User talk:Potalalotus1

ཐང་དཀར་དགོན་གྱི་ལོ་རྒྱུས། ཐང་དཀར་དགོན་ཞེས་པའི་ཐང་དཀར་གྱི་དོན་ནི་ཤོག་དྲུག་སྐྱབས་མགོན་ངག་དབང་བློ་བཟང་བསྟན་འཛིན་འཕྲིན་ལས་ཀྱི་ཞལ་ནས་བཀྲ་ཤིས་ཐང་དཀར་པད་འདབ་རྒྱས་པའི་སྟེང་ཞེས་གསུངས་པ་ལྟར་ཐང་དཀར་ཞེས་པ་ནི་རྒྱལ་མཆོག་བདུན་པ་ཆེན་པོ་ལི་ཐང་དུ་འཁྲུངས་དུས། མ་ཡུམ་གྱིས་རྒྱབ་ཏུ་ཁུར་ནས་ལྟོ་སློང་སར་སོང་སྟེ་ཐང་འདིར་སླེབས་པའི་ཚེ་བུ་ཆུང་ས་ཆ་འདིར་བཞག་ནས་མ་ཡུམ་ལྟོ་སློང་དུ་སོང་སྐབས་སུ། གློ་བུར་དུ་ཆར་པ་བབས་པར་མ་ཡུམ་གྱིས་ཆར་གྱིས་བུ་ལ་གནོད་ཡོང་སྙམ་ནས་མགྱོགས་པར་བུ་རྩར་སླེབས་དུས་བྱ་ཐང་དཀར་རྒོད་པོ་ཞིག་གིས་གཤོག་པའི་ནང་དུ་བཞག་ཏེ་སྲུང་སྐྱོབ་བྱེད་བཞིན་ཡོད་པ་མཐོང་བས་ཕྱིས་སུ་མིང་དེ་ལྟར་ཐོགས་སོ།། བོད་རབ་བྱུང་བཅུ་གཅིག་པའི་ཤིང་སྟག་ལོ་ལ་(1674)དགའ་ལྡན་ཁྲི་ཆེན་ང་བཞི་པ་ངག་དབང་མཆོག་ལྡན་གྱིས་གུར་དཀར་པོའི་དགོན་པ་གྲྭ་ཚང་གི་མགོ་[page 547] བཙུགས་པར་མཛད། ཁོང་གིས་གུར་དཀར་པོའི་དགོན་པ་བརྒྱ་དང་བཅུ་གསུམ་བཏབ་པའི་ཡ་གྱལ་གཅིག་ཡིན། གྲུབ་མཐའ་གནའ་ནས་ད་ལྟའི་བར་དུ་དགེ་ལུགས་པ་ཡིན། དགོན་པའི་མིང་གི་རྣམ་གྲངས་སྐོར། ཨོ་ཐོག་གྲྭ་ཚང་། གཙང་ཤུལ་དགོན། དགའ་ལྡན་བཀྲ་ཤིས་གླིང་། ཐང་དཀར་དགོན། ཁམས་ནཱ་ལེནྡྲ་ཐེག་ཆེན་བྱང་ཆུབ་ཆོས་གླིང་བཅས་སོ།། བླ་རབས་སྐོར་ནི་ཁྲི་ཆེན་ངག་དབང་མཆོག་ལྡན་ནི་རྭ་སྒྲེང་སྐུ་ཕྲེང་དང་པོ་དང་རྒྱལ་མཆོག་སྐུ་ཕྲེང་བདུན་པ་ཆེན་པོའི་ཡོངས་འཛིན་ཡིན། གཙང་ཤུལ་སྐུ་ཕྲེང་དང་པོ་འཕྲིན་ལས་དམ་ཆོས། སྐུ་ཕྲེང་གཉིས་པ་འཕྲིན་ལས་བློ་ཆོས། སྐུ་ཕྲེང་གསུམ་པ་ངག་དབང་སྐལ་བཟང་འཕྲིན་ལས། དགེ་བའི་བཤེས་གཉེན་ཨ་དམ་ཕུན་ཚོགས་ཀྱི་སྐུ་ཕྲེང་གཉིས་པ་རྗེ་བཙུན་བསྟན་འཛིན་བདེ་ལེགས་ཐུབ་བསྟན་ཆོས་ཀྱི་ཉི་མ་དཔལ་བཟང་པོ་མཆོག་ཡིན། དགེ་བའི་བཤེས་གཉེན་ཡེ་ཤེས་བློ་གྲོས་ཀྱི་སྐུ་ཕྲེང་གཉིས་པ་དམ་ཆོས་ཡེ་ཤེས། དགེ་བཤེས་རབ་བརྟན་བསམ་འཕེལ་གྱི་སྐུ་ཕྲེང་གཉིས་པ་བསྟན་འཛིན་ཐེག་མཆོག