User talk:ཡར་འཕེལ།

༄༅། །ྋསྐྱབས་རྗེ་མཁན་ཟུར་ཨ་མཆོག་རྡོ་རྗེ་འཆང་སྐུ་འཕྲེང་བཞི་པ་རྗེ་བཙུན་བློ་བཟང་ཐུབ་བསྟན་འཕྲིན་ལས་མཁྱེན་རབ་ཡེ་ཤེས་རྒྱ་མཚོ་དཔལ་བཟང་པོ་མཆོག་ནི། རབ་བྱུང་བཅུ་དྲུག་པའི་ཤིང་མོ་བྱ་སྟེ་སྤྱི་ལོ་ ༡༩༤༥ ལོའི་ཟླ་ ༡ ཚེས་ ༨ ཉིན་མདོ་སྨད་ས་ཡི་ཐིག་ལེ་རྒྱལ་མོ་རོང་གི་སའི་ཆར་ཅོག་ཙེའི་ཡུལ་ཁྲོ་སྐྱབས་ཉ་ཚང་ཞེས་བྱ་བའི་ཁྱིམ་དུ། རིགས་རུས་ཕུན་སུམ་ཚོགས་པའི་ཡབ་ཁྲོ་བོ་དང་ཡུམ་སྒྲོལ་མ་གཉིས་ཀྱི་སྲས་སུ་བཀྲ་ཤིས་པའི་ལྟས་བཟང་དང་བཅས་གཟུགས་སྐུའི་མེ་ཏོག་དང་པོར་བཞད། སྐུ་འཁྲུངས་པའི་མཚན་མོ་དེར་ཡུམ་གྱི་མནལ་ལམ་དུ་མཚན་ལྡན་བླ་མ་ཞིག་གིས་ཕྲེང་རྡོག་ཅིག་གནང་བ་རྨིས་ཤིང༌། མཚན་མོའི་སྟག་གི་ཆུ་ཚོད་ལ་སྐར་ཁུང་ནས་ཚོན་མདོག་རྣམ་པར་བཀྲ་བའི་འཇའ་འོད་ཅིག་ཤར་ཏེ་འཇའ་སྣེ་ཟུག་པའི་སར། སྣང་གསལ་འོད་ཀྱིས་འཁྱུད་པའི་མཆོད་ཀོང་འདྲ་བ་བདུན་བྱུང༌། མ་ཟད་འཁྲུངས་ཡུལ་གྱི་བྲག་ཕ་བོང་ཞིག་ཏུ་རྡོ་དཀར་ལས་གྲུབ་པའི་ཨ་ཡིག་བདུན་རང་བྱོན་འབུར་དོད་དུ་འཁྲུངས་པ་སོགས་ངོ་མཚར་བའི་ལྟས་བཟང་ཧ་ཅང་མང་ནའང་ཚིགས་མང་བར་དོགས་ནས་མ་བྲིས། ཁོང་གི་མཚན་ལ་ཚེ་རིང་དོན་གྲུབ་ཅེས་བཏགས་ཤིང་དགུང་གྲངས་གསུམ་གྱི་ཐོག །ྋཀུན་གཟིགས་པཎ་ཆེན་སྐུ་ཕྲེང་བཅུ་པ་རྗེ་བཙུན་ཆོས་ཀྱི་རྒྱལ་མཚན་དཔལ་བཟང་པོ་མཆོག་གི་ཞལ་སྔ་ནས་ཀྱིས། ཨ་མཆོག་རིན་པོ་ཆེ་སྐུ་གོང་མ་རྗེ་འཇམ་དབྱངས་མཁྱེན་རབ་རྒྱ་མཚོ་དཔལ་བཟང་པོའི་ཡང་སྲིད་དུ་ངོས་འཛིན་མཛད་དེ། མཚན་ལ་བློ་བཟང་ཐུབ་བསྟན་མཁྱེན་རབ་ཡེ་ཤེས་རྒྱ་མཚོ་ཞེས་སྩལ། ངོས་འཛིན་མཛད་པ་དང་ཆབས་ཅིག །པཎ་ཆེན་མཆོག་གི་ཞལ་ནས། བློ༷་བཟ༷ང་ཐུ༷བ་དབང་གཉིས་པའི་བསྟ༷ན་པའི་གནད། ། མཁྱེ༷ན་ར༷བ་ཡེ༷་ཤེ༷ས་མཆོག་གི་གཟིགས་པ་གང༌། ། རིས་མེད་གདུལ་བྱ་རྒྱ༷་མཚོ༷ར་འདོམས་མཛད་པ། ། དཔལ་ལྡན་བླ་མའི་ཞབས་ལ་གསོལ་བ་འདེབས། ། ཞེས་རིང་འཚོའི་ཞབས་བརྟན་སྨོན་ཚིག་གསུངས་པར། ཨ་མཆོག་མཚན་ཉིད་དགོན་གྱི་དགེ་བའི་བཤེས་གཉེན་རྣམ་པས་དགའ་དད་སྤྲོ་གསུམ་གྱིས་ཚིག་གི་འབྲུ་འགྲེལ་བ་ན། ཡང་སྤྲུལ་ཉི་མ་གཞོན་ནུ་ཁོང་སྐྱེ་འགྲོ་སྤྱིའི་བདེ་ཐབས་ཀྱི་མགོན་དཔུང་དུ་བཞུགས་དགོས་པ་ལས། རང་དགོན་ཁོ་ན་ལ་དབང་བ་ཞིག་ཡོང་བར་དཀའ་ཞེས་དགའ་སྐྱོ་འདྲེས་མའི