User talk:Sonamchoe
བརྗོད་གཞི་ཁ་སྣོན།ཨ་ཅེ་ལྷ་མོ།
[རྩོམ་སྒྲིག]ཨ་ཅེ་ལྷ་མོ་ནི་བོད་ཀྱི་སྲོལ་རྒྱུན་ཟློས་གར་ཁྲོད་ཀྱི་ཁྱད་དུ་འཕགས་པའི་རིག་གནས་ཤིག་ཡིན། སྤྱིར་བཏང་གི་བོད་ཀྱི་སྲོལ་རྒྱུན་ཟློས་གར་ལ་ལོ་རྒྱུས་ཧ་ཅང་རིང་པོ་ཡོད། ཨ་ཅེ་ལྷ་མོ་ཟེར་བའི་ཟློས་གར་ནི་དུས་རབས་བཅུ་བཞི་པ་ནས་བྱུང་བ་རེད། ཟློས་གར་འདི་བོད་ཀྱི་ས་ཁུལ་དུ་ལྕགས་ཟམ་མང་པོ་འཛུགས་བསྐྲུན་གྱི་ལས་གཞི་གཙོ་སྐྱོང་བྱེད་མཁན་ཐང་སྟོང་རྒྱལ་པོས་སྲོལ་བཏོད་པ་རེད། ཁོང་གིས་ལས་གཞི་དེའི་མ་རྩ་བསྡུ་གསོག་གི་ཆེད་དུ་ཟློས་གར་འཁྲབ་སྟོན་འདི་འགོ་བཙུགས་པ་རེད། ཐོག་མར་ཁོང་གིས་སྐད་སྙན་ལ་གཟུགས་མཛེས་པའི་བུ་མོ་བདུན་བདམས་ཏེ་བོད་ཀྱི་ས་ཕྱོགས་གང་སར་སྐོར་སྐྱོད་འཁྲབ་སྟོན་བྱས་པས་དགའ་བསུ་ཆེན་པོ་ཐོབ། ཨ་ཅེ་ནི་བུ་མོའི་དོན་དང་ལྷ་མོ་ནི་སྐྱེས་གཟུགས་མཛེས་པའི་དོན་རེད། ཟློས་གར་འདི་ཐོག་མར་ འཁྲབ་སྟོན་བྱེད་མཁན་རྣམས་སྐྱེས་གཟུགས་མཛེས་པའི་ཨ་ཅེའམ་བུ་མོ་ཡིན་པས་ཨ་ཅེ་ལྷ་མོ་ཟེར་བའི་མིང་དེ་བྱུང་བ་རེད། ཐོག་མའི་དུས་སུ་རྔ་སྦུག་རྡུང་དཀྲོལ་དང་གར་འཁྲབ་པ་ཙམ་རེད། ཕྱིས་སུ་རིམ་བཞིན་འབག་དཀར་པོ། སྔོན་པོ། སེར་པོ། ནག་པོ། དམར་པོ་དང་ཕྱེད་དཀར་ནག་སོགས་གསར་གཏོད་བྱུང་ཞིང་། ལྷག་པར་དུ་འཆད་པ་དང་གྱེར་འདོན། འཁྲབ་པ་གསུམ་གསར་གཏོད་ཁ་སྣོན་བྱས་ནས་ལྷ་མོའི་ཟློས་གར་གྱི་ངོ་བོ་ཕུན་སུམ་ཇེ་ཚོགས་སུ་སོང་བ་རེད།
ལྷ་མོའི་ཟློས་གར་འདི་ནང་དོན་གྱི་ཆ་ནས་ཧ་ཅང་ཕུན་སུམ་ཚོགས་པོ་ཡོད། ད་ལྟའང་བོད་ཕྱི་ནང་གཉིས་སུ་ལྷ་མོའི་འཁྲབ་གཞུང་ཆེན་པོ་བརྒྱད་མ་ཉམས་རྒྱུན་འཛིན་བྱེད་བཞིན་པ་རེད། ལྷ་མོ་ནི་བོད་ཀྱི་ས་ཆ་ཚང་མ་ལ་དར་བའི་ཐུན་མོང་གི་རིག་གནས་ཤིག་ཡིན་ཞིང་། བོད་ཀྱི་རྒྱལ་ས་ལྷ་ས་ལ་མཚོན་ན་དབྱར་དུས་ཞོ་སྟོན་དུས་ཆེན་གྱི་སྐབས་སུ་མེད་དུ་མི་རུང་བའི་འཁྲབ་སྟོན་གྱི་བྱེད་སྒོ་ཞིག་རེད། ལྷ་མོའི་འཁྲབ་གཞུང་རེ་རེ་ལ་ཆ་གཞག་ན་འགོ་འཛུགས་ཀྱི་འདོན་པ་དང་། འཁྲབ་གཞུང་དངོས། མཇུག་སྡུད་ཀྱི་བཀྲ་ཤིས་གཅོད་པ་ཟེར་བའི་ཚན་པ་གསུམ་དུ་ཕྱེད་པ་རེད། འཆད་གྱེར་འཁྲབ་གསུམ་ནི་འཁྲབ་གཞུང་དངོས་ཀྱི་སྐབས་ཀྱི་བྱེད་སྒོ་རེད།