དགེ་བཤེས་རབ་བརྟན་བསམ་འཕེལ་གྱི་སྐུ་ཕྲེང་གཉིས་པ་བསྟན་འཛིན་ཐེག་མཆོག དགེ་བཤེས་འཕྲིན་ལས་མཁས་བཙུན་གྱི་སྐུ་ཕྲེང་གཉིས་པ་རབ་ཆུང་མ། སྐུ་ཕྲེང་གསུམ་པ་བློ་བཟང་བསྟན་འཛིན། སྐུ་ཕྲེང་བཞི་པ་དགེ་བཅུ་ཡར་འཕྲེལ། སེར་ཤུལ་དགེ་བཤེས་ཀྱི་སྐུ་ཕྲེང་གསུམ་པ་བསྟན་འཛིན་དམ་ཆོས། ངག་དབང་བདེ་ལེགས་ཀྱི་ཡང་སྲིད་དམ་ཆོས་ཉི་མ། ཁམས་སྤྲུལ་བསྟན་པའི་ཉི་མའི་ཡང་སྲིད་བློ་བཟང་དབང་ཕྱུག ཞྭ་ཆེར་སྤེལ་བཀའ་འགྱུར་རིན་པོ་ཆེའི་སྐུ་ཕྲེང་གསུམ་པ་ཚུལ་ཁྲིམས་རྒྱ་མཚོ་བཅས་སོ།། མཁན་རབས་ཀྱི་སྐོར། གཙང་ཤུལ་དགེ་བཤེས་འཕྲིན་ལས་དམ་ཆོས། དུར་ར་བླ་མ་བརྩོན་འགྲུས་ཕུན་ཚོགས། ཀྱ་རྒན་དགེ་བཤས་རབ་ཡངས་རྒྱ་མཚོ། ཨ་ཚབ་དགེ་བཤེས་བློ་བཟང་དམ་ཆོས། དུར་ར་བླ་མ་མཐུ་སྟོབས་ཉི་མ། དེ་ནས་ཨ་དམ་ཕུན་ཚོགས། བླ་མ་འདིས་འདུལ་བ་གཞི་གསུམ་གྱི་ཆོ་གའི་དབུས་བཙུགས་པར་མཛད། ཁོང་ནི་མདོ་སྔགས་གཉིས་ཀྱི་བསྟན་པ་ལ་བཀའ་དྲིན་ཤིན་ཏུ་ཆེ། དགེ་བཤེས་ཡེ་ཤེས་བློ་གྲོས། གཙང་ཤུལ་སྐུ་ཕྲེང་གཉིས་པ་འཕྲིན་ལས་བློ་གྲོས། དགེ་བཤེས་ཕུན་ཚོགས་རྒྱལ་མཚན། སྤྲུལ་སྐུ་རབ་བརྟན་བསམ་འཕེལ། བློ་བཟང་འགྱུར་མེད། ཏིང་འཛིན་ཨ་བློ། སེར་ཤུལ་དགོན་མ་བསྡུས། སྐལ་བཟང་དམ་ཆོས། སྤྲུལ་སྐུ་བློ་བཟང་བསྟན་འཛིན་བཅས་ཡིན་ནོ།། དུས་ཕྱིས་ཆོས་སྒོ་ཕྱེས་ནས་མཁན་རབས་རྣམས་ནི་ཁྲི་ཐོག་ཚེ་འཕེལ། བློ་བཟང་བྱམས་པ། དམ་ཆོས་ཚེ་འཕེལ། བླ་མ་ཨ་ཚོ། གཙང་ཤུལ་སྐུ་ཕྲེང་གསུམ་པ་ཚྭ་སྟག་དགེ་ལེགས་རྒྱ་མཚོ། སྐལ་བཟང་འཕྲིན་ལས། ཨ་ཁུ་དམ་ཆོས། དགེ་བཤེས་བློ་བཟང་མགོན་པོའི་བར་དུ་ཡིན། ས་གནས་འདིར་སྐྱེས་ཆེན་དམ་པས་ཞབས་ཀྱིས་བཅགས་ཚུལ། རྒྱལ་པ་སྐལ་བཟང་རྒྱ་མཚོ། ཁྲི་ཆེན་ངག་དབང་མཆོག་ལྡན། ཏྲེ་ཧོར་སྐྱབས་མགོན། གདན་མ་སྟོང་ལྡན་རིན་པོ་ཆེ། ལྕང་སྐྱ་རོལ་བའི་རྡོ་རྗེ། ཤོག་དྲུག་སྐྱབས་མགོན་སྐུ་ཕྲེང་ཐོག་མ་ངག་དབང་བློ་བཟང་བསྟན་འཛིན་[page 