགས་ཀྱི་དབང་ལུང་མན་ངག་གི་ཁྲིད་དང༌། དགེ་ཚུལ་སློང་གི་སྡོམ་པ་དང༌། བྱང་ཆུབ་སེམས་ཀྱི་སྡོམ་པ་བཅས་གནང་སྟེ་ཡུན་རིང་གདན་ས་བསྐྱངས། དེ་སྔོན་བར་སྐབས་ཞིག་བསྭོ་ཚང་གྲོང་ཚོ་དང༌། རྒྱལ་གཞི་གྲོང་ཚོ་སོགས་ཀྱིས་ཕྲུ་གུ་རྣམས་སྤང་ཕུག་དགོན་དང༌། ལི་ཐང་དགོན་པ། དེ་བཞིན་ཡང་སྟེང་དགོན་པ་སོགས་སུ་གྲྭ་པ་བཟོ་སྲོལ་ཡོད་ཀྱང༌། རྒྱལ་ཚབ་ཆོས་དཔལ་བཟང་པོའི་སྐབས་ནས་བཟུང་དགོན་ཁག་གཞན་དུ་འགྲོ་རྒྱུ་རིམ་བཞིན་ཉུང་དུ་ཕྱིན་ཏེ་འབྲུག་རྗེ་དགོན་དུ་ཞུགས་མཁན་མང་དུ་བྱུང་འདུག རླུང་སེམས་ལ་རྟོགས་པ་ཐོབ་པའི་རྟགས་སུ་རྡོ་ལ་ཞབས་རྗེས་བཞག་པ་སོགས་སྤྲུལ་པའི་རྟགས་ངོ་མཚར་ཅན་ཧ་ཅང་མང་པོ་མཇལ་རྒྱུ་ཡོད་པ་དག་ནི་གོང་དུ་བཤད་ཟིན། བསྭོ་ཚང་གྲོང་ཚོ་གསུམ་པར་ཀླུ་ཤིན་ཏུ་མང་བས་ཡུལ་མི་ལ་རྟག་པར་འཚེ་བས། ཀླུ་རྣམས་ཡུལ་དེ་ནས་གསེར་ཝ་འགུག་ཞེས་པའི་ལུང་པར་སྤོས་ནས། མི་དང་ཕྱུགས་ཟོག་རྣམས་ནད་ཡམས་དང་མུ་གེའི་འཇིགས་པ་ལས་བསྐྱབས། ཡུལ་སྡེ་རྣམས་ཀྱིས་རི་དྭགས་རྔོན་པ་རྒྱབ་རྒྱུ་དང་ཡུལ་མི་ཕན་ཚུན་གཅིག་གིས་གཅིག་ལ་གནོད་འཚེ་སྤང་རྒྱུའི་ལམ་སྟོན་བཀའ་སློབ་དང༌། གདུལ་བྱ་རྣམས་ལ་དབང་ཁྲིད་ལུང་གསུམ་གྱིས་སྨིན་པར་བྱས་པ་སོགས་ཡུལ་འདིར་བཀའ་དྲིན་བསམ་བརྗོད་ཀྱི་ཡུལ་ལས་འདས། རྒྱལ་ཚབ་ཆོས་དཔལ་བཟང་པོས་འབྲུག་རྗེ་དགོན་པ་ཕྱག་བཏབ་པར་ཡོངས་སུ་གྲགས་པའང་དེ་ནས་བྱུང་བ་ཡིན། གཞན་ཡང་མཁས་བཙུན་བཟང་པོས་བྲིས་པའི་སྒྲུབ་བརྒྱུད་ཤིང་རྟ་ཆེན་པོ་བརྒྱད་ལས་བཀའ་བརྒྱུད་བླ་མའི་བརྒྱུད་པ་རྗེས་འབྲང་དང་བཅས་པའི་རིན་ཆེན་ཕྲེང་བའི་དེབ་ཕྲེང་གཉིས་པའི་ནང་དུའང་རྒྱལ་ཚབ་ཆོས་དཔལ་བཟང་པོས་ལི་ཐང་འབྲུག་རྗེ་དགོན་པ་ཕྱག་བཏབ་ཅེས་བྲིས་པར་སྣང༌། འབྲུག་རྗེ་དགོན་དུ་རྒྱལ་ཚབ་ཆོས་དཔལ་བཟང་པོས་གནང་བའི་འཁར་རྔ་ཆེན་པོ་ཞིག་ད་ལྟ་ཡང་མཇལ་རྒྱུ་འདུག ད་དུང་གཞན་པ་དུས་འགྱུར་སྐབས་སུ་ཡལ་ནས་མ་རྙེད་པ་དང༌། ཡོད་ཀྱང་ལོ་རྒྱུས་དང་ཡིག་ཆ་འདི་ཡིན་ཞེས་པའི་ཁ་གསལ་མེད་པས་ལུས་སོ།། རྒྱལ་ཚབ་ཆོས་དཔལ་བཟང་པོ་ནི། འཇང་ས་ཐམ་རྒྱལ་པོའི་ཡུལ་དུ་སྐུ་འཁྲུངས། ད་ལྟ་འཇང་ཡུལ་དུ་བཞུགས་ཡོད་པའི་དྲུང་པ་སྤྲུལ་སྐུ་པདྨ་མཐར་ཕྱིན་གྱིས་རྒྱལ་ཚབ་ཆོས་དཔལ་བཟང་པོ་ནི་འཇང་རྒྱལ་པོའི་སྲས་སུ་འཁྲུངས་པ་རེད་ཅེས་ཕྲན་ལ་དངོས་སུ་ཡང་ཡང་གསུངས་བྱུང༌། ལོ་རྒྱུས་སུ་དེ་ལྟར་མི་འདུག་ཀྱང་ཡིན་མིན་དཔྱད་པར་ཞུ། རྗེ་ཀརྨ་པ་བདུད་འདུལ་རྡོ་རྗེ་དང་སི་ཏུ་ཆོས་ཀྱི་འབྱུང་གནས་ཟུང་གིས་ངོས་འཛིན་མཛད་ཅིང་མཚུར་ཕུའི་གདན་སར་མངའ་གསོལ། མཁས་དབང་མང་པོར་བརྟེན་ཏེ་རིག་པའི་གནས་གང་ལའང་སྦྱང་པ་དཔྱིས་ཕྱིན་པར་མཛད། དེ་ནས་འཇང་ཡུལ་དགོན་ཁག་བཅུ་གསུམ་གྱི་ནང་དུ་དགོན་ཆེན་གྱི་ཡ་གྱལ། ལ་ཕྱི་དགོན་པའམ་ངེས་དོན་ཕུན་ཚོགས་གླིང་རྒྱ་སྐད་དུ་ཏྲི་ཡེན་སེ་ལ་ཁྲི་སྟོན་གྱི་མཛད་སྒོ་ཟབ་རྒྱས་གནང་བ་སོགས་མདོ་ཁམས་སྨད་ཕྱོགས་སུ་མཛད་འཕྲིན་ཤིན་ཏུ་དར་བར་འདུག་གཽ།
རྗེ་ཀརྨ་པ་མཁའ་ཁྱབ་རྡོ་རྗེ་འབྲུག་རྗེ་དགོན་དགེ་ལེགས་དར་རྒྱས་གླིང་དུ་ཆིབས་བསྒྱུར་བསྐྱངས་ནས། སེར་སྐྱ་མི་མང་རྣམས་ལ་ཟླ་བ་མང་པོར་དབང་ལུང་དང་ཁྲིད་སོགས་གནང་སྟེ་སྨིན་པར་བྱས། སྐབས་ཤིག་ཏུ་སྐུ་ཉིད་དགོན་པའི་ཐོག་ཁར་རབ་གསལ་ཚོམས་ཆེན་ཁང་དུ་བཞུགས་སྐབས་ཡུང་སིལ་ལ་ཁར་སྤྲིན་ཕུང་གསེབ་ཏུ་མགོན་པོ་བེར་ནག་ཅན་ཞལ་དངོས་སུ་གཟིགས། ཞལ་གཟིགས་བྱུང་མ་ཐག་བེར་ནག་ཅན་གྱི་སྐུ་ཐང་ཞིག་ཁོང་གིས་ཕྱག་བྲིས་མཛད། ད་ལྟ་འབྲུག་རྗེ་དགོན་དུ་བཞུགས་པར་གྲགས་ཀྱང་ཕྲན་གྱིས་དངོས་སུ་མ་མཇལ། མགོན་པོའི་གཡང་སྒྲུབ་ལྡེབ་ཐུང་ཤོག་ལེབ་ལྔ་ཅན་གསར་དུ་བརྩམས་གནང༌། དགོན་དེར་མགོན་པོའི་གར་འཆམས་འཛུགས་པའི་རྟེན་འབྲེལ་ལེགས་པར་གཟིགས་ཏེ། མཚུར་ཕུ་དོན་གྲུབ་སྤྲུལ་སྐུ་སོགས་ལ་བཀའ་གནང་སྟེ་འབྲུག་དགོན་གྱི་གྲྭ་པ་རྣམས་ལ་གར་འཆམས་བསླབ་བཅུག་ནས་མགོན་པོ་བེར་ཅན་གྱི་གར་འཆམས་མཚུར་ལུགས་ལྟར་དངོས་སུ་དབུ་འཛུགས་གནང༌། འབྲུག་རྗེ་དགོན་དུ་གར་འཆམས་འཁྲབ་པའང་ཐོག་མ་ཡིན། རྡོ་ལ་ཞབས་རྗེས་བཞག་པ་སོགས་མཛད་འཕྲིན་མཐའ་ཡས་སོ།།
