Category talk:བོད་པའི་དགོན་སྡེ།

Page contents not supported in other languages.
ཡོང་ཁུངས་Wikipedia

ཆ== ཆོས་གླིང་རྡོ་རྗེ་དགོན། ==

བསྡུས་མིང་། ཆོས་གླིང་རྡོ་རྗེ་དགོན།

རྒྱས་མིང་། དཔལ་ཆོས་གླིང་རྡོ་རྗེ་དགོན་བསམ་འགྲུབ་བདེ་ཆེནདར་རྒྱས་གླིང་།

རྒྱ་ནག་སྐད་དུ། 曲朗多杰寺

དབྱིན་ཇིའི་སྐད་དུ། Choeling Dorje Gon

༄༅། །ཆོས་སྡེ་འདི་ནི་མདོ་ཁམས་སྟོད་ཀྱི་ཟུར་མང་། རབ་སྨད་ཡུལ་ཚོའི་མོ་གྲོང་ནས་ཤར་དུ་སྤྱི་ལེ་༡༦བགྲོད་པའི་སར་བཞུགས་ཤིང་། དཔལ་ལྡན་ས་ངོར་གྱི་ལུང་རྟོགས་བསྟན་པའི་ཕྱག་ལེན་དྲི་མ་མེད་པ་འཛིན་ཅིང་། ཆོས་རྒྱལ་འགྲོ་མགོན་འཕགས་པ་བློ་གྲོས་རྒྱལ་མཚན་གྱིས་རབ་བྱུང་ལྔ་པའི་མེ་ཡོས་(༡༢༦༧)ལ་ཕྱག་བཏབ་སྟེ། དེ་ཡང་ཧོར་གོང་མ་ཆེན་པོས་གདན་དྲངས་པ་ལྟར་རབ་བྱུང་བཞི་པའི་ཤིང་འབྲུག་(༡༢༤༤)ལ་འཇམ་མགོན་ས་སྐྱ་པཎྜི་ཏ་ཀུན་དགའ་རྒྱལ་མཚན་དང་། ཆོས་རྒྱལ་འགྲོ་མགོན་འཕགས་པ། འགྲོ་མགོན་ཕྱག་ན་རྡོ་རྗེ་བཅས་ཧོར་ཡུལ་དུ་ཆིབས་བསྐྱོད་ནས་དམ་ཆོས་ཀྱི་སྣང་བས་ཧོར་ཡུལ་གསལ་བར་མཛད། ལྕགས་ཕག་(༡༢༥༡)ལ་འཇམ་མགོན་ས་སྐྱ་པཎྜི་ཏ་ཞི་བར་གཤེགས་ཏེ་འགྲོ་མགོན་འཕགས་པས་ཧོར་གོང་མའི་དབུ་བླ་མཛད་ནས་བོད་དུ་ཞབས་སོར་སྐྱོད་པའི་སྐབས་སུ། ད་ལྟའི་དགོན་པའི་བྱང་ཤར་གྱི་རྒྱང་གྲགས་མཚམས་སུ་རྡོ་རྡོ་འགག་ཅེས་ཤིན་ཏུ་དོག་པའི་བྲག་གཉིས་བར་ནས་ཆུ་བོ་བཞུར་བ་དེར་། དགེ་བསྙེན་དང་ལམ་འདྲེ་མ་རུང་པ་ཞིག་གནས་པས་རྒྱུན་པར་ལམ་མགྲོན་དག་ལ་གནོད་འཚེ་བྱས་ཏེ། སྐབས་འགར་བྲག་གཉིས་ཁ་རྡེབ་པ་དང་སྐབས་འགར་ཆུ་བོ་རྒྱས་ནས་མི་ཕྱུགས་ཆུས་ཁྱེར་བ་སོགས་བྱེད་པ་ན། མངོན་སྤྱོད་ཀྱིས་འདྲེ་སྲིན་དེ་བཀུགས་ནས་ལམ་རྒྱུད་དུ་བྲག་ཕུག་གཅིག་ཏུ་མནན། རྡོ་ཡིས་བྲག་ཁུང་ཁ་བརྒྱབ་པ་དང་རྩིག་རྡོ་འདམ་བཞིན་སྦྱར་བ་ད་ལྟ་མཇལ་དུ་ཡོད་ཅིང་། དགེ་བསྙེན་གཡག་རག་པ་ཞོན་མཁན་ཞིག་ཡོད་པ་དེས་ཀྱང་སྲོག་གི་སྙིང་པོ་ཕུལ་ནས་འགྲོ་བ་ཀུན་ལ་གནོད་པ་མི་བྱེད་པ་དང་སངས་རྒྱས་ཀྱི་བསྟན་པ་བསྲུང་བར་ཁས་བླངས་པས་སྒྱོག་པོ་ཟེར་བའི་གཞི་བདག་ཏུ་མངའ་གསོལ་ཅེས་གྲགས། དགོན་སྡེ་འདིའི་ཡུལ་ལྷའི་བསང་མཆོད་དུ་འདི་ཉིད་ཡོད། འཕྲང་འགག་དེ་ནས་ཅུང་ཞིག་ཕེབས་ཏེ་ཉི་འགྲུས་ཞེས་ད་ལྟའི་དགོན་