548] འཕྲིན་ལས་བཅས་བྱོན་མྱོང་། ཏྲེ་ཧོར་སྐྱབས་མགོན་ཚང་གིས་དུས་འཁོར་དབང་ཆེན་གནང་སྐབས་རྣམ་རྒྱལ་མཆོད་རྟེན་ཞིག་ཀྱང་བཞེངས་ཡོད། འགན་ཁུར་གྱི་མི་སྣའི་སྐོར། བསྟན་བདག་མཁན་པོ་གཅིག ཁྲི་བ་གཅིག དབུ་མཛད་གཅིག དགེ་སྐེས་གཅིག མཆོད་གཡོག་གཅིག ཕྱག་མཛོད་གཅིག མགོན་བླ་གཅིག ལོ་གཉིས་རེའི་མཚམས་ནས་གོང་གི་འགན་ཁུར་རྣམས་བརྗེ་ལེན་བྱེད་དགོས། གྲྭ་པ་ཆིག་སྟོང་ལྷག་ཙམ་ཡོད། སྦྱིན་བདག་གི་སྡེ་བའི་དུད་གྲངས་ཆིག་སྟོང་ཙམ་ཡོད། འཛུགས་སྐྲུན་སྐོར། འདུ་ཁང་ནི་གུར་ཆེན་ཞིག་དང་། གྲྭ་ཤག་གི་ཚབ་གུར་ཆུང་བརྒྱ་ལྷག་ཙམ་ཡོད། སྐུ་གསུང་ཐུགས་རྟེན་སྐོར། གསེར་ཟངས་ལས་གྲུབ་པའི་བྱམས་པ་མགོན་པོའི་སྐུ་སྤྱི་ཁྲི་གང་ཅན་གཅིག དེ་མིན་གསེར་སྐུ་ཉིས་བརྒྱ། གསེར་ནག་གིས་བྲིས་པའི་དུས་འཁོར་གྱིོ་ཞལ་ཐང་གཅིག གསེར་དངུལ་གྱི་བྲིས་པའི་བཀའ་བསྟན་ཆ་གཉིས་བཅས་ཡོད། མཆོད་རྟེན་ཆ་བརྒྱད་གཅིག་ཡོད། རྩོད་གྲྭ་གཅིག་ཡོད་ཅིང་སྒྲུབ་པ་གྲྭ་ཚང་ནི་མེད། གྲྭ་ས་འགྲོ་ས་ནི་གདན་ས་གསུམ་ཡིན། དཔལ་འབྱོར་གྱིོ་འོང་ཁུངས། གནའ་ནས་ད་ལྟའི་བར་དུ་དད་ལྡན་སྦྱིན་བདག་ཚོས་འབུལ་བ་ལ་བརྟེན་དགོས། ས་ཁྱོན་ནི་དགོན་པ་འདི་བཏབ་སའི་ཐང་རྒྱ་ཡོངས་ཡིན་ནོ།། མཆོད་ཆ་དང་རོལ་ཆས་སྐོར། དངུལ་བུམ་བཅུ། དངུལ་གྱི་ཐོབ་བུ་བཅུ་གསུམ། དབང་རྫས་ཆ་ཚང་བཅུ་གསུམ། སྦུག་ཆལ་ཆ་བརྒྱ་དང་ལྔ་བཅུ། གསེར་གྱི་ར་མ་ལུག་ཅན་གྱི་རྒྱ་གླིང་ཆ་གཅིག སྤོས་ཕོར་ཆ་གཅིག རྫོང་བ་དཔོན་ཚང་གིས་བཞག་པའི་ཨ་རིའི་རྒྱ་གསེར་ལས་གྲུབ་པའི་སྤོས་གོས་ཆ་གཅིག དུང་ཆེན་ཆ་གསུམ། གསེར་ཀོང་ཆ་གཅིག