དཔལ་སྤུངས་དགོན་གྱི་མཁན་ཆེན་བཀྲ་ཤིས་འོད་ཟེར་འབྲུག་རྗེ་དགོན་དུ་ཕེབས་ནས་དགེ་འདུན་གྱི་སྡེ་རྣམས་ལ་མདོ་སྔགས་ཀྱི་ཁྲིད་ལུང་དང༌། ཡུལ་སྡེ་རྣམས་ལ་མ་ཎི་བཀའ་འབུམ་གྱི་ལུང་དང༌། བྱང་ཆུབ་སེམས་ཀྱི་སྡོམ་པ། དགེ་བཅུའི་ཕན་ཡོན་བཅས་གསུང་སྟེ་ཡུན་རིང་དུ་བཞུགས་པར་གྲགས་སོ།། རྒྱལ་དབང་ཀརྨ་པ་རང་བྱུང་རིག་པའི་རྡོ་རྗེ་དགུང་ལོ་བཅོ་ལྔ་ཐོག་སི་ཏུ་པདྨ་དབང་མཆོག་དང་ལྷན་དུ་ཕེབས་ནས་འབྲུག་རྗེ་དགོན་དུ་ལོ་གཅིག་ལྷག་ཙམ་བཞུགས། མགོན་པོ་བེར་ཅན་གྱི་གར་འཆམས་ལ་བསྐྱར་དུ་བཟོ་བཅོས་གནང༌། འདོན་རྟ་དབྱངས་དང༌། དཀར་བཟོ་གཏོར་བརྒྱན། རྒྱ་གླིང་རག་དུང་སོགས་ལ་བཟོ་བཅོས་གནང་བར་བརྩམས་པའི་ཚེ། ལུགས་འདི་ནི་མཚུར་ཕུ་མཆོད་སྒར་གོང་གི་ཕྱག་སྲོལ་འཁྲུལ་མེད་རེད་འདུག་གསུང་སྟེ་མ་བཅོས་པར་རང་སོར་བཞག་མཛད། དེའི་དུས་སུ་འབྲུག་དགོན་གྱི་དབུ་མཛད་རྒྱལ་གཞི་གྲོང་ཚོ་རུ་ཁག་བཞི་པ་ནང་དུ་ནམ་ཞྭ་ཚང་གི་གྲ་པ་དབང་རྒྱལ་ཡིན་འདུག་པར་འདོན་སྟངས་སོགས་ལ་བསྟོད་བསྔགས་ཀྱང་གནང༌། སྔར་སྒར་པ་གོང་འོག་གཉིས་ཀྱི་མཐོང་རྒྱུན་མི་འདྲ་ཡང༌། དེང་སང་མཚུར་ཕུ་སྒར་པ་འོག་མ་ལུགས་ལྟར་གྱུར་ཟིན། རྒྱལ་དབང་ཀརྨ་པ་མཆོག་གིས་མ་འོངས་པར་དྲན་རྟེན་དང་འབྲུག་རྗེ་དགོན་པར་བཤད་སྒྲུབ་ཀྱི་སྡེ་དར་རྒྱས་ཡོང་མིན་བརྟགས་པའི་ཆེད་དུ་གཙུག་ལག་ཁང་གི་གཡས་ཕྱོགས་ལམ་ཟུར་དུ་ཤུག་པ་ཞིག་བཙུགས་འདུག་པར། དེང་སང་རིང་ཚད་ཁང་པའི་ཐོག་བརྩེགས་གཉིས་ལས་ལྷག་ཙམ་སྐྱེས་འདུག སི་ཏུ་པདྨ་དབང་མཆོག་གིས་གྲྭ་པ་རྣམས་ལ་དགེ་ཚུལ་སློང་གི་སྡོམ་པ་དང༌། བྱང་ཆུབ་སེམས་སྡོམ་དང༌། དགེ་བསྙེན་གྱི་སྡོམ་པ། དེ་བཞིན་དབང་ལུང་སོགས་མང་དུ་གནང༌། རྒྱལ་གཞི་དང་པོར་མི་ཚང་གཉིས་ཀྱིས་ལོ་ངོ་དགུ་ཙམ་འཁྲུག་རྩོད་ཤོར་བར་ཁོང་རྣམ་གཉིས་ཀྱིས་བར་འདོམས་མཛད་པ་སོགས་འཕྲིན་ལས་རྒྱ་ཆེའོ།། དྲུང་པ་བློ་གྲོས་རབ་གསལ་དུས་འགྱུར་དབང་གིས་འཇང་ཡུལ་ཕྱོགས་སུ་བཞུགས་མི་བཟོད་པར། འབྲུག་རྗེ་དགོན་པར་ཁོང་གང་འགྱོགས་སུ་གདན་འདྲེན་དགོས་པའི་ཕྱག་བྲིས་བསྩལ་བ་བཞིན། འབྲུག་དགོན་ཏུ་ཕེབས་ཏེ་བླ་གྲྭ་ཡོངས་ལ་རྒྱུད་སྡེའི་ལུང་དང༌། ཡུལ་མི་རྣམས་ཀྱི་ཁྱིམ་དུ་ཕེབས་ཏེ་རིམ་གྲོ་གནང་བར་ནད་རིམས་དང་ཇག་རྐུན་འཇིགས་པ་ཀུན་ལས་གྲོལ་བ་སོགས་བྱས། གུང་ཁྲན་དམག་གིས་བཟུང་སྟེ་སླར་འཇང་ཡུལ་ཕྱོགས་སུ་ཁྲིད་དེ་རྗེས་སུ་དགོངས་པ་རྫོགས་འདུག་གོ །ལི་ཐང་ཅ་ཤོས་དགོན་གྱི་སྤྲུལ་སྐུ་ཀུན་བཟང་ཆོས་ཀྱི་ཉི་མ་དང༌། སངས་རྒྱས་ཆོས་འཕེལ་གྱི་ཡང་སྲིད་དུ་གྲགས་པ་འབངས་རིན་པོ་ཆེ་བཅས་ཕེབས། ཕྱི་ལོ་ ༡༩༥༠ ཡས་མས་སུ་འབྲུག་རྗེ་དགོན་གྱི་སེར་སྐྱ་ཡོངས་ནས་ལོ་མང་རིང་མ་བསྐུལ་དྭངས་བླངས་ཐོག་དཀའ་ངལ་ཁྱད་དུ་བསད་དེ་གཙུག་ལག་ཁང་ཀ་རིང་བཞི་ཅན་དང༌། རྒྱབ་ཏུ་ལྷ་ཁང༌། ནང་དུ་སྐུ་གསུང་ཐུགས་རྟེན་མང་པོ་གསར་བཞེངས་ལེགས་གྲུབ་མཛད། དུས་རབས་ཉི་ཤུ་ཙམ་ལ་རིག་གནས་གསར་བརྗེ་ཆེན་པོ་ལང་སྟེ་དགོན་པར་དགེ་འདུན་གྱི་སྡེ་རྣམས་རྩ་སྟོང་དུ་གྱུར། རྟེན་གསུམ་མང་པོ་འཐོར་བརླགས་སུ་ཕྱིན། དེ་སྐབས་བསྭོ་ཚང་ནང་དུ་སིལ་ལི་ཚང་ཀུན་བཟང་དང་མི་དགག་གཙོས་པའི་ལྷག་བསམ་ཅན་མང་པོ་ཞིག་གིས་དགོན་པ་བདག་གཉེར་དང༌། དེ་བཞིན་སྐུ་འདྲ་རྙིང་པ། སྐུ་ཐང་མང་པོ། རོལ་སིལ་ཅ་དངོས་རྩ་ཆེན་ཁ་ཤས་སྦས་སྐུང་གནང་ཐུབ་པ་སོགས་ཀྱིས་འབྲུག་རྗེ་དགོན་པར་བྱས་རྗེས་ཆེའོ།། ༼ཕྱིས་ཀྱི་ཉམས་གསོ་མཛད་ཚུལ། ཕྱི་ལོ་ ༡༩༨༤ ལོར་བླ་མ་དབང་འདུས་གཙོ་བོར་མཛད་ཅིང་བླ་གྲྭ་ཁག་ཅིག་གིས་འདབས་པ་རྫོང་དུ་འབྲུག་རྗེ་དགོན་དུ་ཆོས་ལུགས་ཉམས་གསོ་ཆོག་པའི་སྙན་ཞུ་ཕུལ་ཏེ་ཆོག་མཆན་ཐོབ། འབྲུག་རྗེ་དགོན་དུ་རྒྱུད་སྡེའི་སྒྲུབ་མཆོད་སྐོར་ཁག་ཅིག་ཚོགས་རྒྱུའི་དབུ་འཛུགས་གནང༌། དུས་འགྱུར་སྐབས་སུ་གཏོར་བཤིག་ཏུ་སོང་བའི་དགོན་ཤུལ་དུ་གཙུག་ལག་ཁང་དང༌། མགོན་ཁང༌། གྲ་མང་གི་གསོལ་ཐབ་ཁང༌། ཕྱག་མཛོད་ཁང༌། ཆོས་ར་དང་བཅས་པ་ལོ་མང་རིང་དགོན་སྡེ་ཡོངས་ནས་དཀའ་ངལ་ཁྱད་དུ་བསད་དེ་འབད་པ་དྲག་པོས་ཞིག་གསོ་གནང༌། དེང་སྐབས་ནང་ཆོས་ལ་དགའ་མོས་ཀྱིས་གཞོན་ནུ་མང་པོ་གྲྭྭ་པར་འཛུལ་ཏེ་བསླབ་པ་ཐོས་བསམ་གྱི་འཁོར་ལོར་དུས་འདའ་བར་བྱེད། འབྲུག་རྗེ་དགོན་གྱི་ནང་རྟེན་གཙོ་བོ་བདེ་གཤེགས་ཕག་མོ་གྲུ་པའི་སྐུ་འདྲ་རྩ་ཆེན་གསུང་བྱོན་མ་ཞིག་ཡོད་པ། ལི་ཐང་གེ་མོ་དགོན་གྱི་ཞབས་སུ་ཕག་གྲུའི་གདན་ས་གྲགས་པའི་དགོན་ཤུལ་ཞིག་འདུག་པར་དེ་ནས་སྔར་གྲྭ་པ་ཁ་ཤས་ཀྱིས་གདན་དྲངས་ཏེ་འབྲུག་རྗེ་དགོན་དུ་བཞུགས་སུ་གསོལ་པར་བཤད་པ་ཙམ་ལས་འདི་ཡིན་ཞེས་པའི་ལོ་རྒྱུས་ཁ་གསལ་མེད་པས་དཔྱད་པར་ཞུ། རིག་གནས་གསར་བརྗེ་སྐབས་སུ་སྐུ་འདྲ་གསུང་བྱོན་དེ་ཉིད་བཀའ་འགྱུར་གླེགས་བམ་རྣམས་དང་མཉམ་དུ་མེར་བསྲེག་ཏུ་བཏང་ཟིན། ཕྱིས་སུ་ཆོས་ལུགས་ཉམས་གསོའི་སྐབས་འབྲུག་རྗེ་དགོན་གྱི་ཕྱག་མཛོད་རྣམས་ཀྱིས་ཕག་གྲུ་སྐུ་འདྲ་གསར་པ་ཞིག་བཞེངས་སུ་བཅུག་ནས་སྐུ་འདྲ་དེ་ལ་རྒན་པ་ཁག་ཅིག་གིས་ཚུགས་ཡག་པོ་མེད་པའི་སྐྱོན་བརྗོད་བྱས་ནས་ཡུན་རིང་མ་སོང་བར། ཕྱི་ལོ་ ༡༩༨༧ བོད་ཟླ་ ༧ ཚེས་ ༡༥ ཉིན་ཕག་གྲུའི་སྐུ་འདྲས་དངོས་སུ་གསུང་བྱོན་པས་དབུ་ཞྭ་རང་ཕུད་མཛད། སྤང་དུ་ན་བཟའ་དང་མཇལ་དར་རྣམས་མདུན་ལྕོག་སྟེང་དུ་བཞག་མཛད། སྐུ་འདྲས་ཐོག་མར་གསུང་བྱོན་པ་དེ་ཡང་ཡིན། མི་མང་གིས་དད་གུས་སྤྲོ་གསུམ་གྱིས་སྒོ་ནས་མཇལ་ཁ་ཞུ་མཁན་ཀྱང་མང་པོ་འདུག བླ་མ་དབང་འདུས་ཀྱིས་གསུང་པར་འདི་ནི་བཟང་བའི་རྟགས་མཚན་ཞིག་ཡིན་སྲིད། དགོན་པར་ལུང་རྟོགས་དང་དགེ་འདུན་སྡེ་དར་རྒྱས་ཡོང་རྒྱུ་དང༌། དེ་མིན་ན་རྒྱལ་བ་ཡབ་སྲས་ཞིག་ཕེབས་པའི་རྟགས་མཚན་ཡིན་རྒྱུ་རེད་ཅེས་གསུང་འདུག ཚེས་ ༢༥ ཉིན་མཚུར་ཕུ་གཽ་ཤྲི་རྒྱལ་ཚབ་བཅུ་གཉིས་པ་བླ་སློབ་ཁག་ཅིག་གིས་སྤང་ཕུག་དགོན་པ་འདི་ཡིན་ནམ་གསུང་སྟེ་སྤང་ཕུག་དགོན་དུ་ཕེབས་འདུག སྤང་འབྲུག་གཉིས་ཀྱི་གྲྭ་པ་བརྒྱ་ཕྲག་གཉིས་ལྷག་ཙམ་ལ་མཚན་མོ་དགེ་ཚུལ་སློང་གི་སྡོམ་པ་དང༌། ཉིན་གུང་མཇལ་མང་ཡོངས་ལ་རྒྱལ་བ་རྒྱ་མཚོའི་བཀའ་དབང་བསྩལ། ཚེས་ ༢༨ ཉིན་གྱི་ཕྱི་དྲོའི་ཆུ་ཚོད་གཉིས་པ་ཙམ་ལ་འབྲུག་རྗེ་དགོན་དུ་ཕེབས། འབྲུག་རྗེ་དགོན་གྱི་དགེ་འདུན་པ་རྣམས་ཀྱིས་སེར་ཕྲེང་དང་ཐོག་རོལ། མི་མང་རྣམས་ཀྱིས་ལག་ཏུ་མེ་ཏོག་དང་མཇལ་དར་བཟུངས་ཏེ་ཟབ་རྒྱས་ངང་གཙུག་ལག་ཁང་དུ་གདན་འདྲེན་གྱིས་མཎྜལ་རྟེན་གསུམ་འདེབས་འབུལ་མཛད། ཕྱི་དྲོར་གྲྭ་པ་གསར་བཞུགས་པ་རྣམས་ཀྱི་སྐྲ་ཕུད་བྲེག་གནང་སྟེ་སེར་སྐྱ་ཡོངས་ལ་ཚེ་དབང་བཀའ་དྲིན་བསྩལ། སང་ཉིན་ཞོགས་པར་རྡོ་རྗེ་ཕག་མོའི་བཀའ་དབང་གནང༌། དེ་ཚར་བ་དང་དུས་མཚུངས་རྗེ་ཕག་གྲུ་སྐུ་འདྲར་དབུ་ཞྭ་ཡར་གསོལ། མཇལ་དར་ཉིན་མོ་བདེ་ལེགས་སྒྲོན་ནས་སྐུ་འདྲ་ལ་ཁོང་གིས་དབུ་གཏུགས་ཏེ་ཡུན་རིང་སྨོན་ལམ་གནང་ནས་བཞུགས་སོང༌། གཙུག་ལག་ཁང་དང་མགོན་ཁང་རྣམས་སུ་ཁྲུས་གསོལ་དང་རབ་གནས་མཛད། སྤང་འབྲུག་གཉིས་ལ་གསོལ་རས་ཆོས་གོས་རེ་དང་ཀྲུང་སྒོར། ཡུལ་མིས་ཕུལ་བའི་འབུལ་བ་རྣམས་དགོན་པ་སོ་སོར་བཞག་མཛད། དེ་བཞིན་མང་ཚོགས་ལ་དམ་རྫས་དང་བྱིན་མདུད་བཅས་གནང༌། འབྲུག་རྗེ་དགོན་གྱི་རོལ་སིལ་དང་འཆམས་གོས་སོགས་ཅ་དངོས་རྙིང་པ་ཁག་ལ་གཟིགས་ཞིབ་མཛད་གྲུབ་ནས། དེ་ཉིན་རྒྱལ་གཞི་ཞབས་ཁྱིམ་པ་ཚང་གི་ནང་དུ་འཁྱུག་ཙམ་གདན་དྲངས་ཏེ་བླ་མ་འཇམ་དབྱངས་རྒྱལ་མཚན་གྱིས་ཕྱག་དཔེ་རྙིང་པ་ཞིག་ཕུལ་འདུག ཕྱི་དྲོ་ཆུ་ཚོད་གསུམ་པ་ཙམ་ལ་འདབས་པ་ནས་ལི་ཐང་དུ་ཕེབས། དེ་ནས་རྒྱ་ནག་གྲོང་ཁྱེར་ཁྲོན་ཏུ་བརྒྱུད་ཧོང་ཀོང་དུ་ཕེབས་འདུག བླ་མ་དབང་འདུས་གཙོས་པའི་རྒན་རབས་ཁག་ཅིག་གིས་མཚུར་ཕུ་གཽ་ཤྲི་རྒྱལ་ཚབ་ནི། བཀའ་བརྒྱུད་ཀྱི་རྒྱལ་བ་ཡབ་སྲས་ཆེ་གྲས་དང༌། སྔར་འབྲུག་རྗེ་དགོན་གྱི་བླ་མ་རེད་ཅེས་གསུངས་པ་ཐོས། དེའི་དུས་སུ་འཇང་རྒྱལ་པོས་རྒྱབ་སྐྱོར་གྱིས་ས་ཕྱོགས་གང་དུ་ཕེབས་ཀྱང་དབང་ཤུགས་དང་བརྩེ་མཐོང་ཀྱང་ཆེན་པོ་ཡོད་ཚོད་འདུག ཕྱིས་སུ་རྒྱ་གར་དུ་ཁོང་གི་ཕྱག་མཛོད་དམ་ཆོས་མཁས་གྲུབ་ཀྱིས་ཕྲན་ལ་གསུང་པར་སྤང་འབྲུག་གཉིས་ལ་ཆོས་གོས་རེ་གནང་བ་དེ་གཉིས༌། དང་པོ་ལྷ་སར་སྟོད་ལུང་གི་གདན་ས་མཚུར་ཕུའི་སྒར་པ་གོང་འོག་གཉིས་ལ་གནང་རྒྱུའི་ཆོས་གོས་ཡིན་ཀྱང༌། དེ་སྐབས་ཕྱག་ཆས་གསེབ་ཏུ་གང་སར་བཙལ་ཀྱང་ཡེ་ནས་རྙེད་སོན་མ་བྱུང་གསུང༌། ཁྱད་མཚར་བ་ཞིག་ལ་འདབས་པ་སྤང་ཕུག་དགོན་དུ་ཕེབས་སྐབས་ཕྱག་སྒམ་དུ་ཐོན་འདུག་པར། འདི་ནི་ཤིན་ཏུ་རྟེན་འབྲེལ་ལེགས་སོང་གསུངས་ནས་སྤང་འབྲུག་གཉིས་ལ་གནང་བ་རེད་ཅེས་གསུང་མྱོང་བ་བཅས་སོ།། སི་ཏུ་པདྨ་དོན་ཡོད་གྲུབ་པ་དཔལ་སྤུངས་སུ་ཕེབས་སྐབས་སྤང་འབྲུག་གཉིས་ཀྱིས་སྐུ་ཚབ་བཅར་ནས་གདན་འདྲེན་གྱི་སྙན་ཞུ་ཕུལ། ཕྱི་ལོ་ ༡༩༩༡ བོད་ཟླ་ ༨ ཚེས་ ༡༣ ཉིན་ཐོག་མར་སྤང་ཕུག་དགོན་དུ་ཕེབས་ཏེ་སྤང་འབྲུག་གཉིས་ཀྱི་གྲྭ་པ་རྣམས་ལ་དགེ་ཚུལ་སློང་གི་སྡོམ་པ་དང༌། སེར་སྐྱ་ཡོངས་ལ་བཀའ་དབང་བཅས་བཀའ་དྲིན་བསྩལ། ཚེས་ ༡༤ ཉིན་འབྲུག་རྗེ་དགོན་དུ་རྟ་པ་མང་པོས་ཆིབས་བསུ་དང་དགེ་འདུན་རྣམས་ཀྱིས་སེར་ཕྲེང་ཟབ་རྒྱས་ངང་ནས་ཐོག་མར་གཙུག་ལག་ཁང་དུ་གདན་འདྲེན་གྱིས་མཎྜལ་དང་སྐུ་གསུང་ཐུགས་རྟེན་རྣམས་ཕུལ། ཕྱོགས་གང་ས་ནས་ཡོང་བའི་སེར་སྐྱ་རྣམས་ལ་མཇལ་ཁ་གནང༌། དེའི་དགོང་མོར་ཐུན་བཞི་བླ་མའི་རྣལ་འབྱོར་གྱི་ལུང་དང༌། བླ་མ་ཡི་དམ་ཆོས་སྐྱོང་གསུམ་ལས་འཕྲོས་པའི་བཀའ་སློབ་དང༌། ཕྱི་ཉིན་སེར་སྐྱ་ཡོངས་ལ་རྒྱལ་བ་རྒྱ་མཚོའི་བཀའ་དབང་དང་འཕོ་ལུང་བཅས་གནང་གྲུབ་ཏེ། སྤང་འབྲུག་གཉིས་ལ་གསོལ་རས་སྦུག་ཆལ་རེ་དང་སིལ་སྙན་རེ། གཞན་ཡང་མི་མང་གིས་ཕུལ་བའི་འབུལ་བ་རྣམས་དགོན་པ་སོ་སོར་གནང༌། ཕྱི་ཉིན་སྡེ་དགེ་དཔལ་སྤུངས་ཕྱོགས་སུ་ཆིབས་ཞལ་བསྒྱུར་བར་མཛད་དོ།། འཇང་དྲུང་པ་བློ་གྲོས་རབ་གསལ་གྱི་ཡང་སྲིད་མཆོག་སྤྲུལ་པདྨ་མཐར་ཕྱིན་ནི། དཀར་མཛེས་ཁུལ་བརྒྱད་ཟིལ་རྫོང་གི་ཁོང་གཏོགས། ཡབ་གཡུ་འབྲུག་བཀྲ་ཤིས་དང༌། ཡུམ་ཟླ་བ་སྒྲོལ་མ་གཉིས་ཀྱི་སྲས་སུ་སྐུ་འཁྲུངས། སྡེ་དགེ་དཔལ་སྤུངས་སུ་སི་ཏུ་པདྨ་དོན་ཡོད་གྲུབ་པས་སེར་སྐྱ་ཡོངས་ལ་གདམས་ངག་མཛོད་ཀྱི་བཀའ་དབང་བསྩལ་སྐབས་ངོས་འཛིན་མཛད་ཅིང༌། མཚན་པདྨ་མཐར་ཕྱིན་གནང་སྟེ་དགེ་བསྙེན་གྱི་སྡོམ་པ་ནོད། དཔལ་སྤུངས་སུ་གདམས་ངག་མཛོད་ཀྱི་དབང་ཞུ་བཅར་མཁན་སྤང་འབྲུག་གཉིས་ཀྱི་བླ་གྲྭ་རྣམས་ནས་མཇལ་བཅར་ཞུས་ཏེ་མ་འོངས་པར་སྤང་འབྲུག་གཉིས་ཀྱི་དགོན་པར་ཕེབས་རོགས་སོགས་ཞུས། ཕྱི་ལོ་ ༡༩༩༣ ལོར་སྤང་འབྲུག་གཉིས་ཀྱི་དགོན་པར་ཆེད་དུ་ཕེབས་པར་མཛད། སྔར་གོང་མ་དང་འབྲེལ་ཆེ་བའི་རྒན་རབས་རྣམས་དང་དྲི་བ་དྲིས་ལན་གྱིས་བཀའ་མོལ་གནང༌། སྤང་འབྲུག་གཉིས་ཀྱི་གནས་རི་སོགས་ལ་གནས་སྐོར་ཀྱང་ཕེབས། ཁོང་ནི་རྒྱ་ནག་གི་སྐད་ལ་བྱང་ཆུབ་ཅིང་གཞོན་དུས་སུ་དམག་ཏུ་འགྲོ་མྱོང་བ། གསང་ཡུམ་དང་སྲས་མོ་ཞིག་ཀྱང་འདུག སྲས་མོ་དེར་མཚན་སི་ཏུ་རིན་པོ་ཆེ་ནས་གནང་འདུག རྗེས་སུ་རྒྱ་གར་དུ་ཕེབས་ཏེ་ཕྱོགས་གང་སར་གནས་སྐོར་དང་བླ་ཆེན་ཁག་མཇལ། གཞན་ཡང་མཚུར་ཕུ་གོ་ཤྲི་རྒྱལ་ཚབ་བཅུ་གཉིས་པའི་མདུན་ནས་ཀཾ་ཚང་རྒྱུད་སྡེ་བཞིའི་བཀའ་དབང་དང༌། ཕྱག་རྒྱ་ཆེན་པོའི་སེམས་ཁྲིད་ཀྱང་ཞུས་འདུག ཕྱི་ལོ་ ༡༩༩༩ ལོར་སྤང་འབྲུག་གཉིས་ནས་ཁྲི་སྟོན་གྱི་མཛད་སྒོ་གནང་སྟེ། དགེ་འདུན་རྣམས་ཀྱིས་ཆོས་ཀྱི་བགྲོ་གླེང་དང༌། མི་མང་རྣམས་ཀྱིས་གཞས་སྣ་ཁྲབ་སྟོན་སོགས་བྱས། གཞན་ཡང་རྫོང་དང་ཞིང་ཆེན་ཁག་ནས་སྐུ་མགྲོན་སོགས་མི་ཉུང་བ་ཞིག་ཀྱང་བསླེབས། འབྲུག་རྗེ་དགོན་པ་ཉམས་གསོའི་ཕྱིར་དུ་རོགས་རམ་དང༌། སེར་སྐྱ་མི་མང་རྣམས་ཀྱིས་གཙུག་ལག་ཁང་གི་གཡོན་ཕྱོགས་སུ་ཀརྨ་པཀྵའི་ལྷ་ཁང་གསར་དུ་བཞེངས་སྐབས་སྒོར་མོ་སོགས་ཀྱིས་རོགས་རམ་རྒྱ་ཆེ་གནང་བ་སོགས་བཀའ་དྲིན་ཆེ། འཇང་ཡུལ་ས་ཐམ་སོགས་སུ་ཕེབས་ཏེ་སྔར་བཀའ་བརྒྱུད་ཀྱི་དགོན་པ་རྣམས་སླར་ཉམས་གསོ་གནང་ནས་དགེ་འདུན་གྱི་སྡེ་བཙུགས། བཀའ་བརྒྱུད་ཀྱི་གདན་ས་ཁག་ནས་ཕེབས་པའི་བླ་གྲྭ་རྣམས་དང་འབྲུག་རྗེ་དགོན་གྱི་གྲ་པ་སོགས་གདན་འབོད་ཀྱིས་དགོན་པ་ཁག་ཏུ་ལས་གནས་ལ་བསྐོ་བཞག་བྱས་པ་སོགས་མཛད་འཕྲིན་རྒྱས་བཞིན་པའོ།། གཞན་ཡང་རིས་མེད་ཀྱི་སྐྱེས་ཆེན་དམ་པ་རྣམས་འབྲུག་རྗེ་དགེ་ལེགས་དར་རྒྱས་གླིང་དུ་སྔ་ཕྱི་རིམ་པ་མང་པོར་ཕེབས་མྱོང་མཁན་དག་གི་མཚན་ནི། སྐྱེ་ལོ་སྐུ་ཞབས་རྒྱལ་མཚན་ཁྲོམ་དགེ་རྒྱལ་སྲས། སྤྲུལ་སྐུ་རྡོ་རྗེ་རིག་འཛིན། སྟག་ལུང་རྩེ་སྤྲུལ། འཇམ་མགོན་ངག་དབང་ལེགས་པ། ཡང་སྟེང་དགོན་གྱི་མཆོག་སྤྲུལ་སྐུ་ཞབས་རྒྱལ་མཚན། མི་འགྱུར་ངག་དབང་བསྟན་འཛིན་ཀུན་དགའ་ཕྲིན་ལས་རྒྱ་མཚོ་བཅས་ཀྱིས་ཞབས་བཅགས་ཏེ་དགོན་སྡེ་རྣམས་ལ་ཆོས་འབྲེལ་ཀྱང་མང་དུ་གནང་བ་བཅས་སོ།། ༼འབྲུག་རྗེ་དགེ་ལེགས་དར་རྒྱས་གླིང་གི་ནང་རྟེན་གྱི་སྐོར་ནི། ནང་རྟེན་གྱི་གཙོ་བོ་རྗེ་ཕག་མོ་གྲུ་པའི་སྐུ་འདྲ་གསུང་བྱོན་པ་གསོལ་བ་བཏབ་པ་ཙམ་གྱིས་ཆོས་ཕྱོགས་ཀྱི་བྱ་བ་འབད་མེད་དུ་འགྲུབ་ནུས་པ་ཞིག་དང༌། རྒྱལ་ཚབ་ཆོས་དཔལ་བཟང་པོ་དང་སངས་རྒྱས་ཆོས་འཕེལ་གྱི་སྐབས་སུ་གདན་དྲངས་པའི་རྒྱལ་བ་གཙུག་གཏོར་ཅན་གྱི་སྐུ་ལི་ནག་ལས་གྲུབ་པ་བོད་ཀྱི་རྒྱལ་པོ་གླང་དར་མ་སྐབས་སུ་སྐུ་འདྲ་གསུང་བྱོན་ཡིན་མིན་བརྟགས་པའི་ཕྱིར་ཕྱག་གཡོན་གྱི་མཛུབ་མོ་སྲིན་ལག་བཅད་པ་ལག་པའི་གྲུ་མོ་གང་ལས་ལྷག་པ་ཞིག་དང༌། གཞན་ཡང་གསེར་སྐུ་རྙིང་པ་རིན་ཐང་བྲལ་བ་གྲངས་བཅུ་དྲུག་ལྷག་ཙམ། གསེར་བྲིས་ཀྱི་སྐུ་ཐང་རྙིང་པ་བརྒྱ་ལྷག སྦུབ་ཆལ་རྙིང་པ་ཉི་ཤུ། སིལ་སྙན་རྙིང་པ་བཅུ་ལས་ལྷག་ཙམ་ཞིག་དང༌། གཞན་ཡང་བཤད་གྲ་དང༌། སྒྲུབ་ཁང༌། མགོན་ཁང་རྣམས་སུ་སྐུ་གསུང་ཐུགས་ཀྱི་རྟེན་མང་ཙམ་བཞུགས་སོ།། ༼པར་ཁང་གི་སྐོར་ནི། སངས་རྒྱས་ཆོས་འཕེལ་དང་ཤིང་བཟོ་བ་རྣམས་ཀྱིས་དཀའ་ངལ་ལ་མ་ལྟོས་པར་འཇང་ཡུལ་དང་སྡེ་དགེ་དཔལ་སྤུངས་རྣམས་སུ་པར་ཤིང་གསར་བརྐོའི་སྦྱང་བརྡར་དང་མ་དཔེ་གཡར་ལེན་སོགས་གནང་ནས། འབྲུག་རྗེ་དགོན་དུ་པར་ཤིང་མང་པོ་གསར་བརྐོ་མཛད། དེའི་རྗེས་སུ་སྒྲུབ་དཔོན་བླ་མ་ཆོས་གྲུབ་ཀྱིས་པར་ཤིང་གསར་བརྐོ་མང་ཙམ་དང༌། ཕྱིས་སུ་བླ་མ་དབང་འདུས་སོགས་ཀྱིས་ཀྱང་པར་ཤིང་མང་པོ་ཁ་བསྐངས་དང་གསར་བརྐོ་མཛད། དེང་སང་ཡོད་བཞིན་པའི་པར་ཤིང་ཁག་ནི། རྒྱལ་བདེ་ཕག་གསུམ། མགོན་པོའི་བསྐང་གསོ། ཞིང་སྐྱོང༌། མཎྜལ་བཞི་ཆོག་དང་ཟབ་ཏིག་སྒྲོལ་མ། ཀར་གླིང་ཞིང་ཁྲོ། སིངྡྷིའི་བུམ་སྒྲུབ། བཀའ་བརྒྱུད་གསེར་ཕྲེང་གི་བླ་མཆོད། ཚེ་དཔག་ལྷ་དགུ་དང་མི་འཁྲུགས་པ། ཀུན་རིག