User talk:Drukgyal
ཁ་ཆེའི་ཕ་ལུའི་འཇིག་རྟེན་ལས་འབྲས་རྩི་ལུགས་ཀྱི་བསླབ་བྱ་བཞུགས་སོ།[རྩོམ་སྒྲིག]
༈ ཨོཾ་སྭ་སྟི། སྔོན་རྒྱ་གར་འཕགས་པའི་ཡུལ་ནས་སངས་རྒྱས་དགུང་ལོ་བཅུ་ལ་ཕེབས་པ་ན། འཛམ་གླིང་སྤྱི་དང་ལྷག་པར་ཡུལ་དགའ་བའི་གཡས་གཡོན་དུ་རྟགས་དང་རྟེན་འབྲེལ་ཕུན་སུམ་ཚོགས་པ་དང༌། རྫུ་འཕྲུལ་མཁས་བཙུན་གྲངས་མེད་ཀྱི་མཛད་པ་རྣམས་བྲི་དགོས་དང༌། ཤོད་དགོས་བྱུང་ན་མི་ཚེའི་ཁ་ལ་མི་ཚེ་མང་པོ་དགོས་པས། མཚམས་ཀྱི་ཞུ་བར། དགུང་ལོ་བཅུ་ལ་ཕེབས་པའི་དུས། དང་པོ་དྲང་པོའི་གཏེར་མཛོད། གཉིས་པ་ཁྲིམས་ཀྱི་འབྱོན་ཁུངས། གསུམ་པ་ངོ་ཚའི་རྒྱ་མཚོ། བཞི་པ་སྦྱིན་པའི་རྒྱལ་སྒོ། ལྔ་པ་ཆོས་གནང་བ་སོགས་རྩ་བ་ལུང་དང་མཉམ་པའི་སྡོང་པོ་ལ་ལོ་འདབ་རྒྱས་པ་ལྟ་བུའི་ཆོས། འཇིག་རྟེན། ལས་རྒྱུ་འབྲས། ཁྲེལ་ངོ་ཚ། བྱམས་སྙིང་རྗེ། ལམ་ལུགས་སྲོལ་སོགས་གང་ཅི་རྒྱ་མཚོ་ཐིགས་པ་དུམ་བུ་བརྒྱ་ཕྲག་མང་པོར་བཏང་བའི་བསླབ་བྱའི་ཚིགས་བཅད་མུ་ཏིག་དར་ལ་བརྒྱུས་པ་བཞིན་རྩོམ་ཚིག་འདི་དག་ཁ་ཆེ་ཕ་ལུ་འཇུ་ཡིས་ཡིག་ཐོག་ཏུ་བཀོད་པའི་བསླབ་བྱ་དངོས་གྲུབ་ཆུ་མིག་གི་ལེའུ་དང་པོའོ།། །། ཆོས་ཀྱི་འབྱོན་ཁུངས་རྡོ་རྗེའི་ཁྲི་ཡི་ཐོག །རྒྱབ་ཏུ་ཆོས་ཀྱི་བྲག་རི་དབུ་འཕང་མཐོ། །མདུན་དུ་སྗིང་རྗེའི་མཚོ་མོ་འོད་ཀྱིས་ཁེངས། །དབྱར་དགུན་མེད་པར་ཉིན་མཚན་རིང་ཐུང་སྙོམས། །དབྱར་ཁ་དྲོ་རྒྱུ་དགུན་ཁ་གྲང་རྒྱུ་མེད། །དབྱར་དགུན་རིང་ཐུང་དྲོ་གྲང་ལྡན་པའི་ས། །ཉི་མ་ནམ་མཁའི་དགུང་དུ་སླེབས་པའི་དུས། །ཁང་ཁྱིམ་མུན་པ་གྲིབ་སོ་འཁོར་རྒྱུ་མེད། །དེ་ཚོ་འཛམ་གླིང་ལྟེ་བའི་རྟགས་དཔྱད་ཡིན། །ལྟེ་བ་དེ་ནས་ལྟེ་བར་འགྲོ་བའི་ལམ། །ལྟེ་བའི་ལྟེ་བ་དེ་ལ་ཕྱག་འཚལ་ལོ། །བོད་ཀྱི་སྐད་དུ་དཀོན་མཆོག་རིན་པོ་ཆེ། །རང་རེའི་སྐད་དུ་གོ་བརྡར་ཕྱག་འཚལ་ལོ། །རྒྱ་གར་འཕགས་པའི་ཡུལ་དུ་འགྲོ་འདོད་ན། །སེམས་པའི་ཡུལ་ན་གཏི་མུག་ཤུལ་མེད་བཟོས། །འདོད་ཆགས་ཞེ་སྡང་དམར་པོའི་མེ་ལ་སྤོར། །བསམ་རྒྱུ་གཅིག་ལ་སྒོམ་རྒྱུ་དྲན་རྒྱུ་གཅིག །གཅིག་ལ་གཉིས་ཀྱི་འབྲེལ་སོ་མེད་ཟེར་ན། །ཆོས་ལ་འགྲོ་ཆས་སྒྲིགས་ཤིག་ཕ་ཡི་བུ། །འགྲོ་གིན་འགྲོ་གིན་ལྟད་མོ་མཐོང་ཡོང་ངོ༌། །བྱས་ཚད་ཆོས་དང་བཏང་ཚད་ལམ་ལ་འགྲོ །བསམ་ཚད་ཐོག་དང་དགོས་ཚད་ལག་ཏུ་ཐེབས། །ལབ་ཚད་གཏམ་དང་དགོས་ཚད་འབེན་ལ་ཕོག །དེ་འདྲའི་ས་རུ་འགྲོ་འདོད་ཡོད་ཟེར་ན། །དགོས་རྒྱུའི་སྙིང་པོ་དོན་གྱི་རྡོག་ཁ་གསུམ། །དང་པོ་སེམས་པ་མེ་ལོང་བཞིན་དུ་དྭངས་གཅིག་དགོས། །གཉིས་པ་དམ་ཚིག་གཙང་ཆུ་བཞིན་དུ་གཙང་གཅིག་དགོས། །གསུམ་པ་ཡག་རྒྱ་སེངྒེ་བཞིན་དུ་ཆེ་གཅིག་དགོས། །དེ་གསུམ་འཛོམ་ན་དེ་རུ་སླེབས་པ་ཡིན། །དེ་འདྲའི་ས་རུ་སླེབས་པར་ཕོ་གཞོན་ཚོ། །རང་ལ་རང་གིས་གོ་ཆ་མ་བཀོན་ན། །འཇིག་རྟེན་འདི་ཡི་འཁོར་དུ་ཐིམ་ཡོང་ངོ༌། །སང་སང་གནངས་གནངས་ཟེར་གྱིན་འགྱངས་ཡོང་ངོ༌། །དེ་འདྲའི་ངང་ནས་འབོད་མཁན་སླེབས་ཡོང་ངོ༌། །དེ་དུས་འགྱོད་པའི་གླིང་ལ་རྒྱབ་ཡོང་ངོ༌། །ཁ་བསུར་སྡོང་པོ་སྐམ་པོའི་རྡོ་ལ་སྐྱེས། །ཡལ་ག་ལོ་འདབ་དེ་མ་ཐག་ཏུ་རྒྱས། །འདབ་ལོ་རེ་རེའི་ཐོག་ཏུ་མཚན་རེ་འཁྲུངས། །མཁས་པ་ཡོངས་ཀྱི་རིག་པ་མི་ཉམས་པ། །ལྟེ་བའི་སྙན་ཞུ་ལྟེ་བའི་དྲུང་དུ་ཕུལ། །བཀའ་ཤོག་རྒྱབ་དང་དམ་ཕྲུག་སྐུ་རྒྱབ་ཏུ། །གཙུག་གི་ནོར་བུའི་དོན་གྱི་རྡོག་ཁའི་ཚིག །སྡིག་ཆེན་བདག་དང་འཁོར་བའི་སེམས་ཅན་སོང༌། །ཆོས་ཀྱི་ལམ་སྣ་ཟིན་པའི་སྙན་ཞུ་དང༌། །འདི་དང་ཕྱི་མ་གཉིས་ཀྱི་རེ་ས་དང༌། །བློ་དང་སེམས་པ་གཉིས་ཀྱི་བཞག་ས་ལ། འབྲལ་བ་མེད་པར་ཐུགས་རྗེས་རྒྱང་ནས་གཟིགས། །ཡེ་ཤེས་སྤྱན་གྱིས་གཟིགས་ནས་ཐུགས་ལ་ཞོག །བྱམས་དང་བརྩེ་བས་བསྐྱངས་ནས་ལམ་སྣ་དྲོངས། །སྐར་ཆེན་འོད་ཀྱི་གླིང་ལ་ཞལ་གཟིགས་ནས། །སྐར་ཆུང་ཆིག་བརྒྱ་ལྔ་བཅུ་ང་གཉིས་བར། །སྙུག་གུར་བཤད་པ་སྙུག་གུས་གོ་སོང་ངོ༌། །ནག་པོའི་རི་མོ་དཀར་པོའི་ཚིག་གིས་ཁེངས། །ཁ་ཆེ་ཕ་ལུའི་བརྙེས་སོ་དྲན་པོས་ཕུལ། །བསླབ་བྱ་ལེའུ་གཉིས་པའོ།། །། ཆོས་དང་འཇིག་རྟེན་ཁག་ཁག་སོ་སོ་རེད། །སེམས་དང་ལུས་པོ་རང་རང་སོ་སོ་རེད། །སེམས་པ་དཀའ་བ་སྤྱད་ནས་འགྲོ་འདོད་ཀྱང༌། །ལུས་པོ་ཞིམ་པོ་ཟས་ནས་སྡོད་འདོད་ཆེ། །ལུས་པོ་སྐྱིད་པོ་སྡོད་པ་ཞག་གསུམ་དང༌། །སེམས་པ་སྡུག་པ་ཕུག་གི་ཕུག་ནས་སྡུག །སེམས་སྐྱིད་འདོད་ན་ལུས་ཀྱིས་དཀའ་བ་སྤྱད། །ལུས་པོ་བསམ་ན་སེམས་པ་སྡུག་ལ་སྦྱོར། །ང་ལ་ཉན་ན་ལུས་སེམས་དབྱེ་བ་ཆོད། །གསེར་དང་ར་གན་བརྗེ་མི་སྨྱོན་པ་རེད། །གཡུ་དང་དོ་ལེ་ནོར་ན་ལྐུགས་པ་རེད། །འདི་དང་ཕྱི་མ་ཁེ་གྱོང་མི་ཤེས་ན། །འཇིག་རྟེན་འཁོར་བའི་མི་ཚེ་འཁྱོལ་འགྲོ་ཟེར། །ལོ་གཅིག་ལོ་གཉིས་མི་དགོས་བརྒྱ་ཡི་བར། །ཐ་མ་ས་རྡོའི་ཕུང་པོ་ས་ལ་ཐིམ། །རྒྱལ་པོ་གསེར་ཁྲིའི་སྟེང་དུ་བཞུགས་པ་དང༌། །སྤྲང་ཕྲུག་བན་པོའི་འོག་ཏུ་སྡོད་པ་གཉིས། །མི་རྟག་འཆི་བ་བྱུང་དུས་འདྲ་འདྲ་རེད། །ཟས་ཀྱི་ཞིམ་མངར་ལྕེ་ནས་མིད་པའི་བར། །འཁོར་བའི་སྐྱིད་སྡུག་ཞག་གསུམ་འདི་ཡི་རིང༌། །སྤྲང་པོ་སྡུག་ཀྱང་མི་ཚེ་འཁྱོལ་འགྲོ་ལོ། །རྒྱལ་པོ་སྐྱིད་ཀྱང་ཐ་མ་ཤི་འགྲོ་ལོ། །དེ་སྔ་སོང་བའི་གྲངས་ཀ་མི་ཤེས་འདུག །ད་རུང་འགྲོ་རྒྱུའི་གདེང་ཚོད་སུ་ཡིས་ཤེས། །ཡོད་གིན་ཡོད་གིན་འགྲོ་གིན་འགྲོ་གིན་དུ། །དོན་དུ་ཡོང་མི་ཚང་མ་འགྲོ་མི་རེད། །འཁོར་བ་འདི་ལ་རྟག་པ་གཅིག་ཀྱང་མེད། །རྟག་པ་མེད་པར་བདེན་པ་སུ་ལ་ཡོད། །རྟག་པ་བརྟན་པ་མེད་པའི་མི་ཚེ་འདི། །ལ་འགོའི་ཁ་ཡི་ཁྲི་གདུགས་ཉི་མ་འདྲ། །བྱོན་ན་མ་གཏོགས་བཞུགས་རྒྱུ་ཡོད་དྭོགས་མེད། །ད་དུང་ཕྲུ་གུའི་སྣང་བ་མ་ཡེངས་ར། །མཁས་པ་ཡིན་ན་དོན་གྱི་རྡོ་ཁ་སྒྲིལ། །དོན་རྩ་སྒྲིལ་ན་དཔའ་བོ་ཡང་རྩེ་རེད། །འཇིག་རྟེན་འཁོར་བའི་ལས་ལ་སྙིང་པོ་མེད། །འཁོར་བ་གཏན་དུ་སྡོད་པའི་ས་མ་རེད། །འགྲུལ་པ་ཞག་གསུམ་གནས་ཚང་གནས་མགྲོན་རེད། །སོ་སོའི་བསམ་བློ་སོ་སོས་གཏང་བ་དགའ། །འགྲུལ་པ་འགྲོ་ཆས་སྔོན་ནས་མ་བསྒྲིགས་ན། །གནས་ཚང་རྒྱབ་ཏུ་འཁྱེར་ནས་འགྲོ་རྒྱུ་མེད། །གནས་མོ་རོགས་ལ་ཁྲིད་རྒྱུ་ཡོང་དོགས་མེད། །རང་ནོར་རང་ལ་བདག་དུས་བསམ་བློ་ཐོངས། །ལྡེ་མིག་མི་ལ་ཤོར་དུས་འགྱོད་པའི་རྒྱུ། །ཕ་མ་ཤི་བ་མང་པོ་བྱུང་ཡོད་འགྲོ། །ཕྲུ་གུ་བསྡད་པ་མང་པོ་མཐོང་ཡོད་འགྲོ། །ཨ་མའི་རྗེས་ལ་ཨོ་ལོ་འགྲོ་དོགས་མེད། །ཨ་མའི་མཇུག་ལ་བུ་མོ་འགྲོ་དོགས་མེད། །སོ་སོའི་ནམ་དུས་སོ་སོས་བསྐྱལ་ནས་འགྲོ། །ཁྱོད་རང་ཁྱོད་རེའི་བསམ་བློ༌ཁྱེད་རང་ཐོངས། །གཅིག་པུར་འགྲོ་བའི་ལམ་གྱི་ལམ་ཆས་འདི། །སྔོན་སྔོན་སྔོན་ལ་སྤྲང་པོའི་ལག་ཏུ་བསྐུར། །ནོར་གྱི་རྟ་ལ་འགྲོ་བའི་བང་འགྲོས་སློབས། །ཕྱི་མ་འགྲོ་བའི་ལམ་ལ་ཐོན་ཆོག་གྱིས། །ཕ་རོལ་ཕྱུག་པོ་ལོངས་སྤྱོད་དགོས་འདོད་ན། །འདི་རུ་སྤྲང་པོའི་སྐྱིད་སྡུག་བལྟས་པ་བཟང༌། །ས་ཡི་འོག་ཏུ་ཁམ་བུ་ཟ་འདོད་ན། །ས་སྟེང་འདི་རུ་ཁམ་སྡོང་བཙུགས་པ་བཟང༌། །ཀུན་ལ་བདེ་བའི་རྩ་བ་བཙུགས་པ་བཟང༌། །ཆོས་ཀྱི་རྩ་བ་མི་སེམས་འཛིན་རྒྱུ་ཡིན། །ཆོས་ཀྱི་སྙིང་པོ་གཞན་དོན་འགྲིག་ལེ་རེད། །ཁྱོད་རང་ཁྱོད་རེའི་འདོད་པ་ཟིན་འདོད་ན། །ཆང་དང་ཨ་རག་དེ་ལས་ལྷག་པ་མེད། །ང་ང་ང་རྒྱལ་ཟེར་བའི་བང་རྒྱས་ཅན། །གསེར་དངུལ་བཟང་དང་གཏམ་དོན་ང་ཟེར་ཞིང༌། །ཞིམ་པོ་ང་དང་འཇམ་པོ་ང་ཟེར་གྱི། །ལེགས་པོ་ང་དང་མཛེས་པོ་ང་ཟེར་གྱི། །གནས་བཟང་བསྐོར་ཀྱང་རྐང་ཆུང་ན་རོགས་ཡིན། །རི་ཁྲོད་འགྲིམས་ཀྱང་རྣ་ལྕོག་ཚ་རོགས་རེད། །རླུང་ལ་བཅུད་སྐོར་མཐོང་ཀྱང་སྟོང་པ་རེད། །རྡེའུ་བཅུད་ལེན་རང་སྡུག་རང་གིས་ཉོས། །བྱ་ལུགས་བྱེད་ལུགས་ལྡན་པའི་ཕ་རྒན་ཚོ། །འདོད་པ་ཅན་གྱི་ཆོས་པ་བརྒྱ་ལས་ལྷག །རང་འདོད་ཅན་གྱི་མི་ལ་ངོ་ཚ་མེད། །ངོ་ཚ་མེད་པའི་མི་དེ་དུད་འགྲོའི་རྒྱུད། །བུ་མོ་རྒྱན་དང་གོས་ཀྱིས་སྤུད་གྱུར་ཀྱང༌། །ནོར་བཟང་རྒྱ་ལུའི་བཙུན་མོ་ཉན་དོགས་མེད། །སེམས་གོས་མ་ཆོད་ཆོས་ཤིག་བྱས་གྱུར་ཀྱང༌། །མེ་ལོང་མུན་པའི་གླིང་དུ་གསལ་དོགས་མེད། །ཆུ་འཐག་གླང་གི་མིག་དེ་ཡོལ་བས་སྒྲིབ། །ཉིན་གང་སོང་ཡང་དགོང་མོ་ས་དེར་ལུས། །འདོད་པའི་ཞགས་ཐག་རྐང་ནས་མ་ཁྲོལ་ན། །ལྷ་ཆོས་བྱེད་སོང་ཟེར་ཀྱང་སྟོང་པ་རེད། །གཤོག་སྒྲོ་དར་གྱི་སྐུད་པས་བསྡམས་པ་ན། །རྒོད་པོ་ཡིན་ཀྱང་ནམ་འཕང་ཆོད་དོགས་མེད། །དམ་ཚིག་སེམས་དང་བརྩོན་འགྲུས་སྙིང་ནས་དགོས། །ཐུག་རྒྱུ་གང་ཡོད་ཅི་ཡོད་སེམས་ལ་ཐུག །ལམ་བུ་འདི་ནི་སེམས་པ་དྲུང་གི་ལམ། །སེམས་ལ་གད་དར་ཡང་ནས་ཡང་དུ་རྒྱོབས། །ཚང་མས་སྨོན་རྒྱུ་ཨེ་ཡོང་ལྟོས་ཤིག་ཨང༌། །གཏམ་བཟང་ཁྱེར་རྒྱུ་ཨེ་ཡོང་ལྟོས་ཤིག་ཨང༌། །སྲོལ་བཟང་ཞོག་རྒྱུ་ཨེ་ཡོང་ལྟོས་ཤིག་ཨང༌། །དེ་གསུམ་འཛོམས་ན་དང་པོའི་དང་པོ་རེད། །ཁ་ཆེ་ཕ་ལུའི་སྗིང་གཏམ་བཤད་ཡོད་དོ། །ཉན་དང་མི་ཉན་སོ་སོའི་བསམ་བློ་རེད། །ཡིན་ཀྱང་རྒྱ་ཤོག་རི་མོས་ཁེངས་སོང་ངོ༌། །རྒྱ་སྨྱུག་སེར་པོའི་བློ་ཁ་རྫོགས་སོང་ངོ༌། །བསླབ་བྱ་ལེའུ་གསུམ་པའོ།། །། ཁྲི་གདུགས་ཉི་ཟླ་ནམ་མཁའི་རྒྱན་ཆ་རེད། །མུན་པ་བསངས་ནས་གླིང་བཞི་འོད་ཀྱིས་ཁེངས། །ཧ་ལོའི་མེ་ཏོག་ལྡུམ་རའི་རྒྱན་ཆ་རེད། །ཞལ་ཁ་ཕྱེ་དུས་ལྡུམ་ལོ་རབ་ཏུ་རྒྱས། །རྒྱལ་པོ་ཆེན་པོ་ཡུལ་གྱི་རྒྱན་ཆ་རེད། །ཁྲིམས་དང་མཐུན་ན་རྒྱལ་གཞིས་མངའ་ཐང་ལྡན། །ཁྲིམས་འགོ་ནོན་ན་བསམ་དོན་ལྷུན་གྱིས་འགྲུབ། །ཁྲིམས་གཞུང་ལྡན་ན་བདེ་སྐྱིད་ཕུན་སུམ་ཚོགས། །མཚོ་མོ་འཁྱོམས་ན་ཉ་མོ་ལས་ཀྱིས་འཁྱོམས། །ལུང་པ་དབུལ་ན་རྒྱལ་པོ་ལས་ཀྱིས་དབུལ། །རྗེ་དཔོན་དར་ཞིང་རྒྱལ་པོའི་ས་སྡེའི་འཕྲུལ། །ཡུལ་སྡེ་མེད་པའི་རྗེ་དཔོན་རྒོད་རེ་བྲོ། །དཔོན་འབངས་ནད་པ་ཨེམ་རྗེའི་དཔེ་བཞིན་དུ། །གཙག་བུ་བཙུགས་པའི་ཤུལ་ལ་རྨ་སྨན་ཐོབ། །བཀའ་བཀྱོན་དགོངས་འཚོམས་བཞག་ལ་བྱམས་སྐྱོངས་མཛོད། །དང་པོ་ཉེས་པ་ཅན་ཡང་བབས་དང་བསྟུན། །གཉིས་པ་ཉེས་པའི་ཐོག་ཏུ་ཉེས་ཐག་ཐོངས། །གསུམ་པ་མི་ངན་རྩ་མེད་བཟོས་ཀྱང་རུང༌། །དེ་འདྲའི་མི་ལ་སྙིང་རྗེ་ལྟ་དགོས་མེད། །ལུ་གུ་མ་འཁྱེར་གོང་ལ་སྤྱང་ཀི་བཟུངས། །ཡུལ་སྡེ་མ་འཁྱོམས་གོང་ལ་མི་ངན་སྤུར། །རྒྱལ་པོ་ཞོ་ལྟར་ཆགས་པ་ཉལ་བསྡད་ན། །ཡུལ་སྡེ་ཁྲག་ལྟར་འཁྲུགས་པ་མི་ཤེས་སོ། །ལུག་རྫི་ཇ་ཆང་གཉིས་ལ་མགོ་འཁོར་ན། །ལུག་གུ་སྤྱང་ཀིས་འཁྱེར་བ་དངོས་བདེན་རེད། །གང་ལ་མཁས་པའི་མི་དེ་ལས་ལ་མངགས། །ཤིང་བཟོ་མཁས་ཀྱང་ལྷ་བྲིས་ཡོང་དོགས་མེད། །སྤྱང་ཀི་དགའ་ཡང་ལུག་རྫི་ཉན་དོགས་མེད། །ལས་འབྲས་ཅན་ལ་མི་ཡི་རྗེ་དཔོན་བསྐོས། །ལུ་གུ་སྤྱང་ཀིའི་ཁ་ལ་བཅུག་ཡོང་ངོ༌། །ཡོན་ཏན་ཅན་ལ་དོན་གྱི་རྡོ་ཁ་སྒྲིལ། །ནོར་བུ་དགོས་ན་རྒྱ་མཚོའི་གཏིང་ལ་ཡོང༌། །དམ་ཚིག་གཙང་མའི་མི་ལ་བློ་གཏད་བཅོལ། །རྡོ་རྗེ་བྲག་ལ་འགྱུར་བ་ཅི་ལ་སྲིད། །ཉིན་མཚན་མེད་པར་མཁས་པའི་མི་དང་བསྟུན། །ཚ་ཁའི་ཁྱི་རོ་ཐ་མ་ཚ་ལ་འགྲོ །ཤ་ཚ་ཅན་ལ་སྐྱོང་ཐར་རིམ་པར་སྤྲོད། །བྱས་རྗེས་བྲུས་ཤུལ་བྱུང་ན་བློ་ཁ་རྫོགས། །བྱས་པ་ཅན་གྱི་སེམས་པ་ཕམ་མ་འཇུག །བྱེད་རྒྱུ་མདུན་དུ་ཡོད་དུས་བྱེད་མཁན་མང༌། །བློ་གཏད་བཅོལ་མི་རྣམས་ཚོ་མཐའ་ནས་སྐྱོངས། །འཛམ་བུའི་གླིང་འདིར་གཏམ་བཟང་སྐད་ཀྱིས་ཁེངས། །དཔའ་རྩལ་ཅན་ལ་དལ་དུས་བདག་པོ་སྤྲོད། །འགག་རྩ་ཐུག་དུས་དགོས་པའི་དུས་ཤིག་ཡོང༌། །རྒྱུན་དུ་བང་མཛོད་ནོར་གྱིས་རྒྱོང་བར་གྱིས། །རྐྱེན་རྩ་ལྷག་ཡོང་དགྲ་བོ་མཆོང་ཡོང་ངོ༌། །དགྲ་བོ་འདུལ་བར་དགོས་རྒྱུའི་དགོས་ཆ་གཉིས། །ནོར་དང་དཔུང་གིས་དགྲ་བོ་ཆམ་ལ་ཕོབས། །ནོར་རྫས་མེད་པར་དཔུང་རོགས་མེད་ཐབས་མེད། །དཔུང་རོགས་འཚོལ་བར་ནོར་རྫས་མེད་ཐབས་མེད། །དེ་གཉིས་འཛོམས་ན་དགྲ་བོ་ལས་ཀྱིས་འཇོམས། །ནོར་ལ་ཕ་མ་བུ་ཚ་སྲོལ་སྲོལ་མཛོད། །ལོ་མང་སོང་བའི་རྒད་པོའི་ཁ་ལ་ཉོན། །སྐྱིད་སྡུག་མང་པོ་མྱོང་བའི་མི་རྒན་རེད། །ལྕགས་ཀྱི་ལྕགས་རིའི་མཚམས་ལ་སླེབས་པའི་དུས། །གཞོན་པའི་ཤེད་ལས་རྒད་པོའི་བྱུས་བྱ་བཟང༌། །དགྲ་པོ་འཕྲལ་གང་འཕྲལ་ལ་འདུལ་འདོད་ན། །སྐབས་ཐོག་གྲོགས་ལ་བཀུག་ནས་བསྡད་པ་བཟང༌། །ཐབས་ཀྱི་སྒོ་ནས་དོན་རྩ་ལོན་ཟེར་ན། །མདའ་གྲི་མདུང་གསུམ་འཕྱར་རྒྱུ་སྨྱོན་པའི་ལས། །མི་ཐུབ་དགྲ་དང་འཛིངས་འཛིངས་བཞག་པ་དགའ། །འཛོམས་རོ་རྩ་འུའི་སྟེང་ལ་རྒྱག་ཐོག་མེད། །འདན་མ་མི་དགོས་གེ་སར་དངོས་ཡིན་ཀྱང༌། །འགྲིགས་ཙམ་བྱུང་ན་འགྲིགས་པ་གཙོ་དོན་ཆེ། །གདོང་བསུ་དཔའ་བོ་རྒྱལ་ཁམས་ཉེས་སུ་ཁོག །ཐབས་རྣམ་འཕྲུལ་གྱི་མེ་མདའ་རྒྱང་ནས་གཏོང༌། །དང་པོ་ཐབས་རྣམ་དགུ་བཅུ་གོ་དགུ་བཏང༌། །དགྲ་ལ་འཁྲུག་དགོས་བྱུང་ཡང་བྱ་ཐབས་མེད། །གོ་བ་མེད་པའི་མི་དེ་ཁྱི་ལས་ལོད། །ཁྱི་ངན་བྱུང་ན་བེར་ཀ་རྣ་ལ་དཀྲིས། །ཕྱིན་ཏོ་ཟེར་ན་ཕྱིན་རྒྱུའི་ལམ་བུ་ཐོངས། །འཛིངས་ཏོ་ཟེར་ན་གོམ་གསུམ་སྔོན་ལ་སྤོས། །འཛོམ་རོ་ཁོང་ཁྲོ་བསླང་དུས་མ་དྲན་ན། །རྗེས་སུ་དྲན་ན་རང་གི་ཁ་ལ་རྒྱོབས། །དོན་རྩ་འཇམ་པོའི་སྒོ་ནས་ལོན་ཟེར་ན། །ང་རྒྱལ་ཁོང་ཁྲོ་དོན་མེད་སྟོང་པ་རེད། །ཁོང་ཁྲོ་དབང་དུ་འདུས་ན་མཁས་པའི་རྟགས། །ཁོང་ཁྲོའི་རྗེས་ལ་འགྲོ་མི་གླེན་པ་རེད། །བསམ་བློ་སྔོན་ལ་ཐོངས་ན་མཁས་པ་དང༌། །རྐྱེན་རྩ་མདུན་དུ་ལྷགས་པ་སུས་ཀྱང་མཐོང༌། །དུང་དཀར་གཡས་འཁྱིལ་བཅག་པ་སུས་ཀྱང་མཐོང༌། །ཆག་པ་སྒྲིག་དགོས་བྱུང་ན་ཉས་སྒྲིག་ཡོང༌། །དགྲ་བོ་མགོ་བོ་སྒུར་ནས་སླེབས་བྱུང་ན། །སྙིང་ནས་ཁོང་ཁྲོ་སེམས་ཀྱི་གཏིང་ནས་ཐོན། །མགོ་བོ་སྒུར་བའི་དགྲ་བོ་ཕམ་མ་ཆུག །ཡིན་ཀྱང་ཁྲམ་དང་གཡོ་སྒྱུར་དོགས་ཟོན་དགོས། །གཙང་པོ་མཁར་བསྐྱིལ་ཞབས་ལ་རྒྱུགས་པ་དེ། །རག་རྒྱུ་མ་བྱུང་ཐ་མར་མཁར་ལ་གཤེད། །ངན་པ་བསྐྱངས་ན་བཟང་པོ་བརྡུང་པ་འདྲ། །རྐུན་བུ་སྲེལ་ན་ཚོང་པ་བསད་པ་འདྲ། །དུག་སྦྲུལ་བཞག་ན་མགོ་ནག་མི་ལ་ངན། །སྤྱང་ཀི་བཞག་ན་གཡང་དཀར་ལུག་ལ་ངན། །ཁྱི་ཡིས་མི་ལ་རྨུག་པ་ཡིན་མི་ཞུ། །ཁྱི་ངན་བདག་འཛིན་བྱེད་མཁན་མི་ངན་རེད། །དགྲ་མགོ་འདུལ་མཁན་གཉེན་མགོ་སྐྱོང་མཁན་དགོས། །འཇམ་རང་དྲག་ན་དགྲ་བོ་གཉའ་རེངས་ཡོང༌། །གྱོང་རང་དྲགས་ན་འགག་ལ་ཐུག་པའི་ཉེན། །འཇམ་རྩུབ་བསྲེས་ནས་ཀུན་ལ་གདོང་ལུགས་མཛོད། །དགྲ་གཉེན་ཚང་མར་ཐབས་ཀྱིས་གྲོགས་ལ་ཁུགས། །འཕྲལ་དང་ཕུགས་ཀྱི་རྒྱལ་ས་འཛིན་འདོད་ན། །ཉེ་རིང་མེད་པར་གསེར་ཁྲིའི་ཐོག་ནས་དྲོངས། །ཡུལ་བདེ་མི་ བདེ་ཡོང་བའི་དགོངས་པ་དང༌། །དགོང་མོ་ས་ལ་བབས་ལ་ཆོས་ལ་འབུངས། །ལུས་ངག་ཡིད་གསུམ་ཕྱག་འཚལ་སྨོན་ལམ་ཐོབ། །གཏན་གྱི་རེ་ས་དཀོན་མཆོག་གསུམ་ལ་ཞུས། །རིན་ཆེན་སྐར་མའི་བདག་པོའི་བཀའ་དང་བསྟུན། །འདི་ཕྱི་གཉིས་ཀྱི་དབུ་འཕང་མཐོ་དགོས་ན། །མི་རྟག་འཆི་བ་མ་བརྗེད་ཐུགས་ལ་ཞོག །འདོད་འདོད་ཁ་ཆེ་ཕ་ལུའི་གྲོས་གྲོས་ཀྱི། །དོན་གྱི་སྙན་ཞུ་མུ་ཏིག་དར་ལ་བརྒྱུས། །ཁམས་གསུམ་དབང་འདུས་དྲུང་དུ་ཕུལ་ཡོད་དོ། །རིན་ཐང་སྐོར་དུས་རྒྱ་ལྟར་གྲངས་སུ་ཚུད། །བསླབ་བྱ་ལེའུ་བཞི་པའོ།། །། འཇིག་རྟེན་འདི་རུ་སྒང་གཤོང་མང་གཅིག་འདུག །སྐྱིད་སྡུག་རིང་ཐུང་སྦོམ་ཕྲ་གྲངས་མེད་རེད། །འདྲ་འདྲ་གཅིག་ཀྱང་མེད་པ་མཐོང་གསལ་རེད། །འདི་ལ་ཆོག་ཤེས་རང་གིས་བྱས་པ་དགའ། །ཐོད་པའི་རི་མོ་བསུབ་ཀྱང་སུབ་རྒྱུ་མེད། དེ་ལས་རི་མོའི་འགྲོ་ལུགས་བསྟུན་པ་དགའ། །ལྕགས་རོང་བོང་བུ་སྡུག་ཀྱང་རང་སྡུག་རེད། །སྒལ་བའི་རྒྱབ་ཁུར་མ་འཁྱེར་ཀ་མེད་རེད། །སེམས་གོས་ཆོད་ན་ནོར་ལ་མང་ཉུང་མེད། །ཆོག་ཤེས་མེད་པས་རྒྱལ་པོ་སྤྲང་པོ་དང༌། །སེམས་གོས་ཆོད་ན་སྤྲང་པོ་དེ་ལས་ལྷག །རྒྱལ་པོ་རྒྱལ་གཞིས་ཟོས་ནས་ལྟོགས་ལྷང་ལྷང༌། །སྤྲང་ཕྲུག་ཐང་རྐྱལ་ཁེངས་ནས་སྤོ་སྒྱེད་སྒྱེད། །བཀོད་པའི་ལས་ལ་ཆོག་ཤེས་མ་བྱས་ན། རང་སྡུག་རང་གིས་ཉོས་པ་དོན་མེད་རེད། །ཆོག་ཤེས་ལྡན་ན་ཕྱུག་དང་མ་ཕྱུག་མེད། །ལས་ལ་བཀོད་ན་དགྲ་ནོར་རང་གི་ནོར། །མ་བཀོད་ཕ་ནོར་བུ་ལ་བདག་པ་དཀའ། །ལྗང་པ་རྡོ་ཡི་སྟེང་དུ་སྐྱེ་དོགས་མེད། །སྦག་སྦག་སིག་སིག་བྱས་པས་ཅི་ལ་ཕན། །སེམས་པ་ཤོར་ན་ཕ་བཟང་བུ་ལ་ཤོར། །ཆོག་ཤེས་བྱས་ནས་ལུས་སེམས་འདོད་ལ་འཇོག །ལག་ལེན་ངན་པའི་རིགས་ལ་སྤང་ཆ་གྱིས། །ཕ་བདེ་བུ་སྐྱིད་ཡོང་བའི་བསམ་བློ་ཐོངས། །འདི་ཕྱི་གཉིས་ཀྱི་གཏམ་དོན་ལག་པའི་མཐིལ། །ཁ་ཆེ་ཕ་ལུའི་སྙིང་གཏམ་ཁ་ནས་ལུད། །སྙིང་གི་བུ་ཚོ་སྙིང་ནས་རྣ་བ་ཉོན། །གོ་བ་ཡོད་ན་གོ་རྒྱུ་བྲིས་ཡོད་དོ། །མང་པོ་མེད་ཀྱང་བྲོ་བ་བཅུད་དང་ལྡན། །བསླབ་བྱ་ལེའུ་ལྔ་པའོ།། །། དབྱར་ཁ་ལྕགས་དང་དགུན་ཁ་རྫ་ལ་ལྟོས། །དབྱར་དགུན་མེད་པར་དམར་པོའི་ལྕེ་ལ་ལྟོས། །སྙིང་གཏམ་སྙིང་གི་གྲོགས་ལ་ཤོད་ཚོད་གྱིས། །སྔ་གྲོགས་དགོང་དགྲར་སོང་བ་མང་པོ་ཡོང༌། །གསེར་དངུལ་མི་ལ་བཅོལ་དགོས་བྱུང་ཡང་བཅོལ། །བཅོལ་བ་སྟོར་ཡང་བཙལ་ནས་རྙེད་པ་རེད། །སྙིང་གཏམ་མི་ལ་བཅོལ་བཅོལ་མང་དྲགས༌། །ལག་མགོ་ཁ་ལ་བཅུག་ནས་སྡོད་དགོས་ཡོང༌། །གཏམ་གྱི་བདུད་པོ་སྙིང་གི་དོང་དུ་ཚུད། །ཁ་ལ་ལྕགས་དང་ལྕེ་ལ་སྒོ་ལྕགས་རྒྱོབས། །བདུད་པོ་གདོང་ནས་ཤོར་ན་མི་ཕོ་གསོད། །འ་རྫི་བྱས་པ་ཅན་གྱི་མི་ལ་ཕན། །མི་ཤོད་དགུ་ཤོད་ཤོད་རྒྱུ་མང་དྲགས་ན། །མི་ལ་མ་ཤོད་ཟེར་གིན་སྡོད་དགོས་ཡོང༌། །ནར་ནར་ལྕེ་ལ་བདག་པོ་མ་བརྒྱབ་ན། །རིལ་རིལ་དབུ་ལ་འོ་བརྒྱལ་བཟོས་ཡོང་ངོ༌། །མ་བཤད་གཏམ་དེ་ག་དུས་བཤད་བཤད་རེད། །བཤད་ནས་འགྱོད་དགོས་བྱུང་ན་ཐ་མའི་ལས། །མ་བཤད་བར་དུ་གཏམ་ལ་རང་དབང་ཐོབ། །བཤད་ནས་གཏམ་གྱི་དབང་དུ་ཤོར་མཁན་ཚོས། །བཟང་པོའི་བསླབ་བྱ་ངན་པའི་དགྲ་ལ་འགྲོ །དེ་ལས་བཟང་ངན་ཚང་མ་བཟང་པོས་སྐྱོངས། །བཟང་པོས་དགྲ་མགོ་ངན་པ་བཟློག་པས་བསྟུན། །གཏམ་ལ་དྲང་ན་ཆོས་ཀྱི་ལམ་སྣ་ཟིན། །ད་ལྟ་དེ་ལས་ཕུག་ཡུལ་སྐྱིད་ཀྱང་སྐྱིད། །འདི་ཕྱི་གཉིས་ཀྱི་བསམ་དོན་ལྷུན་གྱིས་འགྲུབ། །ཁ་ཆེའི་ཕ་ལུའི་འདོད་དང་སྣག་སྙུག་ཐུག །དཀར་པོའི་ཐོག་ཏུ་ནག་པོའི་བྲིས་ཆ་གསལ། །བྲིས་མི་ས་འོག་བྲིས་ཆ་ས་ཡི་ཐོག །འཛམ་གླིང་མིས་བརྙེད་བསམ་བློའི་དྲན་གསོས་མཛོད། །བསླབ་བྱ་ལེའུ་དྲུག་པའོ།། །། འཛམ་གླིང་མེ་ལོང་ཕར་བལྟ་ཚུར་བལྟ་རེད། །འཁོར་བ་བྲག་རི་བཞིན་དུ་ཁ་ལན་བསློག །རང་གིས་གར་བལྟས་མེ་ལོང་ནང་དུ་གསལ། །རང་གིས་གར་ལབ་བྲག་རིས་ཁ་ལན་བསློག །བཟང་ན་བཟང་དང་ངན་ན་ངན་གྱི་ལན། །འདི་ནི་ཡོང་རྒྱུ་འཇིག་རྟེན་འཁོར་བའི་ལས། །ཚང་མས་སྨོན་པའི་འདོད་པ་མེད་ཟེར་ན། །གཞན་ལ་མ་ལབ་རང་ལ་དོགས་ཟོན་གྱིས། །ཚང་མ་རང་གི་མདོག་དང་མཐུན་ཡོང་ངོ༌། །གང་བྱས་ལག་པའི་མཐིལ་དུ་གསལ་ཡོང་ངོ༌། །གཞན་ལ་དགའ་ཚོད་ཁྱོད་རང་དགའ་མེད་ཡིན། །གང་ལྟར་བཟང་ལ་བཟང་དང་ངན་ལ་ངན། །དུག་ཤིང་སྡོང་པོས་ཁམ་བུ་སྟེར་དོགས་མེད། །ཁམ་བུ་དགོས་ན་ཁམ་སྡོང་འགྲམ་ལ་སོང༌། །རིན་ཆེན་གསེར་གྱི་འདོད་པ་ཡོད་ཟེར་ན། །དོན་མེད་མུན་པའི་གླིང་ལ་མ་སོང་ཞིག །གཞན་ནས་ལགས་ལགས་ལུག་ལུག་དགོས་ཟེར་ན། །རང་ལ་ལགས་ལགས་ལུག་ལུག་མ་ཉུང་དགོས། །ཆེ་འདོད་ཅན་ལ་ཆེ་བ་ཡོང་བ་དཀའ། །དེ་ཡི་ཐབས་ལ་ཆེ་འདོད་བཞག་པ་དགའ། །བྱམས་པོ་བྱས་ན་དགྲ་ཡང་གཉེན་ལ་ལོག །རྩུབ་ཚོད་མ་ཟིན་བུ་ཡང་ཞེན་པ་ལོག །ཐོད་པའི་རི་མོ་གྱེན་ལ་ཡོད་པའི་མི། །སོ་དཀར་འཛུམ་ལེགས་མི་སེམས་འཛིན་པར་མཁས། །ལས་བཟང་བྱས་ནས་ཐར་པའི་ལམ་བུ་ལ། །གཏམ་བཟང་འཁྱེར་ནས་སོང་ཞིག་ཕ་ཡི་བུ། །རི་མོ་ཐུར་ལ་ཡོད་པའི་མི་ངན་ལ། །དུག་སྦྲུལ་ཁྱི་སྨྱོན་གཉིས་ཀྱི་རྟགས་དཔྱད་ཚང༌། །ཉིན་མཚན་མེད་པར་རྨུག་རྒྱུ་ཁོ་ལས་མེད། །ལག་ལེན་ངན་པའི་ཐལ་བ་བསླང་ནས་འགྲོ །བཟང༌པོ་འོང་བའི་རྗེས་ལ་གཏམ་བཟང་ཡོད། །བཟང་པོའི་ལོ་ལ་བཟང༌པོའི་འབྲས་བུ་སྨིན། །ངན་པའི་འབྲས་བུ་ངན་པའི་སྐེ་ལ་འཁྲིལ། །ངན་པའི་རྗེས་ལ་ལྟས་ངན་གཏམ་ངན་སྡོད། །རྒྱ་ཤོག་དཀར་པོའི་སེམས་གསལ་ཡོང་ངོ༌། །རྒྱ་སྐད་བོད་ཀྱི་སྐད་ལ་འགྱུར་སོང་ངོ༌། །ཁ་ཆེ་ཕ་ལུའི་བློ་ཐག་ཆོད་སོང་ངོ༌། །བསླབ་བྱ་ལེའུ་བདུན་པའོ།། །། དམའ་ས་བཟུང་ནས་གང་ཅིར་བཟོད་པ་སྒོམས། །དོན་གྱི་རྡོ་ཁ་རང་གི་སྙིང་དུ་ཞོག །མི་སེམས་འཛིན་པའི་སྐད་ཆ་ཤོད་གིན་སོང༌། །རང་དོན་སྒྲུབ་པའི་ཇུས་ཆ་གཏོང་གིན་སོང༌། །སྟོང་པ་ཁ་ཡིས་ཁེངས་པའི་དོན་རྩ་ལོངས། །དེ་འདྲའི་ཐབས་ལ་དམའ་ས་བཟུང་ན་བཟང༌། །དམའ་ས་བཟུང་བའི་མི་ལ་དགའ་མཁན་མང༌། །དེ་འདྲའི་མི་ལ་ཡིད་ནས་ཕན་མཁན་མང༌། །མི་ཚེ་ཇ་ཆང་ལོངས་སྤྱོད་ངང་ལ་འགྲོ །འདིར་བཞུགས་འདིར་བྱོན་ཟེར་མཁན་མང་པོ་ཡོང༌། །འདོད་པའི་རྟ་རྒོད་ཚོད་ཀྱི་སྲབ་ཁ་འཐེན། །གང་ས་ཅི་ཐད་རང་ཚོད་རང་གིས་ཟུངས། །འགྲོ་ཚོད་སྡོད་ཚོད་ཤོད་ཚོད་བྱེད་ཚོད་དང༌། །སྐྱིད་པོའི་བྱེད་ཚོད་སྡུག་པོའི་ཁུར་ཚོད་དང༌། ཞིམ་པོའི་ཟ་ཚོད་འཇམ་པོའི་གྱོན་ཚོད་དག །མི་ལ་ཚང་ན་མཁས་པའི་ཡང་རྩེ་ཟེར། །དེ་འདྲའི་མི་ལ་སྐར་མའི་བདག་པོ་རྙེད། །ད་ལྟ་དེ་ལས་ཕུགས་ཡུལ་ལས་གྲས་ཡང༌། །འདོད་པ་ཚོད་ཀྱི་ཕྱི་ལ་ཤོར་དང་གཅིག །ཚོད་ལ་སེམས་ཀྱི་བཀོད་པ་མེད་དང་གཉིས། །དེ་འདྲའི་མི་དང་སྡེབ་ནས་བསྡད་ཞན་འདྲ། །དེ་འདྲས་ཆག་སྒོའི་ནང་ལ་འཁྲིད་ཡོང་ངོ༌། །ལས་ལ་ཚོད་མེད་ཐ་མ་ཕུང་པའི་གཞི། །ཚོང་ལ་ཚོད་མེད་མཐའ་གཞུག་ཕམ་པའི་གཞི། །ཁ་ལ་ཚོད་མེད་རྐུབ་ལ་ཉོ་བའི་གཞི། །རྒོད་ལ་ཚོད་མེད་མཐའ་གཞུག་ངུ་བའི་གཞི། །འཁོར་བའི་གཡས་གཡོན་གཡང་དང་གད་པའི་གླིང༌། །ཟགས་ན་ཟགས་ཆོག་རིལ་ན་རིལ་ཆོག་རེད། །དེ་འདྲའི་ལམ་དུ་འགྲོ་བཟོ་སྡོད་མཁས་མཛོད། །གདངས་ཕྲུག་འཁོར་བ་འབྲོག་པའི་ཤོ་དང་འདྲ། །སྤ་ར་ལྕ་མོ་གང་ཐོན་མི་ཤེས་འདུག །ཁེ་གྱོང་སྙིང་ལ་བཅངས་ནས་འགྲོ་ལུགས་མཛོད། །ཁེ་ཡི་སྒོ་མོ་དབྱེ་རྒྱུའི་ཐབས་ལ་ལྟོས། །གྱོང་གི་ལམ་བུ་དགག་རྒྱུའི་ཤུལ་ལ་ལྟོས། །ཁེ་གྱོང་གཉིས་ལ་སྦོམ་ཕྲ་ཤོར་བའི་དུས། །སྡུག་སྙིང་མནན་ནས་སྡུག་ཚོད་བཟུང་བ་དགའ། །ཚོད་མེད་ཁ་ཆེ་ཕ་ལུའི་ཚོད་ནས་ཤོར། །གཏམ་གྱི་ནོར་བུ་ཤོག་བུའི་ཐང་ལ་ཤོར། །རིན་ཐང་བསྐོར་དུས་སྐོར་ཐང་མ་ལོག་མཛོད། །ནོམ་པ་འཛིན་ནས་ཡོད་དོ་ཕ་ཡི་བུ། །བསླབ་བྱ་ལེའུ་བརྒྱད་པའོ།། །། ཞིམ་ཚད་མ་ཟ་འཇམ་ཚད་མ་གྱོན་ཅིག །ཁ་ལུས་གཉིས་ཀྱིས་སྡུག་ལ་སྦྱར་ཡོང་ངོ༌། །ཁོག་པ་དབུགས་དང་ལྟོ་དང་འདོན་པའི་དུས། །ཟ་མ་གཅིག་པོས་སྡོད་པ་ཡིན་དོགས་མེད། །མིག་དང་གྲོད་པ་གཉིས་ལ་ཁེངས་རྒྱུ་མེད། །ལྟོ་ཚོད་ཟ་ཚོད་རང་གིས་བྱས་པ་དགའ། །གྲོད་པ་ཐབ་ལ་བཙོས་བཙོས་མང་དྲགས་ན། །སྡུག་རྩ་ཐུག་དུས་སྒྱེད་བུ་གྲང་བ་མཐོང༌། །མི་ལ་རེ་བའི་ཇ་ཆང་ལོངས་སྤྱོད་ལས། །རང་གི་རྩ་རྐྱང་ཆུ་རྐྱང་བྲོ་བ་ཞིམ། །ལས་ངན་བཤན་པའི་ཀྲེག་ཁུར་བཟའ་བ་ལས། །དམར་དད་ལངས་ནས་ཤིག་ཀྱང་ཟ་བ་དགའ། །ཟ་རྒྱུ་ཉལ་རྒྱུ་བ་དང་བོང་བུའི་ལས། །དེ་འདྲ་བྱས་པ་ཨེ་དགའ་ཕ་ཡི་བུ། །ཁྱི་དང་གྲོད་པ་ལག་ནས་ཤོར་སོང་ན། །རྟ་རོ་བོང་རོའི་ཐོག་ལ་ཤོར་ཉེན་ཆེ། །གྲོད་པའི་སྒོ་ལ་བསྡམ་ཚོད་མ་བྱས་ན། །གཏམ་གྱི་ཕུ་ཐུང་འཇོལ་འཇོལ་དགོས་འདོད་ན། །གྲོད་པའི་ལག་མགོ་ཐུང་དུ་བཅུག་པ་དགའ། །ཆུ་ནང་ཉ་མོ་བག་ལ་དད་པས་ཕུང༌། །བྱི་བ་ཇིལ་འཇོལ་སྤད་ཁ་ཟོས་པས་ལན། །བྱི་བ་སྨུག་ཆུང་ལྟོགས་སླ་ཟ་འདོད་ཀྱིས། །ས་མདའ་སྐེ་ལ་ཟུག་པ་ཟ་མའི་སྐྱོན། །བྱང་ཐང་ཝ་མོ་རང་ཚོད་མ་ཟིན་ན། །མགོ་པགས་རྐང་ལ་བཤུས་པ་ཟ་མའི་སྐྱོན། །སྟག་དམར་ངར་བཞིམས་བུ་བཞིན་འཛིན་རྒྱུ་འདི། །སྟག་རྒན་ལུག་ལ་ཁྱི་ལྟར་མཆོང་བའི་ཉེན། །མཁས་པ་འདི་ཡིན་ཞུ་རྒྱུ་མེད་ལགས་ཀྱང༌། །དཀར་པོའི་ཐོག་ཏུ་ནག་པོའི་བྲིས་ཆ་གསལ། །ཁ་ཆེ་ཕ་ལུ་ས་འོག་སོང་ན་ཡང༌། །རྒྱ་ཤོག་ལོགས་ཀྱི་སྣག་ཚའི་རི་མོ་འདི། །ས་སྟེང་ཡུན་རིང་གནས་པའི་བཀྲིས་ཤོག །བསླབ་བྱ་ལེའུ་དགུ་པའོ།། །། འཇིག་རྟེན་བལྟ་ལུགས་གཅིག་ལ་མཐོང་ལུགས་གཉིས། །བལྟ་ལུགས་གཅིག་ལ་རིགས་ཀྱང་རིགས་གཅིག་འདུག །ཕ་ཡིས་བུ་དང་བུ་ཡིས་ཕ་བྱེད་པ། །དེ་འདྲ་བསམ་ན་ཐུང་ཐུང་ག་ནས་ཡིན། །མ་བསམ་གྱུར་ན་ཕ་བུའི་དམ་ཚིག་ཉམས། །དམ་ཉམས་ལག་ལེན་དགྲ་བོའི་དགྲ་ལ་བསྒྱུར། །ཕྲུ་གུ་ཕ་མ་མེད་པ་མི་སྲིད་ཀྱང༌། །ལག་ཐོག་སྟོན་རྒྱུ་ཡོད་པ་རེ་རེ་ཙམ། །ཚེ་སྟོད་ཡོད་ཀྱང་ཚེ་སྨད་མེད་པ་ཡང༌། །ཕ་བུའི་དམ་ཚིག་བསྲུང་དུས་བསྲུང་བ་དགའ། །དུས་ཚོད་ཆུ་ཚོད་མ་འགྱངས་གྲོལ་ནས་འགྲོ །འཐུས་ཤོར་མེད་པ་བུ་ལ་ཡོན་ཏན་སློབ། །ཡོན་ཏན་ཀུན་གྱི་རྩ་བ་ཡི་གེ་དང༌། །ཡོན་ཏན་ཡོངས་ཀྱི་རྒྱལ་པོ་ཡི་གེ་རེད། །ཕྲུ་གུའི་ཡི་གེས་གསེར་ཁྲིའི་སྟེང་དུ་སྐྱེལ། །མི་ཕོའི་ཡི་གེས་སྟག་གདན་སྟེང་དུ་འཇོག །བླ་མའི་ཆོས་རྭར་ཡི་གེ་མེ་ལོང་རེད། །རྒྱལ་པོའི་ཁྲིམས་རྭར་ཡི་གེ་འབྲས་བུ་རེད། །ཡིག་ཡོད་ཡིག་ཡོད་མཁས་པ་སྤྲུལ་པའི་རྒྱུད། །ཡིག་མེད་ཡིག་མེད་ལོང་བ་ལྐུགས་པའི་རྒྱུད། །ཀྱོག་ཀྱོག་ཡི་གེ་གཞུ་ལྟར་འཁྱོག་གྱུར་ཡང༌། །དོན་རྩ་མདའ་ལས་འདྲོངས་པ་དེ་རུ་ཚང༌། །ཡོན་ཏན་རིན་ཆེན་དགོས་འདོད་ཀུན་འབྱུང་རེད། །དགོས་འདོད་ཀུན་འབྱུང་མི་དགོས་ཐོགས་པ་མེད། །དོན་དུ་མི་ལ་ཡོན་ཏན་ཚང་བ་དགོས། །ནོར་རྫས་མཚམས་རེ་སོང་འགྲོ་མཚམས་རེ་ཡོང༌། །ནོར་ལ་བསྐྱུར་བརླག་རྐུན་མས་འཁྱེར་བའི་ཉེན། །ཡོན་ཏན་རིན་ཆེན་འཛད་མེད་ཕུགས་ཀྱི་གཏེར། །ན་སོ་གཞོན་དུས་བུ་ལ་སྦྱོང་བདར་སློབ། །ན་སོ་ལོང་ནས་བསླབ་དགོས་མེད་པ་གྱིས། །ལྕང་གསར་གཞོན་དུས་འདྲོངས་ན་འདྲོངས་པ་རེད། །ལྕང་རྒན་སོང་སོང་མང་ན་ཆག་པའི་ཉེན། །ངན་པ་མི་དང་བསྡོངས་ཤིང་འགྲོགས་ཞན་འདྲ། །དུག་དང་བསྡོངས་ན་དུག་གི་ཁ་རླངས་ཕོག །ངན་པའི་ཚོགས་དང་ནག་པོའི་སོལ་བ་འདྲ། །ཚ་མོ་བསྲེགས་ཡོང་གྲང་མོ་རྫས་ཉེན་ཆེ། །ཁེ་དང་གྱོང་གི་བསྐོར་ཕྱོགས་གཏོང་གིན་སོང༌། །ཡག་དང་ཉེས་ཀྱི་སྐད་ཆ་ཤོད་ཀྱིན་སོང༌། །ཡག་ན་ཡག་པས་ངོ་བསྟོད་བདག་རྐྱེན་སྤྲོད། །ཉེས་ན་ཉེས་སོང་ཟེར་བས་ཉེས་ཐག་ཐོངས། །ཨ་མའི་ཁ་ལ་སྒོ་ལྕགས་བརྒྱབ་དྲགས་ན། །ཕྲུག་གུས་ཆག་སྒོའི་རྒྱལ་སྒོ་ཕྱེད་ཉེན་ཆེ། །རྡོ་ལ་ཕྱི་བརྡར་ཐོན་ན་ནོར་བུ་དང༌། །ལྕགས་ལ་འཇམ་ཤ་ཐོན་ན་མེ་ལོང་ཡོང༌། །ཡོན་ཏན་ཕུན་སུམ་ཚོགས་ན་སྙིང་གི་བུ། །བྱ་ལུགས་བྱེད་ལུགས་ངན་ན་དགྲ་ལས་ཀྱང༌། །དེ་ཚོ་སེམས་པ་དཀར་བའི་སྐད་ཆ་རེད། །བུ་ཡོད་ཕ་ཚོ་ཐུགས་ལ་དེ་ལྟར་ཞོག །བསླབ་ལེའུ་བཅུ་པའོ།། །། དེ་ནས་གསན་དང་ཨ་མའི་སྙིང་ཉེ་ཚོ། །བྱམས་དང་བརྩེ་བ་ཅན་གྱི་དྲིན་ཅན་མ། །ཕྲུག་གུ་ཆུང་དུས་ཨ་མའི་འགོ་རུ་སྡོད། །ལང་ལ་གཏོང་རང་གཏོང་ན་ཨ་མས་གཏོང༌། །ཁ་ལ་མི་སྟེར་དགུ་སྟེར་ཨ་མས་སྟེར། །ལུས་ལ་མི་གཡོགས་དགུ་གཡོགས་ཨ་མས་གཡོགས། །ཆུང་དུས་ཨ་མས་ལང་ལ་བཏང་བའི་བུ། །ལང་ཤོར་ཐ་མ་ཨ་མས་དགའ་མི་ཁུག །དེ་འདྲ་མི་གསོད་བྱས་ནས་ཕུང་བ་མང༌། །དེ་འདྲ་རྟ་འཁྱེར་བྱས་ནས་བྲོས་པ་མང༌། །ཨ་མས་སྡུག་སྙིང་མནན་ནས་མ་བསྡད་ན། །ཨ་མས་ཕྲུག་གུ་རླུང་ལ་བསྐུར་ཡོང་ངོ༌། །རྐུ་མ་རྐུ་དུས་ཐུག་ཐུག་བརྡུང་བ་དགའ། །ཧམ་གྱི་ཡོད་ན་སློག་སློག་བཏང་བ་དགའ། །སྒོ་ང་རྐུ་དུས་ཁྲིག་ཁྲིག་མ་བཟོས་ན། །བྱ་མོ་འཁྱེར་བའི་རྗེས་ལ་རྟ་ཕོ་འཁྱེར། །ཞིམ་པོ་སྟེར་སྟེར་འཇམ་པོ་གཡོག་གཡོག་ཞོག །བྱ་ལུགས་བྱེད་ལུགས་འགྲོ་ལུགས་སྡོད་ལུགས་སྦྱོངས། །བྱེད་ལུགས་མེད་ཀྱང་ཁ་ལ་ཟ་ལུགས་སློབས། །ཐ་མ་དེ་འདྲས་ཉོ་ཉོ་སུ་ཡིས་ཉོ། །ཝ་ཕྲུག་ཐང་ནས་ཐང་ལ་ཟག་རྒྱུ་མེད། །རྒོད་ཕྲུག་གཡང་ལ་ཟག་པ་སྙིང་རེ་རྗེ། །སྤྲང་ཕྲུག་རྒྱལ་ཁམས་བསྐོར་བ་སྤྲང་པོའི་ལས། །ཕྱུག་པོ་སྤྲང་ལ་འཁྱམས་པ་དགྲ་ལ་བསྒྱུར། །ཉན་མཁན་ཡོད་ན་གོ་རྒྱུ་བཤད་ཡོད་དོ། །མཐོང་མཁན་ཡོད་ན་སྟོན་རྒྱུ་བསྟན་ཡོད་དོ། །སྙུག་གུའི་ཁ་ཡི་དོན་གྱི་རྡོ་ཁའི་ཚིག །ཐུགས་ཀྱི་དཀྱིལ་དུ་ཞོག་མཛོད་ཨ་མའི་ཚོགས། །བསླབ་བྱ་ལེའུ་བཅུ་གཅིག་པའོ།། །། དེ་ནས་ཉོན་དང་ཨ་མའི་ཨོ་ལོ་ཚོ། །སྟག་གཟིག་ནགས་ཀྱི་དཀྱིལ་ནས་ཐོན་འདྲ་རྣམས། །ཕྲུག་གུ་མ་ཡི་ཁོག་ནས་ཐོན་པའི་དུས། །ལྟེ་བ་མ་དང་འབྲེལ་ནས་ཡོང་བའི་དུས། །རྩེར་རྩེར་ཟེར་བ་ཙམ་ལས་ཤ་རྡོག་གཅིག །ནུ་ཞོ་ཁ་ལ་སྦྱར་ཡང་འཐུང་མི་ཤེས། །རྐང་པ་ཡོད་ཀྱང་གོམ་པ་སྤོ་མི་ཤེས། །རྣ་བ་ཡོད་ཀྱང་ཚིག་བརྡ་སྤྲོད་མི་ཤེས། །མིག་གཉིས་ཡོད་ཀྱང་མཐོང་རྒྱུ་མ་ལས་མེད། །སེམས་པ་ཡོད་ཀྱང་བསམ་རྒྱུ་མ་ལས་མེད། །ངོ་ལ་འཁོར་བའི་སྦྲང་མ་དཀྲོག་མི་ཤེས། །མིག་ལ་འཚང་བའི་ཐལ་བ་འདོན་མི་ཤེས། །གྲང་ངུ་འཁྱག་ངུ་ལྟོགས་ངུ་རྒྱག་པའི་དུས། །ཕ་མ་གཉིས་པོའི་དགོང་མོའི་གཉིད་ཐེབས་བཅག །སྐམ་པ་བུ་དང་རློན་པ་ཕ་མས་བྱེད། །འཇམ་པ་བུ་དང་རྩུབ་པ་ཕ་མས་བྱེད། །ད་ལྟའི་དེ་འདྲ་དེ་དུས་ཡིན་དོགས་མེད། །ཕྲུག་གུ་ཆུང་དུས་ལྟ་བ་ཕ་མའི་སྲོལ། །བྱ་ལུགས་བྱེད་ལུགས་འགྲོ་ལུགས་སྡོད་ལུགས་སྦྱོངས། །གང་བྱས་ཡོང་བའི་ཡོན་ཏན་ཕ་མའི་དྲིན། །ཁ་ནས་ཕྲི་སྟེ་བསགས་ཚད་བུ་ཡི་དོན། །ལས་འབྲས་རླུང་ལ་བསྐུར་རྒྱུ་བུ་ཡི་དོན། །བསམ་རྒྱུ་བུ་དང་དྲན་རྒྱུ་བུ་ལས་མེད། །དགོས་རྒྱུ་བུ་དང་འདེམས་རྒྱུ་བུ་ལས་མེད། །བཀའ་དྲིན་ཅན་གྱི་ཕ་མ་རྣམ་པ་གཉིས། །ན་སོ་རྒས་པ་ད་ལྟ་ཨེ་ཤེས་ལགས། །དྲིན་ཅན་དྲིན་དུ་བསམ་པ་ཨེ་ཡོད་ལགས། །ཁྲེལ་དང་ངོ་ཚ་དགོས་པ་འདི་རུ་རེད། །ཚོགས་དང་བསོད་ནམས་བསགས་པའི་རྩ་བ་རེད། །གོང་ན་གོ་བརྡ་གཤམ་ན་ཕ་མ་གཉིས། །དེ་གསུམ་ལས་ལྷག་སུ་ཡང་ཡོད་པ་མིན། །ཉིན་མཚན་མེད་པར་ཕ་མའི་བཀའ་དང་བསྟུན། །སྔ་དགོང་མེད་པར་ཕ་མའི་ཞབས་ལ་བཏུད། །ཞིམ་པོ་ཕུལ་ནས་ཨེ་མཉེས་སེམས་ཀྱིས་ལྟོས། །སྙན་པོ་ཞུས་ནས་ཐུགས་སེམས་ཨེ་འགྲོ་ལྟོས། །ཡག་པོ་ཞུས་ནས་དགོངས་པ་ཨེ་སྤྲོ་ལྟོས། །ཕ་མ་མཉེས་ན་འདི་ཕྱི་གཉིས་ཡོད་རེད། །ཕ་མ་མ་མཉེས་འདི་ཕྱི་གཉིས་མེད་རེད། །ཕ་མ་ཡོད་དུས་བཀའ་དྲིན་མ་བསམ་པར། །མེད་དུས་འགྱོད་པ་སྐྱེས་པ་ཐ་མའི་ཐ། ། །འགྱོད་པ་དེ་ནི་ཕུགས་ནས་ཕུགས་སུ་འགྱོད། །ད་ལྟ་ས་སྟེང་འགྱོད་པོ་དེ་ལས་མེད། །དེ་ལྟར་ཕ་མ་འཛོམས་པའི་ཕྲུག་གུ་ཚོ། །གཏམ་གྱི་ནོར་བུ་སྙིང་གི་སྒམ་དུ་ཚུད། །བྱུང་མེད་ཁྲམ་དང་གཡོ་སྒྱུ་གྱོད་ཀྱི་གཞི། །བསླུ་བྱ་སྟེར་ནས་ཕ་བུ་འཕྲལ་ཡོང་ངོ༌། །དེ་འདྲས་དམྱལ་བའི་གཏིང་དུ་བསྐྱུར་ཡོང་ངོ༌། །དེ་འདྲའི་འཕྲོད་དུ་རྐང་པ་དྲངས་ཡོང་ངོ༌། །རི་ཐང་གཡོག་པ་རྣ་བས་ཐོས་ཡོད་འགྲོ །རྩ་མཆོག་ཟིལ་པས་སྐད་ཆ་གོ་ཚོད་འགྲོ །མི་རྒྱུད་མི་དགོས་ལྷ་རྒྱུད་ཡིན་གྱུར་ཀྱང༌། །བུད་མེད་ཡིན་ན་བདུད་ཀྱི་ཡན་ལག་རེད། །དེ་འདྲས་བཤད་ཚད་ཉན་ན་འཕོང་ལ་བཙོག །བྱས་ཚད་ལམ་ལ་གཏང་ན་རླུང་ལ་བསྐུར། །བདུད་དང་གདོང་དུས་མེ་ལ་དོགས་ཟོན་དགོས། །འདྲེ་དང་གྲོགས་པོ་བྱེད་ན་བླ་མ་སྒོམ། །གྱོན་པ་རྙིང་ན་གསར་པ་བཟོས་པས་ཆོག །མནའ་མ་མེད་ཀྱང་མནའ་མ་བསུས་པའི་ཆོག །ཚོལ་དགོས་བྱུང་ན་ཕ་མ་རྙེད་དོགས་མེད། །ཕ་མ་གཉིས་དང་མནའ་མ་བརྗེས་དོགས་མེད། །འདྲ་འདྲའི་ཁྲོད་དུ་སྡོད་པ་ངོ་ཡང་ཚ། །འཇོན་མདོག་བྱས་ཀྱང་འཇོན་རྒྱུ་དེ་ཁ་རེད། །ཕ་མ་མནའ་མའི་དབྱེ་འབྱེད་མ་ཤེས་ན། །མི་ལུས་དེ་འདྲ་ཐོབ་ཀྱང་ཁྱི་ལས་ལོད། །ཁྱི་ངན་སྨྱོ་ཡང་བདག་པོ་ངོས་ཀྱིས་འཛིན། །ཁྱི་ལས་ལོད་པའི་མི་དེ་ཡ་ཡང་ང༌། །དེ་འདྲའི་ལུས་རྟེན་སྡང་པའི་དགྲ་ལ་བསྒྱུར། །མི་ངན་གཅིག་གིས་མི་བརྒྱ་རླུང་ལ་བསྐུར། །ལམ་ངན་བཏོད་ནས་འཛམ་གླིང་ཕུང་ལ་སྦྱོར། །བ་མོ་གཅིག་གིས་མི་ཡི་ཞིང་བཟས་ནས། །བ་མོ་ཡོངས་ཀྱི་འགྲོ་བའི་ལམ་བུ་བཀག །ཅེས་པའི་དཔེ་ལྟར་སྤྱོད་ངན་འདོར་ཤེས་པ། །རིག་པ་རྣལ་དུ་ཕོབ་ཅིག་ཕ་ཡི་བུ། །བསམ་བློ་འདྲོངས་ལ་ཐོངས་ཤིག་ཇོ་ཇོའི་སྙིང་། །རེ་དང་འཇིགས་པས་དབྱར་ས་དགུན་ས་ནས། །ཐར་བའི་གླིང་གི་ལས་སུ་སྐྱ་སེང་སེང༌། །བཟང་གི་རེ་དང་ངན་གྱི་ཉེས་ཡོད་ན། །ལམ་བུ་དེ་ག་རེད་དོ་སྐལ་ལྡན་ཚོ། །འཁོར་བའི་མི་སྲིད་སྲིད་པའི་ཁྲོན་པ་རུ། །ལས་ཉོན་མི་སྲིད་སྲིད་པས་སྐྱུར་དུས་འདིར། །དོན་རྩ་བསྒྲིལ་ནས་རྡོག་དོན་བྱེད་པའི་དུས། །རེ་ས་ལྟ་ས་གོ་བརྡ་ཁོང་ལ་ཞུས། །ལས་འབྲས་སྙིང་ལ་བཅངས་ནས་འགྲོ་ལུགས་དང༌། །དཀར་ནག་སེམས་ལ་བཞག་ནས་བྱེད་ལུགས་མཛོད། །ལས་འབྲས་ཁ་ནས་ཤོད་མཁན་མང་པོ་ཡོང༌། །ལག་ལེན་ལག་ཏུ་ལེན་པ་གསེར་ལས་དཀོན། །དེ་ལ་བལྟས་ན་འགྱོད་པ་སྙིང་ནས་བསྐྱེད། །དེ་འདྲ་བསམ་ན་སྐྱོ་བ་གཏིང་ནས་བསྐྱེད། །དེ་རིང་བྲིས་པའི་ཡི་གེ་ནག་ཆུང་འདི། །ཁ་ཆེ་ཕ་ལུ་སྨྱོ་བའི་སྨྱོ་ལབ་རེད། །གཏི་མུག་སྙིང་གི་དཀྱིལ་ལ་རྩོལ་རྩོལ་འདི། །རང་གིས་མི་ཤེས་མི་ལ་བཤད་ལེ་འདྲ། །རང་སྐྱོན་མི་མཐོང་མི་སྐྱོན་སྟོན་ལེ་འདྲ། །ཆག་པ་གས་པའི་ཕྱོགས་ལ་ཧམ་ལེ་འདྲ། །ང་ལ་བླ་མས་ཐུགས་རྗེས་རྒྱང་ནས་གཟིགས། །ཁ་དང་ལག་ལེན་འགྲིགས་པའི་འཕྲིན་ལས་མཛོད། །མདོག་དང་བྲོ་བ་མཐུན་པའི་བཀྲ་ཤིས་ཤོག །ཁ་ཆེ་ཕ་ལུའི་བསམ་བློའི་རྒྱ་མཚོ་ནས། །བཏོན་པའི་ནོར་བུ་ཤོག་བུའི་ནང་དུ་ལྷུང༌། །རྒྱལ་སྡེ་ཁྲོན་པའི་དཀྱིལ་དུ་བཞག་ཡོད་དོ། །རྨ་བྱའི་ལུས་ལ་ཁུ་བྱུག་གསུང་སྙན་འདི། །སྐྱིད་སྐྱིད་ཟེར་བས་ཕྱོགས་ཀུན་ཁྱབ་པར་ཤོག །ཁ་ཆེ་ཕ་ལུས་ཀུན་ལ་གདམས་པའོ།། །།
སྒྲུང་ལྡེའུ་བོན་གསུམ་གྱིས་ཆབ་སྲིད་ཇི་ལྟར་བསྐྱངས་ཚུལ་ལ་གསར་དུ་དཔྱད་པ།[རྩོམ་སྒྲིག]
བོད་ཀྱི་ལོ་རྒྱུས་རྣམས་ལས་སྲོང་བཙན་གྱི་སྔོན་དུ་བོད་ལ་ཡི་གེ་མེད་པས་ཆབ་སྲིད་སྒྲུང་ལྡེའུ་བོན་གསུམ་གྱིས་བསྐྱངས་ཞེས་པ་ལས་ཡང་སྙིང་སྒྲུང་ལྡེའུ་བོན་གསུམ་ག་འདྲ་ཡིན་པ་དང་དེས་ཆབ་སྲིད་ཇི་ལྟར་བསྐྱངས་པའི་སྐོར་གསལ་བོར་བཤད་མེད་སྟབས་བོད་རིག་པར་ཞིབ་འཇུག་གི་ཁྲོད་དུ་ད་ལྟའང་དེ་ལ་བསྡོམས་ཚིག་ཡང་དག་ཅིག་ཐོབ་མེད། གསར་སློབ་པ་མང་བོ་ཞིག་ལ་དོགས་པ་ཤིན་ཏུ་ཆེ་བར་བརྟེན་ད་ལན་ཁོ་བོས་སྒྲུང་ལྡེའུ་བོན་གསུམ་གྱིས་ཆབ་སྲིད་ཇི་ལྟར་བསྐྱངས་བའི་སྐོར་ལ་དཔྱད་པ་ཐུང་ངུ་ཞིག་སྤེལ་བར་འདོད། གཅིག སྒྲུང་གིས་ཆབ་སྲིད་ཇི་ལྟར་བསྐྱངས་པ་ཡིན་ནམ།
སྒྲུང་ལྡེའུ་བོན་གསུམ་གྱི་སྒྲུང་ནི《མཁས་པའི་དགའ་སྟོན》ལས“མདོ་སྡེ་དར་བའི་ལྟས་སུ་སྒྲུང་རྣམས་དར། རོ་ལངས་གསེར་སྒྲུབ་ཀྱི་སྒྲུང་དང༌། མ་སངས་ཀྱི་སྒྲུང་མཆིལ་བའི་སྒྲུང་སོགས་ཉན་བཤད①”ཅེས་འབྱུང་བ་བཞིན་དེ་དག་གིས་རིག་པའི་སྒོ་ཕྱེས་ཏེ་ཆབ་སྲིད་བསྐྱངས་པར་འདོད་ནའང་རོ་ལངས་གསེར་སྒྲུབ་ཀྱི་སྒྲུང་དང་མ་སངས་ཀྱི་སྒྲུང༌། མཆིལ་བའི་སྒྲུང་སོགས་ངོས་འཛིན་ལ་རྟ་མོག་མོག་གི་སྤུ་ལྟར་བཞེད་པ་མི་མཐུན་པ་གང་མང་ཞིག་ཡོད། གང་ལྟར་ཡང་དེ་དག་ཕལ་ཆེར་མི་ཆོས་གཏམ་དུ་སྨྲ་བའི་སྒྲུང་གཏམ་ཞིག་ཏུ་ངེས་ཤིང༌། “སོགས”ཁོངས་ནས་ད་དུང་རི་དྭགས་གཡུང་ལ་ཕབ་ཚུལ་དང༌། མི་ལ་རྗེ་བོ་བྱུང་ཚུལ། ཉི་ཟླ་སྐར་གསུམ་དང་འབྲུ་རིགས་སྣ་ལྔ། མགུར་ལྷ་བཅུ་གསུམ་སོགས་ཀྱི་གཏམ་རྒྱུད་བྱུང་བར་གདོན་མི་ཟ་ནའང་ང་ཚོས་མཐའ་གཅིག་ཏུ་མཆིལ་བའི་སྒྲུང་ལྟ་བུ་ལས་ཆབ་སྲིད་ཇི་ལྟར་བསྐྱངས་སྙམ་པའི་དོགས་པའང་གཏན་ནས་མི་དགོས།
སྒྲུང་ཞེས་པ་ནི་སྔོན་གྱི་གཏམ་བརྗོད་པའི་ངག་གི་ཕྲེང་བ་ཞིག་སྟེ་བརྗོད་བྱ་ཕུན་སུམ་ཚོགས་ལ་གསོན་ཤུགས་ལྡན་པས་ཡིད་འཕྲོག་པ་ཞིག་ཀྱང་ཡིན། མཁས་དབང་དགེ་འདུན་ཆོས་འཕེལ་གྱིས“དེ་བཞིན་སྔོན་གྱི་གཏམ་རྒྱུད་མང་བོ་ལ་ཚད་མར་བྱེད②”ཅེས་གསུངས་པ་བཞིན་སྔོན་གྱི་མི་རྣམས་ཀྱིས་སྒྲུང་གི་མི་སྣས་བཀོད་པའི་ཟིན་ཐོ་དང་སྤྱི་ཚོགས་ཀྱི་གནད་དོན་མང་བོ་ཐག་གཅོད་ཐུབ་པ་བྱུང་བས་རིམ་གྱིས་སྒྲུང་དང་མི་རིགས་ གོམས་སྲོལ་ལ་མ་བུ་ལྟ་བུའི་འབྲེལ་བ་དམ་པོ་ཆགས་པར་བརྟེན། སྔོན་གྱི་བཙན་པོ་རྣམས་ཀྱིས་བརྗོད་བྱ་ཕུན་སུམ་ཚོགས་པའི་སྒྲུང་སྣ་ཚོགས་ཀྱིས་ཆབ་སྲིད་ཐག་གཅོད་པ་ལ་བརྟེན་ནས“ཆབ་སྲིད་སྒྲུང་གིས་བསྐྱངས”ཞེས་པའི་གཏམ་འདི་བྱུང་བ་རེད། དེས་ན་སྒྲུང་གིས་ཆབ་སྲིད་ལ་ནུས་པ་ཇི་ལྟར་ཐོན་ཚུལ་ཐད་ལ་ཁོ་བོས་དབྱེ་ཞིབ་བྱས་པ་བརྒྱུད་ཤེས་རྟོགས་ཐུབ་པ་འདི་ལྟ་སྟེ།