་དཔྱད་ཞིབ་ཀྱང་ཞུས། དགུང་ལོ་ལྔའི་ཐོག་ཨ་མཆོག་མཚན་ཉིད་དགོན་འཇམ་དབྱངས་སྨྲ་བའི་སེང་གེའི་གླིང་དུ་མི་འཇིགས་གདོང་ལྔས་བཏེགས་པའི་ཆོས་ཀྱི་ཁྲི་འཕངས་མཐོན་པོར་མངའ་གསོལ་མཛད་དེ། ཡོངས་ཀྱི་དགེ་བའི་བཤེས་གཉེན་ཆེན་པོ་ཨ་ཁུ་སྦྱིན་པ་རྒྱ་མཚོ་ཚང་ཡོངས་འཛིན་དུ་བསྟེན། རྒྱ་ནག་མཁན་པོ་སྒང་བ་རྡོ་རྗེ་འཆང་སྐལ་བཟང་བསྟན་པ་རྒྱ་མཚོ་ལས་ཚིགས་སྔ་མ་རབ་བྱུང་གི་སྡོམ་པ་ཞུས། སྐུ་ན་ཕྲ་བའི་སྐབས་ཁོང་གིས་དཔེ་ཆ་ཐུགས་འཛིན་གནང་ཞོར་ཕྱག་ཏུ་རྩེད་ཆས་མདའ་གཞུ་ཞིག་བཟུང་སྟེ་སྐུ་རྩེད་གནང་བར། ཡོངས་འཛིན་མཆོག་གིས་བྱབྱཁྱོད་ཀྱིས་ཕྱག་ཏུ་མདའ་གཞུ་འཛིན་མི་རུང་བྱབྱགསུངས་པར། བྱབྱཡོངས་འཛིན་ལགས། འཕགས་པ་སྤྱན་རས་གཟིགས་ཀྱིས་ཕྱག་ཏུ་མདའ་གཞུ་བཟུང་ཡོད་པ་མ་ཡིན་ནམ་བྱབྱགསུངས་པས། ཡོངས་འཛིན་གྱིས་གཙོས་དད་ལྡན་སྐྱེ་བོའི་ཚོགས་ཀྱིས། བྱབྱཁོང་རྡོ་རྗེ་འཆང་གིས་རང་ཉིད་འཕགས་པ་སྤྱན་རས་གཟིགས་དངོས་ཡིན་པ་ཞལ་གྱིས་བཞེས་སོང༌།བྱབྱ ཞེས་སྤྱན་རས་གཟིགས་སྐུ་རློན་པར་བལྟས་ཏེ་དད་པ་ཞུ་བཞིན་པ་ནི་གྲགས་ཤིང་གྲུབ་པ་ཞིག་ཡིན། དེ་བཞིན་སྐུ་གཞོན་ནུའི་སྐབས་སྒྱུ་རྩལ་མཛེས་རིས་འབྲི་རྒྱུར་ཐུགས་མཉེས་པོ་ཡོད་སྟབས། མཛེས་རིས་ཀྱི་ལམ་ནས་མ་འོངས་ལུང་བསྟན་གནང་བ་དག །ཕྱིས་སུ་ཇི་བཞིན་དོན་ཐོག་ཏུ་འཁེལ་ཏེ་གདུལ་བྱ་ཆོས་ལ་བཀོད་པའི་ངོ་མཚར་རྨད་བྱུང་གི་མཛད་པ་རྣམ་ཐར་དག་ནི་ཁོང་སྐུ་ན་ཕྲ་བའི་སྐབས་ཀྱི་རྒྱུན་ལྡན་གནང་སྒོ་ཞིག་ཏུ་མཆིས། དགུང་ལོ་བཅུ་གཉིས་ནས་བཟུང་མཚན་ཉིད་རིགས་པའི་གཞུང་ཆེན་ལ་སློབ་གཉེར་གནང་མགོ་བཙུགས། དགུང་ལོ་བཅུ་གསུམ་པར་ཡོངས་འཛིན་སྐུ་བགྲེས་ཨ་ཁུ་སྦྱིན་པ་རྒྱ་མཚོ་ཚང་སྐུ་ཞི་བར་གཤེགས་པས། འདམ་མདོའི་དགེ་བཤེས་དཀོན་མཆོག་རྒྱ་མཚོ་ཚང་ཕྱིས་སུ་དགའ་ལྡན་ཤར་རྩེའི་མཁན་ཁྲིར་ཕེབས་པ་ཡོངས་འཛིན་དུ་བསྐོ་གཞག་ཞུས། དྲང་ངེས་ལེགས་བཤད་སྙིང་པོ་སོགས་གཞུང་ཆེན་དུ་མ་ཐུགས་འཛིན་གྱིས་སློབ་གཉེར་དཔྱིས་ཕྱིན་མཛད། མེ་མོ་བྱ་སྟེ་སྤྱི་ལོ་ ༡༩༥༧ ལོར་ཡུལ་དབུས་སུ་ཕེབས་ནས། ཨ་མཆོག་སྐུ་འཕྲེང་གོང་མ་ན་རིམ་གྱི་མཛད་པ་རྣམ་ཐར་ཇི་བཞིན་དགའ་ལྡན་ཤར་རྩེ་སོག་པ་འཇམ་དབྱངས་ཁང་ཚན་དུ་བཞུགས་ནས་གཞུང་གསར་འཛིན་གྲྭར་ཆོས་ཞུགས་གནང༌། ཤར་རྩེའི་མཁན་པོ་ཕུ་ཁང་དགེ་བཤེས་བློ་བཟང་ཆོས་འཕེལ་མཆོག་དཔེ་ཁྲིད་དགེ་རྒན་དུ་བསྟེན་ནས་གཞུང་ཆེན་ལ་གསན་བསམ་ཚུལ་བཞིན་གནང༌། ནོར་གླིང་དུ་རྒྱལ་མཆོག་སྐུ་འཕྲེང་བཅུ་བཞི་པ་ལས་ཆོས་འབྲེལ་ཞུས་ཤིང༌། བཀྲ་ཤིས་ལྷུན་པོར་བྱོན་ནས་ཀུན་གཟིགས་པཎ་ཆེན་ཐམས་ཅད་མཁྱེན་པ་མཆོག་ལའང་ཆོས་འབྲེལ་ཞུས། དེ་ནས་གསང་ཕུའི་ཆོས་གྲྭ་དང༌། འཇང་དགུན་ཆོས་སོགས་སུ་རྩོད་གྲྭར་བྱོན་ཏེ་སྙན་པའི་བ་དན་མཁའ་ལ་སྒྲེང་བའི་དམ་འཇོག་ཚུལ་བཞིན་མཛད། རྒྱལ་བའི་ཡོངས་འཛིན་གཞོན་པ་ྋསྐྱབས་རྗེ་ཁྲི་བྱང་རིན་པོ་ཆེ་རྩ་བའི་བླ་མར་བསྟེན། རབ་རྒྱལ་ས་མོ་ཕག་སྟེ་སྤྱི་ལོ་ ༡༩༥༩ ལོར་ཁ་བ་གངས་ཅན་གྱི་ལྗོངས་སུ་ནང་བསྟན་འོད་སྟོང་གཟའ་ཡིས་མིད་དེ་མུན་ནག་དུས་ཀྱི་ཡོ་ལང་འཁྲིགས་པར་བརྟེན། ཡོངས་འཛིན་དཀོན་མཆོག་རྒྱ་མཚོ་ཚང་གིས་གཙོས་སྐུ་འཁོར་ལྷན་རྒྱས། འུ་ཅག་གངས་ཅན་པ་ཡོངས་ཀྱི་དཔྲལ་བའི་མིག་དང་ཁོག་པའི་སྙིང་གཅིག་པུར་གྱུར་པ། ྋརྒྱལ་དབང་ཐམས་ཅད་མཁྱེན་པའི་སྐུ་རྗེས་བསྙེགས་ཏེ་རྒྱ་གར་འཕགས་པའི་ཡུལ་དུ་སྐྱབས་བཅོལ་ལ་ཕེབས་དགོས་བྱུང༌། སྐུ་འཁོར་ལྷན་རྒྱས་ཀྱིས་བྷག་ས་ཆོས་སྒར་དུ་ལོ་མང་རིང་སློབ་གཉེར་འཕྲོ་སྐྱོང་གནང་ནས། ས་མོ་བྱ་སྟེ་སྤྱི་ལོ་ ༡༩༦༩ ལོར་ཝཱ་ཎ་བོད་ཀྱི་གཙུག་ལག་སློབ་གྲྭ་ཆེན་མོར་ལོ་ངོ་ཕྱེད་དང་གཉིས་ལྷག་གི་རིང་གཞུང་ཆེན་མོ་དང་སཾསྐྲྀ་ཏ་སོགས་ཀྱིས་མཚོན། ཕྱི་ནང་རིག་པའི་གནས་ཀུན་ལ་གསན་བསམ་དཔྱིས་ཕྱིན་གནང་སྟེ་ཨཱ་ཅཱརྱ་ཨང་དང་པོའི་མཚན་གནས་བཞེས། བོད་གཞུང་ཆོས་རིག་ལས་ཁུངས་ཀྱིས་བཀའ་ཡིག་ཕེབས་པ་བཞིན། འཕགས་ཡུལ་བཀྲ་ཤིས་འཁྱིལ་དགོན་པའི་མཁན་ཁྲིར་ཕེབས་ཏེ། ལོ་ལྟར་དགའ་ལྡན་རྣམ་པར་རྒྱལ་བའི་གླིང་དུ་ཟླ་བ་དྲུག་རེའི་རིང་ཐོས་བསམ་གནང༌། རིགས་དང་དཀྱིལ་འཁོར་རྒྱ་མཚོའི་མངའ་བདག་ྋརྒྱལ་བའི་ཡོངས་འཛིན་རྣམ་གཉིས་དང༌། ྋསྐྱབས་རྗེ་ཟོང་རྡོ་རྗེ་འཆང་སོགས་དགེ་བའི་བཤེས་གཉེན་དུ་མའི་ཞབས་རྡུལ་སྤྱི་བོས་བླངས་ཏེ་ཟབ་རྒྱས་ཆོས་ཀྱི་གདམས་པ་མང་དུ་གསན། མེ་མོ་སྦྲུལ་ཏེ་སྤྱི་ལོ་ ༡༩༧༧ ལོའི་རི་བོ་དགེ་ལྡན་པའི་ལྷ་ལྡན་སྨོན་ལམ་ཆེན་མོའི་སྐབས། དཔལ་ལྡན་འབྲས་དཀར་སྤུངས་པའི་ཚོགས་ཆེན་འདུ་ཁང་དུ་རྒྱལ་མཚན་དཀར་པོའི་གུར་ཁང་འོག་ནས་དགེ་བཤེས་ལྷ་རམས་པའི་མཚན་གནས་བཞེས། དེ་ནས་བཞུགས་སྒར་དྷ་རམ་ས་ལར་བོད་ཀྱི་དཔེ་མཛོད་ཁང་དུ་རིག་གཞུང་ཉམས་ཞིབ་དང་ཕྱག་དཔེ་དོ་དམ་འགན་འཛིན་གྱི་ཕྱག་ལས་གནང༌། ལྕགས་ཕོ་སྤྲེལ་ཏེ་སྤྱི་ལོ་ ༡༩༨༠ ལོ་ནས་བཟུང་ཡུ་རོབ་ཨོ་སུ་ཀྲི་རི་ཡའི་རྒྱལ་ས་ཝི་ཡ་ན་མཐོ་སློབ་ཏུ་ནང་ཆོས་དང་བོད་ཀྱི་སྐད་ཡིག་དགེ་རྒན་ལོ་གཉིས་ལ་མཛད། ཆུ་མོ་ཕག་སྟེ་སྤྱི་ལོ་ ༡༩༨༣ ལོར་བྱམས་བརྩེའི་གཏེར་ཆེན་ཨ་ལགས་སངས་ཚང་རིན་པོ་ཆེ་དང་ལྷན་ཕ་ཡུལ་མདོ་སྨད་དུ་བྱོན་ནས། ཤུལ་ལུས་ཨ་མཆོག་མཚན་ཉིད་དགོན་གྱི་དགེ་འདུན་པ་ཞལ་གྲངས་བཞི་བརྒྱ་ཙམ་བཞུགས་པ་ལ། རྗེ་བདག་ཉིད་ཆེན་པོའི་གསུང་དྲང་ངེས་ལེགས་བཤད་སྙིང་པོའི་བཤད་ཁྲིད་རྒྱས་པ་སོགས་ཀྱིས་མཚོན་འདོད་ཆོས་ཅི་རིགས་བུམ་པ་གང་བྱོའི་ཚུལ་དུ་གནང༌། དེ་བཞིན་གྲུབ་སྡེ་དགོན་ཁག་བདུན་སོགས་དགོན་མ་ལག་དང་བཅས་ཉམས་པ་སླར་གསོ་དགོས་པའི་བཀའ་སློབ་སྩལ་ཏེ་མཐུན་འགྱུར་ཡང་གནང༌། ལྷ་སྡེ་ཤོག་ཁ་བདུན་གྱིས་མཚོན་ལྷ་སྡེ་མི་སྡེ་རྣམས་ལ་དབང་ལུང་མན་ངག་ཅི་འདོད་དུ་སྩལ་བར་མ་ཟད། མི་ཚང་རེ་རེར་ཁྱིམ་ཕེབས་ཀྱང་གནང་བས་སྐྱེ་དགུ་མཐའ་དག་དད་པའི་ས་ལ་བཀོད། མདོ་སྨད་བསྟན་པའི་འབྱུང་གནས་བླ་བྲང་བཀྲ་ཤིས་འཁྱིལ་དང་སྐུ་འབུམ་བྱམས་པ་གླིང་སོགས་སུ་བྱོན་ནས། ཀུན་གཟིགས་པཎ་ཆེན་རིན་པོ་ཆེ་སྐུ་འཕྲེང་བཅུ་པ་རྗེ་བཙུན་ཆོས་ཀྱི་རྒྱལ་མཚན་དཔལ་བཟང་པོ་མཆོག་དང༌། ཀུན་མཁྱེན་ཆེན་པོ་འཇམ་དབྱངས་བཞད་པའི་རྡོ་རྗེ། རྗེ་གུང་ཐང་བ་འཇིགས་མེད་བསྟན་པའི་དབང་ཕྱུག་འཇིགས་བྲལ་ཕྱོགས་ལས་རྣམ་རྒྱལ་དཔལ་བཟང་པོ་སོགས་དང་མཇལ། དེ་ནས་ཕྱིར་རྒྱ་གར་འཕགས་ཡུལ་དུ་བྱོན་ཏེ་མུ་མཐུད་བོད་ཀྱི་དཔེ་མཛོད་ཁང་དུ་རིག་གཞུང་ཉམས་ཞིབ་ཀྱི་ཕྱག་ལས་གནང༌། མེ་མོ་ཡོས་ཏེ་སྤྱི་ལོ་ ༡༩༨༧ ལོར་ཀུན་གཟིགས་པཎ་ཆེན་རིན་པོ་ཆེ་བལ་ཡུལ་དུ་ཕེབས་སྐབས། རིན་པོ་ཆེ་ཁོང་དབྱིན་སྐད་གསུང་སྒྱུར་དུ་བྱོན་པའི་སྟབས་དང་བསྟུན་ནས། པཎ་ཆེན་རིན་པོ་ཆེས་པེ་ཅིང་དུ་བོད་བརྒྱུད་ནང་བསྟན་སློབ་གླིང་འཛུགས་འཆར་གྱི་དགེ་རྒན་ལ་ཕེབས་དགོས་པའི་བཀའ་སྤྱི་བོར་ཕེབས་པ་བཞིན། ྋགོང་ས་མཆོག་དང་རང་གཞུང་བཀའ་ཤག་གིས་ཀྱང་བཀའ་འཁྲོལ་བསྩལ་ཏེ། རྒྱ་ནག་གི་རྒྱལ་ས་པེ་ཅིང་དུ་ཆེད་ཕེབས་ཀྱིས། མདོ་དབུས་ཁམས་གསུམ་ནས་ཕེབས་པའི་རིས་སུ་མ་ཆད་པའི་བླ་ཆེན་ལྔ་བཅུ་བརྒལ་བར། ཟླ་བ་བརྒྱད་ཙམ་གྱི་རིང་ཡོན་ཏན་གཞི་གྱུར་མའི་འགྲེལ་པའི་བཀའ་ཁྲིད་དང༌། ཞོར་དུ་བླ་སྤྲུལ་ཁག་དང་དེ་གའི་ལས་བྱེད་རྣམ་པར་གང་ལ་གང་འདོད་ཀྱི་དཔེ་ཁྲིད་དང་དབྱིན་ཡིག་སོགས་སློབ་ཁྲིད་གནང༌། རང་དགོན་ཨ་མཆོག་མཚན་ཉིད་དགོན་དུ་ཕེབས་ཏེ་རྣམ་འགྲེལ་ཐར་ལམ་གསལ་བྱེད་ཀྱི་དཔེ་ཁྲིད་རྒྱས་པ་དང༌། རྔ་བ་སྤྲོ་ཚིགས་དགོན་དུ་བྱང་ཆུབ་ལམ་རིམ་ཆེན་མོའི་བཀའ་ཁྲིད་རྒྱས་པ་གནང༌། དབལ་ཤུལ་གཅའ་དགོན་མི་ཕམ་བྱམས་པ་གླིང་དུ་དགོན་ཁག་བཅུ་གྲངས་ནས་ཕེབས་པའི་དགེ་འདུན་པ་ཉིས་བརྒྱ་ལྷག་ལ་དགེ་ཚུལ་སློང་གི་བསླབ་སྡོམ་སྩལ། ཁོང་གིས་ཡུལ་ཕྱོགས་གང་སར་དབང་ལུང་མན་ངག་གནང་སྐབས། དད་ལྡན་སྐྱེ་བོའི་ཚོགས་ཀྱིས་ཆོས་ཡོན་དུ་ཕུལ་བའི་དངུལ་དངོས་རྣམས་གཅིག་ཀྱང་མ་བཞེས་པ་ཙམ་དུ་མ་ཟད། ངེས་པར་མཁོ་བའི་ཚོགས་སྡེ་དང་སློབ་གྲྭ་སོགས་མཐུན་རྐྱེན་ཞན་པ་རྣམས་ལ་ཞིག་གསོའི་ཆེད་ཞལ་འདེབས་ཕོན་ཆེ་གནང་བས། རྒྱ་གཞུང་གིས་ཀྱང་དགའ་མོས་དང་གདེང་འཇོག་གིས་གཟེངས་བསྟོད་ཞུས། དེ་བཞིན་ཨ་མཆོག་མཚན་ཉིད་དགོན་འཇམ་དབྱངས་སྨྲ་བའི་སེང་གེའི་གླིང་དུ། དཔལ་དུས་ཀྱི་འཁོར་ལོ་སྡོམ་པ་ཆེན་པོའི་བཀའ་དབང་གནང་བའི་མཚན་སྙན་གྱི་གྲགས་པ་དཀར་པོ་མཐའ་དབུས་ཡུལ་གྲུ་ཀུན་ལ་ཁྱབ་པར་བརྟེན། མཐར་རྒྱ་གཞུང་འབྲེལ་ཡོད་ལས་ཁུངས་ཁག་གིས་ཀྱང་དོགས་ཟོན་དང་ནང་མོལ་གྱིས་མཚོན་དོ་སྣང་བྱེད་དགོས་བྱུང༌། ས་ཕོ་འབྲུག་སྟེ་སྤྱི་ལོ་ ༡༩༨༨ ལོར་ཕྱིར་རྒྱ་གར་དུ་ཕེབས་རྗེས། བོད་གཞུང་དབུས་སྨན་རྩིས་ཁང་གི་སྤྱི་ཁྱབ་འགན་འཛིན་གྱི་ཐུགས་འགན་བཞེས། ཤིང་ཕོ་ཁྱི་སྟེ་སྤྱི་ལོ་ ༡༩༩༤ ལོར། དཔལ་ལྡན་ཡོན་ཏན་ཚོགས་ཀྱི་བྱེད་པོ་ཡིས། །མི་འཇིགས་སེང་གེའི་ཁྲི་ལ་དབང་བསྐུར་བ། །ཞེས་གསུངས་པ་ལྟར། ྋསྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་གིས་ཕྱག་རྟགས་ཕྱག་ཐམ་རིན་པོ་ཆེ་ཕེབས་ཏེ། འབྲོག་རི་བོ་ཆེ་དགའ་ལྡན་རྣམ་པར་རྒྱལ་བའི་གླིང་གི་ཡ་གྱལ་ཤར་རྩེ་ཐོས་བསམ་ནོར་གླིང་གྲྭ་ཚང་གི་མཁན་ཁྲིར་ཕེབས། ཁོང་གིས་ལོ་ཙཱ་བའི་ཊིའཀ་ཆུང་ངམ་བསྡུས་དོན་གྱི་གླེང་བརྗོད་རྒྱས་པ་མི་ཕམ་བཞད་སྒྲ་ལྗགས་རྩོམ་གནང༌། ཤར་རྩེ་ཐོས་བསམ་ནོར་གླིང་གྲྭ་ཚང་གི་འཆད་ཉན་གོང་མཐོར་སྤེལ་སླད། འཛིན་གྲྭ་གོང་འོག་དཀྲུགས་ཏེ་དམ་བཅའ་ཡར་འཇོག་མར་འཇོག་གནང་རྒྱུ་སོགས། གནའ་སྔ་མོ་ཕྱག་ལེན་ལ་ཡོད་ཅིང་ཕྱིས་སུ་ཉམས་པ་མང་དག་ཅིག་སླར་གསོ་གནང་བར་མ་ཟད། ཆོས་འགྲིམ་པའི་མཚན་གཞུང་བཟོས་ཏེ་འགྲིག་རྟགས་རྒྱག་རྒྱུ་སོགས་གསར་བཟོ་གནང་བས། མིག་གིས་མཐོང་ས་ཉིད་དུ་འཆད་ཉན་གྱི་སྤུས་ཀ་ཡག་ཏུ་ཕྱིན། དེ་བཞིན་སྔ་བར་ཕྱི་གསུམ་དུ་དངོས་བརྒྱུད་ཅི་རིགས་པའི་སྒོ་ནས་རང་གི་སློབ་མའི་ཚོགས་ལ་སློབ་གཉེར་གྱི་བསླབ་བྱ་འབེལ་གཏམ་གྱི་ཚུལ་དུ་གནང་བ་གྲངས་ལས་འདས་པ་ཞིག་ཡོད་ཅིང༌། དེ་དག་ཞུ་སྒྲིག་བགྱིས་པར་པོ་ཏི་གཅིག་གི་ཚད་ལོང་ཙམ་ཡོད། མེ་ཕོ་བྱི་སྟེ་སྤྱི་ལོ་ ༡༩༩༦ ལོའི་ཟླ་ ༡༡ པར་མཁན་པོའི་ཐུགས་འགན་ཡོངས་སུ་གྲུབ་རྗེས། ལོ་ངོ་གཅིག་ལྷག་གི་རིང་ྋགོང་ས་ྋསྐྱབས་མགོན་ཆེན་པོའི་མཛད་རྣམ་སྡེ་ཚན་དུ་ཕྱག་ལས་གནང༌། ས་ཕོ་སྟག་སྟེ་སྤྱི་ལོ་ ༡༩༩༨ ལོར་ྋགོང་ས་ྋསྐྱབས་མགོན་ཆེན་པོའི་བཀའ་ཡི་ཅོད་པན་སྤྱི་བོར་ཕེབས་ཏེ། བོད་ཀྱི་དཔེ་མཛོད་ཁང་གི་སྤྱི་ཁྱབ་འགན་འཛིན་གྱི་ཐུགས་འགན་བཞེས། དུས་ཡུན་དེ་དག་གི་སྐབས་སུ་ཆོས་སྲིད་གང་ཐད་ནས་དཔེ་མཛོད་ཁང་གི་མཚན་གྱི་སྙན་པ་ཕྱོགས་སུ་སྤྲོས་ཤིང༌། རྒྱ་གར་གཞུང་གི་རིག་གཞུང་སྡེ་ཚན་ལ་འབོད་སྐུལ་གྱིས་ལོ་རེའི་རོགས་དངུལ་འབུམ་བཅུ་བཞི་ཡོད་པ་ནས་བཞི་བཅུ་བར་འཕར་སྣོན་ཐུབ་པ་བྱུང་བས། ལས་བྱེད་ཀྱི་ཟླ་ཕོགས་ཀྱང་ཡིད་མགུ་བ་ཞིག་འཕར་ཏེ་དཀའ་ཁག་མི་ཉུང་བ་ཞིག་སེལ། ལྕགས་ཕོ་འབྲུག་སྟེ་སྤྱི་ལོ་ ༢༠༠༠ ལོར་ྋགོང་ས་མཆོག་གིས་བཀའ་ཡི་ཕེབས་སྒོ་བཞིན། གདན་ས་གསུམ་གྱིས་གཙོས་ས་དགེ་བཀའ་རྙིང་གཡུང་དྲུང་བོན་དང་བཅས། རིས་སུ་མ་ཆད་པའི་དགོན་སྡེ་ཆེ་ཁག་རྣམས་ཀྱི་གཞུང་ཆེན་ལ་སྦྱང་བ་མཐར་སོན་པའི་དགེ་འདུན་པ་ཁག་ཅིག་གི་ཁྲོད་ཚན་རིག་སྦྱོང་བརྡར་གྱི་ཐུགས་འགན་བཞེས་ཏེ། ལོ་མང་རིང་ནུབ་ཕྱོགས་ཀྱི་ཚན་རིག་ཆེད་ལས་པ་གྲགས་ཅན་ཁག་གདན་ཞུས་ཀྱིས། རིས་མེད་དགེ་འདུན་པ་མི་ཉུང་བ་ཞིག་ལ་ཚན་རིག་ཟབ་སྦྱོང་དང༌། དེ་འབྲེལ་བཙན་བྱོལ་བོད་གཞུང་གི་སློབ་གྲྭ་ཆེ་ཁག་རྣམས་སུ་ཆོས་ཚན་དང་འབྲེལ་བའི་སྦྱང་བཤད་ལེགས་སྦྱར་གནང་བ་སོགས། མདོར་ན་ནང་ཆོས་དང་ཚན་རིག་གི་ལྟ་བའི་ཐོག་བགྲོ་གླེང་གི་ལས་གཞི་རླབས་ཆེན་མཛད། ཁོང་གིས་ཆོས་ཚན་སྦྱོང་བརྡར་གྱི་ཐུགས་འགན་བཞེས་སྐབས། སློབ་གྲྭ་ཁག་གི་དྲི་བར་དྲིས་ལན་མཛད་པའི་<<ཉི་མའི་འོད་སྣང་དང༌།>> <<ཆོས་ཚན་དབར་གྱི་གསེར་ཟམ།>> དེ་བཞིན་<<ཚད་མ་དང་ཚན་རིག་བར་གྱི་ཞི་འགྲིག>> སོགས་མདོར་ན་ཆོས་ཚན་དང་འབྲེལ་བའི་ལྗགས་རྩོམ་གནང་བ་ལ་པོད་གཅིག་གི་ཚད་ལོང་ཙམ་བཞུགས། ཆེས་རིན་ཐང་བྲལ་བའི་མཛད་པ་རྣམ་ཐར་གཞན་ཞིག་ནི། ཁོང་རྡོ་རྗེ་འཆང་གིས་སོག་པ་འཇམ་དབྱངས་ཁང་ཚན་གྱི་སློབ་གཉེར་བ་བཟང་གྲས་ཉི་ཤུ་རྩ་གྲངས་ཤིག་ཁུ་བསྡུས་གནང་སྟེ་བཀའ་ཡི་ཕེབས་སྒོར། དེང་གི་དུས་བསྟན་བཅོས་མངོན་པར་རྟོགས་པའི་རྒྱན་ཡུམ་ཤེས་རབ་ཀྱི་ཕ་རོལ་ཏུ་ཕྱིན་པའི་མདོ་སྡེ་རིན་པོ་ཆེ་དང་སྦྱར་བའི་འཆད་རྩོད་རྩོམ་གསུམ་གྱི་སྲོལ་བཟང་ཉམས་ལ་ཉེ་བའི་སྐབས་སུ། ཁྱེད་ཅག་ཤེས་རབ་ཀྱི་ཕ་རོལ་ཏུ་ཕྱིན་པའི་གཞུང་ཆེན་ལ་ཐོས་བསམ་སློབ་གཉེར་གནང་བཞིན་པ་རྣམས་ཀྱིས་སྙིང་ལ་རུས་པ་བཏབ་སྟེ་མདོ་རྒྱན་མ་བུ་སྦྱར་བའི་གཞུང་ཆེན་མོ་ཞིག་འབྲི་རྩོམ་ཐུབ་ན། འདི་ནི་ཤཱཀྱའི་རྒྱལ་པོ་དགྱེས་པའི་མཆོད་སྤྲིན་དང༌། རྒྱན་དྲུག་མཆོག་གཉིས་བཞུད་པའི་ཤུལ་ལམ་ཡིན། དེས་ན་ཕ་བཟང་གི་བུ་གཅེས་དག །གསེར་ལས་དཀོན་པའི་དུས་ཚོད་ཆུད་ཟོས་སུ་མི་གཏོང་བར་གོ་སྐབས་གང་ཡོད་ཀྱིས་ལས་ཆེན་འདི་ལ་ཞུགས་ཐུབ་པ་གྱིས་ཤིག་དང༌། མདོ་རྒྱན་སྦྱོར་སྟངས་ཐད་དཀའ་ཁག་དང་དོགས་གནས་གང་ཕྲད་ལ་ངོས་ཀྱིས་ཁུར་ལེན་དང་མཉམ་གནས་བྱེད་ཆོག་གསུངས་ཏེ། བཅོམ་ལྡན་འདས་སྐུ་དངོས་སུ་བྱོན་ཞིང་གསུང་རྣ་བས་ཐོས་ཀྱང་འདི་ལས་ལྷག་པའི་རིན་བྲལ་གྱི་གདམས་པ་ཞིག་གནང་རྒྱུ་མེད་པར་བརྟེན། སློབ་བུའི་ཚོགས་ཀྱིས་མགྲིན་གཅིག་དབྱངས་གཅིག་གིས་ལེགས་སོའི་ཐལ་མོ་སྦྱི་བོར་བཀོད་དེ། བགྲང་བྱ་བཅུ་ལ་ཉེ་བའི་རིང་དཀའ་ཚེགས་ཀྱི་ལམ་བུ་ཀྱག་ཀྱོག་ཅན་མང་དག་ཅིག་བརྒྱུད་ནས། འབད་འབུངས་དང་སྤྲོ་ཤུགས་ཀྱི་ཚོར་བ་མཚམས་མ་བཞག་པའི་ཉེར་འབྲས་སུ། ད་ཆ་<<འཕགས་བོད་མཁས་པའི་གཞུང་ལམ།>>ཞེས་མདོ་རྒྱན་མ་བུ་སྦྱར་བའི་་གཞུང་ཆེན་མོ་དེ་ཉིད་དཔར་སྐྲུན་གྱི་སྟ་གོན་ལ་ཉེ་བའི་སྐབས་ཡིན། དེ་ཡང་མདོ་རྒྱན་ཚོགས་ཆུང་གིས་མདོ་རྒྱན་མ་བུ་སྦྱོར་བའི་ལོ་ངོ་འདི་དག་གི་རིང་ཐག་མི་ཆོད་པའི་དོགས་གནས་དང༌། འབྲིར་མི་སྤོབས་པའི་དཀའ་ཁག་ཅི་ཞིག་ལ་ཕྲད་ཀྱང༌། ཁོང་ཨ་མཆོག་རྡོ་རྗེ་འཆང་གི་རྣམ་དཔྱོད་ཀྱི་འཕེལ་ཁ་ལས་མཆེད་པའི་ཟབ་བརླིང་ཕུགས་འཕེལ་གྱི་གསུང་ངག་རེ་རེས། ཐག་མི་ཆོད་ཅིང་འབྲིར་མི་སྤོབས་པའི་འཆིང་རྒྱ་ལས་ཉེ་བར་བཀྲོལ་བས། དོན་དངོས་སུ་གཞུང་བཟང་འདིའི་དོན་གྱི་མཛད་པ་པོ་ནི་ཁོང་ཨ་མཆོག་རྡོ་རྗེ་འཆང་ཡིན་ཞེས་ཞུས་ཀྱང་དོན་ལ་གནས་པ་ཞིག་གོ། དེ་བཞིན་ཁོང་གི་བཀའ་ཡི་ཕེབས་སྒོར་<<ཆོས་རའི་ནང་གི་དྷིའཿསྐད་>>ཅེས་འཆད་ཉན་ཁོ་ནའི་གླེང་སྟེགས་ལ་དམིགས་པའི་ཟླ་དྲུག་དུས་དེབ་ཅིག་སྤེལ་ཐུབ་ན། འདི་ནི་འཆད་རྩོད་རྩོམ་གསུམ་ལ་སྨན་པའི་ཐབས་ལམ་རྨད་དུ་བྱུང་བ་ཞིག་ཡིན་ཞེས་གདམས་པ་ནི། ལེགས་གསུང་ཤཱཀྱའི་མགྲིན་བཟང་ཉན་ཐོས་བུ་ཡི་སྙན་དུ་འབྱོར་བ་བཞིན། སོག་པ་འཇམ་དབྱངས་ཁང་ཚན་གྱིས་དུས་དེབ་དེ་ཉིད་འདོན་སྤེལ་བྱས་ཏེ་ད་བར་འདོན་ཐེངས་ ༡༦ ཙམ་སྤེལ་ཟིན། ཨ་མཆོག་རྡོ་རྗེ་འཆང་གི་ཞལ་ནས། ཐར་འདོད་སྐྱེས་བུར་མཁོ་བའི་བླང་དོར་གནས། །ཇི་བཞིན་འབྱེད་པའི་གོ་རིག་ཟུང་འབྲེལ་གྱི། །དཔྱད་པ་འདི་ལ་ཆོ༷ས་ར༷འི་ད༷ྷིའཿསྐ༷ད་ཅེས། །ལེགས་པར་བཤད་པའི་དེབ་གྲངས་བཅུ་གསུམ་བསྐྲུན། །གདན་ས་ཆེན་པོར་འོས་པའི་མཛད་པ་གཅིག །བླང་དོར་གནས་ལ་དཔྱད་པའི་དྷིའཿསྐད་འདིས། །མཁས་པ་མགུ་བའི་ལས་འདིས་པད་དཀར་འཆང༌། །མཆོད་པའི་བསོད་ནམས་སྣོད་དུ་ནམ་མཁའ་ཙམ། །ཞེས་གསུངས། དྷཱིཿསྐད་དུས་དེབ་དེ་ལ་གདན་ས་གསུམ་གྱི་མཁས་དབང་རྣམ་པས་གཙོས་མཚན་ཉིད་ཀྱི་གཞུང་ལ་ཐོས་བསམ་གནང་མཁན་དག་གིས་དགའ་བསུ་དང་གདེང་འཇོག་ཚད་མེད་ཞུས་པར་མ་ཟད། ྋསྤྱི་ནོར་ྋགོང་ས་སྐྱབས་མགོན་ཆེན་པོས་དྷཱིཿསྐད་དུས་དེབ་དང་མདོ་རྒྱན་འགྲེལ་ཆེན་<<འཕགས་བོད་མཁས་པའི་གཞུང་ལམ་>>གཉིས་ལ་ཚད་མཐོའི་བསྔགས་བརྗོད་ཀྱི་ཤིས་པ་བརྗོད་པ་དྷིའཿསྐད་དུས་དེབ་ཀྱི་དབུ་ཤོག་ནས་མཇལ་ཐུབ། ཤིང་མོ་བྱ་སྟེ་སྤྱི་ལོ་ ༢༠༠༥ ལོའི་ཟླ་བ་ ༤ ནས་བོད་ཀྱི་དཔེ་མཛོད་ཁང་གི་འགན་འཛིན་གྱི་ཐུགས་འགན་ཡོངས་སུ་གྲུབ་སྟེ། ད་ལྟའི་ཆར་ྋསྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་གིས་སེར་སྐྱ་ཁྲི་སྟོང་མང་པོར། རྗེ་ཙོང་ཁ་པ་བློ་བཟང་གྲགས་པས་མཛད་པའི་བྱང་ཆུབ་ལམ་རིམ་ཆེན་མོའི་བཀའ་ཁྲིད་གནང་བ་ཁག་ནས། ཟབ་ཁྲིད་དོགས་དཔྱོད་རྒྱས་པའི་ལམ་རིམ་བཀའ་ཁྲིད་ཁག་གསུམ་ཕྱོགས་གཅིག་ཏུ་བསྒྲིགས་ཏེ་རྩོམ་སྒྲིག་གི་མཛད་འགན་ཡོངས་སུ་བཞེས་བཞིན།