དངུལ་ཀོང་ཆ་ལྔ། ནང་མཆོད་ཆ་བཞི། རིགས་ལྔ་ཨོ་ཐོག་དཔོན་པོ་ཚང་གི་བཞག་པའི་གཞི་གསེར་དངུལ་གྱི་མཐོང་ཕྱེ་མ་ཆ་སྡེར་ལྔ། གོས་ཆེན་སྣ་ཚོགས་ལས་གྲུབ་པའི་རྒྱལ་མཚན་ཆ་བཅོ་ལྔ། བ་དན་ཉེར་གཅིག དགེ་བཤེས་རབ་བསྟན་གྱིས་ཕུལ་བའི་མཛད་བརྒྱ་དང་། དཔག་བསམ་འཁྲི་ཤིང་ཐང་ག་ལྔ་བཅུའི་གཙོའི་ཐག་ག་ཆེ་ཆུང་བཞི་བརྒྱ། གཞན་ཚོགས་ཟངས་ཆུ་ཟོམ་བཅུ་གསུམ་ཤོང་བ་གསུམ། གདན་རིང་ཆེ་ཆུང་སུམ་ཅུ་བཅས་ཡོད་མོད་ཀྱང་། རྗེས་སུ་ངོ་རྒོལ་བཞི་དང་རིག་གནས་གསར་བརྗེ་བཅས་ཀྱིས་གུར་དཀར་པོའི་དགོན་པ་མེད་པར་བཏང་། དེང་སང་གི་གནས་ཚུལ། སྔར་མེད་གསེར་བཞེངས་སྐོར་ལ་ཚོགས་ཆེན་འདུ་ཁང་གཅིག སྲུང་མ་ཁང་གཅིག ཇོ་ཁང་གཅིག སྨན་ཁང་གཅིག དུང་འཁོར་ཁང་གཅིག གཟིམ་ཆུང་གཅིག ཚོགས་ཆེན་ཁང་གཅིག གྲྭ་ཤག་བརྒྱ་བཅས་ཀྱི་ཕྱིའི་འཛུགས་སྐྲུན་དང་། ཤོག་སྒོར་ཁྲི་ཚོ་བཞི་བཅུས་བཞེངས་པའི་ཇོ་བོའི་སྐུ་རིན་པོ་ཆེ་ཕྲ་ཅན་གཅིག ཞལ་ཐང་ཆེ་ཆུང་དྲུག་ཅུ། སྨན་འདམ་ལས་གྲུབ་པའི་སྐུ་ཆེ་ཆུང་བརྒྱ་དང་སུམ་ཅུ། གསེར་སྐུ་ཆེ་ཆུང་བརྒྱ་དང་བཅུ། ཤིང་ལས་གྲུབ་པའི་སྐུ་འདྲ་ཆེ་ཆུང་བརྒྱ་དང་སུམ་ཅུ། བཀའ་འགྱུར་ཆ་བཞི། བསྟན་འགྱུར་ཆ་གཉིས། དགེ་ཕྱོགས་ཀྱི་འདོན་ཆ་ཡོངས་རྫོགས་དང་དེ་མིན་དཔེ་ཆའི་འགྲེལ་བ་མང་ཙམ་དང་། མཆོད་རྟེན་ཆེ་ཆུང་བཅུ་གཉིས་བཅས་ཀྱི་རྟེན་བཞེངས་གསར་དུ་གྲུབ་པོ། མཆོད་ཆ་དང་རོལ་ཆས་ཆ་ཚང་གཅིག་ཀྱང་གསར་དུ་གྲུབ་ཟིན། དུས་མཆོད་སྐོར་ལ། དབྱར་ཆོས་དང་[page 549] དགུན་ཆོས་ཀྱི་སྲོལ་ཡང་ཚུགས་ཡོད་དོ༎ རྩོད་གྲྭར་རིག་གནས་ཀྱང་སློབ་ཁྲིད་བྱེད་འགོ་ཚུགས་ཡོད། གྲྭ་པ་བདུན་བརྒྱ་ལྷག་ཙམ་ཡོད། དགོན་པའི་མངའ་འོག་གི་སྦྱིན་བདག་གི་དུད་གྲངས་ལྔ་བརྒྱ་དང་ཉི་ཤུ་ཙམ་ཡོད་དགོན་པ་བཏབ་ནས་ད་བར་ལོ་གསུམ་བརྒྱ་ཉེར་གཅིག་སོང་ཟིན། དགོན་པ་བཞེངས་མཁན་གྱི་འགན་ཁུར་གཙོ་བོ་བྱེད་མཁན་ནི་ཨ་དམ་ཕུན་ཚོགས། མཁན་པོ་བློ་བཟང་མགོན་པོ། སྐུ་ཞབས་དགེ་བཅུ་ཡར་འཕེལ། ཚེ་རྡོ། མཁས་བསྟན། ཚེ་རྣམས་བཅས་གཙོ་བྱས་པའི་སྐྱ་སེར་དགོན་སྡེ་ཡོངས་ཀྱི་ནུས་མཐུ་ཆིག་སྒྲིལ་གྱིས་ད་ལྟ་དགོན་པ་འདི་བཞེངས་ཟིན་པ་ཡིན།

ཞེས་རབ་བྱུང་བཅུ་བདུན་པའི་ཤིང་ཕག་ལོ་ལ་སྐུ་ཞབས་དགེ་བཅུ་ཡར་འཕེལ་དང་དགེ་བཤེས་བློ་བཟང་བཅས་ལ་ཞིབ་འདྲི་བྱས་ནས་རིག་བསྟན་གྱིས་ཉག་ཆུ་ཁའི་ཨོ་ཐོག་དགོན་ནས་བྲིས་པའོ༎ ༎

ལི་ཐང་གནས་ནང་དགོན།

འབྲེལ་ཡོད་རྣམ་ཐར་དང་ལོ་རྒྱུས་ལས་བྱུང་བར་བལྟས་ན། གནས་ནང་གི་གཙུག་ལག་ཁང་འདི་དུས་མཁྱེན་གཤེགས་རྗེས་དབྲ་དགེ་ཆོས་བརྩོན་གྱིས་ཡུན་རིང་བསྐྱངས་ནས་འགྲོ་མགོན་ཆོས་རྒྱལ་འཕགས་པ་ཧོར་ཡུལ་དུ་ཕེབས་སྐབས། དབྲ་དགེ་ཆོས་བརྩོན་གྱིས་འབུལ་ནོད་དང་དགོན་གནས་ལ་བདག་རྐྱེན་ཞུས་པས་ལྷ་ཁང་འདི་རྣམས་རྩིས་བཞེས་མཛད་དེ། དེ་ནས་བརྩམས་དཔལ་ལྡན་ས་སྐྱ་པའི་ཆོས་རྒྱུད་དུ་གྱུར་རྗེས་སུ་མཚན་ཉིད་ཀྱི་བཤད་གྲྭ་དང་རིགས་གཏེར་རྩ་འགྲེལ་ལ་འཆད་ཉན་ཤིན་ཏུ་དར་ཞིང་བཀའ་བཞི་པ་རིག་པའི་སེང་གེ་སོགས་ཀྱིས་གདན་ས་འདིར་རིགས་གཏེར་ལ་སྦྱོང་པ་མཛད། དེ་དག་དགོན་གསར་སྟག་དེལ་གོང་འོག་ཐང་འབོལ་ཕན་ཚུན་སོགས་དཔལ་ལྡན་ས་སྐྱའི་མདོ་ལུགས་ཀྱི་བཤད་པ་སྔགས་ལུགས་ཡི་དམ་ཆོས་སྐྱོང་དཀྱིལ་འཁོར་གྱི་ཕྱག་བཞེངས་བཅས་དར་རྒྱས་བྱུང་བ་དང་། སླར་ཡང་དགེ་སློང་ཆོས་ཀྱི་དབང་ཕྱུག་གིས་ལྷ་ཆེན་བྱིན་རླབས་དཔལ་འབར་བཞེངས་ཏེ་གཙུག་ལག་ཁང་རྟེན་དང་བརྟེན་པ་བཅས་པ་བསྐྱར་གསོ་མཛད་པ། གཞན་ཡང་དགོན་སྡེ་མང་པོ་དར་གུད་སྣ་ཚོགས་རྐྱེན་གྱིས་ཕྱིས་སུ་མེད་པར་གྱུར་བ་འདྲ། སྔོན་རྗེས་སུ་གསང་སྔགས་སྔ་འགྱུར་གྱི་བསྟན་པའི་བདག་པོ་ཁམས་ཀྱི་ཀཿཐོག་དགོན་པ་ཕྱག་འདེབས་པ་པོ་ཀཿདམ་པ་བདེ་གཤེགས་ཀྱིས་རྗེ་དུས་གསུམ་མཁྱེན་པ་གནས་འདིར་མཇལ་ཏེ། འཁོར་ལོ་བདེ་མཆོག་གི་དབང་བསྐུར་དང་གདམས་པ་མང་པོ་ཞུས་ནས་ཡུན་རིང་བཞུགས་མྱོང་བ་དང་། ཡང་འགྲོ་མགོན་རས་ཆེན་བསོད་ནམས་གྲགས་པ་འགོང་སྨད་ནས་ཡར་གནས་ནང་དུ་བྱོན་པའི་ཚེ། དགེ་བསྙེན་རྡོ་རྗེ་དཔལ་བརྩེགས་རྟ་པ་མང་པོའི་ཚོགས་ཀྱིས་བསུ་བ་བྱས། གནས་ནང་དུ་དུས་མཁྱེན་དང་མཇལ་བས་ཁྱོད་སྔགས་ཆུང་ཤེས་རབ་ཅན་ཞིག་འདུག ངའི་སློབ་མ་འབལ་ཚ་སྟག་དེལ་བ་དང་ལྡེ་ཆུང་སངས་རྒྱས་ལ་སོགས་པ་ཡོད་ཁྱེད་རང་ཡང་དེ་རྣམས་ཀྱི་རྩར་སོང་གསུང་སྟེ་བྱོན་ནས། ནུས་པ་འགྲན་པས་སློབ་མ་ལ་ཡོན་ཏན་འདི་ལྟ་བུ་ཡོད་པ་ལ། བླ་མ་ལ་ནི་ལྟ་སྨོས་ཀྱང་ཅི་དགོས་སྙམ་དུ་དད་པ་རང་དབང་མེད་པ་སྐྱེས། དུས་མཁྱེན་ཡབ་སྲས་ཀྱི་ཉམས་རྟོགས་ཡོན་ཏན་གྱིས་ཐུགས་ཡིད་འཕྲོག་སྟེ་རྗེས་སུ་བཟུང་། གདམས་ངག་མང་པོ་ཞུས་ཤིང་གདུལ་བྱ་དང་སྐུ་བསོད་རྒྱས་པར་ལུང་བསྟན། ཡང་དཔལ་ཀརྨ་པ་ན་རིམ་གཉིས་པ་ཀརྨ་པཀྵྀ། ཀཾ་པོ་གནས་ནང་དུ་བྱོན་པའི་ཚེ། འཇའ་ཚོན་ལྟ་བུའི་གཞལ་ཡས་ཁང་དུ་བདེ་མཆོག་གི་ལྷ་ཚོགས་དང་། དགེ་བསྙེན་དཔལ་བརྩེགས་ཀྱིས་རིན་པོ་ཆེའི་ཁྲི་བརྩིགས་ནས་ཁྱེད་འདིར་བཞུགས་ཟེར་བ་རྨིས་པ་གདན་ས་གསར་རྙིང་གཉིས་ཟུག་པའི་བརྡར་འདུག་གསུངས། གནས་ནང་ནས་འཆར་སློང་ནས་སྒོམ་པའི་ཚེ། ཕྱོགས་བཅུའི་སངས་རྒྱས་ཀྱི་ཞིང་དང་སྐུའི་བཀོད་པ་ཐམས་ཅད་ཞག་བདུན་གྱི་བར་དུ་གསལ་བར་གཟིགས་པ་བྱུང་བ། དེ་ནས་སྤུངས་རི་ལ་འབྱོན་པའི་ཚེ། གནས་ནང་ལུང་པའི་གཡས་ཕྱོགས་དཔའ་བོའི་དཀྱིལ་འཁོར།གཡོན་ཕྱོགས་དཔའ་མོའི་དཀྱིལ་འཁོར་རྣམས་གར་ཁྱུག་ཁྱུག་བྱེད་ཅིང་བསྐྱེལ་བར་གཟིགས། ཡང་ཀརྨ་པ་རང་བྱུང་རྡོ་རྗེ། ཀཾ་པོ་གནས་ནང་དུ་བྱོན་པའི་ཚེ་དགེ་བསྙེན་རྡོ་རྗེ་དཔལ་བརྩེགས་དེ་རྟ་དཀར་རྔོག་དམར་ཞོན་ཞིང་དར་མདུང་ཐོགས་ནས་དགའ་བཞིན་དུ་བསུ་བ་བྱེད་པ་གཟིགས།ཤར་ཀོལ་ཏེའི་འཁྲུག་ཆེན་སུས་ཀྱང་མ་བཟླུམ་པར་ཡུན་རིང་བ་དེ་ལྷ་འདྲེ་འཁྲུགས་པར་མཁྱེན་ནས་ཏིང་ངེ་འཛིན་གྱིས་ལྷ་འདྲེ་རྣམས་བཀུག་སྟེ་ཟིལ་གྱིས་མནན་པས་བཀའ་བསྒྲུབ་པར་དམ་བཅས་ཏེ་དེ་ཉིད་དུ་རང་ཞིར་སོང་བ། ཡང་དཔལ་ཀརྨ་པ་ན་རིམ་བདུན་པ་ཆོས་གྲགས་རྒྱ་མཚོ་གདན་ས་གནས་སྒོའི་ཀ་ཀ་རི་ཕུག་ཏུ་ཕེབས། མཁན་ནང་དགེ་འདུན་གྱིས་བསུ་ཚེ་ངོ་མཚར་གྱི་ལྟས་དང་གཟིགས་སྣང་མང་དུ་བྱུང་། གྲུབ་ཆེན་པཀྵྀའི་སྒྲུབ་གནས་རྣམས་སུ་ཕེབས། གྲུབ་ཐོབ་ཆེན་པོའི་སྐུ་འདྲ་གསུང་བྱོན་མ་སོགས་ལ་མཆོད་པ་ཆེར་མཛད། ཕྱག་ནས་མང་དུ་ཟུག ཆོས་འབྱུང་སྟེང་གི་ཕ་ཝང་ཞིག་ལ་ཞབས་རྗེས་དྲུག རྒ་ལོ་ཕུག་ཏུ་ཞབས་རྗེས་དྲུག་རྣམས་བཞག ཆོས་ཁྲི་སར་ཀུན་གྱིས་མཐོང་བར་ཞབས་གཉིས་ཀའི་རྗེས་ཤིན་ཏུ་གསལ་བར་བཞག རྟོགས་ལྡན་ཆོས་འབུམ་ལ་རྒ་ལོ་ཕུག་གི་ལམ་དུ་ཆིབས་པ་ལྷུན་གྲུབ་ཀྱི་ཞབས་རྗེས་ཡོད་ཟེར་བ་རྨིས་པས་ནམ་ལངས་པ་ན་ཕྱིན་ཏེ་ཉུལ་བས་གསལ་པོར་མཇལ། ཡང་དཔལ་ཀརྨ་པ་ན་རིམ་བརྒྱད་པ་རྗེ་བཙུན་མི་བསྐྱོད་རྡོ་རྗེ་ཀཾ་པོ་གངས་རར་ཕེབས། ཀ་ཀ་རི་ཕུག འཇའ་ཚོན་གླིང་། ཆོས་འབྱུང་གོང་འོག་རྣམས་སུ་ཞབས་རྗེས་རེ་གནང་སྟེ་བྱོན་པ། ཡང་གོང་མའི་དབུ་བླ་ལྕང་སྐྱ་རོལ་པའི་རྡོ་རྗེ་རྒྱལ་བ་བསྐལ་བཟང་རྒྱ་མཚོ་ཁམས་མགར་ཐར་ནས་ལྷ་ལྡན་དུ་བསུར་ཕེབས་སྐབས་གནས་འདིར་ཕེབས་ཏེ་ཆོས་འབྲེལ་མཛད། ཡང་རྗེ་བརྒྱད་པའི་རིགས་ཀྱི་བདག་པོ་འདན་མ་གྲུབ་ཆེན་སངས་རྒྱས་མཉན་པ་ཀཾ་པོ་གནས་ནང་དུ་བྱོན་ཏེ། མེ་མ་བུས། གཡོས་པའི་ཟས་མ་གསོལ་བར་རླུང་དང་རིག་པའི་བཅུད་ལེན་ཁོ་ན་ལོ་གསུམ་བཞུགས། གཞན་ཡང་ཞྭ་དམར་དཀོན་མཆོག་ཡན་ལག་དང་། གོ་ཤྲཱི་གྲགས་པ་དོན་གྲུབ། སི་ཏུ་ཆོས་ཀྱི་རྒྱལ་མཚན། གར་དབང་དྲུག་པ། སི་ཏུ་ཆོས་ཀྱི་འབྱུང་གནས་སོགས་ཀཾ་པོ་གནས་ནང་དུ་ཕེབས་ཏེ་དགོན་སྡེ་ཞིག་གསོ་དང་། སྐུ་མཚམས་བཞུགས་པ། དད་ལྡན་རྣམས་ལ་ཆོས་ཁྲིད་དང་། རབ་བྱུང་དང་བསྙེན་རྫོགས་མཛད། ཤཱཀྱའི་དགེ་སློང་སྤོང་བ་པ་ཆོས་ཀྱི་དབང་ཕྱུག་གིས་གནས་མཆོག་དེ་ཉིད་ཀྱི་གནས་ཡིག་རྒྱས་པ་བཀོད་པ་སོགས་ལོ་རྒྱུས་ཕྱི་ནང་གསང་གསུམ་གྱི་གནས་ཚུལ་དང་བསྟུན་པའི་རྣམ་བཤད་བསམ་གྱིས་མི་ཁྱབ་པ་ཡོད་ཅིང་མཐོང་ཐོས་དྲན་རེག་ཐམས་ཅད་གྲོལ་བ་བཞི་ལྡན་གྱི་གནས་མཆོག་ཁྱད་དུ་འཕགས་པར་ཆགས་སོ། ། 　དེ་ལྟར་གནས་མཆོག་འདི་ནི་གོང་ཞུས་ཀྱི་ཐུན་མིན་རྣལ་འབྱོར་པ་དང་། འཕགས་པ་ཆེན་པོ་རྣམས་ཀྱི་གཟིགས་ངོ་ཇི་ལྟར་ཡོད་པ་ཙམ་མ་ཡིན་པ། ཐུན་མོང་གི་སྣང་ངོ་ལའང་། མཐོ་ཞིང་བརྗིད་པའི་གངས་རིའི་ཕྲེང་བ། སྐར་ཚོགས་བཀྲམ་འདྲའི་མཚེའུ་དང་ཆུ་མིག མ་སླེབས་མྱོང་མེད་བྲག་དང་བྲག་ཕུག ཁེངས་པས་རྒྱགས་པའི་རི་སྐྱེས་སྲོག་ཆགས། དྲི་བཟང་ཁྱབ་པའི་ལྗོན་ཤིང་ནེའུ་གསིང། མངོན་སུམ་གསལ་བའི་རང་བྱོན་ཤུལ་རྗེས། ལོ་རྒྱུས་ཡུན་རིང་ལྡན་པའི་སྒྲུབ་ཕུག་སོགས་ཐུན་མོང་མ་ཡིན་པའི་རང་བྱུང་ཁམས་ཆེན་པོས་གནས་འདིར་མཛེས་སྡུག་གི་ཁོར་ཡུག ཡུལ་སྐོར་གྱི་ཐོན་ཁུངས་ཕུན་སུམ་ཚོགས་པ་ཞིག་བསྐྲུན་ཡོད་པ་རེད། ཉེ་བའི་ལོ་ཤས་རིང་དཀར་མཛེས་ཁུལ་དང་ལི་ཐང་རྫོང་གཉིས་ཀྱི་སྲིད་གཞུང་གིས་གནས་མཆོག་འདི་ཡུལ་སྐོར་གྱི་སྤྱིའི་འཆར་འགོད་ལེགས་སུ་གཏོང་བཞིན་པ་དང་། ཡུལ་སྐོར་གྱི་ཐོན་ཁུངས་གསར་གཏོད་དང་དྲིལ་བསྒྲགས། ཡུལ་སྐོར་གྱི་རྨང་གཞིའི་སྒྲིག་ཆས་འཛུགས་སྐྲུན་བྱེད་བཞིན་པའི་སྐབས་སུ། སྔར་ལས་ལྷག་པའི་སྒོ་ནས་འགོ་མཇུག་ཡོད་པའི་འཛུགས་སྐྲུན་དང། ཚན་རིག་གི་སྒོ་ནས་བདག་གཉེར་བྱེད་དགོས་པའི་ཀཾ་པོ་གངས་རའི་ཡུལ་སྐོར་ཁུལ་གྱི་སྤྱིའི་འཆར་འགོད་ཅེས་བྱ་བ་གཏན་འབེབས་དང་ལག་བསྟར་བྱ་བ་ནི་གལ་ཆེའི་ཆེ་བ་ཞིག་ཡིན་པར་སྙམ། །

http://www.thlib.org/places/monasteries/publications/kham-monasteries.php#!book=/kham-monasteries/v2/b10-18/ http://tb.kangbatv.com/KBTV2014_ZQLY/KBTV2014_GZZ/KBTV2014_RDJQ/201510/t20151028_2557712.html