(1)མནའ་ཡི་ནུས་པ་ཐོན་པའི་སྐོར།
སྤྱི་ཚོགས་འཕེལ་རིམ་ལ་བལྟས་ན་སྒྲུང་ཡོད་ཚེ་ལྷ་ཡོད་ལ་ལྷ་ཡོད་པར་ངོས་འཛིན་གྱིས་དེ་བདེན་དབང་དུ་འཇོག་པའི་ལམ་སྲོལ་བྱུང་ཞིང༌། ལྷའམ་ཉི་ཟླ་སྐར་གསུམ་བདེན་དཔང་དུ་བྱས་ནས་མནའ་བསྐྱེལ་ན་དེ་ལས་བདར་མི་ཐུབ་པའི་ནུས་པ་ཞིག་བྱུང་བ་བོད་ཀྱི་གཏམ་དཔེར། “མིས་མི་བཟའ་མནའ་དང་ཁྱིས་མི་བཟའ་ལྕགས”ཞེས་དང“མནའ་ཟོས་པའི་བུ་ལ་ཐར་བ་མེད”ཅེས་པ་སོགས་ལས་གསལ་བར་མཐོང་ཐུབ། ལྷག་པར《ཐང་ཡིག་གསར་རྙིང་ལས་བྱུང་བའི་བོད་ཆེན་པོའི་སྲིད་ལུགས》ཞེས་པ་ལས།“རྗེ་བློན་རྣམས་ཀྱིས་འདུན་མ་ཆུང་ངུ་རེ་བསྡུ་སྟེ། ལུག་ཁྱི་སྤྲེལ་གསུམ་དམར་མཆོད་བྱེད། ཐོག་མར་སྲོག་ཆགས་དེ་དག་གི་རྐང་ལག་འབྲེག དོན་སྣོད་མདུན་དུ་སྤུངས་ནས་བན་དེ་ཞིག་གིས་གནམ་ས་རི་ལུང་ཉི་ཟླ་གཟའ་སྐར་ལ་སོགས་པ་དཔང་དུ་གསོལ་ཏེ། གལ་ཏེ་འདུན་མ་དང་འགལ་ཏེ་བསམ་ངན་བྱེད་ན། ལྷ་ལ་མངོན་མཁྱེན་ཡོད་པས། ཁྱོད་ཚོ་ཡང་ལུག་ཁྱི་འདི་རྣམས་བཞིན་དུ་མི་བགྱིད་རི་ཞེས་མནའ་འདོར་རོ། །ལོ་གསུམ་ན་འདུན་མ་ཆེན་པོ་རེ་བསྡུ། མཚན་མོ་ཁྲི་ཐོག་ཏུ་མཆོད་ཟས་རྣམས་བསྒྲིགས་པ་དང༌། ཁྱི་རྟ་གཡག་གསུམ་དང་བོང་བུ་རྣམས་བསད་དེ་ཁྱོད་ཅག་ཡོད་དོ་ཅོག་གིས་སེམས་རྩ་མཐུན་པའི་སྒོ་ནས་རང་ཡུལ་སྲུང་བར་གྱིས་ཤིག གནམ་སའི་ལྷ་རྣམས་ཀྱིས་ཁྱོད་ཅག་སེམས་པ་ཐམས་ཅད་མཁྱེན་པས། གལ་སྲིད་མནའ་དང་འགལ་ན་ད་ལྟ་བསད་པའི་སྲོག་ཆགས་འདི་རྣམས་བཞིན་དུམ་བུར་བྱས་ལ་གསོད་ཅིག་ཅེས་མནའ་འདོར་རོ། །③”ཞེས་པ་འདི་དང་གནའ་བོའི་རྡོ་རིང་ཡི་གེ་དག་ལ་བལྟས་ན་དགྲ་འདུལ་གཉེན་སྐྱོང་དང་ཆོས་སྲིད་ཀྱི་བྱ་བ། ཡང་ན་སྲིད་དོན་གལ་བོ་ཆེ་ཞིག་ལ་ཐུག་དུས་རྒྱལ་བློན་དང་འབངས་དག་གི་འཐུས་མི་དང་བཅས་པས་ལྷན་ཅིག་བྲོ་བོར་ཏེ་བློ་བརྟན་འགྱུར་བ་མེད་པ་བྱེད་ཅིང་དེ་ལས་འབྲས་བུ་ཆེན་པོ་ཕྱིའི་དགྲ་འདུལ་བ་དང་ནང་གི་ཆབ་སྲིད་བརྟན་པར་བློ་ལས་འགོངས་པའི་ནུས་པ་ཞིག་བཏོན་ཡོད། ལྷག་པར་ད་ལྟའི་བར་དུ་རང་རེའི་རོང་འབྲོག་ས་ཁུལ་དུ་སྲོལ་འདི་ཡོངས་ཁྱབ་ཏུ་དར་བ་ལ་བརྟགས་ན་སྒྲུང་དང་མནའི་ནུས་པ་ལ་འབྲལ་དུ་མེད་པའི་རྗེས་སུ་འགྲོ་ལྡོག་གི་འབྲེལ་བ་ཡོད་པས་ཚུལ་དེ་ལ་བལྟས་ན་མནའ་ཡིས་ཆབ་སྲིད་ལ་ནུས་པ་ཐོན་པའི་གནད་དེ་སྒྲུང་ལའང་ཐད་ཀར་འབྲེལ་ཡོད་ཅིང༌། སྐབས་དེར་མནའ་སྐྱེལ་བའི་གཏམ་རྒྱུད་མང་བོ་ཞིག་ཡོད་ངེས་ཤིང༌། མི་ཆེ་གེ་མོས་མནའ་ཟོས་པས་རྐྱེན་ངན་དེ་དང་དེ་བྱུང་ལྟ་བུའི་སྒྲུང་ད་ལྟའང་ཀློང་ལ་ཁྱབ་འདུག་པ་འདིས་སྒྲུང་གིས་ཆབ་སྲིད་བསྐྱངས་པའང་མནའ་དང་སྦྲེལ་ནས་བཤད་ཆོག
(2) ཁྲིམས་ཀྱི་ནུས་པ་ཐོན་པའི་སྐོར།
སྲོང་བཙན་གྱི་སྔ་རོལ་དུ་བོད་ལ་ཡི་གེ་མེད་པས་གཅིག་གྱུར་གྱི་ཁྲིམས་ཡིག་མ་བྱུང་ཡང་ཁྲིམས་མེད་པ་ག་ལ་ཡིན། 《ལ་དྭགས་རྒྱལ་རབས》ལས། “མངའ་ཐང་བཀའ་ཁྲིམས་ཀྱིས་སྐུ་བརྒྱན་མཛད། རྗེ་བཀའ་གངས་ལ་ཉི་མ་ཤར་བ་དང་འདྲ།④ ”ཞེས་པས་གཉའ་ཁྲིའི་སྐབས་ནས་བོད་ལ་ཁྲིམས་སྲོལ་དར་ཡོད་པ་གསལ་ཆའང་ཁྲིམས་ཡིག་མེད་པས་སྒྲུང་གིས་ཁྲིམས་ཡིག་གི་ཚབ་བྱས་ཏེ་གནད་དོན་ཐག་གཅོད་པའི་སྲོལ་བྱུང་ཡོད་ཅིང༌། དེའི་རྨང་གཞིའི་སྟེང་ནས་རྗེས་སུ་ཁྲིམས་ཡིག་གཏན་ལ་འབེབ་སྐབས་ཀྱང་སྒྲུང་ལ་བརྟེན་ནས་ཁྲིམས་ཡིག་བཟོས་པ། དཔེར་ན། 《མཁས་པའི་དགའ་སྟོན》ལས།“གཉི་གས་ལན་པ་ལ་བྲམ་ཟེ་དབྱུག་པ་ཅན་གྱིས་ཁྱིམ་བདག་གི་གླང་གཡར་ནས་གཏོང་དུ་ཕྱིན་པས་ཁྱིམ་བདག་གི་ར་བར་བཏང་སྟེ་ཅི་ཡང་མ་སྨྲས་པར་ལོག ཁྱིམ་བདག་གིས་གླང་སྐྱེལ་བ་མཐོང་ཡང་མ་བཏགས་པར་བཞག་པས་གླང་ཕུགས་ཀྱི་སྒོ་ནས་ཐོན་ཏེ་སྟོར་བ་རྒྱལ་བོ་མེ་ལོང་གདོང་ལ་ཞལ་ལྕེ་ཞུས་པས་བྲམ་ཟེས་གླང་བཏང་ཡོད་དོ། །ཞེས་མ་སྨྲས་པས་ལྕེ་ཆོད། ཁྱིམ་བདག་གིས་མཐོང་ཡང་མ་བཏགས་པས་ལག་པ་བྲེགས། ཞེས་ཞལ་ལྕེ་བཅད་པ་ལ་དཔེ་བྱས་ནས་ཆད་པ་གཉིས་མཉམ་དུ་གཅོད་པ་དབང་ཆེན་བཅད་ཀྱི་ཁྲིམས། གཉི་ག་བདེན་ན་ཁྱིམ་བདག་ཞིག་གི་བུ་སྐྱེས་མ་ཐག་ཆུར་ལྷུང་བ་ཉ་ཞིག་གིས་མིད་པ་རིའི་འོག་གི་གྲོང་ན་གནས་པའི་ཁྱིམ་བདག་གཞན་ཞིག་གི་གཡོག་གིས་ཉ་དེ་ཟིན་ནས་བཤས་པས་ཁྱེའུ་ཞིག་མ་ཤི་བར་བྱུང་བ་ཁྱིམ་བདག་དེས་བུར་གསོས་པ་ཁྱིམ་བདག་གཞན་གོང་མས་ཐོས་ནས་རྩོད་དེ་རྒྱལ་བོ་ལ་ཞལ་ལྕེ་ཞུས་པས་གཉི་གས་ཁྱེའུ་རེས་མོས་སུ་གསོས་ལ་བུད་མེད་རེ་རེ་ལོངས། བུ་བྱུང་ན་ཁྱིམ་བདག་སོ་སོས་ཁྱེར་ཞིག་སྨོས་བྱུང་ནས་ཁྱེའུ་རིགས་གཉིས་པར་མིང་ཆགས། བུ་རེ་རེ་སོ་སོས་ཁྱེར། ཕྱིས་རབ་ཏུ་བྱུང་བས་དགེ་སློང་རིགས་གཉིས་པར་གྲགས་པ་དེ་ལ་དཔེ་བྱས་ནས་བདེན་གཉིས་དགའ་གསུམ་དུ་གཅོད་པ་ཁབ་སོ་ནང་པའི་ཁྲིམས་ཡིག་ཏུ་གྲགས⑤”ཞེས་བྱུང་བ་དག་ལས་སྒྲུང་ལ་བརྟེན་ནས་ཁྲིམས་བྱས་པ་ཤིན་ཏུ་གསལ་ཞིང་བོད་ལ་གཅིག་གྱུར་གྱི་ཁྲིམས་ཡིག་གཏན་ལ་མ་ཕབ་པའི་སྔོན་དུ་ད་ལྟའི་ཨ་མདོའི་ས་ཁུལ་དུ་དར་བ་བཞིན་གནའ་སྔ་མོར་ཆེ་གེ་མོས་གཟུ་བྱེད་དུས་གནད་དོན་འདི་ལྟར་ཐག་བཅད། དེ་ལྟར་ན་འདི་ལྟར་བྱེད་དགོས། ག་གེ་མོས་འདི་ལྟར་ཐག་བཅད། དེ་ལྟར་ན་འདི་ལྟར་བྱེད་དགོས་ཞེས་ཐ་ན་སྔོན་གྱི་མིས་བཤད་པའི་སྐད་ཆ་དང་གཏམ་དཔེ་སོགས་ཀྱང་ཆུ་བཞུར་བ་བཞིན་ཐོན་ཐུབ་པ་ཞིག་ཡིན་ངེས། དེས་ན་ད་ལྟའི་ཨ་མདོའི་ས་ཁུལ་དུ་དར་བའི་སྲོལ་འདི་ནི་སྔོན་གྱི་རྒྱུན་ཞིག་ཏུ་གདོན་མི་ཟ་བས་འདི་ལ་དཔྱད་ན་སྐབས་དེའི་ཁྲིམས་དཔོན་དག་ནི་སྒྲུང་ལ་མཁས་ཤིང་བློ་ཐོས་ཡངས་པ། གཏམ་དང་ཁ་ལྕེ་ལྡན་པ་ཞིག་ཏུ་ཤེས་ཐུབ།
(3)རྗེ་བློན་གྱི་བརྩི་བཀུར་ལ་ནུས་པ་ཐོན་པའི་སྐོར།
དབང་སྒྱུར་གྲལ་རིམ་གྱིས་རང་གི་ཁེ་ཕན་གྱི་ཆེད་དུ་ལྷ་སྒྲུང་མང་བོ་དར་སྤེལ་བཏང་སྟེ་རྒྱལ་བོ་དང་བློན་པོ་ལྷ་ནས་ཆད་པའམ་ལྷ་ཡིས་བསྐོས་པའི་ལྷ་སྒྲུང་ངམ་བཤད་ཚུལ་བྱུང་བ་དེས་གདོད་མའི་མི་རྣམས་ཀྱིས་དོན་དངོས་ལ་བརྟག་དཔྱད་བྱེད་མ་ཐུབ་པར་ལྷར་ཡིད་ཆེས་ཀྱིས་དེ་དག་བརྩི་ཞིང་བཀུར་བའི་སྲོལ་འདི་བྱུང་བ་རེད། དཔེར་ན། 《ཏུན་ཧོང་ནས་ཐོན་པའི་བོད་ཀྱི་ལོ་རྒྱུས་ཡིག་ཆ》 ལས“ལྷ་གནམ་གྱི་སྟེང་ནས་གཤེགས་པ། གནམ་ལྷབ་ཀྱི་བླ་ན། ཡབ་ལྷ་བདག་དྲུག་བཞུགས་པའི་སྲས། གཅེན་གསུམ་གཅུང་གསུམ་ན། ཁྲིའི་བདུན་ཚིགས་དང་བདུན། ཁྲིའི་བདུན་ཚིགས་ཀྱི་སྲས། ཁྲི་ཉག་ཁྲི་བཙན་པོ། ས་དོག་ལ་ཡུལ་ཡབ་ཀྱི་རྗེ། དོག་ཡབ་ཀྱི་ཆར་དུ་གཤེགས་སོ། །ལྷ་རི་གྱང་དོར་གཤེགས་ན། རི་རབ་ལྷུན་པོ་ཡང་དགའ་དུད་དུད། ལྗོན་ཤིང་སྡོང་བོ་ཡང་བང་ཐང་ཐང༌། ཆབ་ལུ་མ་ཡང་དངོ་སིལ་སིལ། གོར་ཕ་བོང་ལ་སྩོགས་པ་ཡང་གཉེན་ཁྲུང་ཁྲུང་གིས་ཕྱག་འཚལ་ལོ། བོད་ཀ་གཡག་དྲུག་གི་རྗེར་གཤེགས་སོ། །⑥”ཞེས་པ་འདི་ལས་གཉའ་ཁྲི་ལྷ་ནས་མཆེད་པ་དང༌། བོད་དུ་བྱོན་དུས་རི་ཆུ་ནགས་ཚལ་ཐམས་ ཅད་ཀྱིས་ཕྱག་བྱས་པ་ལ་སོགས་སྒྲོ་བཏགས་ཀྱི་སྒྲུང་གཏམ་ངོ་མཚར་ཅན་ཞིག་བཟོས་ཏེ་མི་རྣམས་བློ་འགུག་གིས་བརྩི་བཀུར་གྱི་ནུས་པ་ཞིག་ངང་གིས་ཐོན་བཅུག་སྟེ་ད་ལྟའི་བར་དུ་རང་རེའི་མི་རྣམས་ཀྱི“མི་རྗེ་ལྷ་ནས་མཆེད”ཅེས་པའི་གཏམ་འདི་བྱུང༌། གཞན་ཡང《ལེགས་བཤད་མཛོད》ཀྱི“བོན་སྙད་པ་བསྣུབས་བོན་གཤེན་མཐའ་རུ་སྤྱུགས། བོན་བསྣུབས་པའི་དབུ་ཡོག་རྒྱལ་ལ་བབ། རྒྱལ་བོ་ཐེའུ་རང་མང་སྙ་ཡུ་ཝེར་གྱི་སྐྱེ་བ་ཡིན། འབངས་ལོ་ངམ་རྟ་རྫི་ཡིས་ལྟག་པ་གཅུས་ནས་བསད⑦”ཅེས་པའི་གཏམ་རྒྱུད་དེ་ལས་གྲི་གུམ་ཐེའུ་རང་གི་སྤྲུལ་པར་བཤད་པ་འདིས་རྒྱལ་བོ་ཆེས་དམན་པ་ཞིག་ཏུ་བཏང་ཡོད་ལ། ལོ་ངམ་བོན་གྱི་ཆོས་སྐྱོང་གི་སྤྲུལ་པ་ཡིན་པས་རྒྱལ་བོ་དཀྲོངས་པ་ནི་བོན་བསྣུབས་པའི་ལེ་ལན་ཡིན་པ་སོགས་ལས་ལོ་ངམ་གྱིས་རྒྱལ་བོ་ལྔ་ལམ་དུ་གཏོང་འོས་ཤིང་འཚམ་པ་ཞིག་ཏུ་བཤད་ནས་དམངས་ལ་བསླུ་བྲིད་ཀྱི་ནུས་པ་ཐོན་པའི་སྒྲུང་གཏམ་དེས་ལོ་ངམ་བཀུར་འོས་པ་ཞིག་ཏུ་དོན་གྱིས་བསྟན་ཡོད། ཡང་རུ་ལས་སྐྱེས་ཡར་ལྷ་ཤམ་པོའི་བུ་རུ་བཤད་པའི་སྒྲུང་སོགས་ཀྱིས་ཁོང་རང་ཐང་བུ་ཡིན་པར་དམོད་པ་འགོག་པ་སོགས་ཏེ་ལྷར་དད་པ་བེད་སྤྱད་ནས་རང་གི་ཆབ་སྲིད་ཇེ་བརྟན་དུ་གཏོང་བའི་ཐབས་ལམ་ཞིག་ལས་མ་འདས་སོ། །
(4)དགྲ་འདུལ་གཉེན་སྐྱོང་ལ་ནུས་པ་ཐོན་པའི་སྐོར།
བོད་ཀྱི་ལོ་རྒྱུས་སྟེང་དུ་དགྲ་འདུལ་གཉེན་སྐྱོང་གི་བྱུང་བ་བགྲང་ལས་འདས་པ་ཞིག་ཡོད་ལ་དེ་དག་བརྗོད་བྱར་བྱས་པའི་སྒྲུང་གཏམ་ཡང་གང་མང་ཞིག་ཐོན་ཡོད། 《ལྡེའུ་ཆོས་འབྱུང》ལས། “བཙན་པོའི་ཞལ་ནས་མ་གི་ལ་རྐུ་ཡོད། སྡང་ཡོད། དགྲ་ཡོད། དུག་ཡོད། གཡག་ཡོད། བྱད་ལྟེམས་ཡོད་གསུངས་པས། རྐུ་ལ་ལན་ཡོད། སྡང་ལ་བྱམས་ཡོད། དགྲ་ལ་གཉེན་ཡོད། དུག་ལ་སྨན་ཡོད། གཡག་ལ་མཚོན་ཡོད། བྱད་ལྡེམས་ལ་འགྲོལ་ཐབས་ཡོད།⑧ ”ཅེས་པ་སོགས་ཀྱི་སྒྲུང་ལས་གཉའ་ཁྲི་དགྲ་འདུལ་གཉེན་སྐྱོང་ལ་མཁས་ལུགས་བསྟན་ཡོད་ཅིང༌། གཞན་ཡང་དེ་ལྟ་བུའི་སྒྲུང《རྟ་རྐྱང་རབ་དབྱེ》སོགས་ཀྱང་བྱུང་མྱོང་བས་ད་ལྟའི་བར་དུ“དགྲ་འདུལ་གཉེན་སྐྱོང”ཞེས་པའི་གཏམ་རྒྱུད་འདི་བྱུང་བ་ཡིན་ལ་དེའི་ཕྱིར《ལ་དྭགས་རྒྱལ་རབས》ལས“སྐུ་སྲུང་སྡེ་བཞིས་སྐུ་སྲུངས་རྒོད་ལྡོད་སྡེ་མི་བཞི་བཅུ་རྩ་བཞིས་ནི་ཕྱིའི་དགྲ་འདུལ། རོང་དོར་ཁབ་སོ་ཉི་ཤུ་རྩ་གཉིས་ཀྱིས་བང་མཛོད་འགྱེངས། ཚོང་འཕྲོས་བཅུ་གཉིས་ནས་ནོར་གྱི་དབྱིག་འབུལ། ལེགས་ཉེས་ཀྱི་བྱ་དགའ། དཔའ་མཛངས་ཀྱིས་ཤན་འབྱེད། ནོངས་ཀྱི་ཆད་པའི་ཤ། གཡོའི་ཁུང་སྣུབས། མཛད་སྣ་ལྔའི་གསེར་གཡུ་དང་ཡིག་ ཚང་གིས་བསྟོད། དཔལ་སྣ་ལྔས་སེང་གེ་དང་གུང་སྟག་གིས་བརྒྱན། མགྱོགས་སྣ་ལྔས་ཆིབས་སུ་མཛད་ནས་རྒྱུགས་སུ་སྤྲོ། རྗེའི་བཀའ་ཁྲིམས་ནི་གངས་ལ་ཉི་མ་ཤར་བ་དང་འདྲ། མཛད་པ་ལས་སུ་ཕོ་བྲང་འུམ་བུ་བླ་སྒང་བརྩིགས། རྐུ་འཕྲོག་དང༌། རྫུན་སྤྱོད་ཅིང༌། ཚོང་ དང་ཁེ་སྤོགས་ལ་མི་ལྟ། རྒྱལ་ཁམས་ཐམས་ཅད་བདེ་ཞིང༌། མངའ་ཐང་ཐམས་ཅད་སྐྱིད⑨”ཅེས་པ་འདི་ལྟ་བུ་དག་ཀྱང་རྒྱལ་རབས་རྗེས་མའི་རྒྱལ་སྲིད་སྐྱོང་བའི་དཔེ་རུ་འཇོག་པ་ཡིན་ལ་ཡང《རྒྱ་བོད་ཆོས་འབྱུང་རྒྱས་པ》ལས།“དབང་མཛད་བཅུ་གཉིས་ཀྱི་ལོ་རྒྱུས་དང་བཅས་པ་ཟེར་བས་དེ་ལྟར་བསྐོས་པའི་རྒྱལ་བོ་ཕྱོགས་བཞི་ཁ་ན་གྲགས། བོད་དབུས་ན་རྨོངས་པས་ཁས་ཉེན་ཏེ། རྒོལ་དུ་མི་ཐུབ་བྲག་རི་བཙན་པོ་འཛིན་སྐད⑩”ཅེས་བྱུང་ཞིང་དེའི་དུས་སུ་ཕྱོགས་བཞིའི་རྒྱལ་བོ་འདི་ལ་དཔྱད་ན་དབང་མཛད་ཀྱི་གོང་ནས་དགྲ་འདུལ་གཉེན་སྐྱོང་གི་སྲོལ་ག་བྱུང་ལ་དེ་ལས་ངོ་མཚར་བའི་སྒྲུང་གང་མང་བྱུང་བའང་གདོན་མི་ཟ་བས་སྒྲུང་གིས་དགྲ་འདུལ་གཉེན་སྐྱོང་ལ་ནུས་པ་བཏོན་པ་ནི་བཙན་པོའི་སྐབས་ཁོ་ན་མ་ཡིན་པར་དེའི་སྔ་རོལ་ནས་ཡོད་ལ། བཙན་པོ་ཞེས་བཀུར་བ་འདིའང་དགྲ་འདུལ་གཉེན་སྐྱོང་དང་དེའི་སྒྲུང་ལ་ཐད་ཀར་འབྲེལ་བའི་ཐ་སྙད་ཅིག་ཏུ་མངོན། གཞན་ཡང་བོད་ཀྱི་ལོ་རྒྱུས་སུ《རྒན་མོ་གསེར་འཁུར》ཞེས་པའི་སྒྲུང་དེ་སྤྱི་ཚོགས་བདེ་བའི་ཚད་དུ་ད་ལྟའང་གླེང་བཞིན་ཡོད་ལ་དེ་དག་གིས་དགྲ་འདུལ་གཉེན་སྐྱོང་ལ་ནུས་པ་ཐོན་པ་བསྙོན་ པར་ག་ལ་ནུས། ད་དུང་སྟོད་སྨད་བར་གྱི་དཔའ་སྡེ་ཞེས་པ་དག་གི་དགྲ་འཐབ་ཀྱི་ནུས་པ་དེའང་སྒྲུང་དང་འབྲེལ་ཡོད་པར་སེམས་ཏེ་དཔྱད་པར་རིགས་སོ། །
གཉིས། ལྡེའུ་དང་དེས་ཆབ་སྲིད་ཇི་ལྟར་བསྐྱངས་པའི་སྐོར།
《མཁས་པའི་དགའ་སྟོན》ལས།“མངོན་པའི་སྡེ་སྣོད་འབྱུང་ལྟས་ལྡེའུ་སྤྲོད། སྲང་ལ་ཐེམ་གཉེར་ལྭ་བ་ཆེ་བ་ཅི་ཡིན། པོར་མགོ་མགོ་ཅན་སྐྱེད་ཅིང་རྒྱགས་ཅི་ཡིན་ཞེས་འདྲི་བ་སོགས་ཏེ⑴”ཞེས་པ་འདི་དག་ལ་དཔྱད་ན་ལྡེའུ་ནི་ད་ལྟའི་ཁེད་དུ་སྣང་བས་མང་བོ་ཞིག་གིས་ཁེད་ཀྱིས་རྒྱལ་སྲིད་ཇི་ལྟར་བསྐྱངས་བར་སོམ་ཉི་བྱེད་ལ། ལོ་རྒྱུས་སྨྲ་བ་འགས་ལྡེའུ་ནི་ཞང་ཞུང་སྐད་དེ་རིག་པའི་མིང་ཡིན་པར་འདོད་མོད་དོན་དུ་འཁྱོག་པའི་བརྡ་རྙིང་ཡིན་པ་རྗེ་ཙོང་ཁ་པས《ལེགས་བཤད་གསེར་འཕྲེང》དུ་གསུངས་ཏེ་དེ་ཉིད་ལས།“ཐད་ཀར་མི་སྟོན་པ་འཁྱོག་པའི་ངག་གིས་བསྟན་པའི་དགོས་པ་འདིའོ་ཞེས་དགོས་པ་སྟོན་པའི་ཆ་ནས་ལྡེམ་པོར་དགོངས་པ་སྟེ་ལྡེམ་པོའམ་ལྡེའུའི་ངག་ནི་འཁྱོག་པོ་ཡིན་པས་སོ། །⑵”ཞེས་འབྱུང་བ་ལྟར་རོ། །འདི་ལ་དཔྱད་ན་ཐད་ཀར་དྲང་བོར་མི་སྟོན་པ་ནི་ལྡེའུ་ཡིན་པ་གདོན་མི་ཟ་ལ་ཁེད་ཀྱི་གོ་དོན་ཡང་ཕལ་ཆེར་དེ་ལས་མ་འདས་སྙམ། མཁས་དབང་དགེ་འདུན་ཆོས་འཕེལ་གྱི《གསེར་གྱི་ཐང་མ》ལས། “བརྡ་ཐབས་ཡིན་ཁུལ་མང་བོ་སྨྲ་བ་ལ་དགའ་བར་བྱེད། བློན་ཆེན་ལྟ་བུ་ཞིག་གིས། འདི་ལྟར་བྱས་ན་ཤར་གྱི་རི་ནུར་ཏེ་ནུབ་ཀྱི་མཚོ་ཁ་བཅད་ཡོང་ཞེས་སྨྲས་པ་ལ། རྒན་མོ་རིག་པ་ཅན་རྣམས་ཀྱིས་དེའི་དོན་ཅི་ཡིན་ཞེས་ཉིན་མང་བོ་ལ་བསམ་བློ་གཏོང་བར་བྱེད།⑶ ”ཅེས་པ་ལ་བསམ་ན་ཡང་ཤེས་ཐུབ་ལ་གོང་གི་ཚིག་འདི་ལས་ལྡེའུའི་ལམ་ནས་གཏམ་སྨྲ་བའི་སྲོལ་ཤིན་ཏུ་དར་ཁྱབ་ཆེ་བ་ཤེས་ཐུབ། དེ་བཞིན《མཁས་པའི་དགའ་སྟོན》དུའང༌།“འཕན་ཡུལ་དར་རྒྱལ་བྱིས་པ་མང་བོ་རྗེ་བྱ་བ་འཕྲུལ་ཆེ་བ་ར་ཐོས་ནས་བློན་པོ་བཞི་འཚོལ་དུ་ཕྱིན་པས་ནེའུ་གསིང་ཆེན་པོ་ཞིག་གི་མཐར་བྱིས་པ་དང་འཕྲད། ན་འདིའི་གཞུང་གཅོད་དམ་མཐའ་བསྐོར་དྲིས་པས་དལ་ན་གཞུང་ཆོད། རིངས་ན་མཐའ་བསྐོར་ཟེར། བློན་པོ་བཞིས་གཞུང་བཅད་པས་འདམ་དུ་ཚུད་ནས་ཡུན་རིང་འགོར། བྱིས་པ་དེ་ལ་ཕ་མ་གར་སོང་དྲིས་པས་ཕ་གཏམ་འཚོལ་དུ་སོང༌། མ་མིག་འཚོལ་དུ་སོང་ཟེར། དར་ཅིག་ན་ཕས་ཆང་ཁྱེར། མས་མེ་ཁྱེར་བྱུང་སྐད⑷” ཅེས་གསལ་བ་དག་གིས་ཀྱང་ར་འཕྲོད་ཐུབ། དེ་ལྟར་སྤྱི་ཚོགས་སྟེང་དུ་ལྡེའུ་དར་ཁྱབ་ཆེ་ ནའང་དེས་ཆབ་སྲིད་སྐྱོང་བ་ནི་ཕལ་ཆེར་གསང་འཕྲིན་ལ་འབྲེལ་བ་ཡོད་པ་ཞིག་སྟེ་ངག་གམ་བརྡ་ཐབས་སྣ་ཚོགས་བརྒྱུད་ནས་གསང་བ་སྐྱེལ་བ་ཞིག་ཡིན་པར་མངོན། ཁོ་བོས་དཔྱད་པ་ལྟར་ན་ལྡེའུ་ལ་ངག་གི་ལྡེའུ་དང་རྫས་ཀྱི་ལྡེའུ་གཉིས་ཡོད་ཅིང་སྤྱོད་སྟངས་ལའང་ནམ་རྒྱུན་འཚོ་བའི་ནང་དུ་སྤྱོད་པ་དང༌། རྩེད་མཚར་གྱི་སྐབས་སྤྱོད་པ། གསང་འཕྲིན་ལ་སྤྱོད་པ། དགོས་པ་གལ་ཆེན་ཞིག་གི་ཆེད་དུ་སྤྱོད་པ་སོགས་ཡོད་ནའང་འདིར་གསང་འཕྲིན་ལ་འབྲེལ་བ་ཡོད་པའི་ལྡེའུ་གཉིས་གླེང་བར་བྱ་སྟེ།
