User:Lobsang tsondru

       གཙང་པོ་ཞིག་ཡིན་ན། རྒྱ་མཚོ་དང་ཐུག་ལ་ཉེ་བའི་བཞུར་སྒྲ་དེ་ཡིན་ངེས་ལ། གྲུ་པ་ཞིག་ཡིན་ན།  ཆུའི་ཕ་རོལ་དུ་སླེབས་ལ་ཉེ་བའི་ཚུ་རོལ་དེ་ཡིན་ངེས། དེ་སྔོན་ཁྱེད་ཀྱིས་གཞན་གྱི་ངག་སྒྲོས་ལས་ཐོས་པའི་ཡུལ་དེ་ན། ཁྱེད་རང་དངོས་སུ་སླེབས་གྲབས་བྱེད་ཀྱི་འདུག 

ཉིན་མོ་འདི།  ཁྱེད་ཀྱི་ཨ་མས་ཉི་མ་རེ་རེ་བཞིན་དཔེ་ཁུག་རྒྱབ་ཏུ་བསྐུར་བའི་རྒྱབ་སྐྱོར་དང་འབྲེལ་བ་ཡོད་ལ། ཉིན་མོ་འདི།  ཁྱེད་ཀྱི་དགེ་རྒན་རེ་རེའི་ངེས་སྟོན་དང་མཛུབ་ཁྲིད་ལའང་འབྲེལ་བ་ཡོད་མོད། གཙོ་བོ་ནི་ཁྱེད་ཀྱི་སྡུག་ཐེག་པའི་སྙིང་རུས་དང་། གཞན་དྲིང་མི་འཇོག་པའི་རྣམ་དཔྱོད་ལ་ཐུག་ཡོད། 

ངས་ཆུང་དུས་རང་ཉིད་ལས་ཆེ་བའི་རྨི་ལམ་གཏོང་མྱོང་ཞིང་། ཆེ་དུས་རང་ཉིད་ལས་ཆུང་བའི་གྲུབ་འབྲས་ཤིག་ལ་འཐམ་ནས་ལུས་ཀྱང་། ཉིན་མོ་འདི།  དཔྱིད་འགོ་མའི་མེ་ཏོག་དང་མཉམ་དུ་བཞད་ཅིང་།  མེ་ཏོག་གི་དྲི་བསུང་དང་ལྷན་དུ་སྡོང་པའི་ཉིན་མོ་འདི།  རང་ཉིད་ཀྱི་ཡིན་པ་ལྟ་བུའི་ཉིན་མོ་འདི། ཉིན་མོ་འདི་ལ། དགའ་འབོད་མི་སྒྲོགས་རང་དབང་མི་འདུག  ཉིན་མོ་འདི་ལ། གླུ་དབྱངས་མི་ལེན་རང་དབང་མི་འདུག