དཀོན་མཆོག་སྤྱི་འདུས། ཆགས་མེད་ཀྱི་བདེ་སྨོན་དང༌། བདེ་སྨོན་བསྡུས་པ། གསུར་མཆོད་འདོད་ཡོན་སྤྲིན་ཕུང༌། མཁའ་འགྲོའི་འབུམ་སྐོར་སེང་གདོང༌། ཀཾ་ཚང་ཆོས་སྤྱོད་རབ་གསལ། གདུགས་དཀར་རྒྱས་པ། བར་དོ་ངོ་སྤྲོད། འཁོར་བ་དོང་སྤྲུགས། སྡེ་བརྒྱད་གསེར་སྐྱེམས། བརྟན་བཞུགས་བསྡུས་པ། བསམ་པ་ལྷུན་གྲུབ་དང་བར་ཆད་ལམ་སེལ་རྒྱས་པ། གུ་རུ་ལེའུ་བདུན་པ། དབང་སྡུད། རྡོར་གཅོད་དང་འཇམ་དཔལ་མཚན་བརྗོད། དྭགས་པོའི་ཐར་རྒྱན། ཆོས་སྐུ་འཛུབ་འཚུགས། གཞན་ཡང་ལྷ་སྐུའི་གཟུངས་ཀྱི་པར་ཤིང་དང་སྲུང་འཁོར་རླུང་རྟ་བཅས་ཀྱི་པར་ཤིང་ཧ་ཅང་མང་བས་འདིར་ཡི་གེ་མང་དྭོགས་ནས་མ་བྲིས་སོ།། ༼སྒྲུབ་མཆོད་ཀྱི་སྐོར་ནི། བོད་ཟླ་དང་པོར་ཡི་དམ་རྡོ་རྗེ་ཕག་མོ་བདུན་ཕྲག་གཅིག ཟླ་བ་གཉིས་པར་སྨྱུང་གནས་ཉིན་དགུ། ཟླ་བ་གསུམ་པར་བཀའ་བརྒྱུད་གསེར་ཕྲེང་གི་བླ་མཆོད་བདུན་ཕྲག་གཅིག ཟླ་བ་བཞི་པར་བླ་མ་དབང་འདུས་ཀྱིས་བཙུགས་པའི་རྙིང་ལུགས་སིངྡྷིའི་བུམ་སྒྲུབ་ཉིན་བདུན། འཁོར་ལོ་བདེ་མཆོག་དང༌། ཀུན་རིག་རྣམ་པར་སྣང་མཛད། འཇིག་རྟེན་དབང་ཕྱུག་རྒྱལ་བ་རྒྱ་མཚོ། ཀར་གླིང་ཞི་ཁྲོ། ཚེ་སྒྲུབ་ཐབས་ཤེས་ཁ་སྦྱོར། རྡོ་རྗེ་གྲོ་ལོད་ཡས་ཟུར། ཚེ་དཔག་དང་མི་འཁྲུགས་པ། མགོན་པོའི་དགུ་གཏོར་བཅས་ལོ་རེ་བཞིན་ཟམ་མ་ཆད་པར་ཚོགས་ཀྱིན་ཡོད། དེ་རྣམས་ཀྱི་ཐེབས་རྩ་ཡོང་ཁུངས་གཙོ་བོ་དགོན་པ་རང་གི་གྲ་པར་བརྟེན་ནས་སོ།། ༼སྒྲུབ་ཁང་ཡེ་ཤེས་རབ་བརྟན་གླིང་གི་སྐོར་ནི། ད་ལྟ་སྤང་ཕུག་དགོན་གྱི་སྒྲུབ་དཔོན་དོན་གྲུབ་ཕུན་ཚོགས་དང༌། འབྲུག་དགོན་གྱི་བླ་མ་ཨ་སྨན་བུ་ཕྲུག་ཁོང་རྣམ་གཉིས་སྤང་འབྲུག་གཉིས་ཀྱིས་ཆེད་མངགས་སྡེ་དགེ་དཔལ་སྤུངས་སྒྲུབ་ཁང་དུ་མངགས་གཏོང་མཛད། དཔལ་སྤུངས་དགོན་གྱི་སྒྲུབ་སྡེ་འོག་མ་བསམ་གཏན་གླིང་དུ་ལོ་གསུམ་ཕྱོགས་གསུམ་མཐར་ཕྱིན། དེ་ནས་ཁོང་རྣམ་གཉིས་སོ་སོས་སྤང་ཕུག་དགོན་དང་འབྲུག་རྗེ་དགོན་དུ་ཕེབས་ནས་སྒྲུབ་དཔོན་མཛད། སྔར་ཡོད་པའི་འབྲུག་དགོན་གྱི་སྒྲུབ་ཁང་རྙིང་པ་ནི་འཐོར་ཤིག་ཏུ་སོང་སྟེ་ཁང་ཤུལ་ཞིག་ལས་ལྷག་མེད། དགོན་སྡེ་གཉིས་ཀྱིས་དེར་རྒྱ་བསྐྱེད་བཏང་སྟེ་གསར་བཞེངས་ལེགས་པར་གྲུབ་ནས་མཚུར་ཕུ་རྒྱལ་ཚབ་བཅུ་གཉིས་པས་སྒྲུབ་ཁང་གི་མཚན་ལ་ཡེ་ཤེས་རབ་བརྟན་གླིང་གསོལ། ཕྱི་ལོ་ ༡༩༩༣ ཟླ་ཚེས་བཟང་པོར་ཉིན། ཐོག་མར་སྒྲུབ་ཁང་དངོས་སུ་དབུ་བཙུགས་ནས་སྒྲུབ་བླ་བཅུ་བཅས་ཞུགས། སྒྲུབ་ཐེངས་རེ་ལ་སྒྲུབ་བླ་བཅུ་རེ་བཅས། ད་ལྟ་སྒྲུབ་ཐེངས་ལྔ་པ་ཡིན། སྒྲུབ་ཁང་དུ་ཀཾ་ཚང་གི་རྒྱུད་སྡེ་ཁག་དང༌། ཟབ་ལམ་ཕྱག་རྒྱ་ཆེན་པོ། ཐབས་ལམ་ནཱ་རོ་ཆོས་དྲུག་རྣམས་ལ་ཉམས་ལེན་གཙོ་བོར་མཛད་བཞིན་པ་བཅས་སོ།། ༼བཤད་གྲ་འཇམ་དཔལ་ཆོས་གསལ་གླིང་གི་སྐོར་ནི། འབྲུག་རྗེ་དགོན་གྱི་ཕྱག་མཛོད་རྣམས་དང༌། དགེ་འདུན་ཡོངས་ཀྱིས་གྲོས་མོལ་གནང་སྟེ། སྡེ་དགེ་དཔལ་སྤུངས་སུ་མཁན་པོ་བུ་སྟོན་གདན་ཞུས་བྱས། བཤད་གྲའི་གཙུག་ལག་ཁང་དང༌། དེའི་ཉེ་འཁོར་དུ་གྲ་ཤག་དང་བཅས་པ་གསར་བཞེངས་ལེགས་པར་མཛད། ཕྱི་ལོ་ ༡༩༩༦ བོད་ཟླ་ ༣ ཚེས་བཟང་གི་ཉིན་མོར་རྟེན་འབྲེལ་མཛད་སྒོ་དང་བཅས་དངོས་སུ་དབུ་བཙུགས། བཤད་གྲ་ནང་དུ་སློབ་ཚན་ཁག་ནི། བསྡུས་གྲ་ནས་མདོ་ཕྱོགས་ཀྱི་གཞུང་ཆེན་ཁག་དང༌། སྔགས་ཕྱོགས་སུ་རྒྱུད་བརྟགས་གཉིས། ཟབ་མོ་ནང་དོན་བཅས། དེ་བཞིན་དག་ཡིག་དང༌། སུམ་རྟགས། སྙན་ངག རྩིས་དཀར་ནག ས་དཔྱད་སོགས་ཁྲིད་དང་འཁྲིད་བཞིན་པའོ། །དེ་དུས་སློབ་གཉེར་བ་ཡུལ་ཕྱོགས་འདྲ་མིན་གྱི་དགོན་པ་ཁག་བཅུ་གསུམ་ཙམ་གྱི་གྲ་པ་འདུས་ཡོད། ད་ལྟ་ཡང་ཕྱོགས་ཁག་གི་གྲ་པ་ཁག་དང་བྲག་ནོར་དགོན་གྱི་སྤྲུལ་སྐུ་ཟླ་བ་བཟང་པོའི་ཡང་སྲིད་པདྨ་དབང་དྲག་གིས་ཀྱང་དེར་སློབ་གཉེར་གནང་བཞིན་པ་ཡིན། དེ་རྣམས་ལ་བཞུགས་སའི་གྲ་ཤག་དང་གློག་གི་ཆ་རྐྱེན་སོགས་བཤད་གྲ་གཞུང་གིས་གོ་སྒྲིག་ཆ་ཚང་ཞུ་བཞིན་འདུག འཇང་དྲུང་པ་སྤྲུལ་སྐུ་པདྨ་མཐར་ཕྱིན་དང་ཨ་ཀོང་སྤྲུལ་སྐུ་གཉིས་ཀྱིས་ཀྱང་བཤད་གྲར་དངུལ་གྱིས་རོགས་རམ་རྒྱ་ཆེ་གནང༌། བཤད་གྲ་ཐོག་མར་དབུ་བཙུགས་པའི་སྐབས་སུ་དགེ་འདུན་པ་བརྒྱད་ཅུ་ལྷག་ཙམ་འདུས་ཡོད་པའི་ནང་ནས་སློབ་ཐོན་པ་བཅུ་ཙམ་མཁན་པོར་བསྐོ་བཞག་གནང་སྟེ། བཤད་གྲའི་ངོས་ནས་ཉིན་མང་པོར་རྟེན་འབྲེལ་གྱིས་མཛད་སྒོ་དང༌། སློབ་ཐོན་པའི་ཕྱག་ཁྱེར་ཀྱང་བསྩལ་འདུག སློབ་ཐོན་པ་ཁག་ཅིག་དེང་སང་ཆབ་མདོ་དང༌། ནང་ཆེན་རྟ་ནག་དགོན། སྡེ་དགེ། འབྲུག་རྗེ་དགོན་གྱི་བཤད་གྲ་སོགས་སུ་མཁན་པོའི་ཕྱག་ལས་གནང་བཞིན་པ་བཅས། ཉེ་ཆར་བཤད་གྲའི་མཁན་པོ་བསོད་ནམས་བདེ་ཆེན་གྱིས་བླ་མ་ལོངས་སྤྱོད་བརྒྱུད་དེ་ཞལ་པར་ཐོག་ཕྲན་ལ་འབྲུག་རྗེ་དགོན་པའི་བཤད་གྲར་མཚན་ཡག་པོ་ཞིག་དགོས་པས། ཁྱོད་ཀྱི་སྐྱབས་རྗེ་རྒྱལ་ཚབ་རིན་པོ་ཆེ་ལ་བཤད་གྲར་མཚན་ཞིག་ཞུ་རོགས་གསུངས། དེ་དུས་གནས་ཆེན་རྡོ་རྗེ་གདན་དུ་བཀའ་བརྒྱུད་སྨོན་ལམ་སྐབས་ཉེར་ལྔ་ཚོགས་པ་དང་ཁེལ། བདག་གིས་སྐྱབས་རྗེ་རྒྱལ་ཚབ་རིན་པོ་ཆེར་ཐེང་མང་ཞུས་ཀྱང་སང་ཉིན་བར་སྒུགས་རྐྱང་གསུང་སྟེ་ཕྱིར་འགྱངས་གནང༌། ཕྱི་ལོ་ ༢༠༠༨ ཟླ་བ་དང་པོའི་ཚེས་བཅུ་དགུའི་ཉིན་སྨོན་ལམ་འདུས་ཚོགས་སུ་རྒྱལ་མཆོག་བཅུ་བདུན་པ་ལ་བཀའ་བརྒྱུད་སྨོན་ལམ་ཚོགས་པས་བརྟན་བཞུགས་བསྟར་འབུལ་དང་རྒྱལ་ཚབ་རིན་པོ་ཆེས་མཎྜལ་རྒྱས་བཤད་མཛད་གྲུབ་ཏེ་ཐུགས་དགྱེས་པའི་ཚུལ་གྱིས་གཟིམས་ཤག་ཏུ་ཕེབས་ཏེ། ཕྲན་གྱི་མིང་ནས་བོས་ཏེ་བདེ་ཆེན་མགྱོགས་པར་འདིར་ཤོག་ང་ལ་གསོལ་ཇ་དྲངས་ཤོག དེ་རིང་རྟེན་འབྲེལ་ཤིན་ཏུ་ལེགས་པའི་ཉིན་མོ་ཡིན་ཅིང༌། འབྲུག་རྗེ་དགོན་གྱི་བཤད་གྲའི་མཚན་ལ་འཇམ་དཔལ་ཆོས་གསལ་གླིང་ཡིན་ཞེས་མགྱོགས་པར་བྲིས་ནས་ཕར་ཕུལ་ཤོག་གསུངས་བ་བཅས་སོ།། ༼འབྲུག་དགོན་ཡུལ་སྡེ་ནས་བྱུང་བའི་ཕྱག་རྗེས་ཆེ་བའི་རྒན་རབས་རྣམས། བླ་མ་མངོན་དགས་འབྲུག་རྗེ་དགོན་གྱི་གདན་ས་བསྐྱངས། སངས་རྒྱས་ཆོས་འཕེལ་དང་བསམ་གཏན་བླ་མ་གཉིས་ཀྱིས་མཚུར་ཕུ་རྒྱལ་ཚབ་གདན་ཞུ་དང༌། དགོན་པ་གསར་བཞེངས་ཀྱི་མཛད་འཕྲིན་ཆེ། དེ་བཞིན་ཛྭ་ཞྭ་ཆོས་འཛིན། བླ་མ་བརྩོན་འགྲུས། བླ་མ་བློ་གྲོས། སྒྲུབ་དཔོན་བླ་མ་ཀརྨ་བསོད་ནམས། སྒྲུབ་དཔོན་བླ་མ་ཆོས་གྲུབ། རྒྱལ་ལྷག་བླ་མ་དགེ་ལེགས་རྣམ་རྒྱལ། བླ་མ་ཀརྨ་དོན་གྲུབ་སོགས། གཞན་ཡང་ཨ་བྷོ་ཚང་གི་བླ་མ་ཀརྨ་རྒྱ་མཚོ་ནི་འོག་མིན་མཚུར་ཕུ་སྒྲུབ་ཁང་ནས་ལོ་གསུམ་ཕྱོགས་གསུམ་ཐོན། འབྲུག་རྗེ་དགོན་དུ་གསེར་སྐུ་རིན་ཐང་བྲལ་བ་ཁག་ཅིག་དང༌། གསེར་བྲིས་ཀྱི་སྐུ་ཐང་ཆ་འགྲིག་ཅན་མང་པོ་དང༌། རོལ་སིལ་རྙིང་པ་ཁག་བཅས་གཏན་འཇོག་མཛད་པ་སོགས་ཤིན་ཏུ་ཕྱག་རྗེས་ཆེ། ཕྱིས་སུ་དུས་རབས་གསར་པའི་སྐབས་སུ་འབྲུག་རྗེ་དགོན་དུ་བླ་མ་དབང་འདུས་ཀྱིས་བསྟན་པའི་བདག་པོ་དང༌། བླ་མ་འཇམ་དབྱངས་རྒྱལ་མཚན། བླ་མ་ཆོས་རྒྱལ། བླ་མ་ཀརྨ་ངེས་དོན། བླ་མ་དོན་འགྲུབ་རྒྱ་མཚོ། བླ་མ་ཨོ་རྒྱན་རིག་འཛིན། བླ་མ་ཨ་སྨན་བུ་ཕྲུག