(1)ངག་གི་ལྡེའུ་ནི《རྒྱལ་རབས་གསལ་བའི་མེ་ལོང》ལས། “བོད་བློན་རྣམས་ཀྱིས་རྫུས་མའི་སྤྲང་བོ་ཞིག་བཏང་བྱུང་ངོ༌། །དེར་བློན་པོ་ལོག་པའི་སྐད་བྱས་ཏེ་ར་ཕོ་རྒྱ་བོ་ལ་ངོ་ཤེས་མི་བྱའོ། །ཁ་རོག་སྡོད་ལ་ཀུ་ཅོ་ཐོང༌། ནག་མོ་ལྕགས་མཁར་ཐུག་ནས་ཡོང༌། །ལུང་པ་ཕུ་བརྡུགས་མདའ་བརྡུགས་སུ། །ཐུ་རུ་ཅོ་བྲགས་ཁོང་ལ་ཞོག །དར་དཀར་དྲིལ་ལ་དར་ནག་ བསྐྱོད། །ཟླ་བ་ཉི་མའི་རྩ་རུ་སླེབ། །ཟེར་ནས་དེར་སྤྲང་བོ་དེ་ལོག་གོ⑸”ཞེས་སྐད་བཏང་བ་དེའང་ངག་གི་ལྡེའུ་ཁོངས་སུ་གཏོགས་པ་ཡིན་ཏེ་དེའི་དོན་ནི་ར་ཕོ་རྒྱ་བོ་ལ་ངོ་ཤེས་མ་བྱེད་ཅེས་པ་རྒྱའི་བློན་པོ་ལ་ཁོང་རང་གི་རྒྱུ་མཚན་མ་བཤད་ཅེས་པའི་བརྡ་ཡིན་ལ། ནག་མོ་ལྕགས་མཁར་ཐུག་ནས་ཡོང་ཞེས་པ་དེ་རྒྱ་རྣམས་ལ་ས་བོན་ཡོས་སུ་བརྔོས་ནས་འདེབས་སུ་བཅུག་པའི་བརྡ་ཡིན། ལུང་པ་ཕུ་བརྡུགས་མདའ་བརྡུགས་སུ། །ཐོ་རུ་ཅོ་བྲགས་ཁོང་ལ་ཞོག་བྱ་བ་དེ་དོང་བར་མདའ་མོ་མང་བོ་བཅུག་ཅེས་པའི་བརྡ་ཡིན། དར་དཀར་དྲིལ་ལ་དར་ནག་བསྐྱོད་ཅེས་པ་དེ་ཉིན་མོར་བསྡད་དེ་མཚན་མོར་འོང་ཞེས་པའི་བརྡ་ཡིན། ཟླ་བས་ཉི་མའི་རྩར་སླེབ་ཟེར་བ་དེ་ང་ཁྱེད་རྣམས་ཀྱི་སར་མགྱོགས་པོར་ཡོང་ཟེར་བའི་དོན་ཡིན་པ་སོགས་ཁེད་དང་ཆ་འདྲ་བར་བརྡ་འཕྲིན་སྐྱེལ་བ་འདི་ལྟ་བུ་དམངས་ཁྲོད་གཏམ་རྒྱུད་དག་ན་ཤིན་ཏུ་མང༌། དེ་དག་ལས་དཔེ་མཚོན་རེ་བཀོད་ན། བློན་པོ་མགར་སྟོང་བཙན་ལོ་ན་བགྲེས་དུས་རྒྱའི་མྱུལ་མ་གསུམ་སླེབས་ཏེ་མགོ་འཛུལ་ཚུལ་བསྟན་པར་ཁོང་གིས་ཤིན་ཏུ་ལེགས་མོད་ཀྱི་ཁོ་བོ་ན་སོ་སྨིན་པས་ད་སྐབས་བུ་ཆེ་བས་འགན་འཁྲི་བཞེས་བཞིན་ལགས་པས་དེར་སོངས་ཞེས་གདམས་ཏེ་གཅིག་རང་གི་མདུན་དུ་འདུག་བཅུག་པ་དང་གཞན་གཉིས་བུ་ཆེ་བའི་སར་མངགས་པ་སྐྱེལ་མ་ལ། ཁྱོད་ཀྱིས་བཙན་སྙ་ལ་ཤོད་དང༌། ར་གྭ་གཞི་པོ་བཀྱིགས་ཏེ་ར་རྒྱ་བོ་བཤས་ནས་མགྲོན་པོ་ལ་གསོལ་སྟོན་ཤོམས། ཡ་གིའི་གྲི་ཆུང་གཡུ་དཀར་གྱིས་མི་ཆོད་ན་མ་གིའི་གཡའ་མའི་རྡར་ལ་དངོ་ལེན་པར་གྱིས། ཞེས་བརྗོད་དེ་འགྲོ་རུ་བཅུག་བཙན་སྙའི་ཁྱིམ་དུ་སླེབས་པ་ན་སྐྱེལ་མས་ཡབ་ཀྱི་ངག་འཕྲིན་ཇི་བཞིན་སྨྲས་ཀྱང་ཁོང་ཧ་མ་གོ་བས་ཆུང་མར་དྲིས་པར་མོས་བསམ་བློ་ཅུང་བཏང་སྟེ་བཙན་སྙ་ལ་ར་གྭ་གཞི་པོ་བཀྱིགས་ཟེར་བ་ནི་མགྲོན་པོ་གཉིས་ལས་ངོ་དཀར་པོ་ཅན་འདི་ཁྱིགས་ཟེར་བའི་བརྡ་ཡིན། ར་རྒྱ་བོ་བཤས་ཟེར་བ་ནི་ངོ་དམར་ཞིང་སྨྲ་ར་ཅན་འདི་སོད་ཅེས་བའི་བརྡ་ཡིན། ཡ་གིའི་གྲི་ཆུང་གཡུ་དཀར་ཁྱོད་ལ་ཟེར་ཞིང༌། མ་གིའི་གཡའ་མ་སྔོན་མོ་མོ་སྨན་ང་ལ་ཟེར་ཏེ་དོན་མི་ཤེས་ན་ང་ལ་དྲིས་ཞེས་པའི་བརྡ་ཡིན་འདུག་ཟེར་བས་བཙན་སྙས་བདེན་པར་གོ་ནས་དེ་ལྟར་བྱས་པས་བཀྱིགས་པ་དེས་གསང་བ་བརྗོད་པས་འཕྲལ་དུ་ཡབ་ཀྱི་སར་རྒྱུགས་ནས་གསང་མྱུལ་གཞན་པ་དེའང་བཟུང༌། གོ་ཧྲགས་ཀྱི་དམག་བསྐུལ་ནས་གློ་བུར་དུ་དགྲ་ལ་འཐབ་ནས་རྒྱལ་ཁ་ཆེན་པོ་བླངས་པའི་གཏམ་རྒྱུད་འདི་ལས་བཙན་པོའི་དུས་དམག་དོན་གྱི་གསང་འཕྲིན་ལྡེའུ་སྤྱོད་པ་ཤིན་ཏུ་གསལ་ཅིང༌། ཆོས་རྒྱལ་སྲོང་བཙན་སྒམ་པོའི་གཅུང་མོ་ལྷ་ལྕམ་སད་མ་ཀར་གྱིས་བཙན་པོས་མངགས་པའི་ཕོ་ཉ་ལ་བླངས་པའི་མགུར་ལས། “མཆིལ་བའི་ནི་རུ་སྲུབས་ལ། །ག་གི་ནི་ཤ་བཏཊ་ཤིང༌། །གཡས་སུ་མ་ཡོ་ཞིག། གཡོན་དུ་ནི་མ་རྡལ་ཆིག །གཡས་སུ་ནི་ཡོ་བ་ན། །སོ་བྱ་ནི་གྲེ་བོ་ཆུང༌། །གཡོན་དུ་ནི་རྡལ་བ་ན། །སྲམ་བུ་ནི་གོང་དེ་དངུལ། །མར་གྱི་ནི་ཆང་ཚང་ལ། །གྱུར་གྱིས་ནི་མ་མནན་ན། །སིང་ཕྱི་ནི་ གནངས་སླང་ན། །སྲམ་གྱིས་ནི་འཚལ་ཏ་རེ། །⑹”ཞེས་བྱུང་བ་འདི་ལྷ་ལྕམ་སད་མ་ཀར་གྱིས་སྲོང་བཙན་ལ་བསྐུར་བའི་ལྡེའུ་ཞིག་ཡིན་ཅིང༌། དེའི་དོན་ནི་མྱུར་མོར་ཞང་ཞུང་དབང་དུ་མ་བསྡུས་ན་རྒྱལ་ཁབ་གཞན་གྱིས་དབང་དུ་སྡུད་པའི་ཉེན་ཁ་ཡོད་པ་དེ་ཡིན་མོད་ཁོ་མོས་ཇི་བཞིན་མ་བརྗོད་པར་ཉ་ཡིས་ཞང་ཞུང་མཚོན་པ་དང༌། སྲམ་གྱིས་རྒྱལ་ཁབ་གཞན་མཚོན་པར་བྱས་ནས་བརྗོད་བྱ་འཁྱོག་པོའམ་སྦས་པའི་ཚུལ་གྱིས་བསྟན་ཏེ་དེའི་དགོས་པ་གཙོ་བོ་ནི་གསང་འཕྲིན་གཞན་གྱིས་ཤེས་མ་ ཐུབ་པར་དོན་དེ་བདེ་བླག་ཏུ་འགྲུབ་པ་ལ་ཕན་ནུས་ཆེན་པོ་གདོན་ཐུབ་པ་ཡིན། (2)རྫས་ཀྱི་ལྡེའུ་ནི་རྫས་ཀྱིས་དོན་སྣ་ཚོགས་མཚོན་ཞིང་དེའི་དོན་ཕ་རོལ་བས་དཔྱད་པས་གོ་ནུས་པ་ཞིག་ཡིན་པས་བཙན་པོའི་དུས་སུ་ཆབ་སྲིད་ཀྱི་དགོས་མཁོ་བཞིན་ཡོངས་ཁྱབ་ཏུ་སྤྱོད་བཞིན་ཡོད། དཔེར་ན། 《ཏུན་ཧོང་ནས་ཐོན་པའི་བོད་ཀྱི་ལོ་རྒྱུས་ཡིག་ཆ》ལས། “རྨང་ཅུང་བགྱིས་པ་ལས། བཙན་པོ་དྲལ་ལ། བཀའ་ལན་གསོལ་བ་ནི་ཅང་མ་མཆིས་སོ། །བཙན་པོ་དྲལ་གྱི་ཞལ་སྔ་ནས་ཐུགས་བདེ་ཞིང་བཞུགས་པ་གློ་བ་དགའ་ཤིང་མཆིས་སོ། །བཙན་པོས་བཀའ་སྩལ་བ་ནི། གུམ་ཆད་གཉིས། རྔོ་ཇི་ཐོག་གིས་འཚལ་ཞིང་མཆིས་སོ། །བཙན་པོའི་པྱག་ཏུ་འདི་པུལ་ཆིག་ཆེས། ཞུ་གཡག་ཞུ། གཆིག་པྱག་རྒྱས་བཏབ་ནས་བསྐུར་རོ། །གྱིམ་བརྩན་རྨང་ཅུང་སླར། བཙན་པོའི་སྤྱན་སྔར་མཆིས་ནས་བཙན་མོས་བཀའ་ལན་ཡི་གེ་གསོལ་བ་ཅང་མ་མཆིས། མགུར་བླང་བའི་ཚིག་ནི་འདི་ཞེས་མཆིས། ཕྱག་རྒྱས་བཏབ་སྟེ་སྐུར་བ་འདི་ལགས་ཤེས་གསལ་བ་ལས། ཞུ་པྱག་རྒྱ་པྱེ་སྟེ་གཟིགས་པ་ན་གཡུ་རྙིང་བཟང་བོ་སུམ་ཅུ་ཙམ་ཞིག་བྱུང་སྟེ། བཙན་པོའི་དགོངས་དགོངས་ནས། ཡུ་བུས་ལིག་མྱི་དྷྱ་ལ་རྒོལ་པོད་ན་གཡུ་ཐོགས་ཤིག རྒོལ་མ་ཕོད་ན་ནི་བུད་མྱེད་དང་མཚུངས་ཞུ་གྱོན་ཆིག་ཟེར་བ་ལྟ་ཞེས་བཀའ་སྩལ་ནས། རྗེ་བློན་བློད་བློད་དེ་ལིག་མི་དྷྱའི་སྲིད་བརླག་གོ ། ⑺”ཞེས་པ་ལྟ་བུ་སྟེ་འདི་ལས་རྫས་ཀྱི་ལྡེའུས་བོད་ཀྱི་དམག་དོན་དང་ཆབ་སྲིད་ལ་ནུས་པ་ཆེན་པོ་བཏོན་པ་གསལ་བོར་ཤེས་ཐུབ། འོན་ཀྱང་ངག་གི་ལྡེའུ་མཐའ་དག་གསང་འཕྲིན་ལ་སྤྱོད་པའི་ངེས་པ་མེད་ལ་རྫས་ཀྱི་ལྡེའུ་འདི་གཞན་དུ་སྤྱོད་པའང་ཡོད་དེ། 《ཆོས་འབྱུང་མེ་ཏོག་སྙིང་བོ》ལས། “བློན་པོ་མགར། གྱེས་དུང་ཙེ་བདུན་ཕྱག་རྟེན་དུ་ཕུལ། རྒྱལ་བོ་ལ་ཕྱག་དང་ཞེ་ས་རྫོགས་པར་བྱས་ཏེ་རྒྱལ་བོའི་མདུན་དུ་བཻརྱའི་རྨོག་བཞག⑻”ཅེས་བྱུང་བ་ལྟར་ཁྲབ་དང་རིན་པོ་ཆེ་བསྐུར་བ་དེར་ཡང་ལྡེའུ་དང་འབྲེལ་བ་ཡོད་དེ། གང་གིས་ན། ཁྲབ་ཀྱིས་ཀོང་ཇོ་མ་བྱིན་ན་དམག་བྱེད་དགོས་པ་དང༌། གསེར་སོགས་ཀྱིས་རིན་པོ་ཆེས་ཀོང་ཇོ་བྱིན་ན་གཉིས་ག་མཛའ་མཐུན་གོང་འཕེལ་དུ་གཏོང་ཆོག་པའི་བརྡར་མངོན། གཞན་ངག་རྒྱུན་དང་དམངས་ཁྲོད་གཏམ་རྒྱུད། ད་ལྟའི་བོད་ཀྱི་གོམས་སྲོལ་བཅས་ལ་བརྟག་ན་ལྡེའུ་དང་ཁེད་ནི་ཕལ་ཆེར་འདྲ་ནའང་ཁྱབ་ཆེ་ཆུང་ཡོད་ལ་སྔོན་གྱི་སྐབས་སུ་ལྡེའུ་ལ་བརྟེན་ནས་བློན་པོ་རིག་པ་ཅན་བསྐོ་བཞག་བྱེད་པའི་ཚུལ་ཞིག་ཀྱང་སྣང་བར་མ་ཟད། བག་མ་ལེན་པ་དང་ཕ་རོལ་ཚོད་བགམ་བྱེད་པ་བཅས་ལ་བཀོལ་སྤྱོད་བྱེད་བཞིན་ཡོད་པ་འདྲ། དེ་དག་ཕྲ་ཞིབ་ད་དུང་མུ་མཐུད་དུ་ཞིབ་འཇུག་བྱེད་དགོས་ཏེ་མགར་གྱིས་བག་མ་བླངས་པའི་གཏམ་རྒྱུད་སོགས་ལྡེའུ་དང་འབྲེལ་བ་ཡོད་པའི་མནའ་གཏམ་ཅུང་མང་ངོ༌། །