གནས་ནས་རྒྱང་གྲགས་ཕྱེད་ཙམ་གྱི་ས་ན། འདིར་དགོན་པ་ཞིག་བཏབ་ན་དགོངས་ཏེ་གདིང་བ་ས་ལ་འཕངས་པས་གྲྭ་པ་ཞིག་གིས་རིན་པོ་ཆེའི་གདིང་བ་སར་ལྷུང་འདུག་ཟེར་ནས་ཡར་བླངས་ཏེ་ཕུལ་བས་གནས་དེར་རྟེན་འབྲེལ་མ་འགྲིགས། དེ་ནས་ཤར་མདའ་ལྟོང་ལྟར་ཕྱེས་པ། ལྷོ་ཕྱི་ནང་ལྔ་རུ་ཟུམ་པ། གཡས་གཡོན་གྱི་ཆུ་གཉིས་གཡུ་འབྲུག་མ་བུ་འདྲེས་པ་བཞིན་ལྷོའི་མདུན་ཐང་དུ་བཞུར་བ། རྒྱབ་རི་ཁེར་ཆོག་རྡོ་རྗེ་ལེགས་པ། གཡས་གཡོན་གཉིས་ནས་མཇལ་ན་གླང་ཆེན་ནོར་བུས་བརྒྱན་འདྲ། མདུན་ནས་མཇལ་ན་རྒྱལ་པོ་ལ་ཐོད་ཅན་གདན་ལ་བཞུགས་འདྲ། གཡས་རི་ལ་རི་གཡང་ནགས་རྒྱལ་ཕྱུག་མོ་ཞེས་བཙུན་མོས་བྲང་རྒྱན་བཏགས་འདྲ། གཡོན་རི་བྲག་དཀར་ཉི་མ་ལྷ་རྩེ་ཞེས་གངས་སེང་གནམ་དུ་འཕྱོ་འདྲ། མདུན་རི་སོབ་རོང་རིན་ཆེན་སྤུངས་པ་ཞེས་ཁྲོ་ཕུར་གྱེན་དུ་བསླངས་འདྲ། གནམ་བཀོད་ལེགས་འཁོར་ལོ་རྩིབས་བརྒྱད་འདྲ་བ། ས་བཀོད་ལེགས་པདྨ་འདབ་བརྒྱད་འདྲ་བའི་དབུས། བཀྲ་ཤིས་ཤིང་ཉམས་དགའ་བ། ཐོས་ན་ཡིད་སྨོན་འཆོར་ལ་མཐོང་ན་སྤྲོ་བ་འཕེལ་བ། ཁོར་ཡངས་ཤིང་བག་བྲོ་བ། ས་ཡི་དགེ་བཅུ་ཡོངས་སུ་ཚང་བ་ད་ལྟའི་དགོན་གནས་འདིར་ཕེབས་པ་དང་བུད་མེད་ཅིག་གིས་གྲོ་མ་རྐོ་བཞིན་ཡོད་པ་ལ། ཉིད་ཆིབས་ལས་བཞོལ་ཏེ་བདག་གིས་འདིར་ལྷ་ཁང་ཞིག་བཞེང་དགོས་པས་ཁྱོད་ཕར་སོང་གསུངས་པས། བུད་མེད་དེས་མ་འདོད་པའི་སྒོ་ནས་ང་ཡི་གྲོ་མ་བརྐོ་སའི་མུ་ནང་དུ་ཁྱེད་ཀྱིས་ཀ་བ་བརྒྱ་ཅན་གྱི་ལྷ་ཁང་བཞེང་ས་འདུག་ཟེར་ནས་མོ་ཡར་ལངས་ཏེ་སོང་བས་རྟེན་འབྲེལ་ཤིན་ཏུ་ལེགས་དགོངས་ནས་དགོན་ས་འདི་བཏབ་པ་དང་། ནང་རྟེན་དུ་སངས་རྒྱས་མར་མེ་མཛད་ཀྱི་རིང་བསྲེལ་མཐོ་ཚད་མི་ཡི་ལག་སོར་ལྔ་ལ་ཉེ་བ། ལག་པས་ཁྱུད་ནུས་ཙམ་རིང་བསྲེལ་གྱི་ཨ་མ་ཡང་ཞུ་ཞིང་། རྒྱུན་པར་དེ་ལས་རིང་བསྲེལ་ཆེ་བ་ལུག་རིལ་ཙམ་དང་ཆུང་བ་ཏིལ་འབྲུ་ཙམ་འཁྲུངས་པ། (འདི་༡༩༥༩ལོར་རང་དགོན་གྱི་སྤྲུལ་སྐུ་ཆོས་གླིང་ཤཀ་གྲགས་སྐུ་གཤེགས་ཁར་ཉིད་ཀྱིས་གསོལ་བ་དང་མི་གཞན་ལ་གནང་བ་སོགས་མཛད་ཅིང་ལྷག་མ་གར་ཡོད་ཆ་མ་འཚལ།)