༢༠༠༩ ལོར་མཉམ་འབྲེལ་རྒྱལ་ཚོགས་ཚན་སློབ་རིག་གསུམ་རྩ་འཛུགས་ཀྱིས་བོད་ཀྱི་ལྷ་མོའི་རིག་གནས་འདི་མིའི་རིགས་ཀྱི་མངོན་མེད་ཤུལ་བཞག་རིག་དངོས་ཀྱི་ཁོངས་སུ་བཅུག་སྟེ་ལོ་རྒྱུས་ཡུན་རིང་ལྡན་པའི་བོད་ཀྱི་ལྷ་མོའི་རིག་གནས་ལ་འོས་ཤིང་འཚམ་པའི་ངོས་འཛིན་ཐོབ་པ་རེད། ཕྱོགས་གང་ལ་བལྟས་ཀྱང་བོད་ཀྱི་རྩ་ཆེན་རིག་གནས་འདི་ད་དུང་མི་ཉམས་ཡུན་རིང་དུ་གནས་རྒྱུ་ཡིན་པའི་རྟེན་འབྲེལ་གྱི་རྐྱེན་ཚང་ནས་ཡོད་པར་སྣང་།
སྦྱོང་བརྡར།
ལྷ་མོའི་ཟློས་གར་འདི་སུས་སྲོད་གཏོད་པ་ཡིན་ནམ།
འོག་གི་དྲི་བ་རྣམས་ལ་ལན་བྲིས། 1. ལྷ་མོའི་ཟློས་གར་ནི་དུས་རབས་ག་རེའི་ནང་ཐོག་མར་འགོ་ཚུགས་པ་ཡིན་ནམ། 2. ཨ་ཅེ་ལྷ་མོ་ཟེར་བའི་མིང་འདི་གང་འདྲ་བྱུང་བ་ཡིན་ནམ། 3. ལྷ་མོའི་ཟློས་གར་མཉམ་འབྲེལ་རྒྱལ་ཚོགས་ཚན་སློབ་རིག་གསུམ་རྩ་འཛུགས་ཀྱིས་མིའི་རིགས་ཀྱི་མངོན་མེད་ཤུལ་བཞག་རིག་དངོས་སུ་ངོས་འཛིན་བྱས་པའི་ལོ་ཚིགས་བྲིས།
རླུང་རྟ།
[རྩོམ་སྒྲིག]བོད་ཀྱི་སྐོར་ལ་རྒྱུས་མངའ་ཡོད་པའི་མི་ཞིག་ཡིན་ན་རླུང་རྟ་མཐོང་མ་མྱོང་མཁན་ཕལ་ཆེར་མེད་ཟེར་ཆོག བོད་ཀྱི་རླུང་རྟའི་རིག་གནས་འདི་ལ་ལོ་རྒྱུས་ཧ་ཅང་གི་རིང་པོ་ཡོད་ཅིང་། མཚོན་དོན་གྱི་ཆ་ནས་ཀྱང་རླུང་རྟའི་རིག་གནས་འདི་ནི་ཆེས་ཕུན་སུམ་ཚོགས་པའི་རིག་གནས་ཤིག་ཡིན། དེང་སང་ནི་རླུང་རྟ་འདི་བོད་མིའི་ངོ་བོ་མཚོན་བྱེད་ཀྱི་རིག་གནས་ཤིག་ཏུ་གྱུར་ཡོད། འཛམ་གླིང་གི་ས་ཆ་གང་སར་གཞིས་ཆགས་པའི་བོད་མི་རྣམས་ཀྱིས་བོད་ཀྱི་རིག་གཞུང་གཞན་དང་མཉམ་དུ་རླུང་རྟའི་རིག་གནས་འདི་རྒྱུན་འཛིན་བྱེད་བཞིན་ཡོད། ས་གནས་གང་ཞིག་ཏུ་རླུང་རྟ་ཞིག་མཐོང་ན་ས་གནས་དེ་རུ་བོད་མི་གནས་སྡོད་བྱེད་པའམ་ཡང་ན་བོད་དང་འབྲེལ་བ་ཡོད་པའི་མི་ཞིག་གནས་སྡོད་བྱེད་པ་ཚོད་དཔག་བྱ་ཆོག