བླ་མ་འགོ་རྒན། བླ་མ་ཚེ་འཕེལ། གྲ་པ་ཀུན་བཟང་སོགས་ཀྱིས་ཕྱག་རོགས་ཞུས་ཏེ། འབྲུག་རྗེ་དགོན་གྱི་བསྟན་དོན་རྣམས་མི་ཉམས་གོང་འཕེལ་དང་ཉམས་པ་སླར་གསོ་སོགས་ཀྱིས་མཛད་འཕྲིན་རྒྱས་བཞིན་པ་ནི། སྔར་ཁོང་རྣམས་ཀྱི་བཀའ་དྲིན་ཁོ་ན་ལ་བརྟེན་ནས་བྱུང་བ་ཡིན་ནོ།། ༼སྔར་ནས་ད་ལྟ་བར་དུ་འབྲུག་རྗེ་དགོན་གྱི་གྲ་རྒྱུན་འགྲོ་ས་གཙོ་བོ་ཁག་ནི། སྟོད་ལུང་མཚུར་ཕུ་སྒར་པ་གོང་འོག་གཉིས་དང༌། སྡེ་དགེ་དཔལ་སྤུངས་དགོན་དང༌། འདབས་པ་སྤང་ཕུག་དགོན་རྣམས་སུ་འགྲོ་བའི་ལུགས་སྲོལ་ཡོད། ད་ལྟ་ཡང་མཚུར་ཕུ་མཆོད་སྒར་གོང་དང༌། སྡེ་དགེ་དཔལ་སྤུངས་ཐུབ་བསྟན་ཆོས་འཁོར་གླིང༌། འདབས་སྤང་ཕུག་སོགས་ཀྱི་སྒྲུབ་ཁང་དང་བཤད་གྲ་རྣམས་སུ་འཛུལ་ཞུགས་གནང་གིན་ཡོད། གཞན་ཡང་རྒྱ་གར་དུའང་གདན་ས་རུམ་བཏེག་དཔལ་ཀརྨ་བཤད་སྒྲུབ་ཆོས་འཁོར་གླིང་དང༌། དཔལ་སྤུངས་ཤེས་རབ་གླིང༌། མཆོད་གོང་དཔལ་ཆེན་ཆོས་གླིང་སོགས་དེ་བཞིན་བཀའ་བརྒྱུད་ཀྱི་དགོན་སྡེ་གཞན་པ་རྣམས་སུའང་ཞུགས་བཞིན་པ་བཅས་འབྲུག་རྗེ་དགོན་གྱི་ལོ་རྒྱུས་རེ་ཞིག་གྲུབ་པས་སོ། ། ༼མཇུག་བསྡུ་བའི་གཏམ། དེང་སང་འཛམ་གླིང་ཡུལ་གྲུ་གང་སར་ཚན་རིག་དང་འཕྲུལ་ཆས། དེ་བཞིན་ཤེས་རིག་སོགས་ཉིན་རེ་བཞིན་ཚད་ལས་བརྒལ་བའི་ཡར་རྒྱས་ཀྱི་ཕྱོགས་སུ་བགྲོད་བཞིན་ཡོད། དེས་ན་སྔོན་གྱི་ཡུལ་སྡེ་དང་དགོན་པ་ཁག་གི་ཚད་ལྡན་གྱི་ལོ་རྒྱུས་ནི་ཆེས་མེད་དུ་མི་རུང་བ་དཔྱད་གཞིའི་ཡིག་ཆ་གལ་ཆེན་ཞིག་ཏུ་གྱུར་ཡོད། འོན་ཀྱང་ལོ་རྒྱུས་ནི་སྔར་དངོས་བྱུང་གི་གནས་ཚུལ་རྣམས་བློ་གཟུ་བོར་གནས་ཏེ། དྲང་བདེན་གྱིས་འབྲི་དགོས་པ་ལས། དེ་མིན་ཕྱོགས་ཞེན་གྱི་དབང་དུ་སོང་བ། གཡོ་སྒྱུ་དང༌། འཁྱོགས་པར་བརྗོད་པ། གཞན་དབང་གི་སྟོབས་དང་དཔལ་འབྱོར་ལ་ཞེན་ཏེ་རང་དགར་བྲིས་པ་སོགས་ནི་ཆེས་ནོར་འཁྲུལ་དང༌། ལོ་རབས་མང་པོར་དགོན་པ་དང་མི་རིགས་ཀྱི་ལོ་རྒྱུས་རིན་ཐང་བྲལ་བ་དེ་དག་རྩ་མེད་དུ་འགྲོ་བའི་རྒྱུར་མཐོང༌། སྔར་ནས་ཕྲན་ལ་འབྲུག་རྗེ་དགོན་པའི་དགེ་འདུན་པ་ཁག་ཅིག་གིས་འབྲུག་དགོན་གྱི་ལོ་རྒྱུས་ཞིག་བྲིས་དགོས་ཤེས་ཡང་ཡང་བསྐུལ་མ་གནང་ཀྱང༌། ཕྲན་ལ་རིག་གནས་དང་ལོ་རྒྱུས་ལ་སོགས་པའི་ཤེས་ཚད་ཀྱིས་དབེན་ཞིང༌། ལྷག་པར་དུ་འབྲུག་རྗེ་དགོན་གྱི་སྔོན་བྱུང་ལོ་རྒྱུས་རྣམས་གསལ་རྟོགས་མེད་པ་དང༌། ཁུངས་གཏུགས་ཀྱི་ཡིག་ཆ་ཡག་པོ་ཞིག་མེད་པའི་དབང་གིས་ལོ་ངོ་གསུམ་ཙམ་ལུས། དེ་རྗེས་ཁོ་བོས་དངོས་སུ་འབྲུག་རྗེ་དགོན་པར་བསྐྱོད་དེ་སྔོན་གྱི་ཡིག་ཆ་དག་བཙལ་བསྒྲུབས་དང༌། རྒན་རབས་རྣམས་ཀྱི་ངག་རྒྱུན་ཡིག་ཐོག་ཏུ་བཀོད་པ་སོགས་བྱས་ནས་དེ་རྣམས་ལ་ཁུངས་གཏུགས་ཏེ། ལོ་རྒྱུས་ཤིག་འབྲི་ཐུབ་ན་མ་འོངས་པར་རང་དང་སྐལ་མཉམ་ཅན་རྣམས་ལ་དཔྱད་གཞིའི་ཡིག་ཆ་དང༌། གཞན་དོན་གཉེར་ཅན་ལས་དང་པོ་པ་རྣམས་ལ་ཡང་ཕན་པ་ཅུང་ཟད་འབྱུང་ན་སྙམ་པའི་སྒོ་ནས། ཕྱི་ལོ་ ༢༠༠༨ ཟླ་ ༡༠ ཚེས་ ༢༨ ཉིན་རྒྱ་གར་དུ་དཔལ་ཀརྨ་པ་གདན་ས་ཆེན་པོ་རུམ་བཏེག་བཤད་སྒྲུབ་ཆོས་འཁོར་གླིང་དུ་རྒྱལ་ཁམས་པ་བདེ་ཆེན་ལྷུན་གྲུབ་ཀྱིས་རྫོགས་པར་བགྱིས་པའོ།། སྨྲས་པ། འདི་བྲིས་ལས་བྱུང་དགེ་བའི་ཚོགས་མཆིས་ན། །ལུང་རྟོགས་བསྟན་པ་ཕྱོགས་བཅུར་རྒྱས་བྱེད་ཅིང༌། ། སྐྱེ་འགྲོའི་རྒུད་པ་མ་ལུས་རབ་ཞི་ནས། །ཕན་བདེའི་དཔལ་འབྱོར་གྱིས་རྒྱས་ཡུན་གནས་ཤོག །
མ་ཤེས་རྟོག་བཏགས་བྲལ་བའི་ལོ་རྒྱུས་འདི། །ཞིབ་མར་དྲངས་པའི་ལྷག་བསམ་ལས་བྱུང་བ། ། ཡིད་བརྟན་རུང་བར་གཟུ་བོས་དཔྱད་ན་གསལ། །སྙན་ཚིག་སྡེབ་སྦྱོར་དབེན་པས་བདག་འཆགས་སོ། །