ཧོར་གྱི་རྒྱལ་པོས་ཆོས་དུང་དཀར་མོ་རྒྱང་གྲགས་ཆ་གཅིག་ཕུལ་བ་ལས། གཅིག་དགོན་འདིར་འཕྲོད་ཐབས་བྱ་གསུངས་པ་ལྟར་ཉིད་ཕེབས་ནས་ལོ་གཉིས་འགོར་བའི་གཟའ་སྐར་དགེ་བའི་ཉིན་ཆོས་དུང་འདི་མཁའ་ལས་བབས་ཏེ། དགོན་དཀྱིལ་དུ་གྱེན་ལ་ལངས་ནས་བཞུགས་པ་བླ་གྲྭ་ཀུན་གྱིས་མཇལ་བ་འགྲོ་མགོན་ཆོས་རྒྱལ་འཕགས་པས་རྫུ་འཕྲུལ་གྱི་སྒོ་ནས་གནང་བ་མཁྱེན་ཏེ་བདག་གཉེར་བྱས། ཆོས་དུང་འབབ་ས་དེར་རྡོ་ཡི་སྟེགས་བུ་ལ་པད་སྤུངས་བཟོས་ཏེ་དུང་ཐོ་ཞེས་མཚན་གསོལ། དེ་ཕྱིན་མི་ནོར་ལ་ཉེར་འཚེ་བྱུང་སྐབས་འདུས་སྡེས་ཤེས་རབ་ཀྱི་ཕ་རོལ་ཏུ་ཕྱིན་པའི་མདོ་གསུང་བཞིན་ཆོས་དུང་འདི་བུས་ན་ཉེར་འཚེ་མཐའ་དག་ལས་གྲོལ། དུང་གཤོག་གསོལ་རྩིས་ཐེངས་གསུམ་ཞུས་ཀྱང་མ་བཞེས། རྗེས་མའི་ཚེ་བུ་ག་བརྟོལ་བ་ན་མགར་བ་ལ། ཨ་ཚ་དམ་ཉམས་ཞེས་པའི་མི་སྐད་བརྗོད་པར་གྲགས། བུ་ག་བརྟོལ་བ་ད་ལྟ་མཇལ་དུ་ཡོད། དཀར་ཡོལ་རིན་ཆེན་འབྲུག་བརྒྱ་མ་ཞེས་ཕྱི་ནང་གང་ནས་བལྟས་ཀྱང་འབྲུག་ཆ་གཅིག་དཀར་ཡོལ་གྱི་མཐའ་རུ་སྣང་ཡང་ཕྱི་ནང་གཉིས་ཀར་འབྲུག་རིས་བྲིས་མེད་པ། མིང་ལ་དཀལ་ཡོལ་བཏགས་ཀྱང་དོན་དུ་རྒྱུ་ཅི་ལས་གྲུབ་པ་སུས་ཀྱང་ཁ་ཚོན་མ་ཆོད་པ་ཞིག །འདི་ཆོས་འཕགས་ལ་ཕུལ་བའི་ཞུ་གསོལ་གཉིས་ཏེ། གཅིག་ནི་མི་སྤྱིར་བཏང་བ་ཞིག་གིས་ཕུལ་ཅེས་པ་དང་། ཞུ་གསོལ་གཞན་ཞིག་ནི། ཧོར་གྱི་རྒྱལ་པོ་མུང་ཁེས་རབ་བྱུང་བཞི་པའི་ཆུ་བྱི་(༡༢༥༢)ལོར་ཉམས་སད་དུ་གསོལ་སྣོད་འདིར་དུག་དྲངས་པ་འཕགས་པས་མཁྱེན་ཏེ། རིན་ཆེན་འབྲུག་བརྒྱ་ཡིད་འོང་ལྡན་པ་རུ། །དཔག་བསམ་ཤིང་གི་བཅུད་ཀྱིས་ལེགས་བསྐངས་ནས། །ལྕེ་བདེ་བློ་གསལ་འགྲོ་རྣམས་འཇོམས་མཛད་པའི། །རྩ་བའི་བླ་མ་མཉེས་ཕྱིར་མཆོད་པ་འབུལ། །ཅེས་བྱིན་གྱིས་བརླབས་ཏེ་དུག་བདུད་རྩི་རུ་བསྒྱུར་བར་གྲགས། རོལ་མོ་ཚངས་པའི་སྒྲ་དབྱངས་བྱ་ཁུར་མའམ་བསྡུས་མིང་ལ་བྱེས་རོལ་བྱ་ཁུར་མ་ཡང་ཟེར་བ། རོལ་མོའི་སྦུབས་ངོས་སུ་བྱ་སྡེར་གྱིས་བཅངས་རྗེས་གསལ་བ་ཆོས་འཕགས་བྱེས་སུ་ཕེབས་སྐབས་འཛིན། ཧོར་རྒྱལ་པོས་ཆོས་འཕགས་ལ་ཕུལ་བའི་གདུགས་དཀར་མོ་རྩིབས་བརྒྱ་མ་ཞེས་རྩིབས་བརྒྱ་དང་ལྡན་ཅིང་འཚེམ་འཐག་ལས་གྲུབ་པ། རྔ་དྲེལ་རྗེས་མ་ཞེས་རྔ་ཡི་ངོས་སུ་དྲེལ་གྱི་རྗེས་ཅན། གཞན་ཡང་རྒྱ་གླིང་དང་མཆོད་ཆ་སྣ་ཚོགས་ཆོས་རྒྱལ་འགྲོ་མགོན་འཕགས་པས་གནང་བ་རྣམས་རྒྱུན་པར་གཏན་སྒམ་དུ་བཞུགས་སུ་གསོལ། དཔལ་ས་སྐྱའི་གོང་མ་རིན་པོ་ཆེ་དང་ངོར་ཨེ་ཝཾ་ཆོས་ལྡན་པའི་ཁྲི་ཆེན་རྣམས་ཕེབས་སྐབས་གཡང་སྐྱབས་བཅས་ཏེ་གཏན་སྒམ་སྒོ་ཕྱེས་ནས་མཇལ་བ་ལས་དམ་ཕྲུག་གི་རྒྱ་བཏབ་ཡོད། གཞན་ཡང་ཆོས་འཕགས་ལ་ཧོར་གྱི་གོང་མས་ཕུལ་བའི་གོས་ཆེན་ལ་རྒྱ་བོད་ཧོར་གསུམ་སྐད་ཤན་སྦྱར་གྱིས་འཚེམ་བཟོ་བྱས་ནས་ཆོས་གླིང་རྡོ་རྡོ་དགོན་འདི་ཉིད་གཞན་ལས་ལྷག་པའི་ཆེད་རྟགས་དང་། བླ་མ་རྒྱལ་སྲས་ཏེ་ལས་ཚན་བཅུ་གསུམ་གྱི་ནང་ཚན་ཆོས་གླིང་རྡོ་རྗེ་འབྱུང་གནས་ལ་རམ་པཀྴིའི་ཐོབ་ཐང་བདག་རྐྱེན་གྱི་བཅའ་ཡིག་བཅས་ཡོད་ཕྱིར་རྒྱལ་རབས་རིམ་བྱུང་གི་གཟིགས་སྐྱོང་ཡོད། ཆོས་འཕགས་ཕེབས་སྐབས་འབོ་ཐོག་རེ་རེ་བཏབ་སྟེ་ཤིང་གི་དངོས་གྲུབ་གནང་བ་ནས་འབོ་ལོ་ཡར་འདབ་མར་འདབ་ཅེས་དགོན་སྡེ་ལ་ཤིང་ཇི་ཙམ་དགོས་ཀྱང་ཡོད་ཅིང་། དེ་ཕྱིན་ས་ལ་བྱིན་ཆགས། བྱིན་ལ་གཡང་ཆགས་ནས་དགོན་པ་ལ་ཞིང་ཁལ་༩༠༠ལྷག་ཡོད་པ་ལ་བཙའ་སད་སོགས་ཀྱི་གནོད་པ་མེད།

དགོན་སྡེ་འདིའི་སྤྲུལ་སྐུ་རིམ་བྱོན་ནི། བླ་མ་ཆོས་གླིང་རྒྱལ་སྲས་ལ་ཆོས་གླིང་པཀྴི་རྡོ་རྗེ་འབྱུང་གནས་དང་། རྒྱལ་སྲས་ཐོག་རྡུགས། རབ་ཤིས་ཁྲ་འཇིགས་སོགས་དང་། ཆོས་གླིང་རྒྱལ་སྲས་སྐུ་ཕྲེང་བཅོ་བརྒྱད་པ་ངག་དབང་དམ་ཆོས་རྒྱལ་མཚན་དགུང་ལོ་བཅོ་ལྔ་པ་ལ་དཔལ་ས་སྐྱའི་བདག་ཆེན་རིན་པོ་ཆེས་ངོས་འཛིན་གནང་། རྒྱལ་བ་ལྷ་ལས་བབས་པའི་དུས་ཆེན་ཉིན་ཁྲི་ལ་མངའ་གསོལ། དགུང་ལོ་བཅུ་བདུན་བར་འབྲི་ཀློག་དང་ཆོས་སྤྱོད་སྐོར་གསན་སྦྱངས་མཛད། གླེ་མདའི་བླ་མ་བྱང་ཆུབ་རྡོ་རྗེ་ལས་ས་སྐྱའི་ཞེན་པ་བཞི་བྲལ་དང་སྣང་གསུམ་རྒྱུད་གསུམ་བཅས་ལམ་འབྲས་ཚོགས་བཤད། མགོན་པོ་དང་འཇིགས་བྱེད་ཀྱི་བསྐྱེད་རྫོགས་སོགས་གདམས་ངག་མང་དུ་ཞུས། ཀྱེེ་རྡོར། ཀུན་རིག །ས་འཇམ་སྦགས་སྒྲུབ་སོགས་ལོ་གསུམ་ལ་སྒྲུབ་པ་མཛད། ཤང་དགོན་གྱི་ཁྲོམ་ཐར་མཁན་པོ་ཡེ་ཤེས་བཟང་པོ་ལས་ལམ་འབྲས་ཚོགས་བཤད་དང་། སྒྲུབ་ཐབས་ཀུན་བཏུས་སོགས་ཞུས། ངོར་ཀླུ་ལྡིང་མཁན་ཆེན་འཇམ་དབྱངས་བསྟན་པའི་ཉི་མ་ལས་དབང་གདམས་ངག་མཐའ་ཡས་པ་གསན། དགུང་ལོ་ཉེར་གཉིས་པ་ལ་རྒྱ་ནག་པེ་ཅིང་དུ་ཕེབས་ཏེ་བོད་བརྒྱུད་མཐོ་རིམ་ནང་བསྟན་སློབ་གླིང་ལས་མཁན་ཆེན་པདྨ་ཚེ་དབང་དང་། བསོད་རྒྱལ། ཤར་གདོང་། ཤིང་བཟའ། ཤེས་རབ། ཚེ་རྣམ། གྲགས་པ། དགེ་འདུན་རྒྱ་མཚོ། ཆུང་བདག །བློ་བརྟན་བཅས་དགེ་རྒན་དུ་བསྟེན་ནས་ས་དགེ་བཀའ་རྙིང་རིས་མེད་ཀྱི་གདམས་ངག་དང་། རྒྱ་ཡིག་དང་ཆབ་སྲིད་སོགས་ཐུན་མོང་གི་རིག་གནས་བཅས་གསན་བསམ་མཛད་ནས་ད་ལྟ་སྐྱེ་རྒུའི་བསོད་ནམས་ཀྱི་དཔལ་དམ་པར་བཞུགས་བཞིན་པའོ། །

བླ་མ་ཤཱཀྱ་གྲགས་པ་དང་བཀྲ་ཤིས་དོན་འགྲུབ་སོགས་ཤཀ་གྲགས་སྐུ་ཕྲེང་བཅུ་བཞི། རག་ར་སྤྲུལ་སྐུ་ཀུན་དགའ་ཆོས་རྒྱལ་སོགས་སྐུ་ཕྲེང་དྲུག་བྱོན།

བསྟན་འཛིན་གྱི་སྐྱེས་བུ་དམ་པ་མང་དུ་བྱོན་པ་ལས་མཆོག་ཏུ་གྱུར་པ་ནི་མཁན་པོ་མཁྱེན་རབ་མཐར་ཕྱིན་ཏེ། ཁོང་ཉིད་རབ་བྱུང་བཅོ་ལྔ་པའི་དཀྱིལ་ཙམ་ལ་ཤར་རྒྱག་ནང་ཞེས་པར་ཡབ་པད་ཆུང་དང་ཡུམ་ག་སྒོང་གི་སྲས་སུ་འཁྲུངས། ཆུང་ངུ་ནས་དམ་པའི་རིགས་སད་ཅིང་ཁྱིམ་དབུལ་བས་ཕྱག་ཕྲེང་མེད་ཀྱང་སྣལ་མ་ལ་མདུད་པ་བརྒྱ་མཛད་དེ་མ་ཎི་གསུང་། དགུང་ལོ་ལྔ་དྲུག་ལ་འབྲི་ཀློག་མཐར་ཕྱིན་པས་བཅུ་གཅིག་པ་ལ་རང་དགོན་དུ་གཙུག་ཕུད་ཕུལ་ཏེ་དགེ་བསྙེན་གྱི་སྡོམ་པ་བཞེས། སློབ་ལ་དགྱེས་ཕྱིར་ཟུར་མང་མཁན་པོ་པདྨ་རྣམ་རྒྱལ་གྱི་མཚན་གསན་མ་ཐག་མི་ཕྱེད་པའི་དད་པ་འཁྲུངས་ཏེ་རྣམ་རྒྱལ་རྩེའི་ཆོས་གྲྭར་ཕེབས། དགུང་ལོ་བཅོ་ལྔ་ནས་བཟུང་མཁན་པད་རྣམ་ལས་མདོ། འདུལ་བ། མངོན་པ། ས་སྐྱའི་ཞེན་པ་བཞི་བྲལ། ས་པཎ་གྱི་མཁས་འཇུག་དང་སྡོམ་གསུམ་རབ་དབྱེ་སོགས་ཐུན་མོང་དང་ཐུན་མོང་མ་ཡིན་པའི་རིག་གཞུང་ལ་གསན་བསམ་མཛད། དགུང་ལོ་ཉེར་གཉིས་པ་ལ་ངོར་ཨེ་ཝྃ་ཆོས་ལྡན་དུ་ཕེབས་ནས་བསྙེན་པར་རྫོགས་ཤིང་ལམ་འབྲས་བུ་དང་བཅས་པའི་བཀའ་ཆོས་དབང་མན་ངག་རྣམས་གསན། དེ་ནས་སླར་ཕེབས་ཏེ་དགུང་ལོ་ཉེར་ལྔ་ནས་བཟུང་སྟེ་མཁན་པོ་པད་རྣམ་ལས་གསན་སྦྱངས་དཔྱིས་ཕྱིན་པ་མཛད། དགུང་ལོ་ཞེ་གསུམ་པ་ལ་མཁན་དེ་ཉིད་འདའ་ཁར་ཉིད་ཀྱི་རྒྱལ་ཚབ་ཏུ་མངའ་གསོལ། དགུང་ལོ་ཞེ་བཞི་པ་ལ་འབྲི་ཆུའི་ཕྱོགས་སུ་ཕེབས་ཏེ་མངོན་པའི་ཆོས་སྐོར་གསན། ཞེ་ལྔ་པ་ནས་ཟུར་མང་བཤད་གྲྭ་མི་ལོ་ཉེར་གཅིག་ཙམ་བསྐྱངས་པས་ཟུར་མང་གར་དབང་དང་། བསྟན་སྤྲུལ། འབྲུག་སྤྲུལ། ལྷོ་ཀུན་བཟང་། གནས་མདོ་ཁྲ་འཇིགས། རྡོ་དགོན་མཁན་པོ་ཀུན་དགའ་རྣམ་རྒྱལ། ཟུར་མང་མཁན་པོ་ལེགས་བརྩེ། མཁན་འཇམ་དབྱངས་མཁྱེན་རབ། མཁན་ཕུར་དྷིས། མཁན་འཆི་མེད་རབ་བརྟན། མཁན་ཆོས་དབྱིངས་བཟང་པོ། མཁན་ཚེ་རིང་འགྱུར་མེད། མཁན་འགྱུར་གྲགས། མཁན་ཀརྨ་ཚེ་བརྟན། མཁན་པདྨ་བཀོད་པ། འབྲུག་ཡུལ་མཁན་པོ། མཁན་སྐྱོ་བྲག་མི་འགྱུར། ཤང་ཐོ་སྤྲུལ་སྐུ་སོགས་མཁས་གྲུབ་གཉིས་ལྡན་གྱི་སློབ་མ་མང་པོ་བྱུང་། ཟུར་མང་བཤད་གྲྭ་སླར་གསོ་དང་བཤད་གྲྭའི་གཙུག་ལག་ཁང་རྒྱ་བསྐྱེད་མཛད། རྫོགས་ཆེན་ཀ་དག་ཁྲེགས་ཆོད་དང་། སྒྲ་གཞུང་། སྙན་ངག་འགྲེལ་བ། རྩིས་གཞུང་སོགས་ཕྱག་རྩོམ་གླེགས་བམ་དུ་མ་མཛད་ཀྱང་། ད་ལྟ་ཉམས་མགུར་སྣ་ཚོགས་དང་མངོན་པའི་ས་བཅད་རིན་ཆེན་ཕྲེང་བ་སོགས་ཁ་ཤས་ལས་མ་བཞུགས་པར་འཇའ་གཟུགས་སུ་དེངས། དེ་ནས་རང་དགོན་དུ་ཕེབས་ཏེ་བྲག་དཀར་ལྷ་རྩེ་ལ་བཅད་རྒྱར་བཞུགས་པས་ཉམས་རྟོགས་ཀྱི་ཡོན་ཏན་མང་དུ་འཁྲུངས། དཔལ་ས་སྐྱའི་བདག་ཆེན་ངག་དབང་ཀུན་དགའ་བསོད་ནམས་ཕེབས་སྐབས་གསུང་གླེང་མཛད་པས་གོང་མ་རིན་པོ་ཆེ་ཐུགས་ཤིན་ཏུ་དགྱེས་ཏེ། ངོར་པའི་མཁན་ཆེན་དགོས་ཚུལ་གྱི་བཀའ་ལུང་བསྩལ་ཀྱང་དུས་དབང་གིས་ཕེབས་མ་ཐུབ། མཁན་ཆེན་ཉིད་ཀྱི་ཐུགས་བཞེད་ལྟར་འདུ་ཁང་ཀ་བ་དྲུག་ཅུའི་ས་ཁྱོན་ཅན་གསར་བཞེངས་དེ་ས་ཁྱི་ལོའི་སྟོན་ཀར་གྲུབ་སྟེ་རབ་གནས་མཛད་རྗེས་གཟུགས་སྐུའི་བཀོད་པ་བསྡུས་པའི་གདུང་ལས་རིང་བསྲེལ་སོགས་བྱོན། ཞག་ཤས་སོང་རྗེས་དགོན་ནང་དུ་དམག་སླེབས་པས་སྐྱེ་འཆིར་རང་དབང་ཐོབ་པ་ཀུན་གྱིས་སྒྲོགས་སོ། །

དགོན་པ་ཐོག་མར་བཏབ་ནས་བཞེངས་པའི་ལྷ་ཁང་གསེར་ཁང་ཞེས་པ་ལ་ཀ་བ་༢༠ ཁྱམས་ངོས་དང་ཐང་ཁང་ཡུག་གཅིག་གྱང་གསེར་ཤར་བྱུགས་བྱས་པ་ལ་སངས་རྒྱས་ཤཱཀྱ་ཐུབ་པའི་སྐུ་འབུམ་ཕྲག་གཅིག་དང་། ཡི་དམ། ཆོས་སྐྱོང་སོགས། ཐང་ཁང་ལ་དྲུག་པ་རྡོ་རྗེ་འཆང་ཆེན་དང་། རྒྱ་གར་གྲུབ་ཆེན་བརྒྱད་ཅུ། རྒྱན་དྲུག་མཆོག་གཉིས། ས་སྐྱ་གོང་མ་རྣམ་ལྔ་སོགས། སྒོ་ཁྱམས་སུ་རྒྱལ་ཆེན་སྡེ་བཞི་དང་རི་རབ་ཆོས་འཁོར། སྲིད་པའི་འཁོར་ལོ། ཡུལ་ལྷ་གཞི་བདག །བཀའ་སྲུང་དམ་ཅན་སོགས་ཀྱི་བྲིས་སྐུ། དུས་གསུམ་སངས་རྒྱས་ཀྱི་གསེར་སྐུ་ཐོག་རྩེག་ཕྱེད་གཉིས་རེ། སངས་རྒྱས་ཤཱཀྱ་ཐུབ་པའི་སྐུ་རང་བྱོན། གསེར་དངུལ་གྱིས་བྲིས་པའི་འབུམ་པུ་ཏི་བཅུ་གཉིས། གཞན་གསེར་གདུང་སོགས་དང་རྒྱལ་སྲས་སྤྲུལ་སྐུ་ཐོག་རྡུགས་ཀྱི་ཐོག་ཆུ་འོད་ཆེམ་མེར་ཡོད་པ་སོགས་བཞུགས། ལྷ་ཁང་འབྲིང་བ་ལ་ཀ་བ་༢༨ གྱང་ངོས་སུ་སངས་རྒྱས་ཤཱཀྱ་ཐུབ་པའི་སྐྱེས་རབས་རྣམ་ཐར་རྒྱས་པ་དང་། རིགས་ལྔའི་ཞིང་བཀོད། ཡི་དམ་ཀྱེེ་ཡི་རྡོ་རྗེ། དཔལ་གསང་བ་འདུས་པ། འཁོར་ལོ་བདེ་མཆོག །མཁའ་འགྲོ་མ་སེངྒེའི་གདོང་པ་ཅན། ཕྱག་ན་རྡོ་རྗེ་འབྱུང་པོ་འདུལ་བྱེད། གུར་ལྕམ་དྲལ་གསུམ། རྡོ་རྗེ་འཆང་ལ་རྒྱ་གར་གྲུབ་ཆེན་བརྒྱད་ཅུས་བསྐོར་བ། ས་སྐྱ་གོང་མ་རྣམ་ལྔ། ངོར་ཨེ་ཝཾ་ཆོས་ལྡན་གྱི་བླ་བརྒྱུད། སྒོ་ཁྱམས་སུ་རྒྱལ་ཆེན་སྡེ་བཞི་དང་རི་རབ་ཆོས་འཁོར། སྲིད་པའི་འཁོར་ལོ། ཡུལ་ལྷ་གཞི་བདག་སོགས་ཀྱི་བྲིས་སྐུ། ཟངས་གསེར་ལས་གྲུབ་པའི་སངས་རྒྱས་གཙོ་འཁོར་གསུམ་མི་ཚད་ཙམ་རེ་དང་། གསེར་གདུང་། ཡི་དམ་ཀྱེེ་རྡོར་གྱི་ལི་སྐུ་མི་ཚད་ཙམ། བཀའ་གདམས་མཆོད་རྟེན། རྒྱལ་བའི་བཀའ་བསྟན་འགྱུར་སོགས་བཞུགས། ལྷ་ཁང་ཆེ་བ་ལ་ཀ་བ་༦༠ཅན་རབ་རྒྱལ་ཤིང་རྟ་(༡༩༥༤)ནས་བཞེངས་པ་ས་ཁྱི་(༡༩༥༨)ལ་གནམ་རྒྱན་དང་། མདོ་གཅལ། ཚོན་བཟོ་སོགས་མ་གཏོགས་ཕལ་ཆེར་གྲུབ། གཞན་ཀུན་རིག་ལྷ་ཁང་དང་། མི་ལའི་ལྷ་ཁང་། དཔེ་མཛོད་ཁང་བཅས་སུ་སྐུ་གསུང་ཐུགས་རྟེན་ཁྱད་པར་ཅན་སྣ་ཚོགས་དང་། བཀའ་གསར་རྙིང་གི་པོད་སྣ་ཚོགས། ས་ངོར་གྱི་གསུང་རྣམ་ཐར་སྣ་ཚོགས། ཁྱད་པར་བོད་ཀྱི་མཁས་དབང་རིས་མེད་ཀྱི་གསུང་འབུམ་སྣ་ཚོགས་བཅས་བཞུགས།

གཞན་ཡང་མགོན་ཁང་སྒྲུབ་ཁག་དང་། བུམ་ཁང་སྒྲུབ་ཁག །ངོར་པའི་སྒྲུབ་ཁག །ལྷ་རྗེའི་སྒྲུབ་ཁག །རག་རའི་སྒྲུབ་ཁག །ཁ་སྟག་སྒྲུབ་ཁག་བཅས་སྒྲུབ་ཁག་དྲུག་བཞུགས་པ་ལས་མགོན་ཁང་སྒྲུབ་ཁག་ཁོ་ནའི་རྟེན་ལའང་། གུར་ལྕམ་དྲལ་གསུམ་དང་པུ་ཊ་མིང་སྲིང་བཅས་ཀྱི་སྐུ་བརྙན་ཚད་ལྡན་སྨན་འདག་ལ་བཟོས་ཏེ་ངོར་ཨེ་ཝཾ་ཆོས་ལྡན་ནས་གདན་དྲངས་པའི་ཞལ་འབག་གསོལ་ཏེ་བཞེངས་པ་དང་། དཔལ་ས་སྐྱ་ནས་གདན་དྲངས་པའི་དམ་རྫས་ལས་བཟོས་པའི་དམ་ཅན་པུ་ཊའི་ཞལ་འབག །ཡི་དམ་རྡོ་རྗེ་གཞོན་ནུའི་ཞལ་འབག །གཞན་ཡང་ཆོས་སྐྱོང་སྲུང་མ་རྣམས་ཀྱི་ཞལ་འབག །ལི་མའི་སྐུ་འདྲ་གྲངས་མང་། བཀའ་གདམས་པའི་མཆོད་རྟེན། ཟངས་གསེར་ལས་གྲུབ་པའི་བླ་མ་དང་ཡི་དམ། སངས་རྒྱས། བྱང་སེམས། ཆོས་སྐྱོང་བཅས་ཀྱི་སྐུ་འདྲ། གནའ་བོའི་ཁྲབ། རྨོག །ཕུབ། མདུང་། སྟ་རེ། ཤང་ལང་། མདའ། གཞུ། མེ་བོའུ། གྲི་སོགས་གོ་ཆ་སྣ་ཚོགས། གཅན་གཟན། རི་དྭགས། སྒོ་ཕྱུགས་སོགས་ཀྱི་གསོབ་སོགས་མཆོད་རྫས་མ་ཚང་བ་མེད་པ་ཡོད་དོ། །དགོན་པའི་སྒྲིག་འཛུགས་ནི། བླ་བྲང་དང་། སྤྱི་ཆེན། དགོན་གཞུང་ཞེས་གཙོ་བོ་སྡེ་ཚན་གསུམ་ཡོད། དེ་ལས་བླ་བྲང་གིས། བླ་བྲང་ཁག་གསུམ་