རླུང་རྟའི་མཚོན་དོན་ལ་གོ་བ་ལེན་ཚུལ་མི་འདྲ་བ་མང་པོ་ཡོད་པར་མ་ཟད་ཆེ་ཆུང་དང་བེད་སྤྱོད་བྱེད་ཚུལ་ཡང་མི་འདྲ་བ་མང་པོ་ཡོད། སྤྱིར་བཏང་ནས་རས་སྲབ་མོ་གྲུ་བཞིའམ་གྲུ་བཞི་ནར་མོ་གང་རུང་ཞིག་གི་དཀྱིལ་གྱི་ཆ་ལ་ནོར་བུ་རྩེ་གསུམ་ཁུར་བའི་རྟ་དང་། ཟུར་བཞི་ལ་སྟག་དང་སེང་གེ ཁྱུང་དང་འབྲུག་བཅས་སེམས་ཅན་བཞིའི་རི་མོ་བཀོད་ཡོད། དབུས་དང་ཟུར་བཞིའི་རི་མོ་རྣམས་ཀྱི་བར་དུ་གཟུངས་དང་སྨོན་ལམ་བཅས་ཡིག་ཐོག་ནས་བཀོད་ཡོད། དབུས་ཀྱི་རྟའི་རི་མོ་ཡིས་རང་ཉིད་ཀྱི་རླུང་རྟའམ་དབང་ཐང་། ལམ་འགྲོ་དང་བསོད་ནམས་བྱས་མཚོན། སྟག་སོགས་ཀྱི་རི་མོས་རྐྱེན་ངན་རིགས་ལས་རྒྱལ་བ་མཚོན་པ་དང་འབྱུང་བ་བཞི་མཚོན་པར་བཤད་པའང་ཡོད། རླུང་རྟ་འདོགས་པའི་སྐབས་སྔོན་པོ་དང་དཀར་པོ་དམར་པོ། ལྗང་ཁུ་དང་སེར་པོ་བཅས་ཚོན་མདོག་མི་འདྲ་བ་ལྔ་མཉམ་དུ་འདོགས་སྲོལ་ཡོད། ཚོན་མདོག་ལྔ་པོ་དེས་རིམ་བཞིན་ནམ་མཁའ། ཆུ་མེ། རླུང་། ས་བཅས་ཕྱི་ནང་གི་འབྱུང་བ་ལྔ་མཚོན་པ་ཡིན།
བོད་ཟླ་དྲུག་པའི་ཚེས་བཞི་ལྟ་བུ་ལོ་རེའི་དུས་ཆེན་ཁག་གི་སྐབས་རླུང་རྟ་འདོགས་ཤིང་། ཡང་རྒྱུན་ལྡན་ནས་མི་སྒེར་དང་ཁྱིམ་ཚང་། ཡུལ་ལུང་དང་འབྲེལ་བའི་ལས་དོན་གལ་ཆེའི་རིགས་ཐོན་པའི་སྐབས་སུའང་རླུང་རྟ་འདོགས་སྲོལ་ཡོད།
རླུང་རྟ་འདོགས་ཡུལ་ནི་རི་མཐོན་པོ་དང་ཤིང་སྡོང་གི་རྩེ་མོ། ཁང་པའི་ཐོག་ཁ་སོགས་སུ་འདོགས་པ་ཡིན། འདོགས་པའི་དམིགས་འདུན་ནི་ཡི་དམ་དང་ཡུལ་ལྷ་སོགས་ལ་ལས་ཀ་བཅོལ་བ་དང་། ཕྱི་ནང་གི་འབྱུང་བ་ལྔ་འཁྲུགས་པ་ལས་སྐྱེ་བའི་རྐྱེན་ངན་ཞི་ནས་བསོད་ནམས་འཕེལ་བ་དང་ཁ་ལས་རླུང་རྟ་དར་བ་བཅས་ཀྱི་ཆེད་དུ་འདོགས་པ་རེད།
སྦྱོང་བརྡར།
གཤམ་གྱི་རླུང་རྟའི་ཁྱད་ཆོས་རྣམས་ཀྱི་མཚོན་དོན་མདོར་བསྡུས་རེ་བྲིས།
a. སྔོན་པོ་སོགས་ཚོན་མདོག་ལྔ། b. ཟུར་བཞིའི་སྟག་སོགས་ཀྱི་རི་མོ་བཞི།
འོག་གི་དྲི་བ་རྣམས་ལ་ལན་བྲིས། a. རླུང་རྟ་ནི་ས་ཆ་གང་དང་གང་དུ་འདོགས་པ་ཡིན་ནམ། b. རླུང་རྟ་འདོགས་པའི་དགོས་པ་ནི་གང་ཡིན་ནམ། c. རླུང་རྟའི་ངོས་སུ་སེམས་ཅན་གྱི་རི་མོ་ལས་གཞན་པ་གང་ཡོད་དམ།
སེམས་འབྱུང་ཀུན་འགྲོའི་སྐོར།
[རྩོམ་སྒྲིག]"ཚོར་བ་འདུ་ཤེས་སེམས་པ་དང་།། ཡིད་ལ་བྱེད་དང་རེག་པ་ལྔ།། གཙོ་སེམས་ཀུན་ཀྱི་འཁོར་དུ་ནི།། འགྲོ་ཕྱིར་ཀུན་འགྲོ་ཞེས་བྱའོ།།"ཞེས་གསུང་པ་ལྟར་ཐེག་ཆེན་གྱི་མངོན་པའི་གཞུང་རྣམས་སུ་སེམས་འབྱུང་ཀུན་འགྲོ་ལ་དབྱེ་བ་ལྔར་གསུང་ཡོད། —