དང་མགོན་བླ་གཉིས་ལ་ཉིན་བཞིན་ཇ་མེ་མདུན་དུ་སྐྱེལ་བ་དང་། འབྲུ་རིགས། མར། ཇ། ཤ་བཅས་ཀྱི་ཟས་ཕོགས་སྤྲོད་དགོས། དགོན་འདིའི་རྟ་དྲེལ་ཡོངས་རྫོགས་འཚོ་བ་དང་། དགུ་ཆུང་ཚོགས་པའི་སྐབས་དགེ་འདུན་རྣམས་ལ་བསོད་སྙོམས་འབུལ་དགོས་པས། བླ་མ་གསུམ་དང་མགོན་བླར་ཕུལ་བའི་དངོས་པོ་ཕྱེད་སུམ་ཆ་གཅིག་ཐོབ་སྐལ་ཡོད། སྤྱི་ཆེན་གྱིས། བུམ་ཁང་སྒྲུབ་ཁག་ལ་ནམ་རྒྱུན་ཇ་མེ་སྤྲོད་པ་དང་། ལོ་རེ་བཞིན་འབྲུ་རིགས་དང་། ཇ་མར། ཤ་བཅས་ཀྱི་ཕོགས་སྤྲོད་རྒྱུ། དམར་ཆེན་ཞེས་པའི་དུས་མཆོད་སྐབས་དགེ་འདུན་ལ་བསོད་སྙོམས་འབུལ་དགོས་པས་དགོན་པ་ལ་རིམ་གྲོ་མཆོད་འབུལ་གྱི་ཡོན་ཕུལ་བ་རྣམས་དབང་། དགོན་གཞུང་ཞེས་བླ་བྲང་དང་སྤྱི་ཆེན་གང་ལའང་མ་ལྟོས་པར་དགོན་གཞུང་ལ་འབུལ་བསྟོད་ཞབས་ཏོག་ཡོད་པ་རྣམས། དགོན་པའི་ཕྱག་མཛོད་ཆེན་མོས་རྩིས་ལེན་ཐོ་འགོད་དང་། སྤྱོད་བཟང་གཞུང་དྲང་ཅན་གྱི་གྲྭ་པ་ཞིག་ལ་བདག་གཉེར་བྱེད་དུ་བཅུག་སྟེ་དགོན་གཞུང་གིས་རྟེན་བཞེངས་སོགས་འགྲོ་གྲོན་རྣམས་གཏོང་བ་མི་ཆེན་བླ་དཔོན་ཐུན་མོང་གིས་གོ་བསྡུར་བྱེད། ས་ཁྱི་ལོའི་དུས་ཟིང་གི་ཡར་སྔོན་དུ་བླ་གྲྭ་༡༡༣(ཡིག་ཚགས་ལྟར་)དང་། འདུ་ཁང་གསུམ་ལ་ཀ་བ་༡༩༢ ལྷ་ཁང་ཁག་བདུན་ལ་ཀ་བ་༨༦ ཇ་ཁང་སོགས་ཁག་བཅུ་གསུམ་ལ་ཀ་བ་༥༠ གྲྭ་ཤག་༦༥བཅས་ལ་འཛུགས་སྐྲུན་རྒྱ་ཁྱོན་སྤྱི་ཁྲུ་གྲུ་བཞི་མ་༨༥༡༠ སྐུ་འདྲ་༨༠༠ལྷག །གསུང་རབ་པོད་༢༠༥༠ལྷག །ཞལ་ཐང་༡༥༠༠ལྷག །མཆོད་ཆས་སྣ་གྲངས་༢༣༠༠ལྷག །དགོན་གཞུང་གི་སྤྱི་རྩ་ལ་ས་ཞིང་ཁལ་༩༠༠སྐོར་དང་། ནོར་༢༠༠ལྷག །རྟ་དྲེལ་༧༠ཙམ། དགུ་ཆེན་སོགས་ལོ་རེར་རྒྱུན་ཚོགས་ཉིན་༡༥༨ཡོད། སྐབས་བཅུ་གཅིག་པ་ཐེངས་གསུམ་པའི་ཚང་འཛོམས་གྲོས་ཚོགས་ཀྱི་ཚུན་དུ་མི་རིགས་ཆོས་ལུགས་དད་མོས་རང་དབང་གི་སྲིད་ཇུས་སོགས་རིམ་བཞིན་དོན་འབབ་བྱུང་བ་དང་བསྟུན་ཏེ། ༡༩༨༨ལོའི་ཟླ་༣ཚེས་༨ཉིན་ཆོས་སྒོ་འབྱེད་པའི་ཆོག་མཆན་ཐོབ་པ་ལ་གཏན་ཚད་བླ་གྲྭ་༢༠ཡིན། སེར་སྐྱ་ཐུན་མོང་གིས་ཉམས་གསོ་ཞུས་པས་འདུ་ཁང་ཀ་བ་༦༠ ཇ་ཁང་དང་མཛོད་ཁང་ཀ་བ་༦ གྲྭ་ཤག་༢༣བཅས་ལ་འཛུགས་སྐྲུན་རྒྱ་ཁྱོན་སྤྱི་ཁྲུ་གྲུ་བཞི་མ་༢༢༢༠ ནོར་༡༣ སྐུ་འདྲ་༦༤ ཞལ་ཐང་༡༠༩ གསུང་རབ་པོད་༢༩༠ མཆོད་ཆས་སྣ་གྲངས་༡༥༨ དགུ་ཆེན་སོགས་ལོ་རེར་རྒྱུན་ཚོགས་ཉིན་༢༧བཅས་ཡོད།